အခန်း (၁၁၃၅)

အစစ်အမှန်ဝိညာဉ်အရိုးများသည် ရွှေကျီးကန်းမျိုးနွယ်၏ အမွေအနှစ်အတွက် အလွန်အရေးပါသည်။

လူသားမျိုးနွယ်က ရွှေကျီးကန်းလက်ရွေးစင်များကို သတ်ဖြတ်မည့်အပြင် ရွှေကျီးကန်းမျိုးနွယ်၏ အမွေအနှစ်ကိုလည်း ဖျက်ဆီးပစ်လိမ့်မည်။

“နောက်တစ်ဆင့်ကိုမဝင်ခင် သူတို့ကို အရင်ဆုံး တားဆီးရအောင်”

ရှန်းကျန်းယွီက ဟန်မူယဲ့ကို ကြည့်လိုက်ပြီး တီးတိုးပြောသည်။

“ငါတို့က ရွှေကျီးကန်းကလန်သားတွေအနေနဲ့ အမွေအနှစ်ကို ကာကွယ်ရမယ်”

အမွေအနှစ်ကိုကာကွယ်ပြီး ရန်သူကို တားဆီးရမည်။

ဟန်မူယဲ့က ပြုံးလိုက်ပြီး ပြောသည်။

“ကောင်းတယ်”

တစ်ရက်အကြာတွင် ပေတစ်သန်းကြီးမားသော ရွှေကျီးကန်းပုံရိပ်သည် တောင်ပံဖြန့်ပြီး အဝေးသို့ ပျံသန်းသွားခဲ့သည်။

အဝေးတစ်နေရာတွင် လူသားမျိုးနွယ်၏ အနက်ရောင်ဝတ်စုံနှင့် အစစ်အမှန်ဝိညာဉ်အဆင့် လူအိုကြီးက မည်းမှောင်နေသောမျက်နှာထားဖြင့် ပြောလိုက်သည်။

“ဒုတိယအဆင့်ကို မြန်မြန်သွားကြမယ်။ သူတို့ကြောင့် ပိတ်မိနေလို့ မဖြစ်ဘူး”

ယိုယွင်းနေသော တောင်တစ်လုံး၏ရှေ့တွင် အလင်းစီးကြောင်းနှစ်ခု တိုက်မိသွားသည်။

ချက်ချင်းဆိုသလိုပင် ကောင်းကင်နှင့်မြေကြီး ပျက်စီးသွားသကဲ့သို့ နားအူလောက်သော ပေါက်ကွဲသံကို ကြားရသည်။

တောင်ထိပ်တွင် ပေတစ်ထောင်မြင့်မားပြီး ပေသုံးရာကျယ်ဝန်းသော ဂိတ်တံခါးတစ်ခု ရှိနေသည်။

ထိုဂိတ်တံခါးမှတစ်ဆင့် ဒုတိယအဆင့်သို့ သွားနိုင်မည်။

လျှို့ဝှက်နယ်မြေ၏ ဒုတိယအလွှာတွင် ပိုမိုအားကောင်းသော သားရဲများ ရှိကြသည်။ ထို့အပြင် ဖိအားလည်း ပိုများသည်။

ဒုတိယအလွှာတွင်ရှိသော ရွှေကျီးကန်းစွမ်းအားသည် သွေးမျိုးဆက်နိုးထရန် ကူညီပေးနိုင်သည်။

ဟန်မူယဲ့၊ ရှန်းကျန်းယွီနှင့် တခြားလူများက ပျံသန်းလိုက်ပြီး ဂိတ်တံခါးကို ပိတ်ဆို့ထားသည်။

သူတို့က သွေးမျိုးဆက်စွမ်းအားကို အသက်သွင်းပြီး ရွှေကျီးကန်းပုံရိပ်ကို ဖော်ထုတ်လိုက်ကြသည်။

ပထမအလွှာတွင် အစစ်အမှန်ဝိညာဉ်အဆင့် လူသားကျွမ်းကျင်သူလေးယောက်သာ ရှိသည်။ သူတို့က ဟန်မူယဲ့တို့ကို ကျော်လွှားနိုင်မည်မဟုတ်ပေ။

ကောင်းမွန်စွာ ကိုင်တွယ်ထားလျှင် ပြန်လည်တိုက်ခိုက်ရန် ဖြစ်နိုင်သည်။

တစ်ဦးချင်းဆိုလျှင် ရွှေကျီးကန်းများက လူသားများထက် ပိုမိုသန်မာကြသည်။

ရှေ့တွင်ရှိသော လူသားစစ်သည်များသည် ဝင်္ကပါကို ဖွဲ့စည်းထားသည်။ ရွှေကျီးကန်းလက်ရွေးစင် ခြောက်သောင်းက သူတို့နှင့် ဖြည်းဖြည်းချင်း တိုက်ခိုက်ရုံသာ တတ်နိုင်သည်။

“ဘုန်း”

စစ်တပ်နှစ်ခုက ရင်ဆိုင်လိုက်ပြီး ရွှေအလင်းနှင့် အမျိုးမျိုးသော အဆီအနှစ်ဝိညာဉ်ပုံရိပ်များကို ဖြစ်ပေါ်လာစေသည်။

ယခုအချိန်တွင် လူသားများက ကိုယ့်ကိုယ်ကိုယ် ဖုံးကွယ်မထားတော့ပေ။ သူတို့၏ အဆီအနှစ်ဝိညာဉ်စွမ်းအားသည် ပေါက်ကွဲထွက်လာ၏။

အဆီအနှစ်ဝိညာဉ်အများစုသည် ခွန်အားနှင့် အမြန်နှုန်းကောင်းသော ဝံပုလွေ၊ ကျားသစ်နက်နှင့် ဝက်ဝံနက်များ ဖြစ်ကြသည်။

ရေနဂါး၊ တိမ်ကျားသစ် စသည်ဖြင့် ထူးခြားသော သားရဲများလည်း ရှိကြသည်။

အဆီအနှစ်ဝိညာဉ်စွမ်းအားချင်း ယှဉ်လိုက်လျှင် လူသားများက ရွှေကျီးကန်းများနှင့် မယှဉ်နိုင်ပေ။

သို့သော် လူသားမျိုးနွယ်က မျိုးပွားနိုင်စွမ်းကောင်းပြီး စည်းလုံးသည်။ သူတို့က အနည်းဆုံးကုန်ကျစရိတ်ဖြင့် အကောင်းဆုံးအကျိုးအမြတ်ကို ရနိုင်သည်။

“သတ်”

ဟန်မူယဲ့၏နောက်တွင်ရှိသော ရွှေကျီးကန်းပုံရိပ်က ဖျတ်ခနဲ လှုပ်ရှားလိုက်သည်။ သူက ဓားကိုင်ထားပြီး ပြေးထွက်သွားသည်။

လူသားမျိုးနွယ်၏ အစစ်အမှန်ဝိညာဉ်အဆင့် ကျွမ်းကျင်သူလေးယောက်က အကြည့်ချင်းဖလှယ်လိုက်သည်။ နှစ်ယောက်က ဟန်မူယဲ့ကို တားဆီးရန် လှုပ်ရှားလိုက်ကြသည်။

ကျန်နှစ်ယောက်က ရှန်းကျန်းယွီ၊ ကျူးချန်ယန်တို့နှင့် တိုက်ခိုက်နေသည်။

ဟန်မူယဲ့၏ ဓားချက်တိုင်းသည် ကောင်းကင်နှင့်မြေကြီး၏ စွမ်းအားကို သယ်ဆောင်ထားသည်။

လူသားမျိုးနွယ်၏ အစစ်အမှန်ဝိညာဉ်အဆင့် နှစ်ယောက်က အလေးအနက်ထားနေသည်။

ယခုအချိန်တွင် ဟန်မူယဲ့က ချပ်ဝတ်ကို ဝတ်ဆင်မထားသော်လည်း အလွန်ကောင်းမွန်သော ဓားနည်းစနစ်ဖြင့် သူတို့ကို တိုက်ခိုက်နိုင်သည်။

ဟန်မူယဲ့က ဓားချက်များကို ထုတ်ဖော်လိုက်ပြီး အစစ်အမှန်ဝိညာဉ်အဆင့်၏ စွမ်းအားနှင့် ပိုမိုရင်းနှီးလာသည်။

သူ၏ ဓားအလင်းသည် ပေတစ်ရာအထိ တိုးလာခဲ့သည်။

အစစ်အမှန်ဝိညာဉ်အဆင့်သည် စည်းမျဉ်းနှင့် စွမ်းအားကို ထိန်းချုပ်ထားသည်။

အင်မော်တယ်သခင်များက ကံကောင်းခြင်းကို ရှာဖွေပြီး အင်မော်တယ်ဘုရင်များက စည်းမျဉ်းကို ရှာဖွေကြသည်။

စည်းမျဉ်းကို ထိန်းချုပ်ထားသော အင်မော်တယ်ဘုရင်ကသာ ကပ်ဘေးတွင် ရှင်သန်နိုင်လိမ့်မည်။

ဟန်မူယဲ့က ရှန်းကျန်းယွီ၊ ကျူးချန်ယန်တို့နှင့် ဆွေးနွေးခဲ့ပြီး အစစ်အမှန်ဝိညာဉ် ဒုတိယအဆင့်ကသာ စည်းမျဉ်းကို ထိန်းချုပ်နိုင်ကြောင်း သိခဲ့ရသည်။

တစ်နည်းပြောရလျှင် သာမန် အစစ်အမှန်ဝိညာဉ်အဆင့် ကျွမ်းကျင်သူများသည် အင်မော်တယ်ဘုရင်အဆင့်သို့ စတင်ဝင်ရောက်လာသော စည်းမျဉ်းကိုနားမလည်သေးသည့် ကျွမ်းကျင်သူများနှင့် ဆင်တူသည်။

သူတို့က အင်မော်တယ်သခင်အဆင့်ကို ကျော်ဖြတ်လာသော်လည်း ဝါရင့် အင်မော်တယ်ဘုရင်တစ်ယောက်၏ရှေ့တွင် အကူအညီမဲ့နေသည်။

ကပ်ဘေးကို ကျော်ဖြတ်လာသော အင်မော်တယ်ဘုရင်များ၏ တိုက်ခိုက်နိုင်စွမ်းသည် ပိုမိုနက်နဲသည်။

ဟန်မူယဲ့က အင်မော်တယ်ဘုရင်များနှင့် ဆုံတွေ့ခဲ့ပြီး အင်မော်တယ်ဘုရင်မင်ဟယ်၏ ကိုယ်ပွားနှင့်လည်း တိုက်ခိုက်ခဲ့သည်။ သို့သော် အစစ်အမှန် အင်မော်တယ်ဘုရင်များကို အစစ်အမှန်ဝိညာဉ်အဆင့်က မယှဉ်နိုင်ကြောင်း သူနားလည်သည်။

ယခုအချိန်တွင် သူကတောက်ပနေသော ဓားတစ်လက်ဖြင့် အစစ်အမှန်ဝိညာဉ်အဆင့် ကျွမ်းကျင်သူနှစ်ဦးကို တိုက်ခိုက်နေသည်။ သူ၏ ဓားချက်တိုင်းသည် လျှို့ဝှက်နယ်မြေ၏စွမ်းအားကို သယ်ဆောင်ထားပြီး လောကအား လောင်ကျွမ်းစေနိုင်သော ရွှေကျီးကန်းမီးတောက်ကို ထုတ်ပေးသည်။

သူ့ရှေ့တွင်ရှိသော အစစ်အမှန်ဝိညာဉ်အဆင့် ကျွမ်းကျင်သူနှစ်ယောက်က သူနှင့် ထိပ်တိုက် ရင်မဆိုင်နိုင်ဘဲ ရှောင်တိမ်းနေသည်။

“ဘုန်း ....”

ဓားချက်နှင့်အတူ ရွှေနီရောင်မီးတိမ်တိုက်သည် မိုင်တစ်ရာပတ်ဝန်းကျင်ကို လွှမ်းခြုံသွားသည်။

မီးတောက်များကြားတွင် ရပ်နေသော ဟန်မူယဲ့က ရုတ်တရက် တုန်ခါသွားသည်။

စည်းမျဉ်း ....

မီးစည်းမျဉ်း ....

ရွှေကျီးကန်းမီးတောက် ပါဝင်နေသော မီးစည်းမျဉ်း ဖြစ်သည်။

မဟာတောရိုင်းကမ္ဘာသည် စည်းမျဉ်းစွမ်းအားများ ကင်းလွတ်နေခြင်းမဟုတ်ပေ။ မလိုအပ်ခြင်းသာ ဖြစ်သည်။

မဟာတောရိုင်းကမ္ဘာ၏ စွမ်းအားသည် အရိုင်းဆန်သောကြောင့် တိကျစွာထိန်းချုပ်ရန် မဖြစ်နိုင်ပေ။

သို့သော် စွမ်းအားသည် စွမ်းအားသာ ဖြစ်သည်။ စည်းမျဉ်းစွမ်းအားများသည် ဤနေရာတွင် တည်ရှိပြီး လောကနှင့် ပေါင်းစပ်နေသည်။

ယခုအချိန်တွင် ဟန်မူယဲ့၏ဓားရှည်က ဆက်တိုက် လှုပ်ရှားနေပြီး နောက်ဆုံးတွင် စွမ်းအားတချို့ကို တည်ငြိမ်အောင်လုပ်၍ စည်းမျဉ်းကို ထုတ်ယူနိုင်ခဲ့သည်။

မီးတောက် ....

ရွှေကျီးကန်းမျိုးနွယ်တွင် မီးတောက်စွမ်းအားသည် အခြေခံသာဖြစ်သည်။

အကယ်၍ ရွှေကျီးကန်းက မီးတောက်သာဖြစ်လျှင် ကောင်းကင်တွင် ချိတ်ဆွဲပြီး မဟာတောရိုင်းကမ္ဘာကို အလင်းပေးနိုင်မည်မဟုတ်ပေ။

“ရွှေကျီးကန်းစွမ်းအားက မီးစည်းမျဉ်းကို ထိန်းချုပ်နိုင်တယ်”

“ဒီလိုထိန်းချုပ်မှုမျိုးက သဘာဝကျတယ်။ အရင်တုန်းက ငါစုပ်ယူခဲ့တဲ့ စွမ်းအားတွေနဲ့ မတူဘူး”

ဟန်မူယဲ့က ဓားရှည်ဖြင့် ရှေ့သို့ ညွှန်ပြလိုက်ပြီး တီးတိုးပြောသည်။

သူ့ပတ်ဝန်းကျင်တွင်ရှိသော မီးတောက်များသည် သူ၏ စိတ်အတွေးအတိုင်း လှုပ်ရှားနေကြောင်း ခံစားမိသည်။

မိုင်တစ်ရာပတ်ဝန်းကျင်တွင် မီးတောက်များအားလုံးသည် သူ၏ အမိန့်ကို နာခံကြသည်။

ရှေးခေတ်တွင်လည်း နတ်ဘုရားများက ထိုစွမ်းအားမျိုးကို ထိန်းချုပ်ခဲ့ကြသည်။

“ဒီလိုမျိုးပေါ့”

ဟန်မူယဲ့က ဓားမြှောက်သည်။

မိုင်တစ်ရာပတ်ဝန်းကျင်တွင်ရှိသော မီးတောက်များသည် ဓားတစ်လက်အဖြစ် စုစည်းသွားသည်။

ဓားရှည် ကျဆင်းလာသည်။

“ဘုန်း”

ပေတစ်ထောင်ဓားရှည်သည် မီးတောက်များဖြင့် ပြည့်နှက်နေသည်။

မီးစည်းမျဉ်းကို ထိန်းချုပ်ခဲ့သည်။

စည်းမျဉ်းစွမ်းအားသည် ဟန်မူယဲ့၏ ခန္ဓာကိုယ်ကို ရစ်ပတ်ထားသည်။

ယခင်က သူနားလည်ထားသော စည်းမျဉ်းစွမ်းအားကို မဟာတောရိုင်းကမ္ဘာတွင် မသုံးနိုင်သော်လည်း မီးစည်းမျဉ်းကို နားလည်သွားသောအခါ လျင်မြန်စွာ တိုးတက်လာခဲ့သည်။

ထိုအရာသည် သူ၏ ကိုယ်ပိုင်စွမ်းအား ဖြစ်သည်။

“နောက်ဆုတ်”

ဟန်မူယဲ့၏ရှေ့တွင် လူသားမျိုးနွယ်၏ အစစ်အမှန်ဝိညာဉ်အဆင့် နှစ်ယောက်က မခုခံနိုင်သောကြောင့် နောက်ဆုတ်ပေးလိုက်ရသည်။

သူတို့ နောက်ဆုတ်သွားသောကြောင့် တခြားလူနှစ်ယောက်ကလည်း ဆက်မနေရဲတော့ဘဲ စစ်တပ်ကိုဦးဆောင်ပြီး မိုင်တစ်ထောင်အကွာအထိ ထွက်သွားသည်။

သူတို့၏တိုက်ပွဲသည် လေးနာရီကြာခဲ့သည်။ ဒုတိယအဆင်၏ ဂိတ်တံခါးကို တားဆီးထားသော ရွှေကျီးကန်းမျိုးနွယ်စုက အနိုင်ရခဲ့သည်။

လူသားမျိုးနွယ်က အကျအဆုံးများနှင့်အတူ နောက်ဆုတ်သွားသောအခါ တောင်ထိပ်တွင်ရှိသော ‌ရွှေကျီးကန်းများက အော်ဟစ်လိုက်ကြသည်။

“ခေါင်းဆောင်ဟန်က တကယ်ရဲရင့်တာပဲ”

ရှန်းကျန်းယွီက ဟန်မူယဲ့ကို ကြည့်လိုက်ပြီး ညင်သာစွာ သက်ပြင်းချသည်။

ဟန်မူယဲ့က အစစ်အမှန်ဝိညာဉ်အဆင့်သို့ ဝင်ရောက်ခါစဖြစ်သော်လည်း လူသားကျွမ်းကျင်သူနှစ်ယောက်နှင့် ရင်ဆိုင်ပြီး အနိုင်ရခဲ့သည်။ ထိုခွန်အားမျိုးကို မည်သူက စိတ်ကူးကြည့်နိုင်မည်နည်း။

ကျူးချန်ယန်က လေးစားစွာ ခေါင်းညိတ်သည်။

ထိုလူမျိုး၏ အနာဂတ်သည် အကန့်အသတ်မရှိပေ။

လူသားများ နောက်ဆုတ်သွားသောအခါ ဟန်မူယဲ့တို့က ဂိတ်တံခါး၏ရှေ့တွင် ထိုင်လိုက်ကြသည်။

သူတို့က အစီအစဉ်အရ ယခုအချိန်တွင် ဒုတိယအဆင့်သို့ ဝင်ရောက်မည်မဟုတ်ပေ။ လူသားစစ်တပ်ကို အားနည်းအောင်လုပ်ပြီးမှ နောက်တစ်ဆင့်သို့ သွားလိမ့်မည်။

ဤနေရာသည် လူသားစစ်တပ်အတွက် တည်နေရာအနေအထား မကောင်းပေ။ သူတို့က ဟန်မူယဲ့တို့ကို တုန်လှုပ်သွားအောင် မလုပ်နိုင်ပေ။

ဤနေရာတွင် ရွှေကျီးကန်းမျိုးနွယ်က အသာစီးရလိမ့်မည်။

လူသားမျိုးနွယ် နောက်ဆုတ်သွားသောကြောင့် ဟန်မူယဲ့က အခွင့်ကောင်းယူပြီး ကျင့်ကြံလိုက်သည်။

သူ့ရှေ့တွင် ရွှေအလင်းများ ပေါ်ထွက်လာပြီး သူ့ကို လွှမ်းခြုံသွားသည်။

အပြင်လူများက သူ၏ အခြေအနေကို အာရုံခံနိုင်မည်မဟုတ်ပေ။

“ဝီ”

ရွှေအလင်းတစ်ခုသည် သူ့လက်ထဲတွင် ပေါ်လာသည်။

ထိုအလင်းက သူကျင့်ကြံထားသော ရွှေကျီးကန်းမျိုးနွယ်၏ အစစ်အမှန်ဝိညာဉ် ဖြစ်သည်။

သူ၏ အစစ်အမှန်ဝိညာဉ်ကို ရွှေကျီးကန်းမီးတောက်များဖြင့် အပြည့်အဝ ဖွဲ့စည်းထားသည်။

တစ်ဖက်တွင် အနက်ရောင်ချပ်ဝတ်တစ်ခုသည် သူ့ရှေ့တွင် ပေါ်လာသည်။

ကမ္ဘာဦးချပ်ဝတ် ဖြစ်သည်။

မီးတောက်များက ချပ်ဝတ်ကို လွှမ်းခြုံသွားပြီး စွမ်းအားတစ်ခု နိုးထလာသည်ဟု သူခံစားရသည်။

ကမ္ဘာဦးချပ်ဝတ်၏ စွမ်းအားကို သွန်းလုပ်ထားသော နည်းလမ်း၊ အသုံးပြုထားသော ဝိညာဉ်သတ္တုများဖြင့် မဆုံးဖြတ်နိုင်ပေ။

ကမ္ဘာဦးချပ်ဝတ်နှင့် ကမ္ဘာဦးရုပ်သေးရုပ်များသည် အတူတူပင် ဖြစ်သည်။ အားကောင်းသောစွမ်းအားကို စုပ်ယူနိုင်လျှင် ပိုမိုသန်မာလာလိမ့်မည်။

ရုပ်သေးရုပ်အကြောင်းကို တွေးမိသောအခါတွင် ဟန်မူယဲ့က နတ်ဘုရားသတ်ဖြတ်ခြင်း ရုပ်သေးရုပ်ကို သတိရသွားသည်။ ထိုရုပ်သေးရုပ်၏ တည်နေရာကို သူမသိပေ။

သို့သော် နတ်ဘုရားသတ်ဖြတ်ခြင်း ရုပ်သေးရုပ်က ဝိညာဉ်စွမ်းအား ကောင်းမွန်သောကြောင့် မှတ်ဉာဏ်နိုးထရန် လွယ်ကူလိမ့်မည်။

အစစ်အမှန်ဝိညာဉ်စွမ်းအားသည် ကမ္ဘာဦးချပ်ဝတ်ကို အားဖြည့်ပေးနေသောကြောင့် ဟန်မူယဲ့၏ အငွေ့အသက်က ပိုမိုလေးနက်လာသည်။

ကမ္ဘာဦးချပ်ဝတ်၏ အကူအညီကြောင့် သူက ပိုမိုသန်မာလာလိမ့်မည်။

ရှုပ်ထွေးသော နည်းစနစ်များသည် မဟာတောရိုင်းကမ္ဘာတွင် အသုံးမဝင်ပေ။

အစစ်အမှန်ဝိညာဉ်အဆင့်တွင် ကောင်းကင်နှင့်မြေကြီး၏စွမ်းအားကို အသုံးပြုနိုင်သော တာအိုနည်းစနစ်နှင့် ဓားနည်းစနစ်များသည် ထိရောက်မှုမရှိတော့ပေ။

ရုပ်ခန္ဓာခွန်အား၊ သွေးမျိုးဆက်စွမ်းအားနှင့် အမွေဆက်ခံထားသော ပညာရပ်များကသာ အသုံးဝင်သည်။

ခွန်အားအနည်းငယ်ဖြင့် ကမ္ဘာတစ်ခုကို ဖျက်ဆီးနိုင်သောလူကသာ အစစ်အမှန်ကျွမ်းကျင်သူ ဖြစ်သည်။

နဂါးမိကျောင်း၏ခန္ဓာကိုယ်ကို သန့်စင်လိုက်‌သောအချိန်တွင် ဟန်မူယဲ့က ထိုအချက်ကို နားလည်ခဲ့သည်။

မဟာတောရိုင်းကမ္ဘာ ဖြစ်စေ၊ မူလကမ္ဘာ ဖြစ်စေ တိုက်ပွဲတိုင်းသည် အလုံးစုံစွမ်းအားအပေါ်တွင် မှီခိုနေသည်။

ထိုစွမ်းအားမျိုးသည် မရေမတွက်နိင်သော သဘာဝစွမ်းအားများ၏ ပေါင်းစပ်မှုဖြစ်ပြီး ပိုမိုသန်မာလေ ကမ္ဘာတစ်ခုကိုဖျက်ဆီးရန် လွယ်ကူလေ ဖြစ်သည်။

“ဘန်း”

သူ့ကို လွှမ်းခြုံထားသော ဝင်္ကပါအလင်းလျွာက ပျက်စီးသွားသည်။ ဟန်မူယဲ့က ကောင်းကင်ပေါ်သို့ ပျံတက်လာသည်။

အဝေးတစ်နေရာတွင် လူသားစစ်တပ်က ထပ်မံလှုပ်ရှားနေသည်။

ဤတစ်ကြိမ်တွင် သူတို့၏ စစ်ပွဲဝင်္ကပါက ပုဆိန်ကိုင်ထားသော ရွှေရောင်ချပ်ဝတ်စစ်သူကြီးများကို ဖန်တီးသည်။ ထိုစစ်သူကြီးများက တောင်ထွတ်ဆီသို့ ပြေးဝင်လာကြသည်။

ဟန်မူယဲ့၊ ရှန်းကျန်းယွီ၊ ကျူးချန်ယန်နှင့် တခြားလူများက တုံ့ဆိုင်းမနေဘဲ ရွှေ‌ရောင်ချပ်ဝတ် စစ်သူကြီးများဆီသို့ ပြေးသွားကြသည်။

“ဘုန်း”

ဟန်မူယဲ့က လက်သီးတစ်ချက်ဖြင့် ရှေ့တွင်ရှိသော စစ်သူကြီးပုံရိပ်ကို ဖျက်ဆီးလိုက်သည်။

သူ၏ လက်သီးချက်က အလွန်အားကောင်းသောကြောင့် ရှန်းကျန်းယွီက အံ့အားသင့်သွားသည်။

နာရီဝက်အတွင်း လူသားစစ်တပ်က နောက်ဆုတ်ပေးလိုက်ရသည်။