အခုဝေတောင်မဝေဖန်ရဲတော့! ဘယ်ကစရမလဲ! ၂

သို့သော် သူတို့ခန္ဓာကိုယ်အင်အားဆုံးရှုံးမှုက လေ့ကျင့်ရေးဆင်းသောအခါ ပိုပြင်းထန်သည်။

သူတို့ဖျော်ရည်က အားကစားသမားတွေအတွက်ဆုလဒ်ပဲမဟုတ်လား?

သူတို့နှစ်ယောက်သားမှာ အချိန်အတော်ကြာကြာ သက်ဆိုင်ရာအကြောင်းများအသေးစိတ်ပြောကြသည်။ မိုးမှောင်လာသောအခါ တန့်ကွမ်းမပြန်ခင်ထမင်းအတူစားပြီး နင်းမြို့တော်သို့အပြေးပြန်သွားသည်။

သင့်တော်သောစက်ရုံမန်နေဂျာမတွေ့သေးခင် လောလောဆယ် ဒီစက်ရုံမှခွာမရသေး။

ချင်လင်ဖက်တွင် အာဆီယံပွဲအတွင်းနိုင်ငံ့အသင်းအတွက်ဖျော်ရည်စပွန်ဆာစာချုပ်ကို ဝမ်းသာအားရလက်မှတ်ထိုးနေကြပြီး တစ်ဖက်တွင်ဘရန်းကြီးသုံးခုမှာ ချင်းလင်လက်ဖက်ရည်ကိစ္စကိုမရပ်မနားဖြေရှင်းနေကြသည်။

ညပိုင်း၌ ယွီရှန်းလည်း သူ့ရုံးခန်းထဲတွင် သူ့လက်အောက်ငယ်သားများ၏ ချင်းလင်လက်ဖက်ရည်ကိုနာမည်ဖျက်ထားသောအစီအစဉ်ရလိုက်သည်။

ထိုအစီအစဉ်ကြောင့် သူစိတ်ကျေနပ်သွား၏။ ဒါလုံးဝလမ်းကြောင်းပေးထားသည်။

အစီအစဉ်တွင်ပါဝင်သောအကြောင်းအရာများမှာ ချင်းလင်လက်ဖက်ရည်ကို စုံတွဲများကိစ္စအပြီး အားပြန်ပြည့်စေရန်အသုံးပြုနိုင်သော်လည်း ချင်းလင်လက်ဖက်ရည်အများကြီးသောက်လျှင် အမျိုးသားများ၏စွမ်းဆောင်ရည်ကိုကျဆင်းစေကြောင်း လုံးဝလမ်းကြောင်းပေးထားသည်။

ဒီအချက်မှန်သည်ဖြစ်စေ မှားသည်ဖြစ်စေ၊ ပြည်သူ့အမြင်ဖြစ်သွားပြီဆိုတာနှင့် အမျိုးသားအများစုက သုံးဖို့လန့်သွားလိမ့်မည်။





ဒါအမျိုးသားတွေအကြောက်ဆုံးပဲမလား?

ဒီအထောက်အကူကြောင့် သူတို့ရဲ့စိတ်ပျက်စရာအခြေအနေကိုသက်သာဖို့ ချင်းလင်လက်ဖက်ရည်ကိုလုယူနိုင်လိမ့်မည် (သို့မဟုတ်) အမျိုးသားတွေ ချင်းလင်လက်ဖက်ရည်ကိုလန့်ပြီး အသုံးမပြုဘဲနေကြလိမ့်မည်။

ထိုစဉ် ဖုန်းမြည်လာသည်။

ယွီရှန်းက သူ့ဖုန်းကိုကောက်ကိုင်လိုက်သည်။ တောင်ပိုင်းမှတခြားဘရန်းတစ်ခု၏အထွေထွေမန်နေဂျာကဖုန်းဆက်လာခြင်းဖြစ်သည်။

သူကချက်ချင်း ဖုန်းကိုင်လိုက်၏။ တစ်ဖက်မှအသံကိုကြားသောအခါ သူကပြုံးလိုက်ပြီး_ ''မပူပါနဲ့ ဥက္ကဌမုန့်... ငါအစီအစဉ်လုပ်ပြီးသွားပြီ... ကောင်းပြီလေ... အခုအတူတူတိုက်ကြတာပေါ့''

ဖုန်းချပြီးနောက် ယွီရှန်းကအစီအစဉ်ကို သူ့လက်အောက်ငယ်သားဆီပြန်ပေး၍ ညွှန်ကြားလိုက်သည်_ ''ဒါကို ကြေးစားဗီဒီယိုအတိုဘလော့ဂါတွေ Weibo အတည်ပြုအကောင့်တွေဆီပို့လိုက်''

''ဟုတ်ကဲ့!'' လက်အောက်ငယ်သားက အစီအစဉ်ယူပြီး ဘေးဘက်သွား၍ဆက်သွယ်လိုက်သည်။

ယနေ့ခေတ်တွင် Weibo အကောင့်တွေ၊ ဗီဒီယိုအတိုတွေအများကြီးရှိသည်။ သူတို့ပိုက်ဆံသုံးဖို့ဆန္ဒရှိနေသရွေ့ သူတို့ကသိသိရက်နှင့် ပြည်သူ့အမြင်ကိုလမ်းကြောင်းပေးကြလိမ့်မည်။

အင်တာနက်ပေါ်မှ အတည်ပြုအကောင့်များ၊ ဘလော့ဂါများကို စိတ်ယုတ်ရှိမှန်း အွန်လိုင်းပြည်သူများလုံးဝမသိနိုင်။ ဘာမှန်းမသိရသေးခင် ကားလှန်သည့်နေ့ကိုစောင့်ရုံသာရှိသည်။

ယွီရှန်းက စားပွဲပေါ်မှချင်းလင်လက်ဖက်ရည်တစ်ပုလင်းယူ၍ တစ်ငုံနှစ်ငုံသောက်ကြည့်ပြီး ချီးကျူးလိုက်သည်_ ''အာနိသင်က တကယ်အရမ်းကောင်းတယ်... ဒါပေမဲ့ နှမြောစရာပဲ''

ချင်းလင်လက်ဖက်ရည်ရဲ့အာနိသင်က သူကိုယ်စားလှယ်လုပ်တဲ့ Red Bull ထက် ပိုအစွမ်းထက်ကြောင်း သူမငြင်းနိုင်။

သူသာ Red Bull ရဲ့တောင်ပိုင်းအထွေထွေကိုယ်စားလှယ်မဟုတ်ရင် ဒီထုတ်ကုန်က ကိုယ်စားလှယ်လုပ်ဖို့အရမ်းကောင်းတာ အသေအချာပင်။

ဖြစ်ချင်တော့ အခုရန်ဘက်လုပ်နေရသည်။

ဒီညလွန်ရင် ချင်းလင်လက်ဖက်ရည်က ဒီကိစ္စကိုဘယ်လိုရှင်းမလဲကြည့်ချင်သေးသည်။

ယွီရှန်းတွေးတောနေစဉ် ကိုယ်လုံးကိုယ်ပေါက်ကောင်းကောင်းနှင့်အမျိုးသမီးတစ်ဦးဝင်လာသည်ကိုတွေ့လိုက်ရသည်။

ဒါသူ့အတွင်းရေးမှူးပင်။ ညကျရင် ချင်းလင်လက်ဖက်ရည်ရဲ့တိတိကျကျအာနိသင်ကို သူမနှင့်ကြည့်ရဦးမည်။

အတွင်းရေးမှူးက ဝင်လာပြီး အမောတကောနှင့်_ ''ဥက္ကဌယွီ... သတင်းဆိုးရှိပါတယ်... ကျွန်မကို ချင်းလင်လက်ဖက်ရည်ကုမ္ပဏီရဲ့သတင်းအာရုံစိုက်ခိုင်းထားတာ... သူတို့ရဲ့တရားဝင်အကောင့်မှာ ချင်းလင်လက်ဖက်ရည်ကုမ္ပဏီက အာဆီယံပွဲအတွင်း နိုင်ငံ့အသင်းအသိအမှတ်ပြုစပွန်ဆာဖျော်ရည်ဖြစ်လာတဲ့အကြောင်း အခုပဲဗီဒီယိုတင်ပြီးကြေညာထားပါတယ်''

''ဘာ?'' ယွီရှန်းကအလန့်တကြားမတ်တပ်ထရပ်လိုက်ပြီး အလောတကြီးမေးလိုက်၏_ ''ဒါအမှန်ပဲလား?''





''အမှန်ပါပဲ'' အတွင်းရေးမှူးက သူမဖုန်းကိုအလျင်စလိုထုတ်၍ ဗီဒီယိုဖွင့်ကာ ယွီရှန်းလက်ထဲထည့်ပေးလိုက်သည်။

ယွီရှန်းကဖုန်းယူပြီး ချင်းလင်စံအိမ်တရားဝင်အကောင့်မှတင်ထားသောဗီဒီယိုကိုကြည့်လိုက်သည်။

''မင်္ဂလာပါ အားလုံးပဲ... ကျွန်မက ယောင်ယောင်ပါ... ထပ်ဆုံပြန်ပြီနော်... အခုတလော လူတိုင်းက ကျွန်မတို့သူဌေးရဲ့ချင်းလင်လက်ဖက်ရည်ကိုကြိုက်...''

''ဒီနေရာမှာ ယောင်ယောင်လည်း အားလုံးကိုသတင်းကောင်းမျှဝေချင်ပါတယ်... ဒီနေ့ ချင်းလင်လက်ဖက်ရည်က အာဆီယံပွဲအတွင်း နိုင်ငံ့အသင်းအသိအမှတ်ပြုစပွန်ဆာဖျော်ရည်ဖြစ်သွားပါပြီ''

ရိုးရိုးရှင်းရှင်းကြေညာချက်ဗီဒီယိုဖြစ်သော်လည်း လက်ရှိချင်းလင်လက်ဖက်ရည်၏ကျော်ကြားမှုကြောင့် လှိုင်းအကြီးကြီးရိုက်ခတ်သွားသည်။

ဗီဒီယိုမှတ်ချက်နေရာတွင် ပိုပြီးတောင်လူစည်နေသည်:

''၆၆၆... ဒါချင်းလင်လက်ဖက်ရည်ရဲ့အာနိသင်ကိုထောက်ခံပေးတဲ့တရားဝင်အဆင့်အတန်းပဲ... ဒီဖျော်ရည်ကို မြောက်ပိုင်းကမြေခွေးတွေဘယ်တော့ဝယ်နိုင်မလဲ ပြောပါလား?''

''ငါ့မိန်းမနဲ့အာနိသင်ကိုစမ်းကြည့်ပြီးတော့ ဒီပစ္စည်းက အားကစားသမားတွေအတွက် တကယ့်ဆုလဒ်လို့တွေးမိသားပဲ''

''အာဆီယံပွဲတက်နိုင်တဲ့ထုတ်ကုန်တွေက နိုင်ငံတကာအိုလံပစ်ကော်မတီက စမ်းသပ်ပြီးသား... အားလုံးစိတ်ချလက်ချသောက်လို့ရတယ်''

''တကယ်တော့ ဒီဖျော်ရည်ကို လေ့ကျင့်ရေးဆင်းတဲ့စစ်သားတွေလည်းသုံးနိုင်တယ်မလား?''

“…”

''တကယ်တော့... ချင်းလင်လက်ဖက်ရည်က တိုင်းပြည်ကိုကယ်နိုင်မကယ်နိုင် ပိုသိချင်နေတာ''

''အရင်ပိုစတာ... ထတော့... နိုင်ငံ့ဘောလုံးအသင်းက ပင်လယ်သခွားသီးတွေ ထပ်မစားနိုင်တော့ဘူး''

''ထတော့ +၁... နိုင်ငံ့ဘောလုံးအသင်းက သူတို့လစာသုံးဆလျော့သွားပြီ... သူတို့လစာက ယွမ်သုံးသန်းပဲရှိတော့တယ်... နိုင်ငံ့ဘောလုံးအသင်းတစ်သင်းလုံးက သူတို့လစာနဲ့သူတို့လုပ်ရတာမတန်ဘူးဆိုပြီး ဆန္ဒပြနေပြီ''

''ပင်လယ်သခွားသီး + ချင်းလင်လက်ဖက်ရည်က စက်မှုနိုင်ငံ Y ကို သရေကျအောင်လုပ်နိုင်တယ်မလား?''

''နောက်ဟာသပြောရအောင်... အရှေ့ပိုင်းဘောလုံးအသင်းက အမျိုးသားနိုင်ငံ့အသင်းကို တရားဝင်စိန်ခေါ်နေပြီ... မင်းဘယ်ဘက်ကလောင်းမှာလဲ?''

“…”

သို့သော် ယွီရှန်းမှာ ထိုစည်ကားနေသောမှတ်ချက်နေရာကိုအာရုံမစိုက်နိုင်တော့။

ဒီလိုကြေညာချက်မျိုးကို ဘယ်သူမှမတင်ရဲမှန်းသိသော်လည်း ဗီဒီယိုကိုမြင်ပြီးနောက် ချက်ချင်းသူ့ကွန်ပျူတာဖွင့်၍ ဒီနှစ်ဟန်ကျိုးအာဆီယံကစားပွဲ၏နိုင်ငံ့အသင်းအထူး Weibo အကောင့်ကိုအလောတကြီးရှာကြည့်လိုက်သည်။

သတင်းအချက်အလက်ခေတ်မှာ တရားဝင် Weibo နှင့်ဗီဒီယိုအတိုအကောင့်များလည်း ပိုပိုများလာသည်။

အာဆီယံကစားပွဲ၏တရားဝင် Weibo အကောင့်နှင့် အာဆီယံကစားပွဲ၏နိုင်ငံ့အသင်းအထူး Weibo အကောင့်ကို အာဆီယံပွဲများအတွက်လျှောက်ထားချက်အောင်မြင်ပြီးနောက် ဖွင့်ထားတာကြာခဲ့ပြီ။ လှုပ်ရှားမှုတစ်ခုခုရှိလျှင် လူထုသိအောင်တင်ပေးပြီး လူထုနှင့်အာဆီယံပွဲများအကြား ဆက်သွယ်မှုရှိစေသည်။ ပူးပေါင်းပါဝင်မှုလည်း အားကောင်းလာလိမ့်မည်။