ဝက်တောင်ဒီလောက်ကြိုးစားနေရင် မင်းဘာအားကိုးနဲ့ပျင်းနေမလဲ? ၃

စံအိမ်ဝန်ထမ်းဟောင်းများမှာ စံအိမ်ကိစ္စများနှင့်အသားကျနေ၍ ပုံမှန်လည်ပတ်မှုကိုသက်ရောက်လိမ့်မည်မဟုတ်။

ရန်သုံ့ကိုမွေးမြူရေးခြံပြောင်းမလား ဒါမှမဟုတ် ဘဲခြံကိုမွေးမြူရေးခြံနဲ့ပေါင်းမလား။ ဘဲခြံရေလှောင်တမံတစ်ဖက်ကိုလည်း မွေးမြူရေးခြံအဖျားနှင့်ဆက်ထားသည်။

ရန်သုံ့လည်း မွေးမြူရေးခြံတွင် ဝက်ခြံအပါအဝင် တချို့မွေးမြူရေးတိရစ္ဆာန်များနှင့်ငှက်စာကျွေးခြင်းကိုပါတာဝန်ယူထားရသည်။

ဝက်ခြံထဲတွင်ဝက်မမှာရသေးခြင်းသာ။ အခုအဆီချဝက်ရောက်လာပြီဖြစ်၍ နောက်ထပ်ဝက်မှာစရာမလိုတော့။

ကားရပ်ပြီးမကြာမီ ရန်သုံ့ကမွေးမြူရေးခြံဝန်ထမ်းတချို့နှင့်အတူ ကိရိယာများယူပြီးရောက်လာသည်။

''သူဌေး!'' ရန်သုံ့ကအရင်ဆုံး ချင်လင်ကိုနှုတ်ဆက်ပြီးမှ ဝန်ထမ်းများကိုခေါ်လိုက်သည်_

''အရင်ဆုံးဝက်ခြံကိုသန့်ရှင်းရေးလုပ်လိုက်... ပြီးရင် ဝက်တွေကိုလှည်းနဲ့ရွှေ့... ခြံစည်းရိုးလုံမလုံစစ်လိုက်ဦးနော်''

မွေးမြူရေးခြံထဲမှဝက်ခြံမှာ သာမန်မွေးမြူရေးခြံမှဝက်ခြံနှင့်မတူ။ ဝက်ခြံရှေ့တွင် ဝက်များရွှေ့ရန်အဓိကသုံးသောနေရာကျယ်ကျယ်ရှိသည်။

ဝက်ခြံကိုနည်းနည်းသန့်ရှင်းရေးလုပ်ပြီးနောက် ရန်သုံ့ကဝန်ထမ်းများအား ထရပ်ကားပေါ်မှဝက်များကိုရွှေ့ခိုင်းသည်။

ဝန်ထမ်းတချို့ကကားပေါ်တက်ပြီး အဆီချဝက်များကိုတစ်ကောင်ချင်းကားပေါ်မှချလိုက်သည်။ သို့ရာတွင် အဆီချဝက်အကောင်ကြီးသုံးကောင်ကိုရွှေ့သောအခါ ကြွက်သားများထွက်နေသောကိုယ်လုံးကိုမြင်ပြီး အားလုံးလန့်သွားသည်။

''ဒီဝက်ကဘယ်လိုဖြစ်တာလဲ? ကြွက်သားတွေနဲ့ပါလား?''

''ဒီလိုအသားနဲ့ဝက်ရှိတာလား?''

''ဒီဝက်သုံးကောင်ကလေ့ကျင့်ခန်းလုပ်ထားတာလား?''

“……”

ရန်သုံ့ကပွစိပွစိအသံများကြားပြီး ကားပေါ်တက်၍စူးစမ်းလိုက်သည်။

သူလည်းအဆီချဝက်အကောင်ကြီးသုံးကောင်ကိုမြင်ပြီး အံ့ဩသွားသည်_

''သောက်*... ဒီဝက်သုံးကောင်ရဲ့အကြောတွေက နည်းနည်းသန်တယ်... သူဌေး ဒါအမေရိကန်ဒူးရော့ဝက်တွေလား?''



''ခင်ဗျားသိတယ်လား?''

ချင်လင်ကပြုံးပြီးမေးလိုက်သည်။

ရန်သုံ့ကရှင်းပြသည်_ ''သူဌေး... ကျွန်တော့်ကိုဒီကိစ္စတွေဂရုစိုက်ခိုင်းမှတော့ ကျွန်တော်လည်းရှာပြီးလေ့လာထားတာပေါ့... ဒီကယေဘူယျဝက်မျိုးစိတ်တွေရဲ့တချို့အချက်အလက်တွေဖတ်ထားတယ်''

''သူဌေးယူလာတဲ့ဒူးရော့ဝက်တွေက နည်းနည်းအကောင်သေးတာတစ်ခုပဲ... ဒူးရော့ဝက်ငယ်မျိုးကိုအိမ်မွေးတိရစ္ဆာန်လုပ်ဖူးတယ်ထင်တယ်? ဒါပေမဲ့ ဝက်မျိုးစပ်တာမအောင်မြင်ခဲ့ဘူးလားလို့?''

''မဟုတ်သေးဘူး... ဒီဝက်တွေရဲ့ကြွက်သားက သံတုံးနဲ့တူတယ်... အရမ်းသဘောကျစရာကောင်းတယ်... လေ့ကျင့်တဲ့ရလဒ်ကဒီလိုထွက်လာရင် အောင်မြင်တယ်လို့ပြောရမှာမလား?''

ချင်လင်ကထိုအမေးကိုမဖြေ၊ ရန်သုံ့ဘာသာအဖြေရှာလိမ့်မည်။

သူ့ကိုဒူးရော့ဝက်ဟုထင်အောင်သာလုပ်ရမည်။

တကယ်လည်း ဒီဝက်ကဒူးရော့ဝက်မျိုးပါသည်။

ရန်သုံ့ကသူ့လူများကို အဆီချဝက်အကောင်ကြီးသုံးကောင်အားထရပ်ကားပေါ်မှရွှေ့စေလိုက်သည်။ ထို့နောက် လှောင်အိမ်ဖွင့်၍ဝက်များကိုလွှတ်လိုက်သည်။

ထိုအဆီချဝက်သုံးကောင်မှာ လွတ်သည်နှင့်ဂဏှာမငြိမ်တော့။ လှောင်အိမ်ထဲအကြာကြီးနေပြီး အားအင်များပြည့်ဝနေသည်။ ထို့ကြောင့် ဝက်ကြီးသုံးကောင်ကလွတ်လွတ်ချင်း ပတ်ပတ်လည်လျှောက်ပြေးတော့သည်။

ဝက်ပေါက်များက ဝက်ကြီးသုံးကောင်နောက်ပြေးလိုက်နေသဖြင့် အပြေးအဖွဲ့လေးဖြစ်နေသည်။

အထူးသဖြင့် ဝက်များအဖွဲ့ဖြစ်ပြီး အစီအစဉ်ကျကျပြေးနေသည်။

ရန်သုံ့နှင့်ဝန်ထမ်းများမှာ ထိုအဆီချဝက်များ၏လှုပ်ရှားပုံကိုကြည့်ရင်းကြောင်နေသည်။

ဒီဝက်တွေက ထွက်ပြေးဖို့ကြိုးစားနေတာလား?

မဟုတ်သေးဘူး။ ထွက်ပြေးချင်ရင် ခြံစည်းရိုးကိုဝင်တိုက်မှာပေါ့။ ဘာလို့ပတ်ပတ်လည်ပြေးနေတာလဲ? ပြေးနေရင်းတောင် တအစ်အစ်နှင့်ပြိုင်တူအော်နေသေးသည်။

ထိုမြင်ကွင်းက မသိသူများအဖို့နည်းနည်းထူးဆန်းနေသည်။





ချင်လင်တစ်ယောက်သာ ဘာဖြစ်နေမှန်းသိသည်။ ဘာပဲဖြစ်ဖြစ် ဒီအဆီချဝက်တွေရဲ့မှတ်ချက်က နေ့တိုင်းပြေးလိမ့်မည်တဲ့။

ရန်သုံ့နှင့်မွေးမြူရေးခြံဝန်ထမ်းများက ဘာမှမသိ။ ဝက်တွေကပတ်ပတ်လည်ပြေးနေသောကြောင့် အတော်စိတ်ဝင်စားနေကြသည်။

ရုတ်တရက် အဆီချဝက်ကြီးသုံးကောင်ကဦးဆောင်ပြီး ရန်သုံ့နှင့်မွေးမြူရေးခြံဝန်ထမ်းများကိုပတ်ပြေးကာ အချင်းချင်းတောင်ကျော်တက်နေကြသည်။

သူတို့လုပ်ပုံကြောင့် ရန်သုံ့နှင့်မွေးမြူရေးခြံဝန်ထမ်းများပိုပြီးဇဝေဇဝါဖြစ်ကုန်ကြသည်။

ချင်လင်လည်း ထိုအဆီချဝက်များ၏မှတ်ချက်များကြားယောင်ပြီးအံ့ဩသွားသည်။ ဒီအဆီချဝက်တွေက မယုံနိုင်စရာလေ့ကျင့်ခန်းတွေလုပ်တတ်တယ်တဲ့။

သူမြင်နေရတာ ဝက်တွေအတွက်ဆို မယုံနိုင်စရာလေ့ကျင့်ခန်းဖြစ်လောက်တယ်မလား?

ဒါရန်သုံ့တို့ကို အတားအဆီးတွေလိုသဘောထားတာပဲ။

ထို့အပြင် ရန်သုံ့တို့ကိုပတ်ပြီးနောက် ဝက်ကြီးသုံးကောင်က ဝန်ထမ်းများမြေပေါ်ချထားသောထွန်ခြစ်များဆီပြေးသွားသည်။ သူတို့က အတားအဆီးများခုန်ကျော်သလို ထွန်ခြစ်များကိုခုန်ကျော်ကြ၏။

တစ်ဖက်တွင် အဆီချဝက်ပေါက်များကမခုန်နိုင်။ ခုန်လျှင်ခေါင်းနှင့်ဆောင့်မည်ဖြစ်သောကြောင့် ပတ်သာပြေးနေကြသည်။

''ဒီကောင်တွေဘာလုပ်နေတာလဲ? ကြံ့ခိုင်ရေးလား?''

နောက်ဆုံး ရန်သုံ့ကမနေနိုင်ဘဲမေးလိုက်သည်။

မွေးမြူရေးခြံဝန်ထမ်းများလည်း အချင်းချင်းကြည့်လိုက်ကြသည်။

ဝက်များ၏လှုပ်ရှားပုံကိုကြည့်ရင်း အာစေးမိကုန်သည်။

ဒီကောင်တွေ လေ့ကျင့်ခန်းလုပ်နေတာမလား?

သူဌေးဘယ်ကတွေ့လာပါလိမ့်? ဒီဝက်တွေက အကြောင်းအရင်းမရှိလုပ်နေတာတော့မဟုတ်ဘူးမလား?

ရန်သုံ့မှာအတော်သိချင်လာ၍ ချက်ချင်းသူဌေးကိုမေးလိုက်ချင်သည်။

ထိုအချိန်တွင် ချင်လင်ကရန်သုံ့ကိုထမေးလိုက်သည်_

''ခင်ဗျားအချက်အလက်တွေဖတ်ထားတယ်မလား? ဒီဝက်တွေကဘာဖြစ်တာလဲ? ဘာလို့ဒီလိုဖြစ်နေတာလဲ?''

ဝက်များထူးဆန်းနေပုံကိုကြည့်ရင်း မေးခွန်းထုတ်မခံချင်သောကြောင့် သူကအရင်မေးလိုက်ရသည်။

လုံးဝဘာဖြစ်နေမှန်းမသိသလိုပုံဖမ်းပြီး ဇဝေဇဝါလုပ်နေလိုက်၏။

''ကျစ်.. ကျစ်''

ထိုမေးခွန်းကြောင့် ရန်သုံ့ကြောင်သွားသည်။

ဒါသူဌေးကိုမေးချင်နေတာလေ။

ဘယ်လိုလုပ်ပြီး သူဌေးကပြန်မေးနေတာလဲ?