စတင်ခြင်း

တစ်ဖက်သူက သူ့ကို မမြင်နိုင်သည့် အကြောင်းအရင်းမှာ ဝမ်ပေါင်လဲ့သည် ထူးကဲနေသည့်အတွက်ကြောင့် မဟုတ်ပေ။ အကြောင်းအရင်းကမူ သေချာသည့်အနေအထားအရ သူက တစ်ဖက်သူ၏ ဂီတကို နားလည်သွားသည့်အခါ သူ့ခန္ဓာကိုယ်က ဂီတဖြင့် တစ်သားတည်း ဖြစ်သွားခဲ့သည်။

သူကိုယ်တိုင်က တစ်ဖက်သူ၏ ဂီတတစ်စိတ်တစ်ပိုင်းဖြစ်လာသကဲ့သို့ ဖြစ်၏။ ထိုအရာက ဂီတတာအိုဂိုဏ်းမှ ကျင့်ကြံသူအား သူ့စွမ်းအားအပြည့် ထုတ်လွှတ်မှုကို ဖြစ်လာစေသည်။ ထိုဂီတက အဖက်ဖက်သို့ လွှမ်းခြုံသွားသော်လည်း ဝမ်ပေါင်လဲ့က မနီးမဝေးတွင် ရှိနေသည့်အချက်ကို အာရုံမခံမိခဲ့ပေ။

ထိုအခိုက်အတန့်၌ ဝမ်ပေါင်လဲ့ စကားပြောလာသည့်အခါ ဂီတတာအိုဂိုဏ်းမှ ကျင့်ကြံသူ၏ အမူအရာက ပြောင်းလဲသွားပြီး စိတ်ထဲ၌ အံ့အားသင့်သွားလေသည်။ သို့သော်လည်း သူက ထင်းယွိစည်းမျဉ်းဥပဒေသကို နှစ်များစွာ လေ့လာခဲ့သည့်အတွက် ဂီတအပေါ် အောင်မြင်မှုက ထူးကဲလေသည်။ ထို့ကြောင့် ချက်ချင်းဆိုသလို သူက ပြဿနာတစ်ခုကို ခံစားမိခဲ့၏။ သူ့ခန္ဓာကိုယ်က တုံ့ဆိုင်းခြင်းမရှိဘဲ နောက်ဆုတ်ခဲ့သည်။ သူက အဖက်ဖက်သို့ ဖြန့်ကျက်ထားသည့် ဂီတကို အလျင်အမြန် ရုတ်သိမ်းခဲ့သည်။

ထိုအရာက ဝမ်ပေါင်လဲ့ကို အနည်းငယ် ထင်ရှားလာစေသည်။ အကယ်၍ တခြားအချိန်ဆိုပါက ဂီတတာအိုဂိုဏ်းမှ ကျင့်ကြံသူသည် သူ့ကိုယ်ပိုင်နှင့် ဆင်တူနေသည့် ဂီတကို အာရုံခံမိမည် မဟုတ်ပေ။ သို့သော်လည်း သူက ယခု အပြည့်အဝ အာရုံစိုက်ထားလိုက်သည့်အတွက် သဲလွန်စတချို့ကို မြင်နိုင်လေ၏။

“အဲဒါဆိုတော့ သူက ဒီမှာ ပုန်းနေတာပဲ”

သူက ပြောလိုက်ရင်းဖြင့် ဂီတတာအိုဂိုဏ်းမှ ကျင့်ကြံသူက အနည်းငယ် မျက်နှာပူသွားမိသည်။ သူက နောက်ဆုတ်နေရင်း ညာဖက်လက်ကို မြှောက်ကာ ဝမ်ပေါင်လဲ့ ပုန်းအောင်းနေသည့် နေရာဆီ လက်ညှိုးထိုးလိုက်၏။

ထို့နောက် ချက်ချင်းဆိုသလို သူ့ဘေးပတ်ဝန်းကျင်မှ တေးသံတို့က အံ့မခန်း အသံတစ်သံထွက်ပေါ်လာလေသည်။ တောအုပ်ထဲရှိ သစ်ပင်များကပင် အပြင်းအထန် လှုပ်ခတ်သွားပြီး အသံပေါက်ကွဲမှုတစ်ခုက ဝမ်ပေါင်လဲ့ဆီ ဦးတည်သွား၏။

ထိုအရာ ဖြတ်သန်းသွားသည့်အချိန်တိုင်း လေဟာနယ်က ပျက်ယွင်းသွားသည်။ အသံက ဖျက်ဆီးမှု အငွေ့အသက်ကို သယ်ဆောင်လာသည့်အလား ဝမ်ပေါင်လဲ့ကို ဖျက်ဆီးကာ အမှုန့်အဖြစ် ပြောင်းပစ်လိုဟန်ပေါ်သည်။

ထိုအသံပေါက်ကွဲမှု ချဉ်းကပ်လာသည်ကို မြင်သည့်အခါ ဝမ်ပေါင်လဲ့က မရှောင်ရှားရုံသာမက သူ့အကြည့်များက တောက်ပလာလေ၏။ သူက သူ့ခန္ဓာကိုယ်ထဲ စုဝေးလာသည့် ဂီတသင်္ကေတ ပမာဏစုဝေးနှုန်းသည် အထွတ်အထိပ်သို့ ရောက်ရှိလာကြောင်း သဘောပေါက်သွားခဲ့၏။

သုံးခု၊ ငါးခု၊ ဆယ်ခု၊ အခုနှစ်ဆယ်… တစ်ခုပြီးတစ်ခုဆိုသလို သင်္ကေတများ ဆက်တိုက်ဖြစ်ပေါ်နေပြီး ဝမ်ပေါင်လဲ့ကိုပင် အံ့အားသင့်သွားစေသည်။

ဘာတွေဖြစ်နေတာလဲ…

ထိုအရာက အံ့ဩဖို့ကောင်းလှပြီး အတော်လေး စိတ်ကျေနပ်ဖို့ ကောင်းလှသည်။ ထို့ကြောင့် အသံပေါက်ကွဲမှု ရောက်ရှိလာသော်လည်း ဝမ်ပေါင်လဲ့က အလှုပ်အရှားမရှိ ရပ်နေဆဲဖြစ်ကာ ထိုအသံလှိုင်းကို သူ့အား လွှမ်းခြုံခွင့်ပြုထားလေသည်။

အဝေးမှ အဆုံးမဲ့ဂီတသံတို့က သစ်ရွက်သဏ္ဍာန်အဖြစ် ပုံပေါ်လာသည်။ တခြားတစ်ဖက်တွင် ဝမ်ပေါင်လဲ့က သစ်ရွက်အလယ်တွင် ရှိနေပြီး ရစ်ပတ်ခံထားရ၏။

ထိုအရာက ဤသို့ဖြစ်နေဟန်ထင်ရသော်လည်း လက်တွေ့၌မူ ဝမ်ပေါင်လဲ့က အတော်လေး ပျော်ရွှင်နေမိသည်။ သူ့အသက်ရှူနှုန်းက မြန်ဆန်လာပြီး သူ့စွမ်းအား ပေါက်ကြားသွားမည်ကို စိုးရိမ်ပြီး တစ်ဖက်သူအား သူ့ကျင့်ကြံဆင့်ကြောင့် ထိတ်လန့်သွားစေမည်ကို စိုးရိမ်နေမိသည်။

ထို့ကြောင့် ဝမ်ပေါင်လဲ့က နာကျင်နေသည့်အမူအရာကို ပန်ဆင်ပြီး အသံပေါက်ကွဲမှုအလယ်တွင် တောင့်ခံနိုင်ရုံမျှ အနေအထားမျိုး ဟန်ဆောင်လိုက်သည်။ သူက ပြိုလဲလုနီးပါးဖြစ်နေလေ၏။

ဂီတတာအိုဂိုဏ်းမှ ကျင့်ကြံသူက ထိုအရာကို မြင်သည့်အခါ သက်ပြင်းချလိုက်၏။ သူက အေးစက်စက်ဖြင့်သာ သရော်လိုက်သည်။ သူက သီးသန့်ကျင့်ကြံရေး ဝင်ရောက်နေသည်မှာ နှစ်များစွာ ကြာမြင့်နေပြီဖြစ်သည့်အတွက် ယခင်နှင့် ကွဲပြားနေပြီ ဖြစ်၏။ တစ်ဖက်လူက ထူးထူးဆန်းဆန်း ပုန်းအောင်းနေနိုင်သော်လည်း တိုက်ကွက်အောက်တွင် သူက ရှုံးနိမ့်နေမည်သာ ဖြစ်၏။

သူ့စိတ်ထဲ ဂုဏ်ယူသည့် အရိပ်အမြွက်တို့ ပေါ်ထွက်လာကာ ဂီတတာအိုဂိုဏ်းမှ ကျင့်ကြံသူက ဝမ်ပေါင်လဲ့ကို အေးစက်စက် လှမ်းကြည့်လာသည်။

“အလွန်ဆုံး အသက်ဆယ်ရှိုက်စာပဲ။ မင်း သေသွားလိမ့်မယ်။ အခု မင်း တောင်းဆိုမယ်ဆိုရင် ငါ မင်းကို ထွက်လမ်းရှာပေးနိုင်တယ်”

သူ့စကားများက ဝမ်ပေါင်လဲ့ကို စိတ်လှုပ်ရှားသွားစေ၏။ တစ်ချိန်တည်းဆိုသလို သူ့ကိုယ်သူသာ အပြစ်တင်မိလိုက်သည်။ တစ်ဖက်သူက မောက်မာဟန်ထင်ရသော်လည်း ထိုသူက သူ့ကို မသတ်ဖို့ စကားထဲတွင် အရိပ်အမြွက်များ ထည့်ကာ ပြောနေလေ၏။

ထားလိုက်ပါတော့။ သူက သဘောကောင်းမှတော့ ငါလည်း သူ့ကို ရလဒ်ကောင်းပဲ ပေးသင့်တယ်…

ဝမ်ပေါင်လဲ့က သူ့ဘာသာသူ ကိုယ်ပိုင်အတွေးနက်နေရင်း တွေးလိုက်သည်။ ဤသို့ဖြင့် အသက်ဆယ်ရှိုက်စာ ကုန်ဆုံးသွားလေ၏။ ဝမ်ပေါင်လဲ့က ထပ်မံရုန်းကန်ရသည့် အရိပ်အယောင်မျှ ပြသလာသည်။ ဂီတတာအိုဂိုဏ်းမှ ကျင့်ကြံသူက မျက်မှောင်ကြုတ်လာသည်။ သူက တစ်စုံတစ်ခု လွဲမှားနေသလို ခံစားမိသည်။ ပုံမှန်သဘောတရားအရ သူ့ရှေ့တွင်ရှိနေသည့်လူက တောင့်မခံနိုင်သင့်ပေ။

 သို့သော်လည်း တစ်ဖက်သူက ယခုအခြေအနေထိ တောင့်ခံနေနိုင်ဆဲ ဖြစ်၏။ ထိုအရာက ဂီတတာအိုဂိုဏ်းမှ ကျင့်ကြံသူ၏ အကြည့်အား တောက်ပလာစေသည်။ သူက သူ့စွမ်းအားကို တိုးမြှင့်ဖို့ မလိုလားခဲ့ပေ။ အကြောင်းအရင်းကမူ သူသည် မသတ်လို၍ မဟုတ်ဘဲ သူ့ကိုယ်ပိုင်စွမ်းအားအများစုကို မဖော်ထုတ်လို၍ ဖြစ်သည်။

သူ့ရည်မှန်းချက်က ထိပ်တန်းဆယ်ယောက်အတွင်း ဝင်ရောက်ဖို့ ဖြစ်ကာ ပထမနေရာကိုပင် လိုချင်နေ၏။ သို့သော်လည်း ယခု ဝမ်ပေါင်လဲ့သည် တောင့်ခံနိုင်သေးသည်ကို မြင်သည့်အခါ သူသာ ကြာကြာစောင့်ဆိုင်းပါက ကိစ္စများ ပြောင်းလဲသွားသည်ကို စိုးရိမ်လာမိသည်။

“မင်းက သေချင်နေမှတော့ ငါ့ကို အပြစ်မတင်နဲ့” ဂီတတာအိုဂိုဏ်းမှ ကျင့်ကြံသူက ညာဖက်လက်ကို မြှောက်ကာ ဝမ်ပေါင်လဲ့ကို ဆွဲယူဟန်ပြုလုပ်လိုက်သည်။ ဤဆွဲယူဟန်ဖြင့် ဝမ်ပေါင်လဲ့ ဘေးပတ်ဝန်းကျင်တွင် ဂီတသံစဉ်မှ ဖွဲ့စည်းထားသည့် သစ်ရွက်ပုံရိပ်က ချက်ချင်းဆိုသလို ပေါ်ထွက်လာပြီး  ဝမ်ပေါင်လဲ့ကို တင်းတင်းကြပ်ကြပ် ရစ်ပတ်လိုက်၏။ သူသာ စွမ်းအားထည့်လိုက်သည်နှင့် ထိုသူကို ခြေမွလုနီးပါး ဖြစ်သွားနိုင်သည်။

ဂီတတာအိုဂိုဏ်းမှ ကျင့်ကြံသူက ပြုံးလိုက်၏။ သို့သော်လည်း သူ့မျက်လုံးက ဖြည်းဖြည်းချင်း ပြူးကျယ်လာသည်။ သူ့မျက်ဆံများကပင် ကျယ်ဝန်းသွား၏။ ခဏအကြာတွင် သူက တံတွေးကို မျိုချမိပြီး အသက်ရှူနှုန်းပင် မြန်ဆန်လာကာ အမူအရာက မယုံကြည်နိုင်ရာမှ တုန်လှုပ်နေသည့်အမူအရာအဖြစ် ပြောင်းလဲသွားခဲ့သည်။

 သူ့အတွက် အံ့အားမသင့်ဘဲ နေဖို့မဖြစ်နိုင်ပေ။ သူက ယခင်က နက်နက်နဲနဲ မခံစားမိခဲ့သော်လည်း ယခု သူ့နတ်ဘုရားအသိစိတ်အားလုံးကို ဂီတထဲ ထည့်သွင်းပြီး ဂီတ၏ ခြေမွစွမ်းအားကို ထိန်းချုပ်လိုက်သည့်အခါ သူ ပြောင်းလဲထားသည့် သစ်ရွက်က သံမဏိတုံးကို ရစ်ပတ်ထားသလိုမျိုး ဖိအားမပေးနိုင်ကြောင်း ရှင်းရှင်းလင်းလင်း ခံစားမိလိုက်သည်။

သူ့သစ်ရွက်ပြိုလဲသွားလျှင်ပင် တစ်ဖက်လူက အဆင်ပြေနေမည်ဖြစ်ကြောင်း ခံစားချက်ရရှိလိုက်၏။

ဂီတသံစဉ်မှ ပြောင်းလဲထားသည့် သစ်ရွက်က ရက်စက်ဟန်ထင်ရသော်လည်း ဝမ်ပေါင်လဲ့အတွက်မူ အသုံးမဝင်ပေ။ သို့သော်လည်း ကိစ္စများက ဤအခြေအနေထိ ရောက်ရှိလာပြီဖြစ်သည့်အတွက် သူ့အနေဖြင့် ထပ်မံမဖုံးကွယ်နိုင်တော့ပေ။ ထို့ကြောင့် သူက လက်ကိုမြှောက်ကာ ဖြူဖျော့နေသည့် ဂီတတာအိုဂိုဏ်းမှ ကျင့်ကြံသူအား ကူကယ်ရာမဲ့စွာကြည့်လိုက်၏။

ထိုအကြည့်က သူ့စိတ်ထဲတွင် ကျန်ရှိနေသည့် နောက်ဆုံးသော ခွန်အားကို ခြေမွပစ်လိုက်ဟန်ပေါ်သည်။ ဂီတတာအိုဂိုဏ်းမှ ကျင့်ကြံသူက အသက်လုရှူပြီး အလျင်အမြန် နောက်ဆုတ်လိုက်၏။ သူက ထွက်ပြီးလျှင် နောက်ပင်လှည့်မကြည့်ပေ။

သူ့နှလုံးသားက တုန်ယင်နေပြီး ဂိုဏ်းကြီးသုံးဂိုဏ်းမှ လျှို့ဝှက်အင်အားကြီး ပုဂ္ဂိုလ်နှင့် ရင်ဆိုင်ရသည်ကို သဘောပေါက်သွားခဲ့သည်။

ငါက ဂိုဏ်းကြီးသုံးဂိုဏ်းထဲကသူတွေက သူတို့ရဲ့ စွမ်းအားကို ဝှက်ထားတာ သဘောကျတယ်ဆိုတာ ကြားဖူးတယ်။ ကျစ် ငါ သူတို့နဲ့ ဘယ်လိုများ တွေ့ခဲ့တာတုန်း…

ဂီတတာအိုဂိုဏ်းမှ ကျင့်ကြံသူက ပိုမိုမြန်ဆန်လာသည်။

 ဝမ်ပေါင်လဲ့က ထိုအခိုက်အတန့်၌ သက်ပြင်းချလိုက်၏။

ဂီတသံစဉ်က လျော့ကျသွားသည့်အတွက် ဝမ်ပေါင်လဲ့က ခေါင်းအသာယမ်းလိုက်သည်။ သူက ဂီတသင်္ကေတများကို အေးအေးချမ်းချမ်းသာ နားဆင်လို၏။ သူက သက်ပြင်းချလိုက်သည့်အခါ သူ့ခန္ဓာကိုယ်က လှုပ်ရှားသွားပြီး အက်သံနှင့်အတူ သူ့ခန္ဓာကိုယ်အပြင်ဘက်မှ ဂီတသံစဉ်မှ သစ်ရွက်က ချက်ချင်းဆိုသလို ပြိုလဲသွားလေ၏။

သူက ခေါင်းမော့ကာ ဂီတတာအိုဂိုဏ်းသား ထွက်ပြေးသွားသည့်ဖက်ကို လှမ်းကြည့်လိုက်သည်။ ဝမ်ပေါင်လဲ့က လက်ကိုဝှေ့လိုက်သည့်အချိန် သူ့ခန္ဓာကိုယ်ထဲ စုပုံထားသည့် ဂီတသင်္ကေတသိန်းချီက ချက်ချင်းဆိုသလို ပေါ်ထွက်မလာသေးပေ။ သူတို့က အနည်းငယ်မျှ လှုပ်ရှားသွားပြီး သူ့ရှေ့တွင်ရှိနေသည့် လေဟာနယ်ကို အသံကျယ်ကြီးနှင့်အတူ ပြိုလဲသွားစေ၏။ ပြောရလျှင် နေရာတစ်ခုလုံးက ပြိုလဲသွားပြီး အနက်ရောင်မြွေနှင့်တူသည့် အက်ကြောင်းကြီးသဖွယ် ဖြစ်ပေါ်လာသည်။ ထိုအရာက ဂီတတာအိုဂိုဏ်းမှ ကျင့်ကြံသူဆီ ချဉ်းကပ်သွားလေသည်။

ထိုမြင်ကွင်းက ဂီတတာအိုဂိုဏ်းမှ ကျင့်ကြံသူ၏ အမူအရာအား ပြောင်းလဲသွားစေသည်။ မြင်ရသလောက် ဤနေရာရှိ ကမ္ဘာကြီးက ပြိုလဲတော့မည်ဖြစ်ပြီး အနက်ရောင်မြွေကြီးက သူ့ရှေ့တွင်ရှိသမျှ အရာအားလုံးကို စုတ်ဖြဲပစ်တော့မည် ဖြစ်သည်။

“အရှုံးကို ဝန်ခံတယ်” ထိုအရေးကြီးသည့် အခိုက်အတန့်တွင် ဂီတတာအိုဂိုဏ်းမှ ကျင့်ကြံသူက စူးစူးရှရှ အော်ဟစ်လိုက်၏။ သူက နှေးနှေးကွေးကွေး ပြောနေပါက ချက်ချင်းဆိုသလို အက်ကြောင်းလိုမျိုး စုတ်ဖြဲခံရမည်ကို စိုးရိမ်နေမိသည်။