စိတ်ခံစားချက် ၇မျိုးနှင့် လိုအင်ဆန္ဒ ၆ပါး

ဤသည်က အလိုဆန္ဒစည်းမျဉ်းဥပဒေသကို နောက်ထပ်အသုံးပြုမှုတစ်ခု ဖြစ်၏။ တခြားသော လိုအင်ဆန္ဒမြို့သခင်များက ထိုအရာကို ကျွမ်းကျင်ထားကြသော်လည်း သူတို့က တစ်ခုကိုသာ အသုံးပြုနိုင်ကြသည်။ ဝမ်ပေါင်လဲ့ တစ်ယောက်တည်းကသာ သုံးခုကို အသုံးပြုနိုင်ခြင်း ဖြစ်၏။ အာသီသစည်းမျဉ်းဥပဒေသက ဇစ်မြစ်လောက် အားကောင်းနေသည့်အတွက် မြေနက်ဧကရာဇ်ပင် သက်ရောက်ခံလိုက်ရသည်။ သူ့ခန္ဓာကိုယ်က တုန်ယင်သွားကာ ဝမ်ပေါင်လဲ့နောက် ချက်ချင်း လိုက်မဖမ်းနိုင်ခဲ့ပေ။

သူက တံခါးရှေ့ တင်ပျဉ်ခွေကာ ထိုင်နေပြီး မျက်လုံးကို မှိတ်ကာ အားပြန်ဖြည့်လိုက်သည်။ ထိုတံခါးက နေရာတွင်ရှိနေဆဲ ဖြစ်သော်လည်း ဝမ်ပေါင်လဲ့တစ်ယောက်တည်းကသာ ဖွင့်နိုင်မည့် လုပ်ပိုင်ခွင့် ရှိ၏။

အကယ်၍ သူသာ တံခါးကို ဖွင့်လိုပါက မြေနက်ဧကရာဇ်၏ အတားအဆီးနှင့် ရင်ဆိုင်ရမည် ဖြစ်သည်။ ထို့အပြင် ဝမ်ပေါင်လဲ့က တိုက်ပွဲအတွင်း ဒဏ်ရာရရှိသွားခဲ့၏။ အခြေအနေက ယခုအခိုက်အတန့်တွင် ရပ်တန့်သွားဟန်ပေါ်သည်။

တခြားသော လိုအင်ဆန္ဒများနှင့် စိတ်ခံစားချက်မြို့သခင်များကလည်း မြေနက်ဧကရာဇ်အတွက် ပြိုင်ဖက် မဟုတ်ကြပေ။ ထိုသူက ကျိန်စာသင့်နေလျှင်ပင် သူတို့အနေဖြင့် အလျင်စလို မပြုမူရဲပေ။

ဤသို့ဖြင့် ဒုတိယကမ္ဘာတစ်ခုလုံးက တိတ်တဆိတ်သာ စောင့်ကြည့်နေလေ၏။ ဝမ်ပေါင်လဲ့၏ ပုံရိပ်က အဝေးတစ်နေရာရှိ ကောင်းကင်ယံ၌ ပေါ်ထွက်လာသည်။ သူ့မျက်နှာက ဖြူဖျော့နေပြီး သွေးများလည်း စီးကျနေ၏။ သူ့ခန္ဓာကိုယ်တစ်ခုလုံးက အက်ကြောင်းများဖြင့် ပြည့်နှက်နေကာ သူသာ သတိမထားမိပါက ခန္ဓာကိုယ်သည် ပြိုလဲသွားနိုင်ချေ ရှိ၏။

ထိုအက်ကြောင်းများက စွမ်းအားကုန်သုံးရင်း ပြန်လည်ကုစားနေသော်လည်း ကုစားနှုန်းက နှေးကွေးနေလေသည်။ တခြားတစ်ဖက်တွင် အနှောင့်အယှက်ကလည်း ရှိနေသေး၏။

ထိုအရာက ဝမ်ပေါင်လဲ့အား သွေးသံရဲရဲ လူအဖြစ် ပြောင်းလဲသွားစေပြီး သူ့အရှိန်အဝါက ပိုမိုအားနည်းသွားလေသည်။

“တကယ်ကို စွမ်းအားကြီးတဲ့ မြေနက်ဧကရာဇ်ပဲ” ထိုနေရာတွင် ရပ်နေရင်း ဝမ်ပေါင်လဲ့က မျက်မှောင်ကြုတ်ကာ ရေရွတ်လိုက်သည်။

“ဒါပေမဲ့ ခင်ဗျားလည်း ကောင်းကောင်းနေရမှာမဟုတ်ဘူး။ ကျုပ်ရဲ့ လိုအင်ဆန္ဒကျိန်စာသုံးခုက ဖိနှိပ်ဖို့ လိုတဲ့အရာမျိုး မဟုတ်ဘူး” ဝမ်ပေါင်လဲ့က တစ်ဖက်သူ၏ အခြေအနေကို ခံစားမိလိုက်သည်။ သူ့ဒဏ်ရာကို ကုစားခြင်းက ကိစ္စတစ်ခုဖြစ်ကာ သူနှင့် မြေနက်ဧကရာဇ်ကြားမှ ကွာဟချက်ကို သိထားခြင်းက နောက်ထပ်ကိစ္စတစ်ခုဖြစ်သည်။ ထိုဟာကွက်က သိပ်မကြီးမားသော်လည်း သူက လက်ရှိစွမ်းအားပေါ်မှာသာ မှီခိုနေပါက တစ်ဖက်သူကို ဖိနှိပ်ထားနိုင်မည်မဟုတ်ပေ။

အကယ်၍ သူသာ မြေနက်ဧကရာဇ်ကို မဖိနှိပ်နိုင်လျှင် သူ့အနေဖြင့် အထက်ကမ္ဘာမှ တံခါးကို ဖွင့်လှစ်ဖို့ ခက်ခဲလိမ့်မည်။

“ငါ့အနေနဲ့ အလိုဆန္ဒစည်းမျဉ်းအများကြီး လိုတယ်။” ဝမ်ပေါင်လဲ့က မျက်မှောင်ကြုတ်ပြီး လိုအင်ဆန္ဒ ၆ပါးအနက် ၄ပါးကို ရရှိထားသော်လည်း နှစ်ခု လိုအပ်နေသေးလေ၏။ ထိုအရာများက  ကျန်ရှိနေသည့် လိုအင်ဆန္ဒနှစ်ခု ဖြစ်သည့် ရနံ့နှင့် အထိတွေ့တို့ ဖြစ်၏။

အစပိုင်းတွင် ဝမ်ပေါင်လဲ့က သူတို့ကို လိုအပ်လာလိမ့်မည်ဟု ထင်မှတ်မထားပေ။ သို့သော်လည်း ယခု သူတို့ကို လိုအပ်နေဆဲသာ ဖြစ်၏။

ထိုအတွေးဖြင့် ဝမ်ပေါင်လဲ့က အသက်ပြင်းပြင်းရှူကာ သူ့ခန္ဓာကိုယ်မှ နာကျင်မှုအားလုံးကို တောင့်ခံလိုက်သည်။ သူက ခြေတစ်လှမ်းဖြင့် ထင်းယွိကမ္ဘာထဲ လျှောက်လှမ်းလိုက်သည်။ အသံကြားရာနေရာတိုင်းသို့ သူက ကူးသန်းသွားလာနိုင်၏။ သူက အဆုံးမဲ့ အကွာအဝေးကို ဖြတ်ကျော်ကာ အထိအတွေ့မြို့တော်ဆီ ရောက်ရှိလာလေ၏။

ဝမ်ပေါင်လဲ့က လေထဲမှ ဖြတ်သန်းလာသည့်အခါ ဧရာမခန္ဓာကြီးတစ်ခု ပေါ်ထွက်လာသည်။

ထိုအမျိုးသားက အနက်ရောင်ဝတ်ရုံကို ဝတ်ဆင်ထားပြီး သူ့တစ်ကိုယ်လုံးက မြူခိုးများဖြင့် ပြုလုပ်ထားသကဲ့သို့ ဖြစ်၏။ သူက လေထဲတွင် ရပ်နေရင်း ဝမ်ပေါင်လဲ့အား စိတ်ရှုပ်ထွေးစွာ ကြည့်လာသည်။

ဝမ်ပေါင်လဲ့က မြို့အပြင်တွင် ရပ်ကာ ရနံ့မြို့သခင်ကို ကြည့်လိုက်၏။

ခဏအကြာတွင် ရနံ့မြို့သခင်က ခေါင်းငုံ့ဖို့ ရွေးချယ်ခဲ့သည်။ သူက ဝမ်ပေါင်လဲ့သည် အထက်ကမ္ဘာ၏ ဂိတ်ပေါက်ကို ဆင့်ခေါ်ခဲ့ကြောင်း ကိုယ်တိုင်မြင်တွေ့ခဲ့ရပြီဖြစ်ကာ ထိုအရာအားလုံးက သူ့အနေဖြင့် ဝမ်ပေါင်လဲ့နှင့် တိုက်ခိုက်ဖို့ အရည်အချင်းမပြည့်မှီကြောင်း သိသွားစေသည်။

ဝမ်ပေါင်လဲ့က လက်ရှိ အားနည်းနေသော်လည်း ရနံ့မြို့သခင်က သူ့စိတ်နှလုံးသားမှ တိုက်ခိုက်ဖို့ရာ မလိုလားပေ။ ခေတ္တမျှ တိတ်ဆိတ်နေပြီးသည့်နောက်တွင် ခေါင်းငုံ့ပြီး ဝမ်ပေါင်လဲ့ထံ ဦးညွှတ်လိုက်၏။ ထို့နောက် သူ့လက်တစ်ချက်အဝှေ့တွင် သူ့ခန္ဓာကိုယ်မှ ရနံ့စည်းမျဉ်းဥပဒေသတို့က ပျံ့နှံ့သွားကာ ဝမ်ပေါင်လဲ့ဆီ ဦးတည်သွားလေသည်။

ထိုကြိုးမျှင်တစ်ခုချင်းစီက စည်းမျဉ်းဥပဒေသ တစ်စိတ်တစ်ပိုင်း ဖြစ်၏။ ဤသည်က ရနံ့မြို့သခင်၏ သူ့ကိုယ်သူပိုင်းဖြတ်ကာ ဝမ်ပေါင်လဲ့ကို ကူညီလိုက်ခြင်းဖြစ်သည်။

ထိုကြိုးမျှင်များက ထွက်ပေါ်လာသည့်အခါ ဝမ်ပေါင်လဲ့၏ ကိုယ်ရှိ အက်ကြောင်းများက စတင် ကောင်းမွန်လာသည်။ ထို့နောက် ရနံ့စည်းမျဉ်းဥပဒေသက သူ့အရှိန်အဝါကို ပြောင်းလဲပေးလိုက်၏။ ထိုအပြောင်းအလဲက တခြားသော လိုအင်ဆန္ဒများကို လှုံ့ဆော်ပေးလိုက်သကဲ့သို့ဖြစ်ကာ အားလုံးက တုန်ခါလာလေသည်။

အချိန်အတော်ကြာ ကြာမြင့်ပြီးသည့်နောက်တွင် ရနံ့မြို့သခင်က သိသိသာသာ အားနည်းသွားလေ၏။ ဝမ်ပေါင်လဲ့အတွက်မူ သူ့ခန္ဓာကိုယ်ရှိ အက်ကြောင်းများက တစ်ဝက်ကျော် ပြန်လည်ကောင်းမွန်လာပြီး အရှိန်အဝါက တည်ငြိမ်လာသည်။

“ကျေးဇူးပါ” ဝမ်ပေါင်လဲ့က လက်နှစ်ဖက်ယှက်ကာ ဦးညွှတ်ပြီး ပြောလိုက်သည်။

“ကိစ္စမရှိပါဘူး” ရနံ့မြို့သခင်က ခေါင်းအသာယမ်းကာ ဝမ်ပေါင်လဲ့အား ပြောလိုက်သည်။ ထို့နောက် မြူခိုးများဖြင့် ဖွဲ့စည်းထားသည့်ပုံရိပ်က ဖြည်းဖြည်းချင်း ပျောက်ကွယ်သွားလေ၏။

ဝမ်ပေါင်လဲ့က ရနံ့မြို့ကို အချိန်အတော်ကြာ ကြည့်ပြီးသည့်နောက်တွင် လေထုထဲမှ ပျောက်ကွယ်သွားသည်။ သူက ပြန်လည်ပေါ်ထွက်လာသည့်အခါ အထိအတွေ့မြို့ဖြစ်ပေသည်။ အထိအတွေ့ စည်းမျဉ်းဥပဒေသကို ရရှိသည်နှင့် ဝမ်ပေါင်လဲ့၏ လိုအင်ဆန္ဒ၆ပါးလုံးက ပြီးပြည့်စုံသွားလိမ့်မည်။ သို့သော်လည်း အထိအတွေ့မြို့၏ ရွေးချယ်မှုကမူ ရနံ့မြို့သခင်နှင့် ကွဲပြားနေသည်။ သူမက သူမ၏စည်းမျဉ်းဥပဒေသများကို ဝမ်ပေါင်လဲ့ထံ ပေးအပ်ဖို့ မလိုလားပေ။ ထို့ကြောင့် ဝမ်ပေါင်လဲ့ပေါ်ထွက်လာသည့်အခါ အထိအတွေ့မြို့သခင်က လေအေးတစ်ခုအသွင် ပြောင်းလဲသွားသည်။

ထိုလေအေးက သူ့ခန္ဓာကိုယ်ကို ထိတွေ့သွားသည့်အခါ မဖော်ပြနိုင်ဖွယ် သက်တောင့်သက်သာဖြစ်မှုတို့ ကြီးစိုးသွားလေ၏။ သို့သော်လည်း သူ့အာရုံ၌ အပြောင်းအလဲတို့ ဖြစ်ပေါ်လာသည်။ ခဏအကြာတွင် သူ့ခန္ဓာကိုယ်မှ လှိုင်းတွန့်များ ထွက်ပေါ်လာကာ ဝိညာဉ်တွင်း ရောက်ရှိသွားသည်။ ထိုအရာများက ဝမ်ပေါင်လဲ့ကို ဖျက်ဆီးဖို့ ကြိုးစားနေသကဲ့သို့ ဖြစ်၏။

“ဘာလဲ” ဝမ်ပေါင်လဲ့က ခေါင်းယမ်းလိုက်သည်။ သူ ပထမဦးဆုံး ဒုတိယကမ္ဘာတွင် ပေါ်ထွက်လာသည့်အချိန်က အထိအတွေ့ လိုအင်ဆန္ဒမြို့သခင်နှင့် ရင်ဆိုင်ဖို့ အင်အားကင်းမဲ့နေလိမ့်မည်။

သို့သော်လည်း သူက အတိတ်တုန်းကလိုမျိုး မဟုတ်တော့ပေ။ သူက ဒဏ်ရာရရှိထားသော်လည်း အထိအတွေ့မြို့သခင်ကို ဖိနှိပ်ဖို့ရာ မခက်ခဲပေ။ ထို့အပြင် သူက လိုအင်ဆန္ဒစည်းမျဉ်းဥပဒေသ ၅ခုကို ကျွမ်းကျင်ပြီးသား ဖြစ်သွား၏။ ထို့ကြောင့် သူ လက်ဝှေ့လိုက်သည့်အခါ ထိုလေအေးတစ်ချက်ကို လက်ထဲတွင် ဖမ်းဆုပ်မိလိုက်သည်။

ထိုသူက လက်ကို ဖျစ်လိုက်၏။

ထို့နောက် လေထုထဲ ပေါက်ကွဲသံတစ်ခု ထွက်ပေါ်လာသည်။ နောက်အခိုက်အတန့်လေး၌ အထိအတွေ့မြို့ထဲရှိ မြို့သခင်စံအိမ်တွင် ထိုင်နေသည့် အထိအတွေ့မြို့သခင်က ရုတ်ချည်းဆိုသလို မျက်လုံးပွင့်လာလေ၏။ သူမ၏ အမူအရာက ပြောင်းလဲသွားလေသည်။ သူမက ထရပ်တော့မည့်ဆဲဆဲတွင် သူမ၏ ခန္ဓာကိုယ်က မလှုပ်ရှားနိုင်ကြောင်း တွေ့ရှိသွား၏။

အကြောင်းအရင်းကမူ ဝမ်ပေါင်လဲ့က သူမရှေ့တွင် ပေါ်ထွက်လာပြီး ညာဖက်လက်ဖြင့် သူမ၏ ခေါင်းကို ထိကပ်လိုက်၍ ဖြစ်သည်။

“ငါက မင်းရဲ့ စည်းမျဉ်းဥပဒေသရဲ့ ၇၀ ရာခိုင်နှုန်းကိုပဲ ယူမှာ” ဝမ်ပေါင်လဲ့က ပြောလိုက်စဉ် သူ့လက်ဖဝါးမှ စုပ်ယူအား တစ်ခုထွက်ပေါ်လာသည်။

အထိအတွေ့မြို့သခင်၏ ခန္ဓာကိုယ်က တုန်ယင်သွားကာ သူမ၏ စည်းမျဉ်းဥပဒေသစွမ်းအားများက ဝမ်ပေါင်လဲ့၏ လက်ထဲ စုပ်ယူခံလိုက်ရသည်။

ထိုဖြစ်စဉ်တစ်ခုလုံးက သိပ်မကြာမြင့်ခဲ့ပေ။ ထိုအရာက အမွှေးတိုင်တစ်တိုင် လောင်ကျွမ်းချိန်မျှသာ ဖြစ်၏။

အထိအတွေ့မြို့သခင် အားနည်းသွားသည့်အချိန် ဝမ်ပေါင်လဲ့၏ မျက်နှာက ပိုမိုနီရဲလာသည်။ သူ့ခန္ဓာကိုယ်မှ အက်ကြောင်းများက ပျောက်ကွယ်သွားကာ ဒဏ်ရာများကလည်း ကောင်းမွန်လာ၏။ ဒဏ်ရာများက ပြန်လည်ကောင်းမွန်သွား၏။ ထို့နောက် လှုံ့ဆော်လိုက်ခံရသည့် စည်းမျဉ်းက သူ့ခန္ဓာကိုယ်ထဲ ဖြစ်တည်လာကာ လိုအင်ဆန္ဒ၆ခုလုံးက ဆက်တိုက် ပေါ်ထွက်လာသည်။

ဒုတိယကမ္ဘာတွင် လိုအင်ဆန္ဒ၆ပါးနှင့် စိတ်ဆန္ဒ၇မျိုးလုံးကို ပြီးပြည့်စုံအောင် ကျင့်ကြံနိုင်သည့်သူဟူ၍ တစ်ယောက်မှ မရှိခဲ့ဖူးပေ။

သို့သော် ယခုတွင် ဤသို့သောလူမျိုး ပေါ်ထွက်လာပြီ ဖြစ်၏။

ကမ္ဘာကြီးက သိသိသာသာ ပြောင်းလဲသွားကာ ထူးဆန်းသည့် အတက်အကျလှိုင်းတစ်ခု ပေါ်ထွက်လာသည်။ ထို့နောက် ဒုတိယကမ္ဘာရှိ စည်းမျဉ်းဥပဒေသများအားလုံးက တုန်လှုပ်သွားလေ၏။ ကျင့်ကြံသူအားလုံးကလည်း တုန်ရီသွားကြသည်။ အပင်များ၊ သားရဲများ အစရှိသည့် သက်ရှိအားလုံးက ရုတ်တရက် သဘောပေါက်သွားကြ၏။

နတ်ဘုရားတစ်ပါး ပေါ်ထွက်လာလေပြီ။

ဤသည်က ဒုတိယကမ္ဘာ၏ နတ်ဘုရား ဖြစ်၏။

ဝမ်ပေါင်လဲ့က မျက်လုံးကို အသာမှိတ်ထားလိုက်သည်။ သူက သူ့ခန္ဓာကိုယ်ထဲ စီးဆင်းနေသည့် လိုအင်ဆန္ဒ၆ပါး စွမ်းအားကို ခံစားပြီး တစ်ခုနှင့်တစ်ခု ဖြည်းဖြည်းချင်း ပေါင်းစည်းလိုက်သည်။

နောက်ဆုံးတွင် သူတို့က အပြီးတိုင်ပေါ င်းစည်းသွားပြီး သူ့ခန္ဓာကိုယ်တစ်ခုလုံးကို လွှမ်းခြုံသွားသည့် အနက်ရောင်မြူခိုးအသွင် ပြောင်းလဲသွားခဲ့သည်။

ထိုအနက်ရောင်မြူခိုးက လိုအင်ဆန္ဒအားလုံး၏ ဇစ်မြစ် ဖြစ်၏။