နတ်ပင်လယ် အဆင့်တက်ခြင်း

Vol. 3 Ch. 33

ရှေးဟောင်းပင်လယ်တစ်ခုအတွင်း ရေလှိုင်းများ ဝုန်းဝုန်းထနေပြီး ကောင်းကင်ယံတွင် ဓားအလင်းများမှ ဖြစ်ပေါ်လာသော ငှက်ကြီးတစ်ကောင် ပျံသန်းနေ၏။ ၎င်း၏ရှေ့တည့်တည့်တွင် အနက်ရောင်ဝတ်ဆင်ထားသော ရဲကုရင် မတ်တပ်ရပ်နေပြီး လက်နှစ်ဖက်နောက်ပစ်၍ ရင်ဆိုင်နေခဲ့သည်။ ၎င်း၏ကျောဘက်တွင် တိမ်များအကြား၌ ဆန်းကျယ်သော ဓားသဏ္ဍာန် မျှော်စင်တစ်ခု ထွက်ပေါ်နေကာ မြူခိုးများ အုံ့ဆိုင်းနေ၏။

"ရဲကုရင် တစ်ဆင့်ပဲ ကျန်ရစ်တယ်"

"ဟုတ်ကဲ့"

အသံတစ်ခုက မိုးချုန်းသံပမာ ပဲ့တင်ထပ်၍ ထွက်ပေါ်လာသည်။ ရဲကုရင်၏အနောက်တွင် သူဦးဆောင်ရာသို့ လိုက်ပါမည့် ဓားသမားတစ်သောင်းကျော်သည် ဓားပျံကိုယ်စီနှင့် နေရာယူထားကြသည်။

"ရဲကုရင်"

"ဘာကိစ္စလဲ"

"အသူရာဓားဂိုဏ်းက ဓားဆွေးနွေးပွဲအကြောင်း သတင်းရလာတယ်"

"ဆက်ပြော"

ဤသို့ဖြင့် အဘိုးအိုတစ်ယောက်က သူ၏နားသို့ကပ်ကာ ယွမ်ရှောင်ဆိုသော အမည်ကို တီးတိုးပြောလိုက်သဖြင့် အေးစက်နေသော မျက်လုံးများအကြား အံ့သြမှုတို့ ဖြစ်တည်လာသည်။

ဓားအိမ်တော်၏ သစ်တောအတွင်း အခေါင်းအတွင်း၌ ယွမ်ရှောင်ရှိနေကာ ကောင်းကင်တာအိုဆေးလုံးများကို ရှေးဟောင်းဟင်းလင်းပြင်ကျင့်စဥ်နှင့် သန့်စင်လိုက်သည်။ သူက ဝူဝူထံမှ ရရှိခဲ့သော စိတ်ကျောက်တုံးငါးသောင်းခန့်ကို သားရဲလေး ပြန်လည်ကောင်းမွန်လာရန်အတွက် အသုံးပြုခဲ့ရသည်။ လုပ်ကြံသူက ရောင်ချင်းချန်ထက် ပို၍သန်မာသောကြောင့် ၎င်း၏အစွမ်းကို အကန့်အသတ်အထိ ထုတ်ဖော်ခဲ့ရသည်။ သို့သော်လည်း ရလဒ်အဖြစ် ထွက်ပေါ်လာသော ဆေးလုံးများသည် သူ၏အင်အားကို နဂါးနွေဦးအခြေတည်အဆင့်သို့ ရောက်ရှိသွားစေသည်။ သူ၏ခန္ဓာကိုယ်ပတ်လည်တွင် ချီစွမ်းအင်များ လှည့်ပတ်နေကာ နောက်ထပ်ကျင့်ကြံဆင့်တစ်ခု ပြန်လည်ရရှိခဲ့သည်။ သူက သေမျိုးအခွံဖြင့် မွေးဖွားလာသော ဖန်ဆင်းရှင်အင်မော်တယ် ဖြစ်သောကြောင့် နဂါးနွေဦးအခြေတည်အဆင့်သို့ ရောက်သောအခါ နတ်ပင်လယ်တစ်ခု ဖန်တီးရန် အသင့်ဖြစ်နေသည်။

အခေါင်းအဖုံးတွင် စာလုံးများ လှပစွာဖြစ်ပေါ်လာပြီး ယွမ်ရှောင်၏ခေါင်းအတွင်း ပေါင်းစပ်သွားကြသည်။ သူ၏အသိစိတ်က ဒန်တန်အတွင်းရောက်ရှိသွားကာ ပြည့်စုံသော လက်သည်းငါးခု ရှေးဟောင်းဟင်းလင်းပြင်နဂါးကို မြင်လိုက်ရသည်။

"ရှေးဟောင်းဟင်းလင်းပြင်က လောကကြီးကို မွေးဖွားတယ်။ နတ်ပင်လယ်ဟာ ကုန်းမြေတွေအကြားမှာ ရှိတယ်"

သူက ရှေးဟောင်းဂါထာတစ်ပုဒ်ကို ရေရွတ်လိုက်သောအခါ စာလုံးများသည် နဂါးနှင့်ပေါင်းစပ်သွားပြီး တုန်ခါသွားကာ ရှေးခေါင်းတလားက ပတ်ဝန်းကျင်မှ ချီစွမ်းအင်များကို စုဝေးပေးခဲ့သည်။ နဂါးကြီးက ပါးစပ်ကိုဟ၍ ချီများကို အငမ်းမရစုပ်ယူလိုက်သောအခါ ခန္ဓာကိုယ်ကြီး ဖောင်းကားလာ၏။

"အမှတ်စတစ်ခုကနေ ကျယ်ပြန့်လာပြီး နတ်ပင်လယ် ဖြစ်ပေါ်လာရတယ်"

နဂါးနွေဦးအဆင့်မှ နတ်ပင်လယ်အဆင့်တက်ခြင်းသည် ကိုယ်ပိုင်ချီစွမ်းအင်ကို မြှင့်တင်သော နည်းလမ်းဖြစ်ကာ ကျန်းရယ်ပင် အဆင့်တက်ရန် အချိန်သုံးရက် ယူခဲ့ရသော်လည်း ယွမ်ရှောင်အတွက် မလိုအပ်ချေ။ သူ၏ ရှေးဟောင်းဟင်းလင်းပြင်ပင်လယ်က ခေးအော့မှ မွေးဖွားလာပြီး စကြဝဠာ၏ သဘာဝဓာတ်များကို စုဝေးစေခဲ့သည်။ လွန်ခဲ့သော တိုက်ပွဲများအတွင်း အခြားကျင့်ကြံသူများသည် သဘာဝချီဓာတ်မျိုးစုံ ပိုင်ဆိုင်ထားကြောင်း သူက သိခဲ့ရသည်။ ဥပမာပြောရလျှင် ဝမ်ဖုန်းသည် သူ၏ဓားဝိညာဥ်ဖြင့် သဲများကို ထိန်းချုပ်နိုင်ပြီး မြေချီကို ပိုင်ဆိုင်ထားသည်။

ရှေးဟောင်းဟင်းလင်းပြင်ကျင့်စဥ်က အသက်ချီကို ကိုယ်စားပြုပြီး ကောင်းကင်သင်္ချိုင်းဓားဝိညာဥ်က ဖျက်ဆီးခြင်းဟူသော မရဏချီကို ထုတ်ဖော်နိုင်သည်။ သူက အသက်ချီကို ကျင့်ကြံပြီး ဓားဝိညာဥ်က မရဏချီကို ထုတ်ဖော်နိုင်သောကြောင့် လိုက်ဖက်ညီနေကာ ဆန့်ကျင့်ဘက် အင်အားနှစ်ရပ်အကြား ဟန်ချက်ညီမျှနေ၏။

"ပြည့်စုံတဲ့ကမ္ဘာတစ်ခုမှာ သေခြင်းနဲ့ ရှင်ခြင်းက ဒွန်တွဲတည်ရှိနေတာလား"

ယွမ်ရှောင်က ရေရွတ်လိုက်ပြီး သေရာပြန်လာပြီးနောက် သူ၏ထိုးထွင်းဉာဏ်က အလွန်တရာ တိုးတက်လာခဲ့သည်။ ဓားသိုင်းများဖြစ်စေ၊ ရှေးဟောင်းဟင်းလင်းပြင်ကျင့်စဥ်ဖြစ်စေ သူက နားမလည်သည်များကို အလွယ်တကူ အဖြေရှာနိုင်ခဲ့၏။ သူ၏ဉာဏ်ရည်နှင့် ကျင့်ကြံနှုန်းအရ အမှန်တကယ် ပါရမီရှင်တစ်ယောက်ဖြစ်ကြောင်း သိသာနေသည်။

"ရဲကုရင် မင်းရဲ့ နောက်ဆုံးအချိန် နီးကပ်နေပြီ။ မင်းကို အစစ်အမှန်အင်မော်တယ်က ဘာလဲဆိုတာ ပြမယ်"

သူက အေးစက်စက် ရေရွတ်လိုက်သော်လည်း သာမန်သေမျိုးများ၏ အပြစ်မရှိသော အသက်ကို မလေးမစားလုပ်မည့် အင်မော်တယ်မျိုး ဖြစ်လာမည်မဟုတ်ပေ။ သူက ရှေးဟောင်းလောကအတွင်း တစ်ဦးတည်းသာရှိသော ဖန်ဆင်းရှင်အင်မော်တယ် ဖြစ်လာပြီး သေမျိုးဘုရင်တစ်ယောက် မဟုတ်တော့ပေ။ သူ၏ဒန်တန်အတွင်း ရှေးဟောင်းဟင်းလင်းပြင်နဂါးသည် ချီစွမ်းအင်ပမာဏများစွာကို ဝါးမျို၍ အရွယ်အစား ဆက်တိုက်ကြီးမားလာနေသောကြောင့် ဝမ်းဗိုက်က ဖောင်းကားနေသည်။

"မင်းရဲ့ဗိုက်ကို ကြည့်ရတာ အနည်းဆုံး ကိုယ်ဝန်ရှစ်လလောက်တော့ ရှိနေပြီ။ ဘယ်သူမှ အဆင့်တက်ဖို့ ကလေးမွေးဖူးမယ် မထင်ဘူး"

"မင်းကလေးမွေးတာကို ကြည့်ဖို့ မစောင့်နိုင်တော့ဘူး"

ကြယ်ပြာနှင့် လနီသည် စနောက်လိုက်ကြသော်လည်း ယွမ်ရှောင်က မကြားဟန်ဆောင်လိုက်သည်။ သူ၏ဝမ်းဗိုက် ဖောင်းကားနေရသည်မှာ အခြားကျင့်ကြံသူများထက် စွမ်းအင်ပမာဏများစွာ စုဆောင်းထားသောကြောင့် ဖြစ်၏။

"နတ်ပင်လယ်အဆင့် တက်စမ်း"

သူက ကြုံးဝါးလိုက်ပြီး နဂါးကြီးကို စွမ်းအင်ပင်လယ်အဖြစ် ပြောင်းလဲရန် အာရုံစိုက်ထားလိုက်သည်။ ပြင်းထန်သော စိတ်ခွန်အားကြောင့် သူက ရှေးဟောင်းဟင်းလင်းပြင်ကျင့်စဥ်၏ နည်းလမ်းအတိုင်း ပြောင်းလဲခြင်း စတင်လိုက်၏။ နဂါးဟိန်းသံတစ်ခုက ကျယ်လောင်စွာ ထွက်ပေါ်လာပြီး ယွမ်ရှောင်၏ဝမ်းဗိုက်သည် မူလအတိုင်း ချပ်ရပ်သွားကာ ရှေးဟောင်းဟင်းလင်းပြင်နဂါးကြီးက ကျယ်ဝန်းသော ပင်လယ်ကြီးအဖြစ် ပြောင်းလဲသွားသည်။ သူ၏အသက်ချီများသည် ဒန်တန်အတွင်း လှိုင်းထန်နေပြီး အဖြူရောင်အလင်းများနှင့် ဆင်တူနေသည်။ နတ်ပင်လယ်အဆင့်တွင်လည်း နဂါးနွေဦးအဆင့်ကဲ့သို့ အဆင့်ငယ်ငါးခုရှိကာ နတ်ပင်လယ်တစ်ခု ပိုင်ဆိုင်ခြင်းသည် နတ်ပင်လယ်စဦးအဆင့်ကို ဆိုလိုသည်။

နတ်ပင်လယ် အခြေတည်အဆင့်သို့ ရောက်နေသည့် ကျောက်ရန်ရန်က စည်းကမ်းထိန်းတစ်ယောက်ကို ဓားတစ်ချက်တည်းဖြင့် သတ်ပြထားသောကြောင့် ဤအဆင့်၏စွမ်းအားကို သိနိုင်သည်။ နတ်ပင်လယ်တစ်ခုမှ ငါးခုအဖြစ် ပြောင်းလဲနိုင်ရန်အတွက် နောက်ထပ်နဂါးတစ်ကောင်အား လက်သည်းတစ်ခုမှ ငါးခုအထိ အစအဆုံးကျင့်ကြံရန် လိုအပ်ပြီး နောက်ဆုံး၌ ထိုနဂါးအား နတ်ပင်လယ်အဖြစ် ပြောင်းလဲရပေလိမ့်မည်။ နတ်ပင်လယ်အလယ်အဆင့်သည် နဂါးနွေဦးအဆင့်ကို နှစ်ကြိမ်ကျင့်ကြံသည်နှင့် ညီမျှပြီး ကျောက်ရန်ရန်က ငါးကြိမ်အထိ ကျင့်ကြံထားပုံရသည်။

"ငါက နတ်ပင်လယ်အစောပိုင်းအဆင့်ဆိုပေမယ့် ရှေးဟောင်းဟင်းလင်းပြင်ကျင့်စဥ်နဲ့ ရွှေရောင်ဒန်တန်ကြောင့် အဆင့်တူတွေထက် အများကြီး ပိုသန်မာတယ်လို့ ခံစားနေရတယ်"

ယွမ်ရှောင်က ရေရွတ်လိုက်ပြီး ဓားဝိညာဥ်နှင့် ပူးပေါင်းလိုက်လျှင် ကြောက်မက်ဖွယ်ရာ အစွမ်းထက်လာနိုင်သည်။

"မင်းက အမြင်ကျဥ်းနေပြန်ပြီ"

ကြယ်ပြာ၏စကားသံ ထွက်ပေါ်လာခြင်း ဖြစ်သည်။

"ဘာကြောင့်လဲ"

"အစ်ကိုကြီး ရဲကွာရဲ့ ရွှေရောင်ဒန်တန်က ဘာမှမဟုတ်ပေမယ့် ရှေးဟောင်းဟင်းလင်းပြင်ကျင့်စဥ်ကို အထင်မသေးနဲ့။ မင်းက အဆင့်တူတွေထက် အဆပေါင်းသိန်းချီ ပိုသန်မာလာနိုင်တဲ့ အလားအလာရှိတယ်။ တကယ်ဆိုရင် အဆပေါင်း ဘီလီယံချီတောင် ဖြစ်နိုင်သေးတယ်"

"ဘာကြောင့် ဒီလောက် အစွမ်းထက်ရတာလဲ"

"ရှင်းပါတယ်။ မင်းရဲ့အရင်ဘဝမှာ ဒီကျင့်စဥ်က လောက ဖန်တီးရေး နည်းလမ်းတစ်ခုဖြစ်လို့ ကျင့်ကြံခြင်းအုတ်မြစ်အဖြစ် အသုံးပြုလိုက်လို့လေ"

"ဒါဆိုရင် ငါက ဖန်ဆင်းရှင်အင်မော်တယ်အကြောင်း အပေါ်ယံလောက်ပဲ သိထားတာပေါ့"

ယွမ်ရှောင်က နားလည်သွားဟန်ဖြင့် မျက်လုံးများ တောက်ပလာသည်။

"လက်ရှိမှာ မင်းရဲ့ခန္ဓာကိုယ်က အားနည်းလွန်းလို့ ကျင့်စဥ်ရဲ့ စွမ်းအားအစစ်အမှန်ကို မထုတ်ဖော်နိုင်ဘူး။ ရဲကုရင်ရဲ့ ဒန်တန်ကို ရလိုက်ရင်တော့ ခွန်အားသုံးဆလောက် တိုးလာလိမ့်မယ်"

"ငါသိပြီ။ ဒါဆိုရင် အင်မော်တယ်မိုးစက်တွေကို တတ်နိုင်သမျှ မြန်မြန် စုဆောင်းရမှာပေါ့"

ယွမ်ရှောင်က ဖန်ဆင်းရှင်အင်မော်တယ် မည်မျှအစွမ်းထက်ကြောင်း စတင်သိမြင်လာခဲ့ပြီး လက်ရှိတွင် အဆင့်နိမ့် ကျင့်ကြံသူတစ်ယောက် ဖြစ်နေသော်လည်း အင်မော်တယ်လမ်းကြောင်း၌ ရှေးနတ်ဘုရားခြောက်ပါးကို ဆန့်ကျင်ကာ ရှင်သန်ရပေလိမ့်မည်။

"အရုဏ်တက်ချိန် ရောက်ပြီ။ မဟာတိုက်ပွဲ စတင်တော့မယ်။ ကျန်းရယ် မင်းရဲ့နေ့ရက်တွေ ကုန်ဆုံးပြီလို့ မှတ်လိုက်တော့"

ဓားအော်ရာ ၁၅ခု၊ နတ်ပင်လယ်အစောပိုင်းအဆင့် အသက်ချီနှင့် ကောင်းကင်သင်္ချိုင်းဓားဝိညာဥ်တို့ကြောင့် ယွမ်ရှောင်က ကျေနပ်စွာ ကြုံးဝါးလိုက်ပြီး ခေါင်းတလားအပြင်သို့ ခုန်ထွက်လိုက်လေသည်။