အခန်း (၅၃၃)

လီခိုင်ကမငြင်းဘဲ ချင်လင်ကိုမျိုးစေ့တချို့ပေးလိုက်သည်။

အထူးမြေကြီးကိုအားထားနေရတယ်ဆိုမှတော့ စိုက်ချင်သလိုသာစိုက်။

သို့ရာတွင် ချင်လင်ကထိုမျိုးစေ့များကိုယူပြီး ဂိမ်းထဲမှထုတ်လာသောမျိုးစေ့နှင့်ရောလိုက်သည်ကို သူမသိလိုက်။

ထို့နောက် ချင်လင်ကမျိုးစေ့များကို လီခိုင်ရှေ့တွင် တမင်သက်သက်ကျပန်းစိုက်ပစ်လိုက်သည်။

ဒီလိုမှ လီခိုင်ရဲ့မျိုးစေ့နဲ့ သူ့မျိုးစေ့ရောပြီး ဘယ်မျိုးစေ့ကိုဘယ်သူစိုက်တာဟူ၍ မပြောနိုင်တော့။

လီခိုင်မှာ သံသယစိုးစဉ်းမျှမရှိ။

ဘာပဲဖြစ်ဖြစ် ညီလေးချင်ကအပျော်လျှောက်လုပ်နေတာ။ သူရမ်းသမ်းစိုက်ချင်လည်း စိုက်စေတော့။ အထူးမြေကြီးနဲ့ဆိုရင် ထိခိုက်မှာမဟုတ်ဘူး။

ချင်လင်ကထပြီးလုပ်ကိုင်ပေးနေသောကြောင့် အကြီးအကဲရန်လည်း ရှန်လီကိုမေးလိုက်သည်_

''ဥက္ကဌရှန်... ပါမောက္ခလီခိုင်ရဲ့စမ်းသပ်မှုမှာ သူဌေးချင်လည်းကူပေးတာလား?''

ရှန်လီကရှင်းပြသည်_

''ကျွန်တော်တို့သူဌေးက ခရီးသွားမေဂျာနဲ့ဘွဲ့ရထားတာ... ဒါမျိုးမလုပ်နိုင်လောက်ပါဘူး... ဒါပေမဲ့ သူဌေးနဲ့ပါမောက္ခလီခိုင်က တတွဲတွဲဆိုတော့ သူ့ဆီကသင်ထားတာဖြစ်မယ်... ဘာပဲဖြစ်ဖြစ် ပါမောက္ခလီခိုင်ရဲ့အရည်အချင်းနဲ့ဆိုရင် သူ့သုတေသနကိုထိခိုက်မှုရှိမှာမဟုတ်ပါဘူး''

အကြီးအကဲရန်ကထောက်ခံလိုက်၏_

''အမှန်ပဲ... ပါမောက္ခလီခိုင်က အရမ်းတော်လို့ဖြစ်မယ်... သူဌေးချင်နဲ့ပါမောက္ခလီခိုင်ရင်းနှီးပုံကိုကြည့်ရင် ခရီးသွားမေဂျာဖြစ်တဲ့သူဌေးချင်က ဘာလို့ဓာတ်ခွဲခန်းထောင်လဲဆိုတာ နားလည်လို့ရတယ်... ပါမောက္ခလီခိုင်က တရုတ်သိပ္ပံအကယ်ဒမီကိုပါမောက္ခရန်ကဖိတ်တာလက်မခံဘဲ ချင်းလင်ဓာတ်ခွဲခန်းမှာနေချင်တာ''

အချိန်ယူအားထုတ်ပြီးနောက် လီခိုင်ကမျိုးစေ့အားလုံးကို စမ်းသပ်စိုက်ခင်းထဲစိုက်ပြီးသွားသည်။

သူပြီးမှ သူရောချင်လင်ပါ သက်ပြင်းချလိုက်ကြ၏။

''ညီလေးချင်... ပထမအသုတ်တော့စိုက်ပြီးပြီ''

လီခိုင်မျက်နှာမှာ သူနှင့်ချင်လင်သာနားလည်နိုင်သောအကြည့်နှင့်ပြုံးရွှင်နေသည်။

အားလုံးက ဒီအထူးမြေကြီးအပေါ်မူတည််သည်။

ဒီအချိန်မှာ အကြီးအကဲရန်ရှေ့တွင် မျိုးစေ့များကိုအပင်အားဖြည့်ဆေးလောင်းရန်သာလိုတော့သည်။

''အင်း... ကျွန်တော်ကပြီးပြီ... အခု အစ်ကိုလီလုပ်စရာရှိတာလုပ်လေ''

ချင်လင်လည်းပြုံးရွှင်နေသည်။

နာမည်ကျော်ထျန်းမုထုံရှန်းမျိုးစေ့ကို ဘယ်သူမှမသိအောင်ခိုးစိုက်လိုက်ပြီ။ အစ်ကိုလီတော့ နာမည်ခံရတော့မည်။

''ပါမောက္ခလီခိုင်... ပင်ပန်းသွားပြီနော်''

အကြီးအကဲရန်နှင့်ရှန်လီကရှေ့တိုးလာပြီး လီခိုင်၏ချွေးတလုံးလုံးနှင့်ပုံစံကိုကြည့်ကာ စိတ်ထဲတွင်လေးစားနေကြသည်။

တရုတ်သိပ္ပံအကယ်ဒမီက ပျိုးထောင်ကျွမ်းကျင်ပညာရှင်တွေတောင် သူတို့ကိုယ်တိုင်မလုပ်။ အပင်စိုက်သူသီးသန့်ရှိသည်။

နေ့လယ်ပိုင်း_

အကြီးအကဲရန်မှာ ချင်းလင်စံအိမ်ကစီစဉ်ပေးသောသတို့သမီးခန်းထဲသွားပြီး ပထမနေ့လီခိုင်၏အခြေအနေကို တရုတ်သိပ္ပံအကယ်ဒမီသို့တင်ပြလိုက်သည်။

တရုတ်သိပ္ပံအကယ်ဒမီ_

စမ်းသပ်မှုပထမနေ့မှာ ပါမောက္ခသုံးယောက်အလုပ်စသောပထမဆုံးနေ့ဖြစ်သည်။ ဝန်ကြီးလုနှင့်ပါမောက္ခရန်က နားစွင့်နေကြ၏။

တင်ပြသူက အကြီးအကဲရန်တစ်ယောက်တည်းမဟုတ်။ ပါမောက္ခဟွမ်နှင့်ပါမောက္ခကျင်းဆီမှသုတေသီများကလည်းတင်ပြကြသည်။

''ပါမောက္ခရန်... တစ်ချက်ကြည့်ပါဦး... ပါမောက္ခသုံးယောက်က စမ်းသပ်မှုတွေစလုပ်နေပြီ''

ဝန်ကြီးလုက အချက်အလက်သုံးစောင်ကို ပါမောက္ခရန်ဆီပေးလိုက်သည်။

ပါမောက္ခရန်လည်း ယူကြည့်ပြီး_

''ဒီပါမောက္ခကျင်းမှာ တရုတ်သိပ္ပံအကယ်ဒမီရဲ့ပျိုးထောင်ကျွမ်းကျင်တွေနဲ့မတူတဲ့အတွေးမျိုးရှိတာပဲ... သူ့ရဲ့ပထမအဆင့်က ထျန်းမုထုံရှန်းမျိုးစေ့အပေါ်မှာ အစိုဓာတ်ထိန်းသိမ်းမှုနဲ့အပူချိန်ရေရှည်သက်ရောက်မှုရှိတယ်လို့ယူဆလို့ရတယ်... ကျုပ်အရင်ကဒါမျိုးမစမ်းသပ်ဖူးဘူး... ဒီတော့ နောက်ဆုံးရလဒ်ဘယ်လိုဖြစ်မလဲမသိသေးဘူး''

''ပါမောက္ခဟွမ်ရဲ့စိတ်ကူးကလည်း ထူးခြားတယ်... တရုတ်သိပ္ပံအကယ်ဒမီကပျိုးထောင်ကျွမ်းကျင်တွေလုပ်ဖူးတာမျိုးမဟုတ်ဘူး... မြေကြီးကိုလေဝင်လေထွက်နဲ့အာဟာရထိန်းချုပ်ဖို့လုပ်ထားတယ်... ပြီးရင် မျိုးစေ့ကြီးထွားပုံကိုမှတ်တမ်းတင်တယ်''

ဝန်ကြီးလုက ဒီအကြောင်းသိပ်မသိသောကြောင့် မေးလိုက်သည်_

''ပါမောက္ခရန်... ဒီပါမောက္ခနှစ်ယောက်ရဲ့စိတ်ကူးက အကျိုးရှိလား?''

''မသေချာဘူး... ဒါမြေကြီးအခြေအနေကို အခြေခံအကျဆုံးထိန်းသိမ်းမှုပဲ... တကယ့်စမ်းသပ်ချက်က နောက်ပိုင်းထိန်းသိမ်းမှုနဲ့မျိုးစေ့ဖောက်တာ''

ပါမောက္ခရန်ခေါင်းခါလိုက်သည်။ သူကမဆုံးဖြတ်နိုင်သေးသဖြင့်_

''ပါမောက္ခလီရဲ့အတွေးကိုအရင်ကြည့်ရအောင်... ပါမောက္ခလီကတော့ တကယ်ပဲ... ရှောင်လီ... ကောင်းတယ်''

စကားတစ်ဝက်တပျက်နှင့်တန့်သွားပြီး သူ့မျက်နှာတွင်အံ့ဩမှုကအတိုင်းသား_

''ရှောင်လီရဲ့အတွေးက မြေကြီးရဲ့အစိုဓာတ်နဲ့လေဝင်လေထွက်ကိုထိန်းချုပ်ဖို့ပဲ... ပြီးတော့ အစိုဓာတ်နဲ့လေဝင်လေထွက်ကိုအဆင့်ဆင့်ကွဲပြားသွားအောင် တခြားမြေကြီးရောတယ်... ဒီလိုနဲ့ ထူးခြားမှုကိုမှတ်တမ်းတင်နိုင်မယ်''

ဝန်ကြီးလုက နားထောင်ရင်းအံ့ဩသွားသည်_

''ပါမောက္ခဟွမ်နဲ့ပါမောက္ခကျင်းက ဒီအတွေးနဲ့... တစ်ချိန်တည်းမှာ ပါမောက္ခလီခိုင်ကဒီအတွေးနဲ့လား? ပါမောက္ခလီခိုင်ကတော့ နာမည်နဲ့လိုက်ပါပေတယ်... အံ့ဩစရာပဲ''

''အကျိုးရှိတာမရှိတာထက်...''

ပါမောက္ခရန်ကထောက်ခံလိုက်သည်_

''ပါမောက္ခဟွမ်နဲ့ပါမောက္ခကျင်းသိရင် မအံ့ဩဘဲမနေနိုင်မှာစိုးမိတယ်!''