အခန်း (၁၁၅၈)

ကြယ်စုစကြဝဠာသည် အတိတ်၏ဂုဏ်ကျက်သရေကို ဆုံးရှုံးသွားပြီး ယခင်က သူတို့ လွှမ်းမိုးခဲ့သော ကမ္ဘာကို ရှာဖွေနေကြသည်။

ကျန်းယွီလင်းဟုခေါ်သော တာအိုတန်ခိုးရှင်သည် မူလကမ္ဘာကို ရှာဖွေနေသည်။ သူက တည်နေရာရွှေ့ပြောင်းခြင်းဝင်္ကပါများကို ကျော်ဖြတ်ပြီး ကောင်းကင်စက်ဝန်းနတ်ဘုရားကမ္ဘာသို့ ရောက်လာခဲ့သည်။

နောက်ပိုင်းတွင် ကျန်းယွီလင်း၏ဓားကို နတ်ဘုရားကမ္ဘာ၏ ဂိုဏ်းငယ်တစ်ဂိုဏ်းက ရှာတွေ့ခဲ့သည်။

ကျန်းယွီလင်း၏ ပိုင်ဆိုင်မှုတချို့သည်လည်း ထိုဂိုဏ်းတွင် ရှိနေသည်။

ဟန်မူယဲ့က ထိုအချက်ကို မှတ်ထားပြီး ဓားကို သိမ်းလိုက်သည်။

သူက ပိုင်စုကျန်းကို ဓားများဆက်လက်ရှာဖွေရန် ပြောလိုက်ပြီး မြို့ထဲမှ တိတ်ဆိတ်စွာ ထွက်လာခဲ့သည်။

သူက မဟာတောရိုင်းကမ္ဘာ၏ နတ်ဘုရားသားရဲများနှင့် ဆွေးနွေးခဲ့သည်။ ကပ်ဘေး၏ မူလရင်းမြစ်ကို မသိနိုင်သော်လည်း တခြားစကြဝဠာကို သက်ရောက်မည်မဟုတ်ပေ။

ဟန်မူယဲ့က ကျဆင်းနေသော ကျန်းယွီလင်း၏ ကြယ်စုစကြဝဠာကို စိတ်ဝင်စားနေသည်။

အကယ်၍ ထိုစကြဝဠာက ကျဆင်းသွားလျှင် နှဂါးမိကျောင်း၏ချိပ်စည်းတွင် စွမ်းအားည်မျှ ကျန်သေးသနည်း။

ခွန်းဝူ၏အမှတ်အသားက မည်သို့ ဖြစ်နေမည်နည်း။

ဟန်မူယဲ့က နဂါးမိကျောင်း၏ ချိပ်စည်းအကြောင်းကို တွေးမိသွားပြီး နလုံးသားလှုပ်ရှားနေသည်။ သူက အရှိန်မြှင့်လိုက်သည်။

သူက သွေးစက်ကျချောက်ကမ်းပါးသို့ ရောက်လာပြီး လျှို့ဝှက်နယ်မြေသို့ ဝင်ရောက်လိုက်သောအခါတွင် မူလဝိညာဉ်ဓားကို အာရုံခံမိသည်။

“ဘုန်း”

လျှို့ဝှက်နယ်မြေ၏ သွေးစွမ်းအင်က ဆူပွက်လာသည်။

သူထင်ထားသည့်အတိုင်း နဂါးမိကျောင်းကို ဖိနှိပ်ထားသော ဝင်္ကပါက ကျဆင်းနေသည်။

အကယ်၍ နဂါးမိကျောင်းက ချိုးဖောက်ပြီး ထွက်လာချင်လျှင် အချိန်အတော်ကြာကတည်းက လုပ်ခဲ့လိမ့်မည်။

သို့သော် သူက မလုပ်ရဲခဲ့ပေ။

ကြယ်စုစကြဝဠာ၏ ကျွမ်းကျင်သူများကို ဆွဲဆောင်မိမှာ စိုးရိမ်နေသည်။

အကယ်၍ သူက ထိုအကြောင်းကို သိခဲ့လျှင် ဖိနှိပ်ခံရန် ဆန္ဒရှိမည်မဟုတ်ပေ။

ဟန်မူယဲ့က လက်မြှောက်သည်။ သူ့ရှေ့တွင်ရှိသော နဂါးမိကျောင်းအမြီးက ဖြည်းဖြည်းချင်း အရည်ပျော်လာပြီး နောက်ဆုံးတွင် ယိမ်းနွဲ့ပါးဓားရှည်အဖြစ် အသွင်ပြောင်းသွားသည်။

“ဝီ”

သူက ဓားရှည်ကို လက်ထဲတွင် ကိုင်ထားပြီး နဂါးမိကျေင်း၏ ရုပ်ခန္ဓာစွမ်းအားက ခန္ဓာကိုယ်ထဲသို့ တိုးဝင်လာသည်။

ကမ္ဘာဦးခေတ်မှ ထိပ်တန်းအဆင့် နတ်ဘုရားသားရဲ၏ စွမ်းအား ဖြစ်သည်။

ဟန်မူယဲ့က နဂါးမိကျောင်း၏ခန္ဓာကိုယ်ကို သန့်စင်ထားလျှင်ပင် တစ်သောင်းပုံတစ်ပုံ၏စွမ်းအားကို ထုတ်သုံးရန် မဖြစ်နိုင်သေးပေ။

“ကောင်လေး၊ မင်းက ခွန်အားတွေကို ဘယ်လောက်တောင် စုစည်းထားတာလဲ ....”

ရွှေရောင်ငှက်လေးက ပျံသန်းလာပြီး ဟန်မူယဲ့၏ပခုံးကို တောင်ပံဖြင့် ပုတ်ပေးလိုက်သည်။

ရွှေရောင်မီးတောက်တစ်ခုသည် ဟန်မူယဲ့၏ ခန္ဓာကိုယ်ထဲသို့ ဝင်ရောက်လာပြီး ပြင်းထန်နေသော သွေးစွမ်းအင်ကို ဖိနှိပ်လိုက်သည်။

“ငါက အကြာကြီး ထိန်းမထားနိုင်ဘူး။ နဂါးမိကျောင်းရဲ့အငွေ့အသက်ကို ဖိနှိပ်နိုင်တဲ့ အင်အားတစ်ခုကို ရှာရမယ်”

ရွှေရောင်ငှက်က ခေါင်းခါလိုက်ပြီး နောင်တများနှင့်အတူ ပြောသည်။

“ဒီစွမ်းအားက အရမ်းသန်မာလွန်းတယ်။ သူက ကမ္ဘာဦးခေတ်မှာ ဘုရင်ပဲ”

“မင်းက ဒါကို ထိန်းချုပ်နိုင်မယ်လို့ ငါမထင်ဘူး။ အဆုံးမှာ လက်လျော့ရလိမ့်မယ်”

ရွှေရောင်ငှက်က ပတ်ဝန်းကျင်ကို ကြည့်လိုက်ပြီး တီးတိုးပြောသည်။

“မူလကမ္ဘာကို ဖျက်ဆီးခဲ့တဲ့ လူတွေကတောင် နဂါးမိကျောင်းရဲ့ခန္ဓာကိုယ်ကို ယူမသွားနိုင်ဘူး”

ကြယ်စုစကြဝဠာ၏ လူများက မည်မျှသန်မာကြသနည်း။

အဆုံးတွင် သူတို့က နဂါးမိကျောင်း၏ ခန္ဓာကိုယ်ကို ယူမသွားနိုင်ခဲ့ပေ။

နဂါးမိကျောင်းက အလွန်သန်မာပြီး ထိန်းချုပ်ရန် မဖြစ်နိုင်ပေ။

ဟန်မူယဲ့က ငှက်က‌လေးကို ဂရုမစိုက်တော့ပေ။

သူ့မျက်လုံးများက တောက်ပနေပြီး ရွှေကျီးကန်းမီးတောက်ကို အဆုံးစွန်အထိ အသက်သွင်းသည်။

မူလဝိညာဉ်ဓား သုံးလက်သည် သူ့နောက်တွင် တောက်ပနေသည်။

မိုးကြိုးလျှပ်စီးကို ထိန်းချုပ်ထားသော နွားသိုးတစ်ကောင်၏ပုံရိပ်လည်း ပေါ်ထွက်လာသည်။

ထို့နောက် ပါ့ရှားပေါ်လာပြီး ဟိန်းဟောက်လိုက်သည်။

ပါ့ရှား၏ သွေးမျိုးဆက်ကို မူလရင်းမြစ်သို့ ပြန်သွားခိုင်းပြီး နဂါးမိကျောင်းကို ဝါးမြိုမည်။

ရွှေရောင်ငှက်က ပါ့ရှား၏ပုံရိပ်ကို ကြည့်လိုက်ပြီး မျက်လုံးပြူးသွားသည်။

“မင်း၊ မင်းက ရူးနေတာပဲ။ ပါ့ရှားက နဂါးမိကျောင်းကနေ ဆင်းသက်လာတယ်”

“မင်းက ဘယ်လိုလုပ်ပြီး ....”

ထို့နောက် သူက ချက်ချင်း ပါးစပ်ပိတ်လိုက်သည်။

အဘယ်ကြောင့်ဆိုသော် သူ့ရှေ့တွင် ဟန်မူယဲ့က ပါ့ရှား၏သွေးမျိုးဆက်ကို အသက်သွင်းပြီး နဂါးမိကျောင်း၏စွမ်းအားကို လျင်မြန်စွာ သန့်စင်နေသည်။

နဂါးမိကျောင်း၏ ခန္ဓာကိုယ်တွင် ဝိညာဉ်မရှိတော့ပေ။ ဤခန္ဓာကိုယ်သည် အသွေးအသားကိုသာ သယ်ဆောင်ထားပြီး အသက်မဲ့နေသည်။

အကယ်၍ ဟန်မူယဲ့က မဟာတောရိုင်းကမ္ဘာတွင် နတ်ဘုရားသားရဲတစ်ကောင် ဖြစ်လာပြီး တခြားနတ်ဘုရားသားရဲများနှင့် မဆက်သွယ်ခဲ့လျှင်၊ ခွန်းဝူကို မထိန်းချုပ်ခဲ့လျှင်၊ အစစ်အမှန်ဝိညာဉ်အရိုးကို မစုစည်းခဲ့လျှင် နဂါးမိကျောင်း၏ခန္ဓာကိုယ်ကို ဝါးမြိုရဲမည်မဟုတ်ပေ။

ယခုအချိန်တွင် သူက နဂါးမိကျောင်းကို ကြောက်ရွံ့နေရန် မလိုတော့ပေ။

“ဘုန်း”

ကမ္ဘာဦးချပ်ဝတ်သည် သူ့ခန္ဓာကိုယ်တွင် ပေါ်လာသည်။

ယခုအချိန်တွင် ကမ္ဘာဦးချပ်ဝတ်က အပြည့်အဝ အသက်ဝင်နေသည်။

သူက ချပ်ဝတ်၏စွမ်းအားကို ငှားယူပြီး နဂါးမိကျောင်းကို ဖိနှိပ်ထားသည်။ ထို့နောက် ပါ့ရှားသွေးမျိုးဆက်နှင့် ဝါးမြိုသည်။

“အရူးပဲ”

ရွှေရောင်ငှက်က တစ်ကိုယ်လုံး တုန်ခါနေသည်။ သို့သော် တောင်ပံဖြန့်ပြီး ပေတစ်သောင်းကြီးမားသော ရွှေကျီးကန်းအဖြစ် ပြောင်းလဲသည်။ အစစ်အမှန်ဝိညာဉ်အင်းကွက် တစ်ရာသည် ရွှေအလင်းဖြင့် တောက်ပနေပြီး ဟန်မူယဲ့၏ နောက်တွင်ရှိသော ပုံရိပ်ယောင်နယ်မြေကို လွှမ်းခြုံထားသည်။

နဂါးမိကျောင်း၏ ရုပ်ခန္ဓာစွမ်းအားသည် ဘုရင်အဆင့်တွင် ရှိနေသည်။

ဤနေရာတွင် သူ့ခန္ဓာကိုယ်၏ သုံးပုံတစ်ပုံသာ ရှိနေသော်လည်း အင်မော်တယ်ဘုရင်များ ရင်မဆိုင်နိုင်သော တည်ရှိမှုတစ်ခု ဖြစ်နေသည်။

အင်မော်တယ်ဘုရင်အဆင့်သို့ မရောက်သေးသော ဟန်မူယဲ့က နဂါးမိကျောင်း၏ ခန္ဓာကိုယ်ကို တိုက်ရိုက်ဝါးမြိုပြီး သန့်စင်ရဲမည်ဟု မည်သူက ထင်ထားမည်နည်း။

သတ်ဖြတ်ခြင်းဓားသည် ပျံသန်းလာပြီး ဓားအလင်းဖြင့် ဟန်မူယဲ့၏ ခန္ဓာကိုယ်ကို လွှမ်းခြုံလိုက်သည်။

သတ်ဖြတ်ခြင်းဓားသည် နှစ်ပေါင်းများစွာကြာအောင် ဤနေရာတွင် ရှိနေခဲ့ပြီး ထိုဓား၏ သတ်ဖြတ်ခြင်းဆန္ဒများသည် နဂါးမိကျောင်း၏ ခန္ဓာကိုယ်နှင့် ပေါင်းစပ်နေသည်။

ဟန်မူယဲ့က သတ်ဖြတ်ခြင်းဓားနှင့် အချိန်ယူပြီး နဂါးမိကျောင်း၏ခန္ဓာကိုယ်ကို ဖြည်းဖြည်းချင်း မသန့်စင်ခဲ့ပေ။

သူက ရည်မှန်းချက်ကြီးမားနေခြင်း မဟုတ်ပေ။ နဂါးမိကျောင်း၏ ဝိညာဉ်ဖြစ်သော အင်မော်တယ်ဘုရင်ထုံထျန်းက ကြင်နာနေမည်မဟုတ်ကြောင်း သူသိထားသည်။

လောကတွင် နဂါးမိကျောင်း၏ခန္ဓာကိုယ်ကို သန့်စင်နိုင်သောလူ မရှိကြောင်း အင်မော်တယ်ဘုရင်ထုံထျန်းက သိထားသည်။ ထို့ကြောင့် တမင်သက်သက် ဤနေရာတွင် ချန်ထားခဲ့သည်။

အင်မော်တယ်ဘုရင်ထုံထျန်းက ဟန်မူယဲ့ကို အစွမ်းကုန်သုံးပြီး နဂါးမိကျောင်း၏ခန္ဓာကိုယ်ကို ပျိုးထောင်ပေးစေချင်သည်။

အကယ်၍ ဟန်မူယဲ့က ဤခန္ဓာကိုယ်ကို မသန့်စင်ခဲ့လျှင် တခြားလူတစ်ယောက်၏ စတေးခံ ဖြစ်သွားလိမ့်မည်။

“ဘုန်း”

ဟန်မူယဲ့၏နောက်တွင် သွေးအလင်းသည် ကောင်းကင်အထိ ထိုးတက်သွားသည်။

ပြင်းထန်သော စွမ်းအားကြောင့် သူ၏ ခန္ဓာကိုယ်က ပျက်စီးသွားတော့မည်ဟု ထင်ရသည်။

သို့သော် သူက အံကြိတ်ထားပြီး ဖြည်းဖြည်းချင်း နိုးထလာပုံရသော နဂါးမိကျောင်း၏ခန္ဓာကိုယ်ကို သန့်စင်သည်။

သူက မှိန်ဖျော့နေသော သွေးရောင်ကောင်းကင်ကို ကြည့်လိုက်ပြီး လက်မြှောက်သည်။

ဟန်မူယဲ့က နဂါးမိကျောင်း၏ခန္ဓာကိုယ်အား ချပ်ပိတ်ထားသော ဝင်္ကပါကို မသိပေ။

သို့သော် ကြယ်စုစကြဝဠာမှ ရောက်လာသော ကျန်းယွီလင်းက သိနေသည်။

ကျန်းယွီလင်းက ထိုအကြောင်းကို သိရုံသာမက ချိပ်ပိတ်အစီအရင်များကို သေချာလေ့လာခဲ့သည်။

ယခုအချိန်တွင် ဟန်မူယဲ့က ထိုဗဟုသုတများကို နားလည်နေသည်။

“ချပ်ပိတ်ခြင်း၊ ကောင်းကင်၊ ပျက်စီးခြင်း၊ ကမ္ဘာမြေ ....”

ဟန်မူယဲ့က ဟိန်းဟောက်သံနှင့်တူသော စကားလုံးများကို ရေရွတ်လိုက်သည်။

သူ၏ စကားအဆုံးတွင် သွေးအလင်းသည် တောက်ပလာသည်။

သွေးစက်ကျချောက်ကမ်းပါး၏ ဝင်္ကပါတစ်ခုလုံးသည် သွေးရောင်ချပ်ဝတ်အဖြစ် ပြောင်းလဲသွားပြီး ဟန်မူယဲ့၏ ကိုယ်ပေါ်သို့ ရောက်လာသည်။

အစီအရင်ကို ချပ်ဝတ်အနေဖြင့် အသုံးပြုသည်။

ထိုသွေးချပ်ဝတ်ကြောင့် ပြင်းထန်စွာ လှုပ်ရှားနေသော နဂါးမိကျောင်း၏ စွမ်းအားများက ချုပ်နှောင်ခံလိုက်ရသည်။

ဟန်မူယဲ့က လက်မြှောက်သည်။ သွေးမျိုးဆက်ပုတီးစေ့များက သူ့ခန္ဓာကိုယ်ထဲသို့ တိုးဝင်လာကြသည်။

ထိုပုတီးစေ့များသည် သွေးချပ်ဝတ်ကို အားဖြည့်ပေးလိုက်သည်။

သူက သန်းချီသော သွေးပုတီးစေ့များကို ပိုင်ဆိုင်ထားသည့်အတွက် လုံလောက်သည်။

သွေးစက်ကျချောက်ကမ်းပါးတွင်ရှိသော ဝင်္ကပါက ပျောက်ကွယ်သွားသည်။ ကျင့်ကြံသူများက စိတ်ရှုပ်ထွေးစွာ မတ်တပ်ရပ်လိုက်ကြသည်။

“ယွင်လန်ဓားအင်မော်တယ်”

မူရုံကျိုးနှင့် တခြားလူများက ဟန်မူယဲ့ကို ကြည့်လိုက်ပြီး လျင်မြန်စွာ ဦးညွတ်သည်။

“မင်းတို့ လွတ်မြောက်သွားပြီ”

သွေးချပ်ဝတ်နှင့် ဟန်မူယဲ့သည် သွေးစက်ကျချောက်ကမ်းပါးပေါ်တွင် ပေါ်လာသည်။ သူက လူတိုင်းကို ကြည့်လိုက်ပြီး ညင်သာစွာ ပြောသည်။

လွတ်မြောက်သွားသည်။

ဤနေရာတွင် နှစ်ပေါင်းများစွာကြာအောင် နေထိုင်လာသော အင်မော်တယ်ကျင့်ကြံသူများက လမ်းပျောက်နေကြသည်။

ဟန်မူယဲ့က သွေးစက်ကျချောက်ကမ်းပါးတွင် ကြာမြင့်စွာ မနေခဲ့ပေ။ သူက အင်မော်တယ်သခင်များနှင့် တွေ့ဆုံပြီး ထွက်သွားခဲ့သည်။

သူက နဂါးမိကျောင်း၏ခန္ဓာကိုယ်ကို သန့်စင်ပြီး မူလဝိညာဉ်ဓားသုံးလက်နှင့် ပေါင်းစပ်မည်။ ထို့ကြောင့် အကူအညီအနည်းငယ် လိုအပ်နေသည်။

ကောင်းကင်အလင်းဂိုဏ်း ....

မိစ္ဆာအမွေအနှစ်ကို ဆက်ခံထားသော ဖူယွီအင်မော်တယ်ကမ္ဘာ၏ ကောင်းကင်အလင်းဂိုဏ်းသည် ကောင်းမွန်‌သော အခြေခံအုတ်မြစ်ကို ပိုင်ဆိုင်သည်။

သူတို့ဂိုဏ်း၏ လျှို့ဝှက်နယ်မြေတွင် ကမ္ဘာဦးခေတ်၏ ခွေနတ်ဘုရားသားရဲ ရှိနေသည်။

သို့သော် ထိုသားရဲ၏ ဝိညာဉ်က ပျောက်ကွယ်သွားပြီး ရုပ်ခန္ဓာကိုသာ ချန်ရစ်ခဲ့သည်ဟု ထင်ရသည်။

“ယွင်လန်ဓားအင်မော်တယ်၊ အရင်က ငါတို့ဂိုဏ်းရဲ့ လျှို့ဝှက်နယ်မြေကို မဖွင့်နိုင်ခဲ့ဘူး။ အခု မင်းမှာ နည်းလမ်းရှိနေပြီလား”

အဖြူရောင်ဝတ်စုံနှင့် ကောင်းကင်အလင်းဂိုဏ်း၏ ဂိုဏ်းချုပ်ဖူရွှယ်က ဟန်မူယဲ့ကို နှုတ်ဆက်လိုက်သည်။

အင်မော်တယ်သခင်ဖူရွှယ်က ဟန်မူယဲ့ကို အပြုံးတစ်ခုနှင့်အတူ ကြည့်နေသည်။

ယခင်က ဟန်မူယဲ့သည် ကောင်းကင်အလင်းဂိုဏ်းသို့ ရောက်လာခဲ့သည်။ သို့သော် လျှို့ဝှက်နယ်မြေကို မဖွင့်နိုင်သောကြောင့် ထွက်သွားခဲ့သည်။

အင်မော်တယ်သခင်ဖူရွှယ်က ဟန်မူယဲ့ကို လျှို့ဝှက်နယ်မြေထဲသို့ တစ်ကြိမ်ဝင်ခွင့်ပေးရန် ကတိပြုထားသော်လည်း ဟန်မူယဲ့က လျှို့ဝှက်နယ်မြေကို မဖွင့်နိုင်လျှင်တော့ မတတ်နိုင်ပေ။

“ကျွန်တော်က ရတနာတစ်ခုကို ရှာတွေ့ထားတယ်။ အဲဒါကြောင့် လာပြီး ကြိုးစားကြည့်တာ”

ကောင်းကင်အလင်းဂိုဏ်းက လျှို့ဝှက်နယ်မြေသို့ ဝင်ခွင့်ပေးရန် အလွန်မလိုလားကြောင်း ဟန်မူယဲ့က သိနေသည်။

သို့သော် သူတို့က သဘောတူထားခဲ့သည်။ ဟန်မူယဲ့က နတ်ဘုရားကမ္ဘာ၏ စစ်တပ်ကို ခုခံပေးပြီး ကောင်းကင်အလင်းဂိုဏ်းက လျှို့ဝှက်နယ်မြေသို့ တစ်ကြိမ်ဝင်ခွင့်ပေးရမည်။

အင်မော်တယ်သခင်ဖူရွှယ်က အပြုံးတစ်ခုကို ညှစ်ထုတ်ပြီး သူ့ကို တည်နေရာရွှေ့ပြောင်းခြင်းဝင်္ကပါဆီသို့ ခေါ်သွားသည်။

“ဝီ”

အင်မော်တယ်အလင်းက ဖျတ်ခနဲတောက်ပသွားပြီး ဟန်မူယဲ့က ပုံရိပ်ယောင်ကမ္ဘာတစ်ခုကို မြင်ရသည်။

“မူလကမ္ဘာရဲ့ အစိတ်အပိုင်းတစ်ခုပဲ”

ဟန်မူယဲ့က ရွှေရောင်ငှက်လေး၏အသံကို ကြားလိုက်ရသည်။

ဟန်မူယဲ့က ထိုအကြောင်းကို သိထားသည်။

သူက လက်ဆန့်ထုတ်ပြီး ကျောက်စိမ်းပေတံကို ဆုပ်ကိုင်လိုက်သည်။

ကောင်းကင်တိုင်းတာခြင်းပေတံ ဖြစ်သည်။

သူက လက်မြှောက်ပြီး ပုံရိပ်ယောင်ကမ္ဘာကို ပေတံဖြင့် ရိုက်ချသည်။

“ဘန်း”

အစိမ်းရောင်အလင်းသည် သူ့ရှေ့တွင်ရှိသော အတားအဆီးကို စက္ကူတစ်ရွက်ကဲ့သို့ ချိုးဖျက်လိုက်သည်။

စည်းမျဉ်းစွမ်းအား ဖြစ်သည်။

ကောင်းကင်တိုင်းတာခြင်းပေတံသည် လောကကို ချိုးဖောက်နိုင်သည်။

“ဘုန်း”

အဆုံးမရှိသော အငွေ့အသက်သည် သူ့ကို ရိုက်ခတ်လာသည်။