အခန်း (၁၁၄၅)

အောင်ပွဲကြီးတစ်ခု ဖြစ်သည်။

လူသားမျိုးနွယ်နှင့် နှစ်ပေါင်းများစွာကြာအောင် တိုက်ခိုက်ခဲ့သော ရွှေကျီးကန်းမျိုးနွယ်၏ သမိုင်းကြောင်းတွင် ထိုအောင်ပွဲမျိုး မရှိခဲ့ပေ။

ရွှေကျီးကန်းမျိုးနွယ်၏ လက်ရွေးစင်များက ကျယ်လောင်စွာ အော်ဟစ်နေကြသည်။

အစစ်အမှန်ဝိညာဉ်အဆင့် အကြီးအကဲများက ပြုံးနေကြသည်။

ရှန်းယွဲ့က နောက်ဆုတ်သွားသော လူသားစစ်တပ်ကို လှမ်းကြည့်သည်။

ထို့နောက် ဟန်မူယဲ့ကို လှည့်ကြည့်သည်။

တခြားလူများက နာမည်မကြီးသော်လည်း အလွန်သန်မာသော မျိုးဆက်သစ်လူငယ်ကို တိတ်ဆိတ်စွာ စောင့်ကြည့်နေကြသည်။

ယန်ကျန်းနှင့် ရင်ဆိုင်ခဲ့သည့်အတွက် သူက မျိုးဆက်သစ်၏ နံပတ်တစ်လူငယ် ဖြစ်လိမ့်မည်။

ရှန်းယွဲ့နှင့် တခြားလူများက ရွှေကျီးကန်းခုံရုံးဟောင်းတွင် ရက်အနည်းငယ်ခန့်နေပြီး ဖြည်းဖြည်းချင်း ထွက်လာခဲ့သည်။

ခုံရုံးသည် ပျက်စီးနေသောကြောင့် တန်ဖိုးမရှိတော့ပေ။

ရှန်းယွဲ့က ထွက်မသွားခင် နောင်တ၊ ဝမ်းနည်းမှုများနှင့်အတူ လျှို့ဝှက်နယ်မြေနှင့် ဆက်သွယ်ထားသော ယဇ်ပလ္လင်ကို ဖျက်ဆီးပစ်လိုက်သည်။

မတတ်နိုင်ပေ။ ရွှေကျီးကန်းမျိုးနွယ်စုက ပိုမိုသန်မာလာလျှင်ပင် လူသားမျိုးနွယ်ကို အပြည့်အဝတားဆီးရန် မဖြစ်နိုင်ပေ။ ထို့ကြောင့် ယဇ်ပလ္လင်ကို ဖျက်ဆီးပစ်ရမည်။

လူသားမျိုးနွယ်က ဤကမ္ဘာ၏ ထိပ်တန်းအင်အားစုတစ်ခု ဖြစ်လာသည်။

“ငါတို့ ရွှေကျီးကန်းမျိုးနွယ်က ဘယ်ကို သွားနိုင်မှာလဲ”

ရှန်းယွဲ့က ရွှေကျီးကန်းခုံရုံး၏ အပျက်အစီးများကို ကြည့်လိုက်ပြီး ညင်သာစွာ ပြောသည်။

တခြားလူများ၏ မျက်နှာထားကလည်း ရှုပ်ထွေးနေသည်။

ရွှေကျီးကန်းမျိုးနွယ်က မည်သည့်နေရာသို့ သွားရမည်နည်း။

ကလန်ကြီးတစ်ခု၏ ခေါင်းဆောင်အနေဖြင့် ရှန်းယွဲ့က ထိုသို့ ပြောလိုက်သောကြောင့် ရွှေကျီးကန်းမျိုးနွယ်စု၏ အခြေအနေကို မြင်နိုင်သည်။

“တခြားမျိုးနွယ်စုတွေနဲ့ မဟာမိတ်ဖွဲ့လို့ရတယ်လေ”

“ဒါမှမဟုတ် အံ့ဖွယ်ဝိညာဉ်တိုင်းပြည်နဲ့ ပူးပေါင်းလို့ရတယ်”

ဟန်မူယဲ့က ညင်သာစွာပြောသည်။

သို့သော် အကြံပြုချက်တစ်ခုသာ ဖြစ်သည်။

သူက အစစ်အမှန်ဝိညာဉ်အဆင့်သို့ ဝင်ရောက်လာသော်လည်း မျိုးနွယ်စုတစ်ခုလုံး၏ အခြေအနေကို မဆုံးဖြတ်နိုင်သေးပေ။

မိုင်သန်းချီအကွာသို့ ရောက်လာသောအခါတွင် ရွှေကျီးကန်းမျိုးနွယ်ဝင်များက လူစုခွဲလိုက်ကြသည်။

အစစ်အမှန်ဝိညာဉ်အရိုးကို ရသည်ဖြစ်စေ၊ မရသည်ဖြစ်စေ ဤတိုက်ပွဲသည် သူတို့အားလုံးအတွက် ရှားပါးသော အတွေ့အကြုံတစ်ခု ဖြစ်သည်။

သူတို့က အစစ်အမှန်ဝိညာဉ် တတိယအဆင့် ကျွမ်းကျင်သူများ၏ တိုက်ပွဲကိုလည်း မြင်ခဲ့ရသည်။ အစစ်အမှန်ဝိညာဉ်အဆင့် လူသားများနှင့်လည်း တိုက်ခိုက်ခဲ့သည်။

ရွှေကျီးကန်းခုံရုံးမှ အတိတ်ဝိညာဉ်များနှင့်လည်း ပူးပေါင်းခဲ့သည်။

ထိုအတွေ့အကြုံကြောင့် ရှင်သန်လာသော ရွှေကျီးကန်းလက်ရွေးစင်များက လျင်မြန်စွာ တိုးတက်လာလိမ့်မည်။

အနာဂတ်တွင် သူတို့က ကိုယ်ပိုင်ကလန်၏ အထောက်အပံ့များ ဖြစ်လာမည်။

“လျှို့ဝှက်နယ်မြေထဲမှာ ဖြစ်ခဲ့တဲ့အကြောင်းကို မင်းတို့က ထုတ်မပြောဘူးလို့ မျှော်လင့်တယ်”

ရှန်းယွဲ့က ထွက်သွားတော့မည့် လက်ရွေးစင်များကို ပြောလိုက်သည်။

သူ့မျက်နှာထားက လေးနက်နေသည်။

“ခေါင်းဆောင်ဟန်မူယဲ့၊ ရှန်းကျန်းယွီ၊ ကျူးချန်ယန်နဲ့ မင်းတို့အားလုံးက တိုးတက်လာဖို့ အချိန်လိုတယ်”

“လျှို့ဝှက်နယ်မြေရဲ့ အတွေ့အကြုံနဲ့ ရတနာတွေကို မင်းတို့က ဖြည်းဖြည်းချင်း ချေဖျက်ရမယ်။ တခြားလူတွေက လုယူသွားလို့ မရဘူး”

လူတိုင်းက ရှန်းယွဲ့၏စကားကို မှတ်သားထားလိုက်သည်။

သူတို့က သတိလွတ်သွားလျှင် အမဲလိုက်ခံရလိမ့်မည်။

ဟန်မူယဲ့က ထွက်သွားတော့မည့်အချိန်တွင် ရှန်းယွဲ့က သီးသန့်ပြောခဲ့သည်။

“ဟန်မူယဲ့၊ မင်းက တခြားလူတွေနဲ့ မတူဘူး။ ကောင်းကင်တစ်သောင်းတိုင်းပြည်ရဲ့ အဓိကပစ်မှတ်တစ်ခု ဖြစ်လာလိမ့်မယ်”

“မင်းက အစစ်အမှန်ဝိညာဉ်အဆင့် ဖြစ်နေတာကြောင့် အမဲလိုက်မခံရတော့ဘူးလို့ မထင်လိုက်နဲ့”

ရှန်းယွဲ့က မုန်းတီးသော မျက်လုံးများနှင့်အတူ အံကြိတ်ထားပြီး ပြောလိုက်သည်။

“ရှန်းကျန်းယွီရဲ့ အစ်ကိုကြီးက အစစ်အမှန်ဝိညာဉ်အဆင့်မှာ နှစ်ပေါင်းရှစ်သောင်းကြာအောင် ရှိခဲ့ပေမဲ့ နယ်စပ်ရဲ့ ကုန်ပစ္စည်းပို့ဆောင်ရေးမှာ လုပ်ကြံခံလိုက်ရတယ်”

ရွှေကျီးကန်းမျိုးနွယ်၏ အစစ်အမှန်ဝိညာဉ်အဆင့် ကျွမ်းကျင်သူတိုင်းကို လူသားများက အမဲလိုက်လိမ့်မည်။

ဤတစ်ကြိမ်တွင် ဟန်မူယဲ့က အလွန်ကောင်းမွန်စွာ ဆောင်ရွက်ခဲ့သည်။ ထို့အပြင် ယန်ကျန်းနှင့်လည်း တိုက်ခိုက်ခဲ့သောကြောင့် လူသားမုဆိုးများ၏ အဓိကပစ်မှတ်တစ်ခု ဖြစ်လာလိမ့်မည်။

ယန်ကျန်းက ဆန္ဒရှိလျှင် ဟန်မူယဲ့၏ နာမည်အောက်တွင် ဆုကြေးများကို ထည့်ထားနိုင်သည်။

ဟန်မူယဲ့က ခေါင်းညိတ်လိုက်ပြီး လက်မြှောက်သည်။ ရွှေအလင်းလွှာသည် ပတ်ဝန်းကျင်ကို ပိတ်ဆို့လိုက်သည်။

ရှန်းယွဲ့က အံ့အားသင့်သွားသည်။

ထို့နောက် သူက မျက်လုံးပြူးသွားခဲ့သည်။

ဟန်မူယဲ့က လက်မြှောက်ပြီး အစစ်အမှန်ဝိညာဉ်အရိုးများကို ထုတ်ပေးသည်။

အနည်းဆုံး အစစ်အမှန်ဝိညာဉ်အရိုး ငါးသောင်း ရှိနေသည်။

“ကျွန်တော်က လျှို့ဝှက်နယ်မြေကနေ အရိုးငါးသောင်းယူလာခဲ့တယ်”

ဟန်မူယဲ့က အံ့အားသင့်နေသော ရှန်းယွဲ့ကို ကြည့်လိုက်ပြီး ညင်သာစွာပြောသည်။

“ဒါက မဟာနေမင်းရွှေကျီးကန်းရဲ့ ရည်ရွယ်ချက်ပါ”

မဟာနေမင်းရွှေကျီးကန်း ....

ကောင်းကင်တွင်ရှိနေသော မဟာနေမင်းရွှေကျီးကန်းသည် ရွှေကျီးကန်းမျိုးနွယ်ဝင်များ၏ ဆုတောင်းစကားကို မတုံ့ပြန်ခဲ့ပေ။

“မဟာနေမင်းရွှေကျီးကန်းလား။ သူက ဘာပြောသေးလဲ”

ရှန်းယွဲ့က ဟန်မူယဲ့ကို မယုံကြည်နိုင်စွာ ကြည့်လိုက်သည်။

“သူက ရွှေကျီးကန်းမျိုးနွယ်စုကို ကူညီပေးဖို့အတွက် အစစ်အမှန်ဝိညာဉ်အရိုးတွေကို အသုံးပြုချင်တယ်”

“အနည်းဆုံး ရွှေကျီးကန်းမျိုးနွယ်က အချိန်တစ်ခုအထိ ရှုံးနိမ့်သွားမှာမဟုတ်ဘူး”

ဟန်မူယဲ့၏ မျက်လုံးများက လေးနက်နေသည်။

သူက အင်မော်တယ်ဘုရင်ချန်ယွမ်ကို တိုက်ခိုက်ရန် မလိုအပ်သော်လည်း တစ်ခါတလေတွင် ကံကြမ္မာက ထူးဆန်းသည်။

သူက တစ်‌နေ့တွင် အင်မော်တယ်ဘုရင်ချန်ယွမ်နှင့် ရင်ဆိုင်ရလိမ့်မည်။

‘မဟာနေမင်းရွှေကျီးကန်းက အဲဒီအကြောင်းကို ကြိုသိနေတာလား’

‘အင်မော်တယ်ဘုရင်ချန်ယွမ်က လိုချင်တာရရင် ထွက်သွားလိမ့်မယ်’

‘ဒါက ရွှေကျီးကန်းမျိုးနွယ်ရဲ့ အနာဂတ်လား’

ရှန်းယွဲ့က အစစ်အမှန်ဝိညာဉ်အရိုး ငါးသောင်းကို ယူသွားသည်။

ကလန်ကြီးသုံးခုက ထိုအရိုးများကို အသုံးပြု၍ မရေမတွက်နိုင်သော ကျွမ်းကျင်သူများကို မွေးထုတ်ပေးလိမ့်မည်။

အနည်းဆုံး နှစ်တစ်သိန်းကြာသည်အထိ ရှေ့တန်းတွင် ပြဿနာမရှိနိုင်တော့ပေ။

ဟန်မူယဲ့က ဟန်တောင်တန်းကလန်သို့ ပြန်ရောက်လာပြီး တံခါးပိတ်ကျင့်ကြံလိုက်သည်။

ရွှေအလင်းစက်ကွင်းများသည် သူ့ရှေ့တွင် တစ်ခုပြီးတစ်ခု ပေါ်လာသည်။

စည်းမျဉ်းများ ဖြစ်သည်။

မီးစည်းမျဉ်းသည် အဆင့်နိမ့်သည်။

စတေးခြင်းစည်းမျဉ်းသည် အလယ်အလတ်အဆင့် ဖြစ်သည်။

သတ္တိစည်းမျဉ်းသည် စတေးခြင်းစည်းမျဉ်းနှင့် အဆင့်တူသည်။

အစိမ်းရောင်အငွေ့အသက်သည် ဟန်မူယဲ့၏ လက်ချောင်းထိပ်တွင် ပေါ်လာသည်။

သူစုစည်းထားသော စည်းမျဉ်းစွမ်းအားများ ဖြစ်သည်။

မဟာတောရိုင်းကမ္ဘာ၏ ဖိအားကြောင့် ထိုစည်းမျဉ်းများကို မသုံးနိုင်သော်လည်း သုံးသပ်ကြည့်နိုင်သည်။

သေခြင်းရှင်ခြင်းစည်းမျဉ်း။ သက်ရှိများ၏ သေခြင်းရှင်ခြင်းကို ထိန်းချုပ်ထားသော စည်းမျဉ်းသည် စတေးခြင်းစည်းမျဉ်းနှင့် မတူပေ။ ထိုစည်းမျဉ်းသည် မီးစည်းမျဉ်းနှင့် အဆင့်တူသည်။

သေခြင်းရှင်ခြင်းသည် ပြိုင်ဘက်ကို အမှန်တကယ် မထိန်းချုပ်နိုင်ပေ။

မီးစည်းမျဉ်းကဲ့သို့ ပြိုင်ဘက်ကို အားနည်းသွားစေရုံသာ တတ်နိုင်သည်။

သို့သော် အစစ်အမှန်ဝိညာဉ်အဆင့် ကျွမ်းကျင်သူများအတွက်သာ ဖြစ်သည်။

အစစ်အမှန်ဝိညာဉ်အဆင့်သို့ မရောက်‌သေးသော လူများက ပုရွက်ဆိတ်များသာ ဖြစ်ကြသည်။

သေခြင်းရှင်ခြင်းအပြင် ကောင်းကင်သစ်ပင်၏ အသက်စွမ်းအားလည်း ရှိနေသည်။

ထိုစွမ်းအားက သေခြင်းရှင်ခြင်းထက် အဆင့်မြင့်သည်။

“အဲဒီတော့ ငါက စတေးခြင်း၊ သေခြင်းရှင်ခြင်းနဲ့ အသက်စွမ်းအားကို ပေါင်းစပ်ပြီး ထာဝရှင်သန်ခြင်းစည်းမျဉ်းကို လေ့လာမယ်”

ရွှေအလင်းသည် ဟန်မူယဲ့၏ခန္ဓာကိုယ်ကို လွှမ်းခြုံသွားသည်။

ထာဝရှင်သန်ခြင်းက မည်သည့်အရာ ဖြစ်သနည်း။

တိကျသော အခြေအနေတချို့ကို လိုအပ်သည့် ပြန်လည်မွေးဖွားခြင်း မဟုတ်ပေ။

လုံလောက်သောစွမ်းအင်ကို လိုအပ်သည့် ဖီးနစ်ငှက်၏ ပြန်လည်မွေးဖွားခြင်းမျိုးလည်း မဟုတ်ပေ။

အစစ်အမှန် ထာဝရရှင်သန်ခြင်းသည် ရုပ်ခန္ဓာနှင့်ဝိညာဉ် တည်မြဲနေခြင်းကို ဆိုလိုသည်။

ထိုစည်းမျဉ်းသည် အဆင့်မြင့်စည်းမျဉ်း ဖြစ်သည်။

ဟန်မူယဲ့က စည်းမျဉ်းအများအပြားကို ထိန်းချုပ်ထားပြီး ထာဝရှင်သန်ခြင်းကို ဉာဏ်အလင်းရခဲ့သည်။

သို့သော် ထာဝရရှင်သန်ခြင်းကို မသုံးသပ်ခင် သေခြင်းရှင်ခြင်းနှင့် စတေးခြင်းစည်းမျဉ်းကို ပေါင်းစပ်ရန် လိုအပ်သည်။

“ဘုန်း”

မီးတောက်တစ်ခုသည် သူ့ရှေ့တွင် ပေါ်ထွက်လာသည်။

ဖီးနစ်ငှက်၏ ပြန်လည်မွေးဖွားခြင်းမီးတောက် ဖြစ်သည်။

ရွှေရောင်မီးတောက်များသည် သူ့ခန္ဓာကိုယ်ကို ရစ်ပတ်ထားသည်။

ဖီးနစ်ငှက်၏ ပြန်လည်မွေးဖွားခြင်းစည်းမျဉ်းက ဖြည်းဖြည်းချင်း ပေါ်လာသည်။

ပြန်လည်မွေးဖွားခြင်း၊ သေခြင်းရှင်ခြင်းနှင့် စတေးခြင်းကို ပေါင်းစပ်လိုက်လျှင် ရှင်သန်ခြင်းစည်းမျဉ်းကို နားလည်နိုင်လိမ့်မည်။

မီးတောက်များကြားတွင်ရှိသော ဟန်မူယဲ့၏ ခန္ဓာကိုယ်က ပုံရိပ်ယောင်ဆန်နေသည်။

နောက်ဆုံးတွင် သူက ပျောက်ကွယ်သွားခဲ့သည်။

မျက်တောင်တစ်ခတ်စာအတွင် နှစ်ပေါင်းငါးရာ ကုန်လွန်သွားသည်။

ကျင့်ကြံခြင်းလောကတွင် အချိန်ကုန်ဆုံးမှုသည် အလွန်လျင်မြန်သည်။

အပျက်အစီးနယ်မြေ၏ နှစ်ပေါင်းငါးရာကလည်း စိတ်ကူးမယဉ်နိုင်အောင် မြန်ဆန်နေသည်။

လွန်ခဲ့သော နှစ်ပေါင်းငါးရာတွင် မရေမတွက်နိုင်သော စိတ်လှုပ်ရှားဖွယ်ဖြစ်ရပ်များသည် မဟာတောရိုင်းကမ္ဘာတွင် ပေါ်ပေါက်လာခဲ့သည်။

ရွှေကျီးကန်းမျိုးနွယ်က တိုးတက်လာသည်။ သောင်းချီသော အစစ်အမှန်ဝိညာဉ်အဆင့် ကျွမ်းကျင်သူများကို စုစည်းထားနိုင်ခဲ့သည်။

ထိုကျွမ်းကျင်သူများက ရှေ့တန်းကို ထောက်ပံ့ပြီး လူသားစစ်တပ်ကို တိုက်ခိုက်ခဲ့သည်။

ကောင်းကင်တစ်သောင်းတိုင်းပြည်၏ လူသားစစ်တပ်က ရွှေကျီးကန်းစစ်တပ်ကြောင့် ရှုံးနိမ့်ပြီး နောက်ဆုတ်ပေးလိုက်ရသည်။

အမှန်အတိုင်းပြောရလျှင် လွန်ခဲ့သော နှစ်ပေါင်းငါးရာတွင် လူသားစစ်တပ်က ရွှေကျီးကန်းခုံရုံး၏ နေရာအ‌ဟောင်းတွင် ရှုံးနိမ့်မှုကို စတင်ခံစားခဲ့ရသည်။ ထိုအချိန်မှစ၍ ရွှေကျီးကန်းမျိုးနွယ်က ပြန်လည်တိုက်ခိုက်ခဲ့သည်။

လူသားများ၏ ဖိနှိပ်မှုအောက်တွင်ရှိနေ‌‌သော ရွှေကျီးကန်းမျိုးနွယ်က ပြန်လည်တိုက်ခိုက်နိုင်လိမ့်မည်ဟု မည်သူမှ ထင်မထားကြပေ။

ထို့အပြင် ရွှေကျီးကန်းမျိုးနွယ်က အလွန်အားကောင်းလာသည်။

နာမည်ကြီးမျိုးဆက်သစ်များသည် တိုက်ပွဲတွင် ဝင်ပါလာကြသည်။

ရှန်းထန်ကလန်၏ မင်းသားရှန်းက အစစ်အမှန်ဝိညာဉ် ဒုတိယအဆင့်သို့ ရောက်သွားသည်။

သူက အလွန်သန်မာပြီး အစစ်အမှန်ဝိညာဉ်အဆင့် ရွှေကျီးကန်းမျိုးနွယ်ဝင်သုံးရာကို ဦးဆောင်ပြီး ရှေ့တန်းကို လွှမ်းမိုးခဲ့သည်။

သို့သော် သူ့ထက် ပိုမိုသန်မာသောလူသည် မဟာရှကလန်၏ သခင်လေး ရှကြွယ် ဖြစ်သည်။

သူက အသက်တစ်ထောင်မပြည့်သေးသော်လည်း ထူးခြားသော ကျင့်ကြံခြင်းကို ပိုင်ဆိုင်ထားသည်။

သူမွေးဖွားလာသောအချိန်တွင် လောကကြီးက တုန်ခါနေပြီး မဟာနေမင်းရွှေကျီးကန်းက လှုပ်ရှားသွားသည်ဟု ပြောကြသည်။

စတင်ကျင့်ကြံလိုက်သောအချိန်တွင် သူ၏ ရွှေကျီးကန်းသွေးမျိုးဆက်သည် ဆက်တိုက် အဆင့်တက်လာသည်။

သူက နှစ်ရာချီအတွင်း၌ အစစ်အမှန်ဝိညာဉ်အဆင့်သို့ ရောက်လာခဲ့သည်။

ထို့အပြင် သူက မဟာရှကလန်၏ရတနာ နတ်ဘုရားမီးပြင်းဖို၏ အသိအမှတ်ပြုခြင်းကို ရရှိပြီး အထဲတွင် နှစ်ပေါင်းတစ်ရာကြာအောင် ကျင့်ကြံခဲ့သည်။

သူက အပြင်ထွက်လာသောအခါ တောက်ပနေသော အစစ်အမှန်ဝိညာဉ်အရိုးနှင့် အစစ်အမှန်ဝိညာဉ် ဒုတိယအဆင့်သို့ ရောက်နေခဲ့သည်။

သူ၏ သွေးမျိုးဆက်က လောင်ကျွမ်းနေမင်းအဆင့်ကို ကျော်ဖြတ်ပြီး ရှားပါးသော မီးနေမင်းအဆင့်သို့ ရောက်နေသည်။ သူ၏ သွေးမျိုးဆက်မှ ထွက်ပေါ်လာသောအလင်းသည် အလွန်တောက်ပသောကြောင့် သူ့ကို တိုက်ရိုက်ကြည့်ရန် မဖြစ်နိုင်ပေ။