အစွမ်းကုန်တိုက်ပွဲတစ်ခု

လေနက်အင်မော်တယ်ပိုင်နက်။

ပုံရိပ်သုံးခုက ဂြိုလ်တစ်ခုပေါ်သို့ ရုတ်တရက် ထွက်ပေါ်လာသည်။ ထန်ရှုက တိုက်ခိုက်ရေးချပ်ဝတ်ကို ဝတ်ဆင်ထားပြီး နတ်ဘုရားဓားကို လက်ထဲတွင် ကိုင်ဆောင်လျက် ပတ်ဝန်းကျင်အား အေးစက်စွာ လေ့လာလိုက်၏။

လွန်ခဲ့သောကိုးရက်လောက်က မဟာထန်အင်ပါယာ၏စစ်တပ်က သူ၏ကောင်းကင်ဘုံစံအိမ်အသုံးအဆောင်ပစ္စည်းထဲသို့ ဝင်ရောက်ပြီးနောက် သူက မြင့်မြတ်ငှက်ဂိုဏ်းသို့ ဉီးတည်ထွက်လာခဲ့သည်။ ဤအချိန်အတွင်း တစ်ယောက်ယောက်က သူ့အား စောင့်ကြည့်နေသည်ဟု အာရုံခံမိသော်လည်း ကောင်းကင်ဘုံမှော်မှန်ကို အသုံးပြုပြီးတောင်မှ သူတို့၏ခြေရာလက်ရာအား မဖော်နိုင်ခဲ့ပေ။

ထိုကြောင့် ရန်သူအား မျှားထုတ်ရန်အတွက် လူအိုကြီးဆိုက်ကာမောနှင့်လင်းယုန်ငှက်တို့ကို သူနှင့်အတူ ချန်ထားခဲ့သည်။ ရန်သူက ထွက်ပေါ်လာလျှင် အန္တိမအရှင်လေးယောက်အား ကောင်းကင်ဘုံစံအိမ်မှ ထပ်ဆင့်ခေါ်လျက် သူတို့အား ဝန်းရံတိုက်ခိုက်ရန် စီစဉ်ထားသည်။

“အရှင်၊ မင်းက အထင်မှားနေတာ ဖြစ်နိုင်လား”ပတ်ဝန်းကျင်အား စစ်ဆေးပြီးနောက် လင်းယုန်ငှက်က အနည်းငယ်တုန့်ဆိုင်းသောလေသံနှင့် မေးလိုက်သည်။

ထန်ရှုက ခေါင်းခါယမ်းကာ ပြောလိုက်သည် “ဒါက မဖြစ်နိုင်ဘူး။ အရင်ကလဲ ဒီလိုခံစားချက်မျိုးကို အကြိမ်ပေါင်းများစွာ ခံစားဖူးတယ်၊ အကြိမ်တိုင်းမှာ ငါ့ကို အန္တရာယ်က လွတ်မြောက်အောင် ကူညီပေးနိုင်ခဲ့တယ်။ တစ်ယောက်ယောက်က အမှောင်ထဲမှာ ပုန်းနေပြီး ငါတို့ကို ကင်းထောက်နေမှာ သေချာတယ်။ သူတို့က ရန်လိုတဲ့အဖွဲ့တစ်ဖွဲ့ဆိုရင် မကြာခင်ထွက်ပေါ်လာလိမ့်မယ်”

အချိန်က တရွေ့ရွေ့နှင့် နှစ်ရက်က လျှပ်တစ်ပြက်အတွင်း ကုန်ဆုံးသွားသည်။ ထန်ရှုတိုသုံးယောက်က ဤဂြိုလ်ပေါ်တွင် တင်ပျဉ်ခွေထိုင်နေသော်လည်း သူတို့က သတိမပြတ်ထားထားကြသည်။

လင်းယုန်ငှက်၏နှလုံးက တုန်ယင်သွားကာ သူက ပြောလိုက်သည် “သူတို့ ရောက်လာပြီ”

ထန်ရှုက ပျံသန်းလျက် အဝေးရှိ ဟင်းလင်းပြင်သို့ ကြည့်လိုက်သည်။ သူတို့ထံ ဉီးတည်လာနေသော စစ်ရထားတစ်စင်း၏ပုံရိပ်ကို သူက ရှင်းလင်းစွာ မြင်ရသည်၊ များမကြာမီ သူတို့ကြား အကွာအဝေးက မီတာတစ်ထောင်လောက်သာ ကျန်သည်။ စစ်ရထားပေါ်တွင် ဆန်းကြယ်သောအနက်ဝတ်လူတစ်ယောက်က ထိုင်နေပြီး သူက အနက်ရောင်မျက်နှာဖုံးကို တပ်လျက် အခြားသူများ၏စိတ်ဝိညာဉ်အာရုံခံမှုကိုကာကွယ်သည့်အင်မော်တယ်ဝတ်ရုံတစ်ခုကို ဝတ်ဆင်ထား၏။

“မင်းက ဘယ်သူလဲ”လေထဲတွင် ရပ်လျက် ထန်ရှုက ဆန်းကြယ်သောလူကို တိုက်ရိုက်စိုက်ကြည့်ကာ မေးလိုက်သည်။

စစ်ရထားပေါ်တွင် အရိပ်နတ်ဆိုးကျူးဝူရှို့က အနည်းငယ်ပြုံးလိုက်သည်၊ နက်မှောင်သောအကြည့်တစ်ခုက သူ့မျက်နှာပေါ်တွင် ထွက်ပေါ်လာကာ သူက ရှင်းလင်းပြတ်သားစွာ ပြောလိုက်၏ “အရင်က ဒီမေးခွန်းကို လူများစွာ မေးဖူးတယ်၊ ဒါပေမယ့် မေးပြီးနောက် သူတို့အားလုံးက စိတ်ဝိညာဉ်ရောအသားပါ ပျောက်ကွယ်သွားတယ်။ ငါ အမှတ်ရတာ မှန်ရင် သူတို့အများစုက မြင့်မြတ်ငှက်ဂိုဏ်းကပဲ”

အေးစက်သောအလင်းတစ်ခုက ထန်ရှု၏မျက်လုံးများထဲတွင် လင်းလက်သွားကာ သူက နက်ရှိုင်းသောအသံနှင့် ပြန်ပြောသည် “လူတစ်ယောက်က ငါ့တပည့်ကို ဒဏ်ရာရစေခဲ့ပြီး ငါ့ရဲ့ယန်အာကို ပျောက်ကွယ်လုနီးပါးဖြစ်စေခဲ့တယ်လို့ တစ်စုံတစ်ယောက်က ငါ့ကို ပြောခဲ့တယ်။ မင်းက သူ့ဖြစ်မယ်လို့ ငါ ယုံကြည်တယ်၊ ဟုတ်လား”

“အသုရာစုန်းမ…ကူယန်အာလား”

အရိပ်နတ်ဆိုးကျူးဝူရှို့က သူ၏မျက်နှာဖုံးကို ချွတ်လိုက်လိုက်ပြီး ကောက်ကျစ်စဉ်းလဲကာ ချောမောခန့်ညားသည့်မျက်နှာကို ထုတ်ပြလိုက်သည်။

ထန်ရှုက နှာခေါင်းရှုံ့လျက် ပြော၏ “အရိပ်နတ်ဆိုးကျူးဝူရှို့၊ ငါက မင်းကို သွားမရှာခင် မင်းက ရောက်လာမယ်လို့ ငါ မထင်ထားခဲ့ဘူး။ မင်းကိုတော့ ငါ တကယ် လေးစားပါတယ်”

အရိပ်နတ်ဆိုးကျူးဝူရှို့က ကျယ်လောင်စွာ ရယ်မောလိုက်သည် “ငါ ဒါကို ဘယ်တော့မှ မမျှော်လင့်ထားခဲ့ဘူး။ မဟာထန်အင်ပါယာရဲ့မဟာထန်ဧကရာဇ်က ယခင်ကြယ်ကျင့်ကြံခြင်းမဟာဧကရာဇ်ဖြစ်နေမယ်လို့ ဘယ်သူက သိနိုင်မှာလဲ။ ဟားဟားဟား…ဒါက တကယ်ကို စိတ်ဝင်စားစရာပဲ၊ အရမ်းစိတ်ဝင်စားစရာကောင်းတယ်။ ငါ့ရဲ့အဲဒီအရူးတပည့်က မင်းအတွက် ငါ့ကို သစ္စာဖောက်ခဲ့တာပဲ၊ ဟီးဟီးဟီး။ သူမက ဖြောင့်ဖြောင့်တန်တန်းသေသွားခဲ့ပေမယ့် မင်းက အသက်ပြန်ရှင်လာခဲ့တယ်၊ ဒါက တကယ်ကို ဒေါသထွက်စရာပဲ။ ပြီးတော့ မဟာဧကရာဇ်တန်ချင်နဲ့ဇီသာဗျတ်စောင်းနတ်ဆိုးကျိုးယောင်၊ ဒီနှစ်ကောင်ကတော့…သူတို့က အချိန်အကြာကြီး အကြံစည်ချခဲ့ပေမယ့် အဆုံးသတ်မှာတော့ ကျရှုံးသွားခဲ့တာပဲ”

ထန်ရှုက လက်သီးတင်းကျပ်စွာ ဆုပ်လျက် အရိပ်နတ်ဆိုးကျူးဝူရှို့အား ခါးသီးစွာ စိုက်ကြည့်လိုက်သည်။ ဤကမ္ဘာတွင် သူက ဘယ်သူ့ကို အမုန်းဆုံးဟု မေးလာလျှင် မဟာဧကရာဇ်တန်ချင်းနှင့်ဇီသာဗျတ်စောင်းနတ်ဆိုးတို့မဟုတ်ဘဲ သူ့ရှေ့ရှိ အရိပ်နတ်ဆိုးကျူးဝူရှို့သာ ဖြစ်ပေလိမ့်မည်။

ဤလူက ချစ်သူ၏သစ္စာဖောက်ခြင်းခံစားချက်ကို ရရှိစေခဲ့သည့် လက်သည်တရားခံပင်။

ရက်စက်သောအမူရာတစ်ခုက ထန်ရှု၏မျက်နှာပေါ်တွင် ထွက်ပေါ်လာလျက် သူက ပြန်ပြောသည် “မင်းရဲ့ချစ်လှစွာသောတပည့်က မင်းကို သစ္စာမဖောက်ခဲ့ပါဘူး။ သူမက ငါ့ကို အရင်အလစ်မတိုက်ခိုက်ခဲ့ရင် သူတို့ရဲ့စွမ်းရည်လောက်နဲ့ ဟိုနှစ်ကောင်က ငါ့ကို သတ်ဖို့ဆိုတာ ခက်ခဲလိမ့်မယ်”

အရိပ်နတ်ဆိုးကျူးဝူရှို့က ကျယ်လောင်စွာ ရယ်မောလိုက်သည် “ဒါက ဒီလိုကိုး။ ကြည့်ရတာ မင်းက သူမကို အရမ်းမုန်းတီးနေမှာပေါ့။ သူမက သေသွားတာ စိတ်မကောင်းစရာပဲ၊ မဟုတ်ရင် မင်းတို့နှစ်ယောက်တွေ့ရင် ဘယ်လောက်တောင် စိတ်ဝင်စားစရာကောင်းလိုက်မလဲ။ ငါ ပြောတာ မှန်တယ်မလား၊ အင်မော်တယ်ကမ္ဘာရဲ့အလင်းလက်ဆုံးအန္တိမအရှင်ကြယ်ကျင့်ကြံခြင်းမဟာဧကရာဇ်”

ထန်ရှုက နှာခေါင်းရှုံ့လိုက်သည် “သူတို့ကို ဉမဖောက်ခင် ခင်ဗျားရဲ့ကြက်ကလေးတွေကို ရေတွက်တာကို ရပ်တန့်တာက ပိုကောင်းတယ်၊ ဘာလို့လဲဆိုတော့ အဲဒါက အချည်းနှီးပဲ ဖြစ်မှာပဲလေ”

အရိပ်နတ်ဆိုးကျူးဝူရှို့က ရယ်လျက် ပြောသည် “အဲဒါက အချည်းနှီးနဲ့ အဆုံးသတ်ရင်တောင် ကိစ္စမရှိပါဘူး။ တကယ်တော့ သူမက ငါ့ရဲ့စစ်တုရင်အပိုင်းအစတစ်ခုမျှပဲ၊ သူမက ပျောက်ကွယ်သွားရင်တောင် ငါ့အတွက် ဘာဆုံးရှုံးမှုမှ ရှိလိမ့်မှာ မဟုတ်ဘူး။ မင်းနဲ့ ပတ်သက်ပြီး ငါက ပိုတောင် သိချင်တယ်။ မင်းက ဒီလောက် လျင်မြန်စွာ ပြန်လည်ကျင့်ကြံခဲ့ပြီး မဟာထန်အင်ပါယာလို အရာတစ်ခုကို တည်ဆောက်နိုင်ခဲ့တယ်။ ဒါက တကယ်ကို အထင်ကြီးလေးစားစရာပဲ”

ထန်ရှုက သက်ပြင်းတစ်ချက်ရှိုက်ကာ ပြောလိုက်သည် “အဲဒါကို သိတောင်မှ မင်းက ထွက်ပေါ်လာတာဆိုတော့ မင်းရဲ့သတ္တိအတွက် ချီးကျူးရမလား ဒါမှမဟုတ် မင်းရဲ့တုံးအမှုအတွက် ဆဲဆိုရမလားဆိုတာတောင် ငါ မသိတော့ဘူး”

အရိပ်နတ်ဆိုးကျူးဝူရှိုက လက်မြှောက်ကာ ရယ်လိုက်သည် “ငါ့မှာ နောက်ဆုံးမေးခွန်းတစ်ခုရှိတယ်။ မင်းက ဒါကို ဖြေနိုင်မယ်ဆိုရင် ငါနဲ့ တိုက်ရိုက်တိုက်ခိုက်ဖို့ အခွင့်အရေးပေးမယ်”

“မေးလေ…”ထန်ရှုက ပြန်ပြောသည်။

အရိပ်နတ်ဆိုးကျူးဝူရှိုက ရယ်၏ “ကောင်းကင်ဘုံဧကရာဇ်က သူ့လက်ကိုဖြတ်လိုက်တဲ့ အကြောင်းပြချက်က မင်းပဲဖြစ်ရမယ်၊ ဟုတ်တယ်မလား။ သူ့က အဲလို လုပ်ရလောက်အောင် မင်းက ဘာဖဲချပ်ကို အသုံးပြုခဲ့တာလဲ”

ထန်ရှုက ခပ်ဖျော့ဖျော့ပြုံးလိုက်သည် “သူ့ကို ဒီလိုလေးပြောဖို့ တစ်ယောက်ယောက်ကို ခိုင်းလိုက်ရုံပါပဲ၊ အသက်ရှင်ချင်တယ်ဆိုင်ရင် မင်းရဲ့လက်မောင်းကို ဖြတ်လိုက်ပါ၊ ဒီလိုဆိုရင် ရန်ငြိုးကို ဖြေရှင်းနိုင်လိမ့်မယ်”

အရိပ်နတ်ဆိုးကျူးဝူရှို၏အမူအရာက အနည်းငယ်ပြောင်းလဲသွားသည်။ သူ့မျက်နှာပေါ်ရှိ အပြုံးက ပျောက်ကွယ်သွားပြီး သူက ထန်ရှုအား လေးစားစွာ ကြည့်ပြီးနောက် အေးစက်စွာ ပြန်ပြော၏ “ဒါက အတော်လေးအထင်ကြီးစရာပဲ၊ မဟာထန်ကောင်းကင်ဘုံဧကရာဇ်။ အခြားတစ်ဖက်မှာတော့ ဒီကောင်းကင်ဘုံဧကရာဇ်ထျန်းကျီက လုံးဝကို အမှိုက်ပဲ။ မင်းရဲ့စကားအနည်းငယ်လောက်နဲ့ သူ့လို အန္တိမအရှင်တစ်ယောက်က ကြောက်ရွံ့ပြီး သူ့လက်မောင်းကို ကိုယ်တိုင်ဖြတ်ခဲ့တယ်။ စိတ်မရှိပါနဲ့၊ ငါ ဒီနေ့ မင်းကို ရှင်းပစ်ပြီးရင် မင်းရဲ့မဟာထန်အင်ပါယာကို ဖျက်ဆီးဖို့ နည်းလမ်းတစ်ခုကို ရှာလိုက်မယ်”

ထိုသို့ပြောရင်း သူက လက်ဝှေ့ယမ်းလိုက်သည်၊ အသက်ရှုချိန်အနည်းငယ်အတွင်း အန္တိမအရှင်ခြောက်ယောက်နှင့် ပြီးပြည့်စုံခြင်းရွှေအင်မော်တယ်အနည်းငယ်က ထန်ရှု၊ လင်းယုန်ငှက်နှင့် လူအိုကြီးဆိုက်ကာမောတို့ကို ဝန်းရံလိုက်သည်။

“ဒါက ဘယ်လိုလုပ်ဖြစ်နိုင်မှာလဲ”ထန်ရှု၏အမူအရာက ရုတ်တရက် ပြောင်းလဲသွားသည်။ ထွက်ပေါ်လာသည့်အန္တိမအရှင်ခြောက်ယောက်ကို မြင်သောအခါ သူက ဒေါသထွက်ကာ အော်ပြောလိုက်၏ “အန္တိမအရှင်ရှိခိုးကောင်၊ အန္တိမအရှင်မက်ဂါ၊ အန္တိမအရှင်နှင်းရေခဲ။ မင်းတို့သုံးယောက်က အရိပ်နတ်ဆိုးကျူးဝူရှိုရဲ့နောက်လက်ပါးစေတွေဖြစ်လိမ့်မယ်လို့ ငါ မထင်ထားဘူး”

အန္တိမအရှင်နှင်းရေခဲက သူ့အား နှာခေါင်းပြန်ရှုံ့လိုက်သည် “ကြယ်ကျင့်ကြံခြင်းမဟာဧကရာဇ်…အိုး…ငါ့ကို ခွင့်လွှတ်ပါ။ မင်းက အခု မဟာထန်ကောင်းကင်ဘုံဧကရာဇ်မလား။ အရိပ်နတ်ဆိုးကျူဝူရှို့ရဲ့လက်ထဲကနေ ငါတို့အလိုချင်ဆုံးအရာကို ရနိုင်မှာဖြစ်တဲ့အတွက် ငါတို့က သူ့အတွက် အလုပ်လုပ်ပေးရမှာပေါ့။ မင်း သိလား၊ မင်းကို သတ်တာ အောင်မြင်တာနဲ့ ငါတို့က နတ်ဘုရားအောင်မြင်ခြင်းဆေးလုံးတစ်လုံးစီရမယ်။ ဟားဟား…နတ်ဘုရားအောင်မြင်ခြင်းဆေးလုံးနဲ့ဆိုရင် နတ်ဘုရားကပ်ဘေးကို ဖြတ်ကျော်နိုင်ဖို့ ငါက ခြောက်ဆယ်ရာခိုင်နှုန်းယုံကြည်ချက်ရှိတယ်”

“ငါ့ကို သတ်ဖို့၊ အိပ်မက်ပဲ မက်နေလိုက်”ထန်ရှုက အန္တိမအရှင်လေးယောက်ကို ကောင်းကင်ဘုံစံအိမ်မှ ထုတ်ကာ ပြောလိုက်၏ “မင်းတို့က ငါတို့ထက် အနည်းငယ်ပိုသန်မာပေမယ့် ငါတို့ဘက်ကလဲ အားမနည်းနေပါဘူး။ အရိပ်နတ်ဆိုးကျူးဝူရှို၊ မင်းက ဒီနေရာကို စစ်မြေပြင်အဖြစ် ရွေးချယ်မှတော့ မင်းက ငါတို့ကို ဒီနေရာမှာ တိုက်ခိုက်ဖို့ အစီအစဉ်ရှိပြီးသားဖြစ်ရမယ်။ ဒီလိုဆိုမှတော့…”

အန္တိမအရှင်နှင်းရေခဲ၏အမူအရာက အကြီးအကျယ်ပြောင်းလဲသွားလျက် သူက နက်ရှိုင်းသောအသံနှင့် မေးလိုက်သည် “ဘာလဲ”

ထန်ရှုက ပြုံးရယ်ကာ ပြော၏ “မင်းတို့မှာ အချိန်အကန့်အသတ်တစ်ခုတော့ ရှိတယ်။ ခုနှစ်ရက်အတွင်းမှာ ငါတို့အားလုံးကို သတ်ဖြတ်ဖို့ ကျရှုံးမယ်ဆိုရင် မင်းတို့အားလုံး အဆုံးသတ်ဖို့သာ ပြင်ထားတော့။ လက်ရှိမှာ ငါ့ရဲ့မဟာထန်အင်ပါယာမှာ အန္တိမအရှင်နှစ်ဆယ်နီးပါးရှိတယ်၊ ဒါကြောင့် နောက်ဆုံးတိုက်ပွဲမှာ ဘယ်သူက အသက်ရှင်နိုင်မလဲဆိုတာ ငါက တကယ်ကို မြင်ချင်မိပါရဲ့”

“မဖြစ်နိုင်တာတွေ”ထန်ရှု၏စကားများကို မယုံကြည်သောကြောင့် အန္တိမအရှင်နှင်းရေခဲက နှာခေါင်းရှုံ့လိုက်သည်။ တကယ်တော့ နှစ်ဆယ်အသာထား၊ အန္တိမအရှင်ဆယ်ယောက်ထက်ကျော်ရှိသည့်ဘယ်ဂိုဏ်းကိုမှ သူက မကြားဖူးပေ။

အရိပ်နတ်ဆိုးကျူးဝူရှိုက ဆိုသည် “အချိန်ဖြုန်းမနေဘဲ တိုက်ခိုက်ကြရအောင်။ ဒါပြီးရင် မြင့်မြတ်ငှက်ဂိုဏ်းကို သွားရမယ်။ နတ်ဆိုးကမ္ဘာက ဝင်္ကပါချိုးဖြတ်အဆောင်ကို ရဖို့ အများကြီးအားထုတ်ခဲ့ရတယ်၊ ဒါကြောင့် သေမင်းတံခါးမှာ နှစ်တစ်သန်းရုန်းကန်ပြီးနောက် မြင့်မြတ်ငှက်ဂိုဏ်းကို ဖျက်ဆီးဖို့ အချိန်တန်ပြီ”

“သူတို့ကို သတ်…”

အရိပ်နတ်ဆိုးကျူးဝူရှိုနှင့်အတူပါလာသည့် အန္တိမအရှင်ခြောက်ယောက်နှင့်ပြီးပြည့်စုံခြင်းရွှေအင်မော်တယ်တစ်ဒါဇင်ကျော်တို့က ထန်ရှုတို့အဖွဲ့အား စတင်တိုက်ခိုက်လိုက်ကြသည်။

“သက်တံအိပ်မက်ပုံရိပ်ယောင်နယ်ပယ်”ထန်ရှုက သူ၏နတ်ဘုရားစွမ်းအားတစ်ခုကို ချက်ချင်း အသုံးချလိုက်ပြီး အရိပ်နတ်ဆိုးကျူးဝူရှိုနှင့်အခြားအန္တိမအရှင်ခြောက်ယောက်တို့ကို ပစ်မှတ်ထားလိုက်သည်။

အရိပ်နတ်ဆိုးကျူးဝူရှို၏နောက်လိုက်များနှင့်အန္တိမအရှင်ခြောက်ယောက်တို့က သက်တံအိပ်မက်ပုံရိပ်ယောင်နယ်ပယ်ထဲသို့ ကျရောက်သွားသည်။ သူတို့က ပုံရိပ်ယောင်မှ ချက်ချင်းလုနီးပါး လွတ်မြောက်လာကာ ထန်ရှုတို့၏သေစေနိုင်သောတိုက်ခိုက်မှုများကို ရှောင်တိမ်းခဲ့သော်ငြား သူတို့၏ခန္ဓာကိုယ်ပေါ်တွင် ဒဏ်ရာအချို့ရရှိသွားကြသည်။

“သေစမ်း၊ ကြယ်ကျင့်ကြံခြင်းမဟာဧကရာဇ်…”

အရိပ်နတ်ဆိုးကျူးဝူရှိုက နှောင်းပိုင်းအဆင့်အန္တိမစွမ်းအားရှင်တစ်ယောက်ဖြစ်ပြီး သူ၏တိုက်ပွဲခွန်အားအရ စဉီးသို့မဟုတ်အလယ်ဆင့်ရှိ အန္တိမအရှင်နှစ်ယောက်သုံးယောက်နှင့် ယှဉ်ပြိုင်နိုင်သည်။ သို့ကြောင့် ပြီးပြည့်စုံခြင်းရွှေအင်မော်တယ်များနှင့်အတူ အခြားအန္တိမအရှင်များက လင်းယုန်ငှက်၊ လူအိုကြီးဆိုက်ကာမောနှင့် အခြားသူများအား တိုက်ခိုက်နေစဉ် ထန်ရှုက အရိပ်နတ်ဆိုးကျူးဝူရှို၏တိုက်ခိုက်မှုများကို ရင်ဆိုင်ခဲ့ပြီး အသက်ရှုချိန်အနည်းငယ်အတွင်း သူက လွင့်ထွက်သွား၏။

“ဘယ်လိုတောင်သန်မာတဲ့ခန္ဓာကိုယ်လဲ။ ကြယ်ကျင့်ကြံခြင်းမဟာဧကရာဇ်အသစ်က ခန္ဓာကိုယ်ကျင့်ကြံသူတစ်ယောက်ဖြစ်လာမယ်လို့ ငါ မမျှော်လင့်ထားဘူး”

ထိုတိုက်ခိုက်မှုတွင် သူက ဒဏ်ရာအများကြီးမရသော်လည်း သူနှင့်အရိပ်နတ်ဆိုးကျူးဝူရှိုကြား ခွန်အားကွာဟချက်ကို သိရှိနိုင်သည်။

“ငါတို့က အရေအတွက်မမျှဘူး၊ ဒါကြောင့် အပေါ်စီးရအောင် မလုပ်နိုင်ဘူး”ထန်ရှုက သက်ပြင်းတစ်ချက်ရှိုက်ကာ သူ၏အသန်မာဆုံးနတ်ဘုရားစွမ်းအားကို ချက်ချင်းအသုံးပြုလိုက်သည်။

“ကောင်းကင်ဘုံပိုက်ကွန်”

အားကောင်းသောရှေးဉီးမူလဖရိုဖရဲစွမ်းအားက ထန်ရှု၏ခန္ဓာကိုယ်မှ တည်ငြိမ်စွာ စီးထွက်လာသည်။ လင်းယုန်ငှက်၊ လူအိုကြီးဆိုက်ကာမောနှင့်အခြားသူများအား တိုက်ခိုက်နေသောအန္တိမအရှင်ခြောက်ယောက်ကို ချက်ချင်း သက်ရောက်သွားပြီး သူတို့ထဲမှ နှစ်ယောက်က ဒဏ်ရာကြီးကြီးမားမားရသွားကာ အခြားလေးယောက်က အသေးစားဒဏ်ရာများရရှိသွားခဲ့သည်။

“ဒါက ဘာကြီးလဲ။ ငါ့အတွက် ချိုးဖြတ်စမ်း”ရက်စက်ကြမ်းကြုတ်သောအမူအရာတစ်ခုက အရိပ်နတ်ဆိုးကျူးဝူရှို၏မျက်နှာပေါ်တွင် ထွက်ပေါ်လာပြီး သူက ထန်ရှုအား ဆေဘာဓားနှင့် တိုက်ခိုက်လိုက်သည်။ ရောင်စုံအလင်းတန်းများက ရုတ်တရက် ထွက်ပေါ်လာကာ ဓားမော့ရောင်ခြည်တန်းအား တားဆီးလိုက်သည်။

အုံး…

ဓားမော့က ရှေးဉီးမူလဖရိဖရဲစွမ်းအားနှင့် ရင်ဆိုင်ပြီး အလင်းတန်းများကို ဖြတ်ကျော်ပြီးနောက် ထန်ရှုထံ တိုက်ခိုက်လိုက်သည်၊ နောက်အခိုက်အတန့်တွင် အရိပ်နတ်ဆိုးကျူးဝူရှိုက ထန်ရှုအရှေ့၌ ထွက်ပေါ်လာသည်။ သူက ထန်ရှု၏ခေါင်းအား ပြင်းထန်စွာ တိုက်ခိုက်လိုက်ရာ အလင်းတန်းတစ်ခု လက်သွား၏၊ သူက တစ်ချက်တည်းနှင့် ထန်ရှုအား ခေါင်းဖြတ်ချင်နေပုံရ၏။