အပိုင်း(၁၀၄၄)

ပျံသန်းလာသော ယန်တင်းထျန်က စစ်သင်္ဘောဆီသို့ မရောက်ခဲ့ပေ။

သူက လေးနက်သောမျက်နှာထားဖြင့် ရပ်တန့်လိုက်သည်။

“ဟားဟား၊ ငါထင်တဲ့အတိုင်းပဲ။ အဲဒီကလေးတွေက ကောင်းကင်တစ်သောင်းချောက်နက်ကိုသွားဖို့ ဘယ်လိုလုပ်ပြီး အရည်အချင်းရှိမှာလဲ”

သူက အစိမ်းရောင်ဝတ်စုံနှင့် ဟန်မူယဲ့ကို ဖြည်းဖြည်းချင်း လှည့်ကြည့်သည်။

သူက ဟန်မူယဲ့ကို မြင်လိုက်ရသောအခါတွင် မှတ်မိသွားပုံပေါ်သည်။

“မင်းပဲ”

“ယွင်လန်ဓားအင်မော်တယ်”

“ကမ္ဘာအသီးသီးရဲ့ ဓားကျင့်ကြံသူတွေကြားမှာ ပြိုင်ဘက်ကင်းဓားကျင့်ကြံသူတစ်ယောက် ပေါ်ထွက်လာတဲ့အကြောင်း သတင်းပြန့်နေတယ်။ ငါက အဲဒီဓားကျင့်ကြံသူကို သိချင်မိတယ်”

သူက အားကောင်းသော ဓားအလင်းကို ထုတ်လွှတ်သည်။

ဟန်မူယဲ့က အနည်းငယ် ကြောင်အသွားသည်။

‘ငါက ဘယ်လိုလုပ်ပြီး အဲဒီလိုဂုဏ်သတင်းမျိုး ရလာတာလဲ’

ယန်တင်းထျန်က သူ့ကို တွေးတောနေရန် အချိန်မပေးခဲ့ပေ။

ရွှေရောင်ဓားသည် ကျဆင်းလာခဲ့သည်။

ဓားအလင်းက အလွန်အမင်း မတောက်ပသော်လည်း ခမ်းနားသော ခွန်အားကို သယ်ဆောင်ထားသည်။ လေပြင်းနှင့် မိုးကြိုးများလည်း ပါဝင်နေသည်။

ထိုဓားသည် ရွှေအင်မော်တယ်အထွတ်အထိပ်အဆင့် ကျင့်ကြံသူများကို ဖိနှိပ်နိုင်သည်။

သို့သော် ဟန်မူယဲ့က ပြုံးသည်။

သူက ယန်တင်းထျန်၏ ဓားနည်းစနစ်များကို လေ့လာဖူးသည်။

ဟန်မူယဲ့က ဖူယွီအင်မော်တယ်ကမ္ဘာထက် အဆပေါင်းများစွာ ပိုမိုသန်မာသော ကောင်းကင်နီအင်မော်တယ်ကမ္ဘာကို အာရုံစိုက်ထားခဲ့သည်။

ယခုအချိန်တွင် သူက ဓားချက်နှင့် ပွင့်လင်းစွာ ရင်ဆိုင်လိုက်ရသည်။

ဟန်မူယဲ့က ခန္ဓာကိုယ်ကို ရွေ့လျားပြီး ဓားကို လက်ညှိုးဖြင့် ညွှန်ပြလိုက်သည်။

“ခလွမ်”

လက်ညှိုးက ဓား၏ကိုယ်ထည်ကို ထိတွေ့သွားသည်။

ယန်တင်းထျန်၏မျက်နှာထားက ပြောင်းလဲသွားပြီး လက်ထဲတွင်ရှိသောဓားက တုန်ခါနေသည်။ သူက နောက်ဆုတ်သည်။

သူက ပြတ်သားသောမျက်နှာထားဖြင့် ဟန်မူယဲ့ကို ကြည့်သည်။

“ကောင်းတယ်။ ကောင်းတယ်။ မျှော်လင့်ထားတဲ့အတိုင်း အလကားနာမည်ကြီးနေတာမဟုတ်ဘူးပဲ”

သူက စကားပြောလိုက်ပြီး ဓားဖြင့် ထိုးချသည်။ လေပြင်းနှင့် မိုးကြိုးများသည် တောက်ပနေသော နေတစ်စင်းအဖြစ် ပြောင်းလဲသွားပြီး ပတ်ဝန်းကျင်ကို အလင်းပေးသည်။

“ငါ့ရဲ့ လေပြင်းနဲ့နေမင်းဓားကို ကြည့်လိုက်”

လေပြင်းနှင့်မိုးကြိုးကို အသုံးပြုပြီး နေမင်းကို ထုတ်ဖော်သည်။ ကြမ်းတမ်းပြီး ပြင်းထန်သော နေမင်းတွင် အဆုံးမရှိသော လေပြင်းနှင့်မိုးကြိုးစွမ်းအားများ ပါဝင်နေသည်။

ထိုဓားချက်ကို သတိမထားမိလျှင် ခန္ဓာကိုယ်တစ်ခုလုံး ပျက်စီးသွားလိမ့်မည်။

ဝိညာဉ်လည်း ဒဏ်ရာရသွားနိုင်သည်။

ထိုဓားနည်းစနစ်ကို ရွှေအင်မော်တယ်အထွတ်အထိပ်အဆင့် ကျင့်ကြံသူများက မသုံးနိုင်ပေ။ ခုခံရန်လည်း မတတ်နိုင်ပေ။

ယန်တင်းထျန်က ဟန်မူယဲ့ကို အင်မော်တယ်သခင်အဖြစ် သတ်မှတ်ထားသည်။

“ကောင်းတယ်”

ဟန်မူယဲ့က ရယ်လိုက်ပြီး ဓားဆွဲထုတ်သည်။

“ခလွမ်”

ဓားအလင်း ပေါ်ထွက်လာသည်။ ဓားရှည်သည် အင်မော်တယ်ချီကို ထုတ်လွှတ်ပြီး အလင်းလွှာကို ဖန်တီးသည်။

ထူးဆန်းသောအလင်းသည် အလင်းလွှာထဲတွင် ဆင့်ကဲထပ်နေပြီး ယန်တင်းထျန်၏ဓားနှင့် ရင်ဆိုင်သည်။

“ဘုန်း”

ယန်တင်းထျန်၏ဓားရှည်ကို လျှပ်စီးကြောင်းတစ်ခုက ရစ်ပတ်ထားသည်။

ယန်တင်းထျန်က အံ့အားသင့်သွားပုံပေါ်သည်။ သူက လက်မြှောက်ပြီး ဓားကို ပြန်ခေါ်သည်။ သို့သော် ဓားကို မထိန်းချုပ်နိုင်တော့ပေ။

“ကောင်းတယ်”

ယန်တင်းထျန်က ကောင်းကင်နှင့်မြေကြီးအား လောင်ကျွမ်းနိုင်သော အပူဓာတ်ကို ထုတ်လွှတ်သည်။

သူ့နောက်တွင် နေမင်းပုံရိပ် ပေါ်ထွက်လာသည်။

နေမင်း ပေါ်ထွက်လာသောအခါ ဟန်မူယဲ့က ပျံသန်းလာသည်။

အကယ်၍ ကောင်းကင်တွင် နေမင်းပေါ်ထွက်လာသည်အထိ စောင့်နေလျှင် သူက အစွမ်းကုန်တိုက်ခိုက်လျှင်ပင် ချိုးဖျက်နိုင်မည်မဟုတ်ပေ။

ထို့ကြောင့် နေမင်းပေါ်ထွက်လာသောအချိန်တွင် သူ့လက်ထဲတွင်ရှိသော ဓားက မြားတစ်စင်းအဖြစ်ပြောင်းပြီး ပြေးထွက်သွားသည်။

“ဘန်း”

မြားက လှုပ်ရှားလိုက်ပြီး နေမင်းက ကျဆင်းသွားသည်။ ယန်တင်းထျန်၏ မျက်နှာထားက ပြောင်းလဲသွားသည်။

သူက ဟန်မူယဲ့ကို စိုက်ကြည့်နေပြီး ပထမဆုံးအကြိမ်အဖြစ် အလေးအနက်ထားလိုက်သည်။

ဟန်မူယဲ့၏ ဓားတာအိုကျင့်ကြံခြင်းနှင့် အချိန်ကိုက် တုံ့ပြန်နိုင်စွမ်းကြောင့် သူက အံ့အားသင့်သွားခဲ့သည်။

ထိုအရည်အချင်းနှင့် ပါရမီသည် တခြားကမ္ဘာများကို လွှမ်းမိုးရန် လုံလောက်သည်။

“အကြီးအကဲယန်၊ တကယ်လို့ ကောင်းကင်နေမင်းဓားကို ဖိနှိပ်ချင်တယ်ဆိုရင် အချိန်အတိုင်းအတာတစ်ခုအထိ မတိုက်ခိုက်တာ ပိုကောင်းလိမ့်မယ်”

သူ့စကားကြောင့် ယန်တင်းထျန်က မျက်လုံးများကို မှေးကျဉ်းလိုက်သည်။

“မင်းဘယ်သူလဲ ငါသိပြီ”

သူက ဟန်မူယဲ့ကို ကြည့်လိုက်ပြီး တီးတိုးပြောသည်။

“ငါ့ရဲ့ လောင်ကျွမ်းနေမင်းဓားက မင်းလက်ထဲမှာမဟုတ်လား”

သူက ထိပ်တန်းအဆင့် ကျွမ်းကျင်သူတစ်ယောက်ဖြစ်ပြီး ဟန်မူယဲ့၏ စကားတစ်ခွန်းဖြင့် ခန့်မှန်းနိုင်သည်။

“လောင်ကျွမ်းနေမင်းဓားက ကျွန်တော့်ဆီမှာ မဟုတ်ပါဘူး။ ဒါပေမဲ့ ဂိုဏ်းရဲ့ အကြီးအကဲတစ်ယောက်ကို ကျွန်တော်ကိုယ်တိုင် ပေးလိုက်ပါတယ်”

ဟန်မူယဲ့က မငြင်းခဲ့ပေ။

ယန်တင်းထျန်က ခေါင်းညိတ်လိုက်ပြီး ဟန်မူယဲ့ကို ကြည့်သည်။

“ကောင်းပြီ။ ဓားတာအိုမှာ မင်းလိုကြယ်ပွင့်မျိုး ရှိလာလိမ့်မယ်လို့ ထင်မထားခဲ့ဘူး”

“ငါက ကောင်းကင်နေမင်းဓားကို ပျိုးထောင်ဖို့ မလုပ်ရသေးဘူး။ ငါက ရွှေတောင်ထွတ်ကို စောင့်နေတာ”

ကျွမ်းကျင်သူများ၏ စုဝေးပွဲ ....

ကမ္ဘာများ၏ တိုက်ပွဲ ....

ကမ္ဘာအသီးသီးမှ ကျွမ်းကျင်သူများ၏ အင်မော်တယ်ဘုရင်အဆင့်နှင့် သက်ဆိုင်သော အခွင့်အရေး ဖြစ်သည်။

နတ်ဘုရားကမ္ဘာသို့ ဝင်ရောက်နိုင်လိမ့်မည်။

ယန်တင်းထျန်က ထိုအခွင့်အရေးကို လက်လွှတ်ခံမည်မဟုတ်ပေ။

“အကြီးအကဲကို အဲဒီမှာတွေ့မယ်လို့ မျှော်လင့်ပါတယ်”

ဟန်မူယဲ့က ခပ်ဟဟရယ်လိုက်ပြီး အစိမ်းပုပ်ရောင်ဓားတစ်လက်အဖြစ် ပြောင်းလဲ၍ ပျောက်ကွယ်သွားသည်။

“မူလဝိညာဉ်ဓား”

ယန်တင်းထျန်က ထိတ်လန့်သွားသည်။

သူနှင့် သရေကျနေသော ယွင်လန်ဓားအင်မော်တယ်က မူလဝိညာဉ်ဓားတစ်လက် ဖြစ်နေလိမ့်မည်ဟု ထင်မထားခဲ့ပေ။

‘သူ့ရဲ့ မူလခန္ဓာက ဘယ်လောက်တောင် သန်မာတာလဲ’

“စိတ်ဝင်စားစရာပဲ”

သူက အင်မော်တယ်အလင်းနှင့် တိုက်ခိုက်လိုစိတ်ကို ထုတ်လွှတ်နေသည်။

အဆုံးမရှိသော ကမ္ဘာများကြားတွင် လူအနည်းငယ်ကသာ သူ့ကို တိုက်ခိုက်လိုစိတ် ပေါ်ထွက်လာအောင် လှုံ့ဆော်ပေးနိုင်သည်။

သူ၏ စစ်မြေပြင်က နတ်ဘုရားကမ္ဘာတွင်ဖြစ်သည်ဟု ထင်ထားခဲ့သည်။ သို့သော် အင်မော်တယ်ကမ္ဘာတွင် ထိုက်တန်သော ပြိုင်ဘက်တစ်ယောက် ရှိနေလိမ့်မည်ဟု ထင်မထားခဲ့ပေ။

“ဒီလိုကျွမ်းကျင်သူမျိုးကပဲ ငါ့ရဲ့ ကောင်းကင်နေမင်းဓားနဲ့ ထိုက်တန်တယ်”

“ယွင်လန်ဓားအင်မော်တယ်နဲ့ပတ်သတ်ပြီး အချက်အလက်တွေအားလုံး စုံစမ်းလိုက်ပါ”

“အဲဒီသင်္ဘောပျံပေါ်မှာရှိတဲ့ ကျင့်ကြံသူတွေကို အာရုံစိုက်ထားပါ”

သူက အမိန့်ပေးလိုက်ပြီး စစ်သင်္ဘော၏ အပေါ်ဆုံးအထပ်သို့ ဝင်ရောက်သွားသည်။

ကောင်းကင်တစ်သောင်းချောက်နက်ကို ကမ္ဘာအသီးသီး၏ ပျက်စီးခြင်းနယ်မြေဟု သိကြသည်။

သင်္ဘောပျံက အဆုံးမရှိ‌သော အနက်ရောင်အက်ကွဲကြောင်းများကြားသို့ ဝင်လာ‌သောအခါတွင် ဟန်မူယဲ့က ပျက်စီးခြင်းနယ်မြေဟု အမည်တွင်နေသော အကြောင်းအရင်းကို နားလည်သွားသည်။

သုသာန်တစ်စပြင်ကဲ့သို့ တိတ်ဆိတ်နေသည်။

အသံမထွက်ခြင်းမဟုတ်ပဲ စွမ်းအားတစ်မျိုး ရှိနေခြင်း ဖြစ်သည်။

ဤနေရာသည် သေဆုံးခြင်းစွမ်းအားဖြင့် ပြည့်နှက်နေသည်။

ထိုစွမ်းအားသည် အင်မော်တယ်စွမ်းအင်နှင့် နတ်ဘုရားစွမ်းအင်ကို ဖိနှိပ်နိုင်သည်။

“စည်းမျဉ်းလား”

ဟန်မူယဲ့က ရေရွတ်သည်။

သူက စည်းမျဉ်းစွမ်းအားများကို သယ်ဆောင်ထားသည်။

ယခင်ကပ်ဘေးမှ ကောင်းကင်သစ်ပင်၏ စည်းမျဉ်းစွမ်းအားအပြင် အင်မော်တယ်ဘုရင်မင်ဟယ်၏ သေခြင်းရှင်ခြင်းစည်းမျဉ်းကိုလည်း ထိန်းချုပ်ထားသည်။

ထို့နောက် သူက သွေးမြစ်အင်မော်တယ်ဘုရင်ဆီမှ အရင်းအမြစ်တူညီသော စည်းမျဉ်းစွမ်းအားကို ရရှိလာပြန်သည်။

ထိုစည်းမျဉ်းများသည် အစစ်အမှန်စွမ်းအား မဟုတ်ပေ။ ဟန်မူယဲ့က နဂါးမိကျောင်း၏ ခန္ဓာကိုယ်ထဲမှ ရရှိလာသော ဉာဏ်အလင်းမှတစ်ဆင့် အစစ်အမှန်စည်းမျဉ်းစွမ်းအားကို ထိန်းချုပ်ထားသည်။

သို့သော် သူ၏ နားလည်မှုက အပေါ်ယံသာဖြစ်ပြီး လိုအပ်နေသေးသည်။

“တိတ်ဆိတ်ခြင်းစွမ်းအားက သေခြင်းရှင်ခြင်းစွမ်းအားနဲ့ မတူဘူး”

ဟန်မူယဲ့က ပတ်ဝန်းကျင်တွင်ရှိသော စည်းမျဉ်းစွမ်းအားကို အာရုံခံကြည့်လိုက်ပြီး အပြာရောင်အလင်းကို အသုံးပြု၍ သင်္ဘောပျံကို ကာကွယ်သည်။

ထိုစွမ်းအားသည် အင်မော်တယ်ဘုရင်မင်ဟယ်နှင့် သက်ဆိုင်ပြီး တိတ်ဆိတ်ခြင်းစွမ်းအားကို တားဆီးနိုင်သည်။

ထိုစွမ်းအားကြောင့် သင်္ဘောပျံပေါ်တွင်ရှိသော လူတိုင်းက စိတ်သက်သာရာရစွာ သက်ပြင်းချလိုက်ကြသည်။

သူတို့က တိတ်ဆိတ်ခြင်းစွမ်းအားကို ခုခံရန် ခက်ခဲနေပြီး အသက်စွမ်းအား ရပ်တန့်သွားသည်ဟု ခံစားရသည်။

သင်္ဘောပျံက ရှေ့ဆက်လာသည်။ အနက်ရောင်သားရဲတစ်ကောင် ပေါ်ထွက်လာပြီး သင်္ဘောပျံကို တားဆီးလိုက်သည်။

ထိုသားရဲသည် ပေတစ်ရာကြီးမားပြီး အနက်ရောင်ဖြစ်သည်။ ခြေလေးဖက်တွင် တိမ်တိုက်များ စုစည်းနေပြီး ခန္ဓာကိုယ်တွင် မီးတောက်အမှတ်အသားတစ်ခု ရှိသည်။

“ဒါက ဘယ်လိုသားရဲမျိုးလဲ”

မူဝမ်က မေးသည်။

ယွင်ကျင်းကလည်း သိချင်နေသည်။

“မီးတောက်တွေကို ဝါးမြိုနိုင်တဲ့ ကပ်ဘေးစားသုံးသူပဲ”

ဟန်မူယဲ့က ညင်သာစွာပြောသည်။

ထိုသားရဲက မီးတောက်များသာမက အလင်းရောင်ကိုလည်း ဝါးမြိုသည်။

ကပ်ဘေးစားသုံးသူက ပါးစပ်ဖွင့်လိုက်သောအခါတွင် ပတ်ဝန်းကျင်တွင်ရှိသော အလင်းရောင်က ပျောက်ကွယ်သွားပြီး အမှောင်ထုကိုသာ ချန်ရစ်ခဲ့သည်။

ကပ်ဘေးစားသုံးသူက ဆယ်ပေကြီးမားသော မီးလုံးတစ်လုံးကို ပါးစပ်မှတစ်ဆင့် သင်္ဘောပျံဆီသို့ ပစ်လွှတ်လိုက်သည်။

“ရိုင်းစိုင်းတဲ့သတ္တဝါ”

ကုန်းပတ်ပေါ်တွင်ရှိသော လုကောက ဓားဆွဲထုတ်သည်။

သူက အမြင်အာရုံကို မရရှိပေ။ သို့သော် အမှောင်ထုနှင့် ပေါင်းစပ်ထားနိုင်သည်။

ယခုအချိန်တွင် အလင်းမရှိသော အမှောင်ထုက သူ၏နယ်မြေ ဖြစ်လာသည်။

ဓားအလင်းသည် မှိန်ဖျော့နေပြီး အရှိန်အဝါကို သယ်ဆောင်မထားပေ။

သို့သော် ဓားချက်ကြောင့် ကပ်ဘေးစားသုံးသူ၏ မီးလုံးက ပေါက်ကွဲထွက်သွားသည်။

ပြန့်ကျဲသွားသော အလင်းရောင်သည် ပတ်ဝန်းကျင်ကို အလင်းပေးလိုက်သည်။

ပေထောင်ချီပတ်ဝန်းကျင်တွင် မ‌‌ရေမတွက်နိုင်သောသားရဲများ ရှိနေကြောင်း မြင်လိုက်ရသည်။

မီး‌တောက်အမှတ်အသားနှင့် ကပ်ဘေးစားသုံးသူအပြင် ချိုနှစ်ချောင်းကြားတွင် အနက်ရောင်မီးတောက်တစ်ခု ရှိနေသော အပြာရောင်မျက်လုံးနှင့် မီးခိုးရောင်သားရဲများလည်း ရှိကြသည်။

ကောင်းကင်တစ်သောင်းချောက်နက်တွင် ထူးခြားသော သားရဲများက နေရာအနှံ့တွင် ရှိနေကြသည်။

“သတ်”

လေ့ကျင့်ရေးမှူးလင်းက ဓားဆွဲထုတ်ပြီး ပျံသန်းလာသည်။ သူ၏ဓားက အလွန်အားကောင်းပြီး ခုတ်ချလိုက်သောအခါ ပေထောင်ချီပတ်ဝန်းကျင်တွင် လေပြင်းနှင့်မိုးခြိမ်းသံကို ပဲ့တင်ထပ်သွားစေသည်။

“ဘုန်း”

ရှေ့ဆုံးမှဦးဆောင်လာသော ကပ်ဘေးစားသုံးသူက ဓားချက်ကြောင့်လွင့်ထွက်သွားသည်။ နောက်တွင်ရှိသော တခြားသားရဲများကိုလည်း ဝင်တိုက်မိသွားသည်။

ထိုသားရဲများက ဒဏ်ရာမရသော်လည်း သွေးမျက်လုံးများ တစ်ခုပြီးတစ်ခု ပေါ်လာသည်။

အသက်စွမ်းအားသည် ပတ်ဝန်းကျင်တွင် ဖြာထွက်သွားသည်။

ဓားတစ်ချက်သည် သားရဲအများအပြားကို သေဆုံးသွားစေခဲ့သည်။