🦋အလိုဆန္ဒပျောက်ကွယ်ခြင်း

“စိတ်ဝင်စားစရာပဲ။ မင်းတို့က ကိုယ်ခန္ဓာတစ်ခုတည်းကို” အလိုဆန္ဒက သူမကြောင့် ဖိနှိပ်ခံထားရသည့် နတ်ဧကရာဇ်က လွတ်မြောက်လာမည့် အရိပ်အယောင်ပြသလာသည်ကို မြင်သည့်အခါ မျက်မှောင်ကြုတ်လိုက်သည်။

သို့သော်လည်း သူမက များများစားစား ဂရုမစိုက်ပေ။ သူမက နတ်ဧကရာဇ်ကို နှစ်အကြာကြီး ဖိနှိပ်ထားခဲ့လေရာ သူမ၏ ထိန်းချုပ်မှုအပေါ် အပြည့်အဝ ယုံကြည်မှုရှိ၏။ ရံဖန်ရံခါ သူက နိုးထလာလျှင်ပင် ရုတ်ရုတ်သဲသဲဖြစ်ဖို့ ခက်ခဲနေဆဲသာ ဖြစ်သည်။

သို့သော်လည်း အလိုဆန္ဒက သတိကြီးကြီးထားကာ ညာဖက်လက်ကိုမြှောက်ပြီး အဆုံးမဲ့မြူခိုးများဖြင့် လွှမ်းခြုံခံထားရသည့် နတ်ဧကရာဇ်ကို အသာထိလိုက်သည်။

သူမ ထိလိုက်သည့်အခါ နတ်ဧကရာဇ်၏ ခန္ဓာကိုယ်က အပြင်းအထန် တုန်ယင်သွား၏။ လှုပ်နေသည့် သူ့မျက်ခွံများကလည်း ဖြည်းဖြည်းချင်း ငြိမ်ကျသွားကာ နိုးထလာမည့် အရိပ်အယောင်တို့က အတင်းအကြပ် ဖိနှိပ်ခံထားရသည်။

ထိုလှိုင်းတွန့်များ ပျောက်ကွယ်သွားပြီး ထပ်မံ ဖိအားပေးခံလိုက်ရသည့်အခါ နတ်ဧကရာဇ်၏ ခန္ဓာက စွမ်းအား အားလုံးဆုံးရှုံးပြီး နက်နက်ရှိုင်းရှိုင်း အိပ်စက်သွားဟန်ပေါ်သည်။

တစ်ချိန်တည်းဆိုသလို အနက်ရောင်မြူခိုးများက အမူအရာမျိုးစုံရှိသည့် လူသားမျက်နှာများအဖြစ် ပြောင်းလဲသွားလေ၏။ သူတို့က နတ်ဧကရာဇ်၏ ခန္ဓာကိုယ်ထဲ နစ်မြုပ်ကာ အပြင်နှင့်အတွင်း ရွေ့လျားနေလေသည်။ ပြောရမည်ဆိုလျှင် နတ်ဧကရာဇ်၏ ခန္ဓာကိုယ်က အသိုက်တစ်ခုအသွင် ပြောင်းလဲသွားသကဲ့သို့ဖြစ်၏။

တကယ်တော့ ဝမ်ပေါင်လဲ့၏ အမြင်မှကြည့်လျှင် နတ်ဧကရာဇ်က အခွံများသာ ကျန်ရှိတော့ပြီး အလိုဆန္ဒအငွေ့အသက်ဖြင့် အပြည့်အဝ လွှမ်းမိုးခံလိုက်ရသည်။

“အခု မင်းရဲ့ ဝှက်ဖဲတွေအကုန်လုံးက အသုံးမဝင်ဘူး။ မင်းက ငါ့ကို ပြန်လည်မပေးဆပ်ချင်ပေမဲ့ ငါကတော့ ငါ့ရဲ့လက်ဆောင်ကို မင်းဆီကနေ ကိုယ်တိုင်ယူရမယ်” အလိုဆန္ဒက ပြုံးကာ ပြောလိုက်သည်။ ထို့နောက် သူမ၏ မျက်ဝန်းအထက် မဟူရာအလင်းတစ်ချက် ဖြတ်ပြေးသွားကာ ပါးစပ်ကို ဟပြီး ရှူသွင်းလိုက်၏။

ဝမ်ပေါင်လဲ့၏ အမူအရာက ပျက်ယွင်းသွားပြီး အိပ်ပျော်နေသည့် နတ်ဧကရာဇ်ကို ကြည့်လိုက်သည်။ သူက ရုတ်ချည်းဆိုသလို နောက်ဆုတ်လိုက်ပြီး လက်ဟန်များစွာကို ဖွဲ့စည်းလိုက်သည်။ ချက်ချင်းဆိုသလို ထင်းယွိစည်းမျဉ်းဥပဒေသက သူ့ခန္ဓာကိုယ်မှ ထွက်ပေါ်လာကာ သူ့ခန္ဓာကိုယ်ကို ဝေဝါးသွားစေ၏။ သူ့ဝန်းကျင်တွင် ရှိနေသည့်ကမ္ဘာကြီးက ထင်းယွိကမ္ဘာအဖြစ် ပြောင်းလဲသွားခဲ့သည်။ တစ်ချိန်တည်းဆိုသလို ထင်းယွိကမ္ဘာဖြင့် ပေါင်းစည်းထားသည့်သူက အလျင်အမြန် နောက်ဆုတ်ကာ ပျောက်ကွယ်သွားလေ၏။

“မင်းက ငါ့ရှေ့မှာ အလိုဆန္ဒစည်းမျဉ်းကို သုံးနေတာလား” အလိုဆန္ဒက ရယ်မောလိုက်သည်။ သူမက လိုအင်ဆန္ဒ၏ ဇစ်မြစ်ဖြစ်ပြီး စိတ်ခံစားချက်၇မျိုးနှင့် လိုအင်ဆန္ဒ၆ပါးတို့က သူမ၏ တာအို ဖြစ်၏။ ထိုအခိုက်အတန့်၌ ဝမ်ပေါင်လဲ့က သူမ၏ တာအိုကို သူမရှေ့တွင် သုံးသည့်အတွက် သူမအား အတော်လေး ပျော်ရွှင်စေသည်။

သို့သော်လည်း သူမက သူမရှေ့တွင်ရှိနေသည့် ဝမ်ပေါင်လဲ့သည် စိတ်ခံစားချက်၇မျိုးနှင့် လိုအင်ဆန္ဒ၆ပါးအပြင် တခြားဘာမှမသိကြောင်း သိထားလေ၏။ ပြောရလျှင် ထိုအရာက ကိုယ်ပွားမျှသာ ဖြစ်၏။

“အလိုဆန္ဒစည်းမျဉ်းဥပဒေသရဲ့ အစစ်အမှန်က ဘယ်လိုလဲဆိုတာ မင်းကို မြင်တွေ့ခွင့်ပြုရတာပေါ့” သူမက ပြုံးကာ ညာဖက်လက်ကို မြှောက်လိုက်သည်။ သူမက သူမရှေ့ကို အသာထိတွေ့လိုက်သည့်အချိန် အာကာပြင်တစ်ခုလုံးက ရေအဖြစ် ပြောင်းလဲသွားလေ၏။ ထို့နောက် ကျောက်တုံးက ရေထဲပြုတ်ကျသွားသလိုမျိုး လှိုင်းတွန့်များ ထွက်ပေါ်လာသည်။

လှိုင်းတွန့်များအလယ်တွင် ဝမ်ပေါင်လဲ့၏ ထင်းယွိစည်းမျဉ်းဥပဒေသ ဖွဲ့စည်းထားသည့် ထင်းယွိကမ္ဘာက အတင်းအကြပ် ဖယ်ရှားခံလိုက်ရသည်။ ပြောရလျှင် ထိုအရာက အခွံချွတ်ခံလိုက်ရသလို ဖြစ်ကာ ဝမ်ပေါင်လဲ့၏ ပုံရိပ်က ထွက်ပေါ်လာစေ၏။

“ထင်းယွိစည်းမျဉ်းဥပဒေသ” အလိုဆန္ဒက တည်ငြိမ်စွာ ပြောလိုက်သည်။

ထိုအရာက စကားတစ်ခွန်းမျှ ဖြစ်သော်လည်း သူ့စည်းမျဉ်းက သူမဆီမှ ထွက်ပေါ်လာသည့်အခါ အသံများစွာ ကိန်းအောင်းနေသကဲ့သို့ ဖြစ်၏။ ဤသည်က စကြဝဠာတစ်ခုလုံး၏ အသံက ထိုစကားတစ်ခွန်းတွင် ပါဝင်နေသကဲ့သို့ ဖြစ်သည်။

ဝမ်ပေါင်လဲ့၏ အမူအရာက ပျက်ယွင်းသွားလေ၏။ သူက လက်ကိုဝှေ့ကာ သူ့ခန္ဓာကိုယ်ထဲမှ တပ်ဆင်ထားသည့် ဂီတသင်္ကေတများကို ထုတ်ဖော်လိုက်သည်။ သူတို့က သူ့ရှေ့တွင် တားဆီးသည့် အသံလှိုင်းတစ်ခုအသွင် ပြောင်းလဲသွားသော်လည်း ဥပဒေသနှစ်ခုကြားမှ ကွာဟချက်က အရမ်းကြီးမားလွန်းနေသည်။ ထင်းယွိစည်းမျဉ်းဥပဒေသနှစ်ခု ထိပ်တိုက် တွေ့ဆုံသွားသည့်အခါ ဝမ်ပေါင်လဲ့၏ ထပ်ဆင့်ဂီတသင်္ကေတများက ပထမဦးဆုံးအကြိမ်အဖြစ် ပြိုလဲသွားလေ၏။

သူတို့က ပြိုလဲသွားသည့်အခါ ဝမ်ပေါင်လဲ့၏ မျက်နှာက ဖြူဖျော့သွားလေသည်။ သူက နောက်ဆုတ်တော့မည့်ဆဲဆဲတွင် အလိုဆန္ဒ၏ မျက်ဝန်းအထက် အလင်းရောင်တစ်ချက် ဖြတ်ပြေးသွားသည်။

“ဖယ်ရှားစေ” ဤနည်းဖြင့် ဝမ်ပေါင်လဲ့၏ ခန္ဓာကိုယ်တစ်ခုလုံးက တုန်ယင်သွားသည်။ သူ့ခန္ဓာကိုယ်ထဲရှိ စည်းမျဉ်းဥပဒေသက အထိန်းအချုပ် ကင်းမဲ့သွားခဲ့၏။ သူတို့က ခန္ဓာကိုယ်ထဲ ပေါက်ကွဲထွက်ကာ သူ့ခန္ဓာကိုယ်ကို ထိုးဖောက်ပြီး အလိုဆန္ဒသခင်ဆီ ရောက်ရှိသွားလေသည်။ အလိုဆန္ဒသခင်၏ ခန္ဓာကိုယ်နှင့် ပေါင်းစည်းပြီးသည့်နောက်တွင် အလိုဆန္ဒသခင်က ဝမ်ပေါင်လဲ့အား ခပ်ယဲ့ယဲ့ပြုံးကာ ကြည့်လိုက်၏။

“ကျန့်ယွိစည်းမျဉ်းဥပဒေ”

ကျန့်ယွိစည်းမျဉ်းဥပဒေသက သူ့ကို ထိန်းချုပ်သွားသည်နှင့် ဝမ်ပေါင်လဲ့၏ မျက်ဝန်းက သွေးဆာလာသည်။ သူ့မြင်ကွင်းရှေ့ ပုံရိပ်များစွာ ထွက်ပေါ်လာလေ၏။ သူတို့က သူမြင်နိုင်လောက်အောင် သိပ်သည်းလွန်းလှသည်။ ပုံရိပ်ယောင်တစ်ခုချင်းစီက သူ့ကို လွှမ်းခြုံပစ်လိုသည့် ကမ္ဘာကြီးတစ်ခုနှင့် ဖြစ်နေ၏။

သူ့မျက်ဝန်းထဲရှိ သွေးကြောများက ကြီးမားကာ ပိုမိုသွေးဆာလာလေသည်။ သို့သော် ဝမ်ပေါင်လဲ့က စကားတစ်ခွန်းမှမပြောပေ။

သူက ဆက်လက်နောက်ဆုတ်နေရင်း လက်နှစ်ဖက်လုံးဖြင့် လက်ဟန်စည်းတံဆိပ်များကို ပြုလုပ်နေသည်။ ရုတ်ချည်းဆိုသလို သူက လက်ကိုမြှောက်ကာ ကျန့်ယွိစည်းမျဉ်းဥပဒေသကို ထုတ်ဖော်လိုက်၏။

သို့သော်လည်း ကျန့်ယွိစည်းမျဉ်းဥပဒေသ ထုတ်ဖော်လိုက်သည့်အခိုက်အတန့် အလိုဆန္ဒသခင်၏ အသံက ထပ်မံပဲ့တင်ထွက်လာသည်။

“ဖယ်ရှားစေ”

ခဏအကြာတွင် ဝမ်ပေါင်လဲ့၏ မျက်နှာအထက် နာကျင်စေသည့် အမူအရာတို့ထွက်ပေါ်လာကာ နှုတ်ခမ်းထောင့်မှ သွေးများစီးကျလာသည်။

ကျန့်ယွိစည်းမျဉ်းဥပဒေသက သူ့ခန္ဓာကိုယ်ကို ချိုးဖောက်ကာ အလိုဆန္ဒသခင်နှင့် ပေါင်းစည်းသွားလေ၏။

“ငါက တိုက်ခိုက်ရာမှာ မတော်ဘူးတဲ့လား။ ဘာဖြစ်လဲ။ ငါ မင်းကို ပေးထားတဲ့ စွမ်းအားတွေကို ပြန်ယူလို့ ရတယ်လေ”

အလိုဆန္ဒသခင်က ပြုံးကာ ဝမ်ပေါင်လဲ့ဆီ လက်ညှိုးထိုးလိုက်သည်။

“အာသီသစည်းမျဉ်ဥပဒေသ ဖယ်ရှားစေ”

“ရနံ့စည်းမျဉ်ဥပဒေသ ဖယ်ရှားစေ”

“အထိအတွေ့စည်းမျဉ်ဥပဒေသ ဖယ်ရှားစေ”

“အလိုဆန္ဒ ဖယ်ရှားစေ”

ထိုစကားလေးခွန်းက မရပ်တန့်နိုင်ဖွယ် ကျိန်စာများနှင့်တူ၏။ သူတို့က အလိုဆန္ဒသခင်၏ ပါးစပ်မှ ထွက်ပေါ်လာသည်နှင့် ဝမ်ပေါင်လဲ့၏ ခန္ဓာကိုယ်က အပြင်းအထန် တုန်ယင်သွားလေသည်။ သူ့အာသီသစည်းမျဉ်းဥပဒေသကလည်း ခန္ဓာကိုယ်မှ ချက်ချင်း ဖယ်ရှားခံလိုက်ရသည်။

ထိုအရာ ဖယ်ရှားခံလိုက်ရသည်နှင့် ဝမ်ပေါင်လဲ့၏ ခန္ဓာကိုယ်မှ အာသီသစည်းမျဉ်းဥပဒေသ အပိုင်းအစတို့က ထွက်ပေါ်လာကာ သူတို့က သခင်နှင့် ပြန်လည်တွေ့ဆုံသွားသကဲ့သို့ အလိုဆန္ဒသခင်ဆီ ပြေးဝင်သွားကြသည်။

နောက်တစ်ခုကမူ ရနံ့လိုအင်ဆန္ဒ ဖြစ်၏။ ထိုအရာက သူ့ခန္ဓာကိုယ်မှ ကြေမွကာ အပြင်ဘက်မှ ဖွဲ့တည်လာသည်။ အာသီသစည်းမျဉ်းဥပဒေသ ဖယ်ရှားခံရသည့် နာကျင်မှုက နဖူးမှ ချွေးများပင် ထွက်လာစေ၏။ ထိုအခိုက်အတန့်၌ သူက ဖိနှိပ်ဖို့ အကောင်းဆုံး ကြိုးစားနေရသည်။

အရသာလိုအင်ဆန္ဒက ထွက်သွားသည့်အခါ သူ့ခုခံမှုတို့က အဆုံးသတ်သို့ ကျရောက်သွားဟန်ပေါ်သည်။ အထိအတွေ့လိုအင်ဆန္ဒမှ ယူဆောင်လာသည့်နာကျင်မှုတို့က တိုက်ရိုက်အကျဆုံးဖြစ်သော်လည်း ဝမ်ပေါင်လဲ့က အလိုဆန္ဒစည်းမျဉ်းဥပဒေသ ဖယ်ရှားခံလိုက်ရသည့် ဆုံးရှုံးမှုနှင့် မယှဉ်နိုင်သေးပေ။ ဤသည်က သူ့ဘဝကို ထောက်ပံ့ပေးထားသည့် စွမ်းအားအရင်းအမြစ်က ထုတ်ယူခံလိုက်ရသလိုမျိုး ဖြစ်၏။ ဝမ်ပေါင်လဲ့က သွေးအန်ပြီး သူ့ခန္ဓာကိုယ်က အတော်လေး အားနည်းသွားသည်။

တစ်ခါက လိုအင်ဆန္ဒ၆ပါး၏ အထွတ်အထိပ်သို့ ရောက်ရှိခဲ့ဖူးသည့် သူ့ကျင့်ကြံဆင့်က ဖိနှိပ်ခံလိုက်ရသည်။ တစ်ခုတည်းသော ကျန်ရှိသည့်အရာက နတ်ဧကရာဇ်၏ သွေးစက်သာ ဖြစ်၏။

“ဘာမှမကျန်တော့ဘူး” သူမက ပြောလိုက်သည်။

“အဲဒါက ပိုကောင်းမသွားဘူးလား။ နင်က ပိုပြီးတော့ သန့်စင်သွားတယ်လေ။ ငါက မင်းကို ကျန့်ယွိမြို့တော်ဆီ ဘာလို့ လာစေချင်နေခဲ့လဲဆိုတာ သိလား။ မင်းက နတ်ဧကရာဇ်ရဲ့ သွေးစက်ကို စုပ်ယူနိုင်အောင်လို့ပဲ။ အဲဒါမှပဲ ဒါကို ကြားခံအနေနဲ့ သုံးပြီးတော့ မင်းကို ချောချောမွေ့မွေ့ဝါးမျိုနိုင်မှာ”

သူမက ပြုံးချင်သော်လည်း သူမက မျက်ဝန်းထဲရှိ အမှောင်ထုက အဆုံးမဲ့လောဘတို့ ထုတ်လွှတ်လာသည်။ သူမက ပြောရင်းဖြင့် ရှေ့တစ်လှမ်းတိုးကာ အနက်ရောင်မြူခိုးအသွင် ပြောင်းလဲလိုက်၏။ ပထမဦးဆုံးအကြိမ်အနေဖြင့် သူမက လှေကားမှ ဆင်းလာလေသည်။

အနက်ရောင်တိမ်တိုက်များသဖွယ် သူမက ဝမ်ပေါင်လဲ့ဆီ ဦးတည်လာလေ၏။

ချက်ချင်းဆိုသလို သူမက ရောက်ရှိလာခဲ့သည်။ သူမက သူ့ကို လွှမ်းခြုံလိုဟန်ပေါ်၏။

ထိုအခိုက်အတန့်လေး၌ ဝမ်ပေါင်လဲ့၏ မျက်ဝန်းအထက် အေးစက်စက်အကြည့်တစ်ချက် ဖြတ်ပြေးသွားလေသည်။

ဤသည်က သူ့စောင့်ဆိုင်းနေရသည့် အခိုက်အတန့် ဖြစ်၏။