အခန်း (၁၁၉၂)

မရေမတွက်နိုင်သော အင်မော်တယ်သခင်များသည် နတ်ဘုရားလောကသို့ ပြေးဝင်လာကြသည်။

“သန့်စင်ခြင်းရေကန်ကို ဝင်ရောက်ပြီး အင်မော်တယ်ဘုရင်ဖြစ်လာဖို့ မင်းတို့အပေါ်မှာပဲ မူတည်နေတယ်”

ဟန်မူယဲ့က အော်ဟစ်လိုက်ပြီး ပျောက်ကွယ်သွားသည်။

သူရောက်သွားသောနေရာကို မည်သူမှ မသိကြပေ။

ကောင်းကင်စက်ဝန်းနတ်ဘုရားလောကသည် အင်မော်တယ်လောကနှင့် ပေါင်းစပ်ပြီး မရေမတွက်နိုင်‌သော အင်မော်တယ်သခင်များက နတ်ဘုရားရင်းမြစ်နန်းတော်ကို တိုက်ခိုက်နေကြသည်။ ထို့ကြောင့် နတ်ဘုရားလောကသည် အခြေအနေကို ထိန်းချုပ်ရန် မတတ်နိုင်တော့ပေ။

သိန်းချီသော အင်မော်တယ်သခင်များက ခမ်းနားသော နတ်ဘုရားရင်းမြစ်နန်းတော်ကို တိုက်ခိုက်လာမည်ဟု မည်သူက ထင်ထားမည်နည်း။

အင်မော်တယ်လောကတွင် ထိုသို့ များပြားသော အင်မော်တယ်သခင်များ ရှိနေသည်ဟု မည်သူက သိနိုင်မည်နည်း။

ပုရွက်ဆိတ်နှင့်တူသော အင်မော်တယ်သခင်များက ရေစီးကြောင်းသဖွယ် တိုးဝင်လာပြီး တိုက်ခိုက်လာမည်ဟု မည်သူက ခန့်မှန်းထားမည်နည်း။

နတ်ဘုရားရင်းမြစ်နန်းတော်၏ ၉၀%သည် ပျက်စီးသွားခဲ့သည်။

အဆုံးတွင် နန်းတော်သခင်ထိုက်ယွမ်က ရှေ့ထွက်လာပြီး လူတစ်သောင်းကို သန့်စင်ခြင်းရေကန်သို့ နှစ်စဉ်ဝင်ရောက်ခွင့်ပြုမည်ဟု ကတိပေးလိုက်ရသည်။

သို့သော် လောက၏ စွမ်းအားက ပြောင်းလဲသွားသည်။ နတ်စွမ်းအားများက မသန့်စင်တော့ပေ။ အင်မော်တယ်ဘုရင်အဆင့်သို့ တက်လှမ်းရန် ပိုမိုခက်ခဲလာသည်။ သန့်စင်ခြင်းရေကန်၏ ထိရောက်မှုကလည်း သိသိသာသာ လျော့နည်းသွားသည်။

မရေမတွက်နိုင်သော လူများက ဟန်မူယဲ့ကို ရှာဖွေချင်ကြသည်။

အဘယ်ကြောင့်ဆိုသော် ယွင်လန်ဓားအင်မော်တယ်က နတ်စွမ်းအားသလင်းကျောက် သန်းသုံးသိန်းကို သယ်ဆောင်ထားသည်။

ထိုသလင်းကျောက်များနှင့် နတ်ဘုရားကမ္ဘာတစ်ခုလုံး၏ နတ်စွမ်းအားသန့်စင်မှုကို အဆင့်မြှင့်နိုင်သည်။

သို့သော် ဟန်မူယဲ့ကို ရှာမတွေ့ကြ‌ပေ။

အဘယ်ကြောင့်ဆိုသော် ဟန်မူယဲ့က ဤစကြဝဠာမှ ထွက်သွားခဲ့သည်။

ကြယ်စင်စုစကြဝဠာ ....

လူသူကင်းမဲ့နေသော ကန္တာရ ....

ဤနေရာသည် မူလကမ္ဘာကို ဖျက်ဆီးပြီး နဂါးမိကျောင်းကို ဖိနှိပ်ခဲ့သော အားကောင်းသည့် ကျင့်ကြံခြင်းလောက ဖြစ်သည်။

ဟန်မူယဲ့က ကျန်းယွီလင်း ကျဆုံးသွားသောနေရာကို ကျော်ဖြတ်လာခဲ့သည်။ ထို့နောက် တည်နေရာရွှေ့ပြောင်းခြင်းဝင်္ကပါကို ရှာတွေ့ပြီး ကြယ်စင်စုစကြဝဠာသို့ တိတ်ဆိတ်စွာ ရောက်လာသည်။

တည်နေရာရွှေ့ပြောင်းရန်အတွက် နတ်စွမ်းအားသလင်းကျောက် တစ်သိန်းကို အသုံးပြုခဲ့ရသည်။

တည်နေရာရွှေ့ပြောင်းလိုက်သောအချိန်တွင် ဝင်္ကပါက လှုပ်ခါနေပြီး လေဟာနယ်စွမ်းအားက မတည်ငြိမ်ပေ။ အားကောင်းသော စွမ်းအားသည် နတ်ဘုရားသားရဲ၏ ခန္ဓာကိုယ်ကိုပင် ဆုတ်ဖြဲပစ်နိုင်သည်။

ဟန်မူယဲ့က ကန္တာရထဲသို့ ရောက်လာသောအခါတွင် အဝတ်များက စုတ်ပြတ်နေသည်။

ကံကောင်းစွာဖြင့် သူ၏ ရုပ်ခန္ဓာက နတ်ဘုရားသားရဲများထက် သာလွန်ပြီး မူလကမ္ဘာ၏ အုပ်ချုပ်သူအဆင့်နှင့် နီးကပ်လာသည်။ ထို့အပြင် ကမ္ဘာဦးချပ်ဝတ်လည်း ရှိနေသောကြောင့် သူက ဒဏ်ရာမရခဲ့ပေ။

“ဒါက မူလကမ္ဘာကို ဖျက်ဆီးခဲ့တဲ့ စကြဝဠာလား”

ရွှေရောင်ငှက်က ဟန်မူယဲ့၏ပခုံးပေါ်သို့ ရောက်လာပြီး အသံပေးလိုက်သည်။

“ကျဆင်းသွားပြီ။ တကယ်ကို ကျဆင်းသွားပြီပဲ ....”

ရွှေရောင်ပုတီးစေ့သည် ဟန်မူယဲ့၏ တခြားပခုံးပေါ်တွင် လွင့်မျောနေပြီး ရေရွတ်လိုက်သည်။

ဟန်မူယဲ့က ကျန်းယွီလင်း၏ဓားမှတစ်ဆင့် ချပ်ဝတ်နှင့် ရုပ်သေးများအား ထိန်းချုပ်ထားသော ဤစကြဝဠာကို မြင်ခဲ့ရသည်။

ရုပ်သေးရုပ်နှင့် ချပ်ဝတ်များသည် ဤကမ္ဘာ၏ ကျင့်ကြံခြင်းနည်းစနစ် ဖြစ်သည်။

ရုပ်သေးဆရာသခင်နှင့် ချပ်ဝတ်ဆရာသခင်များ ဖြစ်ကြသည်။

ဤစကြဝဠာတွင် ရုပ်သေးရုပ်နှင့် ချပ်ဝတ်ကို သန့်စင်သော ပန်းပဲပညာရှင်များက အမှန်တကယ်ပင် အဆင့်နိမ့်သည်။

အဘယ်ကြောင့်ဆိုသော် လူတိုင်းက ပန်းပဲနည်းစနစ်တချို့ကို နားလည်ကြသည်။ လုံလောက်သော ဝိညာဉ်သတ္တုများ ရှိနေလျှင် လူတိုင်းက ရုပ်သေးရုပ်နှင့် ချပ်ဝတ်သန့်စင်ရာတွင် ပါဝင်နိုင်သည်။

“သဘာဝစွမ်းအားတွေ ပျောက်ကွယ်နေသလိုပဲ”

ရွှေရောင်ငှက်က တောင်ပံဖြန့်လိုက်ပြီး ညင်သာစွာ ရေရွတ်သည်။

ဤနေရာတွင် သဘာဝစွမ်းအား မရှိပေ။

“မူလကမ္ဘာကို ဖျက်ဆီးခဲ့တဲ့အချိန်မှာ အဲဒီလူတွေက သဘာဝစွမ်းအားကို မလိုအပ်ဘဲ ကောင်းကင်နဲ့မြေကြီးကို လွှမ်းမိုးနိုင်တယ်လို့ ပြောခဲ့ကြတယ်”

ခေးအော့က ခံစားချက်များနှင့်အတူ ပြောလိုက်သည်။

“ကမ္ဘာဦးချပ်ဝတ်နဲ့ ကမ္ဘာဦးရုပ်သေးရုပ်တွေမှာ ကောင်းကင်တာအိုရဲ့အစိတ်အပိုင်း ပါဝင်နေတယ်။ အဲဒါကြောင့် သူတို့က အရမ်းအားကောင်းတာပဲ”

ဝိညာဉ်သတ္တုများသည် မည်မျှပင် အရည်အသွေးကောင်းနေပါစေ မူလအဆင့်လက်နက်များကို ဖန်တီးရန် မဖြစ်နိုင်ပေ။

အားကောင်းသော ဝိညာဉ်နှင့် အဆင့်မြင့်ကုန်ကြမ်းများကို လိုအပ်သည်။

ဥပမာအနေဖြင့် ဟန်မူယဲ့၏ ကမ္ဘာဦးချပ်ဝတ်သည် တခြားချပ်ဝတ်များထက် ပိုကောင်းသည်။ အဘယ်ကြောင့်ဆိုသော် သူက ခွေ၏ ခန္ဓာကိုယ်နှင့် အကြွင်းအကျန်ဝိညာဉ်ကို အသုံးပြုထားသည်။

ဟန်မူယဲ့က ပျက်စီးနေသောအဝတ်အစားများကို လဲလှယ်တော့မည့်အချိန်တွင် မျက်လုံးများကို မှေးကျဉ်းလိုက်သည်။

ကန္တာရ၏ အဝေးတစ်နေရာတွင် သဲမှုန်များကို မြင်လိုက်ရသည်။

အနက်ရောင်ကုလားအုတ်များကို စီးနင်းထားသော လူတချို့က လျင်မြန်စွာ ပြေးလာကြသည်။

ကုလားအုတ်များက ဆယ်ပေရှည်လျားပြီး အနက်ရောင်ကြေးခွံကို ပိုင်ဆိုင်သည်။ သူတို့၏အမြီးက ငါးပေရှည်ပြီး ဆူးချွန်များဖြင့် ပြည့်နှက်နေသည်။

ထိုကုလားအုတ်များက အလွန်လျင်မြန်ပြီး ဟန်မူယဲ့၏ရှေ့သို့ ချက်ချင်းရောက်လာသည်။

ကုလားအုတ်ကို စီးနင်းထားသော လူများက သားရေချပ်ဝတ်ကို ဝတ်ဆင်ပြီး ဓားနှင့် လှံရှည်များကို ကိုင်ဆောင်ထားသည်။

ဟန်မူယဲ့က သူတို့၏ ကျင့်ကြံခြင်းကို အာရုံခံကြည့်လိုက်သည်။ အခြေခံအုတ်မြစ် အထွတ်အထိပ်အဆင့်နှင့် တူညီသည်။

သို့သော် ကျန်းယွီလင်း၏ ဓားမှတစ်ဆင့် ဤစကြဝဠာ၏ ကျင့်ကြံဆင့်များသည် သူ့စကြဝဠာ၏ ကျင့်ကြံဆင့်များကဲ့သို့ မရှုပ်ထွေးကြောင်း နားလည်ခဲ့သည်။

အဆင့်တစ်မှ အဆင့်ကိုးအထိသာ ရှိသည်။ ထိုအဆင့်များ၏အထက်တွင် သူတော်စင်အဆင့်နှင့် နတ်ဘုရားအဆင့် ရှိနေသည်။

သူတော်စင်အဆင့်သည် မူလစကြဝဠာ၏ အင်မော်တယ်ဘုရင်အဆင့်နှင့် ဆင်တူသည်။ အဆင့်ကိုးသည် အင်မော်တယ်သခင်အဆင့် ဖြစ်ပြီး အဆင့်ရှစ်သည် ရွှေအင်မော်တယ် အထွတ်အထိပ်အဆင့် ဖြစ်သည်။

အဆင့်ခုနစ်က ရွှေအင်မော်တယ်အဆင့် ဖြစ်ပြီး အဆင့်ခြောက်က ကောင်းကင်အင်မော်တယ်အဆင့် ဖြစ်သည်။

သူ့ရှေ့တွင်ရှိ‌သော လူများ၏ ခန္ဓာကိုယ်နှင့် အငွေ့အသက်အရ အဆင့်တစ်ကျင့်ကြံသူများသာ ဖြစ်ကြသည်။

သူတို့၏ ချပ်ဝတ်နှင့် ရုပ်သေးများကိုတော့ သူတို့ကိုယ်တိုင် ဖော်ပြရုံသာ တတ်နိုင်လိမ့်မည်။

“မြန်မြန်သွားတော့။ ကန္တာရသွေးကျားသစ်တွေ လာနေပြီ”

လူတစ်ယောက်က ဟန်မူယဲ့ကို ကြည့်လိုက်ပြီး အော်ပြောသည်။

ဤစကြဝဠာတွင်ရှိသော ဘာသာစကားက မတူညီပေ။ ကံကောင်းစွာဖြင့် ဟန်မူယဲ့က ကျန်းယွီလင်း၏ ဓားမှတ်ဉာဏ်ထဲမှ သင်ယူနိုင်ခဲ့သည်။

‘ကန္တာရသွေးကျားသစ်လား’

ဟန်မူယဲ့က အဝေးတစ်နေရာသို့ ကြည့်လိုက်သည်။ သူက သွေးအလင်းတန်းတစ်ခုကို မြင်ရသည်။

ထိုကျားသစ်က လျင်မြန်သည်။

ကျားသစ်၏ ခြေလေးချောင်းသည် မြေပြင်ကို ထိတွေ့နေသည်ဟု မထင်ရပေ။ သွေးအလင်းတန်းတွင် ပုံရိပ်တစ်ခုကို မြင်နိုင်သည်။

ထိုပုံရိပ်က ပေတစ်ရာကြီးမားပြီး အနီရောင်သားမွေးကို ပိုင်ဆိုင်သည်။ မျက်လုံးများက သွေးနီရောင်သန်းနေပြီး လက်သည်းများက ထက်မြိသည်။

ထိုသားရဲကို သွေးကျားသစ်ဟုခေါ်ဆိုသည့်အတွက် အံ့အားသင့်နေရန် မလိုတော့ပေ။

“မြန်မြန်ရှောင်လိုက်။ အဲဒီကျားသစ်က အဆင့်နှစ်မိစ္ဆာပဲ”

ပေရာချီအကွာသို့ ရောက်သွားသော လူအုပ်စုတွင် လူတစ်ယောက်က အော်ပြောလိုက်သည်။

တခြားလူများက နောင်တရနေသောမျက်နှာထားဖြင့် နောက်လှည့်ကြည့်သည်။

သူတို့က သူ့ကို မကယ်နိုင်တော့ပေ။

သူတို့က အဆင့်နှစ်မိစ္ဆာသားရဲကို မတားဆီးနိုင်ပေ။

အဆင့်နှစ်မိစ္ဆာသားရဲ၏ အမြန်နှုန်း၊ ခွန်အား၊ ခုခံနိုင်စွမ်းသည် သူတို့ထက် ကျော်လွန်နေပြီး သူတို့ကို လွယ်ကူစွာ သတ်ပစ်နိုင်သည်။

ဟန်မူယဲ့က မျက်လုံးများကို မှေးကျဉ်းလိုက်ပြီး ပြေးဝင်လာသော သွေးကျားသစ်ကို ကြည့်သည်။

ထိုကျားသစ်၏ ခွန်အားနှင့် အမြန်နှုန်းက ကမ္ဘာမြေအဆင့်တွင်ရှိပြီး အမှန်တကယ်ပင် အဆင့်နှစ်မိစ္ဆာသားရဲ ဖြစ်သည်။

သို့သော် ထိုသားရဲက သူ့ကို ဝင်တိုက်မည်ဆိုလျှင်ပင် သူက အကောင်းအတိုင်း ရှိနေလိမ့်မည်။

ထိုသားရဲကတော့ ခန္ဓာကိုယ်တစ်ခုလုံး ပျက်စီးသွားနိုင်သည်။

သို့သော် ဟန်မူယဲ့က စောင့်မနေဘဲ လက်မြှောက်ပြီး ဝှေ့ယမ်းလိုက်သည်။

အနက်ရောင်ရုပ်သေးရုပ်သည် သူ့ရှေ့တွင် ပေါ်လာသည်။

နတ်ဘုရားသတ်ဖြတ်ခြင်းရုပ်သေးရုပ် ဖြစ်သည်။

ထိုရုပ်သေးရုပ် ပေါ်လာသောအခါ ထွက်ပြေးနေသောလူများက ရပ်တန့်လိုက်ကြသည်။

“ရုပ်သေးသခင်ပဲ”

“ငါတို့တော့ ကယ်တင်ခံရပြီ”

“မြန်မြန်လေး။ ရုပ်သေးသခင်နဲ့ ပူးပေါင်းလိုက်ကြ”

သူတို့က ပြန်လှည့်လာသည်။

သွေးကျားသစ်က သတိထားနေသော မျက်နှာထားဖြင့် ရုပ်သေးရုပ်၏ရှေ့သို့ ရောက်လာသည်။

နတ်ဘုရားသတ်ဖြတ်ခြင်း ရုပ်သေးရုပ်က မည်သည့်စွမ်းအားကိုမှ ထုတ်လွှတ်မနေသော်လည်း ဤကမ္ဘာသည် ရုပ်သေးရုပ်နှင့် ချပ်ဝတ်များကို ထိန်းချုပ်သည်။

ရုပ်သေးသခင်တစ်ယောက် ဖြစ်နေခြင်းသည် စွမ်းအားကို ဖော်ပြသည်။

“ဝေါင်း”

ထွက်ပြေးနေသောလူများက ပြန်လှည့်လာသောအခါ သွေးကျားသစ်က မနေနိုင်တော့ဘဲ ဟန်မူယဲ့ဆီသို့ ရောက်လာသည်။

ထိုကျားသစ်က ပါးနပ်ပြီး ရုပ်သေးရုပ်ကို ရှောင်တိမ်းခဲ့သည်။

ဟန်မူယဲ့က လက်မြှောက်ပြီး ဝှေ့ယမ်းလိုက်သည်။

နတ်ဘုရားသတ်ဖြတ်ခြင်း ရုပ်သေးရုပ်က ဓားဖြင့် ခုတ်ချသည်။

ရုပ်သေးရုပ်၏ လှုပ်ရှားမှုက လျင်မြန်ပြီး တိကျသည်။

“ရွှပ်”

သွေးကျားသစ်၏ရင်ဘတ်တွင် ဒဏ်ရာတစ်ခုပေါ်လာပြီး မြေပြင်တွင် လဲကျသွားသည်။

“ဘန်း”

သွေးကျားသစ်၏ ခန္ဓာကိုယ်ကြောင့် ဖုန့်မှုန့်များ ပေါ်ထွက်လာသည်။

“ဝိုင်းထားလိုက်”

လူတစ်ယောက်က အော်ဟစ်သည်။ ကုလားအုတ်စီးထားသော လူနှစ်ဆယ်ခန့်က သွေးကျားသစ်ကို ဝိုင်းရံလိုက်ကြသည်။

“ရုပ်သေးသခင်၊ ဒီကျားသစ်ကို အရှင်ဖမ်းချင်ပါသလား။ ဒါမှမဟုတ် သတ်လိုက်ရမလား”

သူတို့၏ခေါင်းဆောင် လူသန်ကြီးက ဟန်မူယဲ့ကို ကြည့်လိုက်ပြီး ဓားမြှောက်လျက် ပြောသည်။

‘အသေလား၊ အရှင်လား’

ဟန်မူယဲ့အတွက် ထိုမိစ္ဆာသားရဲသည် အသုံးမဝင်ပေ။

“ဝေါင်း”

သွေးကျားသစ်က နာကျင်စွာ ဟိန်းဟောက်လိုက်ပြီး ဟန်မူယဲ့ကို ထပ်ကာတလဲလဲ ဦးညွတ်နေသည်။

‘ဒါက အညံ့ခံတာလား’

ဟန်မူယဲ့က အနက်ရောင်ကြေးခွံနှင့် ကုလားအုတ်များကို ကြည့်လိုက်သည်။

သွေးကျားသစ်က ထိုကုလားအုတ်များထက် ပိုကောင်းသည်။

“ထားလိုက်ပါတော့။ ငါက စီးတော်သားရဲ လိုအပ်နေတာပဲ”

ဟန်မူယဲ့က လက်ကို ဝှေ့ယမ်းလိုက်သည်။ နတ်ဘုရားသတ်ဖြတ်ခြင်း ရုပ်သေးရုပ်က သံမဏိပြားအဖြစ် ပြောင်းလဲပြီး သူ့လက်မောင်းပေါ်သို့ ရောက်လာသည်။

ပတ်ဝန်းကျင်တွင်ရှိသော လူများက ထိုမြင်ကွင်းကို လေးစားအားကျစွာ ကြည့်နေကြသည်။

နာကျင်မှုကို သည်းခံထားသော သွေးကျားသစ်က ဟန်မူယဲ့ဆီသို့ ရောက်လာသည်။

“ရုပ်သေးသခင်၊ ကျွန်တော်တို့က ဘုရားမြို့ရဲ့ ကုန်သည်အဖွဲ့ပါ။ ကျွန်တော်တို့မြို့က သိပ်မဝေးတော့ပါဘူး”

“မြို့ကို အလည်လာဖို့ ဖိတ်ခေါ်ပါတယ်”

ခေါင်းဆောင်က ဟန်မူယဲ့ကို ဦးညွတ်လိုက်ပြီး ကျယ်လောင်စွာပြောသည်။

ဟန်မူယဲ့က ‌ခေါင်းညိတ်သည်။

ယခုအချိန်တွင် သူက ဤစကြဝဠာကို လျင်မြန်စွာ လေ့လာပြီး ပျောက်ဆုံးသွားသော အားကောင်းသည့်ချပ်ဝတ်နှင့် ရုပ်သေးရုပ်များကို ရှာဖွေရမည်။

ထိုရတနာများကသာ ကပ်ဘေးကို ခိုင်မာစွာ ခုခံနိုင်လိမ့်မည်။

သူက မူလစကြဝဠာသို့ ပြန်ရောက်သွားသောအခါတွင် မရေမတွက်နိုင်သော ကျွမ်းကျင်သူများကို ဆွဲဆောင်မိလိမ့်မည်။

သူ၏ ကြွယ်ဝမှုနှင့် ကောင်းကင်စက်ဝန်းနတ်ဘုရားလောက၏ အတားအဆီးကို ချိုးဖျက်ခဲ့သောကြောင့် ပြဿနာတက်လိမ့်မည်။

ဤစကြဝဠာတွင် သူက ရုပ်သေးနှင့် ချပ်ဝတ်များကို ရှာဖွေရမည်။

ကျန်းယွီလင်း၏ ဓားမှတ်ဉာဏ်မှတစ်ဆင့် ထိုရတနာများကို အင်အားစုကြီးများက ထိန်းသိမ်းထားကြောင်း သိခဲ့ရသည်။

သို့သော် အပျက်အစီးနယ်မြေတွင် ပြန့်ကျဲနေသော ရုပ်သေးရုပ်နှင့် ချပ်ဝတ်များက အရေအတွက်ပိုများသည်။

“မင်းတို့ ဘုရားမြို့ရဲ့အဆင့်က ဘယ်လောက်လဲ”

ဟန်မူယဲ့က သူတို့ကို ကြည့်လိုက်သည်။

ကြယ်စင်စုစကြဝဠာတွင်ရှိသော မြို့များ၏အဆင့်သည် ကျင့်ကြံဆင့်နှင့် တူညီနေသည်။

ကျွမ်းကျင်သူတစ်ယောက်၏ ကျင့်ကြံခြင်းဖြင့် မြို့၏အဆင့်ကို ဆုံးဖြတ်သည်။

ဥပမာအနေဖြင့် သူတော်စင်အဆင့် ကျွမ်းကျင်သူများသည် မြို့ကြီးများတွင် နေထိုင်ကြသည်။

“ဆရာသခင်၊ ကျွန်တော်တို့ ဘုရားမြို့က အဆင့်ငါးမြို့ပါ”

ခေါင်းဆောင်လူသန်ကြီးက ပြောသည်။ ထို့နောက် သူက ဟန်မူယဲ့၏လက်မောင်းကို ကြည့်လိုက်ပြီး ဆက်ပြောသည်။

“ကျွန်တော်တို့ ဘုရားမြို့က အဆင့်ကိုးအပျက်အစီးနယ်မြေဖြစ်တဲ့ ယုထောင်မြို့ကို စောင့်ကြပ်နေပါတယ်”