အခန်း (၁၁၀၂)

ဟန်‌တောင်တန်းက လက်နက်များသာမက ဆေးလုံးကိုလည်း ရောင်းချသည်။

တိမ်တိုက်ယုန်ကလန်၏ ယုရွှမ်နှင့် ယုမင်က ဟန်မူယဲ့၏နောက်သို့ လိုက်လာပြီး အဆင့်မြင့်ဆေးလုံးများကို သန့်စင်နေကြသည်။

ဆေးလုံးနှင့် လက်နက်အရောင်းအဝယ်ကြောင့် ဟန်တောင်တန်းကလန်က မရေမတွက်နိုင်သော အရင်းအမြစ်များကို စုဆောင်းနိုင်ခဲ့သည်။

ဟန်တောင်တန်းရွှေကျီးကလန်၏ ကလန်သားရှစ်ထောင်ခန့်သည် အစွမ်းကုန်ကြိုးစား၍ ကျင့်ကြံနေကြသည်။ လက်ရွေးစင်များက လျင်မြန်စွာ တိုးတက်လာသည်။

ဟန်ယွင်ဟယ်၊ ဟန်တင်းရီနှင့် တခြားလူများက အဆီအနှစ်ဝိညာဉ် သတ္တမအဆင့်သို့ ရောက်လာကြသည်။

ဟန်ကျင်းနှင့် တခြားလူငယ်ဆယ်ယောက်ကျော်က အဆီအနှစ်ဝိညာဉ် ဆဌမအဆင့်တွင် ရှိနေကြသည်။

စတုတ္ထအဆင့်နှင့် တတိယအဆင့် လူငယ်များလည်း ရှိကြသည်။

အရေးအကြီးဆုံးအနေဖြင့် မဟာနေမင်းရွှေကျီးကန်း၏ ကောင်းချီးကြောင့် သွေးမျိုးဆက်နိုးထရန် ပိုမိုလွယ်ကူလာသည်။

တခြားရွှေကျီးကလန်များက ပါရမီရှင်များကို ဟန်တောင်တန်းတွင် လေ့ကျင့်ရန် စေလွှတ်ကြသည်။

သူတို့က သွေးမျိုးဆက်ကို နိုးထချင်ကြသည်။

ယခုအချိန်တွင် ဟန်တောင်တန်းရွှေကျီးကလန်၏ ‌ခေါင်းဆောင် ဟန်မူယဲ့က အဆီအနှစ်ဝိညာဉ် အဌမအဆင့်၏ အထွတ်အထိပ်တွင် ရှိနေသည်။

သူက နဝမအဆင့်သို့ရောက်ရန် အနည်းငယ်သာ လိုတော့သည်။

“‌‌ခေါင်းဆောင်၊ ခေါင်းဆောင်မူချန်ခုံး ရောက်လာပါတယ်”

အပြာရောင်ချပ်ဝတ်နှင့် ဟန်ကျင်းက လျင်မြန်စွာ ရှေ့တက်လာပြီး ဦးညွတ်၍ ပြောလိုက်သည်။

ဟန်မူယဲ့က ခေါင်းညိတ်သည်။ ခဏအကြာတွင် အနက်ရောင်ဝတ်စုံနှင့် အရပ်ရှည်ပြီး ခံ့ညားသောလူတစ်ယောက်က ခန်းဆောင်ထဲသို့ ဝင်လာခဲ့သည်။

ထိုလူ၏နောက်တွင် အပြာရောင်ဝတ်စုံနှင့် လူငယ်နှစ်ယောက် ရှိသည်။ သူတို့က ဟန်မူယဲ့ကို ကြည့်နေကြသည်။

“ခေါင်း‌ဆောင်ချန်ခုံး၊ မတွေ့ရတာကြာပြီ”

ဟန်မူယဲ့က ပြုံးလိုက်ပြီး ညင်သာစွာပြောသည်။

မူချန်ခုံးက ဟန်မူယဲ့ကို ကြည့်လိုက်ပြီး သက်ပြင်းချသည်။

“မင်းရဲ့ကျင့်ကြံဆင့်က အမြဲတမ်း တိုးတက်လာနေတာပဲ။ ငါ့ကို ခေါင်းကိုက်စေတယ်”

ထိုစကားများကြောင့် ဟန်မူယဲ့က ရယ်လိုက်ပြီး မူချန်ခုံးနှင့်အတူ ပါလာသော ရွှေကျီးကလန်၏ လူငယ်နှစ်ယောက်ကို ကြည့်သည်။

“နေလုံးနီကလန်ရဲ့ ယုယန်နဲ့ ငှက်တောင်ဖြူတောင်တန်းရဲ့ ထောင်ယွင်က ငါတို့ ရွှေကျီးကလန်ရဲ့ ပါရမီရှင်တွေပဲ”

မူချန်ခုံးက လေးနက်သောမျက်နှာထားဖြင့် လူငယ်နှစ်ယောက်ကို ညွှန်ပြသည်။

“ထုံးစံအတိုင်း နှစ်ပေါင်းသုံးဆယ် ကျင့်ကြံလိမ့်မယ်”

“နှစ်ပေါင်းသုံးဆယ်အတွင်း ရွှေကျီးကန်းသွေးမျိုးဆက်ကို မနိုးထနိုင်ရင် နောက်ထပ် နှစ်ပေါင်းသုံးဆယ် ကျင့်ကြံခွင့်ရမယ်”

ဟန်တောင်တန်းကလန်တွင်ရှိသော ရွှေကျီးကန်း၏ကောင်းချီးကို အသုံးပြု၍ မျိုးဆက်သစ်များကို ကျင့်ကြံခွင့်ပေးသည်။ ထိုသို့ဖြင့် သူတို့က ရွှေကျီးကန်းသွေးမျိုးဆက်ကို နိုးထရန် အခွင့်အရေးရလိမ့်မည်။

သို့သော် အလကားမဟုတ်ပေ။

နှစ်ပေါင်းသုံးဆယ် ကျင့်ကြံခြင်းအတွက် ဟန်မူယဲ့က ကလန်များ၏ ကျင့်ကြံခြင်းနည်းစနစ်နှင့် အမွေအနှစ်ကို လေ့လာခွင့်ရသည်။

အကယ်၍ ရွှေကျီးကန်းသွေးမျိုးဆက် နိုးထလာလျှင် တခြားရွှေကျီးကလန်များက ကောင်းကင်ဖိနှိပ်ခြင်းနည်းစနစ်ကို ဟန်မူယဲ့လေ့လာနိုင်ရန် လွှဲပြောင်းပေးရမည်။

အမွေအနှစ်နည်းစနစ်များနှင့် ယှဉ်လိုက်လျှင် မျိုးဆက်သစ်များ သွေးမျိုးဆက်နိုးထနိုင်ရန် အရေးကြီးသည်။

လွန်ခဲ့သော နှစ်ပေါင်းသုံးဆယ်တွင် မူချန်ခုံး၏သား မူယွင်က ရွှေကျီးကန်းသွေးမျိုးဆက်ကို နိုးထခဲ့သောကြောင့် ဆူပွက်သွားသည်။

ဟန်တောင်တန်းတွင် ကျင့်ကြံခဲ့သောကြောင့် ဖြစ်သည်ဟု မူချန်ခုံးက ဝန်ခံလိုက်သည်။

ချက်ချင်းဆိုသလိုပင် ရွှေကျီးကန်းလူငယ်များက ဟန်တောင်တန်းသို့ ရောက်လာကြသည်။

ထိုသို့ဖြင့် ဟန်မူယဲ့က အခွင့်ကောင်းယူပြီး ကမ်းလှမ်းခဲ့သည်။

အစပိုင်းတွင် အမျိုးမျိုးသော ရွှေကျီးကလန်များက ထိုအလဲအလှယ်ကို ဆန့်ကျင်ခဲ့ကြသည်။

ကျင့်ကြံခြင်းနည်းစနစ်နှင့် အမွေအနှစ်များ ပါဝင်နေသည်။ ထို့အပြင် ကောင်းကင်ဖိနှိပ်ခြင်း နည်းစနစ်ကို ခေါင်းဆောင်များကသာ ကျင့်ကြံခွင့်ရသည်။

သို့သော် ဟန်တောင်တန်းတွင်ရှိသော လူငယ်များ၏ သွေးမျိုးဆက်နိုးထမှုကြောင့် တော်ဝင်နယ်မြေတစ်ခု ဖြစ်လာသည်။ ကလန်များက ဟန်မူယဲ့၏ တောင်းဆိုချက်ကို သဘောတူလိုက်ကြသည်။

သို့သော် ဟန်တောင်တန်းတွင် ကျင့်ကြံရန် ဆန္ဒရှိသော လူငယ်အများစုက ကလန်ငယ်များမှ ဖြစ်သည်။

လူဦးရေတစ်သိန်းကျော်သော ကလန်ကြီးများ သိပ်မရှိပေ။

ယနေ့ရောက်လာသော လူငယ်နှစ်ယောက်သည် ကလန်ကြီးများမှ ဖြစ်သည်။

မူချန်ခုံးက ကိုယ်တိုင်ရောက်လာသည့်အတွက် အံ့အားသင့်နေရန် မလိုတော့ပေ။

“ကလန်ကြီးတွေလား။ နှစ်တစ်ရာကြာရင် ကျင်းပမယ့် နေမင်းအခမ်းအနားအတွက်လား”

ဟန်မူယဲ့က ယုယန်နှင့် ထောင်ယွင်ကို ကြည့်လိုက်ပြီး တည်ငြိမ်စွာ ပြောသည်။

သူက အဆင့်မြင့်ကျွမ်းကျင်သူတစ်ဦး၏ အရှိန်အဝါကို ထုတ်လွှတ်နေသောကြောင့် လူငယ်နှစ်ယောက်က အနည်းငယ် တုန်ခါသွားပြီး နောက်ဆုတ်လိုက်ရသည်။

အဆီအနှစ်ဝိညာဉ်များကလည်း သူတို့၏နောက်တွင် ပေါ်လာကြသည်။

အဆီအနှစ်ဝိညာဉ် ဆဌမအဆင့် ....

မျိုးဆက်သစ်လူငယ်များထဲတွင် သူတို့က ရှားပါးသော ကျွမ်းကျင်သူများ ဖြစ်ကြသည်။

ခန်းဆောင်ထဲသို့ ဝင်လာသောအချိန်တွင် အတော်လေး မောက်မာနေသောကြောင့် အံ့အားသင့်ရန် မလိုတော့ပေ။

သို့သော် ယခုအချိန်တွင် သူတို့၏ မောက်မာမှုက ပျောက်ကွယ်သွားသည်။ သူတို့က ခေါင်းငုံ့ထားပြီး ဟန်မူယဲ့ကို မကြည့်ရဲတော့ပေ။

ခွန်အား၏ အမိန့်အာဏာ ဖြစ်သည်။

နေမင်းအခမ်းအနားတွင် ရွှေကျီးကန်းအကြီးအကဲတစ်ယောက်၏ အစစ်အမှန်ဝိညာဉ်အရိုးကို ရရှိလိမ့်မည်။

ထိုအရာသည် ရွှေကျီးကန်းမျိုးနွယ်အတွက် နှစ်ပေါင်းမရေမတွက်နိုင်အောင် အခြေခံအုတ်မြစ်တစ်ခု ဖြစ်ခဲ့သည်။

အစစ်အမှန်ဝိညာဉ်အဆင့် အကြီးအကဲတစ်ယောက်က မသေဆုံးခင် အစစ်အမှန်ဝိညာဉ်အရိုးကို ထုတ်ယူပြီး မျိုးဆက်သစ်များ ကျင့်ကြံနိုင်ရန် ချန်ထားခဲ့သည်။

နှစ်တစ်ထောင်လျှင် တစ်ကြိမ်ကျင်းပသော နေမင်းအခမ်းအနားတွင် အစစ်အမှန်ဝိညာဉ်အရိုးကို ရရှိသွားသောလူက တိုးတက်လာလိမ့်မည်။

“ဟန်ကျင်း၊ သူတို့ကို အရုဏ်ဦးစံအိမ်ဆီ ခေါ်သွားလိုက်ပါ”

ဟန်မူယဲ့က ပြောသည်။

သူ့စကားအဆုံးတွင် ပုံရိပ်တစ်ခု ပျံသန်းလာသည်။

ဓားတစ်လက်နှင့် ဟန်ကျင်းက လေးနက်သောမျက်နှာထားဖြင့် ဦးညွတ်လိုက်သည်။

အဆီအနှစ်ဝိညာဉ် ဆဌမအဆင့် ဖြစ်သည်။

တခြားကလန်မှ ရောက်လာသော လူငယ်နှစ်ယောက်က အံ့အားသင့်သွားသည်။ ဟန်ကျင်းက သူတို့နှင့် အဆင့်တူသည်။

ဟန်ကျင်း၏မျက်လုံးကို မြင်လိုက်ရသောအခါတွင် ယုယန်နှင့် ထောင်ယွင်၏ မျက်နှာထားက အေးခဲသွားသည်။

သူ့မျက်လုံးများက ရွှေရောင်သန်းနေသည်။ ရွှေကျီးကန်းသွေးမျိုးဆက် နိုးထခဲ့သော အမှတ်အသား ဖြစ်သည်။

သူတို့နှင့် မျိုးဆက်တူသော ဟန်တောင်တန်း၏ လူငယ်က သွေးမျိုးဆက်ကို နိုးထခဲ့သည်။

‘ဟန်တောင်တန်းကလန်မှာ လူနည်းနည်းပဲရှိတာလေ’

‘သူတို့က ဒီလိုပါရမီရှင်မျိုးကို မွေးထုတ်ပေးနိုင်တယ်ပေါ့’

သူတို့နှစ်ယောက်က ရှုပ်ထွေးနေသော မျက်နှာထားဖြင့် ဟန်ကျင်း၏နောက်မှ လိုက်သွားသည်။

သူတို့နှစ်ယောက် ထွက်သွားသောအခါတွင် မူချန်ခုံးက ဟန်မူယဲ့ကို ကြည့်လိုက်သည်။

“မူယဲ့ ကောင်းကင်အမဲလိုက်ပွဲ စတော့မယ်။ မင်းက အသင့်ပဲလား”

အမဲလိုက်ပွဲသည် မဟာတောရိုင်းကမ္ဘာမှ မျိုးနွယ်များအတွက် အရေးကြီးပွဲတစ်ခု ဖြစ်သည်။

နှစ်တစ်ရာလျှင်တစ်ကြိမ် ကျင်းပသော အမဲလိုက်ပွဲတွင် မျိုးနွယ်စုများက ခွန်အားကို ဖော်ပြသည့်အပြင် ကိုယ်ပိုင်မျိုးနွယ်၏ ခွန်အားကိုလည်း မြှင့်တင်နိုင်သည်။

သူတို့က အင်အားစုစည်းပြီး အမျိုးမျိုးသော သားရဲများကို အမဲလိုက်သည်။ သားရဲများဆီမှ ရရှိလာသော ဝိညာဉ်သတ္တုအမျိုးမျိုးနှင့် သွေးမျိုးဆက်များသည် ကလန်အတွက် နှစ်ပေါင်းတစ်ရာကျင့်ကြံရန် လုံလောက်သည်။

“ဒီတစ်ကြိမ်မှာ ဟန်တောင်တန်းရွှေကျီးကလန်က လူသုံးထောင်စေလွှတ်မယ်”

ဟန်မူယဲ့က ခေါင်းညိတ်သည်။

“ကျွန်တော်ကိုယ်တိုင် ဦးဆောင်မယ်”

ဟန်မူယဲ့၏စကားကို ကြားလိုက်ရသောအခါတွင် မူချန်ခုံးက ပြုံးသည်။

လွန်ခဲ့သောဆယ်နှစ်တွင် သူက ဟန်မူယဲ့နှင့် တိုက်ခိုက်ကြည့်ခဲ့သည်။

ဟန်မူယဲ့က အဆီအနှစ်ဝိညာဉ် နဝမအဆင့်သို့ မရောက်သေးသော်လည်း နဝမအဆင့်နှင့် ယှဉ်နိုင်သည့် ခွန်အားကို ပိုင်ဆိုင်ထားသည်။

“ဒါပေမဲ့ လူသားမျိုးနွယ်ရဲ့ နယ်မြေနှစ်ခုကလည်း အမဲလိုက်ပွဲကို လူလွှတ်မယ်လို့ ကြားထားတယ်”

ဟန်မူယဲ့က မူချန်ခုံးကို ကြည့်လိုက်သည်။

မူချန်ခုံးက လေးနက်သောမျက်နှာထားဖြင့် ခေါင်းညိတ်သည်။

ယခင်က အမဲလိုက်ပွဲသည် မျိုးနွယ်စုများ၏ ဓလေ့ထုံးစံတစ်ခုသာ ဖြစ်သည်။ လူသားများက ဝင်မပါကြပေ။

လူသားများက ခွန်အားထုတ်ပြရန် စိတ်မဝင်စားကြပေ။

သူတို့က အမျိုးမျိုးသော နည်းဗျူဟာနှင့် စစ်ပွဲများတွင် ပိုမိုကျွမ်းကျင်ကြသည်။

ဆယ်ချီ၊ ရာချီ၊ ထောင်ချီနေသော စစ်သည်များက ပူးပေါင်းလိုက်ပြီး သွေးနှင့်ချီကို ထုတ်လွှတ်သည်။ ထို့အပြင် အမျိုးမျိုးသော အထောက်အပံ့ပစ္စည်းများနှင့် နတ်ဘုရားသားရဲများကိုပင် အမဲလိုက်နိုင်ကြသည်။

“လူသားတွေမှာ တခြားရည်ရွယ်ချက်ရှိနေတယ်လို့ မင်းပြောချင်တာလား”

မူချန်ခုံးက မျက်လုံးများကို မှေးကျဉ်းလိုက်သည်။

သူက စဉ်းစားကြည့်ခဲ့သော်လည်း လူသားများ၏ ရည်ရွယ်ချက်ကို နားမလည်နိုင်ပေ။

“လွန်ခဲ့တဲ့ နှစ်ပေါင်းသုံးသောင်းမှာ ဉာဏ်အလင်းသားရဲတွေက ကြည်လင်ကောင်းကင်တောအုပ်မှာ နေထိုင်ခဲ့ကြတယ်”

ဟန်မူယဲ့က ညင်သာစွာပြောသည်။

“ဉာဏ်အလင်းသားရဲလား”

မူချန်ခုံးက ကြောင်အသွားပြီး ဟန်မူယဲ့ကို ကြည့်လိုက်သည်။

“ကောင်းကင်နဲ့မြေကြီးရဲ့ ပထမဆုံးအစောင့်အရှောက်ဖြစ်တဲ့ ဉာဏ်အလင်းသားရဲကို ပြောတာလား”

“သူတို့က အဲဒီ မင်္ဂလာသားရဲကို ဖမ်းဆီးဖို့ ကြိုးစားနေကြတာလား”

လူသားများက မင်္ဂလာသားရဲကို ဖမ်းဆီးပြီး ယဉ်ပါးလာအောင် လုပ်နိုင်ကြသည်။ ထိုသားရဲများက သူတို့ကို ခွန်အားတိုးလာစေလိမ့်မည်။

အမှန်အတိုင်းပြောရလျှင် သားရဲအများစုကို ယဉ်ပါးလာအောင် လုပ်နိုင်သည်။ သို့သော် အားကောင်းသော နတ်ဘုရားသားရဲများက မာနကြီးပြီး များသောအားဖြင့် အညံ့ခံလိမ့်မည်မဟုတ်ပေ။

ဉာဏ်အလင်းသားရဲများ၏ တိုက်ခိုက်နိုင်စွမ်းက နတ်ဘုရားသားရဲများကြားတွင် အောက်ဆုံးအဆင့်သာရှိသော်လည်း ခုခံနိုင်စွမ်းတွင် ထိပ်တန်းအဆင့် ဖြစ်သည်။

ရှေးခေတ်တွင် မြို့ကြီးများက ဉာဏ်အလင်းသားရဲကို အစောင့်အကြပ်အဖြစ် အသုံးပြုကြသည်။

“ဉာဏ်အလင်းသားရဲတွေကို ဖမ်းဆီးဖို့ပဲ မဟုတ်လောက်ဘူး”

ဟန်မူယဲ့က ခေါင်းခါသည်။

“ကျွန်တော်က သုံးလနေရင် ထွက်ခွာမယ်။ ‌ကျွန်တော်တို့ အတူတူသွားကြမလား”

ဟန်မူယဲ့က လူသားများ၏အကြောင်းကို ဆက်မပြောတော့ပေ။

မူချန်ခုံးက ခေါင်းညိတ်လိုက်သည်။

“ကောင်းတယ်။ ငါက ကလန်သားတွေကို စုစည်းထားလိုက်မယ်။ သုံးလကြာရင် အတူတူသွားကြမယ်”

ထို့နောက် သူက နက်ရှိုင်းသောအသံဖြင့် ပြောသည်။

“တကယ်လို့ အခွင့်အရေးရှိရင် ငါ့ကို ကူညီပေးပါ မူယဲ့”

ဟန်မူယဲ့က ခေါင်းညိတ်လိုက်ပြီး အပြုံးတစ်ခုနှင့်အတူ ပြောသည်။

“ခေါင်းဆောင်ချန်ခုံးက အစစ်အမှန်ဝိညာဉ်အဆင့်ကို ရောက်သွားမယ်ဆိုရင် ကျွန်တော်က အစွမ်းကုန်ကြိုးစားပြီး ကူညီပေးမှာပါ”

မူချန်ခုံးက အစစ်အမှန်ဝိညာဉ်အဆင့်နှင့် တစ်လှမ်းသာ လိုတော့သည်။

လွန်ခဲ့သောနှစ်များတွင် သူတို့၏ ဆက်ဆံရေးက နီးကပ်ခဲ့သည်။ မူချန်ခုံးက ဟန်မူယဲ့၏ ပါရမီနှင့် အလားအလာကို တန်ဖိုးထားသည်။ ထို့အပြင် ဟန်မူယဲ့၏ ခွန်အားကိုလည်း သိနေသည်။

ဟန်မူယဲ့က ရွှေကျီးကန်းသွေးမျိုးဆက်ကို နိုးထခဲ့ရုံသာမက မဟာနေမင်း၏ ကောင်းချီးကိုလည်း ရရှိထားသည်။ ထို့ကြောင့် သူက အနာဂတ်ကို ဟန်မူယဲ့အပေါ်တွင် ပုံအပ်ထားသည်။

ဟန်မူယဲ့က မူချန်ခုံးကို လိုက်ပို့လိုက်ပြီး တိတ်ဆိတ်နေသည်။

ခရမ်းရောင်ပုံရိပ်တစ်ခုသည် သူ့နောက်တွင် ပေါ်လာသည်။

မူချန်ခုံးက အစစ်အမှန်ဝိညာဉ်အဆင့်သို့ ဝင်ရောက်ချင်သည်။ ဟန်မူယဲ့ကလည်း အဆင့်တက်ချင်သည်။

“အချိန်အတော်ကြာသွားပြီ။ အဆင့်တက်ရအောင်”

ဟန်မူယဲ့က ညင်သာစွာ ရေရွတ်လိုက်သည်။ နောက်တွင်ရှိနေသော ရွှေကျီးကန်းပုံရိပ်က ပျောက်ကွယ်သွားပြီး သူက ခန်းဆောင်ထဲမှ ထွက်သွားသည်။

“တနျို”

ဟန်မူယဲ့က ညင်သာစွာ အော်ဟစ်လိုက်သည်။

အဝေးတစ်နေရာတွင် လူသန်ကြီးတစ်ယောက် ပျံသန်းလာသည်။

ယခုအချိန်တွင် စီယွမ်ဖြစ်နေသော ကျန့်တနျိုက ဝက်ဝံနက်ကလန်၏ ခေါင်းဆောင်ငယ် ဖြစ်သည်။

သူက လွန်ခဲ့သောငါးနှစ်တွင် မှတ်ဉာဏ်များပြန်ရလာသည်။

ထို့နောက် ဝက်ဝံနက်ကလန်၏ သခင်လေးအဖြစ် ဆက်လက်နေထိုင်ခဲ့သည်။

သူက ပန်းပဲပညာကို သင်ယူရန်အတွက် ဟန်မူယဲ့နောက်သို့ လိုက်လာသော စန္ဒကူးဝက်ဝံနက်ကလန်၏ ခေါင်းဆောင်ငယ် စီယွမ်သာ ဖြစ်သည်။

သူက စန္ဒကူးဝက်ဝံနက်ကလန်၏ သွေးမျိုးဆက်ကို ပိုင်ဆိုင်ထားသောကြောင့် ခန္ဓာကိုယ်ကြံ့ခိုင်သည်။ ယခုအချိန်တွင် အဆီအနှစ်ဝိညာဉ် သတ္တမအဆင့်သို့ ရောက်လာပြီး အံ့အားသင့်စရာကောင်းသော ခွန်အားကို ပိုင်ဆိုင်ထားသည်။

ကျားနက်ကပင် သူနှင့် ထိပ်တိုက်ရင်မဆိုင်ရဲပေ။