အခန်း (၁၀၉၇)

အဆီအနှစ်ဝိညာဉ် အဌမအဆင့်သည် မိုင်တစ်သိန်းပတ်ဝန်းကျင်တွင် ထိပ်တန်းအဆင့် ကျွမ်းကျင်သူ ဖြစ်သည်။

ထိုကျင့်ကြံဆင့်သည် နယ်မြေတစ်ခုကို ဖိနှိပ်ထားနိုင်သည်။

သို့သော် ဟန်မူယဲ့၏ ကျင့်ကြံဆင့်က မရိုးရှင်းပေ။ သူက ရွှေကျီးကန်းသွေးမျိုးဆက်ကို နိုးထခဲ့သည်။

ရွှေကျီးကလန်သည် မဟာတောရိုင်းကမ္ဘာ၏ ထိပ်တန်းအဆင့်မျိုးနွယ်တစ်ခု ဖြစ်ပြီး မဟာနေမင်းရွှေကျီးကန်းသည် လောကကို အလင်းပေးနေသည်။

ရွှေကျီးကလန်၏ သွေးမျိုးဆက်က အလွန်အားကောင်းပြီး သာမန်ကလန်များက မယှဉ်နိုင်ကြပေ။

ဟန်မူယဲ့က သွေးမျိုးဆက်ကို နိုးထခဲ့ပြီး အဆီအနှစ်ဝိညာဉ် အဌမအဆင့်တွင် ရှိနေသည်။ သူက မိုင်သိန်းချီပတ်ဝန်းကျင်တွင် ပြိုင်ဘက်ကင်းသည်။

ရေနဂါးနက်ကလန်ခေါင်းဆောင် ဖုန်းကျန်း၏မျက်နှာထားက ပြောင်းလဲသွားသည်။ သူ့နောက်တွင်ရှိသော ရေနဂါးနက်ကလန်၏ ကျွမ်းကျင်သူနှစ်ယောက်ကလည်း ဖြူဖျော့သွားသည်။

ဖုန်းကျန်း၏ ကျင့်ကြံဆင့်နှင့် ခွန်အားသည် နယ်မြေတစ်ခုကို ဖိနှိပ်နိုင်ခဲ့သည်။

ဟန်တောင်တန်းရွှေကျီးကလန်ကပင် မယှဉ်နိုင်ခဲ့ပေ။

သို့သော် ယခုအချိန်တွင် ဟန်တောင်တန်းရွှေကျီးကလန်မှ ခေါင်းဆောင်ငယ်၏ခွန်အားသည် ဖုန်းကျန်းကို အပြည့်အဝ ကျော်လွန်သွားခဲ့သည်။

အနာဂတ်တွင် ဟန်တောင်တန်းရွှေကျီးကလန်က မိုင်တစ်သိန်းပတ်ဝန်းကျင်တွင် နံပတ်တစ်ကလန် ဖြစ်လာတော့မည်။

မီးမျက်လုံးမြွေကလန်၏ ခေါင်းဆောင် ချီယွင်လျန်က ကြောင်အနေပြီး ပျော်ရွှင်သွားသည်။

သူက မှန်ကန်သော ရွေးချယ်မှုကို ပြုလုပ်ခဲ့သည်။

“သူက အဆီအနှစ်ဝိညာဉ် အဌမအဆင့်မှာပဲ”

“ရွှေကျီးကန်းသွေးမျိုးဆက်ကိုလည်း အပြည့်အဝ နိုးထခဲ့တယ်”

ကြောက်ရွံ့နေသော အော်သံများနှင့်အတူ အနက်ရောင်ဝတ်စုံနှင့် အကြီးအကဲနှစ်ယောက်က လျင်မြန်စွာ နောက်ဆုတ်သွားကြသည်။

သူတို့၏ရှေ့တွင် အလောင်းခုနစ်ခု၊ ရှစ်ခုခန့် ရှိနေသည်။

ပတ်ဝန်းကျင်တွင် ပိုမိုများပြားသော လူသားများက မီးတောက်ကြောင့် ပြာကျသွားကြသည်။

အဆီအနှစ်ဝိညာဉ် သတ္တမအဆင့်တွင်ရှိသော သူတို့နှစ်ယောက်က ခုခံနိုင်ရုံသာ ဖြစ်သည်။

သို့သော် သူတို့က အဆီအနှစ်ဝိညာဉ် အဌမအဆင့်ကို တားဆီးနိုင်မည်မဟုတ်ပေ။

“ဝီ”

ဟန်မူယဲ့က လက်ထဲတွင်ရှိသော လှံရှည်ကို မြှောက်လိုက်သည်။ သူ၏ ရွှေရောင်မျက်လုံးများက သတ်ဖြတ်လိုစိတ်ကို ဖော်ပြနေသည်။

ဟန်မူယဲ့က ပြိုင်ဘက်ကင်း တိုက်ပွဲဆန္ဒဖြင့် သတ်ဖြတ်ခြင်းဆန္ဒကို အမြဲ စုစည်းခဲ့သည်။

သတ်ဖြတ်ခြင်းဆန္ဒက ပတ်ဝန်းကျင်တွင် ပျံ့နှံ့သွားပြီး ပြိုင်ဘက်၏စိတ်ဓာတ်ကို တိုက်စားသည်။ သူတို့က ခွန်အားထုတ်သုံးရန် ခက်ခဲလာသည်။

သူတို့၏ နှလုံးသားထဲမှ ထွက်ပေါ်လာသော ကြောက်ရွံ့စိတ်ကို ဖိနှိပ်ရန် ခက်ခဲသည်။

“ငါတို့ မလွတ်မြောက်နိုင်ဘူး ....”

အကြီးအကဲတစ်ယောက်က ရေရွတ်လိုက်ပြီး တိုက်ခိုက်လိုစိတ် ပျောက်ဆုံးသွားသည်။

တခြားတစ်ယောက်က အံကြိတ်ထားပြီး ဝင်္ကပါပြားတစ်ခုကို ဆင့်ခေါ်သည်။

ဝင်္ကပါပြားက လည်ပတ်နေပြီး ရွှေအလင်းကို ထုတ်လွှတ်လိုက်သည်။

“ချန်ယုကျီ၊ ရွှေကျီးကလန်ကို ရှင်းပြီးပြီလား”

“သွေးမျိုးဆက်နိုးထလာတဲ့ ရွှေကျီးကန်းက တကယ်ရှိနေတာလား”

ဝင်္ကပါပြားက ခမ်းနားသောအသံကို ထုတ်ပေးသည်။

ဝင်္ကပါပြားကို အသက်သွင်းလိုက်သော တာအိုတန်ခိုးရှင်၏ မျက်နှာက ဖြူဖျော့နေသည်။ သူက အံကြိတ်ထားပြီး ဟန်မူယဲ့၏ ဖြည်းဖြည်းချင်းမြင့်တက်လာသော လှံရှည်ကို ကြည့်သည်။

“ရွှေကျီးကန်းက သွေးမျိုးဆက်နိုးထလာပြီ ....”

သူ၏ စကားသံကို ဟန်မူယဲ့၏ လှံရှည်က နှောင့်ယှက်လိုက်သည်။

လှံရှည်က ရွှေအလင်းစီးကြောင်းကို သယ်ဆောင်ထားပြီး သူ့ဆီသို့ ဖျတ်ခနဲ ရောက်လာသည်။

လေပြင်းများက တိုက်ခတ်နေပြီး ကောင်းကင်နှင့်မြေကြီး၏စွမ်းအားက အဖြူအမည်းပြောင်းသွားသည်။

“သတ်”

ဟန်မူယဲ့က ငရဲမှထွက်ပေါ်လာသကဲ့သို့ အော်ဟစ်သည်။ တစ်ချိန်တည်းမှာပင် ထိုအသံက ကောင်းကင်ထက်တွင်ရှိသော နေမင်းကဲ့သို့ ခမ်းနားနေသည်။

လှံရှည်က ရွှေကျီးကန်းသုံးကောင်အဖြစ် ပြောင်းလဲသွားပြီး လူအိုကြီးကို ပစ်မှတ်ထားသည်။

“နေသုံးစင်းကောင်းကင်ကိုချုပ်နှောင်ခြင်း”

ဟန်တင်းရီက ရွှေကျီးကန်းများကို ကြည့်လိုက်ပြီး ထိတ်လန့်စွာ ပြောသည်။

ထိုနည်းစနစ်က ဟန်တောင်တန်းရွှေကျီးကလန်၏ အမွေအနှစ်နည်းစနစ် ဖြစ်သည်။

သူက ထိုနည်းစနစ်ကို လေ့ကျင့်ခဲ့ပြီး မှိန်ဖျော့သော ရွှေကျီးကန်းတစ်ကောင်၏ ပုံရိပ်ကိုသာ ဖော်ထုတ်နိုင်သည်။

ခေါင်းဆောင်ငယ်၏ နည်းလမ်းနှင့် မယှဉ်နိုင်ပေ။

ထို့အပြင် ခေါင်းဆောင်ငယ်က လူသားမုဆိုးများနှင့် ရင်ဆိုင်ရန်အတွက် လှံနည်းစနစ်ကို လွန်ခဲ့သော ရက်အနည်းငယ်တွင် လေ့လာခဲ့သည်။

ထိုလှံနည်းစနစ်က အုပ်စုလိုက်တိုက်ပွဲများအတွက် သင့်တော်သည်ဟုလည်း ပြောခဲ့သည်။

ခေါင်းဆောင်ငယ်၏ ပါရမီက အမှန်တကယ်ပင် ကောင်းကင်ကို ဆန့်ကျင်နေသည်။

“ပေါက်ကွဲစမ်း”

ရွှေကျီးကန်းသုံးကောင်၏ အလယ်တွင် ရှိနေသော တာအိုတန်ခိုးရှင်က အင်းကွက်သုံးခုကို ထုတ်ယူသည်။

အင်းကွက်သုံးခုက သွယ်ယှက်နေပြီး ဒိုင်းကာသုံးခုအဖြစ် ပြောင်းသွားသည်။

ဒိုင်းကာ၏ ကြယ်အလင်းက တောက်ပနေပြီး ရွှေကျီးကန်းများနှင့် ရင်ဆိုင်သည်။

“ဘန်း”

ရွှေကျီးကန်းသုံးကောင်က ရွှေအလင်းနှင့် ထိတွေ့ပြီး တာအိုတန်ခိုးရှင်နှင့် သုံးပေအကွာတွင် ရပ်တန့်သွားသည်။

ကြယ်အလင်းနှင့် ရွှေကျီးကန်းများက တောက်ပသော အလင်းရောင်ကို ထုတ်လွှတ်နေကြသည်။

“ဘာဖြစ်နေတာလဲ ချန်ယုကျီ။ ရွှေကျီးကလန်ကို မရှင်းရသေးဘူးလား”

တာအိုတန်ခိုးရှင်၏ ဦးခေါင်းထက်တွင်ရှိနေသော ဝင်္ကပါပြားထဲမှ နက်ရှိုင်းသောအသံ ပေါ်ထွက်လာပြန်သည်။

“ရွှေကျီးကန်းသွေးမျိုးဆက်က တကယ်နိုးထလာတာလား”

“ဘယ်မှာလဲ”

ထိုအသံက စိတ်မရှည်ဖြစ်နေပုံပေါ်သည်။

ချန်ယုကျီဟုခေါ်သော တာအိုတန်ခိုးရှင် လူအိုကြီးက စကားပြောတော့မည့်အချိန်တွင် သူ့ရှေ့တွင်ရှိသော ရွှေကျီးကန်းသုံးကောင်က ရုတ်တရက် ပေါက်ကွဲသွားသည်။

ရွှေကျီးကန်းသုံးကောင်က ကိုးကောင်အဖြစ် ခွဲထွက်သွားသည်။

ထို့နောက် လှံကိုးစင်းအဖြစ် ပြောင်းလဲပြီး ပြင်းထန်သော သတ်ဖြတ်လိုစိတ်ကို သယ်ဆောင်ထားသည်။

“အလင်းကိုးခုအဖြစ် ပြောင်းလဲခြင်း၊ နေသုံးစင်း ကောင်းကင်ချုပ်နှောင်ခြင်း နည်းစနစ်ရဲ့ အဆင့်မြင့်ကျွမ်းကျင်မှု”

အဝေးတစ်နေရာတွင်ရပ်နေသော ဟန်ချောင်ဟူက အံ့အားသင့်စွာ ရေရွတ်သည်။

ဟန်တောင်တန်းရွှေကျီးကလန်၏ လှံနည်းစနစ်က လေးနက်မှုသိပ်မရှိပေ။ သို့သော် အလင်းကိုးခု ခွဲနိုင်သည်အထိ လေ့ကျင့်ထားသော လူများက နှစ်တစ်သောင်းတွင် နှစ်ယောက်သုံးယောက်ခန့်သာ ရှိကြသည်။

အဆင့်မြင့်ကျွမ်းကျင်မှုကို ရရှိရန် နှစ်ထောင်ချီ၍ ကြာမြင့်နိုင်သည်။

သို့‌သော် သူတို့၏ ခေါင်းဆောင်ငယ်က လျင်မြန်စွာ နားလည်သွားခဲ့သည်။

ခေါင်းဆောင်ငယ်က ဟန်တောင်တန်းတွင် ရှိနေသည့်အတွက် နှမြောစရာကောင်းသည်။

အကယ်၍ တခြားကလန်တွင် ရှိနေလျှင် ပိုမိုအောင်မြင်နေလိမ့်မည်။

ဟန်ချောင်ဟူက နှလုံးခုန်မှားသွားပြီး အသက်ရှူသွင်းသည်။

ဟန်ယွင်ဟယ်က မကြာခင် ပြန်လာလိမ့်မည်။ မူယန်ရွှေကျီးကလန်က ကျွမ်းကျင်သူများကို စေလွှတ်နိုင်သည်။

အကယ်၍ မူယန်ရွှေကျီးကလန်မှ တစ်ယောက်ယောက် ရောက်လာခဲ့လျှင် ခေါင်းဆောင်ငယ်၏ ပါရမီကို တန်ဖိုးထားလိမ့်မည်။

ထိုအချိန်တွင် ခေါင်းဆောင်ငယ်က ကောင်းကင်ထက်တွင် ပျံသန်းနိုင်လိမ့်မည်။

“ဘုန်း”

လှံကိုးစင်းက ဒိုင်းကာများကို ထိုးဖောက်သွားသည်။ တာအိုတန်ခိုးရှင်က မခုခံနိုင်တော့ပေ။

လှံများက သူ၏ ခန္ဓာကိုယ်ကို ဖျက်ဆီးပစ်လိုက်သည်။

“ခလွမ်”

တာအိုတန်ခိုးရှင် သေဆုံးသွားသောကြောင့် ဝင်္ကပါပြားက ပြုတ်ကျလာသည်။

ဝင်္ကပါပြား၏ ရွှေအလင်းက ဖြည်းဖြည်းချင်း ပျောက်ကွယ်သွားသည်။

“ချန်ယုကျီ၊ ဘာဖြစ်နေတာလဲ”

“ချန်ယုကျီ ....”

ဝင်္ကပါပြား၏အသံကို ဟန်မူယဲ့က ဖြတ်ပြောလိုက်သည်။

“သူသေပြီ”

ဟန်မူယဲ့က အော်ဟစ်လိုက်ပြီး လှံကို မြှောက်ထားသည်။

“မင်းက ဘယ်သူလဲ။ ကောင်းကင်တစ်သောင်းတိုင်းပြည်ကို ရန်စရဲတယ် ....”

ရွှေအလင်းက ဒေါသတကြီး အော်ဟစ်လိုက်သည်။

“ဘန်း”

ဟန်မူယဲ့၏လှံရှည်က ဝင်္ကပါပြားကို ဖျက်ဆီးပစ်လိုက်သည်။

သူက အဝေးတစ်နေရာသို့ ထွက်ပြေးသွားသော လူသားမုဆိုးကို ကြည့်လိုက်သည်။

“ဝေါင်း ....”

တိတ်ဆိတ်စွာချောင်းမြောင်းနေသော ကျားနက်က အဆီအနှစ်ဝိညာဉ် ဆဌမအဆင့်တွင်ရှိသော လူသားမုဆိုးကို ခုန်အုပ်လိုက်သည်။

ထိုမုဆိုးက တိုက်ခိုက်လိုစိတ် မရှိသောကြောင့် ကျားနက်၏လက်ချက်ဖြင့် အောက်သို့ ချက်ချင်းပြုတ်ကျလာသည်။

ထို့နောက် အကြိမ်ရေအနည်းငယ် တွန့်လိမ်နေပြီး သေဆုံးသွားသည်။

အကယ်၍ အစွမ်းကုန်တိုက်ခိုက်လျှင် ကျားနက်ကို ယှဉ်ပြိုင်နိုင်လိမ့်မည်။

သို့သော် ကြောက်ရွံ့နေပြီး တိုက်ခိုက်လိုစိတ်မရှိသောကြောင့် တစ်ခါတည်း သေဆုံးသွားရသည်။

ဟန်မူယဲ့က လက်ထဲတွင်ရှိသော လှံရှည်ကို သိမ်းလိုက်သည်။ သူ့နောက်တွင်ရှိသော ရွှေကျီးကန်းပုံရိပ်ကလည်း ဖြည်းဖြည်းချင်း ပျောက်ကွယ်သွားသည်။

သူ့မျက်လုံးများက ရွှေရောင်သန်းနေဆဲ ဖြစ်သည်။ သူက အဆင့်မြင့်ကလန်သားတစ်ယောက်၏ အေးစက်မှု၊ မောက်မာမှုဖြင့် လူတိုင်းကို ကြည့်နေပုံရသည်။

“အားလုံးပဲ လူသားမျိုးနွယ်ရဲ့ မုဆိုးတွေကို ဖြေရှင်းပြီးသွားပြီ။ ဟန်တောင်တန်းရွှေကျီးကလန်က အကျိုးအမြတ်တွေကို ယူမှာမဟုတ်ဘူး’

ဟန်မူယဲ့က လက်နှစ်ဖက်ကို ဆုပ်ကိုင်ပြီး ဖုန်းကျန်းနှင့် တခြားလူများကို ပြောလိုက်သည်။ ထို့နောက် ကျားနက်၏ဘေးသို့ လျှောက်သွားပြီး ပွတ်သပ်ပေးလိုက်သည်။

ယနေ့တွင် ကျားနက်က ကောင်းမွန်စွာ လုပ်ဆောင်ခဲ့သည်။ သူက လူသားအများအပြားကို သတ်ဖြတ်ခဲ့သည်။

ထို့အပြင် ထွက်ပြေးနေသော အဆီအနှစ်ဝိညာဉ် ဆဌမအဆင့် ကျင့်ကြံသူကိုလည်း ချောင်းမြောင်းတိုက်ခိုက်ခဲ့သည်။

ဖုန်းကျန်းနှင့် တခြားလူများက တစ်ယောက်ကိုတစ်ယောက် ကြည့်လိုက်ပြီး ခေါင်းညိတ်သည်။ သူတို့က လူသားကျင့်ကြံသူများ၏ ပစ္စည်းများကို သိမ်းယူလိုက်ကြသည်။

လူသားများ၏ လက်နက်က ကောင်းမွန်သည်။ အများစုက အင်းကွက်နှစ်ခုပါသော လက်နက်များ ဖြစ်ကြသည်။

ရေနဂါးနက်ကလန်မှာပင် ထိုလက်နက်များ သိပ်မရှိပေ။

လူသားမျိုးနွယ်က သွေးမျိုးဆက်အရ မသန်မာသော်လည်း မဟာတောရိုင်းကမ္ဘာ၏ တခြားမျိုးနွယ်များ မယှဉ်နိုင်သော အထောက်အပံ့ပစ္စည်းအမျိုးမျိုးကို ပိုင်ဆိုင်ကြသည်။

ထို့ကြောင့် လူသားများက ကလန်များကြားတွင် တိုးတက်လာနိုင်ခဲ့သည်။

ကံကောင်းစွာဖြင့် မဟာတောရိုင်းကမ္ဘာက ကျယ်ပြန့်ပြီး လူသားတိုင်းပြည်နှစ်ခုက ထောင့်တစ်နေရာကိုသာ အပိုင်သိမ်းထားနိုင်သည်။

“ခေါင်းဆောင်ငယ်ဟန်က ဒီနေ့တိုက်ပွဲမှာ အကြီးမားဆုံး အကျိုးဆောင်ပေးခဲ့ပါတယ်”

မီးမျက်လုံးမြွေကလန်၏ခေါင်းဆောင် ချီယွင်လျန်က အပြုံးတစ်ခုနှင့်အတူ ပြောလိုက်ပြီး လက်ထဲတွင်ရှိသော ဓားမော့ကို ဟန်မူယဲ့ဆီသို့ ပေးသည်။

“ခေါင်းဆောင်ငယ်၊ ဒီဓားမော့က မင်းအတွက်ပါပဲ”

ဓားမော့က ရှစ်ပေရှည်လျားပြီး နက်မှောင်နေသည်။ ဓားသွားက အစိမ်းပုပ်ရောင်အလင်းဖြင့် တောက်ပနေပြီး အင်းကွက်နှစ်ခုကို ထည့်သွင်းထားသည်။ ဓားရိုးက ရစ်ခွေနေသော နဂါးတစ်ကောင်နှင့် ဆင်တူသည်။

ထိုဓားမော့က ရှားပါးသော ရတနာတစ်ပါး ဖြစ်သည်။

ထိုဓားမော့ကို မလိုအပ်လျှင်ပင် အနည်းဆုံး ပျက်စီးခြင်းပုလဲလုံးငါးရာဖြင့် ရောင်းစားနိုင်သည်။

ဝံပုလွေနက်ကလန်၏ ကျွမ်းကျင်သူနှစ်ယောက်ကလည်း တစ်ယောက်ကိုတစ်ယောက် ကြည့်လိုက်ပြီး ရရှိထားသော လှံရှည်ကို ပေးသည်။

အကယ်၍ ဟန်မူယဲ့က အဆီအနှစ်ဝိညာဉ် အဌမအဆင့်တွင် မရှိပဲ သွေးမျိုးဆက်ကို အသုံးမပြုနိုင်လျှင် သူတို့က ထိုသို့ ဆောင်ရွက်မည်မဟုတ်ပေ။

သူတို့က ဟန်မူယဲ့၏ဆုကြေးကြောင့် ရောက်လာခဲ့သည်။ ဟန်တောင်တန်းရွှေကျီးကလန်၏ ခေါင်းဆောင်ငယ်ကို အလေးအနက်မထားခဲ့ပေ။

ယခုအချိန်တွင် သူတို့၏ သဘောထားက ပြောင်းလဲသွားခဲ့သည်။

မဟာတောရိုင်းကမ္ဘာဖြစ်စေ၊ ကျင့်ကြံခြင်းလောကဖြစ်စေ ခွန်အားကိုသာ အလေးထားကြသည်။

ဟန်မူယဲ့က ခွန်အား‌ကောင်းသည်။ ထို့ကြောင့် ချီယွင်လျန်နှင့် တခြားလူများက လေးစားကြသည်။

သူတို့က မျက်နှာချိုသွေးရန်ပင် လုပ်နေကြသည်။

ဖုန်းကျန်းက တုံ့ဆိုင်းနေပြီး လက်ထဲတွင်ရှိသော ပုဆိန်တစ်လက်ကို ပေးလိုက်သည်။

“ဒါက အင်းကွက်သုံးခုနဲ့ ရတနာလက်နက်ပဲ။ ခေါင်း‌ဆောင်ငယ်ရဲ့ ခေါင်းဆောင်ရာထူးဆက်ခံပွဲအတွက် လက်ဆောင်လို့ သဘောထားလိုက်ပါ”

သူက တိုက်ရိုက်ဦးညွတ်ရန် မလိုလားသော အစစ်အမှန် ကျွမ်းကျင်သူလူအိုကြီးတစ်ယောက် ဖြစ်သည်။

သူက ဂုဏ်ပြုလက်ဆောင်ဟု ပြောခဲ့ပြီး ဆင်ခြေပေးလိုက်သည်။