အခန်း (၁၁၄၂)

“သူတို့ကိုတား”

ဟန်မူယဲ့က အော်ဟစ်လိုက်သည်။ ကမ္ဘာဦးချပ်ဝတ်သည် သူ့ခန္ဓာကိုယ်တွင် ပြန်ပေါ်လာသည်။ သူက ရှေ့သို့ ခြေတစ်လှမ်းတိုးလိုက်ပြီး ပေတစ်ထောင်ကြီးမားသော စစ်သူကြီးပုံရိပ်သည် ကောင်းကင်ထက်တွင် ရှိနေသည်။

ထိုစစ်သူကြီးပုံရိပ်သည် လူသားစစ်တပ်အတွက် အိပ်မက်ဆိုး ဖြစ်ခဲ့သည်။

သူက ဂိတ်တံခါး၏ရှေ့တွင် ရပ်နေပြီး လူသားစစ်တပ်ကို ရှေ့မတိုးနိုင်အောင် တားဆီးခဲ့သည်။

ယခုအချိန်တွင် စစ်သူကြီးပုံရိပ် ပြန်ပေါ်လာသည်။

“ဘုန်း”

ဟန်မူယဲ့က လက်သီးထိုးချသည်။

ပြန့်ကျဲနေသော လူသားစစ်သည်များက ချက်ချင်း ရှုံးနိမ့်သွားကြသည်။

အစစ်အမှန်ဝိညာဉ်အဆင့် လူသားငါးယောက်က အစွမ်းကုန်ကြိုးစား၍ တိုက်ခိုက်နေသည်။ သူတို့က အစစ်အမှန်ဝိညာဉ်စွမ်းအားကို ထုတ်ဖော်ထားသည်။

သို့သော် ဟန်မူယဲ့၏ ခုခံမှုကို မချိုးဖျက်နိုင်ခဲ့ပေ။

သူက လက်သီးချက်များဖြင့် အစစ်အမှန်ဝိညာဉ်အဆင့် လူသားငါးယောက်ကို တားဆီးခဲ့သည်။

ရှန်းကျန်းယွီနှင့် ကျူးချန်ယန်က ရှေ့တက်လာကြသည်။

အစစ်အမှန်ဝိညာဉ်အရိုးကို သန့်စင်နေသော အဆီအနှစ်ဝိညာဉ် နဝမအဆင့် လက်ရွေးစင်များသည် သူတို့၏နောက်တွင် လိုက်လာသည်။

သူတို့က အစစ်အမှန်ဝိညာဉ်အရိုး၏ ထောက်ပံ့မှုကြောင့် အစစ်အမှန်ဝိညာဉ် တစ်ဝက်အဆင့်သို့ ရောက်နေကြသည်။

သူတို့က ဟန်မူယဲ့ကဲ့သို့ အစစ်အမှန်ဝိညာဉ် တစ်ဝက်အဆင့်နှင့် အစစ်အမှန်ဝိညာဉ်အဆင့်ကို အနိုင်ရမည်မဟုတ်သော်လည်း အရေအတွက် အလွန်များနေသည်။

ရွှေအလင်းရောင်သည် တောက်ပနေသည်။ သူတို့၏ ရွှေကျီးကန်းပုံရိပ်များသည် ကောင်းကင်ကို လွှမ်းမိုးသွားသည်။

“ဘုန်း”

ရွှေကျီးကန်းက တောင်ပံဖြန့်လိုက်ပြီး တိုက်ခိုက်သည်။

အစစ်အမှန်ဝိညာဉ်အဆင့် လူသားငါးယောက်က နောက်ဆုတ်ပေးလိုက်ရသည်။

အောက်တွင် မီးတောက်များက ပြန့်ကျဲနေသော စစ်တပ်ကို လွှမ်းခြုံထားသည်။

မီးစည်းမျဉ်း ဖြစ်သည်။

လူသားစစ်သည်များက မီးတောက်ကို ငြိမ်းသက်ရန် ကြိုးစားနေသော်လည်း မတတ်နိုင်ခဲ့ပေ။

ဤနေရာသည် ရွှေကျီးကန်းများ၏ လျှို့ဝှက်နယ်မြေဖြစ်ပြီး ရွှေကျီးကန်းမျိုးနွယ်ဝင်များကို ထောက်ပံ့ပေးနိုင်သည်။

အလင်းရောင်သည် လျှို့ဝှက်နယ်မြေ၏ အနက်ရှိုင်းဆုံးအပိုင်းတွင် တစ်ခုပြီးတစ်ခု တောက်ပလာသည်။

ရွှေကျီးကန်းရုပ်တုများ ရှိနေသောနေရာ ဖြစ်သည်။

ထိုနေရာတွင် မရေမတွက်နိုင်သော ရွှေကျီးကန်းဘိုးဘေးများကို မြှုပ်နှံထားသည်။

သူတို့က ရန်သူများအား သတ်ဖြတ်နေသော မျိုးဆက်သစ်များကို စောင့်ကြည့်နေကြသည်။

သူတို့ချန်ထားခဲ့သော အစစ်အမှန်ဝိညာဉ်အရိုးသည် မျိုးဆက်သစ်များကို အားဖြည့်ပေးပြီး အနိုင်ရရန် ကူညီနေသည်။

ထိုအချိန်တွင် လေဟာနယ်သည် ဆက်တိုက် တုန်ခါလာသည်။

ရွှေကျီးကန်းမီးတောက်များက အဆက်မပြတ် ပေါ်ထွက်လာသည်။

သူတို့၏ သွေးမျိုးဆက်စွမ်းအားက လှုပ်ရှားလာခဲ့သည်။

သူတို့က ကောင်းချီပေးခံလိုက်ရသည်။

လူတိုင်းက မီးပင်လယ်ထဲသို့ ရောက်သွားသည်ဟု ခံစားလိုက်ရသည်။ ရွှေကျီးကန်းကျွမ်းကျင်သူများသည် မီးပင်လယ်ထဲတွင် ကခုန်နေကြသည်။

ရွှေကျီးကန်းသည် မီးတောက်မှတစ်ဆင့် မွေးဖွားသည်။

သူတို့၏ သွေးမျိုးဆက်စွမ်းအားသည် အဆင့်မြင့်သွားသည်။

‌ရှေ့တွင် လူသားစစ်သည်များက ရှုံးနိမ့်ပြီး ထွက်ပြေးနေကြသည်။

အစစ်အမှန်ဝိညာဉ်အဆင့် လူသားငါးယောက်ကလည်း အသည်းအသန် တိုက်ခိုက်နေသည်။

သူတို့က ကိုယ့်ကိုယ်ကိုယ် ကာကွယ်ရန်ပင် မတတ်နိုင်ပေ။ ထွက်သွားသော ရွှေကျီးကန်းလက်ရွေးစင်များကို မတားဆီးနိုင်တော့ပေ။

ဟန်မူယဲ့၏ ပေတစ်ထောင်မြင့်မားသော စစ်သူကြီးပုံရိပ်က လက်သီးချက်များဖြင့် လူသားကျွမ်းကျင်သူများကို ဆက်လက် တိုက်ခိုက်နေသည်။

သူက ပြင်းထန်သော တိုက်ခိုက်လိုစိတ်ကို ထုတ်လွှတ်ထားသည်။

သူက လူသားများကို တားဆီးချင်ရုံသာမက သူတို့အားလုံးကို လျှို့ဝှက်နယ်မြေထဲတွင် ချန်ထားခဲ့ချင်သည်။

....

ရွှေကျီးကန်းခုံရုံး၏ အပျက်အစီးနယ်မြေ ....

ဤနေရာတွင် ပြန်ကျဲနေသော ကျောက်ခဲများကို မြင်ရသည်။

စစ်မြေပြင်တစ်ခု ဖြစ်နေသည်။

ကောင်းကင်နှင့် မြေကြီးကြားတွင် မရေမတွက်နိုင်သော ရွှေအလင်းတန်းများသည် တခြားအလင်းတန်းများနှင့် တိုက်ခိုက်နေကြသည်။

“ဘုန်း ....”

ရွှေကျီးကန်းလက်ရွေးစင်များသည် ကောင်းကင်ထက်တွင်ရှိသော အက်ကွဲကြောင်းမှတစ်ဆင့် ဆင်းသက်လာပြီး ပျော်ရွှင်နေကြသည်။

သူတို့က လျှို့ဝှက်နယ်မြေမှ ထွက်လာနိုင်ခဲ့သည်။

သူတို့က လျှို့ဝှက်နယ်မြေထဲတွင် သေဆုံးသွားတော့မည်ဟု ထင်ခဲ့ကြသည်။

“ဘုန်း”

ကောင်းကင်မှတစ်ဆင့် အစိမ်းရောင်ဓားမော့အလင်းတစ်ခု ဆင်းသက်လာသည်။

ထိုဓားမော့က မိုင်ထောင်ချီအကွာအဝေးကို ကျော်ဖြတ်ပြီး အက်ကွဲကြောင်းထဲမှ ထွက်လာသော ရွှေကျီးကန်းလက်ရွေးစင်များကို ခုတ်ချသည်။

ထိုဓားချက်သည် ဖျက်ဆီးနိုင်သောစွမ်းအားဖြင့် ပြည့်နှက်နေသည်။

“ဝီ”

ရွှေရောင်ဓားတစ်လက်သည် ဓားမော့ကို တားဆီးလိုက်သည်။

ဓားနှစ်လက်၏ ထိတွေ့မှုကြောင့် ပတ်ဝန်းကျင်တွင်ရှိသော ရင်းမြစ်စွမ်းအားများက တုန်ခါသွားသည်။

ရွှေရောင်မီးတောက်များ ပေါ်ထွက်လာသည်။

အစိမ်းရောင်အလင်းသည် မီးတောက်များအားလုံးကို ငြိမ်းသက်ရန် ကြိုးစားနေပုံရသည်။

“အားလုံးပဲ ထွက်သွားဖို့ အသင့်ပြင်ထားပါ”

“ငါက ရန်သူကို တားဆီးလိုက်မယ်”

လေထုထဲတွင် ဓားရှည်ကိုင်ထားသော ရွှေရောင်ပုံရိပ်တစ်ခုက အော်ပြောလိုက်ပြီး ရှေ့တက်သည်။

ထိုပုံရိပ်၏နောက်တွင် များပြား‌သော ရွှေကျီးကန်းမျိုးနွယ်ဝင်များကို မြင်ရသည်။

“ရှန်းချီယု၊ မင်းက ဒီကို လာရဲရင် ထွက်မသွားစေရဘူး”

အစိမ်းရောင်အလင်းသည် တောက်ပနေပြီး အစစ်အမှန်ဝိညာဉ်များ တစ်ခုပြီးတစ်ခု ပေါ်လာသည်။

ရှန်းထန်ကလန်၏ ပထမအကြီးအကဲ ရှန်းချီယုသည် အစစ်အမှန်ဝိညာဉ် တတိယအဆင့်တွင် ရှိနေသည်။

သို့သော် သူ့ရှေ့တွင်ရှိသော လူသားမျိုးနွယ်၏ ကျွမ်းကျင်သူက ကောင်းကင်ဖိနှိပ်ဘုရင် ယန်ကျန်း ဖြစ်သည်။

သူက လောကကို ဖိနှိပ်ပြီး မျိုးနွယ်စုတိုင်းကို ကြောက်ရွံ့စေနိုင်သည်ဟု ပြောကြသည်။

မရေမတွက်နိုင်သော အစိမ်းရောင်အလင်းများနှင့်အတူ လူသားကျွမ်းကျင်သူများ ပေါ်ထွက်လာကြသည်။

အစစ်အမှန်ဝိညာဉ်အဆင့် အယောက်ငါးဆယ်ကျော် ရှိနေသည်။

သူတို့၏နောက်တွင် သန်းချီသော စစ်သည်များလည်း ရှိနေကြသည်။

လောကကို သိမ်းပိုက်ခဲ့သော စစ်သည်များဖြင့် ထိုစစ်တပ်ကို ဖွဲ့စည်းထားသည်။ သူတို့က အနည်းဆုံး အစစ်အမှန်ဝိညာဉ် သတ္တမအဆင့်တွင် ရှိကြသည်။

သူတို့သည် တခြားမျိုးနွယ်စုများ၏ ကျွမ်းကျင်သူတိုင်းကို ဖိနှိပ်နိုင်သည်။

စစ်တပ်က ရွှေကျီးကန်းမျိုးနွယ်၏ ကျွမ်းကျင်သူများဆီသို့ ချီတက်လာသည်။

ကောင်းကင်ထက်တွင် ရွှေကျီးကန်းမျိုးနွယ်ဝင်များ၏ မျက်နှာထားက လေးနက်နေသည်။

ရွှေကျီးကန်းမျိုးနွယ်၏ အစစ်အမှန်ဝိညာဉ်အဆင့် ကျွမ်းကျင်သူ ၁၉ယောက် ရောက်လာသည်။

ရှန်းထန်ကလန်၏ ခေါင်းဆောင် ရှန်းယွဲ့နှင့် ပထမအကြီးအကဲ ရှန်းချီယုတို့သည် အစစ်အမှန်ဝိညာဉ် တတိယအဆင့်တွင်ရှိနေပြီး အလွန်အားကောင်းကြသည်။

ယခုအချိန်တွင် ရှန်းယွဲ့က လျှို့ဝှက်နယ်မြေကို ထိုးဖောက်ပြီး လက်ရွေးစင်များကို လွှတ်ပေးနေသည်။

လက်ရွေးစင်ငါးသောင်းခန့် ထွက်လာပြီး အက်ကွဲကြောင်းက တိတ်ဆိတ်စွာ ဆက်ရှိနေသည်။

အပြင်ဘက်သို့ရောက်လာသော လက်ရွေးစင်ငါးသောင်းက စိတ်လှုပ်ရှားနေသော မျက်နှာထားဖြင့် ပတ်ဝန်းကျင်ကို ကြည့်နေကြသည်။

ရှန်းယွဲ့က လက်ရွေးစင်ငါးသောင်းကို ကြည့်လိုက်ပြီး စိတ်ပျက်သွားသည်။

ရွှေကျီးကန်းလက်ရွေးစင် ရှစ်သောင်းတွင် ငါးသောင်းခန့်သာ ကျန်တော့သည်။

အရေးအကြီးဆုံးအနေဖြင့် သူ၏ သားဖြစ်သူ ရှန်းကျန်းယွီက ထွက်မလာခဲ့ပေ။

“မင်းသားရှန်းနဲ့တခြားလူတွေက အစစ်အမှန်ဝိညာဉ်စွမ်းအားကို စတေးပြီး ရွှေကျီးကန်းဘိုးဘေးတွေရဲ့ အသိအမှတ်ပြုခြင်းကို ရယူခဲ့တာ ဖြစ်လိမ့်မယ်။ အဲဒါကြောင့် သူတို့တွေ ထွက်လာနိုင်ခဲ့တယ်”

ရှန်းထန်ကလန်၏ အကြီးအကဲတစ်ယောက်က နာကျင်နေသောမျက်နှာထားဖြင့် ပြောသည်။

ထိုလက်ရွေးစင်များက ရွှေကျီးကန်းဘိုးဘေးများ၏ အသိအမှတ်ပြုခြင်းကို မရနိုင်ပေ။ ရှန်းကျန်းယွီနှင့် တခြားလူများက ကိုယ့်ကိုယ်ကိုယ် စတေးလိုက်ခြင်း ဖြစ်လိမ့်မည်။

အမှန်အတိုင်းပြောရလျှင် သူတို့က ရလဒ်တချို့ကို တွက်ချက်ထားခဲ့သည်။

အစစ်အမှန်ဝိညာဉ်အဆင့်နှင့် အဆီအနှစ်ဝိညာဉ် နဝမအဆင့် ကျွမ်းကျင်သူတချို့ ပြန်ထွက်လာနိုင်သည်။

ကျန်လက်ရွေးစင်များကို ဆုံးရှုံးသွားရသော်လည်း လက်ခံနိုင်သည်။

နောက်တစ်ခုသည် လက်ရှိအခြေအနေ ဖြစ်သည်။

အစစ်အမှန်ဝိညာဉ်အဆင့်များက ကိုယ့်ကိုယ်ကိုယ် စတေးပြီး တခြားကလန်သားများကို ထွက်သွားစေခဲ့သည်။

“ခေါင်းဆောင်၊ သူတို့ကို ခေါ်ထုတ်သွားဖို့ လွယ်မှာမဟုတ်ဘူး”

ရှန်းယွဲ့၏ဘေးတွင်ရှိသော ရွှေကျီးကန်းမျိုးနွယ်၏ အစစ်အမှန်ဝိညာဉ်အဆင့် ကျွမ်းကျင်သူက ပတ်ဝန်းကျင်ကို ကြည့်လိုက်ပြီး နက်ရှိုင်းသောအသံဖြင့် ပြောသည်။

သူတို့က လက်ရွေးစင်များကို ခေါ်ဆောင်ရန်အတွက် ကြိုတင်ပြင်ဆင်ထားသော်လည်း လူသားစစ်တပ်ကြောင့် ခက်ခဲနေဆဲ ဖြစ်သည်။

တခြားလူများ၏ မျက်နှာထားကလည်း မှုန်မှိုင်းနေသည်။

ရွှေကျီးကန်းလက်ရွေးစင်များ ထွက်လာသောကြောင့် သူတို့က ပျော်ရွှင်နေသင့်သည်။

သို့သော် နေဖမ်းပွဲတွင် ပါဝင်ခဲ့သည့် အစစ်အမှန်ဝိညာဉ်အဆင့်နှင့် အဆီအနှစ်ဝိညာဉ် နဝမအဆင့် ကျွမ်းကျင်သူများအားလုံးက သေဆုံးသွားသည်။

ထို့ကြောင့် ရွှေကျီးကန်းမျိုးနွယ်စုသည် နောက်ထပ် နှစ်ပေါင်းရာချီ၊ ထောင်ချီအထိ ဆက်ခံသူရှိတော့မည်မဟုတ်ပေ။

“သူတို့ရဲ့ အစစ်အမှန်ဝိညာဉ်အရိုးကို ကြည့်ဖို့ပဲ ကျန်တော့မယ်”

အကြီးအကဲတစ်ယောက်က စိတ်ပျက်နေသော မျက်နှာထားဖြင့် ညင်သာစွာ ပြောသည်။

“သူတို့က အစစ်အမှန်ဝိညာဉ်အရိုး တစ်ရာကို ရလာမယ်ဆိုရင် အရိုးရဲ့စွမ်းအားနဲ့ ကလန်သားတစ်သောင်းကို ခေါ်ထုတ်သွားနိုင်မယ် ....”

သူ့စကားကို ကြားလိုက်ရသောအခါ တခြားအကြီးအကဲများက ခေါင်းခါလိုက်ပြီး တီးတိုးပြောသည်။

“မဖြစ်နိုင်ဘူး။ နေဖမ်းပွဲကနေ အရိုးတစ်ရာ ရလာတဲ့ဖြစ်ရပ်မျိုး တစ်ခါမှ မရှိခဲ့ဘူး”

“ပြီးတော့ ဒီတစ်ကြိမ်မှာ ....”

ယခုတစ်ကြိမ်တွင် အစစ်အမှန်ဝိညာဉ်အဆင့်နှင့် အဆီအနှစ်ဝိညာဉ်နဝမအဆင့်များ ထွက်မလာနိုင်ခဲ့ပေ။

“အစစ်အမှန်ဝိညာဉ်အရိုးကို ရထားတဲ့လူတွေက အရိုးရဲ့စွမ်းအားကို အသက်သွင်းပြီး ကလန်သားတွေကို ကာကွယ်ပေးလိုက်ပါ။ ငါတို့က ဝိုင်းရံမှုကနေ ဖောက်ထွက်မယ်”

ဆံပင်ဖြူနေသော အကြီးအကဲတစ်ယောက်က အသက်ရှူသွင်းလိုက်ပြီး အော်ပြောသည်။

တစ်ဖက်တွင်ရှိနေသော ကောင်းကင်ဖိနှိပ်ဘုရင်က လှုပ်ရှားလိုက်သည်။

အကြီးအကဲ၏စကားကို ကြားလိုက်ရသောအခါတွင် ရွှေကျီးကန်းလက်ရွေးစင်များက တစ်ယောက်ကိုတစ်ယောက် ကြည့်လိုက်ကြသည်။

အစစ်အမှန်ဝိညာဉ်အဆင့် ရွှေကျီးကန်းအကြီးအကဲများ၏ နှလုံးသားက လေးလံသွားသည်။

‘အစစ်အမှန်ဝိညာဉ်အရိုးကို ဘယ်သူမှ မရခဲ့ကြဘူးလား’

“ချီယွီကျဲ၊ ငါက အစစ်အမှန်ဝိညာဉ်အရိုးကို မင်းဆီပေးလိုက်မယ်။ လျှို့ဝှက်နယ်မြေထဲမှာ မင်းက ငါ့ကို ကယ်တင်ခဲ့တယ်။ အခု ငါတို့က တစ်ယောက်နဲ့တစ်ယောက် အကြွေးမတင်တော့ဘူး”

အဆီအနှစ်ဝိညာဉ် အဌမအဆင့်တွင်ရှိသော ချပ်ဝတ်နှင့် လူသန်ကြီးတစ်ယောက်က အစစ်အမှန်ဝိညာဉ်အရိုးကို လူငယ်တစ်ယောက်ဆီသို့ ပစ်ပေးသည်။

“ကျန်းလင်ပေါင်၊ ငါတို့ ယွီလျူကလန်မှာ အစစ်အမှန်ဝိညာဉ်အဆင့်ကိုရောက်ဖို့ မင်းက အခွင့်အရေး အများဆုံးပဲ။ ဒီအရိုးက မင်းအတွက်ပဲ”

သက်လတ်ပိုင်းအရွယ်လူတစ်ယောက်က လေးနက်သောမျက်နှာထားဖြင့် နောက်တွင်ရပ်နေသော အနက်ရောင်ချပ်ဝတ်နှင့်လူငယ်ကို အစစ်အမှန်ဝိညာဉ်အရိုး ပေးလိုက်သည်။

အစစ်အမှန်ဝိညာဉ်အရိုးများသည် တစ်ခုပြီးတစ်ခု ပေါ်ထွက်လာပြီး အစစ်အမှန်ဝိညာဉ်အဆင့်သို့ ရောက်ရှိရန် အခွင့်အရေးများသော လူငယ်များဆီသို့ ရောက်သွားကြသည်။

အရိုးတစ်ခု ....

ဆယ်ခု ....

တစ်ရာ ....

ပိုမိုများပြားသော အစစ်အမှန်ဝိညာဉ်အရိုးများ ပေါ်ထွက်လာပြီး ပတ်ဝန်းကျင်ကို တောက်ပနေစေသည်။

ကောင်းကင်ထက်တွင်ရှိသော ရွှေကျီးကန်းကျွမ်းကျင်သူနှင့် လူသားကျွမ်းကျင်သူများက ထိုမြင်ကွင်းကို ကြည့်လိုက်ပြီး အံ့အားသင့်နေကြသည်။

လျှို့ဝှက်နယ်မြေထဲမှ ထွက်လာသော လက်ရွေးစင်များသည် အစစ်အမှန်ဝိညာဉ်အရိုး တစ်ရာကို ပြန်ယူလာခဲ့ကြသည်။