ကံအကြောင်းတရား

မြေဓာတ်တာအိုကမ္ဘာက သွေးနီရောင်လူငယ်လေးကို ဖိနှိပ်ထားနိုင်လောက်အောင် အားမကောင်းပေ။ ဝမ်ပေါင်လဲ့က ထိုအချက်ကို ကောင်းကောင်း သိထား၏။ သူ့ရည်မှန်းချက်က မြေဓာတ်တာအိုကမ္ဘာအတွင်း အရာအားလုံးကို ပြီးမြောက်စေဖို့ရာအတွက် မဟုတ်ပေ။

သူ လုပ်ဖို့လိုအပ်သည်က ဧကရာဇ်၏ အကြည့်မှ စွမ်းအားကို လျှော့ချဖို့ရာအတွက်သာ ဖြစ်၏။ ဧကရာဇ်၏ အကြည့်က သိသိသာသာ အားနည်းသွားသည်နှင့် သွေးနီရောင်လူငယ်လေး အဆုံးသတ်သွားတော့မည့်အချိန် ရောက်ရှိလာလိမ့်မည်။

“ငါ ဒီတိုက်ပွဲကို နိုင်နိုင်တယ်”

သူက ရေရွတ်လိုက်ပြီးသည့်နောက်တွင် ဝမ်ပေါင်လဲ့က ညာဖက်လက်ကို မြှောက်လိုက်သည့်အချိန် သဲမှုန်များက အတူတကွ စုစည်းသွား၏။ ထို့နောက် မြေကြီးထုထည်လိုမျိုး ကြီးမားသည့် ဧရာမလက်ကြီးတစ်ခု ထွက်ပေါ်လာကာ အသံကျယ်ကြီးများ ထွက်ပေါ်လာသည်။ ထိုအရာက သွေးနီရောင်ဝဲကတော့အပေါ် ကျရောက်လာ၏။

ထိုအသံက မိုးမြေကို တုန်ခါသွားစေပြီး သွေးနီရောင်ဝဲကတော့က ဝမ်ပေါင်လဲ့၏ မြေဓာတ်တာအိုဧရာမလက်ကြီးကြောင့် ခြေမွခံလိုက်ရသည့်အလား ကျုံ့သွားလေသည်။ သို့သော်လည်း သွေးနီရောင်လူငယ်လေးက ထိုသို့မဖြစ်ချင်မှန်း သိသာလှ၏။ သူက အော်ဟစ်ရင်းဖြင့် သွေးနီရောင်ဝဲကတော့ကြီးက ပေါက်ကွဲထွက်သွားကာ နတ်ဧကရာဇ်၏ အကြည့်က ပိုမိုပြင်းထန်လာပြီး ဝမ်ပေါင်လဲ့ကို စိုက်ကြည့်လာသည်။

ထိုအကြည့်တစ်ချက်ဖြင့် မိုးမြေက လှုပ်ခတ်သွားကာ ဝမ်ပေါင်လဲ့ ဖွဲ့စည်းထားသည့် မြေဓာတ်တာအိုလက်ကပင် တုန်ခါသွားပြီး အပိုင်းပိုင်းအစစ ကြေမွသွား၏။ အထဲတွင်ရှိနေသည့် သဲမှုန်များကလည်း ထိုအကြည့်ကို တောင့်မခံနိုင်တော့ဘဲ အမှုန့် ဖြစ်သွားခဲ့သည်။

မြေဓာတ်တာအိုဖြင့် ဖွဲ့စည်းထားသည့် ဧရာမလက်ကြီးက ရှင်းထုတ်ခံလိုက်ရသည်။ ထိုအရာက မိုးမြေကြားမှ ပျောက်ကွယ်သွားသည်နှင့် ဧကရာဇ်၏ အကြည့်က ဝမ်ပေါင်လဲ့အပေါ် ကျရောက်လာသည်။

ဝမ်ပေါင်လဲ့၏ ခန္ဓာကိုယ်က တုန်ယင်သွား၏။ သူ့မျက်လုံးရှေ့ ကွဲပြားသည့် ပုံရိပ်နှစ်ခု ထွက်ပေါ်လာသည်။ တစ်ခုက မဲပိတ်မှောင်နေသည့် နေရာတွင် တင်ပျဉ်ခွေထိုင်နေသည့် ဧရာမပုံရိပ်ကြီးတစ်ခု ဖြစ်၏။ ထိုပုံရိပ်မှ ကြောက်မက်ဖွယ်ဖိအားကို ထုတ်လွှတ်နေသည်။ သူက လက်မြှောက်လိုက်သည့်အခါ စကြဝဠာတစ်ခုလုံး ပါဝင်နေဟန်ပေါ်သည့် အကြည့်တစ်စုံက သူ့ကို အေးစက်စက် ကြည့်လာခဲ့သည်။

သူ့အကြည့်က ရေခဲတစ်မျှ အေးစက်ပြီး ခန္ဓာကိုယ်က နတ်ဘုရားအလား ဖြစ်၏။

တခြားပုံရိပ်ကမူ သွေးနီရောင်ဝဲကတော့အတွင်း ရှိနေသည့် သွေးနီရောင်လူငယ်လေး ဖြစ်၏။ သူ့ဆံပင်က ဖရိုဖရဲဖြစ်နေကာ အမူအရာက ခက်ထန်နေပြီး အကြည့်များက ရူးသွပ်မှုဖြင့် ပြည့်နှက်နေသည်။ ထိုပုံရိပ်နှစ်ခုက ဝမ်ပေါင်လဲ့၏ ဘယ်ဖက်မျက်ဝန်းနှင့် ညာဖက်မျက်ဝန်းတွင် ပေါ်ထွက်လာသည်။ သူတို့က ချက်ချင်းဆိုသလို ထပ်ကာ ပုံရိပ်တစ်ခုအဖြစ် ပြောင်းလဲသွား၏။

သူတို့က ပုံရိပ်တစ်ခုဖြစ်သွားသည်နှင့် ဝမ်ပေါင်လဲ့၏ တစ်ကိုယ်လုံးက တုန်ယင်သွားသည်။ သူ့ခန္ဓာကိုယ်က မဖော်ပြနိုင်လောက်ဖွယ် ခွန်အားဖြင့် ရိုက်ချခံလိုက်ရသလိုမျိုး ဖြစ်၏။ သူ့ဝိညာဉ်နှင့် အသိစိတ်များက ပြိုလဲလုနီးပါး ဖြစ်နေသည်။ တစ်ချိန်တည်းဆိုသလို မြေဓာတ်တာအိုကမ္ဘာက စတင်ပြိုလဲလာ၏။

ကမ္ဘာတစ်ခုလုံးက စတင်ပြိုလဲလာသည်။ သွေးနီရောင်ဝဲကတော့မှ ဆိုးယုတ်သည့် အကြည့်မျိုး ပေးလာစဉ် သွေးနီရောင်လူငယ်လေး၏ ခက်ထန်သည့် အကြည့်က ဝဲကတော့ကို ပိုမိုကြီးမားလာစေ၏။ ထိုအရာက ကမ္ဘာကို ချိုးဖောက်နိုင်တော့မည့်ဆဲဆဲတွင် ဝမ်ပေါင်လဲ့က ရုတ်ချည်းဆိုသလို ဘယ်ဖက်လက်ကို မြှောက်ကာ ရေရွတ်လိုက်သည်။

“ဓမ္မကိုယ်ပွား”

သူက ထိုစကားများကို ရေရွတ်လိုက်သည်နှင့် ဝမ်ပေါင်လဲ့ဝန်းကျင်ရှိ လေထုက ပျက်ယွင်းသွားကာ သူနှင့် တစ်ပုံစံတည်း တူညီသည့် ပုံရိပ်များစွာက ချက်ချင်းဆိုသလို ထွက်ပေါ်လာသည်။ သူတို့က ယခင် သူ့ကျင့်ကြံဆင့်ကို ဖိနှိပ်ဖို့ ဝေခွဲထားသည့် ကိုယ်ပွားများ ဖြစ်၏။

ကိုယ်ပွားများ ပေါ်ထွက်လာသည်နှင့် သူတို့က တောက်ပလာသည်။ သူတို့က ကြောက်မက်ဖွယ် အလင်းရောင်ထွက်ပေါ်နေသည့် နေမင်းသဖွယ်ဖြစ်ကာ သွေးနီရောင်ဝဲကတော့အောက်ဖက်မှ ပြန့်ကျဲလာသည်။

အသံကျယ်ကြီးက ထပ်မံ ထွက်ပေါ်လာပြီး ဝမ်ပေါင်လဲ့၏ ကိုယ်ပွားနှင့် ရင်ဆိုင်ရသည့်အခါ သွေးနီရောင်လူငယ်လေးက အမူအရာ ပြောင်းလဲသွားသည်။ သူက ဝမ်ပေါင်လဲ့နှင့် တိုက်ပွဲအတွင်း အာရုံစိုက်ထားခဲ့ကာ ပင်မခန္ဓာကိုယ်၏ အမြင်အာရုံစွမ်းအားကို နက်ရှိုင်းဖို့ လျှို့ဝှက်နည်းစနစ်တစ်ခုကိုပင် ထုတ်သုံးခဲ့သည်။ သူက တစ်ခါတည်းဖြင့် ကစားပွဲကို ပြောင်းပြန်လှန်ပြီး အနိုင်ယူဖို့ ပြင်ဆင်ထား၏။ ထို့ကြောင့် သူက အာရုံမလွှဲနိုင်ခြင်း ဖြစ်သည်။

ရလဒ်အနေဖြင့် ကိုယ်ပွား၏ သက်ရောက်မှုက သူ့အပေါ် ကျရောက်လာသည်။

အကယ်၍ ဤသို့သာဆိုပါက ကိစ္စကြီးကြီးမားမား မဟုတ်ချေ။

သူက သူတို့ကို ဖိနှိပ်ထားနိုင်ရုံမျှဖြစ်ပြီး ဝမ်ပေါင်လဲ့ကို အာရုံစိုက်ကာ ကြည့်လိုက်ပြီး သူ့ပင်မခန္ဓာကိုယ်၏ အကြည့်အောက် ဝမ်ပေါင်လဲ့၏ ဝိညာဉ် စတင်ပြိုလဲလာအောင် လုပ်ဆောင်ထား၏။

သို့သော်လည်း ကိုယ်ပွားအမြောက်အများ ထွက်ပေါ်လာပြီးသည့်နောက်တွင် ဝမ်ပေါင်လဲ့၏ ကျင့်ကြံဆင့်က ထပ်မံမြင့်တက်သွားသည်။ ပြောရလျှင် ထိုကိုယ်ပွားများက သူ့ကိုယ်ပိုင်စည်းတံဆိပ်များဖြစ်သည့်အတွက် ထိုစည်းတံဆိပ်များကို ဖြေလျော့လိုက်သည့်အခါ ဝမ်ပေါင်လဲ့၏ ကိုယ်ပိုင်ခန္ဓာကိုယ်က မဖော်ပြနိုင်ဖွယ် အလင်းတန်းတစ်ခု ထုတ်လွှတ်လာသည်။ ထိုအရာက အရာအားလုံးကို ထိုးဖောက်နိုင်စွမ်းရှိပြီး ကမ္ဘာ၏ ပထမဦးဆုံးအလင်းရောင်သဖွယ် ဖြစ်နေသည်။

ထိုအလင်းရောင် ဇစ်မြစ်၏ စွမ်းအားပေါက်ကွဲမှုက သွေးနီရောင်လူငယ်လေးကို သက်ရောက်မှုရှိစေပြီး နဂိုအမြင်အာရုံကို ထိန်းထားဖို့ မဖြစ်နိုင်တော့ပေ။ သူ့မြင်ကွင်းက ဖရိုဖရဲဖြစ်လာ၏။

ထို့နောက် အာရုံမစိုက်နိုင်သည့်အချိန် ဝမ်ပေါင်လဲ့ မြင်ကွင်းရှေ့တွင် ရှိနေသည့် အရာအားလုံးက ပိုမိုကြည်လင်လာ၏။ သူတို့က အကြောက်တရားရှိနေသော်လည်း သူ့မျက်ဝန်းရှိ သတ်ဖြတ်ငွေ့က အားကောင်းလှသည်။ သူက ညာဖက်လက်ကို မြှောက်ကာ ဝှေ့ယမ်းလိုက်၏။

“ဓာတ်ငါးပါး- သတ္တုဓာတ်”

သူက ထိုစကားများကို ရေရွတ်လိုက်သည်နှင့် ပတ်ဝန်းကျင် လုံးဝအပြောင်းအလဲ မရှိပေ။ ထိုအရာက တူညီသည့် မြေဓာတ်တာအိုကမ္ဘာသာ ဖြစ်နေဆဲဖြစ်ပြီး ပြိုလဲနေဆဲသာ ဖြစ်၏။ ထိုမြင်ကွင်းက သွေးနီရောင်လူငယ်လေး၏ မျက်ဝန်းအထက် ထူးထူးဆန်းဆန်း အလင်းရောင်တစ်ခု ပေါ်ထွက်လာသည်။ ထို့နောက် သူက ပြောလိုက်၏။

“ဝမ်ပေါင်လဲ့ မင်း ဓာတ်ငါးပါးရဲ့ သတ္တုဓာတ်က ငါ့ရဲ့ တည်ရှိမှုကို တောင့်ခံနိုင်တဲ့ပုံ မပေါ်ဘူးပဲ” သွေးနီရောင်လူငယ်လေး၏ အသံထွက်ပေါ်လာသည့်အခါ သွေးနီရောင်ဝဲကတော့က ထပ်မံလှုပ်ခတ်လာပြီး ဝမ်ပေါင်လဲ့၏ ကိုယ်ပွားအားလုံးကို ဝါးမျိုပစ်လိုသည့်အလား ရှေ့တိုးလာသည်။ ထိုအရာက ဧကရာဇ်၏ တကယ့်သွင်ပြင်မှ မျက်လုံးမှ ကြောက်မက်ဖွယ် ဖိအားတစ်ခု ထပ်မံထုတ်လွှတ်လာသည်။

ထိုအရာက မြေဓာတ်တာအိုကမ္ဘာကို ပိုမိုပြိုလဲသွားစေ၏။

“ဒါက ခင်ဗျားအနေနဲ့ ကျုပ်ရဲ့ သတ္တုတာအိုက ဘာလဲဆိုတာကို နားမလည်လို့ပါ” မြေဓာတ်တာအိုကမ္ဘာပြိုလဲမှုနှင့် သွေးနီရောင်လူငယ်လေး၏ စကားနှင့်ရင်ဆိုင်ရသည့်အခါ ဝမ်ပေါင်လဲ့၏ အမူအရာက တည်ငြိမ်နေဆဲဖြစ်ပြီး ညာဖက်လက်ကို အောက်ချလိုက်သည်။

သူက လှုပ်ရှားမှုမရှိသော်လည်း ဝမ်ပေါင်လဲ့၏ ညာဖက်လက် အောက်ချလိုက်သည်နှင့် သွေးနီရောင်ဝဲကတော့ထဲရှိ လူငယ်လေး၏ အမူအရာက ပျက်ယွင်းသွားခဲ့သည်။

“ဒါက…”

သူ့စကားမဆုံးခင် လေထုထဲမှ ငွေရောင်အလင်းတန်း ထွက်ပေါ်လာသည်။ သူတို့က ဝဲကတော့ဆီ အပြင်းအထန် တိုးဝင်လာ၏။ ထိုအလင်းတန်းက သေချာရေတွက်ကြည့်ဖို့ ခက်ခဲလှသည်။ သူတို့ကို မျက်စိဖြင့် မြင်နိုင်သော်လည်း သူတို့က အတူတကွ စုစည်းနေသည့်အတွက် အဆုံးသတ်ရှိဟန်မပေါ်ပေ။ ထိုအရာက အဖက်ဖက်မှ ထွက်ပေါ်လာပြီး အဆုံးသတ်၌ နှစ်ဖက်လုံးက အတူတကွ ဝဲကတော့၏ တစ်ဖက်စွန်းဆီ၌ စုဝေးသွားသည်။ ထို့နောက် ထိုအရာကို ထိုးဖောက်လိုက်ပြီး ဧရာမငွေရောင်ဓားရှည်တစ်လက် ဖြစ်လာ၏။

ပို၍အတိအကျပြောရမည်ဆိုလျှင် တစ်ဖက်က ဓား၏ ထိပ်ဖျားဖြစ်ပြီး တစ်ဖက်က ဓားရိုး ဖြစ်၏။ အလယ်ကမူ ဝဲကတော့ တည်ရှိနေသည့်နေရာ ဖြစ်သည်။ ထို့နောက် ဝဲကတော့ရှိရာနေရာက အက်ကြောင်းများ ပေါ်ထွက်လာ၏။

ထိုအက်ကြောင်းက ပိုမိုကြီးမားသည်ထက် ကြီးမားလာပြီး ငွေရောင်မျဉ်းများ ရောက်ရှိလာသည်။ သူတို့က စုဝေးသွားပြီး ဓား ကိုယ်ထည် ဖြစ်ပေါ်လာ၏။

ဓား၏ ကိုယ်ထည် ဖြစ်ပေါ်လာသည်နှင့် သွေးနီရောင်ဝဲကတော့ကြီးက နှစ်ပိုင်း ကွဲထွက်သွား၏။

ထိုအရာက အဆုံးသတ် မဟုတ်သေးပေ။ ထိုသို့ ပိုင်းဖြတ်ခံလိုက်ရပြီးသည့်နောက်တွင် အပြည့်အဝ ပုံပေါ်နေသည့် အနက်ရောင်ဓားရှည်က ရုတ်ချည်းဆိုသလို မြှင့်လာကာ ဝမ်ပေါင်လဲ့ထံ ကျရောက်လာသည်။ မျက်စိတစ်မှိတ်အတွင်း၌ ထိုအရာက ကျုံ့သွားပြီး ဝမ်ပေါင်လဲ့ရှေ့မှောက် ပေါ်ထွက်လာ၏။ သူက ဆုပ်ကိုင်လိုက်သည့်အခါ နဂိုအရွယ်အစားအတိုင်း ပြန်လည်ပြောင်းသွားခဲ့သည်။

ဓားကို ကိုင်ဆွဲထားသည့် လက်ကို မြှောက်လိုက်သည်။ ထို့နောက် ဓားက ဧရာမငွေရောင်ကြိုးမျှင်များအဖြစ် ပြောင်းလဲသွားပြီး အဖက်ဖက်သို့ ပျောက်ကွယ်သွား၏။

ထိုမြင်ကွင်းကို မြင်လိုက်သူအားလုံးက သေချာပေါက် အံ့အားသင့်သွားကြလိမ့်မည်။

အကြောင်းအရင်းကမူ ထိုအရာသည် အကျိုးအကြောင်း မသင့်ပေ။ သို့သော်လည်း ပြောင်းပြန်ကြည့်ပါက အရာအားလုံး အကျိုးအကြောင်းသင့်နေသည်ကို သဘောပေါက်သွားလိမ့်မည်။

သူက လက်မြှောက်လိုက်ပြီး ဓားက စုဝေးလာကာ ခုတ်ချလိုက်သည့်အခါ ဓားက နှစ်ပိုင်းကွဲထွက်သွားခြင်း ဖြစ်၏။

သတ္တုဓာတ် တာအို ကမ္ဘာက ကျန်သည့်အရာများနှင့် ကွဲပြားနေသည်။

“ဒါက ငါ့ရဲ့သတ္တုဓာတ်တာအိုကမ္ဘာပဲ။ ကံအကြောင်းတရားလို့လည်း ပြောလို့ရတယ်” ဝမ်ပေါင်လဲ့က ခေါင်းငုံ့ပြီးသည့်နောက်တွင် နှစ်ပိုင်းကွဲထွက်သွားသည့် သွေးနီရောင်ဝဲကတော့ကြီးကို ကြည့်လိုက်၏။ ထို့နောက် သူ့မျက်ဝန်းထဲ နက်ရှိုင်းသည့် အကြည့်တစ်ခု ပေါ်ထွက်လာသည်။