စည်းမျဉ်းမဲ့ သံမဏိ

“ဒီငတုံးလူတွေ။ ငါက အဖိုးတန်သတင်းအချက်အလက်ရောင်းဖို့ ကြိုးစားနေတာကို သူတို့က ငါ့ကို အရူးလို ဆက်ဆံနေတယ်” ဝမ်ဝေ့က ကျိန်ဆဲရင်းဖြင့် အစိမ်းရောင်မြေကမ္ဘာ မျှော်နန်းဆောင်မှ ထွက်လာလေသည်။ သူက ဘေးပတ်လည်ကို ကြည့်ပြီးသည့်နောက်တွင် သက်ပြင်းအသာချလိုက်၏။ သူက နေရာတစ်ခု ဝယ်ယူဖို့ မြို့ထဲ လိုက်လံရှာဖွေခဲ့သော်လည်း အရာအားလုံးက ဈေးကြီးလွန်းလှသည်။

ပထမဦးစွာ သူက မဟာမြူစက်ဝန်းအတွင်း နေထိုင်ဖို့ တွေးကြည့်ခဲ့သော်လည်း ထိုအရာက မျက်နှာပူဖို့ကောင်းလွန်းလှသည်။ ထို့ကြောင့် သူက အံကြိတ်ကာ တည်းခိုဆောင်တစ်ခုကို ရှာဖွေခဲ့၏။

တည်းခိုဆောင်တစ်ခု ဖြစ်နေသော်လည်း သူ ငှားရမ်းသည့် အခန်းက အာကာပြင်အစီရင်၏ အသုံးပြုမှုကြောင့် အတော်လေး ကျယ်ဝန်းလှသည်။ ဝမ်ဝေ့က နောက်ထပ်လှုပ်ရှားမှုကို တွေးတောရင်း အနားယူလိုက်၏။ သူက ထိုင်ခုံပေါ်တွင် တင်ပျဉ်ခွေထိုင်ကာ ကျင့်ကြံနေစဉ် ခရမ်းရောင်မြူခိုးက သူ့အခန်းကို လွှမ်းခြုံသွားလေသည်။

“ဘယ်သူ လုပ်ရဲတာလဲ” သူက အော်ပြောလိုက်သော်လည်း သူ့အပြုအမူများက မြူခိုးများ သူ့ခန္ဓာကိုယ်ထဲ ဝင်ရောက်ဖို့ ပိုမိုလွယ်ကူလာစေ၏။ ထို့ကြောင့် သူ့အပြုအမူက အသုံးမဝင်ခဲ့ပေ။ သူက မျက်ကွင်းအားလုံး မဲမှောင်သွားပြီး မြေပြင်ပေါ် လဲကျသွားသည်။

“ငါ ဘယ်ရောက်နေတာလဲ” ဝမ်ဝေ့က မေးလိုက်သည်။ သူက ဘေးပတ်လည်ကို ကြည့်နေရင်း သူ့လက်များက ချည်နှောင်ခံထားရကာ သုတ်သင်ခံရတော့မည့် ပုံစံမျိုး ဖြစ်နေလေ၏။ သူက သူ့ကျင့်ကြံဆင့်ကို ဖိနှိပ်ထားသည့် ချိတ်ပိတ်ရေးနည်းစနစ်တစ်ခုကိုပင် သတိထားမိခဲ့သည်။ လက်ထိပ်များကလည်း နောက်ထပ်စည်းတံဆိပ်အလွှာတစ်ခုကို ဖြစ်စေသည့် ချိတ်ပိတ်ရေးအသုံးအဆောင်ပစ္စည်းများသာ ဖြစ်၏။

“မင်း နိုးလာပြီပဲ” ခပ်ကြမ်းကြမ်း အသံတစ်သံထွက်ပေါ်လာသည်။

 ဝမ်ဝေ့က အခန်းထဲမှ နှိပ်စက်ရေးပစ္စည်းများမှ အကြည့်လွှဲပြီး အနက်ရောင်ဝတ်စုံ ဝတ်ဆင်ထားပြီး ဘယ်ဖက်မျက်လုံးအထက် အမာရွတ်ရှိနေသည့် အမျိုးသား ဝင်ရောက်လာသည်ကို မြင်လိုက်ရသည်။ ဝမ်ဝေ့က ထိုသူကို အကြောင်းအရင်းများစွာကြောင့် သိထားလေ၏။ ပထမဦးစွာ သူသည် သူ ဝယ်လာသည့် သတင်းတစိတ်တပိုင်း ဖြစ်၏။ ဒုတိယအနေဖြင့် သူက ဘယ်သောအခါမှ မေ့မြောမသွားခဲ့သည့်အတွက် ဤနေရာထဲ ပြောင်းရွှေ့ခံလိုက်ရသည့်နေရာတိုင်းကို မြင်တွေ့လိုက်ရသည်။

ဝမ်ဝေ့က မျက်မှောင်ကြုတ်လိုက်၏။ ယခင် သူ ခွဲထုတ်ထားခဲ့သည့် စိတ်ဝိညာဉ်အမှုန်က ဤအနီးတစ်ဝိုက်တွင် ကောင်းကင်ပြာမျှော်နန်းသခင်ကို အာရုံမခံမိပေ။

သူက ဒီနေရာမှာမရှိမှတော့ သူ့ကို မျှားခေါ်ရမှာပေါ့…

ဘန်း

ထိုအစောင့်ကို ထိတ်လန့်သွားစေသည်က ဝမ်ဝေ့သည် သူ့ချိတ်ပိတ်ထားမှုကို အသုံးမဝင်စေသည့်အလား လက်ထိပ်များကို ချိုးဖောက်လိုက်ခြင်း ဖြစ်၏။ ထိုသူ မတုံ့ပြန်နိုင်ခင် ဝမ်ဝေ့က သူ့အား လည်ပင်းမှ ဆွဲကိုင်လိုက်သည်။

“ကောင်းကောင်း အိပ်လိုက်တော့” ဝမ်ဝေ့က ရေရွတ်ပြီးသည့်နောက်တွင် ထိုသူကို ပစ်ချလိုက်သည်။

ထို့နောက် သူက နေရာတစ်ခုလုံးကို ပြောင်းပြန်လှန်ပစ်ခဲ့ပြီး သူ့လမ်းတွင်ရှိသမျှ လူအားလုံးကို ရိုက်နှက်ပစ်ခဲ့သည်။ ထို့နောက် တခြားသော အကျဉ်းသမားအားလုံးကို လွှတ်ပေးခဲ့၏။ ထင်ထားသည့်အတိုင်း စောင့်နေသည့်သူ ပေါ်ထွက်လာဖို့ သိပ်မကြာလိုက်ပေ။

တန်ဖိုးကြီးဝတ်စုံကို ဝတ်ဆင်ထားပြီး ပုခုံးအထက် ချွန်ထက်ထက် အကော့များ ပါဝင်သည့် အစိမ်းရင့်ရင့်ဝတ်ရုံကို ဝတ်ဆင်ထားသည့် အမျိုးသားက အကျဉ်းထောင်အတွင်း လျှောက်လှမ်းလာ၏။ ထိုသူက တည်ငြိမ်သည့် အမူအရာမျိုး ရှိသော်လည်း မြွေနှင့်တူလေသည်။ သူက ဘေးပတ်ဝန်းကျင်ကို ကြည့်နေရင်း ဘေးပတ်ဝန်းကျင်မှ အပျက်အစီးများနှင့် သူ့လူများ အတုံးအရုန်း လဲကျနေသည်ကို ကြည့်လိုက်သည်။

“မင်းတို့လူတွေက တကယ်ကို အသုံးမကျဘူးပဲ” မျှော်နန်းသခင်က ရေရွတ်ပြီးသည့်နောက်တွင် ဝမ်ဝေ့ကို စိုက်ကြည့်လိုက်၏။

“မင်းနဲ့ ပတ်သက်ပြီးတော့ တစ်ခုခုတော့ သံသယဖြစ်စရာပဲ”

သူ ရရှိထားသည့် သတင်းအချက်အလက်က သူတို့၏ လျှို့ဝှက်လမ်းကြောင်းအကြောင်း ရောင်းချသည့် လေလွင့်ကျင့်ကြံသူ တစ်ယောက်အကြောင်းသာ ဖြစ်၏။ ထိုသို့အားကောင်းသည့် လေလွင့်ကျင့်ကြံသူက အရင်းအမြစ်များ အဘယ်ကြောင့် လိုအပ်နေမည်နည်း။

“ခင်ဗျားလည်း အတူတူပါပဲ” ဝမ်ဝေ့က ပြန်လည်ချေပလိုက်သည်။ သူက အမှန်အတိုင်း ပြောနေခြင်းသာ ဖြစ်၏။ သူက ကောင်းကင်ပြာမျှော်နန်းဆောင်ကို အကြောင်းအရင်းတစ်ခုကြောင့် သတိကြီးကြီး ထားထားခြင်း ဖြစ်၏။ သူတို့က စည်းမျဉ်းမဲ့ဇုန်အတွင်း သက်တမ်းအရင့်ဆုံး အင်အားစုဖြစ်ကာ ကပ်ပါးများ၏ ရှင်းလင်းရေးကိုပင် အသက်ရှင်ကျန်ခဲ့ပြီး ထိပ်တန်းအင်အားစုအဖြစ် ရပ်တည်နေဆဲသာ ဖြစ်၏။ ဤသို့သော ရှည်ကြာမှုမျိုးက နက်နဲသည့် အုတ်မြစ်ရှိကြောင်း ဆိုလိုနေခြင်း ဖြစ်သည်။ နက်နဲသော အုတ်မြစ်ဆိုသည်က အမည်မသိဝှက်ဖဲများစွာ ရှိနေသည်ဟု ဆိုလိုနေခြင်း ဖြစ်၏။

သူက သူ့တာအိုနဲ့ တော်တော်လေး ပြီးပြည့်စုံစွာ သင့်တော်တဲ့ ကောင်းကင်ဘုံအဆင့်လက်နက်ကို အတွင်းကမ္ဘာနဲ့ ပေါင်းစည်းထားတဲ့ ဆန့်ကျင်တာအိုအုပ်ချုပ်သူ တစ်ယောက်လို့ ပြောတာ။ ဒါပေမဲ့ သူတို့ပြောတာ မှားနေတာပဲ။ သူက စံပြအဆင့် လက်နက်ပျက်နဲ့ ပေါင်းစည်းထားတာပဲ…

ဝမ်ဝေ့ကတွေးလိုက်သည်။

“ဒီလိုမျိုး အာရုံခံနည်းစနစ်မျိုးက…” ကောင်းကင်ပြာမျှော်နန်းသခင်က ဝမ်ဝေ့သည် သူ့အတွင်းကမ္ဘာကို စိုက်ကြည့်နေသည်ကို အာရုံခံမိပြီး ရေရွတ်လိုက်သည်။

“အခု မင်းရဲ့ဇစ်မြစ်ကို ပိုပြီး သိချင်သွားပြီ”

ကောင်းကင်ပြာမျှော်နန်းဆောင်က စည်းမျဉ်းမဲ့ဇုန်အတွင်း နှစ်များစွာကြာသည့်တိုင် တည်ရှိသည့် မိသားစုစီးပွားရေးတစ်ခု ရှိ၏။ မိသားစုဝင်တိုင်းက စီးပွားရေးတွင် ထူးချွန်ကြသည်။ မျှော်နန်းသခင်၏ စီးပွားရေးအသိစိတ်က ထိုသူကို ဖမ်းမိခြင်းက အခွင့်အရေးကောင်းဖြစ်ကြောင်း ပြောပြနေလေ၏။ သူက မြေကမ္ဘာတာအိုကို အသက်သွင်းပြီး သူ့လက်ကို ကျောက်တုံးများဖြင့် ဝန်းရံကာ တာအိုဆန္ဒလက်နက်ကို အသက်သွင်းလိုက်သည်။

မြေကြီး၏ ခွန်အား

သူက တစ်ဖက်လူဆီ ပြေးဝင်သွားလိုက်၏။ မြေကမ္ဘာ၏ ခွန်အားအားဖြည့်မှုအပြီးတွင် မျှော်နန်းသခင်က အကောင်းဆုံးခန္ဓာကိုယ်လေ့ကျင့်သူတချို့နှင့်ပင် တိုက်ရိုက်တိုက်ခိုက်နိုင်သည်။ သူ့အတွက် နှမြောဖို့ကောင်းသည်က ဝမ်ဝေ့က သူ့အား ခြိမ်းခြောက်မှုအဖြစ် သတ်မှတ်ကာ အားကုန်ထုတ်သုံးလာခြင်း ဖြစ်၏။

ဝမ်ဝေ့က တိုက်ကွက်ကို တားဆီးရင်း မျက်မှောင်ကြုတ်လိုက်သည်။ ထင်ထားသည့်အတိုင်း ထိုသူက မရိုးရှင်းပေ။ ထိုလက်သီးချက်က တဲ့တိုးဆန်သည့် တိုက်ကွက်ဟု ထင်ရသော်လည်း ထိုအမျိုးသားက သူ့စိတ် သို့မဟုတ် ဝိညာဉ်ကို လွှမ်းမိုးဖို့ရာအတွက် စံပြလက်နက်ကို တိတ်တဆိတ် အသုံးပြုနေလေ၏။

ထိုလက်နက်က ဤသို့သော ပတ်ဝန်းကျင်မျိုးတွင် စွမ်းအား ကန့်သတ်ခံထားရသော်လည်း အနှစ်သာရက မြင့်မားနေဆဲ ဖြစ်၏။ မျှော်နန်းသခင်က တစ်ဖက်သူ၏ စိတ်နှင့် ဝိညာဉ်ကို လွှမ်းမိုးဖို့ရာအတွက် မြင့်မားသည့် အရာကို အသုံးပြုနေသည်။ တခြားနည်းဖြင့် ပြောရမည်ဆိုလျှင် စံပြဝိညာဉ် သို့မဟုတ် အားကောင်းသည့်ဇစ်မြစ် မရှိသည့်သူများက သူ့ကြောင့် လွယ်လွယ်ကူကူ လွှမ်းမိုးခံလိုက်ရလိမ့်မည်။ ကံဆိုးစွာဖြင့် သူက မှားယွင်းသည့် ပြိုင်ဖက်နှင့် တွေ့ဆုံသွားလေ၏။

 နှစ်ဦးသားက နီးကပ်လာသည်နှင့် ဝမ်ဝေ့က ကံကြမ္မာအနှောင်အဖွဲ့ ပင်ကိုပါရမီကို အသုံးပြုကာ တစ်ဖက်သူအား စံပြလက်နက်သည် သူ့တာအိုနှင့် မသင့်တော်ကြောင်း ပြန်လည်ပြုပြင်ရေးသားခဲ့သည်။ ကောင်းကင်ပြာမျှော်နန်းသခင်၏ ထူးကဲသောစွမ်းရည်က ထိုပစ္စည်းမှ ဖြစ်သည့်အတွက် သူ့ခွန်အားက သိသိသာသာ လျော့ကျသွားလေ၏။

ထို့နောက် ဝမ်ဝေ့က ထိုသူ၏ လည်ချောင်းကို ရွယ်လိုက်သည်။

သို့သော်လည်း သူ့ ကြိုးပမ်းမှုက ကျရှုံးသွားလေ၏။ သူ့လက်က တစ်ဖက်သူဆီ ရောက်ဖို့ ဆယ်စင်တီမီတာခန့်သာ လိုတော့သည့်အချိန် သူ့ကိုယ်ပိုင်ခွန်အားကလည်း သိသိသာသာ လျော့ကျသွားလေသည်။ သူ့ကျင့်ကြံဆင့်က ဧကရာဇ်အဆင့်အဖြစ် ဖိနှိပ်ခံလိုက်ရပြီး ခန္ဓာကိုယ်လေ့ကျင့်ရေးအဆင့်ပင် နဂါးဇာမဏီအဆင့်ထိ လျှော့ချခံလိုက်ရသည်။ မျှော်နန်းသခင်က ထိုအခွင့်အရေးကို ရယူကာ ထွက်ပြေးသွားလေ၏။

“ဘယ်လိုငရဲမျိုးလဲ” ဝမ်ဝေ့က မှတ်ချက်ပေးလိုက်သည်။ သူ့စွမ်းအားက ပြန်လည်ရောက်ရှိလာသော်လည်း သူက အနည်းငယ် အတွေးများနေမိ၏။

“တိုက်ခိုက်နေတဲ့ ဆယ်စက္ကန့်လေးအတွင်းမှာ မင်းက ငါ့ကို ဒါကို သုံးလောက်အောင် ဖိအားပေးနိုင်တယ်ဆိုတာ  မယုံနိုင်သေးဘူး” မျှော်နန်းသခင်က သက်ပြင်းချလိုက်၏။ သူ့အရှိန်အဝါက ပုံမှန်ပြန်ဖြစ်သွားလေသည်။ ထိုရက်စက်သည့်အမျိုးသားက သူ့အတွင်းကမ္ဘာမှ သက်ရှိအားလုံးကို စတေးပြီး ကံကြမ္မာအနှောင်အဖွဲ့ အားလုံးကို ဖယ်ရှားကာ ယခင်လက်နက်နှင့် ဆက်နွယ်မှုကို ပြန်လည်ရယူခဲ့သည်။ ထိုသို့သောစတေးမှုမျိုးက ထာဝရဖြစ်သည့်အတွက် သူက ထိုသက်ရှိများကို ပြန်လည်မဖန်တီးနိုင်တော့ပေ။ ထိုအရာက သူ့ရက်စက်မှုနှင့် ဆုံးဖြတ်ချက်ပြတ်သားမှုတို့ကို ပြသနေလေ၏။

ထို့နောက် သူက မျက်လုံးကို မှိတ်ပြီး ပြန်ဖွင့်လိုက်သည့်အချိန် အနက်ရောင်မျက်ဆံကို ထုတ်ပြလာသည်။ ထို့နောက် ပတ်ဝန်းကျင်က ရုတ်ချည်း ပြောင်းလဲသွားခဲ့၏။

ဝမ်ဝေ့၏ စွမ်းအားက ရုတ်ချည်းဆိုသလို ဧကရာဇ်အဆင့်သို့ ပြန်လည်ရောက်ရှိသွားသည်။ မျှော်နန်းသခင်၏ အရှိန်အဝါကပင် အစောပိုင်းကောင်းကင်ဘုံအဆင့်ထိ လျော့ကျသွားလေ၏။

“စည်းမျဉ်းမဲ့ သံမဏိ” ဝမ်ဝေ့က မှတ်ချက်ပေးလိုက်သည်။ ထူးကဲသည့် ပတ်ဝန်းကျင်မျိုးက ထူးကဲသည့်ပစ္စည်းကို ဆင့်ကဲပြောင်းလဲနိုင်သည်။ ဤသည်က မိုးမြေ၏ အခြေခံစည်းမျဉ်းဥပဒေသ တစ်ခုသာ ဖြစ်၏။ ထိုစည်းမျဉ်းက စည်းမျဉ်းမဲ့ဇုန်အတွက်လည်း သက်ဆိုင်မှုရှိကာ ဤနေရာမှ ဖန်တီးမည့် ပစ္စည်းက စည်းမျဉ်းမဲ့သံမဏိ ဖြစ်ပေသည်။ ထိုအရာက ဤနေရာရှိ ကျင့်ကြံရေးဖိနှိပ်စွမ်းအားနှင့် သက်ရောက်မှုမျိုးရှိသည့် သတ္တုအမျိုးအစား ဖြစ်၏။

“ကပ်ပါးတွေအားလုံးက ဒီနေရာက စည်းမျဉ်းမဲ့သံမဏိ မိုင်းတွင်းတွေအားလုံးကို ဖျက်ဆီးခဲ့တယ်လို့ ထင်နေတာ” ဝမ်ဝေ့က မေးလိုက်သည်။ စည်းမျဉ်းမဲ့ သံမဏိမိုင်းတွင်းများက ရှားပါးကာ အရေအတွက် နည်းပါးလှသည်။ သို့သော်လည်း ကပ်ပါးများက ဤနေရာကို ရှင်းလင်းခဲ့စဉ်အခါက သူတို့၏ အဓိကပစ်မှတ်တစ်ခုသည် ထိုမိုင်းတွင်းများ ဖြစ်၏။

“အဲဒါက အရေးမကြီးဘူး” ဝမ်ဝေ့က ဆက်ပြောလိုက်သည်။

“အရေးကြီးတာက ဒီလိုမျိုး စည်းမျဉ်းမဲ့သံမဏိကို သေးငယ်ပြီး အားကောင်းတဲ့ လက်နက်အဖြစ် သန့်စင်နိုင်တဲ့ လက်နက်ဆရာကို တွေ့သွားတာပဲ”

စည်းမျဉ်းမဲ့သံမဏိက ပြင်ပလောကတွင် အဖိုးတန်သည်မှာ ထိုအရာ၏ အဓိကအသုံးပြုမှုက အားကောင်းသည့် သက်ရှိများကို ဖြေရှင်းဖို့ အကျဉ်းထောင်အနေနှင့် ဖန်တီးဖို့ ဖြစ်သည်။ သို့သော်လည်း လက်နက်များကို ဖန်တီးဖို့ရာ သတ္တုအနေဖြင့် အရမ်းဈေးမကြီးပေ။ အကြောင်းအရင်းကမူ တခြားသော သတ္တုများဖြင့် ပေါင်းစည်းသွားသည့်အခါ ဖိနှိပ်စွမ်းအားကို ထိန်းသိမ်းထားဖို့ ခက်ခဲ၍ ဖြစ်၏။ စည်းမျဉ်းမဲ့သံမဏိ၏ သဘာဝဂုဏ်သတ္တိတစ်ခုက အရေအတွက်များပြားပါက ပိုမိုအလုပ်ဖြစ်ပေသည်။ ထို့ကြောင့် ဝမ်ဝေ့က မျက်လုံးလက်နက်မျိုး ရှိနေသည့်အချက်ကို အံ့အားသင့်နေဆဲ ဖြစ်သည်။

“မင်းက အကျဉ်းသား တစ်ယောက်အနေနဲ့ စကားများလွန်းတာပဲ” ကောင်းကင်ပြာ မျှော်နန်းသခင်က သူ့ကို စိုက်ကြည့်ကာ ပြောလိုက်သည်။

“ကဲ ငါ့မှာ ရွေးချယ်စရာ မရှိတော့ဘူး” ဝမ်ဝေ့က လှောင်ပြုံးဖြင့် ပြန်ဖြေလိုက်သည်။ ထို့နောက် ထိုကျောက်လူသားကို ထိတ်လန့်သွားစေသည်က သူတို့သည် နှစ်ဦးသား ထိပ်တိုက်တွေ့ဆုံစဉ် သူတို့၏ စွမ်းအားက ယှဉ်နိုင်လေ၏။

“မင်း ဘယ်လိုလုပ်ဖြစ်နိုင်မှာလဲ”

ဝမ်ဝေ့က လှောင်ပြုံးပြုံးလိုက်သည်။ သူက တစ်ဖက်သူအပေါ် အကြောင်းအရင်း မရှိဘဲ ဝှက်ထားမည် မဟုတ်ပေ။ အချိန်တိုအတွင်း သူက စည်းမျဉ်းမဲ့သံမဏိ၏ ဖွဲ့စည်းပုံနှင့် သက်ရောက်မှုကို နားလည်ကာ လွတ်လပ်ခွင့်တာအိုကို အသုံးပြုပြီး ထိုအရာ၏ သက်ရောက်မှုကို လျှော့ချခဲ့သည်။

သူက အထွတ်အထိပ်သို့ ပြန်လည်မရောက်ရှိသွားသော်လည်း သူ့ကောင်းကင်ဘုံအဆင့်စွမ်းအားနှင့် မဖျက်ဆီးနိုင်ဖွယ် ဂုဏ်သတ္တိတို့ကို ပြန်လည်ရရှိလာသည်။ ထိုအရာက ဤအခြေအနေကို ဖြေရှင်းဖို့ လုံလောက်နေပြီ ဖြစ်၏။

“ကျစ်”

တိုက်ပွဲက ဆက်လက် ဖြစ်ပွားနေသော်လည်း ဝမ်ဝေ့က နောက်ဆုံးအနိုင်ရရှိသူ ဖြစ်လာသည်။ တူညီသည့် ကျင့်ကြံဆင့်တွင် ဝမ်ဝေ့ကို အနိုင်ယူဖို့ရာ ခက်ခဲလှသည်။ မျှော်နန်းသခင်က မြေကြီးပေါ်လဲကျနေစဉ် ဝမ်ဝေ့က ထိုသူ၏ စည်းမျဉ်းမဲ့သံမဏိ မျက်လုံးကို ထုတ်ယူလိုက်၏။

“တကယ်ကို လက်ရာကောင်းပဲ” သူက ကြည့်ရှုလိုက်၏။

“ငါ့ဆီမှာ အရင်းအမြစ်တွေ အများကြီးရှိပေမဲ့ သူတို့ကို အသုံးချဖို့ ကျွမ်းကျင်အတတ်ပညာရှင် မလုံလောက်ဘူး။ အခုတော့ လက်နက်သန့်စင်သူ ဆရာသခင်တစ်ယောက် ရတော့မယ်ထင်တယ်”