ယန္တရားပညာရှင်တစ်ဦး၏ နိဗ္ဗာန်ဘုံ

ဟန်ရှောင်း မျက်ခုံးပင့်လိုက်သည်။ "ဒီမှာ ဘာမှားနေလို့လဲ၊ ငါတို့က ယုံကြည်စိတ်ချရမှု အဆင့်သတ်မှတ်ခြင်း လိုအပ်ချက်နဲ့ ကိုက်ညီတယ် မဟုတ်လား။”

"ငါက စစ်သည်တော် ကိုယ်ရံတော်တွေကို လိုချင်တာ၊ ပြီးတော့ မင်းတို့ရဲ့မှတ်တမ်းတွေအားလုံးက ဂျူဘာလီ အာကာသစခန်းမှာ အိမ်ဖော်တစ်ယောက်လို နေ့စဉ်အလုပ်တွေနဲ့ ပြည့်နေတယ်" မာတင်က နှိမ်သလိုလေသံဖြင့် ပြောကြားလိုက်သည်။ "မင်းက စစ်သားတစ်ယောက်အနေနဲ့ တကယ်အရည်အချင်းပြည့်မီသလား"

ဟန်ရှောင်း မျက်မှောင်ကြုတ်လိုက်သည်။ "ဘာကိုဆိုလိုတာလဲ?"

"မင်းဟာ ငါ့အလုပ်အတွက် အရည်အချင်းမမှီဘူး" မာတင်က ဒေါသတကြီးဖြင့် သူ့လက်ကို ဝှေ့ယမ်းလိုက်သည်။ သူသည် အလွန်စျေးသက်သာသည်ကို လိုချင်သော်လည်း သူ၏စံနှုန်းများကို မလျှော့ဘဲ အသက်သာဆုံးစျေးနှုန်းဖြင့် ရှာတွေ့နိုင်သည့် အကောင်းဆုံးစစ်သည်တော်ကို လိုချင်ခဲ့သည်။ ဘလူးနစ်၏ ကိုယ်ရည်ကိုယ်သွေးသည် အမြဲလိုလို၊ စျေးပေါသည်ကိုကြိုက်ပြီး လောဘကြီးသည်။ ဘလက်စတား ကြေးစားတပ်ဖွဲ့အတွက် ပျမ်းမျှခွန်အား အဆင့်သတ်မှတ်ချက်မှာ အဆင့် C ဖြစ်သော်လည်း မှတ်တမ်းများကို ဖတ်ရှုပြီးနောက် ၎င်းတို့၏ စွမ်းရည်ကို သူမယုံကြည်ပေ။ အသုံးမဝင်သော ကြေးစားသမားများအတွက် ငွေကို သုံးစွဲမည်ဆိုပါက သုတေသနအဖွဲ့အတွက် အလွန်အန္တရာယ်ကြီးလိမ့်မည်။

ပတ်၀န်းကျင်ရှိ ရဲဘော်များက မာတင်အား လှောင်ပြောင်ကြသည်။

"သောက်ရမ်းချေးများတဲ့ သူတောင်းစားလေး၊ မင်းက အီနက်စ်400 ပဲ ပေးတာလေ။"

"ပေးတာနဲ့ တန်တာပဲ ပြန်ရတယ်ဆိုတာ မင်း တခါမှ မကြားဖူးဘူးလား"

"ဟား ဟား၊ ဘလူးနစ်"

ဟန်ရှောင်း အံကိုကြိတ်လိုက်သည်။ ဒီကောင်တွေ ဘာတွေ ဆူညံနေကြတာလဲ။ သူတို့က ငါ့အစား မာတင်ကို ကူညီနေသလို ခံစားရတယ်။

မာတင်သည် အခွင့်အရေးကို မြင်ပြီး စျေးနှုန်းကို အမြန်ဖိအားပေးခဲ့သည်။ "ဒီမှတ်တမ်းနဲ့ဆိုရင်၊ ငါတစ်ဦးကို အီနက်စ် ၂၀၀ ပဲ ပေးနိုင်တယ်။"

“နှုတ်ဆက်ပါတယ်။”

ဟန်ရှောင်း နောက်ပြန်လှည့်မကြည့်ဘဲ ထွက်သွားသည်။ မာတင်၏ သဘောထားသည် ဟန်ရှောင်းကို စိတ်ဆိုးစေခဲ့ပြီး ယန္တရားပညာရှင်ကြီးဟန်သည် သူ့ကို အခြားသူများက ဖိအားပေးခြင်းကို ဘယ်တော့မှ ခွင့်မပြုပေ။ တခြားအခွင့်အရေးတွေ အများကြီးရှိနေသေ၍ ဒီအလုပ်ကို မယူရလျှင်လည်း ကောင်း၏၊ ထို့ကြောင့် စိတ်ရှုပ်စရာ လူရှေ့မှာ တောင်းဆိုနေစရာ မလိုပေ။

သူသည် ကြေးစားအင်တာဖေ့စ်ကိုဖွင့်ပြီး ဆူနီမှ အလုပ်ခန့်ရန် တောင်းဆိုချက်အချို့ကို တွေ့ရှိခဲ့ပြီး၊ အားလုံးသည် တူညီသောဖြစ်ရပ်တစ်ခုဖြစ်သည်။

ဆူနီ၏ ဇာတိမြေသည် ပျက်စီးသွားခဲ့သည်။ ဂိုဒိုရန်၏ အကူအညီဖြင့်၊ လူမှုအဖွဲ့အစည်းသည် သဘာဝအတိုင်း ရှိနေသေးသည့် သစ်တောများပြည့်နှက်နေသော အခြားကမ္ဘာသို့ ရွေ့ပြောင်းသွားခဲ့သည်။ ထိုကမ္ဘာကို ဆူနီဂြိုလ်ဟု အမည်ပြောင်းခဲ့သည်။

ဆူနီဂြိုလ်ကမ္ဘာတဝှမ်းလုံးတွင် တောရိုင်းတိရစ္ဆာန် များစွာရှိ၏။ အများစုမှာ တိရစ္ဆာန်များသည် တက်ကြွကြသည်။ သို့သော်၊ ဆူနီဂြိုလ်၏ မြေပြင်အောက်တွင် နတ်ဆိုးဝိဉာဏ်များပါ၀င်သော ကျောက်တုံးကြီးတစ်ခုရှိနေပြီး ၎င်းက တိရစ္ဆာန်များ သောင်းကျန်းမှုကို နှစ်အနည်းငယ်ကြာတိုင်း တစ်ကြိမ်ဖြစ်ပေါ်သည်။ ထိုအခါ ဆူနီ၏ ရွာများနှင့်မြို့များအားလုံးမှာ ထိခိုက်ခံစားရလိမ့်မည်။ အချိန်တိုင်း၊ ဤကာလအတွင်း၊ ကမ္ဘာနှင့်ဝေးကွာနေသော ဆူနီ၏ စစ်သည်များအားလုံးသည် အကူအညီများ ပိုမိုစုဆောင်းပြီး ၎င်းတို့၏မွေးရပ်မြေကို ကာကွယ်ကြမည်ဖြစ်သည်။

ဆူနီသည် ဝမ်းနည်းစရာကောင်းသော လူမျိုးဖြစ်သည်။ မူလက ၎င်းသည် အခြားဂြိုလ်များနှင့် ဆက်သွယ်ခြင်းမရှိသည့် လူမှုအဖွဲ့အစည်းတစ်ရပ် ဖြစ်ခဲ့သည်။ အေးချမ်းသာယာပြီး ပိုမိုကောင်းမွန်သော လူ့အဖွဲ့အစည်းအဖြစ် ဖွံ့ဖြိုးတိုးတက်ရန် ကြိုးပမ်းခဲ့ကြသည်။ ကံမကောင်းစွာဖြင့်၊ ၎င်းတို့သည် အမှောင်ကြယ်၏ တိုက်ခိုက်ခြင်းခံခဲ့ရ၏။ အမှောင်ကြယ်မှ တိုက်ပွဲယာဉ်များသည် မြေပြင်သို့ ဒုံးကျည်များနှင့် လေဆာများကို အကြိမ်ကြိမ် ပစ်လွှတ်သောကြောင့် ဆူနီများသည် ပြန်လည်တိုက်ခိုက်ရန် နည်းလမ်းမရှိခဲ့ပေ။ တစ်ပြည်လုံးမှာ အော်ဟစ်သံများ မီးလောင်ကျွမ်းမှုများနှင့် ပြည့်နှက်နေပြီး လူများ၏ စိတ်ပျက်အားငယ်မှုများ ဖုံးလွှမ်းသွားစေသည်။

အမှောင်ကြယ်သည် ဂိုဒိုရန်၏ ကမ္ဘာမကြေရန်သူဖြစ်ပြီး ၎င်းသည် ဂါတွန်နဂါးငွေ့တန်းတွင် လှုပ်ရှားသော လူမှုအဖွဲ့အစည်းတစ်ခုဖြစ်သည်။ အမှောင်ကြယ်သည် ဂိုဒိုရန်၏ စီမံခန့်ခွဲမှုတွင် အားနည်းချက်တစ်ခုကို တွေ့ရှိခဲ့ပြီး ဂိုဒိုရန်အုပ်ချုပ်မှုအောက်တွင် ဂြိုဟ်များကို တိုက်ခိုက်ခဲ့သည်။ ဂိုဒိုရန်သည် နိမ့်ပါးသော လူမှုအဖွဲ့အစည်းများကို ကူညီရန် အရင်းအမြစ်များကို ပိုမိုသုံးစွဲရန်မှတပါး ရွေးချယ်စရာမရှိပေ။ အကယ်၍ ဂိုဒိုရန်သည် ထိုယဉ်ကျေးမှုများ၏ ဆင်းရဲဒုက္ခကို လျစ်လျူရှုခဲ့ပါက၊ ၎င်းတို့သည် ဂါတွန်နဂါးငွေ့တန်းကို ထိန်းချုပ်နိုင်မှုအပေါ် လူအများ၏ယုံကြည်မှုကို ဆုံးရှုံးသွားမည်ဖြစ်သည်။

လူဆိုးဂိုဏ်းတစ်ခုအနေဖြင့်၊ အမှောင်ကြယ်သည် ဟိုးရှေးရှေးတုန်းက စကြဝဠာ သဘောတူစာချုပ် [အာကာသ လူမှုအဖွဲ့အစည်း ဖွဲ့စည်းပုံအခြေခံဥပဒေ] ကို ဖွံ့ဖြိုးပြီးနည်းပါးသော ယဉ်ကျေးမှုများကို တိုက်ခိုက်ခြင်းဖြင့် ချိုးဖျက်ခဲ့သည်။ ထို့အပြင်၊ ကွဲအက်ကြယ်စင်ကွင်းသည် အခြားကြယ်စနစ်များနှင့် နှိုင်းယှဉ်ပါက အစွန်ဆုံးတွင် ရှိနေသည်။ ထို့ကြောင့်၊ ကမ္ဘာများကို ဖျက်ဆီးပြီးနောက် အမှောင်ကြယ်သည် ၎င်းတို့၏ဒေသတွင် အချိန်အတော်ကြာ ပျောက်ကွယ်သွားကာ အခြားယဉ်ကျေးမှုများမှ စစ်ကြေငြာချက်များကို ရှောင်ရှားခဲ့သည်။ အမှောင်ကြယ်သည် ဂါတွန်နဂါးငွေ့တန်းကို ဖြည်းဖြည်းချင်း ဖုံးလွှမ်းလာသော အရိပ်တစ်ခုလိုပင်။

ဂိုဒိုရန်စစ်ရေယာဉ်များ ရောက်ရှိလာသောအခါ၊ ဆူနီ၏ မူလဂြိုဟ်သည် ပျက်သုဉ်းသွားခဲ့ပြီဖြစ်သည်။ မြေပြင်သည် ချော်ရည်များဖြင့်ဖုံးလွှမ်းနေပြီး မြေပြင်သည် အက်ကွဲပျက်စီးသွားခဲ့သည်။ ဂေဟစနစ် ဆုံးရှုံးခဲ့ပြီး လူဦးရေ၏ ဆယ်ရာခိုင်နှုန်းသာ အသက်ရှင်ကျန်ရစ်ခဲ့သည်။ ဆူနီ၏ နည်းပညာသည် ယခင်မျိုးဆက်များနှင့် ပြတ်တောက်ခဲ့ပြီး နဂိုအတိုင်းပြန်ဖြစ်လာခြင်းမရှိသေးပေ။ ဒုက္ခသည်များကို ဂိုဒိုရန်၏ အကူအညီဖြင့် ဆူနီဂြိုလ်သို့ ပြောင်းရွှေ့ခဲ့ပြီး၊ အစပိုင်းတွင် ဂိုဒိုရန်သည် မြို့များကိုတည်ဆောက်ရန် ကူညီခဲ့သည်။ နှစ်အနည်းငယ် နေထိုင်ပြီးမှသာ လူများက သားရဲများ သောင်းကျန်းမှုအကြောင်း သိလာကြ၏။

အခြားဂြိုဟ်သို့ ပြောင်းရွှေ့ခြင်းသည် အလုပ်အလွန်များသည်။ ဂိုဒိုရန်က ပထမဆုံး အကူအညီ ပေးခဲ့တာ က စာရိတ္တပိုင်းဆိုင်ရာ အကြောင်းပြချက်ကြောင့် ဖြစ်သော်လည်း ဆူနီများက ဂိုဒိုရန်ကိုထပ်ပြီး အကူအညီ တောင်းခဲ့လျှင် ဂိုဒိုရန်ထံတွင် အကြွေးအလွန်တင်နေပြီဟု ခံစားရမှာဖြစ်သည်။ ထို့ကြောင့် ဤကိစ္စနှင့် ပတ်သက်ပြီး အကူအညီ မတောင်းခံတော့ပေ။ သူတို့သည် ကမ္ဘာပေါ်တွင်နေပြီး မွန်းစတားများကို တိုက်ခိုက်ရန် ဆုံးဖြတ်ခဲ့ကြသည်။

ဤအချိန်သည် သားရဲများ ပြန်လည် လှုပ်ရှားလာသော ကာလဖြစ်သည်။ ဤမစ်ရှင်များသည် အမိမြေကို ကာကွယ်ရန် အကူအညီ တောင်းကြခြင်းဖြစ်၏။ စာရင်းကို ဆက်လက်ကြည့်လာသည်နှင့်အမျှ မစ်ရှင်၏အခက်အခဲမှာ ပိုမိုများပြားလာပြီး အန္တရာယ်အရှိဆုံးမစ်ရှင်အတွက် လျှောက်ထားသူမရှိပေ။ အလွယ်ဆုံးမစ်ရှင်အတွက်၊ သူတို့သည် ယုံကြည်နိုင်မှု အဆင့်သတ်မှတ်ချက် ၁၂၀ လိုအပ်သည်။

ဟန်ရှောင်းသည် အလွယ်ဆုံးမစ်ရှင်ကိုသာ ရွေးချယ်နိုင်ပြီး လျှောက်လွှာတင်ခဲ့သည်။ ခဏအကြာတွင် သူသည် အကြောင်းပြန်စာ ရရှိခဲ့ပြီး သူ၏လျှောက်လွှာမှာ အောင်မြင်သွားသည်။

_________________________________

ကြေးစားစစ်သား မစ်ရှင် - [သစ်တောမြို့ကို ကာကွယ်ပါ]

မစ်ရှင်နိဒါန်း - ကပ်ဘေး၏ နောက်ထပ်လှိုင်းတစ်ခုသည် ဆူနီများပေါ်တွင် အုပ်မိုးလာနေသည်။ သင်သည် မစ်ရှင်ကို လက်ခံခဲ့ပြီး၊ သင်၏တာဝန်မှာ သစ်တောမြို့ကို ကာကွယ်ရန်ဖြစ်သည်။

မစ်ရှင်လိုအပ်ချက် - သစ်တောမြို့ကို ကာကွယ်ပါ။

မအောင်မြင်သောအခြေအနေ - သစ်တောမြို့တော်ကို ကာကွယ်ရန် ပျက်ကွက်ခြင်း။

မအောင်မြင်သောမစ်ရှင်၏ပြစ်ဒဏ် - ယုံကြည်စိတ်ချရမှုအဆင့်သတ်မှတ်ချက် -၆၀

ဆုလာဘ် - အတွေ့အကြုံအမှတ် ၅၀၀,၀၀၀၊ ၁,၈၀၀ အီနက်စ်၊ +၃၄ ယုံကြည်နိုင်မှု အဆင့်သတ်မှတ်ချက်၊ +၃ ဒေသတွင်း နာမည်ကျော်ကြားခြင်း

အသက်သွင်းနိုင်သည့် အချိန် - ၁၂ ရက်

_________________________________

ဆူနီများသည် သားရဲတိုက်ခိုက်သည့်ကာလကို 'ကပ်ဘေး' ဟုခေါ်ကြပြီး သစ်တောမြို့သည် ဆူနီ၏ အဓိကမြို့ဖြစ်သည်။

ဒါက သာမာန်မစ်ရှင်တစ်ခုပဲ၊ သို့သော်လည်း၊ ဒါက ဟန်ရှောင်းစိတ်ထဲမှာ ရှိနေသည့် အရာမဟုတ်ပေ။ မစ်ရှင်ကို လက်ခံရခြင်းအကြောင်းရင်းမှာ ဆူနီများကို သင့်လျော်သော အထောက်အထားဖြင့် ချဉ်းကပ်နိုင်စေရန်ဖြစ်သည်။ သူကိုယ်တိုင်သည်လည်း ဇာတ်လမ်းဇာတ်ကြောင်း မစ်ရှင်ကို အသက်သွင်းရမည်ဖြစ်သည်။

အဖွဲ့ဝင်တစ်ဦးအနေဖြင့်၊ ကစားသမားများသည် ကြေးစားအဖွဲ့တွင် မစ်ရှင်ကို ရရှိခဲ့သည်။ ဟန်ရှောင်းသည် မစ်ရှင်၏ဆုလာဘ်ကို အဖွဲ့မစ်ရှင်၏ ဆုကြေးပေါ်တွင်ထပ်၍ ပေးလိုက်သည်။ ကစားသမားတွေက ဆုနှစ်ဆရသလို ခံစားလိုက်ရ၏။

ဘလက်စတား ကြေးစားတပ်ဖွဲ့သည် တိုက်ပွဲအမျိုးအစားမစ်ရှင်ကို ပထမဆုံးအကြိမ် ရွေးချယ်ခဲ့ခြင်းကြောင့် ကစားသမားများမှာ စိတ်လှုပ်ရှားနေကြသည်။

ဟန်ရှောင်းသူ့လက်ကို ဝှေ့ယမ်းလိုက်သည်။

"သွားကြရအောင်။"

…

သုံးရက်ကြာပြီးနောက် သူတို့အဖွဲ့သည် အာကာသယာဉ်ကိုစီးကာ ဆူနီဂြိုလ်သို့ ရောက်ရှိလာသည်။ စကြာဝဠာကြီးမှကြည့်လျှင် ဂြိုလ်ကြီးမှာ အစိမ်းရောင်ဖြင့် ဖုံးလွှမ်းထားပြီး အပေါ်မှ တိမ်ဖြူဖြူများ လွင့်မျောနေသည်။

အာကာသယာဉ်သည် လေထုထဲသို့ ဆင်းသက်လိုက်စဉ် ပြင်းထန်စွာ တုန်ခါသွားပြီး ညွှန်ကြားထားသည့် လမ်းကြောင်းအတိုင်း သစ်တောဆီသို့ ဦးတည်သွားသည်။ ထို့နောက် ဟန်ရှောင်းသည် လွင်ပြင်တစ်ခုကို မြင်လိုက်ရပြီး အလယ်တွင် မြို့တစ်ခု တည်ရှိသည်။ ထိုနေရာက ဆူနီ၏ မွေးရပ်မြေအသစ် - သစ်တောမြို့ဖြစ်သည်။

အာကာသယာဉ်သည် လေယာဉ်အခန်းလေးကို ပစ်ချလိုက်သည်။ ဟန်ရှောင်းတို့အဖွဲ့သည် စက္ကန့်အနည်းငယ်မျှ အလေးချိန်မဲ့သွားသလို ခံစားလိုက်ရပြီး မြေပြင်ပေါ်သို့ ဘေးကင်းစွာ ဆင်းသက်လာခဲ့သည်။

ဝှစ်!

တံခါးက လျှောခနဲ ပွင့်သွားပြီး သူတို့ စစ်စခန်းတစ်ခုထဲမှာ ရောက်နေ၏။ ဟန်ရှောင်းသည် တံခါးမှ ထွက်လာပြီး အခြေစိုက်စခန်းကို ကာကွယ်နေသည့် ဆူနီစစ်သားများနှင့် သံချပ်ကာယာဉ်များကို လျင်မြန်စွာ သတိပြုမိသည်။

[ဆူနီ-တပ်သားချပ်ဝတ်] သည် ဆူနီစစ်သားဝတ်ထားသော သံချပ်ကာဖြစ်သည်။ သံချပ်ကာသည် မီးခိုးရောင်ဖြစ်ပြီး၊ သံချပ်ကာပြားသည် အလွန်ထူသောကြောင့် စက်သေနတ်များမှ ကျည်ဆန်များကို ပိတ်ဆို့နိုင်သည်။ လိုက်ဖက်သော ချပ်ဝတ်တန်ဆာကြောင့် စစ်သားများသည် စစ်မှန်သော ယူနစ်တစ်ခုနှင့်တူသည်။ သံချပ်ကာဝတ်စုံ၏ အလေးချိန်မှာ တစ်တန်နီးပါးရှိပြီး လှုပ်ရှားမှုကို ပံ့ပိုးပေးသည့် ကိရိယာများပါရှိသည်။ ပခုံးပေါ်ရှိ ကြီးမားသော ပြောင်းတံများရှိသည့် စက်သေနတ်များ၊ ဒုံးပျံလောင်ချာငယ်များနှင့် အခြား အနီးကပ်လက်နက်များ ပါ၀င်သည်။

ဆူနီသည် စစ်မှန်သော နည်းပညာ လူမှုအဖွဲ့အစည်းတစ်ခုဖြစ်ပြီး နည်းပညာ လူမှုအဖွဲ့အစည်းအဆင့်အတန်း တစ်ခုသို့ ရောက်ရှိပြီးနောက်တွင် ၎င်းတို့သည် စစ်သား တစ်ဦးချင်းစီအတွက် ချပ်ဝတ်တန်ဆာများကို အမြဲတမ်း ဖန်တီး ပေးခဲ့သည်။ မတူညီသော လူမှုအဖွဲ့အစည်းများတွင် ချပ်ဝတ်တန်ဆာပုံစံ အမျိုးမျိုးရှိသည်။ ဆူနီအတွက် သံချပ်ကာကို တပ်သားအဆင့်နှင့် တပ်ကြပ်အဆင့်ဟူ၍ ခွဲခြားထားသည်။ ကာကွယ်ရေးပုံစံ၊ တိုက်ခိုက်ရေးပုံစံ၊ ကင်းထောက်ပုံစံ စသဖြင့် ခွဲခြားထားသည်။

တကယ်တော့ ဟန်ရှောင်းသည် ဆူနီချပ်ဝတ်တန်ဆာတွင် 'တပ်မှုးအဆင့် ချပ်ဝတ်တန်ဆာ' ဟုခေါ်သော ပိုအစွမ်းထက်သော အတန်းအစား ရှိသည်ကို သိသည်။ သို့သော်လည်း တိုက်ခိုက်မှုတွင် ဖျက်ဆီးခံခဲ့ရပြီး နည်းပညာမှာ ထာဝရ ဆုံးရှုံးသွားခဲ့သည်။

သံချပ်ကာနည်းပညာမှလွဲ၍ ကြီးမားသောစက်မှုလက်နက်များ၊ မော်တော်ယဉ်များနှင့် အပေါ့စားအာကာသယာဉ်များ ရှိသေးသည်။

စက်ယန္တရားများ အားလုံး အစီအရီ ရှိနေကြပြီး ဟန်ရှောင်း၏ မျက်လုံးများ တောက်ပလာသည်၊ ဤနေရာကို သူ မျှော်လင့်နေခြင်းဖြစ်သည်။ စစ်မှန်သော နည်းပညာတိုးတက်မှုဆီသို့ ဦးတည်သော လူမှုအဖွဲ့အစည်းသည် ယန္တရားပညာရှင် အတန်းအစားအတွက် အကောင်းဆုံးအခြေခံအုတ်မြစ်ဖြစ်ပြီး ၎င်းသည် ဆူနီဂြိုလ်သို့ သူလာရောက်လိုသည့် အကြောင်းရင်းတစ်ခုဖြစ်သည်။ ဆူနီ၏ နည်းပညာအဆင့်သည် ဟန်ရှောင်းအတွက် ကြီးမားသောအကျိုးကျေးဇူးများကို ယူဆောင်လာနိုင်သည်။

ဟန်ရှောင်းသည် ဆူနီ၏ စက်ယန္တရားများနှင့် ပတ်သက်သည့် အတန်းအစားခွဲကြောင့်လည်း ဆွဲဆောင်ခံခဲ့ရသည်။ ၎င်းသည် ဟန်ရှောင်း၏ ပင်မအတန်းအစား၏ တိုးတက်မှုကို သိသိသာသာတိုးတက်စေနိုင်သော ရှားပါးအတန်းအစားခွဲတစ်ခုဖြစ်သည်။ ဟန်ရှောင်းအတွက်တော့ ဒါက သူ့အတန်းအစား ပြီးမြောက်စေရန် အကောင်းဆုံးရွေးချယ်မှုပင်။

ကစားသမားများကလည်း သူတို့ပတ်ဝန်းကျင်က မြင်ကွင်းများကို ကြည့်နေကြတယ်။ ဟန်ရှောင်းသည် ဆူနီ၏ အဖြစ်ဆိုးကို ၎င်းတို့အား ပြောပြခဲ့သဖြင့် ၎င်းတို့သည် ပျက်စီးခါနီးနေသည့် ယဉ်ကျေးမှုတစ်ခုဟု ထင်မှတ်ခဲ့ကြသည်။ ညံ့ဖျင်းသော အခြေအနေများနှင့် နောက်ကျကျန်နေသည့် နည်းပညာမှလွဲ၍ ဘာကိုမျှ မမျှော်လင့်ခဲ့ကြသော်လည်း ဤသံမဏိသစ်တော၏ မြင်ကွင်းက ၎င်းတို့မှားကြောင်း သက်သေပြခဲ့သည်။

ဒေါင် ဒေါင် ဒေါင် !

သံချပ်ကာတပ်ထားသော စစ်သားတစ်ဦးသည် အဖွဲ့ဆီသို့ ချဉ်းကပ်လာစဉ် လေးလံသောသတ္တုသံများ ကျယ်လောင်လာသည်။ သူ့ချပ်ဝတ်က သာမန်တပ်သားများထက် ပိုကောင်း၏။ ၎င်းကို အနီရောင်နှင့် အဖြူဖြင့် ဖုံးအုပ်ထားပြီး ၎င်းသည် တပ်ကြပ်အတန်းအစား သံချပ်ကာဖြစ်ကြောင်း သင်္ကေတဖြစ်သည်။ အနီးသို့ ချဉ်းကပ်လာသူ ဆူနီသည် အရာရှိတစ်ဦးဖြစ်ပုံရပြီး သူ၏မျက်နှာမှာ အေးစက်နေသည်။ ထိုလူက စစ်သားတစ်ဦး၏ အငွေ့အသက်ကို ထုတ်လွှတ်နေ၏

“ကျွန်တော်က B12 ကာကွယ်ရေးအဖွဲ့ ကပ္ပတိန် နဗီးလ်ပါ။ မင်းတို့ရဲ့အချက်အလက်တွေကို ငါဖတ်ပြီးပြီ။ ဘလက်စတား၊ မင်းတို့က ငါတို့နှင့်ပူးပေါင်းတဲ့ ၁,၄၃၂ ခုမြောက် ကြေးစားစစ်သားအဖွဲ့ ဖြစ်လာလိမ့်မည်။ ဆူနီလူမျိုးများကို ကိုယ်စားပြုပြီး ကျွန်တော်တို့ရဲ့ကမ္ဘာက ကြိုဆိုပါတယ်။ ကပ်ဘေးက မစသေးတဲ့အတွက် ကျေးဇူးပြုပြီး ကြေးစားစစ်သား အနားယူရာနေရာကို လိုက်ခဲ့ပါ။ ပြီးရင် မင်းတို့ကို သီးခြားမစ်ရှင်တစ်ခု ပေးမယ်။"

စာစဉ် (၂၃)၊ အခန်း (၃၃၆) ပြီး၏။

လင်းဆက်

+++++