ဒီရှဉ့်လေးကဉာဏ်ကောင်းလိုက်တာ! အရင်ကဒီလိုကြွားဖူးလား? ၂
Vol. 22 Ch. 318
ချင်လင်က ဒီအကြောင်းလုံးဝမသိတော့။ အဲဒီအချိန်တုန်းက အိမ်ရဲ့အခြေအနေကြောင့် စိတ်ခံစားချက်ကောင်းပုံမပေါ်။ သူ့စီနီယာအစ်ကိုအစ်မများဘွဲ့ယူသည့်အချက်နှင့်ပေါင်းလိုက်သောအခါ သူနှင့်ကျောက်မိုချင်းအတွက်စိုးရိမ်ပြီး စိတ်ပျက်နေခဲ့ပုံရသည်။ သူ့စိတ်သောကတွေပြေပျောက်ဖို့ အရက်မသောက်ဘဲနေချင်ခဲ့သည်။
ချုဖုန်းကပြုံးလိုက်ပြီး_ ''ငါ့ကောင်... အရင်ကကြွားဖူးတာကိုသိပြီလား... ငါ့အထင် ကျောင်းကမင်းကို ထူးချွန်ကျောင်းသားဟောင်းတစ်ယောက်အနေနဲ့ မိန့်ခွန်းပြောဖို့ဖိတ်သင့်တယ်ကွ... ဒီဗီဒီယိုကိုဖွင့်ပြလိုက်ရင် ဂန္တဝင်ကျောင်းသားဟောင်းဖြစ်လာလိမ့်မယ်''
ကျောင်းသားဟောင်းမိန့်ခွန်းပြောဖို့ ချင်လင်စိတ်မဝင်စားသော်လည်း ဒီဗီဒီယိုကို ၅ နှစ် ၁၀ နှစ်လောက်သိမ်းထားလိုက်ရင် စိတ်ဝင်စားစရာဖြစ်လာလိမ့်မည်။
ထို့နောက် ချူဖုန်းနှင့်ဝမ်လန်ကို သူ့ရုံးခန်းထဲဖိတ်ပြီး ကောင်းယောင်ယောင်ကိုသူတို့အတွက်သတို့သမီးခန်းတောင်စီစဉ်ခိုင်းလိုက်သည်။
ချူဖုန်းကထိုင်လိုက်ပြီး သူ့ဖုန်းကိုထုတ်ကာ_ ''ချင်လင်... မင်းစံအိမ်ရဲ့ရှဉ့်လေးက ဉာဏ်ကောင်းလိုက်တာ... ငါ့ကို QR ကုတ်စကင်န်ဖတ်ခိုင်းလိုက်တယ်... အဲဒါလက်ဆောင်ပေးတာလား? ငါလက်ဆောင်ယူလို့ရလား?''
''မွေးနီက အစ်ကို့ကိုပေးလိုက်တယ်?'' ကျောက်မိုချင်းအံ့ဩသွားသည်။
မတိုက်ဆိုင်လွန်းဘူးလား?
ချင်လင်က အရည်အသွေး ၂ ရုံးပတီသီးတစ်ကတ်တီလောက်ကိုတွက်ကပ်မနေဘူးပေါ့။ ညပိုင်းတွင် ရုံးပတီသီးတင်မက၊ အရည်အသွေး ၂ ငါး၊ ငါးရှဉ့်နှင့် အရည်အသွေး ၁ ဥကိုလည်းပြင်ဆင်ထားသည်။ သူတို့ကိုဧည့်ခံရန် ဆရာလင်းကိုချက်ခိုင်းထား၏။
ဒီအစားအစာက ချူဖုန်းနှင့်သူ့ဇနီးကိုအံ့ဩစေပြန်သည်။
သူတို့စုံတွဲက မီချယ်လင်းစားသောက်ဆိုင်များ၊ မူလလက်ဟောင်းတရုတ်စားသောက်ဆိုင်များအပါအဝင် စားကောင်းသောက်ဖွယ်အများကြီးစားခဲ့ဖူးသော်လည်း အရည်အသွေး ၂ အရသာရှိအစားအစာများကိုအရသာခံဖူးတာ ဒါပထမဆုံးပင်။
ချူဖုန်းကိုဧည့်ခံပြီးနောက် နှစ်ဦးနှစ်ဖက်က တရားဝင်လုပ်ငန်းအကြောင်းစပြောကြသည်။ မည်သို့ဆိုစေ ဒါကအရေးကြီးကိစ္စဖြစ်၏။
ကုမ္ပဏီတရားဝင်လုပ်ငန်းမှာ ကုမ္ပဏီအရွယ်အစား၊ ရှေ့နေအဆင့်အတန်းနှင့် ဥပဒေကုမ္ပဏီအရွယ်အစားပေါ်မူတည်ပြီး ကွာခြားလိမ့်မည်။ စျေးနှုန်းက တစ်နှစ်ကို ယွမ် ၃၀၀၀၀ မှ ယွမ်မီလီယံဆယ်ချီအထိ အစားစားရှိနိုင်သည်။
သူ့ချင်းလင်စံအိမ်နှင့်ချင်းလင်အစားအသောက်ကုမ္ပဏီအတိုင်းအတာအရ တရားဝင်လုပ်ငန်းကို စွမ်းအားဥပဒေကုမ္ပဏီနှင့်စာချုပ်ချုပ်သည်။ နောက်ပြီး စီနီယာအစ်ကိုချူလို စီနီယာရှေ့နေတစ်ဦးအတွက် တစ်နှစ်ဥပဒေအကြံပေးခမှာ ယွမ် ၅၀၀၀၀၀ ဖြစ်သည်။
စွမ်းအားဥပဒေကုမ္ပဏီ၏စီနီယာလုပ်ဖော်ကိုင်ဖက်သာဆိုလျှင် တစ်နှစ်ပတ်လုံးဥပဒေအကြံပေးခတန်ဖိုးမှာ ၄ ဆလောက်တက်သွားလိမ့်မည်။
ဒီတန်ဖိုးကိုလည်း တွက်ထားပြီးသား။
ကော်မရှင်စာချုပ်လက်မှတ်ထိုးပြီးနောက် ချင်လင်လည်း စီရင်စုစိုက်ပျိုးရေးပူးပေါင်းမှုအကြောင်း ချူဖုန်းကိုပြောပြလိုက်သည်။ ဒါကလည်း သူကူညီဖြေရှင်းပေးဖို့ အရေးတကြီးလိုအပ်နေသည့်ကိစ္စပင်။


အချိန်ကျရင် စီရင်စုကရွေးချယ်ထားသောစိုက်ပျိုးရေးပိုင်ရှင်နှင့်စာချုပ်ချုပ်ဖို့ သူဆွဲပေးရမည်။ ချူဖုန်းမှာ ကန့်သတ်ချက်များ၊ လုပ်ပိုင်ခွင့်များနှင့် ကာကွယ်ရေးလုပ်ထုံးလုပ်နည်းများအတွက် သေချာပေါက်စိတ်ထဲထည့်ထားရမည်။
ဘာပဲဖြစ်ဖြစ် ဒီလိုပူပေါင်းမှုမျိုးတွင်လွှမ်းမိုးမှုရှိရမည်။
ညပိုင်း_
ချင်လင်ကသူ့ရုံးခန်းထဲပြန်လာပြီး သူ့စိတ်ထဲကဖန်သားပြင်ကိုထပ်ကြည့်လိုက်သည်။ သူကသူ့ဂိမ်းဇာတ်ကောင်ကို သတ္တုတွင်းဆက်တူးစေပြီး ဂန္တဝင်ဝိုင်ပုလင်းနှစ်လုံးထပ်လုပ်လိုက်၏။ ထို့နောက် ပုလင်း ၁၀ လုံးကို ပထမအသုတ်ချင်းလင်ဆေးဖက်ဝင်ဝိုင်ဖြည့်လိုက်သည်။
ဒီဝိုင်ပုလင်း ၁၀ လုံးက နှစ် ၄၀ သက်တမ်းရှိသည်။
ဒါပြီးရင် နှစ် ၅၀၊ နှစ် ၆၀ သက်တမ်းရှိဝိုင်များကိုလည်း ထုတ်မည်။
ဝိုင်ပုလင်း ၁၀ လုံးကို ဂိမ်းထဲမှထုတ်ပြီး သူ့စားပွဲဘယ်ဘက်ဘေး ဗီရိုလေးထဲထည့်ထားလိုက်သည်။ လောလောဆယ် ဝိုင်ထားစရာနေရာမရှိသေး၍ ဒီလိုသာလုပ်ထားရမည်။
ဒီဝိုင်တွေက လုံးဝတန်ဖိုးရှိသည်။ ဘယ်လောက်ပဲချမ်းသာချမ်းသာ ကိစ္စမရှိ၊ အသုံးမဝင်။ သူ့စိတ်ခံစားချက်အပေါ်သာမူတည်သည်။
…
နောက်တစ်နေ့_
သတို့သမီးခန်း၌_
ချူဖုန်းမှာ မနက်အစော လန်းလန်းဆန်းဆန်းနိုးထလာသည်_ ''အင်တာနက်ပေါ်မှာ ဒီနံ့သာဖြူနံ့သာမှုန့်က ဘယ်လောက်အိပ်ကောင်းစေတဲ့အကြောင်းပြောထားကြတာ... ကိုယ်တိုင်ကြုံဖူးမှသိတော့တယ်... နှစ်နှစ်ခြိုက်ခြိုက်ကိုအိပ်ပျော်သွားတာ''
''အင်း... အလှအပဥရဲ့အာနိသင်ကလည်း အရမ်းကောင်းတယ်'' ဝမ်လန်လည်း သူမဘေးမှမှန်ထဲ မျက်နှာကိုကြည့်လိုက်သည်။
မနေ့ညက ချင်လင် သူမအတွက်အလှအပဥအသေးပြင်ဆင်ပေးသည်။ ဒီနေ့အိပ်ရာနိုးလာသောအခါ သူမမျက်နှာမှာ အလှအပဆေးခန်းသွားတာထက်တောင် ပိုပြီးစိုပြေနေကြောင်း သတိထားမိသည်။
ချူဖုန်းက သူ့အလုပ်ကိုမမေ့။ အိပ်ရာထပြီး အချက်အလက်များစတင်စုစည်းလိုက်သည်။
နေ့လယ်ပိုင်းတွင် ချင်လင်က အစားအသောက်ကုမ္ပဏီမှတန့်ကွမ်းကိုခေါ်ပြီး ချူဖုန်းနှင့်မိတ်ဆက်ပေးလိုက်၏_ ''လောင်တန့်... ဒါကျွန်တော်တက္ကသိုလ်တုန်းကစီနီယာ... စွမ်းအားဥပဒေကုမ္ပဏီရဲ့စီနီယာရှေ့နေ... အခုကစပြီး ကျွန်တော်တို့ချင်းလင်စံအိမ်နဲ့ချင်းလင်အစားအသောက်ကုမ္ပဏီရဲ့ဥပဒေလုပ်ငန်းတာဝန်ခံဖြစ်လာလိမ့်မယ်... အစားအသောက်ကုမ္ပဏီမှာ ဥပဒေရေးရာပြဿနာတွေရှိလာရင် အရင်ဆုံးစီနီယာအစ်ကိုချူနဲ့ဆက်သွယ်လို့ရတယ်''
သည်လိုနှင့် ချူဖုန်းကိုမိတ်ဆက်ပေးလိုက်သည်_ ''စီနီယာအစ်ကိုချူ... ဒါကျွန်တော့်အစားအသောက်ကုမ္ပဏီရဲ့အထွေထွေမန်နေဂျာတန့်ကွမ်းပါ... ချင်းလင်ဆော့ရဲ့တာဝန်ခံလည်းဟုတ်တယ်... ဒီတစ်ကြိမ်လာဖို့ခေါ်လိုက်ရတာက စိုက်ပျိုးရေးပူးပေါင်းဖို့အပြင် အစားအသောက်ကုမ္ပဏီမှာ ဥပဒေအကာအကွယ်ရှိတဲ့ဆုရွေးချယ်မှုစာရွက်စာတမ်းဆွဲခိုင်းချင်တာလည်းပါတယ်''
ထိုစကားကြားလျှင် တန့်ကွမ်းမျက်လုံးများဝင်းလက်သွားသည်။
ဆုရွေးချယ်မှုဆိုတာဘာလဲ သူသိတာပေါ့။ ရုံချန်းစီရင်စုလိုနေရာငယ်လေးမှာ ဒီအကြောင်းလုံးဝမစဉ်းစားခဲ့။ သူ့စိတ်ထဲမှာ ဒီလိုကိစ္စမျိုးက အလှမ်းဝေးလွန်းသည်။
ဥက္ကဌချင်က အစားအသောက်ကုမ္ပဏီမှာ ဆုရွေးချယ်မှုကိုစီစဉ်ပေးမည်ဟု သူမထင်မိပေ။ အထွေထွေမန်နေဂျာတစ်ဦးတစ်နေနှင့် ဆုချီးမြှင့်ရေးအဖွဲ့ဝင်တစ်ဦးသေချာပေါက်ဖြစ်လာလိမ့်မည်။
ထို့ကြောင့် ရုတ်တရက် သူစိတ်တက်ကြွသွား၏။
ဆုရွေးချယ်ခွင့်ကိုချက်ချင်းရဦးမည်မဟုတ်သော်လည်း ချင်းလင်ဆော့ကဘယ်လောက်အလားအလာရှိကြောင်းသူသိသည်။ ဒီဆုရွေးချယ်ခွင့်တန်ဖိုးက အလွန်မြင့်လိမ့်မည်။
ချင်လင်က တန့်ကွမ်းကြားအောင် တမင်ပြောခြင်းဖြစ်၏။
ပထမဆုံးအနေနှင့် တန့်ကွမ်းက အမှန်ပင်အလုပ်ကောင်းကောင်းလုပ်ခဲ့သည်။
ဒုတိယအချက်အနေနှင့် ကုမ္ပဏီတစ်ခုဖွံ့ဖြိုးလာလျှင် သာသာယာယာလည်ပတ်ပြီး ရာထူးကြီးသူများကိုစိတ်ရောကိုယ်ပါမြှုပ်နှံ၍လုပ်စေလိုပါက ဆုချီးမြှင့်ခြင်းမှာ မလွဲမသွေပါရမည်။


''ဥက္ကဌတန့်... ပြီးရင် အသေးစိတ်ဆက်သွယ်ကြတာပေါ့... ရှေ့လျှောက်ထပ်ဆုံကြမယ်'' ချူဖုန်းကပြုံးပြီး တန့်ကွမ်းနှင့်လက်ဆွဲနှုတ်ဆက်လိုက်သည်။
တန့်ကွမ်းကလည်း ပြန်ပြောလိုက်၏_ ''ရှေ့နေချူ... နောက်ကျအပင်ပန်းခံခိုင်းရတော့မယ်''
ချူဖုန်းက အလွန်ကျင်လည်သည်။ တစ်ရက်တည်းနှင့် စိုက်ပျိုးရေးစာချုပ်ဆွဲပြီးသွား၏။ ဆုရွေးချယ်ရေးစာချုပ်မှာမူ အချိန်တိုအတွင်းပြီးစီးနိုင်သောအရာမဟုတ်။ အစားအသောက်ကုမ္ပဏီ၏ဖွံ့ဖြိုးတိုးတက်မှုဦးတည်ချက်၊ အနာဂတ်အလားအလာစသော အချက်များစွာကိုထည့်သွင်းစဉ်းစားရသေး၏။
စိုက်ပျိုးရေးစာချုပ်ပြီးလျှင် ချင်လင်ကချန်လီကိုအသိပေးလိုက်သည်။
နောက်တစ်နေ့_
ချင်လင်က ချူဖုန်းနှင့်တန့်ကွမ်းကို စီရင်စုဆီခေါ်သွားသည်။
တန့်ကွမ်းက မာစီဒီးဘန့်ဇ်လုပ်ငန်းသုံးကားကိုမောင်းလာသည်။ မနှစ်က ဒီအတွက်ငွေပေးချေရန် ကျောက်မိုချင်းဆီမှထောက်ခံချက်ရခဲ့၏။ မည်သို့ဆိုစေ သူကအစားအသောက်ကုမ္ပဏီ၏အထွေထွေမန်နေဂျာတစ်ဦးပင်။ လက်ရှိအစားအသောက်ကုမ္ပဏီက ရုံချန်းစီရင်စုတွင်သေးသေးမဟုတ်တော့။ တန့်ကွမ်းအပြင်သွားလျှင် အသင့်အတင့်ကားတစ်စီးလိုလာသည်။
''သူဌေးချင် ဥက္ကဌတန့်... မင်းတို့ကိုစောင့်နေတာ'' ချန်လီက သက်ဆိုင်ရာဌာနများ၏တာဝန်ခံပုဂ္ဂိုလ်နှင့်အတူစောင့်နေသည်။ ဒီကိစ္စက စီရင်စုအတွက်ဘယ်လောက်အရေးကြီးကြောင်းသိသာ၏။
ချင်လင်တို့သုံးယောက်ကို ဧည့်ခန်းတစ်ခုတွင်ကြိုဆိုကြသည်။ အထဲတွင် စောင့်နေသောလူများစွာရှိနေပြီး ချင်လုံလည်းအပါအဝင်။ သူက စီရင်စုမှရွေးထားသော စိုက်ပျိုးရေးပိုင်ရှင်ဖြစ်သည်ပေါ့။
ထိုလူများကလည်း ချန်လီ၊ ချင်လင်တို့ကို ချက်ချင်းကြည့်လိုက်ကြသည်။ ချင်းလင်အစားအသောက်ကုမ္ပဏီမှလူတွေရောက်လာပြီဟုသိသောအခါ သူတို့မျက်နှာတွင် မျှော်လင့်ချက်များပြည့်နှက်သွားကြသည်။
စိုက်ပျိုးသူတွေအနေနှင့်အစိုးရိမ်ဆုံးအရာမှာ စိုက်ပျိုးရေးထွက်ကုန်များ၏ရောင်းအားပင်။ ချင်းလင်ဆော့နာမည်ကျော်လာပြီးနောက် ခရမ်းချဉ်သီးစိုက်ပြီး ချင်းလင်အစားအသောက်ကုမ္ပဏီကိုရောင်းချရန်တွေးမိကြသည်။
သို့သော် သူတို့မှာအဆက်အသွယ်လုံးဝမရှိ။ အခုတော့ စီရင်စုကဦးဆောင်ပြီး ထောက်ပံ့ငွေချပေးလာပြီ။ ဒါသူတို့အတွက် ကြီးမားသောအခွင့်အရေးတစ်ခုဖြစ်လေသည်။
ဒီနေ့လာရသောအဓိကရည်ရွယ်ချက်မှာ ချင်းလင်အစားအသောက်ကုမ္ပဏီ၏သက်ဆိုင်ရာဝေါဟာရများနှင့်စာချုပ်လိုအပ်ချက်များကို သိနားလည်ရန်ဖြစ်၏။
ချင်းလင်အစားအသောက်ကုမ္ပဏီ၏ လိုအပ်ချက်များသာ သိပ်မပြင်းထန်လျှင် သူတို့ကတုံ့ဆိုင်းနေမည်မဟုတ်ချေ။
ဒီအသေးစိတ်ကိစ္စအတွက် ချင်လင်လူလုံးမပြ။ သူက တန့်ကွမ်းနှင့်ချူဖုန်းကိုသာ ပွဲထုတ်လိုက်သည်။
စီရင်စုက ဌာနဆိုင်ရာညွှန်မှူးနှင့်ဆက်သွယ်ရန် ကျုံးလဲ့ကိုသာလွှတ်လိုက်၏။
ချန်လီက ချင်လင်ကိုသူ့ရုံးခန်းထဲဖိတ်လိုက်သည်။
ထိုမြင်ကွင်းကို စိုက်ပျိုးရေးပိုင်ရှင်များမြင်သွားကြ၏။ ချန်လီမှာ စီရင်စုလက်ထောက်တာဝန်ခံဖြစ်သောကြောင့် ချင်လင်၏အဆင့်အတန်းကိုခန့်မှန်းမိကြသည်။
ချင်းလင်စံအိမ်သူဌေးသာ သူကိုယ်တိုင်လက်ခံတွေ့ဆုံရနိုင်သည်။ ချင်းလင်စံအိမ်သူဌေးကို ဒီလောက်ငယ်မည်ဟုမထင်ထားပေ။
အားလုံးဖြေရှင်းပြီးနောက် နေ့လယ်ရောက်သွားသည်။ စိုက်ပျိူးရေးလုပ်ငန်းရှင်အားလုံးက ချင်းလင်အစားအသောက်ကုမ္ပဏီနှင့်လက်မှတ်ထိုးကြ၏။ ချင်းလင်အစားအသောက်ကုမ္ပဏီတွင်စာချုပ်သတ်မှတ်ချက်များစွာရှိသော်လည်း စျေးနှိမ်မထားချေ။ စီရင်စုပြောသလို သာမန်စျေးကွက်တန်ဖိုးအတိုင်းသွားမည်။
လက်ရှိတွင် စိုက်ပျိုးရေးထွက်ကုန်များမှာ ထုတ်လုပ်ရခက်သည်။ သူတို့အတွက် ဒီစျေးကွက်တန်ဖိုးထောက်ခံချက်ကလုံလောက်၏။
ဒါကလည်း ချင်းလင်အစားအသောက်ကုမ္ပဏီက မကြာမီ ရုံချန်းစီရင်စုအတွင်းရှိမြို့အားလုံးတွင် ခရမ်းချဉ်သီးစိုက်ပျိုးရေးပူးပေါင်းဆောင်ရွက်မည်ဟုပြောလိုက်သည်နှင့်အတူတူပင်။
တောင်သူအတော်များများက ဒီခရမ်းချဉ်သီးကုန်ကြမ်းလည်ပတ်မှုအတွက် အလုပ်ရှာလာကြမည်။ စီရင်စုကလည်း တချို့အလုပ်သမားငှားရမ်းသည့်ပြဿနာများဖြေရှင်းပေးသည်။ ချင်းလင်အစားအသောက်ကုမ္ပဏီက ကုန်ကြမ်းပြဿနာပြေလည်သွားပြီး စိုက်ပျိုးရေးပိုင်ရှင်များက ရောင်းအားကိုပူစရာမလိုဘဲချဲ့ထွင်နိုင်သည်။
ဒါကရှဉ့်လည်းလျှောက်သာ ပျားလည်းစွဲသာ။
နေ့လယ်တွင် ချန်လီလည်း ချင်လင်ကိုထမင်းစားဖိတ်သည်။ သူကစီရင်စုအစိုးရစားသောက်ဆိုင်ထဲတွင် စိုက်ပျိုးရေးပိုင်ရှင်များနှင့်နေ့လယ်စာစားပြီး ချူဖုန်းကိုစံအိမ်ပြန်ခေါ်သွားလိုက်သည်။
ကားထဲတွင် ချူဖုန်းကစိတ်လှုပ်ရှားပုံနှင့်သက်ပြင်းချရင်း_ ''ချင်လင်... ကြည့်ရတာ ရုံချန်းစီရင်စုအရာရှိတွေက ငါထင်တာထက်ပိုပြီး မင်းကိုတန်ဖိုးထားပုံပဲ... ငါမင်းအတွက်ရေးပေးတဲ့စာချုပ်သတ်မှတ်ချက်တွေက နည်းနည်းသမားရိုးကျဖြစ်သွားတယ်... အထူးသဖြင့် ဒီစိုက်ပျိုးရေးပိုင်ရှင်တွေရဲ့သဘောထားပေါ့... ငါ့အထင် ဒီထက်ပိုတင်းကြပ်ရင်တောင် သူတို့စာချုပ်ချုပ်ကြလိမ့်မယ်''
ချင်လင်ကပြုံးလိုက်ပြီး_ ''ဒီလိုမျိုးပိုအောင်မြင်လာရင်ပဲ အကောင်းဆုံးရလဒ်ဖြစ်နေပါပြီ... ဘာပဲဖြစ်ဖြစ် ကိုယ့်အိတ်ထဲချည်းထည့်လို့မှမရတာ''
ချူဖုန်းက သက်ပြင်းချလိုက်ပြန်သည်_ ''ချင်လင်... မင်းရဲ့စကားတွေက အရမ်းမြင့်တယ်... ဒါကြောင့်လည်း ရုံချန်းစီရင်စုအရာရှိတွေက မင်းကိုဒီလောက်တန်ဖိုးထားတာဖြစ်မယ်''