အခန်း (၁၀၉၁)

“ဝီ”

ဟန်မူယဲ့က မီးပြင်းဖိုကို ဖွင့်လိုက်ပြီး လက်ထဲတွင်ရှိသော ကုသဆေးကို ပစ်ထည့်သည်။

အာခီမီအတွက် သင့်တော်သော ဝိညာဉ်ဆေးပင်များ မရှိသောကြောင့် သူက ထိုဆေးလုံးကို အသုံးပြုရန်သာ တတ်နိုင်သည်။

သာမန်ဆေးလုံးကို ပြုပြင်ရန်အတွက် နာရီဝက်သာ ကြာလိမ့်မည်။

မီးပြင်းဖိုကို ပြန်ဖွင့်လိုက်သောအခါ ထွက်ပေါ်လာသည့် ‌ဆေးရနံ့ကြောင့် ဘေးတွင်ရှိသော ကျားနက်က ခေါင်းမော့လိုက်သည်။

ရွှေရောင်အင်းကွက်များနှင့် ဖြူဖွေးနေသော ဆေးလုံးက ဟန်မူယဲ့၏ လက်ထဲသို့ ရောက်လာသည်။

ယခုအချိန်တွင် ဆေးလုံးက တောက်ပနေပြီး ယခင်ဆေးလုံးနှင့် မတူတော့ပေ။

ဆေးလုံး၏ ကုသနိုင်စွမ်းက အနည်းဆုံး သုံးဆတိုးသွားသည်။

ဟန်မူယဲ့က ဆေးလုံးကို သိမ်းလိုက်ပြီး မီးပြင်းဖိုကို ပုတ်သည်။ သူက တစ်ဖက်သို့လှည့်ပြီး လက်မြှောက်၍ ကျားနက်၏ရှေ့တွင်ရှိသော အစစ်အမှန်ဝိညာဉ်အရိုးကို ပြန်သိမ်းသည်။

ကျားနက်က တစ်ကိုယ်လုံးကို ခါယမ်းလိုက်ပြီး သွေးချီစွမ်းအားကို ထုတ်လွှတ်နေသည်။

ထိုနှစ်နာရီသည် သူ့အတွက် အလွန်အကျိုးရှိသည်။

“မီးပြင်းဖိုကို စောင့်ကြည့်ထားလိုက်”

“နောက်ကျရင် ဒီလိုသတ္တုရိုင်းတွေကို ရှာထားပါ။ ပုံမှန်အတိုင်း သတ္တုရိုင်းအပိုင်းအစ တစ်ရာအတွက် အစစ်အမှန်ဝိညာဉ်အရိုးကို နှစ်နာရီကြည့်ခွင့်ပေးမယ်”

ကျားနက်က သူ့စကားကို နားလည်သောကြောင့် ဟန်မူယဲ့က ပြောလိုက်သည်။

ကျားနက်က အစစ်အမှန်ဝိညာဉ်အရိုးနှင့် ခွဲခွာရန် တွန့်ဆုတ်နေပြီး အကြိမ်ရေအနည်းငယ် ညည်းညူသည်။ သို့သော် နောက်ဆုံးတွင် သဘောတူလိုက်ရသည်။

သဘောမတူပဲ မနေရဲပေ။

ဟန်မူယဲ့၏ ရွှေကျီးကန်းမီးတောက်က သူ့ကို တုန်ခါသွားစေနိုင်သည်။

ကျားနက်က သဘောတူလိုက်သောကြောင့် ဟန်မူယဲ့က ခြင်းတောင်းကိုသယ်ပြီး စိတ်ကျေနပ်စွာ လှည့်ထွက်သွားသည်။

“တကယ်လို့ အဖိုးတန်ဆေးပင်တွေရှိရင်လည်း လိုချင်တယ်”

ထိုသို့ဖြင့် သူက ချောက်နက်ဓားကို ကောက်ယူပြီး လိုဏ်ဂူထဲမှ ထွက်သွားသည်။

မီးပြင်းဖိုကိုတော့ ချန်ထားခဲ့သည်။

ကျင့်ကြံခြင်းနည်းစနစ်နှင့် ဓားများကို ရှင်းပြရန် လွယ်ကူသည်။ သို့သော် မီးပြင်းဖိုကို ရှင်းပြရန် ခက်ခဲသည်။

ဟန်တောင်တန်းကလန်၏ လူများက ရိုးသားသော်လည်း ငတုံးများ မဟုတ်ကြပေ။

သူက ရွှေကျီးကန်းကလန်နှင့် ပေါင်းစပ်ချင်လျှင် လက်ရှိအထောက်အထားကို အသိအမှတ်ပြုရမည်။

ဟန်တောင်တန်းရွှေကျီးကလန်၏ ခေါင်းဆောင်ငယ် ဟန်မူယဲ့ ဖြစ်သည်။

သူက ဟန်တောင်တန်းကလန်သို့ လျင်မြန်စွာ ပြန်ရောက်လာခဲ့သည်။

ဓားရှည်ကို အသုံးပြု၍ ပျံသန်းပြီး နာရီဝက်အတွင်း တောင်ခြေသို့ ရောက်လာသည်။

သို့သော် ဟန်မူယဲ့က အဆီအနှစ်ဝိညာဉ်၏ စွမ်းအားကို အသုံးမပြုခဲ့ပေ။

အကယ်၍ သူက ဓားပျံကို အစွမ်းကုန်အသုံးပြုလိုက်လျှင် မိုင်တစ်ထောင်ကို အသက်ရှူကြိမ်တစ်ရာအတွင်း ဖြတ်သန်းနိုင်သည်။

ဤနေရာသည် မဟာတောရိုင်းကမ္ဘာ ဖြစ်သည်။ ကောင်းကင်နှင့်မြေကြီးက အလွန်တည်ငြိမ်ပြီး အသက်ရှူကြိမ်တစ်ရာအတွင်း မိုင်တစ်ထောင်ကို ဖြတ်သန်းချင်လျှင် အစစ်အမှန်ဝိညာဉ်အဆင့် ကျွမ်းကျင်သူတစ်ယောက် ဖြစ်နေရန် လိုအပ်သည်။

ဟန်မူယဲ့ ပြန်ရောက်လာသောအခါ ဟန်ချောင်ဟူနှင့် တခြားလူများက စိတ်သက်သာသွားကြသည်။

ဟန်မူယဲ့က အလွန်သန်မာပြီး ဤပတ်ဝန်းကျင်တွင် ပြိုင်ဘက်ကင်းကြောင်း သိထားသော်လည်း ကလန်တစ်ခုလုံး၏ထောက်တိုင် ဖြစ်နေသည်။ ဟန်မူယဲ့မရှိလျှင် ဟန်တောင်တန်းရွှေကျီးကလန်က တခြားကလန်များနှင့် ယှဉ်နိုင်မည်မဟုတ်ပေ။

“ရေနဂါးနက်ကလန်ခေါင်းဆောင် ဖုန်းကျန်းနဲ့ ကျားသစ်နက်ကလန်ခေါင်းဆောင် လုချန်လင်းလား”

ဟန်မူယဲ့၏ မျက်နှာထားက ပြောင်းလဲသွားသည်။

ဖုန်းကျန်းက အမှန်တကယ်ပင် အလည်ရောက်လာခြင်း ဖြစ်လိမ့်မည်။ ကျားသစ်နက်ကလန်ကတော့ ရည်ရွယ်ချက်ကောင်းများ မရှိနိုင်ပေ။

“ဒါက ခေါင်းဆောင်ဖုန်းကျန်းရဲ့ လက်ဆောင်ပါ”

“ဒါက လုချန်လင်းပေးလိုက်တဲ့ ဓားတိုပါ”

ဟန်ယွင်ဟယ်က လက်ဆောင်များကို ပြသလိုက်သည်။

လူတိုင်းက ထွက်သွားသောအခါတွင် ဟန်မူယဲ့က တင်ပျဉ်ခွေထိုင်ပြီး ကျင့်ကြံနေခဲ့သည်။ သူက ခေါင်းဆောင်ဟောင်းပေးခဲ့သော ကောင်းကင်ဖိနှိပ်ခြင်းနည်းစနစ်ကို အသုံးပြု၍ အဆီအနှစ်ဝိညာဉ် အဌမအဆင့် ကျင့်ကြံခြင်းကို တည်ငြိမ်စေခဲ့သည်။ ထို့အပြင် ကလန်၏ နည်းစနစ်တချို့ကိုလည်း တွက်ချက်ပေးခဲ့သည်။

လှံပညာရပ်၊ မြားပစ်ပညာရပ် စသည်ဖြင့် ဖြစ်သည်။

ထိုနည်းစနစ်များကို ကလန်သားအများစုက လေ့ကျင့်ကြသည်။ ယခုအချိန်တွင် ဟန်မူယဲ့က နည်းစနစ်များကို ပြုပြင်ပြီး ပိုမိုထိရောက်လာစေသည်။

မူရင်းနည်းစနစ်များသည် လုံလောက်သော ရင်းမြစ်စွမ်းအားကို ထုတ်မပေးနိုင်ပေ။ ထို့ကြောင့် သွေးမျိုးဆက်နိုးထရန် ခက်ခဲလိမ့်မည်။

နည်းစနစ်များကို ကောင်းကင်နှင့်မြေကြီး၏ လက်ရှိစွမ်းအားနှင့် ကိုက်ညီအောင် ပြုပြင်ထားမှသာ ကလန်သားများက သွေးမျိုးဆက်စွမ်းအားကို နိုးထနိုင်လိမ့်မည်။

ထို့အပြင် ကလန်သားများက ထိုနည်းစနစ်များနှင့် ရင်းနှီးသောကြောင့် ပြုပြင်ထားသော နည်းစနစ်ကို လေ့ကျင့်ရန် ပိုမိုလွယ်ကူလိမ့်မည်။

နောက်ရက်များတွင် ဟန်မူယဲ့က ပြုပြင်ထားသော နည်းစနစ်များကို ထုတ်ပေးခဲ့သည်။ ထို့နောက် ဝိညာဉ်ဆေးပင်များကို စုစည်းပြီး အာခီမီအတွက် ပြင်ဆင်နေသည်။

ဟန်တင်းရီက အဆင့်တက်သွားသည်။ ထို့အပြင် လေးကိုင်းအသစ်ကိုလည်း ရထားသောကြောင့် ဟန်မူယဲ့က အမဲလိုက်ရန် စိတ်ပူနေစရာမလိုတော့ပေ။

ဤရက်များတွင် ကလန်က အစားအစာ ကြွယ်ဝနေသည်။ က‌လေးများက ပျော်ရွှင်စွာ ဆော့ကစားနေကြသည်။

ထိုသို့ဖြင့် လဝက်ကုန်ဆုံးသွားသည်။

“ခေါင်းဆောင်ငယ်၊ ဒါက အကြီးအကဲပေးလိုက်တဲ့ ဝိညာဉ်ဆေးပင်တွေပါ”

အမြီးဖြူမြေခွေးကလန်သားများက ဝိညာဉ်ဆေးပင်များကို ယူဆောင်ပြီး ဟန်တောင်တန်းသို့ ရောက်လာခဲ့ကြသည်။

ဟူချန်ကို စုဆောင်းပေးရန် ပြောခဲ့သော ဝိညာဉ်ဆေးပင်များ ဖြစ်ကြသည်။

“ဒီဆေးပင်တွေနဲ့ အရောင်းအဝယ်ကိစ္စကို ပြောဖို့အတွက် ကလန်ခေါင်းဆောင်ဆက်ခံပွဲအထိ စောင့်နေမယ်လို့ အကြီးအကဲက ပြောလိုက်ပါတယ်”

သားရေဝတ်စုံနှင့် သက်လတ်ပိုင်းအရွယ်လူကြီးက လက်နှစ်ဖက်ကိုဆုပ်ကိုင်ပြီး ပြောလိုက်သည်။

ဟူချန်က ဟန်တောင်တန်းကလန်၏ အခြေအနေကို နားလည်ပုံပေါ်သည်။

ဟန်ချောင်ဟူက စိတ်သက်သာရာရစွာ သက်ပြင်းချသည်။

မတတ်နိုင်ပေ။ ဟန်တောင်တန်းကလန်က ယခုအချိန်တွင် အလွန်ဆင်းရဲနေသည်။

ခေါင်းဆောင်ငယ်လိုအပ်သော ဝိညာဉ်ဆေးပင်များက တန်ဖိုးကြီးသည်။ ကလန်က အလဲအလှယ်အတွက် တခြားပစ္စည်းများကို ထုတ်မပေးနိုင်ပေ။

“အဲဒီလိုလုပ်လို့ ဘယ်ဖြစ်မလဲ”

ဟန်မူယဲ့က ခေါင်းခါလိုက်ပြီး ဖြူဖွေးနေသောဆေးလုံးကို ထုတ်ပေးသည်။

“ဒီကုသဆေးက ဒီဆေးပင်တွေအတွက် လုံလောက်ပါတယ်”

ပုံမှန်အတိုင်းဆိုလျှင် ဆေးလုံးက ဝိညာဉ်ဆေးပင်များအတွက် မလုံလောက်ပေ။ သို့သော် ထိုဆေးလုံးတွင် တခြားလူများ ပြုလုပ်မပေးနိုင်သော သန့်စင်သည့် ဆေးစွမ်းအားကို ပိုင်ဆိုင်သည်။

ထို့ကြောင့် ဆေးလုံးက တန်ဖိုးကြီးသွားသည်။

အမြီးဖြူမြေခွေးကလန်၏ သက်လတ်ပိုင်းအရွယ်လူကြီးက ဆေးလုံးကို အာရုံခံကြည့်လိုက်ပြီး အံ့အားသင့်သွားသည်။

သူတို့က ပတ်ဝန်းကျင်တွင် အရောင်းအဝယ်လုပ်နေသောကြောင့် ထိုကုသဆေး၏ တန်ဖိုးကို ကောင်းမွန်စွာ နားလည်သည်။

သတင်းများအရ ထိုသို့ သန့်စင်သော ကုသဆေးမျိုးသည် သူတို့ယူလာသော ဝိညာဉ်ဆေးပင်များ၏ နှစ်ဆနှင့် လဲလှယ်နိုင်သည်။

“ခေါင်းဆောင်ငယ်၊ စိတ်ချပါ။ ကျွန်တော်က ဒီဆေးလုံးကို အကြီးအကဲဟူချန်ဆီ ယူသွားလိုက်ပါမယ်”

ထိုလူက လေးနက်စွာ ပြောလိုက်သည်။

သူ့အမြင်တွင် ဟန်တောင်တန်းကလန်၏ ခေါင်းဆောင်ငယ်က ကောင်းမွန်သော စိတ်ထားကို ဖော်ပြနေသည်။

ဟန်ချောင်ဟူနှင့် တခြားလူများက ထိုဆေးလုံး၏အကြောင်းကို မသိပေ။ သို့သော် ယခင်တစ်ခေါက်က ဟန်ယွင်ဟယ်အတွက် ဆေးလုံးတစ်လုံး ထုတ်ပေးခဲ့သည်။ ထို့ကြောင့် ခေါင်းဆောင်ဟောင်း၏ အမွေအနှစ် ဖြစ်လိမ့်မည်ဟု ယူဆလိုက်ကြသည်။

သို့သော် ခေါင်းဆောင်ငယ် မှာယူထားသော ဝိညာဉ်ဆေးပင်များ၏ အကြောင်းကိုတော့ မသိကြပေ။

အမြီးဖြူမြေခွေးကလန် ထွက်သွားသောအခါတွင် ဟန်မူယဲ့က ဟန်ချောင်ဟူနှင့် တခြားလူများကို ကြည့်လိုက်သည်။

“ငါက တောအုပ်ထဲမှာ အကြီးအကဲတစ်ယောက်ရဲ့ အမွေအနှစ်ကို တွေ့ခဲ့တယ်။ အဲဒီနေရာကို ကျားနက်တစ်ကောင်က စောင့်ကြပ်နေတယ်”

“အဲဒီမှာ မီးပြင်းဖိုနဲ့ တခြားပစ္စည်းတွေလည်း ရှိတယ်”

ဟန်မူယဲ့က လဝက်အချိန်အတွင်း၌ များပြားသော ပစ္စည်းများကို ထုတ်ပေးခဲ့သည်။ ယခုအချိန်တွင် သူက ထိုအရာများအားလုံးကို ကျားနက်ဆီသို့ ပုံချလိုက်သည်။

သူက ကျားနက်၏လိုဏ်ဂူတွင် တချို့အရာများကိုလည်း တမင်သက်သက် ပြင်ဆင်ထားခဲ့သည်။

သူက ဟန်ချောင်ဟူနှင့် တခြားလူများကို ထိုနေရာသို့ ခေါ်သွားလိုက်သောအခါတွင် မီးပြင်းဖို၊ သတ္တုရိုင်းတချို့နှင့် ပြန့်ကျဲနေသော အင်းကွက်များကို တွေ့ခဲ့ရသည်။ ဟန်ချောင်ဟူတို့က သူ့ကို ချက်ချင်း ယုံကြည်သွားကြသည်။

သူတို့၏ ခေါင်းဆောင်ငယ်က ပါရမီကောင်းပြီး ကျင့်ကြံဆင့်မြင့်မားသည့်အပြင် ထူးခြားသည့် ကံကောင်းခြင်းကိုလည်း ပိုင်ဆိုင်ထားသည်။

‌ခေါင်းဆောင်ငယ်၏စကားအရ အာခီမီတွင် ကျွမ်းကျင်လာလျှင် ကလန်သားများ၏ ကျင့်ကြံခြင်းက ဆယ်ဆပိုမြန်လာလိမ့်မည်။

ဟန်ချောင်ဟူနှင့် တခြားလူများက တောအုပ်ထဲမှ တိတ်ဆိတ်စွာ ထွက်လာကြသည်။

နောက်ပိုင်းတွင် အမဲလိုက်အဖွဲ့များအတွက် တာဝန်တစ်ခု တိုးလာသည်။ ကျားနက်စုစည်းထားသော သတ္တုရိုင်းများကို ကလန်သို့ ပြန်ယူလာရမည်။

သို့သော် သတ္တုရိုင်းများကို သန့်စင်ရခြင်းသည် ထိရောက်မှုမရှိပေ။ ထို့ကြောင့် ဟန်မူယဲ့က သတ္တုရိုင်းများကို စုစည်းထားပြီး မိုင်သုံးထောင်အကွာတွင်ရှိသော သမင်စိမ်းကလန်သို့ပို့ရန် စီစဉ်ထားသည်။

သမင်စိမ်းကလန်တွင် အရည်ကျိုရန်သင့်တော်သော ကမ္ဘာမြေမီးတောက်သွေးကြော ရှိသည်။ ထို့အပြင် ပန်းပဲပညာရှင်နှစ်ယောက်ကိုလည်း ပိုင်ဆိုင်ထားသည်။ သူတို့သန့်စင်ထားသော ပစ္စည်းများက အကြမ်းထည်ဆန်သော်လည်း အသုံးပြုနိုင်သည်။

“ဝီ”

မီးပြင်းဖိုက တုန်ခါသွားပြီး ကျောက်စိမ်းနှင့်တူသော ဆေးလုံးသုံးလုံး ပေါ်ထွက်လာသည်။

ဆေးလုံးများ ပေါ်ထွက်လာသောကြောင့် လေထုထဲတွင် ဆေးရနံ့များဖြင့် ပြည့်နှက်သွားသည်။

ဟန်မူယဲ့က ဆေးလုံးများကို သိမ်းလိုက်ပြီး ဆေးလုံးတစ်လုံးကို စိတ်အားထက်သန်စွာ စောင့်ဆိုင်းနေသော ကျားနက်ဆီသို့ ပေးလိုက်သည်။

ကျားနက်က ဆေးလုံးကိုဖမ်းယူပြီး မြိုချလိုက်သည်။

ကျားနက်၏ သွေးနှင့်ချီက လှုပ်ရှားသွားပြီး ဆယ်ပေခန့်ရှည်လျားသော ခန္ဓာကိုယ်က ပေနှစ်ဆယ်အထိ ဖြည်းဖြည်းချင်း ကြီးထွားလာသည်။

ထိုသားရဲက အဆင့်တက်သွားပုံရသည်။

မှိန်ဖျော့သော အပြာရောင်ကျားပုံရိပ်တစ်ခု ပေါ်လာသည်။

ထိုကျားနက်က အဆီအနှစ်ဝိညာဉ် သတ္တမအဆင့်တွင် ရှိနေသည်။

ထိုသားရဲ၏ ခွန်အားနှင့် သွေးမျိုးဆက်စွမ်းအားအရ မိုင်သောင်းချီပတ်ဝန်းကျင်တွင် ပြိုင်ဘက်မရှိပေ။

ဤတောအုပ်ထဲတွင် ရန်သူအနည်းငယ်သာ ရှိသည်။

ကျားနက်က ပျော်ရွှင်စွာ ဟိန်းဟောက်လိုက်သည်။

“အရမ်းပျော်မနေနဲ့။ ငါ့ဆေးလုံးကိုရဖို့ လွယ်တာမဟုတ်ဘူး”

ဟန်မူယဲ့က တီးတိုးပြောလိုက်ပြီး ကျားနက်၏ ဟိန်းဟောက်သံကို နှောင့်ယှက်သည်။

ကျားနက်က ညည်းညူလိုက်ပြီး နာခံမှုရှိသော မျက်နှာထားဖြင့် ဟန်မူယဲ့ကို ကြည့်သည်။

“ငါက နှစ်ရက်နေရင် သမင်စိမ်းကလန်ကို သွားမယ်။ မင်းက လှည်းကို ဆွဲပေးရမယ်”

ဟန်မူယဲ့က ပြောသည်။

‘လှည်းကို ဆွဲပေးရမှာလား’

‘လှည်းကို ဆွဲပေးရမှာတဲ့လား’

‘ဂုဏ်သိက္ခာကြီးမားတဲ့ အဆီအနှစ်ဝိညာဉ်သတ္တမအဆင့် သားရဲက လှည်းကို ဆွဲရမှာလား’

ကျားနက်က မျက်လုံးပြူးသွားပြီး ကြမ်းတမ်းသောမျက်နှာထားကို ဖော်ပြသည်။

သို့သော် ဟန်မူယဲ့က သူ့ကို စိုက်ကြည့်နေသောကြောင့် နောက်တွန့်သွားပြီး တွန့်ဆုတ်စွာ ခေါင်းညိတ်သည်။

ဟန်မူယဲ့က သန့်စင်ထားသော ဆေးလုံးများကို သိမ်းလိုက်သည်။ ထို့နောက် ဆေးပင်များနှင့်ပြည့်နေသော ခြင်းတောင်းကိုယူပြီး ချောက်နက်ဓား၊ အသက်ဓားနှင့်အတူ လိုဏ်ဂူထဲမှ ထွက်သွားသည်။

သူက ဓားကိုအသုံးပြု၍ ပျံသန်းလာပြီး ဟန်တောင်တန်းကလန်သို့ ပြန်ရောက်သွားသည်။ သူက အတွေးတစ်ချက်နှင့်အတူ လျင်မြန်စွာ ဆင်းသက်လိုက်သည်။

ဟန်တောင်တန်းကလန်နှင့် မိုင်သုံးဆယ်အကွာတွင် ပုံရိပ်ဆယ်ခုကျော်က တိတ်ဆိတ်စွာ လှုပ်ရှားနေကြသည်။

“လူသားတွေလား”

ထိုပုံရိပ်များက လူသားများ ဖြစ်ကြသည်။

ဟန်မူယဲ့၏ မျက်လုံးများက အေးစက်သွားသည်။

ယခုအချိန်တွင် သူက ရွှေကျီးကန်းဖြစ်ပြီး လူသားတစ်ယောက် မဟုတ်ပေ။

လူသားမျိုးနွယ်၏ ကောင်းကင်တစ်သောင်းတိုင်းပြည်က ရွှေကျီးကန်းများကို အမဲလိုက်နေခဲ့သည်။

ထိုလူသားများက ဟန်တောင်တန်းကလန်ကို တိုက်ခိုက်ရန်အတွက် ရောက်လာခြင်း ဖြစ်လိမ့်မည်။

သို့သော် ယခင်ခေါင်းဆောင်ဟောင်း ဟန်ချီက အသက်စွန့်ပြီး လူသားကျွမ်းကျင်သူများကို သတ်ဖြတ်ခဲ့သောကြောင့် ဟန်တောင်တန်းရွှေကျီးကလန်က နှစ်တစ်ရာကြာသည်အထိ ငြိမ်းချမ်းနေခဲ့သည်။

ထိုလူသားများက အဘယ်ကြောင့် ရောက်လာခဲ့သနည်း။