နောက်ဆက်တွဲ
Vol. 93 Ch. 1292
“နောက်ထပ် ဘာရစရာရှိသေးလဲ” ဝမ်ဝေ့က မေးလိုက်သည်။
“အခုတော့ ဘာမှမရှိတော့ပါဘူး” အနီရောင်မျက်နှာဖုံးက ပြန်ဖြေလိုက်၏။
“ကောင်းပြီ” ဝမ်ဝေ့က ခေါင်းညိတ်ပြီးသည့်နောက်တွင် မုန့်ခယ်အား ကြည့်လိုက်သည်။
“ကျွမ်းကျင်အတတ်ပညာခန်းမရဲ့ လက်ရှိအခြေအနေကရော ဘယ်လိုလဲ”
“ထင်ထားသလို အရင်းအမြစ်အများကြီး မရှိဘူး” မုန့်ခယ်က ပြန်ဖြေလိုက်သည်။
“ကြည့်ရတာ သွေးနဂါးက အဲဒီလူတွေကို တင်းတင်းကြပ်ကြပ် ထိန်းချုပ်ထားတဲ့ပုံပဲ။ ဒါပေမဲ့ သူတို့အတွက် အသုံးပြုနိုင်တဲ့ ကောင်းကင်မီးတောက်တွေကိုတော့ တွေ့ခဲ့တယ်။ ပြီးတော့ သွေးနဂါးက တစ်ခါက စံပြဝိညာဉ်တစ်ခုကို အစီအရင်အဖြစ် ပြောင်းပြီးတော့ သူတို့အတွက် လုံလောက်တဲ့ ဝိညာဉ်စွမ်းအား ထောက်ပံ့ဖို့ပါ လုပ်ထားတယ်”
“အဲဒီလူတွေက ဒီလောက်ဆုံးဖြတ်ထားတာ အံ့ဩစရာမရှိတော့ဘူး” ဝမ်ဝေ့က မှတ်ချက်ပေးလိုက်သည်။ သူက ကျွမ်းကျင်အတတ်ပညာရှင်များ၏ အလုပ်လုပ်ရသည့် အခြေအနေကို ခန့်မှန်းထားပြီးသားဖြစ်၏။ သွေးနဂါးက သူတို့အား အနားယူခြင်းမရှိဘဲ ယွမ်ခေတ်ကာလများစွာတိုင် အလုပ်လုပ်ခိုင်းလိမ့်မည်။ ထို့အပြင် သူတို့ကို အနားယူခိုင်းမည့်အစား သူတို့ကို ဝိညာဉ်စွမ်းအားနှင့် စိတ်ဝိညာဉ်ကို ပြန်လည်အားဖြည့်ဖို့ ဝိညာဉ်အစီအရင်တစ်ခုကိုပါ အသုံးပြုလိမ့်မည်။
“အဲဒီလူတွေက စောစောစီးစီး လဲကျမသွားတာ အံ့ဩဖို့ကောင်းသားပဲ” ဝမ်ဝေ့က မှတ်ချက်ပေးလိုက်သည်။
“အဲဒီအတွက် အကြောင်းအရင်းရှိပါတယ်”
“အိုး”
“တာအိုလမ်းစဉ်ကျောက်ပြားဆိုတာကို ကြားဖူးလား”
ဝမ်ဝေ့က မှတ်မိဖို့ ခေတ္တမျှ အချိန်ယူလိုက်ရသည်။
“အရည်အချင်းတာအိုအဖွဲ့အစည်းရဲ့ ကံကောင်းမှုစုစည်းရေးအသုံးအဆောင်ကို ပြောတာလား။ အဲဒီထဲမှာ ကျွမ်းကျင်အတတ်ပညာအားလုံးကို သုညရာခိုင်နှုန်းကနေ တစ်ရာ ရာခိုင်နှုန်း ရှင်းပြချက်တွေ ပါဝင်နေတယ်ဆိုတဲ့ တစ်ခုလား”
“ဟုတ်တယ်” မုန့်ခယ်က ခေါင်းညိတ်လိုက်သည်။
“အဲဒီကပ်ပါးတွေက သူတို့အတွက် ယူထားပြီးတော့ အချိန်တစ်ခုကြာ မျှဝေဖို့ သဘောတူထားကြတာ။ အဲဒီကျွမ်းကျင်အတတ်ပညာရှင်တွေက အဲဒီအခွင့်အရေးအတွက် တောင့်ခံထားကြတာပဲ”
“အခု ငါတို့အလှည့်လို့ ပြောစမ်းပါ။ အဲဒါက အခု ငါတို့ရဲ့ ပိုင်ဆိုင်မှုထဲမှာ ရှိတယ်မလား” ဝမ်ဝေ့က အလျင်အမြန် မေးလိုက်သည်။
“ကံဆိုးတာက မရှိဘူး” မုန့်ခယ်က သူ့အိပ်မက်ကို ချိုးဖောက်လိုက်သည်။
“သွေးနဂါးက ပုံတူပွားဖို့ အကောင်းဆုံးကြိုးစားအားထုတ်ခဲ့ပေမဲ့ ၈၉ ရာခိုင်နှုန်းအထိပဲ ရောက်ခဲ့တယ်”
“နှမြောစရာပဲ” ဝမ်ဝေ့က သက်ပြင်းချလိုက်သည်။
“ခေါင်းဆောင် တကယ့်အစစ်အမှန်သာ ဒီမှာရှိတယ်ဆိုရင် အဲဒါကို ယူမှာလား” မုန့်ခယ်က မေးလိုက်သည်။
“အရည်အချင်းတာအိုအဖွဲ့အစည်းက သူတို့ဘိုးဘေးပြန်ရောက်လာတာနဲ့ အဲဒါကို ပြန်ယူမယ်ဆိုတာကို သိသင့်တယ်နော်”
“ငါက ဘာလို့မယူဘဲ နေရမှာလဲ။ အရင်ဆုံး ခိုးတာ ငါမဟုတ်ဘူးလေ” ဝမ်ဝေ့က ပြန်ဖြေလိုက်သည်။ ထို့အပြင် ထိုအရာကို ဘယ်နေရာတွင် သိမ်းဆည်းမလဲဟု နောက်ထပ်မေးခွန်းတစ်ခု ရှိနေသည်။ ထိုသို့သော ပစ္စည်းက တာအိုနယ်ရှင် နှစ်ယောက်ကြား တာအိုစစ်ပွဲ အစပြုဖို့ရာပင် လုံလောက်နေသည်။
“အဲ့လိုပြောမယ်မှန်း သိနေတယ်” မုန့်ခယ်က ရယ်မောလိုက်သည်။
“အခု အဲဒီအရာကို ကျွန်မတို့ဆီ ရောက်အောင် လုပ်ရမယ်” တုကွန်းက အလေးအနက် ပြောလိုက်သည်။
“ဒါပေါ့” မုန့်ခယ်က ခေါင်းညိတ်လိုက်၏။
“သွေးနဂါးက အပြည့်အဝ ပုံတူမပွားနိုင်ဘူးဆိုပေမဲ့လည်း လူရိုင်းမျိုးနွယ်နဲ့ တာအိုအခွင့်အလမ်းဂိုဏ်းအတွက်ကတော့ ပြဿနာမရှိဘူး”
ဤသည်က ကျွမ်းကျင်အတတ်ပညာရှင်များကို ပြုစုပျိုးထောင်ဖို့ အသုံးပြုသည့် ထိပ်တန်း အသုံးအဆောင်ပစ္စည်းတစ်ခု ဖြစ်ပေသည်။ ထိပ်တန်းမျိုးနွယ်များစွာက သူတို့၏ ကျွမ်းကျင်အတတ်ပညာရှင်များကို ပြုစုပျိုးထောင်ဖို့ နည်းလမ်းများစွာ ရှိသော်လည်း အရည်အချင်းတာအိုအဖွဲ့အစည်း သို့မဟုတ် မူလစည်းတံဆိပ်ကုန်းမြေလောက် ကောင်းမွန်ခြင်း မရှိပေ။ သို့သော်လည်း နောက်တစ်ခုကမူ သူတို့သည် အခြေခံအကျဆုံးဖြစ်သည့် သင်္ကေတများကို သင်ကြားရာ၌ ကျော်ကြားသလိုမျိုး ကျွမ်းကျင်အတတ်ပညာရှင်များကို လေ့ကျင့်ပေးခြင်းမှာ မကောင်းပေ။ အကယ်၍ လူရိုင်းမျိုးနွယ်နှင့် တာအိုအခွင့်အလမ်းဂိုဏ်းကသာ ထိုပစ္စည်းကို ရယူပြီး ပုံတူပွားနိုင်ခဲ့ပါက သူတို့မျိုးနွယ်၏ အခြေခံအုတ်မြစ်သည် သိသိသာသာ တိုးတက်လာလိမ့်မည်။
ဒါက တစ်သက်မှာတစ်ခါ အခွင့်အရေးမျိုးပဲ…
ဝမ်ဝေ့က တွေးလိုက်သည်။ သာမန်အခြေအနေအောက်၌ အရည်အချင်းတာအိုအဖွဲ့အစည်းက ထိုသို့သော ပစ္စည်းကို သူတို့မြင်ကွင်းအောက်မှ ထွက်သွားခွင့်ပြုမည် မဟုတ်ပေ။ အမှန်အတိုင်းပြောရမည်ဆိုလျှင် ဝမ်ဝေ့က ထိုကပ်ပါးများသည် အဖွဲ့အစည်းအား ထိုပစ္စည်းကို ပေးလာဖို့ ဖိအားပေးနိုင်လိမ့်မည်ဟုပင် မယုံပေ။ သူတို့က ထိုသူများထံ ပေးလိုက်ခြင်းထက် တိုက်ခိုက်ပြီး ပျောက်ကွယ်သွားဖို့ရာသာ လိုလားကြလိမ့်မည်။
သူတို့အနေဖြင့် အောင်မြင်ဖို့ တစ်ခုတည်းသော နည်းလမ်းက နေမင်းနှစ်စင်း ဝင်ရောက်စွက်ဖက်ခဲ့တာမျိုး သို့မဟုတ် ကပ်ပါးတစ်ယောက်ဖြစ်သည့် အချိန်စားသုံးသူက နေမင်းနှစ်စင်း၏ နာမည်ကို အသုံးပြုကာ ထိုပစ္စည်းကို ပေးဖို့ ဖိအားပေးခဲ့ခြင်းမျိုးသာ ဖြစ်လိမ့်မည်။
“အခု ဘယ်သူ့အလှည့်လဲ သိလား” ဝမ်ဝေ့က မေးလိုက်သည်။
“မြေကမ္ဘာဧကရာဇ်ပါ” မုန့်ခယ်က ပြန်ဖြေလိုက်သည်။
ဤသည်က ကျွမ်းကျင်အတတ်ပညာရှင်များ ပြောပြထားခြင်း ဖြစ်၏။
ဒါက ငါ့ရဲ့နောက်ထပ်ပစ်မှတ် မဖြစ်သင့်ဘူးလား…
ဝမ်ဝေ့က တွေးလိုက်သည်။ သို့သော်လည်း မကြာခင် ထိုအတွေးကို လက်လျှော့လိုက်၏။ သူ့နောက်ထပ်ပစ်မှတ်ကို သတင်းအချက်အလက်အမြောက်အများ စုစည်းပြီးမှသာ ရွေးချယ်သင့်ပေသည်။
“အခု မဟာချူးအံ့ဖွယ်တိုင်းပြည်အပေါ်မှာ သေချာအာရုံစိုက်ထားလိုက်” ဝမ်ဝေ့က အနီရောင်မျက်နှာဖုံးအား အမိန့်ပေးလိုက်သည်။
“လက်ရှိအနေအထားက အားလုံးက အဆုံးစွန်ကို ကျရောက်နေတာ။ အဲဒါကြောင့် သိုသိုသိပ်သိပ်နေ”
“ဟုတ်ကဲ့”
“တခြားရှိသေးလား” ဝမ်ဝေ့က မုန့်ခယ်ကို မေးပြီးသည့်နောက်တွင် ထိုသူက ခေါင်းယမ်းပြလိုက်သည်။
ထို့နောက် သူက မုန့်ခယ်၏ ဇနီးဖြစ်သူထံ အာရုံစိုက်ကာ ပြောလိုက်သည်။
“စိတ်ဝိညာဉ်ဆေးဥယျာဉ်ရဲ့ အခြေအနေကရော”
“ကမ္ဘာဦးဟွင်သွမ်းမြေကြီးနဲ့ လုပ်ထားတဲ့ ဥယျာဉ်တစ်ခုလုံးမျိုးကို မမြင်ဖူးဘူး” တုကွန်းက သက်ပြင်းချလိုက်သည်။ သို့သော် သူမစကားများကို ကြားလိုက်ရသော်လည်း ဝမ်ဝေ့က အံ့အားသင့်ခြင်း မရှိပေ။ ထိုကပ်ပါးများက အရင်းအမြစ်မြောက်များစွာကို ရရှိထားပြီး အများစုကို ဖြုန်းတီးထားကြောင်း သိထားလေသည်။ ထို့ကြောင့် သွေးနဂါးက ရှားပါးလှသည့် ကမ္ဘာဦးဟွင်သွမ်း မြေကြီးကို ရယူထားနိုင်သည့်အချက်ကို မအံ့ဩမိပေ။
“ဒါက သတင်းကောင်းပဲ” ဝမ်ဝေ့က ခေါင်းညိတ်လိုက်သည်။ ဧကရာဇ်အဆင့်အထက် ဆေးပင်များက မြေကြီး၊ အာဟာရ၊ ပတ်ဝန်းကျင်နှင့် အချိန်အတွက် ကွဲပြားသည့် လိုအပ်ချက်မျိုး ရှိလေသည်။ ထို့ကြောင့် ထိုဆေးပင်များကို ပြုစုပျိုးထောင်ရခြင်းက အချိန်နှင့် ကျွမ်းကျင်မှုတို့ လိုအပ်ပေသည်။
သို့သော်လည်း ကမ္ဘာဦးဟွင်သွမ်းမြေကြီးက ထိုလိုအပ်ချက် အများစုကို ဖယ်ရှားပေးခဲ့သည်။ ထိုအရာက ပတ်ဝန်းကျင်အခြေအနေကို စိုးရိမ်စရာမလိုဘဲ ဆေးပင် ၉၉ ရာခိုင်နှုန်းကို ကြီးထွားစေနိုင်သည်။ ထို့အပြင် အရင်းအမြစ်ချီနေရာလွတ် သို့မဟုတ် မဟာတာအိုအရင်းအမြစ်မှ အာဟာရများကို ဆွဲယူပြီး ဆေးပင်များကို အာဟာရဖြည့်ပေးနိုင်လေသည်။ ထို့အပြင် ရင့်မှည့်မည့် အချိန်ကိုပါ အချိန်မြှင့်တင်ပေးနိုင်၏။
“ဟုတ်တယ်” တုကွန်းက ပြောလိုက်သည်။
“ပြီးတော့ ဆေးဥယျာဉ်က ကိုယ်ပိုင်စိတ်ဝိညာဉ်ကိုပါ ရှိထားပြီးတော့ ဆေးပင်တွေရဲ့ ရင့်မှည့်မဲ့ အချိန်က ပိုပြီးတော့ ကောင်းမွန်နေတယ်”
“အဲဒါဆိုရင်တော့ ထိပ်တန်းဆေးဥယျာဉ်ပဲ” ဝမ်ဝေ့က ပြောလိုက်သည်။
“အဲဒါက ကိုယ်ပိုင်အချိန်မြှင့်တင်ရေး အစီအရင်ရော ရှိတာလား”
“ရှိတယ်” တုကွန်းက ခေါင်းညိတ်လိုက်သည်။
“ပိုပြီးကောင်းတာက အဲဒီမှာ ကံကြမ္မာကောင်းအစီအရင်နဲ့ အထွတ်အထိပ် သစ်သားအစီအရင်တို့ပါ အကူအနေနဲ့ ရှိနေတာ”
“ဥယျာဉ်ကလည်း သဘာဝအတိုင်း လုပ်ထားတာလား” ခဏမျှကြာမြင့်ပြီးသည့်နောက်တွင် ဝမ်ဝေ့က ထိုသို့သောအရာမျိုးသည် အထွတ်အထိပ်ဟွင်သွမ်း အသုံးအဆောင်ပစ္စည်း ဖြစ်နိုင်ကြောင်း တွေးမိသွားလေ၏။
“မဟုတ်ဘူး။ လူ လုပ်ထားတာ” တုကွန်းက ပြန်ဖြေလိုက်၏။ သူမကလည်း ဝမ်ဝေ့လိုမျိုး တူညီသည့်အတွေးမျိုးရှိကာ စစ်ဆေးကြည့်ခဲ့သော်လည်း ထိုအရာသည် သွေးနဂါး၏ အားထုတ်မှုနှင့် ကြိုးစားမှုရလဒ် ဖြစ်ကြောင်း သိလိုက်ရသည်။
“သိပြီ” ဝမ်ဝေ့က ခေါင်းညိတ်လိုက်သည်။
“တခြားဘာပြောစရာ ရှိသေးလဲ”
“သွေးနဂါးက သွေးမျက်နှာပန်းပွင့် အမြောက်အများကြီးကို စိုက်ပျိုးထားခဲ့တာ” တုကွန်းက တင်ပြလိုက်သည်။
ဝမ်ဝေ့က မျက်မှောင်ကြုတ်လိုက်၏။ သွေးမျက်နှာပန်းပွင့်ဆိုသည်က ပင်ကိုသက်ရှိများနှင့် နတ်ဆိုးများသည် သူတို့၏ သွေးမျိုးဆက် ဖွံ့ဖြိုးမှုကို တိုးမြှင့်ဖို့ အသုံးပြုသည့် အရာတစ်ခု ဖြစ်ပေသည်။ သို့သော်လည်း သွေးနဂါးက သူ တာအိုသက်သေပြပြီးသည့်အချိန်တွင် သူ့သွေးမျိုးဆက်က အရွယ်ရောက်ပြီးသည်ဖြစ်သည့်အတွက် အသုံးမဝင်တော့ပေ။ ထို့ကြောင့် သူသည် မကောင်းဆိုးဝါးနတ်ဘုရားနှင့် ယှဉ်နိုင်သည့် သွေးမျိုးဆက်ကို ရယူဖို့ ကြိုးစားနေခြင်း မဟုတ်သရွေ့ ထိုပန်းပွင့်ကို အသုံးချရာ၌ အသုံးဝင်မည် မဟုတ်ပေ။
သို့သော်လည်း ဝမ်ဝေ့က ထိုသွေးနဂါးပန်းပွင့်၏ အသေးစား သက်ရောက်မှုတချို့ကို မှတ်မိသွားလေသည်။ ထိုအရာက ရုပ်ပိုင်းဆိုင်ရာကို တိုးမြှင့်ပေးခြင်း ဖြစ်၏။ တစ်စုံတစ်ယောက်က လုံလောက်သည့် သွေးမျိုးဆက်ရှိသည်နှင့် သူတို့က ပန်းပွင့်ကို ယူကာ သူတို့၏ ရုပ်ပိုင်းဆိုင်ရာခွန်အားကို တိုးမြှင့်ပေးနိုင်ကြသည်။
“အဲလိုဆိုတော့ အဲဒီခွေးကောင်က အစစ်အမှန်ခန္ဓာကိုယ်လေ့ကျင့်မှုနဲ့ စစ်မှန်မှုကို ကြောက်လို့ လွယ်နည်းကို စဉ်းစားခဲ့တာပဲ” ဝမ်ဝေ့က မှတ်ချက်ပေးလိုက်သည်။
တစ်စုံတစ်ယောက်အနေဖြင့် ခွန်အားအစစ်အမှန်တာအိုနယ်ပယ်အတွင်း ခြေမချဘဲ ကောင်းကင်ဘုံအဆင့် သို့မဟုတ် စံပြတစ်ယောက်၏ ရုပ်ပိုင်းဆိုင်ရာခွန်အားကို ရရှိဖို့ ဖြစ်နိုင်လေသည်။
“အဲ့လိုဖြစ်နေတဲ့ပုံပဲ” တုကွန်းက ခေါင်းညိတ်လိုက်သည်။
“ဘာဖြစ်ဖြစ် ကိစ္စမရှိဘူး” ဝမ်ဝေ့က ပြောလိုက်သည်။ ထိုသွေးနဂါးပန်းပွင့်က သူ့လူသားမကောင်းဆိုးဝါး နတ်ဘုရားသွေးမျိုးဆက်အတွက် သင့်တော်လှသည်။ ထိုအရှုပ်အထွေးများကို ဖြေရှင်းပြီး သူ သီးသန့်ကျင့်ကြံသည်နှင့် သူ့ခန္ဓာကိုယ်ကို မြင့်မားသည့် အဆင့်တစ်ခုအထိ ရောက်အောင် မြှင့်တင်ဖို့ ယုံကြည်ချက် ရှိလာသည်။
“အခုတော့ ဒီလောက်ပဲ” ဝမ်ဝေ့က ကြေညာလိုက်သည်။ ယနေ့လုပ်ဆောင်မှု၏ နောက်ဆက်တွဲက ပြီးဆုံးဖို့ အလှမ်းဝေးနေသေးသည်။ သွေးနဂါးက ကမ္ဘာပေါင်းမြောက်များစွာကို ထိန်းချုပ်ထားပြီး သူ့ဆီရရှိထားသည့် အရင်းအမြစ်များကို တွက်ချက်ကြည့်၍ မရသေးပေ။ သို့သော်လည်း ထိုသို့သော ကိစ္စမျိုးက ဝမ်ချီနှင့် သူ့စီမံခန့်ခွဲရေးအဖွဲ့အစည်းဆီ အပ်ထားလို့ရပေသည်။
“မင်းတို့အားလုံးက ဒီတစ်ခေါက်မှာ ကောင်းကောင်းလုပ်ခဲ့တယ်ဆိုတော့ ဆုချမယ်” ဝမ်ဝေ့က ဆက်ပြောလိုက်သည်။
“ဒါပေမဲ့ ဝမ်ချီ အားလုံးကို စုစည်းပြီးတဲ့အထိတော့ စောင့်ရဦးမယ်။ အဲဒီအချိန်မှာ မင်းတို့တွေက သွေးနဂါးရဲ့ လူတွေကို ငါတို့လူတွေအဖြစ် ပြောင်းလဲဖို့ ကြိုးစားကြည့်ကြရမယ်။ သဘောတူတဲ့သူတွေကိုတော့ ညှိနှိုင်းလို့ ရတယ်။ ဒါပေမဲ့ ကျန်တာတွေကို ဝါးမျိုရေးမီးပြင်းဖိုဆီ ကျွေးလိုက်”
ဝမ်ဝေ့က ထိုအရာများ ပြောပြီးသည့်နောက်တွင် ခေတ္တမျှ တုံ့ဆိုင်းသွားလေသည်။
“မုန့်ခယ်၊ ကျားဖျင့်နဲ့ မီးတောက်ပန်းပဲဆရာကလွဲရင် ကျန်သူအားလုံး ထွက်သွားလို့ရပြီ”
ထိုစကားများက အစည်းအဝေးကို အဆုံးသတ်သင့်သော်လည်း ထောင့်တစ်နေရာတွင် အံကြိတ်နေသည့် ရုပ်သေးရုပ်နတ်ဆိုးက ရုတ်တရက် ထပြောလာသည်။
“အရှင် ကျုပ်ဆီမှာ တစ်ခု ပြောစရာရှိလို့ပါ”
“ပြောလေ” ဝမ်ဝေ့က ပြောလိုက်သည်။
“အဲဒီလုံလောက်တဲ့ အရင်းအမြစ်တွေနဲ့ဆိုရင် ကျုပ်တို့ ပုံရိပ်ယောင်ထဲမှာ မြင်ခဲ့ရတဲ့ တပ်မဟာနဲ့ ယှဉ်နိုင်တဲ့ ရုပ်သေးရုပ်အဖွဲ့ကို တည်ဆောက်နိုင်တယ်” ရုပ်သေးရုပ်နတ်ဆိုးက ပြောလိုက်သည်။
“သူတို့က အမှန်တကယ် အပြည့်အဝ တပ်ဆင်ထားနိုင်ပြီးတော့ အားကောင်းပြီး ခံစားချက် ရှိမှာလည်း မဟုတ်ဘူး။ သူတို့ကို အားကောင်းတဲ့ အစီအရင်တစ်ခု သင်ပြီးတဲ့နောက်မှာ အတော်လေးကို အသုံးဝင်လာနိုင်တယ်။ ပိုပြီးအရေးကြီးတာက သူတို့တွေကို တည်ဆောက်ဖို့ အချိန်သိပ်မလိုဘူး”
“ဒါက အတော်လေးကို ရဲတင်းတဲ့ စကားပဲ” ဝမ်ဝေ့က မျက်မှောင်ကြုတ်ကာ ကြည့်လိုက်သည်။
“ကျုပ်က နည်းလမ်းတစ်ခုကို စဉ်းစားမိလို့ပါ” ရုပ်သေးရုပ်နတ်ဆိုးက ပြောလိုက်သည်။
“ကျုပ်ဘေးမှာသာ လုံလောက်တဲ့ ကျွမ်းကျင်အတတ်ပညာရှင်တွေ ရှိမယ်ဆိုရင် ကျုပ်တို့တွေ စံနှုန်းတစ်ခုရှိတဲ့ ရုပ်သေးရုပ်တွေကို တည်ဆောက်နိုင်လိမ့်မယ်။ ပြီးတော့ သူတို့ကို မတပ်ဆင်ခင် ကွဲပြားတဲ့ အစိတ်အပိုင်းတွေကိုလည်း ဖန်တီးနိုင်လိမ့်မယ်။ အဲဒီနည်းလမ်းနဲ့ဆိုရင် ကျုပ်တို့တွေရဲ့ အလုပ်လုပ်နိုင်စွမ်းကလည်း သိသိသာသာ တိုးမြှင့်လာလိမ့်မယ်”
သူက ဘယ်လိုလုပ် အဲ့လိုမျိုး တွေးမိသွားတာလဲ…
ဝမ်ဝေ့က တွေးလိုက်ပြီး ရုပ်သေးရုပ်နတ်ဆိုးအား ထူးထူးဆန်းဆန်းကြည့်လိုက်သည်။
မင်းက ဘယ်အချိန်က ဉာဏ်ကောင်းသွားတာလဲ…
ဝမ်ဝေ့က ထိုသူအား ကြည့်ပြီးသည့်နောက်တွင် တစ်စုံတစ်ခု သဘောပေါက်သွားလေ၏။ ထိုသူက ဖိအားကို ခံစားနေရခြင်း ဖြစ်သည်။ သူက ဝမ်ဝေ့သည် မုန့်ခယ်နှင့် တခြားသူများကို အတော်လေး အလေးပေးကြောင်း သဘောပေါက်မိပြီး တခြားသူများကမူ နယ်ရုပ်မျှသာ ဖြစ်နေလေ၏။ ထိုသူက ဖိအားကို ခံစားမိကာ ဤနည်းလမ်းဖြင့် သူ့ကိုယ်သူ အတွင်းပိုင်းအဖွဲ့ဆီ ဝင်ရောက်နိုင်ဖို့ သူ့ကိုယ်သူ တန်ဖိုးမြှင့်တင်နိုင်မည့် နည်းလမ်းကို တွေ့ခဲ့ခြင်း ဖြစ်၏။