အခန်း (၁၁၆၂)

“ဘုန်း”

ဟန်မူယဲ့က စကားပြောလိုက်ပြီး လက်သီးထိုးချသည်။

ရွှေရောင်မီးတောက်များသည် ရွှေကျီးကန်းအဖြစ် စုစည်းသွားသည်။

ရွှေကျီးကန်းက တောင်ပံဖြန့်လိုက်သည်။ မီးတောက်များက ပတ်ဝန်းကျင်ကို လွှမ်းခြုံသွားသည်။

ရွှေကျီးကန်းမီးတောက်ကို မည်သူမှ မရှောင်တိမ်းနိုင်ခဲ့ပေ။

စစ်သည်သုံးသိန်းက ပြာကျသွားသည်။

အင်မော်တယ်သခင် ဆယ့်ငါးယောက်တွင် ရှစ်ယောက်က မီးတောက်များ၏ လွှမ်းခြုံမှုကို ခံထားရသည်။

ခုနစ်ယောက်ကသာ ထွက်ပြေးနိုင်ခဲ့သည်။

ဟန်မူယဲ့က သူတို့ကို လိုက်မဖမ်းခဲ့ပေ။

သူက လက်မြှောက်သည်။ မီးတောက်များက လှံတစ်ချောင်းအဖြစ် စုစည်းလာပြီး သူက ပစ်လွှတ်လိုက်သည်။

ထွက်ပြေးနေသော အင်မော်တယ်သခင်နှစ်ယောက်က လှံချက်ကြောင့် ပေါက်ကွဲပြီး ပြာကျသွားသည်။

အဆုံးတွင် အင်မော်တယ်သခင်ငါးယောက်သာ လွတ်မြောက်သွားခဲ့သည်။

ဟန်မူယဲ့က လောင်ကျွမ်းနေသော မီးတောက်များကို ပြန်သိမ်းလိုက်သည်။

မီးတောက်ထဲတွင်ရှိနေသော သွေးနှင့်ချီကို သန့်စင်လိုက်သည်။

သို့သော် စစ်သည်သုံးသိန်းနှင့် အင်မော်တယ်သခင်ဆယ်ယောက်၏ စွမ်းအားသည် မီးတောက်အပေါ်တွင် သက်ရောက်မှုမရှိပေ။

သူက ရွှေကျီးကန်းမီးတောက်ကို အဆင့်မြှင့်ချင်လျှင် စိတ်ကူးမယဉ်နိုင်သော စွမ်းအားကို လိုအပ်သည်။

သူက ကိုယ်ပိုင်မီးတောက်ကို အကြိမ်ပေါင်းများစွာ အဆင့်မြှင့်ထားသည်။ မဟာနေမင်းရွှေကျီးကန်း၏ မီးတောက်ထက် အနည်းငယ်သာ အားနည်းသည်။

“သွားကြစို့”

ဟန်မူယဲ့က တိတ်ဆိတ်နေသော လူအုပ်ကို လှည့်ကြည့်သည်။

အင်မော်တယ်သခင်ကိုးယောက်နှင့် လက်ရွေးစင်များ၏ မျက်နှာထားက ရှုပ်ထွေးနေသည်။

‘သူက အင်မော်တယ်သခင် ဟုတ်ရဲ့လား’

‘အင်မော်တယ်သခင်တွေက အဲဒီလိုမျိုး သန်မာနိုင်တာလား’

ဖူယွီအင်မော်တယ်ကမ္ဘာသည် တိုက်ပွဲများနှင့် ဆက်တိုက်ကြုံတွေ့နေရသော်လည်း မဟာတောရိုင်းကမ္ဘာနှင့် မယှဉ်နိုင်သေးပေ။

သတ်ဖြတ်ခြင်းသာရှိနေသော ခွန်းဝူဆိုလျှင် ပိုဆိုးသည်။

ထိုနေရာများနှင့် ယှဉ်လိုက်လျှင် အင်မော်တယ်ကမ္ဘာများက ငြိမ်းချမ်းသည်။

“လောကမှာ ဒီလိုကျွမ်းကျင်သူမျိုး တကယ်ရှိနေတာပဲ ....”

ဓားအင်မော်တယ်ရှုမင်၏ဘေးတွင် ရှိနေသော တာအိုဂိုဏ်း၏ တန်ခိုးရှင်ဟုန်မူက ရေရွတ်လိုက်သည်။

တခြားလူများက ညင်သာစွာ ခေါင်းညိတ်ကြသည်။

ဟန်မူယဲ့၏ စွမ်းအားသည် သူတို့နှင့် အဆင့်တူတွင် မရှိပေ။

ဖူယွီအင်မော်တယ်ကမ္ဘာ၏ လက်ရွေးစင်များအားလုံးသည် လေးစားနေကြသည်။

ကျင့်ကြံခြင်းလောကတွင် ခွန်အားသည် အရေးအကြီးဆုံး ဖြစ်သည်။

ဟန်မူယဲ့၏ ခွန်အားကို လူတိုင်းက အသိအမှတ်ပြုလိုက်သည်။

“ဒီနေ့ ရွေးချယ်ပွဲက ပြီးဆုံးသွားပြီ။ သုံးနှစ်ကြာရင် ထိပ်ဆုံးပါရမီရှင်တစ်ရာက ဖူယွီအင်မော်တယ်ကမ္ဘာကို ကိုယ်စားပြုပြီး ကမ္ဘာပေါင်းစုံပြိုင်ပွဲမှာ အစွမ်းပြရမယ်”

“ဒါက မင်းတို့ရဲ့ ဂုဏ်ကျက်သရေပဲ”

“ပြီးတော့ ငါတို့ ဖူယွီအင်မော်တယ်ကမ္ဘာရဲ့ အနာဂတ်လည်း ဖြစ်တယ်”

ပြိုင်ပွဲကို ဦးဆောင်ထားသော လူအိုကြီးက ဟန်မူယဲ့ကို ကြည့်လိုက်ပြီး ကျယ်လောင်စွာ ပြောသည်။

ယနေ့တွင် အပြောင်းအလဲများနှင့် ကြုံခဲ့ရသော်လည်း လူတိုင်းက ပြိုင်ပွဲကို မျှော်လင့်နေကြသည်။

ကမ္ဘာပေါင်းစုံယှဉ်ပြိုင်ရာတွင် ဖူယွီအင်မော်တယ်ကမ္ဘာက တစ်ခါမှ အဆင့်မကောင်းခဲ့ပေ။

သူတို့က ထိပ်ဆုံးတစ်ရာထဲသို့ ရောက်သွားပြီး အင်မော်တယ်ဘုရင်အဆင့်အတွက် အခွင့်အရေးရလာလျှင် အနာဂတ်တွင် ဖူယွီအင်မော်တယ်ကမ္ဘာက နှစ်တစ်ထောင်အထိ အင်မော်တယ်ဘုရင်တစ်ပါးကို ပိုင်ဆိုင်လိမ့်မည်။

အဆုံးတွင် အင်မော်တယ်ဘုရင်က ဤကမ္ဘာမှ ထွက်သွားမည်ဖြစ်သော်လည်း နှစ်တစ်ထောင်သည် လုံလောက်သည်။

အင်မော်တယ်ဘုရင်တစ်ပါး၏ နှစ်တစ်ထောင်ကြာ အကူအညီဖြင့် ဖူယွီအင်မော်တယ်ကမ္ဘာသည် စိတ်ကူးမယဉ်နိုင်အောင် တိုးတက်လာလိမ့်မည်။

“ယွင်လန်ဓားအင်မော်တယ်၊ သူတို့ကို မင်းဆီမှာ အပ်ခဲ့မယ်”

လူအိုကြီးက ထိုသို့ပြောလိုက်ပြီး ဟန်မူယဲ့ကို ဦးညွတ်သည်။

တခြားလူများကလည်း ဟန်မူယဲ့ကို ဦးညွတ်လိုက်ကြသည်။

သုံးနှစ် ....

လွန်ခဲ့သော သုံးနှစ်တွင် လက်ရွေးစင်တစ်ရာက သင်္ချိုင်းအင်မော်တယ်မြို့တွင် တံခါးပိတ်ကျင့်ကြံနေကြသည်။

သူတို့၏ အကျိုးအမြတ်ကို တခြားလူများက မသိနိုင်သော်လည်း သူတို့က ထွက်သွားသောအခါတွင် အင်မော်တယ်အလင်းဖြင့် တောက်ပနေကြသည်။

သင်္ချိုင်းအင်မော်တယ်မြို့၏ တံတိုင်းပေါ်တွင် အံ့ဖွယ်ဝိညာဉ်ဓားဂိုဏ်း၏ ဂိုဏ်းချုပ် ကျန်းကွမ်ယွမ်၊ သွေးစစ်ပွဲဂိုဏ်း၏ ဂိုဏ်းချုပ် ဝမ်ရှားနှင့် တခြားအင်မော်တယ်သခင်များက ဟန်မူယဲ့တို့ကို နှုတ်ဆက်လိုက်ကြသည်။

“ယွင်လန်၊ ဖူယွီအင်မော်တယ်ကမ္ဘာ တိုးတက်လာဖို့က မင်းအပေါ်မှာပဲ မူတည်နေတယ်”

ကျန်းကွမ်ယွမ်က ခံစားချက်များနှင့် ပြောလိုက်ပြီး ညင်သာစွာ သက်ပြင်းချသည်။

ဖူယွီအင်မော်တယ်ကမ္ဘာက ရွှေတောင်ထွတ်တွင် အောင်မြင်မှုမရခဲ့ပေ။

ဤတစ်ကြိမ်တွင် သူတို့အတွက် အောင်မြင်မှုရရန် အကောင်းဆုံးအခွင့်အရေး ဖြစ်သည်။

ဖူယွီအင်မော်တယ်ကမ္ဘာ၏ ခေါင်းဆောင်က ယွင်လန်ဓားအင်မော်တယ် ဖြစ်သည်။

သူက များပြားသော အင်မော်တယ်သခင်များကို တစ်ယောက်တည်း ရင်ဆိုင်နိုင်သည်။

လက်ရွေးစင်ရွေးချယ်ပွဲတွင် ဟန်မူယဲ့က ကျောက်ယန်အင်မော်တယ်ကမ္ဘာ၏ အင်မော်တယ်သခင်အဆင့် စစ်သူကြီးကို လက်သီးတစ်ချက်ဖြင့် သတ်ဖြတ်ပြီး တခြားအင်မော်တယ်သခင် ဆယ်ယောက်ကိုလည်း ပြာချပစ်ခဲ့သည်။

သူက ကမ္ဘာပေါင်းစုံပြိုင်ပွဲတွင် သေချာပေါက် ထင်ရှားလာလိမ့်မည်။

ကောင်းကင်ထက်တွင် ပျောက်ကွယ်သွားသော ဟန်မူယဲ့နှင့် တခြားလူများကို ကျန်းကွမ်ယွမ်တို့က မျှော်လင့်ချက်များဖြင့် ကြည့်လိုက်ကြသည်။

“ယွင်လန်နဲ့ တခြားလူတွေက နတ်ဘုရားကမ္ဘာရဲ့ ကျင့်ကြံခြင်းခွင့်ပြုမိန့် တစ်ခု၊ နှစ်ခုလောက်ကို ပြန်ယူလာနိုင်ရင် ငါတို့ ဖူယွီအင်မော်တယ်ကမ္ဘာက ကောင်းကင်အထိ တိုးတက်သွားလိမ့်မယ်”

ကျန်းကွမ်ယွမ်က တီးတိုးပြောသည်။

ရွှေတောင်ထွတ်၏ ထိပ်ဆုံးတစ်ရာသည် နတ်ဘုရားကမ္ဘာတွင် ကျင့်ကြံနိုင်ရန် အခွင့်အရေးရလိမ့်မည်။

ထိပ်ဆုံးဆယ်ယောက်သည် ပိုမိုများပြားသော ရတနာနှင့် အခွင့်အရေးများကို ရနိုင်သည်။

ရလဒ်ကောင်းလေ ဆုကြေးများလေ ဖြစ်သည်။

လူတစ်ယောက်က ကျင့်ကြံခြင်းအတွက် ခွင့်ပြုမိန့်ကို ရလျှင် နတ်ဘုရားကမ္ဘာတွင် လွတ်လပ်စွာ ကျင့်ကြံနိုင်သည်။

ထို့အပြင် နတ်ဘုရားရင်းမြစ်နန်းတော်သို့ ဝင်ရောက်ပြီး အသိအမှတ်ပြုခံရလျှင် အင်မော်တယ်ဘုရင် ဖြစ်လာမည်။

“ဟားဟား၊ ဂိုဏ်းချုပ်ကျန်းက ယွင်လန်ဓားအင်မော်တယ်နဲ့ ရင်းနှီးတာပဲ။ ခင်ဗျားမှာ ခွင့်ပြုမိန့်ရှိရင် အင်မော်တယ်ဘုရင်အဆင့်ကို တက်ရောက်နိုင်လိမ့်မယ်”

ကောင်းကင်အလင်းဂိုဏ်း၏ ဂိုဏ်းချုပ်ဖူရွှယ်က ပြောလိုက်သည်။

သူ့စကားကို ကြားရသောအခါတွင် တခြားလူများက သက်ပြင်းချပြီး ရယ်လိုက်သည်။

ဖူယွီအင်မော်တယ်ကမ္ဘာသည် အင်မော်တယ်ဘုရင်တစ်ပါးကို ပိုင်ဆိုင်ရန် အလွန်နီးကပ်နေသည်။

“တာအိုရောင်းရင်းတို့ စိတ်မပူပါနဲ့။ ဟန်မူယဲ့က ခွင့်ပြုမိန့်ကို ယူလာရင် ငါတို့ ဖူယွီအင်မော်တယ်ကမ္ဘာတစ်ခုလုံးအတွက် အခွင့်အရေးပါပဲ”

ကျန်းကွမ်ယွမ်က တည်ငြိမ်စွာပြောသည်။

သူက ဟန်မူယဲ့နှင့် နီးကပ်သည်။

ယွင်လန်ဓားအင်မော်တယ်သည် ဓားဂိုဏ်း၏ ကာကွယ်မှုမရှိလျှင် အောင်မြင်မလာနိုင်ကြောင်း ဖူယွီအင်မော်တယ်ကမ္ဘာတစ်ခုလုံးက သိထားကြသည်။

ဟန်မူယဲ့၏ လူအများစုသည် ဓားဂိုဏ်းမှ ဖြစ်ကြသည်။

ဟန်မူယဲ့က နတ်ဘုရားကမ္ဘာ၏ ခွင့်ပြုမိန့်ကို ပြန်ယူလာလျှင် ဓားဂိုဏ်းကို မေ့လျော့သွားမည်မဟုတ်ပေ။

ကျန်းကွမ်ယွမ်က နှစ်ပေါင်းများစွာ ကျင့်ကြံလာပြီး အင်မော်တယ်သခင်အဆင့်တွင် ပိတ်မိနေသည်။ သူက အင်မော်တယ်ဘုရင်အဆင့်သို့ မတက်ရောက်နိုင်ခဲ့ပေ။ ဤတစ်ကြိမ်တွင် သူ့အတွက် မျှော်လင့်ချက်ရှိလာသည်။

....

ရွှေတောင်ထွတ်၏ ပြိုင်ပွဲနေရာသည် ဖူယွီအင်မော်တယ်ကမ္ဘာနှင့် ဝေးကွာသည်။

သင်္ဘောပျံက ငြီးငွေ့စရာကောင်းအောင် ပျံသန်းနေခဲ့သည်။

အင်မော်တယ်အလင်းဖြင့် လွှမ်းခြုံထားသော ဟန်မူယဲ့က အခန်းထဲတွင် တိတ်ဆိတ်စွာ ထိုင်နေခဲ့သည်။

သူက အင်မော်တယ်သခင် အထွတ်အထိပ်အဆင့်တွင် ရှိနေသော်လည်း ရုပ်ခန္ဓာကို သန့်စင်နိုင်သည်။ အဆီအနှစ်ဝိညာဉ်နှင့် အစစ်အမှန်ဝိညာဉ်၏ နည်းစနစ်ကို လေ့ကျင့်နိုင်သည်။ ဓားတာအို၏ မူလဝိညာဉ်ဓားများကို သုံးသပ်နိုင်သည်။ ကိုယ်ပိုင်ကျင့်ကြံခြင်း၏ စည်းမျဉ်းစွမ်းအားများကို ပေါင်းစပ်ရန်လည်း ကြိုးစားနိုင်သည်။

သူက အင်မော်တယ်သခင် အထွတ်အထိပ်အဆင့်သို့ ရောက်နေသော်လည်း ဆက်လက်မကျင့်ကြံနိုင်သော ကျန်းကွမ်ယွမ်တို့နှင့် မတူပေ။

သူ၏ ရုပ်ခန္ဓာကျင့်ကြံခြင်းသည် မူလကမ္ဘာခေတ်အထိ ပြန်သွားပြီး နဂါးမိကျောင်း၏ အဆင့်အထိ ရောက်နိုင်သည်။

ထိုလမ်းစဉ်ကို ကပ်ဘေး၏စည်းမျဉ်းများက ထိန်းချုပ်မထားပေ။

မဟာတောရိုင်းကမ္ဘာ၏ အစစ်အမှန်ဝိညာဉ် ကျင့်ကြံခြင်းသည်လည်း ရှေးခေတ်မှ ဖြစ်သည်။ ဤကပ်ဘေးခေတ်နှင့် မသက်ဆိုင်ပေ။

ဟန်မူယဲ့က အစစ်အမှန်ဝိညာဉ်ကို ပြန်လည်စုစည်းထားသည်။ သို့သော် ရွှေကျီးကန်းသွေးမျိုးဆက်ကိုတော့ မသုံးခဲ့ပေ။

သူ၏ ခွေသွေးမျိုးဆက်နှင့် ရွှေကျီးကန်းသွေးမျိုးဆက်က ပေါင်းစပ်ပြီး မီးနှင့်မိုးကြိုး၏ အစစ်အမှန်ဝိညာဉ်ပုံရိပ်ကို ဖြစ်ပေါ်လာစေသည်။ ထိုပုံရိပ်တွင် ဦးချိုနှစ်ချောင်းနှင့် တောင်ပံတစ်စုံ ရှိနေသည်။

သူက ခွေသားရဲ၏ မိုးကြိုးစွမ်းအားနှင့် ရွှေကျီးကန်း၏ မီးစွမ်းအားကို ထုတ်ယူပြီး ပေါင်းစပ်ခဲ့သည်။

ထိုအစစ်အမှန်ဝိညာဉ်နည်းစနစ်သည် သွေးမျိုးဆက်နှစ်ခုမှ ဖြစ်ပေါ်လာသော်လည်း သွေးမျိုးဆက်စွမ်းအား ပျောက်ဆုံးနေသည်။

သို့သော် ဟန်မူယဲ့က နဂါးမိကျောင်း၏ သွေးမျိုးဆက်ကို ပိုင်ဆိုင်ထားသည်။ ထို့ကြောင့် ဂရုမစိုက်ပေ။

လောကတွင် ရှေးခေတ်၏ အုပ်ချုပ်သူအဆင့် သွေးမျိုးဆက်ထက် ပိုမိုသန်မာသောသွေးမျိုးဆက် မရှိနိုင်တော့ပေ။

သူက အစစ်အမှန်ဝိညာဉ်ကို ဒုတိယအဆင့်သို့ တက်ရောက်ရန် အသင့်ဖြစ်နေသည်။ ထို့နောက် ရုပ်ခန္ဓာစွမ်းအား၊ အင်မော်တယ်စွမ်းအားနှင့် ပေါင်းစပ်ပြီး ဆက်လက်ကျင့်ကြံမည်။

ထို့အပြင် ယခုအချိန်တွင် သူက စည်းမျဉ်းလေးခုနှင့် ဒါဇင်ချီသော စည်းမျဉ်းများကို ထိန်းချုပ်ထားသည်။ ကပ်ဘေးစွမ်းအားလည်း ရှိနေသည်။

သင်္ဘောပျံက ရှေ့ဆက်ရွေ့လျားလာပြီး ရွှေတောင်ထွတ်သို့ သွားနေသော တခြားသင်္ဘောပျံများကို မြင်လာရသည်။

တချို့က အချင်းချင်း နှုတ်ဆက်ကြပြီး တချို့ကတော့ ရှေ့ဆက်သွားနေကြသည်။

ပုံမှန်သာဖြစ်သည်။ ရွှေတောင်ထွတ်သည် အရင်းအမြစ်အတွက် ပြိုင်ပွဲဖြစ်သည်။ သေခြင်းရှင်းခြင်းကို ဆုံးဖြတ်နိုင်သည်။ တခြားလူများနှင့် မိတ်ဆွေဖွဲ့နေရန် မလိုအပ်ပေ။

“ဘုန်း”

ရှေ့တွင် အလင်းလွှာတစ်ခု ပေါ်လာသည်။

သင်္ဘောပျံက အလင်းလွှာထဲသို့ တိုးဝင်သွားသည်။ ပတ်ဝန်းကျင်က ပုံရိပ်ယောင်ဆန်နေသည်။

သူတို့က ရောက်လာခဲ့သည်။

ဤနေရာသည် နတ်ဘုရားကမ္ဘာနှင့် သောင်းချီသော အင်မော်တယ်ကမ္ဘာများကို ဆက်သွယ်ထားပြီး ကမ္ဘာပေါင်းစုံပြိုင်ပွဲကို ကျင်းပမည့် ကောင်းကင်စုပေါင်းကုန်းမြေ ဖြစ်သည်။

ကောင်းကင်စုပေါင်းကုန်းမြေသည် ကောင်းကင်စက်ဝန်းနတ်ဘုရားကမ္ဘာ၏ အစွန်အဖျား ဖြစ်ခဲ့သည်။ နောက်ပိုင်းတွင် အကြောင်းပြချက်တချို့ကြောင့် ပြိုကျသွားပြီး အင်မော်တယ်ကမ္ဘာများ၏နယ်မြေသို့ ရောက်လာသည်။

ဤနေရာသည် နတ်ဘုရားကမ္ဘာ၏ သွင်ပြင်လက္ခဏာကို သယ်ဆောင်ထားသည်။ နတ်စွမ်းအားကို စုစည်းပြီး နတ်စွမ်းအားသလင်းကျောက်များကို ထုတ်ပေးနိုင်သည်။

ထို့အပြင် တခြားကမ္ဘာများထက် ပိုမိုကြွယ်ဝသော အင်မော်တယ်စွမ်းအင်လည်း ရှိနေသည်။

အင်မော်တယ်ကမ္ဘာများက ဤနယ်မြေကို သိမ်းယူရန်အတွက် အပြင်းအထန် တိုက်ခိုက်ခဲ့ကြသည်။

အဆုံးတွင် နတ်ဘုရားကမ္ဘာ၏ ကျွမ်းကျင်သူများ ဝင်ရောက်လာပြီး ရွှေတောင်ထွတ်ပြိုင်ပွဲ ကျင်းပမည့်နေရာအဖြစ် သတ်မှတ်လိုက်ကြသည်။

ကောင်းကင်စုပေါင်းကုန်းမြေတွင် မရေမတွက်နိုင်သော သင်္ဘောပျံများကို မြင်နိုင်သည်။ အဆုံးမရှိသော စံအိမ်များကိုလည်း မြင်နေရသည်။

ထိုစံအိမ်များသည် ပြိုင်ပွဲဝင်မည့် အင်အားစုများအတွက် အနားယူရန်နေရာ ဖြစ်သည်။

“အင်မော်တယ်ကမ္ဘာတွေအားလုံး ပြိုင်ပွဲအတွက် စာရင်းပေးကြပါ”

“ပြိုင်ပွဲမစခင် ရက်တစ်ရာလိုသေးတယ်။ အဲဒီအချိန်အတွင်းမှာ တိုက်ခိုက်မှုတွေကို ခွင့်မပြုပါဘူး”

အသံတစ်သံကို ကြားရသည်။

ဟန်မူယဲ့က ခေါင်းမော့ကြည့်လိုက်ပြီး ပုံရိပ်တစ်ခုကို မြင်ရသည်။

ထိုပုံရိပ်သည် မရေမတွက်နိုင်သော မျက်လုံးများကို ပိုင်ဆိုင်ထားပြီး သင်္ဘောပျံများအားလုံးကို စိုက်ကြည့်နေပုံရသည်။

“နတ်ဘုရားသားရဲလား”

ဟန်မူယဲ့က ရေရွတ်သည်။

“အဲဒါကို နတ်ဘုရားသားရဲလို့ ယူဆနိုင်တယ်။ ဒါပေမဲ့ အခုတော့ အခွံပဲ ကျန်တော့တယ်”

ရွှေရောင်ငှက်က အသံပေးသည်။

ထိုနတ်ဘုရားသားရဲသည် လောကများအားလုံးကို စောင့်ကြည့်နိုင်သည်။ သို့သော် ယခုအချိန်တွင် နတ်ဘုရားရင်းမြစ်နန်းတော်နှင့် သက်ဆိုင်သော ထိပ်တန်းအဆင့်ရတနာတစ်ပါးအဖြစ် သန့်စင်ခံလိုက်ရသည်။