အခန်း (၁၁၈၃)

“စတုတ္ထအဆင့်က တစ်ဦးတည်းခွန်အားအပေါ်မှာ မမှီခိုဘူး”

ဟန်မူယဲ့က ပေါ့ပါးစွာ ရယ်လိုက်ပြီး ခေါင်းခါသည်။

ရွှေတောင်ထွတ်၏ စတုတ္ထအဆင့်သည် ဖရိုဖရဲဖြစ်နေသော တိုက်ပွဲနှင့် အဆက်မပြတ် တိုက်ပွဲများ ပါဝင်သည်။

ဖရိုဖရဲဖြစ်နေသော တိုက်ပွဲတွင် အစစ်အမှန်ကျွမ်းကျင်သူများ ပေါ်ထွက်လာလိမ့်မည်။

ထို့အပြင် အနားမယူဘဲ တိုက်ခိုက်ရသော တိုက်ပွဲများလည်း ရှိနေသေးသည်။

ထိုအချိန်မျိုးတွင် တစ်ယောက်တည်းခွန်အားဖြင့် အနိုင်ယူရန် မဖြစ်နိုင်ပေ။

“အဲဒါဆိုရင် မင်းက အနိုင်ရဖို့ ပိုပြီး မဖြစ်နိုင်ဘူး”

ရွှေရောင်ငှက်က ခေါင်းခါလိုက်ပြီး တီးတိုးပြောသည်။

“သူ့နောက်ကွယ်မှာ နတ်ဘုရားလောကရဲ့ ကျွမ်းကျင်သူတွေ ရှိနေကြတယ်။ တခြားလူတွေက သူနဲ့ ပူးပေါင်းဖို့ တက်ကြွနေမှာပဲ”

ဟန်မူယဲ့က ကောင်းကင်တစ်သောင်းမြို့၏ ကျွမ်းကျင်သူများကို ဖုံးကွယ်ထားကြောင်း ရွှေရောင်ငှက်က သိနေသော်လည်း အကောင်းမမြင်သေးပေ။

ဟွမ်ကျန်းရှုံးသည် တစ်ဦးတည်းခွန်အားဖြင့် နယ်မြေတစ်ခုကို ဖိနှိပ်နိုင်သည်။ ထို့အပြင် နောက်ခံကောင်းပြီး နတ်ဘုရားရင်းမြစ်နန်းတော်၏ ထောက်ပံ့မှုကိုလည်း ရထားသောကြောင့် ရွှေတောင်ထွတ်ပြိုင်ပွဲတွင် ပထမဖြစ်လာလိမ့်မည်။

သူက ချန်ပီယံဖြစ်ရန် ကံပါလာသည်။

ဟန်မူယဲ့က ခေးအော့ကို ပြုံးပြသည်။

ခေးအော့က ‌‌ခေါင်းညိတ်လိုက်ပြီး ပျောက်ကွယ်သွားသည်။

ဟန်မူယဲ့နှင့် ရွှေရောင်ငှက်ကလည်း ပျောက်ကွယ်သွားခဲ့သည်။

“ဘုန်း”

လောကကြီးတစ်ခုလုံးက တုန်ခါနေပြီး အဆုံးမရှိသော ရွှေအလင်းများအဖြစ် ပြောင်းသွားသည်။

ကောင်းကင်စုပေါင်းကုန်းမြေသည် ပြန်ပေါ်လာခဲ့သည်။

သို့သော် ကောင်းကင်စုပေါင်းကုန်းမြေက မရေမတွက်နိုင်သော အစိတ်အပိုင်းများအဖြစ် လွင့်မျောနေသည်။

ပထမအဆင့်နှင့် တူညီပြီး ကျွမ်းကျင်သူများသည် လွင့်မျောနေသော ကုန်းမြေတိုင်းတွင် ရှိနေကြသည်။

“ဒါက စတုတ္ထအဆင့်ပဲ”

“ကောင်းကင်စက်ဝန်းစစ်မြေပြင်ကို တုပထားတယ်”

အလင်းလွှာကို စောင့်ကြည့်နေသော ကျွမ်းကျင်သူများ၏ မျက်လုံးက တောက်ပသွားသည်။

ကောင်းကင်စက်ဝန်းစစ်မြေပြင်သည် ထိုပုံစံအတိုင်း ဖြစ်သည်ဟု ပြောကြသည်။ ကျွမ်းကျင်သူများက ကိုယ်ပိုင်နယ်မြေကို အုပ်စိုးထားသည်။

“ဝီ”

လေဟာနယ်တွင် ပုံရိပ်များသည် တစ်ခုပြီးတစ်ခု ပေါ်လာကြသည်။

ကောင်းကင်ကို ထောက်ပံ့ထားပုံရ‌သော မြင့်မားသည့် နတ်ဘရားများ၊ ကောင်းကင်နှင့်မြေကြီးကို ဖုံးလွှမ်းနိုင်သော တောင်ပံကို ပိုင်ဆိုင်ထားသူများ၊ နတ်ဘုရားသားရဲနှင့် ထူးခြားသားရဲများလည်း ရှိနေကြသည်။

“အဲဒါက ကောင်းကင်စက်ဝန်းစစ်မြေပြင်ရဲ့ ကျွမ်းကျင်သူတွေကို တုပထားတာပဲ”

နတ်ဘုရားလောက၏ အလင်းလွှာတွင် အစိမ်းရောင်ဝတ်စုံနှင့် လူအိုကြီးတစ်ယောက်က တီးတိုးပြောသည်။

သူ့နောက်တွင်ရှိသော ဆံပင်ဖြူနေသည့် အကြီးအကဲများက စိတ်လှုပ်ရှားနေကြသည်။

“ငါတို့ ကနဦးနေမင်းဘုရားကျောင်းရဲ့ တည်ထောင်သူက ကောင်းကင်စက်ဝန်းစစ်မြေပြင်မှာလို့ ပြောကြတယ်။ ငါတို့တပည့်တွေက ရွှေတောင်ထွတ်ပြိုင်ပွဲမှာ အမွေအနှစ်နည်းစနစ်ကို အမြဲထုတ်ပြကြတယ်။ ဒါပေမဲ့ တုံ့ပြန်မှုမရှိဘူး”

အကြီးအကဲတစ်ယောက်က နောင်တများနှင့်အတူ ပြောသည်။

သူ့စကားကို ကြားရသောအခါ ရှေ့တွင်ရှိသော ရွှေရောင်သရဖူနှင့် အကြီးအကဲက ခေါင်းခါလိုက်သည်။

“ကောင်းကင်စက်ဝန်းစစ်မြေပြင်ရဲ့ ကျွမ်းကျင်သူတွေက နတ်ဘုရားကမ္ဘာကို ဘယ်လိုလုပ်ပြီး ဂရုစိုက်နေမှာလဲ”

“ငါတို့က အင်မော်တယ်ကမ္ဘာတွေကို ကြည့်သလိုမျိုးပဲ သူတို့အမြင်မှာ နတ်ဘုရားကမ္ဘာက အရေးမပါဘူး”

“သူတို့က နတ်ဘုရားကမ္ဘာရဲ့ လူတွေအတွက် ဘယ်တော့မှ အားထုတ်ပေးမှာမဟုတ်ဘူး”

အကြီးအကဲက ဉာဏ်များသောမျက်လုံးများဖြင့် ညင်သာစွာပြောသည်။

“ရွှေတောင်ထွတ်မှာ ပြိုင်ဘက်ကင်းပါရမီရှင်တစ်ယောက် ပေါ်လာရင်တော့ အာရုံစိုက်လာလိမ့်မယ်”

‘ပြိုင်ဘက်ကင်းပါရမီရှင်လား’

လူတိုင်းက ခေါင်းခါလိုက်သည်။

ပါရမီရှင်များသည် ရွှေတောင်ထွတ်ပြိုင်ပွဲတွင် အမြဲရှိနေသည်။

ပြိုင်ပွဲတွင်ရှိသော ပါရမီရှင်တိုင်းကို နတ်ဘုရားရင်းမြစ်နန်းတော်က စီစဉ်ပေးထားသည်။

တခြားလူများက ပြိုင်ပွဲနှင့် နတ်ဘုရားကမ္ဘာတွင် အစွမ်းပြရန် အခွင့်အရေးမရှိပေ။

အကယ်၍ နတ်ဘုရားရင်းမြစ်နန်းတော်၏ ပါရမီရှင်တစ်ယောက်ကို ကောင်းကင်စက်ဝန်းစစ်မြေပြင်၏ ကျွမ်းကျင်သူများက တန်ဖိုးထားလျှင် တန်ဖိုးမဖြတ်နိုင်သော အရင်းအမြစ်များကို ရလိမ့်မည်။

ထိုသို့ဆိုလျှင် နတ်ဘုရားရင်းမြစ်နန်းတော်က နတ်ဘုရားကမ္ဘာကို ပိုမိုထိန်းချုပ်နိုင်လိမ့်မည်။

“ဘုန်း”

လေထုထဲတွင် အဆုံးမရှိသော လေဝဲများက တုန်ခါနေသည်။

ကောင်းကင်နှင့်မြေကြီး၏ အမျိုးမျိုးသော စွမ်းအင်များသည် ဆွဲယူခံလိုက်ရသည်။

ပြန့်ကျဲနေသော ကုန်းမြေများက အချင်းချင်း တိုက်မိသွားသည်။

အလင်းလွှာတွင်ရှိသော မြင်ကွင်းက ဆက်တိုက် ပြောင်းလဲနေသည်။ အဆုံးတွင် သူတို့က နတ်ဆိုးဆန်ပြီး ခံ့ညားသော လူငယ်တစ်ယောက်ကို မြင်လိုက်ရသည်။

သူက နဂါးနက်ချပ်ဝတ်ကို ဝတ်ဆင်ထားသည်။ သေဆုံးခြင်းအငွေ့အသက်သည် သူ၏ အသက်စွမ်းအားနှင့် ရောယှက်နေသည်။ သူက ထူးခြားသော လှံတစ်ချောင်းကို ကိုင်ထားသည်။

ဟွမ်ကျန်းရှုံး၊ ဟွမ်ခြောက်၊ ဟွမ်လောင်လျှို ဖြစ်သည်။

စတုတ္ထအဆင့်တွင် ဟွမ်ခြောက်ကို အဓိကထား၍ ပြသနေသည်။

“နတ်ဘုရားရင်းမြစ်နန်းတော်က သူ့ကို စီစဉ်ထားတဲ့ပုံပဲ။ သူက ဒီတစ်ခေါက် ရွှေတောင်ထွတ်ပြိုင်ပွဲရဲ့ ခေါင်းဆောင်ပဲ”

“ရွှေတောင်ထွတ်ပြိုင်ပွဲရဲ့ စတုတ္ထအဆင့်တိုင်းမှာ အလင်းလွှာကနေ ပထမဆုံးပြသတဲ့လူက နံပတ်တစ် ဖြစ်လာတယ်။ ချွင်းချက်မရှိဘူး”

အလင်းလွှာကိုကြည့်နေသော လူတစ်ယောက်က ပြောလိုက်သည်။

“ကောင်းကင်စက်ဝန်းစစ်မြေပြင်က ကျွမ်းကျင်သူတွေရဲ့ အာရုံစိုက်မှုကိုရအောင် သူ့ကို ပြသပေးနေတာပဲ”

လူတစ်ယောက်က အလင်းလွှာတွင်ရှိသော ဟွမ်ခြောက်ကို ကြောက်ရွံ့စွာ ကြည့်သည်။

“သူက အရမ်းသန်မာတယ်”

“သူက သန်မာတာထက် ပိုတယ်”

လူတစ်ယောက်၏ ကျင့်ကြံဆင့်အား စစ်ဆေးနိုင်သော ရတနာကို ကိုင်ဆောင်ထားသောလူသည် အလင်းလွှာကို ကြည့်နေသည်။ ထိုအချိန်တွင် ရတနာက ရှုပ်ထွေးသွားသည်။

“ကောင်းကင်ကြည့်ပုလဲကို အာရုံမခံနိုင်အောင် လုပ်ထားတယ်ဆိုတော့ သူက တတိယအဆင့်ရဲ့ နဂါးနက်ပဲ ဖြစ်လိမ့်မယ်”

“စိတ်ဝင်စားစရာပဲ။ တတိယအဆင့်မှာ ဟန်မူယဲ့နဲ့ နဂါးနက်က မိတ်ဆွေတွေ ဖြစ်ခဲ့ကြတယ်”

“အခုတော့ သူတို့နှစ်ယောက် တိုက်ခိုက်တာကို မြင်ရတော့မယ်”

“ဘုန်း”

ကုန်းမြေအပိုင်းအစတစ်ခုသည် ဟွမ်ခြောက်၏ ကုန်းမြေနှင့် တိုက်မိသွားသည်။

ထိုကုန်းမြေပေါ်တွင်ရှိသော အင်မော်တယ်သခင်က ဟွမ်ခြောက်ကို ငေးကြည့်လိုက်ပြီး တစ်ကိုယ်လုံး တုန်ခါသွားသည်။

“မင်းက ငါ့ကို သိနေတာလား”

ဟွမ်ခြောက်က လှံရှည်ဖြင့် ညွှန်ပြသည်။

“အင်မော်တယ်ဘုရင်ကျန်းရှုံး”

အင်မော်တယ်သခင်က ဦးညွတ်လိုက်ပြီး လေးစားစွာ ပြောသည်။

“မင်းက ငါ့ကိုသိနေတယ်ဆိုရင် လုံလောက်ပြီ”

ဟွမ်ခြောက်က လက်ကို ဝှေ့ယမ်းလိုက်ပြီး ရှေ့သို့ ညွှန်ပြသည်။

“ငါက မင်းကို ဦးဆောင်ပြီး ဒီပြိုင်ပွဲမှာ တိုက်ခိုက်မယ်။ ရလာတဲ့ အကျိုးအမြတ်တွေကို အညီအမျှ ခွဲယူမယ်”

‘အကျိုးအမြတ်တွေကို အညီအမျှ ခွဲယူမှာလား’

‘ကောင်းလိုက်တာ’

ဟွမ်ခြောက်၏စကားကို ကြားရသောအခါတွင် အင်မော်တယ်သခင်က စိတ်လှုပ်ရှားနေပြီး ဦးညွတ်လိုက်ပြန်သည်။

“ကျေးဇူးတင်ပါတယ်။ အင်မော်တယ်ဘုရင်ကျန်းရှုံး”

“နတ်ဘုရားလောကရဲ့ မျိုးဆက်သစ်တွေထဲမှာ အင်မော်တယ်ဘုရင်ကျန်းရှုံးက အရက်ရောဆုံးလို့ပြောကြတာ အမှန်ပဲထင်တယ်”

ထို့နောက် အင်မော်တယ်သခင်က တစ်ဖက်သို့လှည့်ပြီး အော်ပြောသည်။

“အင်မော်တယ်ဘုရင်ကျန်းရှုံးက ဒီမှာရှိနေတယ်။ အညံ့ခံချင်တဲ့လူ‌တွေက မြန်မြန်လာပြီး အရိုအသေပေးသင့်တယ်”

သူ့စကားအဆုံးတွင် နတ်ဘုရားကမ္ဘာမှ စီစဉ်ထားသော ကျွမ်းကျင်သူများ ရောက်လာကြသည်။

ချက်ချင်းဆိုသလိုပင် မိုင်တစ်ရာကျယ်ဝန်းသော ကုန်းမြေတစ်ခု ဖြစ်လာသည်။

ပတ်ဝန်းကျင်တွင်ရှိသော တခြားကုန်းမြေအစိတ်အပိုင်းများက စောင့်ကြည့်မနေလျှင် ထွက်ပြေးသွားကြသည်။

“နတ်ဘုရားလောကရဲံ အင်မော်တယ်ဘုရင်ကျန်းရှုံးလား”

“အဲဒီလူက အရင်တစ်ခေါက် နတ်ဘုရားရင်းမြစ်နန်းတော် စီစဉ်ထားတဲ့လူနဲ့ မတူသလိုပဲ။ နာမည်ကောင်းလည်း ရှိပုံရတယ်”

အလင်းလွှာကို ‌စောင့်ကြည့်နေသော လူများက တီးတိုးပြောလိုက်ကြသည်။

အင်မော်တယ်ဘုရင်ကျန်းရှုံးက နတ်ဘုရားကမ္ဘာကို လွှမ်းမိုးထားနိုင်လျှင် အဆင့်တစ်ရရန် လွဘ်ကူလိမ့်မည်။

သို့သော် ထိုလူမျိုးက ရွှေတောင်ထွတ်သို့ မဖြစ်မနေရောက်လာရန် မလိုအပ်ပေ။

‘ကောင်းကင်စက်ဝန်းစစ်မြေပြင်ရဲ့ ကျွမ်းကျင်သူတွေကို ဆွဲဆောင်ချင်လို့လား’

“ဘုန်း”

လွင့်မျောနေသော ကုန်းမြေအပိုင်းအစတစ်ခုသည် မိုင်တစ်ရာကျယ်ဝန်းသော ကုန်းမြေနှင့် ဝင်တိုက်သွားသည်။ တူတစ်လက်ကိုင်ထားသော လူတစ်ယောက်က ပျံထွက်လာသည်။

“ကောင်းကင်အင်မော်တယ်ကမ္ဘာရဲ့ အင်မော်တယ်သခင်ကျူးကျီပဲ”

“သူက ရွှေတောင်ထွတ်မှာ အနိုင်ရဖို့ ရေပန်းစားခဲ့တယ်”

“ဒါပေမဲ့ အင်မော်တယ်ဘုရင်နဲ့ တွေ့ရတော့မယ်”

အလင်းလွှာကို စောင့်ကြည့်နေသော လူတိုင်းက တားဆီးခံထားရ‌သော အင်မော်တယ်သခင်ကျူးကျီကို နှမြောနေကြသည်။

ပုံမှန်အတိုင်းဆိုလျှင် အင်မော်တယ်သခင်ကျူးကျီက နံပတ်တစ်မရလျှင်ပင် ထိပ်ဆုံးတစ်ရာထဲသို့ သေချာပေါက် ဝင်လိမ့်မည်။

သို့သော် သူက အင်မော်တယ်ဘုရင်ကျန်းရှုံးကို စိန်ခေါ်ချင်နေသောကြောင့် သေဆုံးသွားလိမ့်မည်။

“ဘုန်း”

ကျူးကျီ၏တူက လှုပ်ရှားသွားပြီး လမ်းပိတ်ထားသော အင်မော်တယ်သခင်သုံးယောက်ကို လွင့်ထွက်သွားစေသည်။ ထို့နောက် သူက ရပ်တန့်လိုက်ပြီး ဟွမ်ခြောက်ကို ကြည့်သည်။

“နတ်ဘုရားကမ္ဘာရဲ့ အင်မော်တယ်ဘုရင်ကျန်းရှုံးက အရမ်းသန်မာတယ်လို့ ကြားခဲ့ရတယ်။ ကျူးကျီက တိုက်ခိုက်ချင်ပါတယ်”

“ရှုံးနိမ့်သွားရင် အမိန့်နာခံပါ့မယ်”

သူက ဟွမ်ခြောက်ကို စိန်ခေါ်နေသည်။

အင်မော်တယ်သခင်က အင်မော်တယ်ဘုရင်ကို စိန်ခေါ်ခဲ့သည်။

အလွန်ရဲတင်းသည်။

“ဟားဟား၊ သူက ဉာဏ်ကောင်းသားပဲ။ အင်မော်တယ်ဘုရင်ကျန်းရှုံးရဲ့ လက်အောက်မှာ ကျွမ်းကျင်သူတွေ မရှိသေးတာကို အခွင့်ကောင်းယူပြီး ပူးပေါင်းချင်နေတယ်”

အလင်းလွှာကို စောင့်ကြည့်နေသော လူတစ်ယောက်က ရယ်လိုက်သည်။