ဂိမ်းရဲ့လုပ်ငန်းအသစ်: တီဗွီ အွန်လိုင်း! ၁

ပါမောက္ခရန်နှင့်ချင်းလင်စံအိမ်ကြားကိစ္စမှာ အွန်လိုင်းပေါ်တွင် အုတ်အော်သောင်းတင်းဖြစ်ခဲ့သည်။

နာမည်ကျော်မှုကိုအခွင့်ကောင်းယူပြီး ဗီဒီယိုတင်သူများမှာ တာဝန်ယူရမှာကြောက်သဖြင့် ဗီဒီယိုများတစ်ပုဒ်ပြီးတစ်ပုဒ်ဖျက်ကုန်သော်လည်း ထိုကိစ္စနာမည်ကြီးမှုက ပြီးမသွားချေ။ ထို့အပြင် အားလုံးက လိပ်ခေါင်းကုရန်သုံးသောဆေးဖက်ဝင်ဝိုင်ကိုပိုပြီး အာရုံစိုက်လာကြသည်။

ထို့ကြောင့် ခရီးသည်များက လိုင်းပေါ်တွင် ချင်းလင်ဆေးဖက်ဝင်ဝိုင်အာနိသင်အကြောင်းတင်သောအခါ ချက်ချင်းရေပန်းစားခေါင်းစဉ်ထဲဝင်သွား၏။

သို့သော် ချင်းလင်ဆေးဖက်ဝင်ဝိုင်ရေပန်းစားမည်ဆိုသည်က ထင်ထားသည့်အတိုင်းဖြစ်သည်။ အခုချင်းလင်စံအိမ်ဆိုင်းဘုတ်နှစ်ခုပါရေပန်းစားနေ၏။ ဒါကိုဘယ်သူမှထင်မထားပေ။

ဘာပဲဖြစ်ဖြစ် လူအများစု၏ကနဦးအတွေးထဲတွင် ထိုပစ္စည်းများမှာ ဆိုင်းဘုတ်လေးနှစ်ခုသာဖြစ်သည်။

သို့သော် ချင်းလင်စံအိမ်ကလဲလိုက်သောဆိုင်းဘုတ်တွင် စနစ်၏အရည်အသွေးရှိနေသည်။ ဆိုင်းဘုတ်ကိုမြင်သောခရီးသည်များမှာ စနစ်၏အရည်အသွေးပါနေသောကြောင့် ရှောင်လွှဲမရအောင်စိတ်ဝင်စားသွားကြ၏။ တစ်ယောက်ယောက်ကဗီဒီယိုရိုက်ပြီး လိုင်းပေါ်တင်လိမ့်မည်။

ထိုဆိုင်းဘုတ် ရေပန်းစားရှာဖွေမှုထဲရောက်သွားရသည့်အကြောင်းရင်းမှာ 'မော်ကွန်းဘုရင်'ဆိုသော အင်တာနက်ဆယ်လီဘလော့ဂါကြောင့်ပင်။



မော်ကွန်းဘုရင်မှာ ရှေးဟောင်းကျောက်စာအမျိုးအစားအားလုံးကိုအထူးစုဆောင်းပြီး စိတ်ကြိုက်ပြင်ဆင်သော သူဌေးတစ်ဦးဖြစ်သည်။ သူကအလွန်ချမ်းသာပုံရ၏။

ဝမ်ရန်က ချင်းလင်ဆိုင်းဘုတ်၏ရေပန်းစားခေါင်းစဉ်ကိုနှိပ်လိုက်ရာ ထိုဆိုင်းဘုတ်ဗီဒီယိုကိုတွေ့ရသည်:

''ပြီးခဲ့တဲ့နှစ်ရက်အတွင်းမှာ ချင်းလင်စံအိမ်ဟာ အရမ်းနာမည်ကြီးနေပါတယ်... အားလုံးက ချင်းလင်ဆေးဖက်ဝင်ဝိုင်ကိုအာရုံစိုက်နေကြပေမဲ့ ဒီနေ့ချင်းလင်စံအိမ်ရဲ့ပွဲအစီအစဉ်ကိုမေ့နေပုံရပါတယ်... ချင်းလင်စံအိမ်ရဲ့ဆိုင်းဘုတ်က အဓိကပါ... ဆေးဖက်ဝင်ဝိုင်က လက်ဆောင်သက်သက်ပါ''

''အားလုံးပဲ စဉ်းစားကြည့်ပါ... ရွှေလိုတန်ဖိုးရှိတဲ့ဆေးဖက်ဝင်ဝိုင်ကပဲ အရမ်းအဖိုးတန်နေပါပြီ... အကျိုးအမြတ်က ယွမ် ၃၆၀၀ နဲ့ညီမျှပါတယ်... ပြီးတော့ ဒီနေ့ဆိုင်းဘုတ်က အဓိကဇာတ်လိုက်ပါ... အဲဒါဘယ်လောက်တန်ပါသလဲ?''

ထိုဗီဒီယိုကြည့်ပြီး ဝမ်ရန်ကြောင်သွားသည်။

ဟုတ်သားပဲ။ သူလည်း ဆေးဖက်ဝင်ဝိုင်ကိုပဲအာရုံစိုက်နေတာ။ ဒီနေ့ချင်းလင်စံအိမ်ရဲ့ဆိုင်းဘုတ်က အဓိကဇာတ်လိုက်ဆိုတာ သတိမထားမိ။

ထိုဆိုင်းဘုတ်ကို သူနှင့်စုကျွမ် စံအိမ်ရောက်ရောက်ချင်းတွေ့ခဲ့သည်။ အလွန်အနုပညာဆန်ပြီး လက်ရေးကအရမ်းလှ၏။ သူစိတ်ဝင်စားသွားခဲ့သည်။

သို့သော် ထိုအချိန်က သူ့စိတ်တွင် အကျိုးအမြတ်ရယူဖို့ကိစ္စသာလွှမ်းမိုးနေသဖြင့် သိပ်အာရုံမစိုက်မိပေ။

မော်ကွန်းဘုရင်က_ ''ခရီးသည်တွေတင်တဲ့ဗီဒီယိုကို ကျွန်တော်သေသေချာချာကြည့်ပြီးသွားပြီ... ချင်းလင်စံအိမ်ဆိုင်းဘုတ်ကိုအကဲဖြတ်ဖို့ခရီးသည်တစ်ဦးနဲ့အဆက်အသွယ်ရအောင် ကျွန်တော်လည်းငွေသုံးခဲ့တယ်... ချင်းလင်စံအိမ်ရဲ့ဆိုင်းဘုတ်က ရိုးရိုးမဟုတ်ဘူး... အားလုံးသစ်မွှေးနဲ့လုပ်ထားတာ''

''တချို့လူတွေက သစ်မွှေးအကြောင်းသိပ်သိမှာမဟုတ်ဘူး... ဒါပေမဲ့ အရေးမကြီးပါဘူး... သိရမှာက စျေးပေါတဲ့သစ်မွှေးတစ်ကတ်တီကို ယွမ် ၄-၅၀၀၀ ရှိတယ်... ပိုစျေးကြီးတဲ့သစ်မွှေးက တစ်ကတ်တီယွမ် ၂၀၀၀၀ ကျော်နိုင်တယ်... အဲဒီမှာ ချင်းလင်စံအိမ်ရဲ့ဆိုင်းဘုတ်က တစ်ကတ်တီယွမ် ၂၀၀၀၀ ကျော်တဲ့အမျိုးအစားပဲ''

''ဆိုင်းဘုတ်ကိုကြည့်ရရင် ကတ်တီ ၂၀ ကျော်ရှိလိမ့်မယ်... ဆိုတော့ ဒီသစ်မွှေးဆိုင်းဘုတ်က ယွမ် ၅၀၀၀၀၀ ကျော်တန်တာပေါ့... ဒါပေမဲ့ ချင်းလင်စံအိမ်ဆိုင်းဘုတ်ကနှစ်ခုရှိတာ... ဝင်ပေါက်တစ်ခုမှာ တစ်ခုစီ''

ဝမ်ရန်ကထိုအကြောင်းသိရလျှင် ထအော်လိုက်သည်_ ''သောက်... စျေးကြီးလှချည်လား?''

သူ့မှာငွေတချို့ရှိသည်။ ကားဝယ်ဖို့အတွက် ယွမ်တစ်သန်းသုံးချင်သုံးမည်။ သို့သော် တံခါးဝမှာချိတ်ဆွဲမယ့်ဆိုင်းဘုတ်အတွက် ယွမ်တစ်သန်းသုံးဖို့တော့ စိတ်တောင်မကူးချေ။

ဒါလူအများစုစိတ်ကူးမည့်အရာလည်းမဟုတ်။

စံအိမ်ပိုင်ရှင်က ဘယ်လိုအကွက်ရွှေ့ရမယ်ဆိုတာ တကယ်သိတာပဲ။ နောက်ပြီး သူအကွက်ရွှေ့တာ အထက်တန်းကျသည်။



ဗီဒီယိုကမဆုံးသေး။ အသံဆက်ထွက်နေသည်:

''ဒါက ဆိုင်းဘုတ်ပစ္စည်းတန်ဖိုးပဲရှိပါသေးတယ်... ဆိုင်းဘုတ်ပေါ်ကမ္ဗည်းထိုးထားတာကို အားလုံးတွေ့ပြီးပြီမလား? စာလုံးတွေက အရမ်းကောင်းပြီး အရမ်းအသက်ဝင်နေတယ်... အရင်က ဆရာချန်ဖုန်းဝူဘယ်သူလဲမသိခဲ့ပေမဲ့ မကြာခင်သူနာမည်ကြီးလာပါလိမ့်မယ်''

''သူ့လက်ရေးလက်သားကအဆင့်က အရမ်းမြင့်တယ်... ဒါပေမဲ့ ဘယ်လိုမြင့်တာလဲ? အားလုံးကိုနှိုင်းယှဉ်ပြပါရစေ... ကျွန်တော့်နောက်က ထွင်းထားတဲ့ကမ္ဗည်းနှစ်ခုကိုတွေ့လား?''

ဝမ်ရန်က ဗီဒီယိုထဲတွင် မော်ကွန်းဘုရင်နောက်မှ ထွင်းထားသောကမ္ဗည်းနှစ်ခုကိုသတိထားမိသည်။ ကမ္ဗည်းတစ်ခုတွင် စာလုံးနှစ်လုံးပါပြီး တခြားစာလုံးလေးလုံးကို အဆုံးစွန်သောမေတ္တာစစ်မှန်စွာနှင့်ရေးထားသည်။

မော်ကွန်းဘုရင်က ဆက်ပြီး_ ''ဒီပြင်ညီဆိုင်းဘုတ်နှစ်ခုက ကျွန်တော့်အနုပညာစုဆောင်းမှုထဲကပါပဲ... ဒါတွေကို နိုင်ငံ့လက်ရေးလှအဖွဲ့အစည်းက ဆရာဖန်းကမ္ဗည်းထိုးထားတာ... နှစ်ပေပတ်လည်က ယွမ် ၃၀၀၀၀၀ တန်ပြီး စာလုံးလေးလုံးနဲ့လေးပေပတ်လည်က ယွမ် ၆၀၀၀၀၀ တန်တယ်''

''ရှင်းပါတယ်... ကျွန်တော့်လက်ထဲက ကမ္ဗည်းနှစ်ခုကလည်း ဆရာချန်ဖုန်းဝူထက်နိမ့်ပါတယ်... အဲဒါကြောင့် ချင်းလင်စံအိမ်ဆိုင်းဘုတ်တန်ဖိုးက အနည်းဆုံးယွမ် ၆၀၀၀၀၀ ရှိမယ်... ယွမ် ၅၀၀၀၀၀ နဲ့ ယွမ် ၆၀၀၀၀၀ ပေါင်းလိုက်ရင် ယွမ် ၁.၁ သန်း... နောက်ပြီး ဆိုင်းဘုတ်ကနှစ်ခု''

''အခုချင်းလင်စံအိမ်က ဒီဆိုင်းဘုတ်နှစ်ခုကို ဝင်ပေါက်မှာချိတ်ဆွဲထားပြီ... သူခိုးတစ်ယောက်က ဆိုင်းဘုတ်နှစ်ခုကိုခိုးသွားရင် အနည်းဆုံးယွမ် ၂.၂ သန်းရမယ်... မကြာခင်ချမ်းသာမှာပဲ''

ထိုဗီဒီယိုမှာ ချင်းလင်စံအိမ်ဆိုင်းဘုတ်ကိုရေပန်းစားအောင်လုပ်ထားသောဗီဒီယိုဖြစ်သည်။

ပိုက်ဆံရှိသောဝမ်ရန်ပင် တန်ဖိုးကြောင့်လန့်သွား၏။ သာမန်လူတွေဆိုမပြောနှင့်တော့။

ထိုဗီဒီယို၏မှတ်ချက်နေရာတွင် အလွန်လှုပ်လှုပ်ရွရွဖြစ်နေသည်။

ယွင်ယွီ: ''ဘုရားရေ... သူများပြောတာတော့ ချင်းလင်စံအိမ်ဝင်ပေါက်မှာ သစ်ပြားချိတ်ဆွဲထားတာတဲ့''

ဒုတိယအကြိမ်မျက်စိဖွင့်ပြီ: ''ဒီဗီဒီယိုကိုသာမတွေ့ခဲ့ရင် ချင်းလင်စံအိမ်ဆိုင်းဘုတ်က ဒီလောက်တန်ဖိုးရှိမှန်း တွေးမိမှာမဟုတ်ဘူး''

မုန်တိုင်းနက် ၁၉၉၈: ''ဒီဆိုင်းဘုတ်နှစ်ခုတန်ဖိုးကိုသိပြီးမှ ရုတ်တရက်ချင်းလင်စံအိမ်ရဲ့အဆင့်က နည်းနည်းမြင့်သွားသလိုခံစားရတယ်''

ကြက်သွန်နီတောင်တန်း: ''အမေရေ... သားလုပ်နိုင်ခဲ့ပြီ... ယွမ်နှစ်သန်းကျော်တန်တဲ့ဆိုင်းဘုတ်ချိတ်ထားတဲ့နေရာကို သွားလည်နိုင်ပြီ''

ငါကသောက်အ: ''ညီအစ်ကိုတို့... ဆိုင်းဘုတ်နှစ်ခု ယွမ် ၂.၂ သန်း... ဒီမှာ ကံကြမ္မာဖန်တီးမယ့်အခွင့်အရေး... ငါဦးဆောင်မယ်... ပါချင်တဲ့သူရှိလား?''

အချက်ပြအမှတ်@ငါကသောက်အ: ''ညီအစ်ကို... ငါ့ကိုခေါ်ပါ''

ငါကသောက်အ@အချက်ပြအမှတ်: ''ညီအစ်ကိုကောင်းရေ... ဆက်သွယ်ရမယ့်လိပ်စာလေးထားခဲ့... ငါတို့ဒီဆိုင်းဘုတ်ကိုခိုးရောင်းပြီးရင် AK နှစ်လက်ရလာမယ်... ငါတို့ကြီးမားလာမယ် အားကောင်းလာမယ် ဘုန်းတန်ခိုးတွေဖန်တီးမယ်''

ဝမ်ရန်က ထိုမှတ်ချက်ကိုမြင်လျှင် ပွစိပွစိမပြောဘဲမနေနိုင်တော့_ ''နှစ်တိုင်း အရူးတွေပေါ်တာပဲ... AK ဝယ်ပြီးတော့တောင် ကြီးမားအောင် အားကောင်းအောင်လုပ်မယ်တဲ့... သူတို့ကိုယ်သူတို့ ရုပ်ရှင်ရိုက်နေတယ်များထင်နေလား?''

ထိုရေပန်းစားခေါင်းစဉ်အောက်တွင် ချင်းလင်စံအိမ်ဆိုင်းဘုတ်မှာ လုံးဝနာမည်ကြီးလာသည်။ စံအိမ်ထဲမှခရီးသည်အတော်များများလည်း ဗီဒီယိုကိုတွေ့သွားကြလေသည်။