အခန်း (၁၁၆၀)

“ဝီ”

လျှို့ဝှက်နယ်မြေ ပျောက်ကွယ်သွား‌သောကြောင့် တည်နေရာရွှေ့ပြောင်းခြင်းဝင်္ကပါလည်း ပျောက်ကွယ်သွားသည်။

ဟန်မူယဲ့သည် အင်မော်တယ်သခင်ဖူရွှယ်၏ရှေ့တွင် ပြန်ပေါ်လာသည်။

အင်မော်တယ်သခင်ဖူရွှယ်က စိတ်ပျက်နေသော မျက်နှာထားဖြင့် ဖြည်းဖြည်းချင်း ပျောက်ကွယ်သွားသော လျှို့ဝှက်နယ်မြေကို ကြည့်သည်။

“အကြီးအကဲခွေချီက ဒါကိုပေးဖို့ ပြောလိုက်တယ်”

ဟန်မူယဲ့က လက်မြှောက်ပြီး ရွှေရောင်လျှပ်စီးလုံးကို ထုတ်ပေးသည်။

ခွေ၏ နတ်ဘုရားစွမ်းရည် ဖြစ်သည်။

ယခင်က ခွေသားရဲ၏ နတ်ဘုရားမိုးကြိုးပုတီးစေ့များနှင့် မတူညီပေ။ ထိုလျှပ်စီးလုံးကို ကိုယ်ပိုင်နတ်ဘုရားစွမ်းရည်အဖြစ် ပြောင်းလဲနိုင်သည်။

ကောင်းကင်အလင်းဂိုဏ်းသည် လျှပ်စီးလုံးကို မှီခို၍ မိုးကြိုးလျှပ်စီးအား ထိန်းချုပ်နိုင်သည့် ကျွမ်းကျင်သူဆယ်ယောက်ခန့်ကို မွေးထုတ်ပေးနိုင်လိမ့်မည်။

ကောင်းကင်အလင်းဂိုဏ်း၏ နှစ်ပေါင်းများစွာ ထောက်ပံ့မှုအတွက် ခွေသားရဲ၏ ပြန်လည်ပေးဆပ်ခြင်း ဖြစ်သည်။

ကောင်းကင်အလင်းဂိုဏ်း၏ ကျင့်ကြံသူများသည် ခွေသားရဲ၏ စွမ်းအားကြောင့် သက်ရောက်ခံလိုက်ရသည်။ သူတို့၏ သွေးမျိုးဆက်သည် ခွေသားရဲနှင့် အနည်းငယ် ဆင်တူနေသည်။ သူတို့ကို ခွေချီ၏ မျိုးဆက်သစ်များအဖြစ် ယူဆနိုင်သည်။

ဟန်မူယဲ့က ကောင်းကင်အလင်းဂိုဏ်းမှ ထွက်လာပြီး သင်္ချိုင်းအင်မော်တယ်မြို့သို့ ပြန်မသွားခဲ့ပေ။

ဖူယွီအင်မော်တယ်ကမ္ဘာ၏ ပါရမီရှင်စုဝေးပွဲက စတင်နေသည်။

ဤတစ်ကြိမ်တွင် ဖူယွီအင်မော်တယ်ကမ္ဘာက လက်ရွေးစင်တစ်ရာကို ရွေးချယ်ပြီး ရွှေတောင်ထွတ်တွင် ယှဉ်ပြိုင်ရန် စေလွှတ်လိမ့်မည်။

နတ်ဘုရားကမ္ဘာသို့ သွားရောက်ခွင့်ရမည့် လူများကို ခမ်းနားသော ကမ္ဘာပေါင်းစုံစုဝေးပွဲတွင် ရွေးချယ်လိမ့်မည်။ ထို့အပြင် အင်မော်တယ်ဘုရင်အဆင့် အခွင့်အရေးများကိုလည်း ပေးအပ်လိမ့်မည်။

ကောင်းကင်စက်ဝန်းနတ်ဘုရားကမ္ဘာသည် အနန္တကမ္ဘာများ၏စည်းမျဉ်းကို ထိန်းချုပ်ထားသည်။ အကယ်၍ အင်မော်တယ်ဘုရင်အဆင့်သို့ တက်လှမ်းချင်လျှင် နတ်ဘုရားကမ္ဘာ၏ အသိအမှတ်ပြုခြင်းကို လိုအပ်သည်။

နတ်ဘုရားရင်းမြစ်နန်းတော်ကို အနန္တကမ္ဘာများ၏ အင်မော်တယ်အရင်းအမြစ်အဖြစ် သိကြသည်။ အင်မော်တယ်သခင်များသည် အင်မော်တယ်ဘုရင်အဆင့်သို့ မတက်ရောက်ခင် နတ်ဘုရားရင်းမြစ်နန်းတော်တွင် စည်းမျဉ်းများဖြင့် သန့်စင်ခံရမည်။

ထိုအရာသည် ဤကပ်ဘေးခေတ်၏ စည်းမျဉ်းဖြစ်သည်။ မည်သူမှ ကင်းလွတ်ခွင့်မရပေ။

အင်မော်တယ်ဘုရင်အဆင့်သို့ မတက်ရောက်လျှင်တော့ မလိုအပ်ပေ။

ကျန်းယွမ်အင်မော်တယ်ကမ္ဘာ ....

ထိုအင်မော်တယ်ကမ္ဘာသည် နတ်ဘုရားကမ္ဘာ၏ စစ်တပ်ကြောင့် ကျရှုံးသွားခဲ့သည်။

နောက်ပိုင်းတွင် ဟန်မူယဲ့တို့က နတ်ဘုရားကမ္ဘာ၏ ယဇ်ပလ္လင်များကို ဖျက်ဆီးပြီး စစ်တပ်ကို တိုက်ခိုက်ခဲ့သည်။

သို့သော် ထိုကမ္ဘာသည် ထိခိုက်သွားသောကြောင့် အင်မော်တယ်ကမ္ဘာတစ်ခု မဖြစ်နိုင်တော့ပေ။

ယခုအချိန်တွင် ထိုကမ္ဘာသည် ဖူယွီအင်မော်တယ်ကမ္ဘာမှ မျိုးဆက်သစ်များအတွက် လေ့ကျင့်ရေးကွင်းတစ်ခု ဖြစ်လာသည်။

ထိုနေရာတွင် ရတနာများကို ရှာဖွေပြီး နတ်ဘုရားစစ်တပ်နှင့် တိုက်ခိုက်နိုင်သည်။

လူတစ်ယောက်သည် ကျန်းယွမ်အင်မော်တယ်ကမ္ဘာတွင် ကောင်းကင်အထိ ရောက်သွားနိုင်သည်။ သို့မဟုတ် တစ်ခါတည်း ကျဆုံးသွားနိုင်သည်။

ဖူယွီအင်မော်တယ်ကမ္ဘာ၏ လက်ရွေးစင်ရွေးချယ်ပွဲကို ထိုနေရာတွင် ပြုလုပ်နေသည်။

အင်မော်တယ်သခင်များက စောင့်ကြပ်နေပြီး အသက်တစ်သောင်းမကျော်သော ပါရမီရှင်များက တိုက်ခိုက်နေကြသည်။

လွန်ခဲ့သော သုံးနှစ်တွင် ဒါဇင်ချီသော လက်ရွေးစင်များ ပေါ်ထွက်လာသည်။

အံ့ဖွယ်ဝိညာဉ်ဓားဂိုဏ်း၏ ရွှေအင်မော်တယ်ရှုမင်သည် ထိပ်ဆုံးတွင် ရှိနေသည်။ သူက နံပတ်တစ် ဓားကျင့်ကြံသူ ဖြစ်သည်။

သွေးစစ်ပွဲဂိုဏ်း၏ အင်မော်တယ်သခင်တစ်ဝက်အဆင့် လောင်ကျန်းထျန်း ....

တာအိုဂိုဏ်း၏ ကြယ်ပွင့်အသစ် ဟုန်မူ ....

ထို့အပြင် ကောင်းကင်အလင်းဂိုဏ်း၊ သံမဏိချပ်ဝတ်ဂိုဏ်းနှင့် တခြားဂိုဏ်းကြီးများမှ တပည့်များအပြင် ထူးချွန်လာသော တခြားပါရမီရှင်များလည်း ရှိနေကြသည်။

“သင်္ချိုင်းအင်မော်တယ်မြို့က လိုအပ်နေသေးတယ်”

ပြိုင်ပွဲကို စောင့်ကြည့်နေသော အင်မော်တယ်သခင်များက တီးတိုးပြောလိုက်ကြသည်။

တခြားလူများက ခေါင်းညိတ်သည်။

ဤတစ်ကြိမ် ပြိုင်ပွဲတွင် သင်္ချိုင်းအင်မော်တယ်မြို့၏လူများ မပါဝင်ခဲ့ပေ။

ယွင်လန်ဓားအင်မော်တယ်က စာရင်းပေးထားသော်လည်း ရောက်မလာပေ။

ရောက်လာရန်လည်း မလိုအပ်ပေ။

“ဘုန်း”

ရှေ့တွင် ပေါက်ကွဲသံကို ကြားရသည်။ လူငယ်တပည့်တစ်ဦးက သွေးရောင်လှံနှင့် လူသန်ကြီး၏ တိုက်ခိုက်မှုကြောင့် လွင့်ထွက်သွားသည်။

“သွေးစစ်ပွဲဂိုဏ်းရဲ့ ချူခွန်းယွီက ၉၉ယောက်မြောက်လက်ရွေးစင် ဖြစ်လာတယ်”

“လက်ရွေးစင်ရွေးချယ်ပွဲက ဒီမှာ အဆုံးသတ်သွားပြီ”

အသံတစ်သံသည် လေထုထဲတွင် ပဲ့တင်ထပ်လာသည်။

‘ပြီးသွားပြီလား’

‘လူတစ်ရာရှိမှာ မဟုတ်ဘူးလား’

‘နောက်ဆုံးနေရာကရော ဘယ်လိုလဲ’

နောက်ဆုံးနေရာအတွက် တိုက်ခိုက်ရန် ခွန်အားထိန်ချန်ထားသော လူများက ကြောင်အသွားကြသည်။

ရွေးချယ်ခံထားရသော လက်ရွေးစင် ၉၉ယောက်က တစ်ယောက်ကိုတစ်ယောက် ကြည့်လိုက်ကြသည်။ ထို့နောက် ရွှေအင်မော်တယ်ရှုမင်ကို လှမ်းကြည့်ကြသည်။

ရွှေအင်မော်တယ်ရှုမင်က တည်ငြိမ်သောမျက်နှာထားဖြင့် ပြုံးလိုက်ပြီး ပြောသည်။

“နောက်ဆုံးနေရာက ယွင်လန်ဓားအင်မော်တယ်အတွက်ပဲ”

ယွင်လန်ဓားအင်မော်တယ် ....

ထိုလူသည် ဖူယွီအင်မော်တယ်ကမ္ဘာတွင် ဒဏ္ဍာရီလာပုဂ္ဂိုလ်တစ်ဦး ဖြစ်သည်။

သူက နှစ်ရာပေါင်းအနည်းငယ်အတွင်း ဓားဂိုဏ်း၏ နာမည်မရှိသော တပည့်တစ်ဦးအဖြစ်မှ ဖူယွီအင်မော်တယ်ကမ္ဘာကို လွှမ်းမိုးနိုင်သော လူတစ်ယောက်အဖြစ် ပြောင်းလဲသွားခဲ့သည်။

သူက တခြားလူများ တစ်သက်လုံးမလုပ်နိုင်သော အရာကို အချိန်တိုအတွင်း လုပ်သွားခဲ့သည်။

အကယ်၍ ခွန်အားနှင့် ကျင့်ကြံခြင်းသာဆိုလျှင် အရေးမကြီးပေ။ အဓိကအချက်သည် ထိုလူ၏ ကြွယ်ဝမှုနှင့် လွှမ်းမိုးနိုင်စွမ်း ဖြစ်သည်။

သူတို့က မနာလိုဖြစ်ရန်ပင် မတတ်နိုင်ခဲ့ပေ။

နယ်မြေတစ်ခုကို ဖိနှိပ်ထားသော အားကောင်းလှသည့် သင်္ချိုင်းအင်မော်တယ်မြို့နှင့် ကြွယ်ဝသော ယွင်လန်မြို့သည် လူတစ်ယောက်၏လက်ထဲတွင် ရှိနေလိမ့်မည်ဟု မည်သူက ထင်ထားမည်နည်း။

တောရိုင်းမြေ၏ သန်းချီသော ကျင့်ကြံသူများ စုဝေးနေသည့် ယွင်လန်မြို့ကို ယွင်လန်ဓားအင်မော်တယ်က တစ်ဆင့်ချင်းစီ တည်ဆောက်ခဲ့သည်။

ထိုနေရာတွင်ရှိနေသော လူများသည် ယွင်လန်မြို့၏ တိုးတက်မှုကို ကိုယ်တိုင် မြင်ခဲ့ရသည်။

ယွင်လန်မြို့သည် ဖူယွီအင်မော်တယ်ကမ္ဘာ၏ အကြွယ်ဝဆုံးမြို့ ဖြစ်လာမည်ဟု မည်သူက ထင်ထားမည်နည်း။

မရေမတွက်နိုင်သော လူများက နောင်တရနေကြသည်။

သူတို့က တောရိုင်းမြေသို့ ဝင်ရောက်ခဲ့လျှင် ယွင်လန်မြို့၏ လူချမ်းသာများ ဖြစ်နေလိမ့်မည်။

ယခု ရွေးချယ်ခံထားရသော ပါရမီရှင် ၉၉ယောက်နှင့် မျိုးဆက်သစ်၏ သောင်းချီသော လူငယ်များသည် တောရိုင်းမြေတွင် မြို့တည်ဆောက်ရန် အခွင့်အရေးရှိခဲ့သည်။

ထိုစဉ်က အမည်မရှိသော ဟန်မူယဲ့သည် တောရိုင်းမြေ၏ အကြီးမားဆုံးမြို့ကို ပိုင်ဆိုင်လိမ့်မည်ဟု မည်သူက ထင်ထားမည်နည်း။

“ဘုန်း”

လေထုထဲတွင် ပေါက်ကွဲသံကို ကြားရသည်။

အလင်းစီးကြောင်းသည် ကောင်းကင်နှင့်မြေကြီးကို ထိုးခွဲ၍ ရောက်ရှိလာသည်။

ကောင်းကင်သည် အလင်းစီးကြောင်း၏ဖိအားကို တောင့်မခံနိုင်သောကြောင့် တုန်ခါလာသည်။

ပြိုင်ပွဲကို စောင့်ကြပ်နေသော အင်မော်တယ်သခင်ငါးယောက်က လေးနက်သောမျက်နှာထားဖြင့် မတ်တပ်ရပ်လိုက်ကြသည်။

ပျံသန်းလာသောလူသည် အနည်းဆုံး အင်မော်တယ်သခင်အဆင့် ဖြစ်သည်။

ထိုအင်မော်တယ်သခင်က သူတို့ထက် ပိုမိုသန်မာသည်။

“ဖူယွီအင်မော်တယ်ကမ္ဘာရဲ့ လက်ရွေးစင်ရွေးချယ်ပွဲကို နှောင့်ယှက်ရဲတဲ့လူတွေက ဖူယွီအင်မော်တယ်ကမ္ဘာကို ရန်စလိုက်တာပဲ”

ရှေ့ဆုံးတွင်ရှိနေသော ဆံပင်ဖြူနှင့် တာအိုတန်ခိုးရှင်က ကျယ်လောင်စွာ အော်ဟစ်လိုက်သည်။ သူက အင်မော်တယ်အလင်းကို ထုတ်လွှတ်လိုက်သည်။

တခြားအင်မော်တယ်သခင် လေးယောက်ကလည်း အင်မော်တယ်အလင်းကို အသုံးပြုကြသည်။

ဓားအင်မော်တယ်ရှုမင်၏ မျက်နှာထားက လေးနက်နေပြီး ရှေ့သို့ ခြေတစ်လှမ်းတိုးသည်။

သူက အင်မော်တယ်သခင်အဆင့် အငွေ့အသက်ကို ထုတ်လွှတ်လိုက်သည်။

တခြားလက်ရွေးစင်တပည့် သုံးယောက်ကလည်း လှုပ်ရှားလိုက်ပြီး အင်မော်တယ်သခင်အဆင့် စွမ်းအားကို ဖော်ပြသည်။

အင်မော်တယ်သခင် လေးယောက် ဖြစ်သည်။

လက်ရွေးစင်တပည့်များကြားတွင် အင်မော်တယ်သခင်လေးယောက် ရှိနေသည်။

ပတ်ဝန်းကျင်တွင်ရှိသော ပါရမီရှင်တပည့်များက ဆူပွက်သွားကြသည်။

“ဘုန်း”

ကောင်းကင်ထက်တွင်ရှိသော အလင်းတန်းက ရုတ်တရက် ရပ်တန့်သွားပြီး ပိုမိုလျင်မြန်စွာ ဆင်းသက်လာသည်။

ထိုအမြန်နှုန်းသည် ကောင်းကင်နှင့်မြေကြီး၏ စွမ်းအားကို လှုံ့ဆော်လိုက်ပြီး လေပြင်းနှင့် မိုးကြိုးများကို ဖြစ်ပေါ်လာစေသည်။

“လမ်းဖယ်ကြ”

လက်ရွေးစင်ပြိုင်ပွဲကို တာဝန်ယူထားသော လူအိုကြီးက လက်ဝါးချက်ကို ပစ်လွှတ်သည်။

တခြားလူများကလည်း အင်မော်တယ်အလင်းကို ထုတ်လွှတ်ပြီး ဆင်းသက်လာသောအလင်းတန်းကို တားဆီးသည်။

“ဘန်း”

လူအိုကြီး၏ လက်ဝါးချက်က ချက်ချင်းပျက်စီးသွားသည်။

အလင်းတန်းက ရပ်တန့်မသွားဘဲ တိုက်ခိုက်မှုများအားလုံးကို ချိုးဖျက်ပြီး ဆင်းသက်လိုက်သည်။

အင်မော်တယ်သခင်ငါးယောက်၏ မျက်နှာက ဖြူဖျော့နေပြီး မျက်လုံးပြူးသွားသည်။

သူတို့က ပူးပေါင်းလိုက်သော်လည်း ပြိုင်ဘက်ကို မတားဆီးနိုင်ခဲ့ပေ။

လက်ရွေးစင်တပည့်များ၏ အင်မော်တယ်သခင်လေးယောက်ကလည်း တစ်ယောက်ကိုတစ်ယောက် ကြည့်သည်။ သူတို့၏ အင်မော်တယ်အလင်းက သွယ်ယှက်နေပြီး တိုက်ပွဲအတွက် အသင့်ပြင်ထားသည်။

“အဆင်ပြေပါတယ်”

ထိုအချိန်တွင် ဟန်မူယဲ့၏အသံ ပေါ်ထွက်လာသည်။

အလင်းတန်းသည် အစိမ်းရောင်ဝတ်စုံနှင့် ဓားအိမ်တစ်လက်လွယ်ထားသော ဟန်မူယဲ့အဖြစ် ပြောင်းလဲသွားသည်။

“ယွင်လန်ဓားအင်မော်တယ်”

ဓားအင်မော်တယ်ရှုမင်က မျက်လုံးပြူးနေပြီး ပြောလိုက်သည်။

ဟန်မူယဲ့က ခွန်အားကောင်းကြောင်း သူနားလည်ထားသည်။

သို့သော် အချိန်တိုအတွင်း၌ ဟန်မူယဲ့က အလွန်သန်မာလာပြီး အင်မော်တယ်သခင်များ၏ ပူးပေါင်းမှုက သူ့ကို တားဆီးရန် မလုံလောက်ခဲ့ပေ။

“ယွင်လန်ဖြစ်နေတာပဲ”

လူအိုကြီးက သက်ပြင်းချလိုက်ပြီး ခေါင်းခါသည်။

“ငါတို့ ဖူယွီအင်မော်တယ်ကမ္ဘာရဲ့ ပြိုင်ပွဲကို နှောင့်ယှက်ဖို့ တစ်ယောက်ယောက် ရောက်လာတယ်လို့ ထင်နေတာ”

တခြားအင်မော်တယ်သခင်များကလည်း စိတ်သက်သာသွားကြသည်။

ဟန်မူယဲ့က ခေါင်းညိတ်လိုက်ပြီး အဝေးတစ်နေရာသို့ ကြည့်သည်။

“အကြီးအကဲတွေပြောတာ မှန်ပါတယ်”

“ဖူယွီအင်မော်တယ်ကမ္ဘာရဲ့ ပြိုင်ပွဲကို နှောင့်ယှက်ချင်တဲ့လူတွေ ရှိနေတယ်”

လူတိုင်းက ကြောင်အသွားသည်။

“ဘုန်း”

အက်ကွဲကြောင်းတစ်ခုသည် ကောင်းကင်ထက်တွင် ပေါ်လာသည်။

ပေတစ်ထောင်ရှည်လျားသော သင်္ဘောပျံသည် ကျန်းယွမ်အင်မော်တယ်ကမ္ဘာသို့ ဝင်ရောက်လာသည်။

“ဖူယွီအင်မော်တယ်ကမ္ဘာရဲ့ လူတွေ။ ကျောက်ယန်အင်မော်တယ်ကမ္ဘာရဲ့ လုယန်တိုင်းပြည်က လေ့ကျင့်ဖို့ လိုအပ်နေတယ်။ မင်းတို့အပေါ်မှာပဲ မူတည်တယ်”

ခပ်ဟဟရယ်သံကို ကြားရပြီး ရွှေရောင်ချပ်ဝတ်နှင့် လူသန်ကြီးတစ်ယောက်သည် ဓားမော့ဖြင့် ညွှန်ပြသည်။

သင်္ဘောပျံထဲမှ ကျွမ်းကျင်သူများ ထွက်လာကြပြီး ပြိုင်ပွဲတွင်ရှိနေသော လူများကို ဝိုင်းရံထားလိုက်သည်။

“ဖူယွီအင်မော်တယ်ကမ္ဘာရဲ့ မျိုးဆက်သစ်တွေက ဘယ်လောက်တောင် စွမ်းဆောင်ရည်ရှိလဲ ကြည့်ရအောင်”

လုယန်တိုင်းပြည် ....

ဟွမ်ကျစ်ဟူနှင့် တခြားလူများက ကောင်းကင်တစ်သောင်းချောက်နက်သို့ သွားနေသောအချိန်တွင် ကျောက်ယန်အင်မော်တယ်ကမ္ဘာ၏ လုယန်တိုင်းပြည်မှ စွန်းကျိနှင့် တွေ့ခဲ့သည်။

ယခင်တစ်ကြိမ်က ဖူယွီအင်မော်တယ်ကမ္ဘာကို တိုက်ခိုက်လာသော ဖြစ်ရပ်သည် ထိုအကြောင်းပြချက်ကြောင့် ဖြစ်သည်။

လုယန်တိုင်းပြည်သည် ကျောက်ယန်အင်မော်တယ်ကမ္ဘာတွင် နံပတ်တစ်အင်အားစု ဖြစ်သည်။