အခန်း (၁၁၇၆)

“အဲဒါက ဘယ်သူလဲ”

လူတစ်ယောက်က ခေါင်းမော့ကြည့်လိုက်ပြီး မျက်လုံးပြူးသွားသည်။

မြင့်မားသော မြို့တံတိုင်း၏ မရေမတွက်နိုင်သော သားရဲများကြားတွင် အစိမ်းရောင်ဝတ်စုံနှင့် လူတစ်ယောက်ကို မြင်ရသည်။

ထိုပုံရိပ်က သွယ်လျသော်လည်း မရေမတွက်နိုင်သော သားရဲများကြားတွင် ပြိုင်ဘက်ကင်းသော အရှိန်အဝါကို ထုတ်လွှတ်နေသည်။

အင်မော်တယ်သခင်များပင် ကြောက်ရွံ့ရသော သားရဲများသည် မြို့တံတိုင်းပေါ်တွင် ရှိနေသော်လည်း ထိုသားရဲများအားလုံးက လူငယ်ကို ဒူးထောက်နေကြသည်။

‘ဒါက ဘယ်လိုစွမ်းအားမျိုးလဲ’

“အဲဒါက သူပဲ”

ဂိတ်တံခါး၏ရှေ့တွင် လူတစ်ယောက်က တီးတိုးပြောလိုက်သည်။

“အဲဒါက သူပဲ”

လူတချို့က ထိုပုံရိပ်ကို မှတ်မိသွားသည်။

ထိုလူက ပထမပွဲတွင် လူတိုင်း၏ အာရုံစိုက်စရာ ဖြစ်ခဲ့သည်။

ဟန်မူယဲ့ ....

ယွင်လန်ဓားအင်မော်တယ် ....

သူက ကိုယ်ပိုင်ခွန်အားဖြင့် ပထမပြိုင်ပွဲကို လွှမ်းမိုးခဲ့သည်။

ယခုအချိန်တွင် သူက မည်သည့်အရာမျိုးကို ပြုလုပ်မည်နည်း။

လူတိုင်းက ခန့်မှန်းနေကြသည်။

အလင်းလွှာကို စောင့်ကြည့်နေသော လူများက သက်ပြင်းချလိုက်သည်။

ဟန်မူယဲ့က တူညီသောလူတစ်ယောက် မဟုတ်တော့ပေ။

“သူတို့ကို တတိယအဆင့်အထိ သွားခိုင်းလိုက်ပါ”

နတ်ဘုရားရင်းမြစ်နန်းတော်၏ နန်းတော်သခင်က လက်ကို ဝှေ့ယမ်းလိုက်ပြီး ပြောသည်။ သူက ပြုံးနေသည်။

“တတိယအဆင့်က လူတိုင်းကို စုစည်းထားတယ်”

အလင်းလွှာ၏ရှေ့တွင် အနက်ရောင်ဝတ်စုံနှင့် လူအိုကြီးတစ်ယောက်က တီးတိုးပြောလိုက်သည်။

“စတုတ္ထအဆင့်ရဲ့ စည်းကမ်းက ပထမအဆင့်မှာ ပေါ်လာတယ်။ စတုတ္ထအဆင့်နဲ့ ပဥ္စမအဆင့်မှာ ဘယ်လို ပြောင်းလဲသွားအုံးမှာလဲ”

အလင်းလွှာ၏ရှေ့တွင် တခြားလူများက ဝင်္ကပါအား ထိန်းချုပ်နေသော အကြီးအကဲကို ကြည့်လိုက်ကြသည်။

“လက်ရှိစည်းမျဉ်းတွေအရဆိုရင် စတုတ္ထအဆင့်မှာ ပဥ္စမအဆင့်ရဲ့ စည်းကမ်းမဲ့တိုက်ပွဲတွေ ပါလာနိုင်တယ်”

ရှည်လျားသော မုတ်ဆိတ်နှင့် တာအိုတန်ခိုးရှင်တစ်ယောက်က လူတိုင်းကို စိုးရိမ်စွာ ကြည့်လိုက်သည်။

ယခင်က စတုတ္ထအဆင့်တွင် သေဆုံးခြင်းကို ခွင့်ပြုမထားဘဲ အဆက်မပြတ် တိုက်ပွဲများတွင် အရှုံးပေးခွင့်ရှိသည်။

နတ်ဘုရားကမ္ဘာ၏ လူများက ထိုအဆင့်တွင် လောင်းကြေးများသောလူများကို ဖယ်ထုတ်လေ့ရှိသည်။

ထို့အပြင် ထိုအဆင့်တွင် နတ်ဘုရားကမ္ဘာ၏ ဂိုဏ်းများက သန်မာသော ကိုယ်ပိုင်တပည့်များကို ရွေးချယ်ကြသည်။

ပဥ္စမအဆင့်သည် ဖရိုဖရဲဖြစ်နေသော တိုက်ပွဲ ဖြစ်သည်။

အဆုံးထိ ရှင်သန်နိုင်သောလူသည် လွှမ်းမိုးနိုင်သော ခွန်အားကို ပိုင်ဆိုင်ထားရမည်။

ထိုအချိန်တွင် အပြင်းအထန် ဒဏ်ရာရနေသောလူများက ရှင်းထုတ်ခံရလိမ့်မည်။

နတ်ဘုရားကမ္ဘာမှ ဂိုဏ်းများ၏ အသိအမှတ်ပြုခြင်းကို ရရှိထားသော ကျွမ်းကျင်သူများကတော့ ဆက်ရှိနေလိမ့်မည်။

ထိုလူများကို အဆုံးထိ ထောက်ပံ့ပေးမည်။

ယခင်က ပဥ္စမအဆင့်တွင် ထိပ်ဆုံးတစ်ရာကို စတင်သတ်မှတ်သည်။

ကမ္ဘာတိုင်းသည် ရွှေတောင်ထွတ်ပြိုင်ပွဲကို အဘယ်ကြောင့် ကြည့်ရှုနိုင်သနည်း။

အဘယ်ကြောင့်ဆိုသော် ကမ္ဘာတိုင်းက သူတို့၏ လက်ရွေးစင်များကို မြင်နိုင်လိမ့်မည်။ ပဥ္စမအဆင့်တွင် သူတို့က လောင်းကြေးထပ်နိုင်သည်။

ထိုလောင်းကြေးသည် နတ်စွမ်းအားသလင်းကျောက်သာ မဟုတ်ပေ။

နတ်ဘုရားလောကသည် နတ်စွမ်းအားသလင်းကျောက်ကို မလိုအပ်ပေ။

သူတို့က အညံ့ခံခြင်းကို လိုအပ်သည်။

အနာဂတ်တွင် အင်မော်တယ်ဘုရင်အဆင့်သို့ ရောက်နိုင်သော ကျွမ်းကျင်သူများသည် အညံ့ခံရမည်။

အလားအလာကောင်းသော ကမ္ဘာများသည် အညံ့ခံရမည်။

“ပထမအဆင့်ရဲ့ စည်းကမ်းတွေကို ပြုပြင်လိုက်တဲ့အတွက် တန်ပြန်သက်ရောက်မှု ဖြစ်ပေါ်လာပြီး စတုတ္ထအဆင့်နဲ့ ပဥ္စမအဆင့်က ထပ်သွားလိမ့်မယ်”

လက်နှစ်ဖက်ကို နောက်ပစ်ထားပြီး အလင်းလွှာရှေ့တွင်ရပ်နေသော နန်းတော်သခင်က ဂရုမစိုက်စွာ ပြောသည်။

စတုတ္ထအဆင့်နှင့် ပဥ္စမအဆင့်က ထပ်သွားမည်။

‘အဲဒီလိုဆိုရင် အရမ်းကြမ်းတမ်းနေမှာပေါ့’

နတ်ဘုရားရင်းမြစ်နန်းတော်၏ ကျွမ်းကျင်သူများက ရှုပ်ထွေးသော မျက်နှာထားဖြင့် တစ်ယောက်ကိုတစ်ယောက် ကြည့်လိုက်ကြသည်။

ယခင်က ဖယ်ထုတ်ရန်လိုအပ်‌သော လူများကို စတုတ္ထအဆင့်တွင် ဖယ်ထုတ်သည်။ ယခု ထိုသို့ မလုပ်နိုင်တော့ပေ။

“ဟားဟား၊ စည်းကမ်းတွေ ပြောင်းလဲသွားရင်လည်း ကိစ္စမရှိပါဘူး”

နန်းတော်သခင်က လေးနက်သော အကြည့်ဖြင့် ပြောသည်။

“တတိယအဆင့်မှာ ဟွမ်ကျန်းရှုံးကို ပထမနေရာရအောင် ယူခိုင်းလိုက်မယ်”

“ရှန်းလျူယွင်ကို အခွင့်အရေးမပေးနဲ့”

“ငါတို့ဘက်က အင်မော်တယ်ဘုရင်တစ်ပါး ကျဆုံးသွားပေမဲ့ နတ်ဘုရားရင်းမြစ်နန်းတော်ရဲ့ အခြေခံအုတ်မြစ်ကို လူတိုင်း မြင်စေရမယ်”

ရှန်းလျူယွင်က ဟန်မူယဲ့ကို အညံ့ခံလိုက်သည်။

ထိုအရာသည် နတ်ဘုရားလောကကို အရှက်ရစေသည်။

နတ်ဘုရားရင်းမြစ်နန်းတော်ကိုလည်း အရှက်ရစေခဲ့သည်။

“ဘုန်း”

အလင်းလွှာတွင် တုန်ခါသံကို ကြားရသည်။

မြင့်မားသော ဂိတ်တံခါးက ဖြည်းဖြည်းချင်း ပွင့်သွားသည်။

သားရဲများက ဦးညွတ်လိုက်ပြီး နောက်ဆုတ်သည်။

‘ဒုတိယအဆင့်က ဒီလိုပဲ ပြီးသွားတာလား’

လူတိုင်းက မြို့ထဲသို့ ဝင်ရောက်သွားသည်။ ရွှေရောင်ချပ်ဝတ်သည် လူတိုင်း၏ခန္ဓာကိုယ်တွင် ပေါ်လာသည်။

ဒုတိယအဆင့်၏ ဆုလာဘ် ဖြစ်သည်။

ထိုဆုလာဘ်ကြောင့် ရွှေအင်မော်တယ်အထွတ်အထိပ်အဆင့် ကျင့်ကြံသူများက ထွက်မသွားဘဲ ဤနေရာအထိ ရောက်လာခဲ့သည်။

ရွှေရောင်ချပ်ဝတ်သည် ကံစွမ်းအားကို သယ်ဆောင်ထားသည်။ ထိုချပ်ဝတ်က သူတို့ကို ကာကွယ်ပေးသည့်အပြင် ကံကောင်းခြင်းကိုလည်း သယ်ဆောင်ထားသောကြောင့် အင်မော်တယ်သခင်အဆင့်သို့ ဝင်ရောက်ရာတွင် တန်ဖိုးကြီးသော ပစ္စည်းတစ်ခု ဖြစ်လာလိမ့်မည်။

“ကျေးဇူးပါပဲ ယွင်လန်ဓားအင်မော်တယ်”

“တတိယအဆင့်မှာ ယွင်လန်ဓားအင်မော်တယ်နဲ့အတူ တိုက်ခိုက်ချင်ပါတယ်”

ရွှေရောင်ချပ်ဝတ်ကို ရထားသောလူတိုင်းက ဟန်မူယဲ့ကို ကျေးဇူးတင်လိုက်ကြသည်။

သူတို့က ဤအဆင့်တွင် ခွန်အားကို ထိန်းသိမ်းထားနိုင်လျှင် နောက်ပိုင်းအဆင့်များတွင် အခွင့်အရေးပိုရလိမ့်မည်။

အလင်းလွှာတွင်ရှိသော မြင်ကွင်းကို ကြည့်လိုက်ပြီး အင်မော်တယ်ကမ္ဘာတွင်ရှိသော ကျွမ်းကျင်သူများက ခေါင်းခါလိုက်ကြသည်။

တတိယအဆင့်တွင် ထိုလူများက အပြင်းအထန် ထိခိုက်သွားလိမ့်မည်။

သူတို့က ဟန်မူယဲ့အား ထိန်းချုပ်ထားသော သားရဲများကို သတ်နိုင်မည်မဟုတ်ပေ။

ဟန်မူယဲ့က လက်နှစ်ဖက်ကို တည်ငြိမ်စွာ ဆုပ်ကိုင်ပြီး ပြန်လည်နှုတ်ဆက်လိုက်သည်။

ကောင်းကင်မှတစ်ဆင့် အလင်းတန်းများ ကျဆင်းလာပြီး ဤအဆင့်အား ကျော်ဖြတ်နိုင်သော လူတိုင်းကို နောက်တစ်ဆင့်သို့ တည်နေရာရွှေ့ပြောင်းပေးလိုက်သည်။

အလင်းလွှာတွင် မည်သည့်အရာကိုမှ မမြင်နိုင်တော့ပေ။ ပုံရိပ်ယောင်ဆန်သော သားရဲနှင့် တောင်တန်းများကိုသာ မြင်နေရပုံပေါ်သည်။

ဟန်မူယဲ့ကလည်း ပျောက်ကွယ်သွားသည်။

“တတိယအဆင့်ရဲ့ မူလကမ္ဘာ ပေါ်လာပြီ ....”

အလင်းလွှာကို စောင့်ကြည့်နေသော လူများက တီးတိုးပြောလိုက်သည်။

“ခေးအော့ရဲ့ဝိညာဉ်ကို လှုံ့ဆော်ပြီး မူလကမ္ဘာကို ပြန်ပေါ်လာစေတယ်”

ဟန်မူယဲ့က ရွှေကျီးကန်း၏အသံကို ကြားလိုက်ရသည်။

“မင်းက ခွန်းဝူကို ထိန်းချုပ်ထားတာမဟုတ်လား”

“မူလကမ္ဘာနဲ့ ခွန်းဝူက ဆင်တူတယ်”

ရွှေအလင်းများသည် ဟန်မူယဲ့ကို ရစ်ပတ်ထားသည်။ အလင်းစီးကြောင်းများသည် သူ့ရှေ့တွင် သွယ်ယှက်နေသည်။

အလင်းစီးကြောင်းတိုင်းသည် ပုံရိပ်ယောင်မူလကမ္ဘာသို့ ဝင်ရောက်လာသော ကျင့်ကြံသူတိုင်းကို ကိုယ်စားပြုသည်။

ဤနေရာသည် ပုံရိပ်ယောင်မူလကမ္ဘာဖြစ်သော်လည်း အပျက်အစီးနယ်မြေနှင့် မတူပေ။

အပျက်အစီးနယ်မြေသည် ကပ်ဘေးကို သယ်ဆောင်ထားသည်။

ဤနေရာသည် အပျက်အစီးနယ်မြေနှင့် မယှဉ်နိုင်ပေ။

“အမှန်အတိုင်းပြောရရင် ငါက လူတိုင်းရဲ့ဝိညာဉ်ကို ငါ့ရဲ့မှတ်ဉာဏ်ကမ္ဘာထဲ ဆွဲသွင်းလိုက်တာပါပဲ”

နဖူးတွင် ဒေါင်လိုက်မျက်လုံးတစ်လုံး ရှိနေသော အနက်ရောင်ဝတ်စုံနှင့် လူအိုကြီးက ဟန်မူယဲ့၏ရှေ့တွင် ပေါ်လာသည်။

ထိုလူအိုကြီးက ဟန်မူယဲ့၏ နောက်တွင်ရှိသော ရွှေရောင်ငှက်လေးကို ကြည့်လိုက်ပြီး ညင်သာစွာ သက်ပြင်းချသည်။

“မဟာနေမင်းရွှေကျီးကန်းက ဒီလိုမျိုးကျဆင်းသွားမယ်လို့ ထင်မထားခဲ့ဘူး”

“ကျဆင်းသွားတာက မင်းပဲဖြစ်လိမ့်မယ်။ ငါ့အခြေအနေက အရမ်းကောင်းတယ်”

ရွှေရောင်ငှက်လေးက ဟိန်းဟောက်လိုက်သည်။

လူအိုကြီးက ရယ်သည်။ သူက ဟန်မူယဲ့ကို ကြည့်လိုက်ပြီး ပြောသည်။

“ဒီလိုဆိုရင်ရော ဘယ်လိုလဲ။ အစစ်အမှန်မူလကမ္ဘာကို အလည်သွားဖို့ စိတ်ဝင်စားလား”

‘အစစ်အမှန်မူလကမ္ဘာ’

ဟန်မူယဲ့က အနည်းငယ် အံ့အားသင့်သွားသည်။

ရွှေရောင်ငှက်က တက်ကြွစွာ တောင်ပံခတ်လိုက်သည်။

“မင်းက ခွန်းဝူကို ထိန်းချုပ်ထားတာမဟုတ်လား”

“ခွန်းဝူကို ပို့ပေးမယ်”

လူအိုကြီး၏စကားကြောင့် ဟန်မူယဲ့၏ မျက်လုံးများက တောက်ပသွားသည်။

‌ရွှေရောင်ငှက်က တကျီကျီအော်ဟစ်လိုက်သည်။

“အဲဒီကိုမသွားနဲ့။ မင်းက ခွန်းဝူကို မသွားနိုင်သေးဘူး”

“နတ်ဘုရားသားရဲတွေက ခွန်းဝူမှာ စုစည်းနေတယ်။ မင်းရဲ့ခွန်အားက မလုံလောက်သေးဘူး။ အဲဒီကိုသွားရင် သေလိမ့်မယ်”

ခွန်းဝူ၏ အပြင်ဘက်တွင် စစ်ဖြစ်နေသည်။

သို့သော် ယခုအချိန်တွင် ခွန်းဝူ၏အခြေအနေကို မသိရပေ။

နတ်ဘုရားသားရဲများသည် ခွန်းဝူတွင် မည်သို့ ရှိနေကြသနည်း။

ဟန်မူယဲ့က ခွန်းဝူ၏သခင် ဖြစ်သောကြောင့် ဉာဏ်အလင်းသားရဲ၏ လမ်းညွှန်မှုအောက်တွင် ခွန်းဝူကို တစ်ကြိမ်ဝင်ဖူးခဲ့သည်။

သို့သော် တစ်ချက်အကြည့်သာ ဖြစ်သည်။

သူက ခွန်းဝူကို လုံလောက်အောင် နားမလည်သေးပေ။

ထိုနေရာသည် ကပ်ဘေး၏ မူလရင်းမြစ် ဖြစ်သည်။

နောက်တစ်ကြိမ်ကပ်ဘေးတွင် ခွန်းဝူက ဟန်မူယဲ့၏ ပြိုင်ဘက် ဖြစ်လာနိုင်သည်။

“စိတ်မပူပါနဲ့။ ငါက မင်းရဲ့ ခန္ဓာကိုယ်အစစ်အမှန်ကို ပို့ပေးဖို့ စွမ်းအားမရှိဘူး”

“မင်းက ခွန်းဝူကိုသွားမယ့် လမ်းကြောင်းကို ကိုယ်တိုင်ဖွင့်ရမယ်။ ငါက ဝိညာဉ်စွမ်းအားနဲ့ အဲဒီနေရာကို အလင်းပြပေးမယ်”

“မင်းက ဝိညာဉ်အမျှင်တန်းတစ်ခုနဲ့ပဲ ဝင်ရမှာပါ။ တကယ်လို့ အထဲမှာ သေဆုံးသွားရင်တောင် မင်းရဲ့ မူလခန္ဓာကို သက်ရောက်မှုမရှိဘူး”

ခေးအော့အဖြစ်မှ အသွင်ပြောင်းထားသော လူအိုကြီးက ပြုံးလိုက်ပြီး ညင်သာစွာပြောသည်။

“ဒီအဆင့်ရဲ့စည်းကမ်းကို သိလား”

ဟန်မူယဲ့က သိနေသည်။

အဆုံးတွင် လူတိုင်းက သေဆုံးသွားလိမ့်မည်။

သေဆုံးသွားမည့်အချိန်သာ ကွာခြားသည်။ တချို့က အချိန်တိုအတွင်း သေဆုံးသွားလိမ့်မည်။ တချို့က အချိန်အကြာကြီး တောင့်ခံနိုင်သည်။

“တတိယအဆင့်က ဝိညာဉ်အမျှင်တန်းတွေ သေဆုံးသွားတာတင် မဟုတ်ဘူးလား”

ဟန်မူယဲ့က ခေးအော့ကို ကြည့်သည်။

သူသိထားသော အချက်အလက်များအရ တတိယအဆင့်တွင် ပြန်နိုးမလာသောလူများ ရှိနေသည်။

ထို့ကြောင့် ဝိညာဉ်အမျှင်တန်းတစ်ခုသာ မဖြစ်နိုင်ပေ။

သူ့စကားကို ကြားလိုက်ရသောအခါတွင် ခေးအော့က ပြုံးလိုက်ပြီး ပြောသည်။

“ငါက အားဖြည့်ဖို့ ဝိညာဉ်ကို လိုအပ်တယ်လေ”

“ပြီးတော့ နတ်ဘုရားရင်းမြစ်နန်းတော်နဲ့ သဘောတူထားတယ်”

“သူတို့သတ်ချင်တဲ့လူရဲ့ ဝိညာဉ်ကို ငါက စုဆောင်းပေးတယ်”