လူတစ်ယောက်ကို ခိုးယူခြင်း

ဟားလပ်စ်သည် သံသယများဖြင့် ပြည့်နှက်နေသည်။ သူတစ်ခုခု ပြောတော့မည်ပြုစဉ် ဟန်ရှောင်းက အရင်ပြောလိုက်သည်။

"ခပ်မြန်မြန်ကြီး ယူဆချက်တစ်ခုခု မလုပ်ပါနဲ့။ မကြာသေးမီက၊ ငါသည် ကြိုမြင်သူဖြစ်ကြောင်း မင်း မယုံခဲ့ဘူး။ မင်းစိတ်မပြောင်းခဲ့ဘူးဆိုရင် ဒီအစည်းအဝေးက ဖြစ်မလာဘူး။ မင်း အခုချက်ချင်း ယုံဖို့ မလိုပါဘူး၊ ဒါပေမယ့် မင်းကို လိမ်ဖို့ အကြောင်းပြချက် တစ်ခုခုရှိလား စဉ်းစားကြည့်။ ဆူနီတွေက ငါ့ကို ဘာအကျိုးကျေးဇူးမှ မပေးထားဘူး ၊ ငါပြောခဲ့တာတွေက မမှန်ရင်တောင် မင်းလူတွေ ဆုံးရှုံးမှာ မဟုတ်ဘူး။”

"မှန်ပါတယ်။" ဟားလပ်စ်ခေါင်းညိတ်ပြီး သဘောတူလိုက်သည်။ ဟန်ရှောင်းလိမ်နေရင်တောင် သူ့မျိုးနွယ်က လက်ရှိအခြေအနေကို ထိန်းထားနိုင်လိမ့်မည်။ ဟန်ရှောင်းပြောတဲ့စကားက အမှန်ပါပဲ - တကယ်လို့ သူတို့မှာ အကူအညီတွေ အများကြီးရခဲ့ရင်၊ ကပ်ဘေးအတွင်းမှာ သူတို့ရဲ့ ဆုံးရှုံးမှုတွေ သိသိသာသာ လျော့ကျသွားပြီး သူတို့ ပိုမြန်မြန်ဆန်ဆန် တိုးတက်နိုင်လိမ့်မည်ဟု ဟားလပ်စ်က အမှန်တကယ် ဆန္ဒရှိနေသည်။

အမှောင်ကြယ်မှ ခြိမ်းခြောက်မှု ရှိလာသော်လည်း ဆူနီလူမှုအဖွဲ့အစည်းသည် ၎င်းတို့အတွက် အသေးအဖွဲလေးမျှသာ ဖြစ်သည်။ နှိမ်နှိမ်ချချနေသရွေ့ အန္တရာယ်များနှင့် ပြည့်နှက်နေသော ပတ်ဝန်းကျင်မှာ ပိုသန်မာလာနိုင်၏။

လေးနက်တည်ကြည်သော မျက်နှာဖြင့် ဟားလပ်စ်က တိုးညှင်းသောလေသံဖြင့် “မင်းသာ ဒီအခက်အခဲတွေကို ကျော်လွှားနိုင်အောင် ကူညီပေးနိုင်ရင် ဆူနီဟာ မင်းရဲ့ အခိုင်မာဆုံး မဟာမိတ်ဖြစ်လိမ့်မယ်။ မျိုးနွယ်စုတစ်ခုလုံးအတွက် ကျွန်တော် မဆုံးဖြတ်နိုင်ပေမယ့် ခေါင်းဆောင်တွေက တူညီတဲ့ ဆုံးဖြတ်ချက်ကို ချမှတ်လိမ့်မယ်လို့ ယုံကြည်တယ်။ ငါတို့ ဆူနီတွေရဲ့ ဆုံးဖြတ်ချက်နဲ့ အရည်အသွေးကို ယုံကြည်ပါ။"

"သေချာတာပေါ့၊ ငါဒါကို ဘယ်တော့မှ သံသယမ၀င်ဘူး။" ဟန်ရှောင်း၏ ချီးကျူးစကားကြောင့် ဟားလပ်စ်သည် အလွန်ဝမ်းသာသွားသည်။

"မင်းရဲ့ သဘောထားနဲ့ ပတ်သက်ပြီး ငါ အထက်လူကြီးတွေကို ချက်ခြင်း တင်ပြမယ်..."

ဟန်ရှောင်းက လက်ကို ဝှေ့ယမ်းပြီး ပြောသည်။ “မင်း မပြောသေးဖို့ အကြံပေးချင်တယ်။ ရုတ်တရက် အံ့သြအောင်လုပ်တာက ပင်ပန်းတကြီး စောင့်ဆိုင်းရတာထက် ပိုကောင်းပါတယ်။ ပြီးတော့၊ မင်းရဲ့စကားတစ်ခုတည်းက မင်းရဲ့အထက်လူကြီးတွေကို ငါဟာ ကြိုမြင်သူတစ်ယောက်လို့ ယုံကြည်ဖို့ မလုံလောက်ဘူး။"

ဟားလပ်စ်သည် ခဏမျှ အံ့အားသင့်သွားပြီး “ဒါအမှန်ပဲ…” သူက တွေးမိကာ ပြောလိုက်သည်။

"ငါသာမှန်တယ်ထင်ရင်၊ တခြားစူပါတွေလိုပဲ မင်းက ကြေးစားတစ်ယောက်ဖြစ်လာဖို့ နဂါးငွေ့တန်းဆီ သွားမှာမဟုတ်လား" ဟန်ရှောင်းက ပြောသည်။

"ဟုတ်တယ်၊ ငါဒီမှာနေတာကြာနေပြီ။ အပြင်ထွက်ပြီး ထောက်ပံ့ပေးဖို့ အချိန်တန်ပြီ။ ငါနှစ်ရက်နေရင် ထွက်သွားမှာ" ဟားလပ်စ်က ခေါင်းညိတ်လိုက်သည်။ သူသည် အလွန်သန်မာသော်လည်း နဂါးငွေ့တန်းကို တစ်ယောက်တည်း မစူးစမ်းဖူးပေ။

ဟန်ရှောင်း၏ မျက်လုံးများ တောက်ပလာပြီး သူ ပြုံးလိုက်သည် ။

"ငါတို့ သဘောတူညီချက် ရပြီးပြီဆိုတော့ မင်း ငါ့ရဲ့ ကြေးစားအဖွဲ့မှာ ဝင်ပြီး ငါ့ရဲ့ အပေါင်းအသင်းဖြစ်လာရင် ဘယ်လိုလဲ။"

ဤအခိုက်အတန့်တွင်၊ ဟန်ရှောင်းသည် လူဖီ၏ဝိညာဉ်တော်မှ ကောင်းချီးပေးခံရသည်ဟု ခံစားရသည်။ သူ့နောက်က နေရောင်၊ ဆန့်တန်းထားသော လက်နှစ်ဖက်နှင့် သွေးပူစရာ နောက်ခံတေးဂီတတို့ ပေါင်းစပ်လိုက်လျှင် အလွန်ကြီးကျယ်သော [+၁၀၀% လူသူစုဆောင်းခြင်း အောင်မြင်မှု] ကို ဖြစ်ပေါ်စေသည်ဟု သူခံစားမိသည်။

“မင်းရဲ့ ဘလက်စတား ကြေးစားတပ်ဖွဲ့ထဲ ဝင်ဖို့…” ဟားလပ်စ်သည် သွေးဆောင်ခံလိုက်ရသည်။ သူက ဘာပဲဖြစ်ဖြစ် ကြေးစားစစ်သားတစ်ယောက် ဖြစ်လာတော့မှာ ဖြစ်ပြီး အဖွဲ့တွေဖွဲ့ပြီး အလုပ်လုပ်တာက ပိုအားကောင်းသည့် စွမ်းအားကို ဆိုလိုသည်သာမကဘဲ၊ ဟန်ရှောင်း၏လုပ်ရပ်တွေကို မျက်မြင်တွေ့နိုင်ပြီး သူပြောခဲ့တာတွေ မှန်လား မမှန်ဘူးလားဆိုတာကို သေချာအောင် ရေရှည်ဆက်ဆံနိုင်သည်။

ဟန်ရှောင်းက ဆူနီကို ကူညီရာမှာ စိတ်ရင်းမှန်ထားလျှင်၊ သူက သူ့ကို ပြန်ကူညီနိုင်ပြီး သူ့မိခင်ဂြိုဟ်ကို ကယ်တင်ရန်အတွက် ဟန်ရှောင်းကို ကူညီဖို့ အခွင့်အရေးရှိလာလိမ့်မည်။ ထို့အပြင်၊ ၎င်းတို့နှစ်ဦးသည် အမှောင်ကြယ်ကို မည်သို့တိုက်ဖျက်ရန်နှင့် ၎င်းတို့၏အစီအစဉ်ကို မြှင့်တင်ရန် အသေးစိတ်ဆွေးနွေးမှုများ ပြုလုပ်နိုင်သည်။ တကယ်ကို အဆင်ပြေပါလိမ့်မည်။

ထို့အပြင် ဟန်ရှောင်းသည် ဆူနီအတွက် အလွန်အရေးကြီးသည်။ မတော်တဆမှု ဖြစ်မလာနိုင်အောင် သူတို့ အတူတူ တွဲလုပ်ရင် သူ့ကို ကာကွယ်နိုင်လိမ့်မည်။ ဟားလပ်စ်၏ မျက်လုံးထဲတွင် ဟန်ရှောင်း၏ ခွန်အားသည် လုံးဝ အားကောင်းသည်ဟု မယူဆပေ၊ အကောင်းဆုံးမှာ အလယ်အလတ်အဆင့်မျှသာ ဖြစ်သည်။

သူက ကျွန်တော့်ထက် တစ်ဆင့်နိမ့်တာမို့ ကြေးစားစစ်သားဖြစ်ရတာ သူ့အတွက် အန္တရာယ်ရှိတယ်။ ငါ သူ့နောက်ကို လိုက်သွားမယ်ဆိုရင် မတော်တဆ မသေသွားအောင် ကာကွယ်ပေးနိုင်မယ်။

သေချာစဉ်းစားပြီးနောက်၊ ဟားလပ်စ်သည် ထိုသို့သော လုပ်ရပ်သည် အလွန်အကျိုးရှိသည်ဟု ခံစားမိသောကြောင့် ချက်ချင်းပင် သဘောတူလိုက်သည်။ "ကောင်းပြီ မင်းရဲ့ ကြေးစားအဖွဲ့နဲ့ ငါလိုက်မယ်"

ဟန်ရှောင်းက အေးအေးဆေးဆေး ခေါင်းညိတ်ပြသော်လည်း သူ့စိတ်ထဲတွင်တော့ အထိန်းအကွပ်မရှိ ရယ်မောနေလေသည်။

နောက်ဆုံးတော့! သူ့ကို ယုံကြည်အောင် ကြိုးပမ်းမှုတိုင်းသည် အလဟသ မဖြစ်ခဲ့ပေ။ ငါနောက်ဆုံးတော့ ဒီအဓိကဇာတ်ကောင်ကို ခိုးယူနိုင်သွားပြီ။

ဆူနီ၏ အဆက်အသွယ်ဖြစ်သူအပြင် ဟားလပ်စ်သည် ကြေးစားအဖွဲ့၏ ကွန်ပျူတာဇာတ်ကောင် ကေဒါလည်း ဖြစ်လိမ့်မည်။ သူသည် အဆင့်မြင့် တိုက်ခိုက်ရေး စွမ်းအား ဖြစ်သည် ။

ဤအလုပ်သည် ကြီးမားသော အကျိုးကျေးဇူးများကို ရရှိစေခဲ့သည်။

ဟန်ရှောင်းအကြံပြုထားသည့်အတိုင်း ၎င်းတို့၏ စကားဝိုင်း အသေးစိတ်အချက်အလက်များကို အထက်လူကြီးများထံ အစီရင်ခံခြင်းမရှိပေ။ ဟားလပ်စ်မှလွဲ၍ ကျန်သည့် ဆူနီများ တစ်ယောက်မှ မသိကြပေ။

နှစ်ရက်အကြာတွင် သူတို့ခေါ်သော ကြယ်စင်စု ခရီးသွားအေဂျင်စီသည် ဆူနီဂြိုလ်သို့ရောက်ရှိလာသည်။ ဟန်ရှောင်းအား မျှော်လင့်တကြီးဖြင့် ကစားသမားအုပ်စုသည် အာကာသယာဉ်ပေါ်သို့ လိုက်ပါသွားကြသည်။ ရုတ်တရက် ပေါ့ပေါ့ပါးပါး အဝတ်အစားဝတ်ထားသော အရပ်ရှည်ရှည် ဆူနီတစ်ယောက် လမ်းလျှောက်လာ၏။ သစ်တောမြို့မှာ အကြာကြီးနေထိုင်ခဲ့ပြီး စစ်တပ်မှ ကြော်ငြာထားခဲ့သည်ကို မြင်ပြီးနောက်၊ သူတို့က ဟီးရိုးအဖြစ် သတ်မှတ်ထားကြသော ဟားလပ်စ်ဟူသော ဇာတ်ကောင်ကို ချက်ချင်း မျက်မှန်းတန်းမိကြသည်။

"မင်းရဲ့ ချပ်ဝတ်တန်ဆာက ဘယ်မှာလဲ"

“သုတေသနအဖွဲ့ကို ငှားထားတယ်။ သူတို့ ဒီဇိုင်းပုံစံကို ရလာတဲ့အခါမှ ပြန်ယူလို့ရမယ်ဆိုတော့ ဒီလက်နက်ကိုပဲ ယူခဲ့တာ…”

ဟားလပ်စ်ကလှည့်ပြီး သူ့နောက်ကျောတွင် ချည်ထားသော စတုဂံပုံသတ္ထုငွေတုံးကို ပြသည်။ ၎င်းသည် ခေါက်ထားသော စစ်သင်္ဘောလှီးဓားဖြစ်သည်။

“သဘောပေါက်ပြီ…” ဟန်ရှောင်းအနည်းငယ် စိတ်ပျက်သွားသည်။ ချပ်ဝတ်တန်ဆာသည် ခမ်းနားသော ကိရိယာတစ်ခုဖြစ်သော်လည်း သူသည် NCO အဆင့် ချပ်ဝတ်တန်ဆာ၏ လိုအပ်ချက်ကိုပင် မဖြည့်ဆည်းနိုင်သေးပေ။ တပ်မှူးအဆင့်သည် သူ့အတွက် ပို၍ပင် မဖြစ်နိုင်ပေ။ ဘာပဲဖြစ်ဖြစ် အနာဂတ်မှာ အခွင့်အလမ်းတွေ ရှိလာမှာမို့ စိတ်မရှည်နေဖို့ မလိုပင်။

ဟန်ရှောင်းသည် ကစားသမားများဘက်သို့ လှည့်ကာ မိတ်ဆက်ပေးသည်။ “ဒါက ဟားလပ်စ်၊ အဆင့် B စူပါဖြစ်တယ်။ ဒီနေ့ကစပြီး၊ သူက ငါတို့ကြေးစားတပ်ဖွဲ့ရဲ့ အဖွဲ့ဝင်အသစ် ဖြစ်လာလိမ့်မယ်။”

ဘုရားရေ! ကစားသမားများ၏ မေးရိုးများ ကြမ်းပြင်ပေါ် ပြုတ်ကျလုနီးပါး ဖြစ်သွားသည် - သူတို့ အံ့အားသင့်သွားကြ၏။

ကပ္ပတိန်သည် မျိုးနွယ်စုတစ်ခု၏ သူရဲကောင်းကို ခိုးယူနိုင်ခဲ့သည်။

"ဘာလို့ ငါတို့နဲ့ လက်တွဲခဲ့တာလဲ"

"မင်းရဲ့ အမျိုးအစားက ဘာလဲ"

"မင်း ဘလက်စတားနဲ့ အပေးအယူတစ်ခုခု လုပ်​ထားတာလား။"

သူတို့သည် ဤသူငယ်ချင်းအသစ်နှင့် ပတ်သက်၍ အလွန်သိချင်ကြပြီး မေးခွန်းများဖြင့် သူ့ကို လွှမ်းခြုံထားကြသည်။ ဟားလပ်စ်သည် အလယ်တွင် ဝိုင်းရံခံထားရပြီး သူ၏ 'အသင်းဖော်များ' ထံမှ စိတ်အားထက်သန်မှုကို ခံစားရသည်။ သူသည် သိပ်အသားမကျဘဲ အတင်းပြုံးပြနေရ၏။

ကစားသမားများထံမှ ထောက်လှမ်းခြင်း၏ ရလဒ်မှာ မေးခွန်းများသာဖြစ်သည်။ ဟန်ရှောင်းက အဆင့် B စူပါတစ်ယောက်နှင့် ဘယ်လိုဆက်သွယ်နိုင်ခဲ့လဲဆိုတာ အလွန်သိချင်နေကြ၏။ သူသည် မြင့်မားသောအဆင့် နယ်ပယ်များ၏ ထိပ်ပိုင်းတွင် ရှိနေသူဖြစ်ပြီး သူတို့၏ ကြေးစားတပ်ဖွဲ့တွင် အသန်မာဆုံး ဖြစ်နိုင်သည်။

ဟန်ရှောင်းထက်တောင် အင်အားကြီးတဲ့သူက သူတို့အဖွဲ့ကို ပါ၀င်လာသည့်အတွက် ကစားသမားများက အလွန်စိတ်လှုပ်ရှားနေကြသည်။

အချိန်အနည်းငယ်ကြာပြီးနောက် အာကာသယာဉ်သည် တဖြည်းဖြည်း ဆင်းသက်လာသည်။ နောက်ဆုံးတွင် ဟားလပ်စ်သည် ကစားသမားများထံမှ လွတ်မြောက်ခဲ့ပြီး ဟန်ရှောင်းထံသို့ လျှောက်လာသည်။ သူက ဟန်ရှောင်းအနားမှာ ရပ်လိုက်ပြီး အာကာသယာဉ်ကို မော့ကြည့်လိုက်တော့ သူ့မျက်နှာက အနည်းငယ် တောင့်တင်းသွားသည်။

ဟန်ရှောင်းက သူ့ကို လှည့်ကြည့်လိုက်ကာ မျက်ခုံးပင့်လိုက်ပြီး "မင်း နည်းနည်းတော့ စိတ်ပူနေပုံရတယ်။ မင်း နဂါးငွေ့တန်းထဲကို အရင်က မရောက်ဖူးဘူးလား"

"ဒါက ငါ့ရဲ့ ပထမဆုံးအကြိမ်။" ဟားလပ်စ်သည် သူ၏ လက်နှစ်ဖက်ဖြင့် ချွေးများကို သုတ်လိုက်သည်။ “တကယ်တော့ အမြင့်ကို နည်းနည်းကြောက်တယ်…”

"မင်းက တိုက်ခိုက်သူတွေအတွက် အရှက်ရစရာပဲ" ဟန်ရှောင်းမှာ ပြောစရာစကား ရှာမတွေ့တော့ပေ။

အာကာသယာဉ်ပေါ် တက်သွားကြသည် ။ သစ်တောမြို့သည် သူတို့၏အမြင်တွင် ပိုမိုသေးငယ်လာကာ တဖြည်းဖြည်း မြင့်တက်လာပြီး အာကာသထဲသို့ ပျံသန်းသွားတော့သည်။ ဤငှားရမ်းသည့်အလုပ်က နောက်ဆုံးတော့ ပြီးဆုံးသွား၏။ သူတို့ရောက်လာတုန်းကထက် အဖွဲ့ဝင်တစ်ယောက်နဲ့ ပိုလာသည်။ ဆူနီဂြိုဟ်ပေါ်ရှိ ကပ်ဆိုးသည် သူတို့အားလုံးအတွက်၊ အထူးသဖြင့် ဟန်ရှောင်းအတွက် အလွန်အကျိုးရှိသည်။

ဒီအချိန် ဆူနီမှာ မျိုးစေ့ချထားနိုင်တာက အမှောင်ကြယ်ရဲ့ ဇာတ်ကြောင်းကို ခြေရာခံနေတာပဲ။ အစီအစဥ်ရဲ့ ပထမအဆင့်လည်း ပြီးပြီ။ ဟန်ရှောင်းစဉ်းစားနေရင်း သူ့လက်နှစ်ဖက်ကို ပိုက်လိုက်သည်။

အာကာသယာဉ်၏ ဦးတည်ရာမှာ ဂျူဘာလီ အာကာသစခန်းဖြစ်သည်။ နောက်တစ်ကြိမ် စစ်ဆင်ရေးမစခင်မှာ ဟန်ရှောင်းသည် အနားယူပြီး ဒီခရီးစဉ်မှာ ရရှိခဲ့တဲ့ အရာတွေကို ကျေညက်အောင် လုပ်ချင်နေသည်။

…

သစ်တောမြို့၊ စစ်စခန်းများထဲမှ တစ်ခုကို လူသစ်စုဆောင်းရေးနေရာအဖြစ် ဖွင့်လှစ်ခဲ့သည်။

ကပ်ဆိုးကြီးပြီးနောက် စစ်သားသစ်များ စစ်တပ်သို့ ဝင်ရမယ့်အချိန်ပင်။ အရွယ်ရောက်လာသော လူငယ်များသည် မဖြစ်မနေ စစ်မှုထမ်းရမည်ဖြစ်ပြီး စစ်ရေးလေ့ကျင့်မှုများ ပြုလုပ်ရန် လိုအပ်သည်။ လူငယ်များသည် မိဘများနှင့်အတူ တစ်ယောက်ပြီး တစ်ယောက် ရောက်လာကြသည်။

လာနာက အတော်လေး စောစောရောက်လာ၏။ ၎င်း၏ မှတ်ပုံတင်ကတ်ကို ပြသပြီးမှသာ စုဆောင်းရေးနေရာသို့ ဝင်ခွင့်ပြုသည် - မိဘများအပါအဝင် ခွင့်ပြုချက်မရှိသော အခြားမည်သူ့ကိုမှ ဝင်ရောက်ခွင့်မပြုပေ။

ပြန်လှည့်ကြည့်လိုက်တော့ လာနာက သူ့မိဘတွေ လက်ပြနှုတ်ဆက်နေတာကို တွေ့လိုက်ရသည်။ ထုံးစံအတိုင်း သူတို့၏မျက်နှာမှာ ကြင်နာပြီး ချစ်စရာကောင်းတဲ့ အပြုံးတွေ ရှိနေ၏။

သူ့မျက်လုံးထဲတွင် ခံစားချက်များစွာဖြင့် သူတို့ကိုကြည့်ပြီးနောက် စစ်အခြေစိုက်စခန်းသို့ လိုက်သွားသည်။

အချိန်အတော်ကြာအောင် တန်းစီစောင့်ဆိုင်းပြီးနောက် နောက်ဆုံးတွင် လာနာ၏အလှည့်သို့ ရောက်လာသည်။ စားပွဲနောက်မှာ ထိုင်နေတဲ့ အရာရှိက ခေါင်းမမော့ဘဲ ပေါ့ပေါ့ပါးပါးနဲ့ “နာမည်၊ ပြီးရင် နံပါတ်တစ်ခု ယူပြီးတော့ ဆေးစစ်ဖို့ သွားကြည့်”

လာနာသည် အသက်ပြင်းပြင်းရှူပြီး "ဆရာ၊ ကျွန်တော် စစ်တပ်ထဲဝင်ဖို့ တောင်းဆိုချင်ပါတယ်"

အရာရှိက သူ့ကို မော့ကြည့်လိုက်တယ်။ "မင်းမိဘတွေသိလား"

“မဟုတ်ဘူး”

"ချာတိတ်၊ မင်းရဲ့မိဘတွေက မင်းကို စစ်တပ်ထဲမ၀င်ဖို့ သေချာပေါက် သတိပေးထားတယ် မဟုတ်လား"

"ဟုတ်ကဲ့ပါ ဆရာ၊ ဒါပေမယ့် ကျွန်တော် မှန်ကန်တဲ့ ဆုံးဖြတ်ချက် ချလိုက်တယ်လို့ ကျွန်တော် ယုံကြည်ပါတယ်။"

"တောင်းဆိုမှုကို အတည်ပြုပြီးတာနဲ့ မင်းရဲ့ဆုံးဖြတ်ချက်အတွက် အပြည့်အဝတာဝန်ယူရမယ်" အရာရှိက အေးစက်စွာပြောသည်။ "မင်းပြန်ပြင်လို့မရဘူး၊ ငါတို့ရှင်းတယ်မလား"

"လုံးဝ ရှင်းလင်းပါတယ်"

အရာရှိ၏ အေးစက်သော မျက်နှာပေါ်တွင် အပြုံးအနည်းငယ် ပေါ်လာသည်။ သူသည် အံဆွဲကို ဖွင့်လိုက်ပြီး အထဲရှိ ထူထပ်သော စစ်တပ်လျှောက်လွှာပုံစံများမှ တစ်ခုကိုထုတ်ပြီး လာနာကို ပေးလိုက်သည်။

လာနာက ယူခါနီးတွင် အရာရှိက လျှောက်လွှာဖောင်ကို တင်းတင်းကြပ်ကြပ် ကိုင်ထားတာကို သူသိလိုက်၏။ ထိုအချိန်တွင် အရာရှိက အေးစက်စွာ ပြောသည်။ "ဒါ မင်းရဲ့စိတ်ပြောင်းဖို့ နောက်ဆုံးအခွင့်အရေးပဲ"

လာနာသည် ခိုင်မာသောအမူအရာဖြင့် လျှောက်လွှာပုံစံကို လုယူလိုက်သည်။

“ကောင်းတယ်၊ စစ်တပ်ကိုဝင်ဖို့ နေရာက အဲဒီဘက်မှာရှိတယ်။ နောက်ကွယ်ကလူတွေကို မပိတ်ထားနဲ့။”

လာနာသည် အရာရှိ၏ လက်ညှိုးကို လိုက်၍ ကြည့်လိုက်သည်။ ၎င်းသည် တရားဝင်စစ်တပ်အတွက် စုဆောင်းရေးနေရာအဖြစ် ဆောင်ရွက်သည့် ဂိုဒေါင်အလွတ်တစ်ခုဖြစ်သည်။ လျှောက်လွှာဖောင်ဖြည့်ရန် စောင့်ဆိုင်းနေသည့် လူငယ်များမှာ ဂိုဒေါင်တစ်ခုလုံး အပြည့်ရှိနေသည်။

စာစဉ် (၂၄)၊ အခန်း (၃၅၄) ပြီး၏။

လင်းဆက်

+++++