ညဖက် ရောက်ရှိလာခြင်း

ဝမ်ပေါင်လဲ့က အသံအစေခံ အကြံပြုချက်ကို သဘောမတူပေ။ သို့သော် သူက မငြင်းဆန်ခဲ့ပေ။ ပြောရလျှင် သူက လေးကြိုးမျဉ်းဂိုဏ်းကို မဝင်ရောက်ရသေးပေ။ သူ ဝင်ရောက်ပြီးသည့်နောက်မှ အဆိုးအကောင်းကို ချင့်ချိန်ဖို့ရာ နောက်ကျလွန်းသွားမည် မဟုတ်ပေ။

တာဝန်ခံကို ပြန်လွှတ်လိုက်ပြီးသည့်နောက်တွင် အပြင်ဘက်တွင် ရှိနေသည့် ကောင်းကင်ကြီးက ဖြည်းဖြည်းချင်း မှောင်မဲလာ၏။ ဝမ်ပေါင်လဲ့က သူ့အခန်းအတွင်း တင်ပျဉ်ခွေ ထိုင်နေသည်။ သူက တိတ်တဆိတ်ဖြင့်သာ စောင့်ဆိုင်းနေ၏။

ဂိုဏ်းကြီးသုံးဂိုဏ်းက အမှောင်ထုအတွင်း တည်ရှိလေ၏။

ဝမ်ပေါင်လဲ့က မျက်မှောင်ကြုတ်လိုက်ပြီး ပြတင်းပေါက်အပြင်ဘက်မှ ကောင်းကင်ယံကို တစ်ချက်ကြည့်လိုက်သည်။ နေဝင်ပြီးသွားပြီဖြစ်ကာ ညက နောက်ကျနေခြင်းမရှိဘဲ အလျင်အမြန် ချဉ်းကပ်လာနေပြီဖြစ်သည်။

ဤသို့ဖြင့် အချိန်ကကုန်ဆုံးသွားပြီး အခန်းက ပိုမိုတိတ်ဆိတ်လာကာ ပြတင်းပေါက် အပြင်ဘက်ရှိ လမ်းသွားလမ်းလာများကလည်း ပိုမိုနည်းပါးလာသည်။ အလင်းရောင်ပျောက်ဆုံးသွားပြီး အမှောင်ထုဖြင့် လွှမ်းခြုံသွားသည့်အခါ ည ကျရောက်လာမည် ဖြစ်၏။

မနေ့ကကဲ့သို့ အိမ်အတွင်းအပြင်အားလုံးက တိတ်ဆိတ်နေသည်။

တိတ်ဆိတ်မှုအလယ်တွင် ဝမ်ပေါင်လဲ့က ခေါင်းကို မော့ကာ အချိန်အတော်ကြာ ပိတ်ထားသည့် မျက်လုံးကို ဖွင့်လိုက်၏။ သူက မတ်တတ်ရပ်ကာ တံခါးဆီ လျှောက်သွားလိုက်သည်။

သူက ပြတင်းပေါက်ကို မဖွင့်လိုက်ပေ။ ထိုသို့လုပ်ဖို့ရာအတွက်လည်း မလိုအပ်ပေ။

ထင်းယွိမြို့ထဲရှိ ညက လူများစွာအတွက် အန္တရာယ်ကြီးမားသော်လည်း ထင်းယွိစည်းမျဉ်းဥပဒေသ၏ ဒိုင်မေးရှင်းမှ ထူးထူးဆန်းဆန်း တည်ရှိမှုများကို အမဲလိုက်ခဲ့သည့် ဝမ်ပေါင်လဲ့အတွက်မူ သူ့ကိုယ်ပိုင်ခြံဝန်းအတွင်း လျှောက်သွားနေသည်နှင့် မကွာခြားလှပေ။

ထိုအရာက သူ့အနေဖြင့် အဆင့်မြင့်သက်ရှိများနှင့် မကြုံရသည့် အခြေအနေကို ပြောပြနေခြင်း ဖြစ်၏။ ကံကောင်းစွာဖြင့် ထိုသို့သော တည်ရှိမှုမျိုးက ကမ္ဘာထဲတွင် ပုံမှန်တွေ့လေ့တွေ့ထ မရှိသည့်အတွက် မြင်ရခဲသည်။

ထို့ကြောင့် တံခါးကို ဖွင့်လိုက်သည့် ဝမ်ပေါင်လဲ့က ရယ်သံကို ကြားလိုက်ရသော်လည်း အမူအရာပြောင်းလဲသွားခြင်း မရှိပေ။ သူက ညာဖက်လက်ကို မြှောက်ကာ ညာဖက်မှ ဆွဲယူလိုက်၏။

ထိုရယ်သံက ရုတ်ချည်းဆိုသလို ရပ်တန့်သွားသည်။

“ငါ ဒီရယ်သံကို မကြိုက်ဘူး။  မရယ်နဲ့”

ဝမ်ပေါင်လဲ့က ဗလာကျင်းနေသည့် ညာဖက်အခြမ်းကို ကြည့်လိုက်သည်။ သူ့လက်ထဲတွင် ဘာမှမရှိသော်လည်း သူ့ညာဖက်လက်ထဲ ထုတ်လွှတ်နေသည့် တုန်ခါနှုန်းတို့က တည်ရှိမှုတစ်ခု ရှိနေဟန်ပေါ်သည်။ ထိုအရာက ခေါင်းညိတ်ပြနေဟန်ပေါ်၏။

ဝမ်ပေါင်လဲ့က ကျေနပ်စွာ လွှတ်ပေးလိုက်သည်။ သူက သွေးဆာတတ်သည့်သူ မဟုတ်ကြောင်း ခံစားမိသည်။ တစ်ချိန်တည်းဆိုသလို တစ်ဖက်လူက သူ့သွားကြားမညပ်လောက်အောင် သေးငယ်လွန်းသည့်အတွက် လွှတ်ပေးလိုက်ခြင်းမျိုး မဟုတ်ပေ။

ငါက အကျိုးအကြောင်းသင့်တဲ့သူပဲ…

ဝမ်ပေါင်လဲ့က သူ့ကိုယ်သူ တွေးလိုက်သည်။ ထို့ကြောင့် သူက ရှေ့ကို သွားလိုက်၏။ သူက ပင်မတံခါးဆီ လျှောက်လှမ်းသွားကာ စားသောက်ဆိုင်ထဲမှ ထွက်ခွာလာလိုက်သည်။

သူက လမ်းတစ်လျှောက် အခန်းများစွာကို ဖြတ်ကျော်လာခဲ့ရ၏။ အခန်းတိုင်းတွင် ကျင့်ကြံသူများရှိသည်ကို ခံစားမိသော်လည်း မည်သူကမှ တံခါးကို မဖွင့်ရဲကြပေ။ စားသောက်ဆိုင်ကပင် တားမြစ်ချက်တစ်ခု ဖြစ်လာသည့်အလား ဖြစ်၏။ ဝမ်ပေါင်လဲ့ကမူ ပင်မတံခါးမှထွက်ကာ လမ်းပေါ် လျှောက်လာသည်။ သူက သူ့ဝန်းကျင်တွင်ရှိနေသည့် ဗလာကျင်းနေသည့်လေထုကို ကြည့်ရင်း ညအခါမှ ရောက်လာသည့် တိတ်ဆိတ်မှုကို ခံစားလိုက်၏။ သူက လေထု၏ တီးတိုးသံများကိုပင် ကြားနေရသည်။

လေက အရိုးခိုက်လုမတတ် အေးစက်နေ၏။ ထိုအရာက လက်အေးများဖြင့် ဝမ်ပေါင်လဲ့၏ ခန္ဓာကိုယ်တစ်ခုလုံးကို ပွတ်သပ်နေသကဲ့သို့ ဖြစ်သည်။ ထိုအရာက လှပသည့် မြင်ကွင်းတစ်ခု ဖြစ်သင့်သော်လည်း ယခုအခါ မှောင်မဲကာ တိတ်ဆိတ်သည့် နောက်ခံဖြင့် ကြက်သီးထဖို့ ကောင်းနေလေ၏။

ဝမ်ပေါင်လဲ့က ထိုအရာကို အာရုံမစိုက်ပေ။ သူက သူ့ခန္ဓာကိုယ်ထဲမှ အာသီသစည်းမျဉ်းဥပဒေသ၏ ချိတ်ပိတ်ထားမှုကို ပိုမိုအားကောင်းစေလိုက်သည်။

ခေတ္တမျှတိတ်ဆိတ်နေပြီးသည့်နောက်တွင် ဝမ်ပေါင်လဲ့၏ ရှေ့တစ်လှမ်း တိုးလိုက်၏။ သူက ညအချိန် မြို့ထဲ လျှောက်လှမ်းလာသည့်အခါ ထူးထူးဆန်းဆန်း အသံများစွာကို ကြားလိုက်ရသည်။ အမှောင်ထုထဲမှ အကြည့်များစွာက သူ့အပေါ် ကျရောက်လာသကဲ့သို့ဖြစ်၏။

သူတို့ နီးကပ်လာသည့်အခါ ဝမ်ပေါင်လဲ့က မျက်မှောင်ကြုတ်လိုက်သည်။ သူကညာဖက်လက်ကို မြှောက်ကာ ဝှေ့ယမ်းလိုက်၏။ ထို့နောက် ချက်ချင်းဆိုသလို သူ့လက်ထဲ၌ ဂီတသင်္ကေတတစ်ခု ပေါ်ထွက်လာသည်။ ဂီတသင်္ကေတက အားဖျော့သည့် အလင်းရောင် ထုတ်လွှတ်နေပြီး ခပ်ဝါးဝါးအသံတစ်သံပင် ပဲ့တင်ထွက်နေသည်။

အလင်းရောင်နှင့် အသံအောက်တွင် သူ့ဘေးပတ်ဝန်းကျင်တွင် စုဝေးနေကြသည့် ထူးထူးဆန်းဆန်း သက်ရှိများက ကြောက်ရွံ့သွားကြဟန်ပေါ်သည်။ သူတို့က အလျင်စလို ရှေ့တိုးလာခြင်း မရှိတော့ပေ။ ထိုအစား သူတို့က အခွင့်အရေးကို စောင့်ဆိုင်းရင်း ဘေးနားမှသာ စောင့်ကြည့်နေကြ၏။

ဝမ်ပေါင်လဲ့၏ အမူအရာက နဂိုအတိုင်းသာ ဖြစ်၏။ သို့သော် သူ့စိတ်ထဲ၌ လှောင်ရယ်နေမိသည်။ အကယ်၍ သူသာ လေးကြိုးမျဉ်းဂိုဏ်းထဲ မဝင်ရောက်ဘဲ သူ့ကိုယ်သူ မထုတ်ဖော်လိုပါက ဘေးပတ်ဝန်းကျင်တွင် ရှိနေသည့်သူအားလုံးက သူ့အစာ ဖြစ်လာလိမ့်မည်။

သူက သူ့နားထဲ အသံများ တိုးပွားလာသည်ကို ဂရုမစိုက်ပေ။ သူက ခေါင်းငုံ့ထားပြီး လက်ထဲမှ ဂီတသင်္ကေတကို ကြည့်လိုက်၏။ သူက ထိုအရာထဲ နတ်ဘုရားအသိစိတ်ကို ထည့်သွင်းလိုက်သည့်အခါ တစ်စုံတစ်ခုကို ခံစားမိလိုက်သည်။ အဝေးတစ်နေရာရှိ တစ်စုံတစ်ခုက သူ့ကို ဆွဲခေါ်နေသကဲ့သို့ ဖြစ်၏။

လေးကြိုးမျဉ်းဂိုဏ်း…

ဝမ်ပေါင်လဲ့က အတွေးနက်နေရင်း ထိုခေါ်ဆောင်ရာ အသံနောက်ကို ဦးတည်လိုက်သည်။ သူက အလျင်အမြန် လှုပ်ရှားနေသော်လည်း သူ့ဘေးပတ်ဝန်းကျင်တွင် ရှိနေသည့် ထူးထူးဆန်းဆန်း အရာများက တစ္ဆေများကဲ့သို့ ပျောက်ကွယ်သွားခြင်း မရှိပေ။ သူတို့က သူ့နောက်မှ လိုက်ပါလာ၏။ ပိုမိုပင် များပြားလာသေးသည်။

ဝမ်ပေါင်လဲ့က ဤနေရာတွင် မီးတုတ်တစ်ခု ဖြစ်လာသည့်အလား အားလုံး၏ အာရုံကို ဖမ်းစားထားလေ၏။

သူ့အထဲတွင်ရှိနေသည့် ဂီတသင်္ကေတက အလျင်အမြန် မှေးမှိန်လာသည်။ ထိုမှေးမှိန်မှုအလယ်တွင် ဝမ်ပေါင်လဲ့က အသက်ရှူသံကို ကြားလိုက်ရ၏။ သူ့ဘေးပတ်ဝန်းကျင်တွင်ရှိနေသည့် အရာများစွာက သူ့လက်ထဲမှ ဂီတသင်္ကေတကို ဖယောင်းတိုင်သဖွယ် သဘောထားကာ ငြှိမ်းသက်ဖို့ ကြိုးစားနေသည်ကို ခံစားမိလိုက်သည်။

ဂီတသင်္ကေတ၏ တောက်ပမှုက မှေးမှိန်လာသည့်အခါ ဘေးမှ ဆိုးယုတ်မှုတို့က ပိုမိုကြီးထွားလာ၏။ ထူးထူးဆန်းဆန်းသက်ရှိများက ဂီတသင်္ကေတ၏ တောက်ပမှုအပြီးတိုင် ပျောက်ဆုံးသွားမည့်အချိန်က စောင့်ဆိုင်းနေကြဟန်ပေါ်သည်။

အကယ်၍ တခြားသူဆိုပါက သူတို့က အင်မတန် ထိတ်လန့်နေကြလိမ့်မည်။ သို့သော်လည်း ဝမ်ပေါင်လဲ့က ခေတ္တမျှ မျက်မှောင်ကြုတ်လိုက်၏။ သူ့အမူအရာက နဂိုအတိုင်းကျန်ရှိနေကာ ရှေ့ဆက်လျှောက်လှမ်းသွားလိုက်သည်။ သူက သွားနေရင်းဖြင့် သူ့ဝန်းကျင်တွင်ရှိနေသည့် အသက်ရှူသံများနှင့် ခြေသံများကို ကြားနေရပြီး သူ့လက်တွင်ရှိသည့် ဂီတသင်္ကေတကလည်း ပိုမိုမှေးမှိန်လာလေ၏။

ထိုအရာက ဝမ်ပေါင်လဲ့၏ အကြည့်ထဲတွင် အေးစက်စက် အလင်းရောင်တစ်ချက် ဖြတ်ပြေးသွားစေသည်။ သူက စိတ်ထဲ၌ အကောင်းအဆိုး ချင့်ချိန်နေ၏။ အကယ်၍ ဤသို့သာ ဆက်ဖြစ်နေပါက ဂီတသင်္ကေတ ဆုံးရှုံးသွားလျှင် အသေးအဖွဲကိစ္စသာဖြစ်သော်လည်း လေးကြိုးမျဉ်းဂိုဏ်းကို ဝင်ရောက်ဖို့ သက်သေအထောက်အထား မရှိလျှင် ကိစ္စကြီးကြီးမားမား ဖြစ်သွားလိမ့်မည်။

ဝမ်ပေါင်လဲ့က ရပ်တန့်လိုက်၏။ သူက လက်ထဲမှ ဂီတသင်္ကေတကို သိမ်းဆည်းဖို့ရာ ပြင်လိုက်သည်။ ထိုအခါ ဝမ်ပေါင်လဲ့၏ အမူအရာက အနည်းငယ် ပြောင်းလဲသွားခဲ့၏။ သူက ခေါင်းမော့ကာ အဝေးတစ်နေရာကို လှမ်းကြည့်လိုက်သည်။ သိပ်မကြာခင် မီးအိမ်လေးခုဝှေ့ယမ်းရင်း အမှောင်ထုထဲ ချဉ်းကပ်လာသည်ကို ခံစားမိလိုက်၏။

သူတို့က ပေါ်ထွက်လာသည့်အခါ ပိန်ပါးပါးပုံရိပ်လေးခု ပေါ်ထွက်လာသည်။ သူတို့က အနီရောင်ဝေါယာဉ်ကို သယ်ဆောင်ထားပြီး ထိုဝေါယာဉ်မှ ကျောက်စိမ်းလို လက်တစ်ဖက်ကိုသာ မြင်တွေ့နိုင်သည်။

သူတို့က လက်က ပုံမှန်မဟုတ်စွာ ဝှေ့ယမ်းနေလေ၏။ ကြည့်ရသည်မှာ ပိုင်ရှင်က အတော်လေး စိတ်အခြေအနေကောင်းနေဟန်ပေါ်သည်။ သူတို့က တံတားကို ဖြတ်ကျော်လာသည့်အခါ ဝမ်ပေါင်လဲ့က ဂီတသံစဉ်ညည်းသံကိုပင် ကြားလိုက်ရသည်။

ညဖက်လူသူကင်းမဲ့သည့်အချိန်၌ အနီရောင်ဝေါယာဉ် တစ်စီး ရှိနေသည်။

ထိုဝေါယာဉ်က ဝမ်ပေါင်လဲ့၏ အကြည့်ကို တောက်ပလာစေသည်။ ထိုဝေါယာဉ်က ရောက်ရှိလာသည့်အခါ သူ့ဘေးပတ်ဝန်းကျင်မှ နောက်ဆုတ်သွားသည့် အသံများကို ကြားလိုက်ရ၏။ ညတွင်ရှိသည့် တည်ရှိမှုများက ထိုဝေါယာဉ်ကို ကြောက်ရွံ့နေကြဟန်ပေါ်သည်။

ဝမ်ပေါင်လဲ့က အနီရောင်ဝေါယာဉ်မှ ကျင့်ကြံသူ၏ အငွေ့အသက်ကို မခံစားမိပေ။

ထိုအရာက ကျင့်ကြံသူတစ်ဦး မဟုတ်ဘဲ ဝေါယာဉ်ကို သယ်ဆောင်လာသည့်သူလေးယောက်ကလည်း လူသားများမဟုတ်ပေ။

ဝမ်ပေါင်လဲ့က လမ်းဖယ်ပေးဖို့ တွေးလိုက်၏။

ဝေါယာဉ်အား သူ့နားမှ ဖြတ်သန်းခွင့်ပြုလိုက်သည်။ လူလေးယောက်က ဝမ်ပေါင်လဲ့ကို တစ်ချက်ပင် မကြည့်သလို ဝေါယာဉ်ထဲတွင် ရှိနေသည့်လူအတွက်လည်း အတူတူသာ ဖြစ်၏။ လိုက်ကာ အောက်မှ ထွက်နေသည့် သူ့လက်မောင်းက ဝှေ့ယမ်းနေဆဲ ဖြစ်သည်။

ဝေါယာဉ်က ဝမ်ပေါင်လဲ့ကို ဖြတ်ကျော်သွားသည့်အခါ လေတစ်ချက်တိုက်ခတ်သွားကာ လိုက်ကာက အနည်းငယ် လွင့်သွားခဲ့သည်။

ဝမ်ပေါင်လဲ့က ဘေးတစ်ဖက်တစ်ချက်ကို ခေါင်းလှည့်ကြည့်လိုက်သည့်အချိန် ဝေါယာဉ်ထဲ လက်မှလွဲ၍ ဗလာကျင်းနေသည့် နေရာကို တွေ့လိုက်ရသည်။

ထိုလက်ကသာ ကျန်ရှိပြီး အစွန်း၌ ခရမ်းရောင်သွေးစက်များ ကျန်ရှိနေသည်။

ဝမ်ပေါင်လဲ့က ထိုအရာကို မြင်လိုက်သည့်အချိန် ဝေါယာဉ်ကလည်း ရုတ်ချည်း ရပ်တန့်သွားခဲ့သည်။