အခန်း (၁၃၂၅)

ဟန်မူယဲ့က ပတ်ဝန်းကျင်ကို ကြည့်လိုက်သည်။

လုကျီရှုအား ဝိုင်းရံတိုက်ခိုက်ခဲ့သော နတ်ဘုရားသားရဲနှင့် ကမ္ဘာဦးအဆင့် ကျွမ်းကျင်သူများက ထွက်ပြေးသွားကြသည်။

သို့သော် ဒဏ်ရာရနေပြီး အက်ကွဲကြောင်းများကြားတွင် ရှိနေသောကြောင့် မလှုပ်ရှားနိုင်သောလူများ ကျန်ရစ်ခဲ့ကြသည်။

“ဘန်း”

လုကျီရှု၏ လှံရှည်က ပျံသန်းလာပြီး လေဟာနယ်ကို ထိုးဖောက်၍ လုကျီရှုကို ပြန်ထွက်လာစေသည်။

သူက ဓားရှည်ကိုင်ထားသော ဟန်မူယဲ့ကို ကြည့်လိုက်ပြီး ပြုံးသည်။

“ဟားဟား၊ ငါပြောခဲ့တဲ့အတိုင်း အခုအချိန်ကစပြီး မင်းက ငါ့ရဲ့ ညီအစ်ကိုပဲ”

“လုမိသားစုက စကြဝဠာနယ်မြေမှာ အာဏာရှိတယ်။ ပြီးတော့ တခြားစကြဝဠာကနေ ရောက်လာခဲ့တာပဲ”

လုကျီရှု၏စကားအရ စကြဝဠာနယ်မြေသည် လောကအသီးသီး၏ ကျွမ်းကျင်သူများကို စုစည်းထားသော နေရာတစ်ခု ဖြစ်သည်။

အစစ်အမှန်ကျွမ်းကျင်သူများက ကိုယ်ပိုင်အင်အားစုကို ပျိုးထောင်ရန်အတွက် စကြဝဠာနယ်မြေသို့ ရောက်လာကြသည်။

ထို့‌ကြောင့် သူတို့က ကြယ်စင်စုစကြဝဠာ၏ စည်းကမ်းများကို ဂရုမစိုက်ပေ။

ဤစကြဝဠာက သူတို့၏အိမ် မဟုတ်ပေ။ အဘယ်ကြောင့် ဂရုစိုက်ရမည်နည်း။

စကြဝဠာနယ်မြေတွင် ရုပ်သေးရုပ်နှင့် ချပ်ဝတ်များသာမက နတ်ဘုရားလမ်းစဉ်၏ နည်းလမ်းများ၊ ရုပ်ခန္ဓာနှင့် ဝိညာဉ်ကို ကျင့်ကြံနိုင်သော အင်မော်တယ်နည်းစနစ်များလည်း ရှိနေသည်။

ထို့အပြင် ဓားကျင့်ကြံသူများလည်း ရှိကြသည်။

လုကျီရှု၏စကားကြောင့် ဟန်မူယဲ့က စကြဝဠာနယ်မြေကို စိတ်ဝင်စားလာသည်။

‘အဲဒီနေရာက ဘယ်လိုမျိုးလဲ’

လုကျီရှုက ရှုချန်၏ရတနာများကို ရှာဖွေရန်အတွက် မူယန်လေဟာနယ်သို့ ရောက်လာခဲ့သည်။

ရှုချန်သည် စကြဝဠာနယ်မြေ၏ မဟာကျင့်ကြံသူတစ်ယောက် ဖြစ်သည်။ သို့သော် လွန်ခဲ့သော နှစ်ပေါင်းများစွာတွင် အပြင်းအထန် ဒဏ်ရာရပြီး ထွက်ပြေးသွားခဲ့သည်။

စကြဝဠာနယ်မြေတွင်ရှိသော ကျွမ်းကျင်သူများကလည်း တစ်ယောက်နှင့်တစ်ယောက် အမြဲ ယှဉ်ပြိုင်နေကြသည်။ လုံလောက်အောင် မသန်မာလျှင် ထွက်ပြေးရန်သာ တတ်နိုင်မည်။

“မင်းသတိထားမိလား။ ကျွမ်းကျင်သူတစ်ယောက်ဖြစ်တဲ့ ရှုချန်က စကြဝဠာအဆင့် လက်နက်ကို ကိုင်မထားဘူး”

“မဟုတ်ရင် သူနဲ့ ယှဉ်နိုင်မှာမဟုတ်ဘူး”

လုကျီရှုက တီးတိုးပြောသည်။

စကြဝဠာအဆင့် လက်နက်ကို ကိုင်ဆောင်ထားသော စကြဝဠာအဆင့် ကျွမ်းကျင်သူများသည် အစွမ်းကုန် ထုတ်သုံးနိုင်သည်။

ဟန်မူယဲ့က စကြဝဠာအဆင့် ကျွမ်းကျင်သူနှင့် တိုက်ခိုက်နိုင်ခဲ့သော်လည်း အားကောင်းသော လူများနှင့် ရင်မဆိုင်နိုင်သေးပေ။

ရှုချန် ဒဏ်ရာရသွားသောအကြောင်းကို ဟန်မူယဲ့က သိထားသည်။

ဓားနတ်ဘုရားလုယွဲ့က ကြယ်စင်စုစကြဝဠာကို တိုက်ခိုက်ခဲ့သည်။

လုကျီရှုက ထိုအကြောင်းကို မပြောခဲ့ပေ။

“ညီအစ်ကို၊ ငါနဲ့အတူ စကြဝဠာနယ်မြေကို လိုက်ခဲ့ပါ”

လုကျီရှုက ဟန်မူယဲ့ကို ကြည့်လိုက်ပြီး စိတ်အားထက်သန်စွာ ပြောသည်။

“မင်းက ငါ့ကို ကယ်တင်ခဲ့တယ်။ ပြီးတော့ မင်းရဲ့ ကျင့်ကြံဆင့်နဲ့ ခွန်အားအရ စကြဝဠာနယ်မြေကို ဝင်‌ရောက်နိုင်တယ်”

‘စကြဝဠာနယ်မြေကို သွားရမှာလား’

‘အခုလား’

ဟန်မူယဲ့က စဉ်းစားကြည့်လိုက်ပြီး ခေါင်းခါသည်။

သူက စကြဝဠာနယ်မြေသို့ သွားမည်။ သို့သော် ယခုအချိန်တွင် မဟုတ်သေးပေ။

“ကျွန်တော်က လုပ်စရာရှိသေးတယ်။ အားလုံး စီစဉ်ပြီးရင် စကြဝဠာနယ်မြေကို လာခဲ့ပါမယ်”

ဟန်မူယဲ့က ပြောသည်။

သူ့စကားကို ကြားရသောအခါတွင် လုကျီရှုက ခပ်ဟဟရယ်သည်။

“တခြားလူတွေက စကြဝဠာနယ်မြေကိုသွားဖို့ စိတ်အားထက်သန်နေကြတယ်။ မင်းကတော့ ....”

“ဘယ်လိုပဲဖြစ်ဖြစ် စကြဝဠာနယ်မြေကို ‌ရောက်လာရင် တခြားအကြောင်းအရာတွေက အရေးမကြီးဘူးဆိုတာကို မင်းနားလည်လာမှာပါ”

လုကျီရှုက တွန်းအားမပေးဘဲ ကျောက်စိမ်းပြားတစ်ခုကို ပေးခဲ့သည်။

ဟန်မူယဲ့က စကြဝဠာနယ်မြေသို့ ရောက်လာလျှင် သူက အာရုံခံမိလိမ့်မည်။

လုကျီရှု ထွက်သွားသောအခါ ဟန်မူယဲ့က မူယန်လေဟာနယ်တွင် ဆက်ရှိနေခဲ့သည်။

သူက ကောင်းကင်ဆင်သားရဲ၏ ဗလာဖြစ်နေသောမြို့ကို ပြန်လည်ပြင်ဆင်ခဲ့သည်။ ထို့နောက် အခြေချရန် ကျယ်ဝန်းသောနေရာတစ်ခုကို ရှာလိုက်သည်။

လေဟာနယ်တွင် ခြေလှမ်းတိုင်းသည် သန်းချီသော လောကအလွှာများကို ဖြတ်သန်းသွားသည်။ ဆင်သားရဲ၏ ယခုနေရာသည် တိုက်ပွဲနေရာနှင့် အလွန်ဝေးကွာသည်။ တခြားလူများက ရှာတွေ့မည်မဟုတ်ပေ။

သူက မြို့ထဲတွင်ရှိသော အစီအရင်တချို့ကို ပြုပြင်ခဲ့သည်။

သူ၏ခွန်အားဖြင့် အချိန်တိုအတွင်း အစီအရင်များအားလုံးကို မပြုပြင်နိုင်ပေ။ ရိုးရှင်းသော အကာအကွယ်အစီအရင်နှင့် ဖုံးကွယ်ခြင်းအစီအရင်ကိုသာ အသက်သွင်းနိုင်ခဲ့သည်။

တစ်ချိန်တည်းမှာပင် မြို့ထဲတွင်ရှိသော ရုပ်သေးရုပ်များကို ရှာဖွေပြီး အ‌စောင့်အဖြစ် ထားလိုက်သည်။

အဆင့်ငါးအထက်တွင်ရှိသော ရုပ်သေးရုပ်များသည် အလိုလျောက် ခုခံနိုင်သည်။

ကမ္ဘာဦးအဆင့် ရုပ်သေးရုပ်များသည် အသိဉာဏ်ရှိသည်။

ဟန်မူယဲ့က ကမ္ဘာဦးအဆင့် ရုပ်သေးရုပ် တစ်ရာခန့်နှင့် အဆင့်မတူသော ရုပ်သေးရုပ်အများအပြားကို စုဆောင်းထားသည်။ သူက ရုပ်သေးရုပ်တစ်ထောင်ကျော်ကို မြို့ထဲတွင် နေရာချလိုက်သည်။

သို့သော် မလုံလောက်ပေ။ ဤနေရာသည် မူယန်လေဟာနယ် ဖြစ်သည်။

ထို့ကြောင့် သူက ကောင်းကင်ထမ်းဟိုကို ခေါ်လာပြီး ပတ်ဝန်းကျင်တွင် နတ်ဘုရားသားရဲများကို ရှာဖွေလိုက်သည်။

အချိန်အတော်ကြာသွားသောအခါ သူ‌က နတ်ဘုရားသားရဲ ဆယ်ကောင်ကို ဖမ်းဆီးနိုင်ခဲ့သည်။

ကောင်းကင်ထမ်းဟိုနှင့် ဟန်မူယဲ့၏ မိုးကြိုးစွမ်းရည်ကြောင့် ထိုနတ်ဘုရားသားရဲများက လျင်မြန်စွာ အညံ့ခံခဲ့ကြသည်။

ဟန်မူယဲ့က ဗလာဖြစ်နေသောမြို့ကို ထျန်းရှန်မြို့ဟု အမည်ပေးလိုက်ပြီး နတ်ဘုရားသားရဲများကို စောင့်ကြပ်စေခဲ့သည်။

ထိုနတ်ဘုရားသားရဲများကြောင့် ထျန်းရှန်မြို့က အစစ်အမှန်ခွန်အားတချို့ ရှိလာသည်။

ဟန်မူယဲ့က မူယန်လေဟာနယ်မှ ပြန်ထွက်လာသောအခါတွင် နှစ်ပေါင်းသုံးဆယ် ကုန်ဆုံးသွားခဲ့သည်။

သူက လေဟာနယ်ထဲတွင် ပျံသန်းလာပြီး မြို့ကြီးတစ်မြို့ကို ရှာဖွေခဲ့သည်။ ထို့နောက် မူလဒင်္ဂါးတချို့ကို အသုံးပြု၍ တည်နေရာရွှေ့ပြောင်းခြင်းဝင်္ကပါများကို အဆင့်ဆင့်အသုံးပြုပြီး ‌ရေခဲလမြို့သို့ ပြန်ရောက်လာသည်။

ရေခဲလမြို့သည် ပြောင်းလဲနေသည်။

ကျောက်ချီယန် ဦးဆောင်ထားသော ရေခဲလကျောင်းတော်ကလည်း ပုံစံပေါ်နေသည်။

ကျောက်ချီယန်က နေကြတ်မြို့၏ နည်းပြတစ်ဝက်နှင့် အရင်းအမြစ်တစ်ဝက်ကို ယူလာခဲ့သည်။

ထို့ကြောင့် နေကြတ်မြို့သခင် ယန်ယွီရှန်းက ရင်နာနေသော်လည်း ကျောက်ချီယန်က ရေခဲလမြို့သို့ ရောက်သွားလျှင် နေကြတ်မြို့အတွက် ပိုကောင်းမည်ဖြစ်သောကြောင့် ခွင့်ပြုပေးလိုက်ရသည်။

ယခုအချိန်တွင် နေကြတ်မြို့နှင့် ရေခဲလမြို့၏ ဆက်ဆံရေးက အလွန်နီးစပ်နေပြီး နှစ်ဖက်လုံး၏ အကျိုးအမြတ်ကို ထောက်ပံ့ပေးနိုင်သည်။

ယခုအချိန်တွင် ရေခဲလမြို့၏ ခေါင်းဆောင်က ဖုန်းကျူထျန်း ဖြစ်သည်။

သူက ဖုန်းကောမြို့၏ သခင်လေးဖြစ်ပြီး ဟန်မူယဲ့၏ လူယုံတစ်ယောက်ဖြစ်သောကြောင့် လေဟာနယ်မြို့တစ်မြို့ကို ကောင်းမွန်စွာ စီမံနိုင်သည်။

ဟယ်ရန်စွန်းက ဘုရားမြို့သို့ ပြန်သွားသည်။

ဘုရားမြို့တွင်ရှိသော အလုပ်ရုံသည် ဟန်မူယဲ့၏ အခြေခံအုတ်မြစ် ဖြစ်သည်။

ထိုနေရာတွင်ရှိသော ထုတ်ကုန်များသည် ကြယ်စင်စုစကြဝဠာတစ်ခုလုံးနှင့် ပတ်သတ်နေသည်။

အဆုံးမရှိသော ကြွယ်ဝမှုသည် ဘုရားမြို့တွင် နှစ်စဉ် စုစည်းနေသည်။

ဓာတ်စင်ငါးပါးမီးပြင်းဖိုက ဟန်မူယဲ့ပြန်ရောက်လာကြောင်း အရင်ဆုံး သိလိုက်သည်။ သူနှင့် ရွှေကျီးကန်းက ရေခဲလမြို့တွင် ရှိနေကြသည်။

ခေးအော့နှင့် နတ်ဘုရားသတ်ဖြတ်ခြင်း ရုပ်သေးရုပ်က ဟယ်ရန်စွန်းနှင့်အတူ ဘုရားမြို့သို့ လိုက်သွားကြသည်။

ဟယ်ရန်စွန်းက အလွန်သန်မာသော်လည်း ဘုရားမြို့က အလွန်အရေးကြီးသည်။ သူက ကမ္ဘာဦးအဆင့် ကျွမ်းကျင်သူများကို စိုးရိမ်နေခဲ့သည်။

ပေါင်းစပ်ရုပ်သေးရုပ်နှင့် ဇီဝရုပ်သေးရုပ်များကို ဖန်တီးရန် တာဝန်ယူထားသော ကျောက်ချီယန်၊ ဖုန်းကျူထျန်းနှင့် လျန်ချီယွမ်တို့ အားလုံးက ခန်းဆောင်ထဲသို့ ရောက်လာကြသည်။

လွန်ခဲ့သော နှစ်ပေါင်းသုံးဆယ်တွင် ရေခဲလမြို့၏ စီးပွားရေးက အတော်လေး ကောင်းမွန်ခဲ့သည်။ မြို့က အနည်းငယ် ကျယ်ပြန့်လာပြီး လူဦးရေကလည်း ယခင် တစ်သိန်းခန့်မှ သုံးသန်းကျော်အထိ တိုးပွားလာသည်။

မြို့သည် အလွန်တိုးတက်နေသည်။

“မြို့သခင်၊ ဒါက ရေခဲလမြို့ရဲ့ အကျိုးအမြတ်တွေပါ”

ဖုန်းကျူထျန်းက ကျောက်စိမ်းပေလွှာတစ်ခုကို ပေးသည်။

“မြို့သခင်၊ အစည်းအရုံးရဲ့ အကြီးအကဲတွေက လွန်ခဲ့တဲ့နှစ်အနည်းငယ်မှာ စာပို့လိုက်ပါတယ်။ မြို့သခင်ပြန်လာရင် ဌာနချုပ်ကို လာစေချင်နေတယ်”

ကျောက်ချီယန်က ဟန်မူယဲ့ကို ကြည့်လိုက်ပြီး တီးတိုးပြောသည်။

“မြို့သခင်ကို အဓိကအကြီးအကဲတစ်ယောက်အဖြစ် ဖိတ်ခေါ်ချင်နေတယ်”

ကြယ်စင်စုစကြဝဠာတွင် စကြဝဠာနယ်မြေက အထွတ်အထိပ်ဖြစ်သော်လည်း ပြင်ပလောကနှင့် အဆက်အသွယ်မရှိပေ။

ကျင့်ကြံခြင်းလောကတစ်ခုလုံးက အစည်းအရုံးလေးခုကို လေးစားကြသည်။

ပန်းပဲပညာရှင်အစည်းအရုံး၊ ချပ်ဝတ်သခင် အစည်းအရုံး၊ ရုပ်သေးသခင် အစည်းအရုံးနှင့် ကျောင်းတော်အစည်းအရုံးတို့ ဖြစ်ကြသည်။

ထိုအစည်းအရုံးကြီးလေးခုသည် မည်သည့်အင်အားစုနှင့်မှ မသက်ဆိုင်ပေ။

သူတို့က ကျင့်ကြံခြင်း‌လောကကို တိုးတက်လာအောင် ထောက်ပံ့ပေးရန် ရည်ရွယ်ထားသည်။

ဥပမာအနေဖြင့် ချပ်ဝတ်နှင့် ရုပ်သေးရုပ်များကို နောက်ကွယ်တွင်ရှိသော အစည်းအရုံးများက ပိုမိုကောင်းမွန်လာအောင် ဆက်တိုက် ပြုပြင်ပေးနေသည်။

ထို့အပြင် ဆက်တိုက်ကျဆင်းလာသော သဘာဝစွမ်းအားနှင့် သင့်တော်သော နည်းစနစ်များကိုလည်း ထောက်ပံ့ပေးနေခဲ့သည်။

ကျင့်ကြံခြင်းလောက၏ အကျိုးအမြတ်ကို ကာကွယ်ပေးထားသော အစည်းအရုံးများ မရှိလျှင် မည်သည့်လမ်းစဉ်ကမှ တိုးတက်လာနိုင်မည်မဟုတ်ပေ။

လွန်ခဲ့သောနှစ်များတွင် ဟန်မူယဲ့၏ ပန်းပဲနည်းစနစ်ကို အသိအမှတ်ပြုလိုက်သောကြောင့် သူ့ကို အဓိကအကြီးအကဲတစ်ယောက်အဖြစ် ဖိတ်ခေါ်ခဲ့သည်။

သို့သော် အရေးအကြီးဆုံးအနေဖြင့် ဟန်မူယဲ့က ကြယ်စင်စုစကြဝဠာတစ်ခုလုံး၏ ပန်းပဲနည်းစနစ်ကို တိုးတက်လာအောင် လှုံ့ဆော်ပေးခဲ့သည်။

အဏုကြည့်မျက်လုံးမှ အစပြု၍ နှစ်စဉ်ပေးအပ်ခဲ့သော ဆုကြေးများကြောင့် လွန်ခဲ့သောနှစ်များတွင် ကြယ်စင်စုစကြဝဠာ၏ ပန်းပဲနည်းစနစ်များက ကမ္ဘာတုန်လောက်အောင် ပြောင်းလဲသွားခဲ့သည်။

ယခင်က ခက်ခဲခဲ့သော လုပ်ငန်းစဉ်များကို ယခုအချိန်တွင် ပစ္စည်းကိရိယာများ၏ အကူအညီဖြင့် အဆင့်နိမ့်ပန်းပဲပညာရှင်များက လုပ်ဆောင်နိုင်လာသည်။

ထို့ကြောင့် အဆင့်မြင့်ပန်းပဲပညာရှင်များက သုတေသနလုပ်ရန် အာရုံစိုက်နိုင်သွားသည်။

ပြောင်းလဲမှုများက ဆယ်စုနှစ်အနည်းငယ်သာ ရှိသေးသော်လည်း ကြယ်စင်စုစကြဝဠာ၏ ပန်းပဲနည်းစနစ်များက လွန်ခဲ့သော နှစ်တစ်ထောင်ထက် ပိုမိုတိုးတက်လာသည်။

ယခုအချိန်သည် ကြယ်စင်စုစကြဝဠာ၏ အထွတ်အထိပ်ဟု လူအများက ယုံကြည်ကြသည်။

အဏုကြည့်မျက်လုံး ပေါ်ထွက်မလာခင် ကြေးခေတ်ဟု ခေါ်ဆိုကြသည်။

ယခုအချိန်ကိုတော့ ပန်းပဲပညာရှင်များက ငွေခေတ်ဟု ပြောင်းလဲသတ်မှတ်လိုက်ကြသည်။

သို့သော် လူတိုင်းမျှော်လင့်နေသော ခမ်းနားသည့်ခေတ်သို့ ရောက်လာမည်ဟု မည်သူမှ မပြောနိုင်သေးပေ။

“ကောင်းပြီ။ အနားယူပြီးရင် ပန်းပဲပညာရှင်အစည်းအရုံးကို သွားလိုက်မယ်”

ဟန်မူယဲ့က ခေါင်းညိတ်လိုက်ပြီး ပြောသည်။

သူက ပန်းပဲပညာရှင်အစည်းအရုံး၏ အဓိကအကြီးအကဲတစ်ယောက် ဖြစ်လာလျှင် လုပ်ပိုင်ခွင့်တချို့ ရလာမည်။

ထိုလုပ်ပိုင်ခွင့်သည် အတော်လေးကျယ်ပြန့်ပြီး ဟန်မူယဲ့လိုချင်သော အရာတချို့ကို ယူနိုင်မည်။

ဥပမာအနေဖြင့် ကမ္ဘာဦးအဆင့် အစိတ်အပိုင်းများနှင့် နတ်ဘုရားအဆင့် ရုပ်သေးရုပ်များကို ‌ရောင်းဝယ်ခြင်း ဖြစ်သည်။

အဆင့်မြင့်ရုပ်သေးရုပ်နှင့် ဝိညာဉ်သတ္တုများကို ကူးသန်းရောင်းဝယ်ရန်အတွက် အစည်းအရုံး၏ ခွင့်ပြုချက်ကို လိုအပ်သည်။

အဓိကအကြီးအကဲများကသာ ထိုလုပ်ပိုင်ခွင့်ကို ရရှိထားသည်။

ထိုအရာသည် အရင်းအမြစ်များကို ကန့်သတ်ခြင်းဖြစ်ပြီး ကာကွယ်ခြင်းလည်း ဖြစ်သည်။

ဟန်မူယဲ့က အစည်းအရုံးသို့ သွားမည်ဟု ပြောလိုက်သောအခါတွင် ဖုန်းကျူထျန်း၊ ကျောက်ချီယန်နှင့် တခြားလူများက ပျော်ရွှင်သွားကြသည်။

ဆရာဟန်၏ဂုဏ်သတင်းသည် ကြယ်စင်စုစကြဝဠာတစ်ခုလုံးတွင် ပျံ့နှံ့နေသော်လည်း အစည်းအရုံးတွင် ရာထူးတစ်ခု မရှိသေးပေ။

အကယ်၍ သူက အဓိကအကြီးအကဲတစ်ယောက် ဖြစ်လာလျှင် အရာအားလုံး ပြောင်းလဲသွားလိမ့်မည်။

ရေခဲလမြို့က အကျိုးအမြတ်များကို ရိတ်သိမ်းနိုင်မည်။

ကျောက်ချီယန်နှင့် တခြားလူများက အချိန်ကြာမြင့်စွာ မနေခဲ့ပေ။

သူတို့အားလုံး ထွက်သွားသောအခါ ဟန်မူယဲ့က ရှေ့သို့ ကြည့်လိုက်သည်။

စွမ်းအင်အလင်းသည် တုန်ခါနေပြီး အစိမ်းရောင်ဝတ်စုံနှင့် အမျိုးသမီးတစ်ယောက် ပေါ်ထွက်လာသည်။

မြို့သခင်မူယွဲ့၏ ရုပ်သေးရုပ် ဖြစ်သည်။

ထိုရုပ်သေးရုပ်သည် စကြဝဠာတစ်ဝက်အဆင့် ဇီဝရုပ်သေးရုပ် ဖြစ်သည်။

မြို့သခင်မူယွဲ့က အပြင်းအထန် ဒဏ်ရာရနေပြီး ထွက်မသွားခဲ့လျှင် ထိုရုပ်သေးရုပ်က စကြဝဠာနယ်မြေတွင် ရှိနေလိမ့်မည်။

“နင်က ပိုပြီး သန်မာလာပြီ”

ရုပ်သေးရုပ်က ဟန်မူယဲ့ကို ကြည့်လိုက်ပြီး ညင်သာစွာ ပြောသည်။