ဆုကြေးငွေ ပေးချေခြင်း

ကွဲထွက်မှုမှာ သေချာနေသည်။ လွတ်လပ်ရေးပါတီက ထွက်ခွာဖို့ စိတ်ပိုင်းဖြတ်ထား၏။ ဂါးဒီးယန်းအဖွဲ့က တုန်လှုပ်ခြောက်ခြားကာ ဒေါသထွက်နေမှန်း နားလည်နိုင်၏။ သူတို့သည် မျိုးနွယ်စုကို အတူတကွ ခုခံကာကွယ်ပေးနိုင်ခဲ့သော်လည်း အခုချိန်မှာတော့ သူတို့ကို သစ္စာဖောက်ပြီး ထွက်ခွာသွားသူတွေ ရှိနေပြီ ဖြစ်သည်။ ထို့အပြင် ၎င်းတို့သည် တစ်ချိန်က ကာကွယ်ထားခဲ့သော အရာများကို ပြင်းထန်စွာ ရိုက်ချိုးပစ်ခဲ့သည်။ ဂါးဒီးယန်းအဖွဲ့က ခံစားချက်ပြင်းထန်နေပြီး စစ်ပြေးတွေကို အသံကျယ်ကျယ်နဲ့ မေးခွန်းထုတ်နေကြတယ်။

"မင်းလည်း ဆူနီတစ်ယောက်ပဲ။ အန္တရာယ်က တစ်ဘက်စွန်းမှာ ရှိနေတုန်းပဲ၊ မင်းက ကိုယ့်လူမျိုးကို ဘယ်လို စွန့်လွှတ်နိုင်တာလဲ။”

ဖာနာစ်သည် ထုတ်ဖော်ပြောဆိုခြင်း မရှိခဲ့ပေ။ “ငါမွေးကတည်းက ဆုံးဖြတ်ထားတဲ့ ငါ့လူမျိုး၊ ငါ့ရုပ်ရည်၊ ငါ့ဘဝပုံစံတွေက ငါ့ရဲ့စိတ်နေသဘောထားနဲ့ ငါမြင်တဲ့ရှုထောင့်ကို ဆုံးဖြတ်လို့မရဘူး။ ငါအများကြီး ပံ့ပိုးကူညီထားပြီးပြီ၊ အခု ငါ ဘဝအသစ်ကို လိုချင်တယ်”

ဂါးဒီးယန်းအဖွဲ့က သူတို့ကို မေးခွန်းထုတ်ချင်နေသေးပေမယ့် လွတ်လပ်ရေးအဖွဲ့ရဲ့ မျက်နှာတွေမှာ ဝမ်းနည်းမှု သို့မဟုတ် ရှက်ရွံ့မှု အရိပ်အယောင် လုံးဝမရှိတာကို သူတို့တွေ့လိုက်ရသည်။ ပြောစရာ စကားမရှိတော့ဘဲ စွပ်စွဲပြောဆိုသံတွေက လည်ချောင်းထဲတွင် ကြပ်ခဲနေ၏။ သူတို့ရင်ဆိုင်နေရသော လူများသည် တစ်ချိန်က သူတို့နဲ့အတူ တိုက်ပွဲဝင်ခဲ့ကြတဲ့ ညီအစ်ကိုများပင်။ သူတို့အားလုံးသည် ချွေးများ သွေးများ ရွှဲစိုခဲ့ပြီးဖြစ်သည်၊ ရန်သူများမဟုတ်ကြပေ၊ မတူညီသောလမ်းကို လျှောက်လှမ်းနေကြသော ရဲဘော်များသာဖြစ်သည်။ လွတ်လပ်ရေးပါတီကို အပြစ်တင်နိုင်သော အနေအထားတွင် မရှိနေကြပေ - လူတိုင်းတွင် သူတို့၏ လိုအင်ဆန္ဒများ ရှိနေကြ၏။

ဖာနာစ်သည် သူ့လမ်းကြောင်းရှိ လူများကို တွန်းဖယ်လိုက်ပြီး လွတ်လပ်ရေး အဖွဲ့ သည် လမ်းလျှောက်ထွက်သွားကြသည်။ ဆူနီစစ်သားများနှင့် ဂါးဒီးယန်းအဖွဲ့ဝင်များသည် ၎င်းတို့၏ နောက်ကျောများကိုသာ တိတ်တဆိတ် စိုက်ကြည့်နေကြသည်။

ဒီတစ်ကြိမ်မှာတော့ ဆူနီတိုင်းသည် မှောင်မိုက်ပြီး မည်းမှောင်နေသော အနာဂတ်ကို မြင်နေပုံရသည်ယ်။ တိုးတိုးတိတ်တိတ်နှင့် ငိုကြွေးသံက သေခြင်းတရားကိုတောင် မကြောက်သည့် စစ်သည်တွေတောင် မျက်ရည်ယိုစီးကျကုန်၏။ ဤသည်မှာ သူတို့၏စိတ်နှလုံးထဲရှိ ဝိညာဉ်ရေးမဏ္ဍိုင် ပြိုကျခြင်းဖြစ်သည်။ ဤနှစ်များအတွင်း၊ မျိုးနွယ်စုကို စောင့်ကြပ်နေသော စူပါများသည် ဆူနီများအတွက် ဝိညာဉ်ရေးဆိုင်ရာ တွန်းအားများနှင့် လှုံ့ဆော်မှုများ ဖြစ်လာခဲ့သည်။

တစ်ခါတစ်ရံတွင်၊ ဝိညာဉ်ရေးမဏ္ဍိုင်ပြိုကျခြင်းသည် အုပ်စုတစ်စုအတွက် အပြင်ပိုင်းဘေးဒုက္ခထက်ပင် ပိုမိုပြင်းထန်စွာ ထိုးနှက်နိုင်သည်။

ဟန်ရှောင်း ခေါင်းခါလိုက်သည်။ ဘေးဥပဒ်ပြီးနောက် ဆူနီသည် ရုန်းကုန်နေရသော မသန်စွမ်းသူနှင့်တူပြီး သူ့ခန္ဓာကိုယ်တွင် ဆုံးရှုံးသွားသော အစိတ်အပိုင်းများသည် သူ့ကို မကျရှုံးစေပေ။ သူတို့သည် ရှေ့ဆက်လျှောက်ဖို့ စိတ်ပိုင်းဖြတ်ထားပြီး တွန်းအားများ ရှိနေသေး၏၊ သူ့စိတ်က ကျန်းမာနေသေးသည်။ သို့သော် ယုံကြည်မှုများ ပြိုကျလာသောအခါ သူ့စိတ်ထဲမှာလည်း မသန်မစွမ်း ဖြစ်သွားပြီး ရှေ့ဆက်လျှောက်ဖို့ ခွန်အားများ ဆုံးရှုံးသွားတော့သည်။

ထို့ကြောင့် မျိုးနွယ်စုတွင် ခွဲထွက်ခြင်း၏ အကျိုးသက်ရောက်မှုသည် စူပါများ အရေအတွက် ကျဆင်းခြင်းသာ မကပေ - ၎င်းသည် လူများ၏ စိတ်ဓာတ်နှင့် မျိုးနွယ်စု၏ အကြမ်းခံသော အရည်အသွေးတို့ကို နက်ရှိုင်းစွာ သက်ရောက်မှု ဖြစ်စေသည်။

ဟားလပ်စ်သည် 'အဓိကဇာတ်ကောင်' ဖြစ်လာသည့်ပုံစံမှာ ဖာနာစ်နှင့် တစ်ချိန်က သူရဲကောင်းများဖြစ်ခဲ့ဖူးသည့် အခြားစူပါများ မှေးမှိန်သွားသောအခါ အကြီးအကဲများက သူ့ကို စံနမူနာအသစ်နှင့် စိတ်ပိုင်းဆိုင်ရာ လှုံ့ဆော်မှုအသစ်အဖြစ် သတ်မှတ်ပေးလိုက်ကာ လူများကို မှီခိုထားနိုင်သူများ ရှိနေသေးကြောင်း အဓိပ္ပါယ်ဆောင်စေသည်။

သူ၏ ယခင်ဘဝတွင်၊ ဟားလပ်စ်၏ အနာဂတ်နေရာသည် ဖာနာစ်၏ ယခင်နေရာကိုပင် ကျော်လွန်ခဲ့သည်။ အကယ်၍ ဖာနာစ်သည် ကြင်နာမှုနှင့် စိတ်အားထက်သန်မှုမှ ပင်ပန်းခြင်းနှင့် အေးစက်ခြင်းသို့ ပြောင်းလဲခြင်း၏ ကိုယ်စားလှယ်ဖြစ်ပြီး လာဒန်သည် သူ၏အပြစ်များကို ရွေးနှုတ်ခြင်း၏ ကိုယ်စားလှယ်ဖြစ်ခဲ့ပါက၊ ဟားလပ်စ်သည် ယခင်က အမှန်တရားကို ရှောင်ရှားခဲ့ဖူးပြီး သူ၏တာဝန်ဝတ္တရားများ နိုးကြားလာသော ကိုယ်စားလှယ်ဖြစ်လာမည်ဖြစ်သည်။ ဆူနီတို့သည် ဘေးဥပဒ်ကို ဖြတ်ကျော်ပြီးနောက်၊ လူမျိုးစု၏ သဘောထားသည် သွေးပူခြင်းမှ ဥပေက္ခာပြုခြင်းသို့ ဆက်ကာဆက်ကာ ပြောင်းလဲသွားပြီးနောက် ဥပေက္ခာပြုခြင်းမှ ခိုင်မာသော ယုံကြည်မှုကို တွေ့ရှိခဲ့ကြသည်။ ကွဲထွက်စဉ်အတွင်း ယုံကြည်ချက်က ပြိုပျက်သွားပြီး ဟားလပ်စ်၏ ပေါ်ထွက်လာမှုသည် အပျက်အစီးများအတွင်း ယုံကြည်ချက်အသစ်တစ်ခုကို တည်ဆောက်နေခဲ့ပြီး ဤမျိုးနွယ်စုကို အရည်အသွေးသစ်တစ်ခု ဖြစ်စေခဲ့သည်။ သူ၏ အတွေ့အကြုံနှင့် လုပ်ဆောင်ချက်များသည် လမ်းပျောက်နေသော မျိုးနွယ်စု၏ စိတ်ပိုင်းဖြတ်မှုကို ပြန်လည်ရရှိစေသော အကြောင်းပြချက်ဖြစ်စေကာ၊ နာကျင်မှုနှင့် ခက်ခဲမှုများတွင် တုံ့ဆိုင်းသွားသော်လည်း ရှေ့သို့ ချီတက်နိုင်နေဆဲဖြစ်သည်။ သူ့စိတ်ထဲရှိ ဝိရောဓိသည် လူမျိုးစုတစ်ခုလုံး၏ စိတ်အခြေအနေကိုလည်း ရောင်ပြန်ဟပ်နေ၏။

ဝေးလံသောနေရာတွင်ရှိသော ‌ရေပင်လယ်ဂြိုလ်ရှိ ခိုလှုံရေးစခန်းများကို တည်ဆောက်နေသော ဟိုးရှေးရှေးကတည်းက ခိုင်မာသော ယုံကြည်ချက်တစ်ခုကို ဖော်ထုတ်ခဲ့သည့် ဘန်းနက်နှင့် မတူဘဲ ဟားလပ်စ်သည် ယုံကြည်ချက် တည်ဆောက်နေဆဲ ဇာတ်ကောင်တစ်ဦးဖြစ်သည်။

ဒီအရာအားလုံးကို လျှောက်လှမ်းခဲ့သော သူ့အရင်ဘဝကလမ်းကို စဉ်းစားရင်း ယန္တရားပညာရှင်ကြီးဟန်က သက်ပြင်းချလိုက်သည်။ ဝမ်းနည်းစရာကောင်းသည်မှာ ရေသည် လှေတစ်စင်းကို သယ်ဆောင်နိုင်သော်လည်း နစ်မြုပ်သွားစေနိုင်သည်။ ဟားလပ်စ်သည် တိုက်ပွဲတွင် သေဆုံးသွားသောအခါ ဆူနီတို့သည် ရုန်းကန်မှုကို စွန့်လွှတ်ပြီး ဂိုဒိုရာ၏ လက်ထဲသို့ ခုန်ဆင်းသွားကြတော့သည်။

…

လွတ်လပ်ရေးအဖွဲ့သည် ကာကွယ်ရေးစက်ဝိုင်းမှ ထွက်ခွာလာပြီး တောထဲသို့ ဝင်ရောက်သွားသည်။ သူတို့သည် နေရာတစ်ခုရှာပြီး ကြယ်စင်စု ခရီးသွားအေဂျင်စီကို ဆက်သွယ်ကာ ဘယ်တော့မှ ပြန်မလာတော့ဖို့ စီစဉ်ထားကြသည်။ ရုတ်တရက်၊ လူတစ်ဦး ပေါ်လာသည် - ၎င်းသည် လျှို့ဝှက်ဆန်းကြယ်သော သံချပ်ကာ စစ်သည်တော်ဖြစ်သည်။

ဖာနာစ်နဲ့ တခြားလူတွေက သူတို့၏ ခြေလှမ်းများကို ရပ်တန့်လိုက်ကြသည်။

ဟားလပ်စ်က သူ့ခမောက်ကို ချွတ်လိုက်ပြီး “ဘာလို့လဲ? မျိုးနွယ်ကို ကာကွယ်ဖို့၊ ငါ့ကို မင်းနေရာမှာ အစားထိုးချင်တာကြောင့် မထွက်သွားခင် မင်းငါ့ကို ရှာခဲ့တယ်၊ ဒါပေမယ့် အခု မင်းလုပ်နေတာက မျိုးနွယ်ရဲ့ ယုံကြည်မှုကို ဖျက်ဆီးနေတာပဲ…”

ဖာနာစ်က သူ့ကို အေးစက်စက်ကြည့်ပြီး ခေါင်းခါလိုက်ကာ "ငါမထွက်သွားရင် မင်းငါ့ကို ဘယ်လိုအစားထိုးမလဲ။"

ဟားလပ်စ်၏ မျက်လုံးများတွင် ဒေါသ ပေါ်လာသည်။ "ဒီလို ပျင်းစရာကောင်းတဲ့ အကြောင်းပြချက်ကြောင့်လား?"

“တကယ်တော့ မင်းကို ငါတကယ်မုန်းတီးတယ်။ မင်းမှာ ဒီလို ပြင်းထန်တဲ့ စွမ်းအားတွေ ရှိပေမယ့် နောက်တန်းမှာ ကောင်းကောင်းနေနေရတယ်။ မင်းငါ့ကို နှိမ့်ချပြီးပြောဖို့ ဘာအခြေအနေမှ မရှိဘူး" ဖာနာစ်၏ အမူအရာမှာ ဘာမှမပြောင်းလဲသွားပေ။ “အခု မင်းရဲ့ ခွန်အားကို ပြသပြီး မင်းရဲ့ ချပ်ဝတ်တန်ဆာကို ဖော်ထုတ်လိုက်ပြီ။ မျိုးနွယ်စုက သူတို့ရဲ့ အစွမ်းအစတွေ အကုန်သုံးပြီး မင်းကို လိုက်ရှာလိမ့်မယ် - မင်း နောက်ပြန်ဆုတ်လို့ မရတော့ဘူး။”

ဟားလပ်စ် ရုတ်တရက် သဘောပေါက်သွားသည်။ "မင်းရဲ့အစီအစဥ်အတွက် ငါ့ကိုအသုံးချခဲ့တာပဲ..."

"ကိုယ့်ကိုကိုယ် သိပ်အထင်ကြီးမနေနဲ့!" ဖာနာစ်၏ အေးအေးစက်စက် ပြောနေစဉ် မျက်လုံးများက တည်ငြိမ်နေ၏။ “လူတိုင်းက အများကြီး တွေ့ကြုံဖူးကြပြီးပြီ။ မင်းလို အသေးအဖွဲ ဇာတ်ကောင်ကြောင့် ငါတို့ ဘာကြောင့် စိတ်ပြောင်းသွားရမှာလဲ။ နေဖို့ဆုံးဖြတ်ထားတဲ့ ညီအစ်ကိုတွေလိုပဲ၊ ငါတို့ကလည်း ကိုယ်ပိုင်အကျိုးအတွက် ထွက်သွားတာ။ ခွဲထွက်သွားတာက အပျက်သဘောဆောင်တဲ့ အကျိုးသက်ရောက်မှုတွေ ဖြစ်စေပေမယ့်လည်း မျိုးနွယ်စုကို ကာကွယ်မယ်ဆိုတဲ့ သူတို့ရဲ့ မိုက်မဲတဲ့ ဆုံးဖြတ်ချက်က ယိမ်းယိုင်သွားမှာ မဟုတ်ဘူး။

“ကျွန်တော် ဒီလိုပဲပြောမယ် - အသက်ရှင်နေဖို့က အရေးကြီးတယ်။ ကျွန်တော်က မျိုးနွယ်စုတစ်ခုလုံးကို ဒီလို ကြီးကြီးမားမား မျှော်လင့်ချက် မထားစေချင်ဘူး။ ဒီလို အဓိပ္ပါယ်မဲ့ရုန်းကန်မှုက အဆုံးသတ်သွားရလိမ့်မယ် - ဂိုဒိုရာဆီက အကူအညီကို လိုလိုလားလားလက်ခံလိုက်ရင် ဘယ်သူမှ သွေးထွက်သံယို တိုက်ခိုက်နေစရာ မလိုတော့ဘူးလေ။ ဆူနီတွေအားလုံးက ငြိမ်းချမ်းပြီး တည်ငြိမ်တဲ့ ဘဝတစ်ခုကို ရလာလိမ့်မည်... ဒီလမ်းကြောင်းက မျိုးနွယ်စုကို ကာကွယ်ဖို့ စစ်မှန်တဲ့နည်းလမ်းပဲ။"

ဟားလပ်စ်က သူ့ပါးစပ်ကို ဖွင့်လိုက်သော်လည်း ဟန်ရှောင်းရဲ့ မျက်နှာက သူ့စိတ်ထဲမှာ ပြန်ပေါ်လာသည်။ သူသည် အကူအညီကို လက်ခံမည့် အနာဂတ်အကြောင်း ဖာနာစ်ကို တစ်ကြိမ်ပြောခဲ့ဖူးသော်လည်း ဖာနာစ်သည် သူ၏အမြင်ကို ဆုပ်ကိုင်ထားပြီး လုံးဝမတုန်လှုပ်ခဲ့ပေ။ သူက ကြိုမြင်မှုမှာ မှားယွင်းနေသည်ဟု ထင်နေသည်။

ပြောစရာမရှိသည့်နောက် လွတ်လပ်ရေးအဖွဲ့က ထွက်ခွါသွားတယ်။

ဟားလပ်စ်သည် အချိန်အတော်ကြာအောင် တုံ့ဆိုင်းသွားပြီးနောက် တဖြည်းဖြည်း စိတ်ကို ထိန်းလိုက်သည်။ သူသည် သစ်တောမှထွက်ကာ ကာကွယ်ရေးစက်ဝိုင်းဆီသို့ ခြေလှမ်းကြဲကြီးဖြင့် လျှောက်လှမ်းလာသည်။

ကွဲထွက်မှုကြောင့် စစ်တပ်မှာ ထိတ်လန့်တုန်လှုပ်နေဆဲပင်။ ဤလျှို့ဝှက်ဆန်းကြယ်သော သံချပ်ကာ စစ်သည်တော် ပေါ်လာသည်ကို သတိပြုမိသောအခါတွင် ၎င်းတို့သည် ခဏတာ ထိတ်လန့်သွားပြီးနောက် အထက်အမိန့်ကို သတိရလိုက်ကြသည်။ သူတို့သည် သူတို့၏ စိတ်ခံစားမှုများကို ထိန်းချုပ်လိုက်ကြသည်၊ အမိန့်ကို ဦးစားပေးပြီး သူတို့၏ နှလုံးသားထဲရှိ ခံစားမှုများကို ဖိနှိပ်ကာ ထိုလူအား ဝန်းရံလိုက်ကြသည်။

မရေမတွက်နိုင်သော စစ်သားများရှေ့တွင်၊ ဟားလပ်စ်သည် သူ၏ခမောက်ကို ဖြည်းညှင်းစွာ ချွတ်ကာ ရုပ်ပိုင်းဆိုင်ရာရော စိတ်ပိုင်းဆိုင်ရာပါ ပင်ပန်းနွမ်းနယ်နေသော ပတ်ပတ်လည်ကို တစ်ချက်ကြည့်လိုက်ကာ အသက်ပြင်းပြင်းရှူလိုက်သည်။ “ငါ့နာမည်က ဟားလပ်စ်…”

…

ဆူနီမျိုးနွယ်စု တစ်ခုလုံးအတွက်၊ ဤကပ်ဆိုးကြီးသည် အလှည့်အပြောင်းများနှင့် ပြည့်နှက်နေသည်။ တိုက်ပွဲအပြီးတွင် ကာကွယ်စောင့်ရှောက်သူများသည် လမ်းခွဲခဲ့ကြသော်လည်း ဟားလပ်စ်ဟုခေါ်သော လျှို့ဝှက်အဆင့် B စူပါတစ်ယောက်သည် မျိုးနွယ်စုကိုကာကွယ်ရန် ရှေ့ထွက်လာသောအခါ ဒဏ္ဍာရီလာ တပ်မှူးအဆင့် သံချပ်ကာသည် တစ်ဖန်ပေါ်ထွက်လာ၏။ သူ၏ အခန်းကဏ္ဍအသစ်တွင် ရက်အနည်းငယ်ကြာပြီးနောက် မီဒီယာများသည် ဟားလပ်စ်၏ အတွေ့အကြုံကို နေရာအနှံ့ဖြန့်ကျက်ကာ လိုအပ်နေသည့်အချိန်တွင် ရှေ့ထွက်လာသော သူရဲကောင်းတစ်ဦးအဖြစ် သူ့ကိုတည်ဆောက်ခဲ့သည်။ မျိုးနွယ်စုသည် တစ်နေ့တွင် တပ်မှူးအဆင့် သံချပ်ကာနည်းပညာကို ပြန်လည်ရရှိမည်ဟု မျှော်လင့်ပြီး သုတေသနဓာတ်ခွဲခန်းသည် တပ်မှူးအဆင့် သံချပ်ကာကို လက်ခံရရှိပြီးနောက် ရန်ပုံငွေပိုမိုရရှိလိမ့်မည်ဟုလည်း သတင်းတင်ပြထားသည်။ ထို့ကြောင့်၊ ဟားလပ်စ်နှင့် ၎င်းတို့၏ အနာဂတ်အစီအစဉ်များကို အသုံးပြုပြီး အစုလိုက်အပြုံလိုက် တပ်ပြေးခြင်း၏ အကျိုးသက်ရောက်မှုများကို ဆေးကြောနိုင်ခဲ့သည်။

စစ်တပ်နှင့် ခေါင်းဆောင်များသည် သတင်းဖြန့်ကျက်ရန် လက်တွဲလုပ်ဆောင်ခြင်းဖြင့် ဟားလပ်စ်၏ အမည်သည် နေရာတိုင်းတွင် လူသိများလာပြီး လူမျိုးစုအတွက် စံနမူနာအသစ်ဖြစ်လာသည်။

ဆူနီတို့သည် အလုပ်ခန့်ထားသော ဆုကြေးငွေများကို ပေးချေလိုက်ကြပြီးနောက် ကြေးစားသမားများသည် တစ်ယောက်ပြီး တစ်ယောက် ထွက်ခွာသွားကြသည်။ အတူတူ ယှဉ်တွဲ၍ တိုက်ခိုက်ကြချိန်တွင် ဟန်ရှောင်းသည် လူအများကြီးကို သိလာ၏။ သူတို့သည် အတော်လေး ကောင်းမွန်သော စကားဝိုင်းများ ရှိကြပြီး အခြားသော ကြေးစားစစ်သားများသည် ဆုံးရှုံးမှု လုံးဝမရှိခဲ့သည့် ဘလက်စတား ကြေးစားတပ်ဖွဲ့အပေါ် အလွန် ကောင်းမွန်သော အထင်အမြင် ရှိခဲ့ကြသည်။

ကြေးစားစစ်သားများသည် လုပ်ငန်းတစ်ခုတည်းရှိ လူများကို သိလိုကြသည်။ နောက်ဆုံးတွင် သူတို့သည် တစ်နေ့မှာ တစ်ယောက်နဲ့တစ်ယောက် ယှဉ်တွဲ၍ တိုက်ခိုက်ရန် ဖြစ်လာနိုင်သည်။

ကစားသမားများ ပြန်လာကြပြီး ဆူနီစစ်တပ်မှ ဘလက်စတား ကြေးစားတပ်ဖွဲ့အား ဆုကြေးငွေ မပေးအပ်မီ ၎င်းတို့၏ ကျေးဇူးတင်စကား ပြောကြားခဲ့သေးသည်။ ကစားသမားတိုင်းသည် ၁၂,၀၀၀ အီနက်စ်ကို လက်ခံရရှိခဲ့ပြီး၊ ဤသည်မှာ ၎င်းတို့၏ ဝယ်ယူမှုစွမ်းအားကို တိုးမြင့်လာစေသည်။ ခေါင်းဆောင်အနေဖြင့် ဟန်ရှောင်းသည် အလားတူပမာဏကို ရရှိခဲ့ပြီး စစ်မြေပြင် ပြုပြင်ရေး အလုပ်နှင့်အတူ၊ ယန္တရားပညာရှင်ကြီးဟန်သည် ယခုတစ်ကြိမ်တွင် အမျိုးအစားရာထူးတက်ခြင်း အသိပညာကို ဝယ်ယူရန် လုံလောက်သော ၁၆,၀၀၀ အီနက်စ်ကို ရရှိသွားသည်။

စာစဉ် (၂၄)၊ အခန်း (၃၅၁) ပြီး၏။

လင်းဆက်

+++++