အက်ကွဲနေသော ကြိုးမျှင်
Vol. 94 Ch. 1308
ဝမ်ဝေ့က တုန်ယင်နေသည့် ဟွေ့မုန်ဝေ့ကို ကြည့်ကာ ပြောလိုက်သည်။
“စိတ်အေးအေးထား။ ငါ မင်းကို တစ်ခုခုလုပ်ချင်တယ်ဆိုရင် အဲ့လောက်အကြာကြီး စောင့်မနေဘူး”
“သခင်ကြီး ကျွန်တော်က အရမ်းစိတ်လှုပ်ရှားနေပြီး ကိုယ့်ကိုယ်ကို မထိန်းချုပ်နိုင်လို့ပါ” ဟွေ့မုန်ဝေ့က အလျင်အမြန် ပြန်ဖြေလိုက်သည်။ သူက အခွင့်အရေးကောင်းတစ်ခု သူ့ဆီ ကျရောက်လာတော့မည်ဖြစ်ကြောင်း သိနေသည့်အတွက် သူ့သတ္တိကြောင်မှု သို့မဟုတ် တခြားအရာတစ်ခုကြောင့် ပျက်စီးမသွားစေလိုပေ။
“ကောင်းပြီလေ” ဝမ်ဝေ့က ခေါင်းညိတ်လိုက်သည်။
ထိုသူက အမှန်အတိုင်းပြောနေလား ဂရုမစိုက်ပေ။
“ငါ့ရဲ့ ဇနီးက ငါ မချက်နိုင်လို့ဆိုပြီးတော့ တစ်ခါက လှောင်ပြောင်ခဲ့ဖူးတယ်။ ပြီးတော့ ငါက သူမလိုမျိုး အရသာခံနှုန်း မရှိဘူးဆိုပြီးတော့လည်း ပြောခဲ့တယ်။ မိုးမြေကို လက်ထဲမှာ ဆုပ်ကိုင်ထားနိုင်တဲ့ အမျိုးသားတစ်ယောက်အနေနဲ့ ဒီလိုမျိုး ကိစ္စမျိုးကို ဘယ်လိုလုပ် သည်းခံနိုင်မှာလဲ”
ဟွေ့မုန်ဝေ့က သူ့ကို တုန်လှုပ်စွာ ကြည့်လိုက်သည်။ ဤသည်က ဤစကားဝိုင်း ဦးတည်သွားရမည့် အနေအထားဟု မထင်ပေ။
အဲဒီနတ်ဘုရားတွေကလည်း သူတို့ဇနီးရဲ့ အမျက်ဒေါသကို ကြောက်ရလိမ့်မယ်လို့ မထင်ထားမိဘူး…
ဟွေ့မုန်ဝေ့က တွေးပြီးသည့်နောက်တွင် သူ့ခန္ဓာကိုယ်က အကြောက်တရားဖြင့် ထပ်မံ လွှမ်းမိုးခံလိုက်ရပြန်သည်။ သူတို့တွေးမိသည့်အရာက သူ့ခန္ဓာကိုယ်ငယ်လေးသည် ထိုနတ်ဘုရားများကြားမှ ထိပ်တိုက်ရင်ဆိုင်မှုကို ရှင်သန်နိုင်ပါ့မလား တွေးနေမိ၏။ သူ့ရှင်သန်နိုင်လျှင်ပင် သူက များစွာသိနေသည့်အတွက် ရှင်းထုတ်ခံရနိုင်ချေ ရှိသည်။ ထိုနတ်ဘုရားက သူ့ဇနီး သူ့ကို ဖိနှိပ်ထားသည့်အချက်ကို သိစေလိုမည် မဟုတ်ပေ။
ဟွေ့မုန်ဝေ့က ငိုချင်သော်လည်း မငိုရဲပေ။ ဤသည်က ဘဝကို ပြောင်းလဲပေးမည့် အခွင့်အရေးဟု ထင်ခဲ့မိသော်လည်း သူ့ကိုယ်သူ နတ်ဘုရားများကြားမှ အိမ်ထောင်ရေး ပဋိပက္ခကြား ကျရောက်သွားလေသည်။ အကျိုးဆက်အနေဖြင့် ရှင်းထုတ်ခံရနိုင်ချေ ရှိနေ၏။
ဝမ်ဝေ့က သူ့ရုတ်ချည်းဆိုသလို အပြောင်းအလဲကို သတိထားမိကာ စစ်ဆေးကြည့်လိုက်သည်။ သူက ဆွံ့အမိသွား၏။
ဒီအမျိုးသားက အတော်လေးကို စိတ်ကူးယဉ်တတ်တာပဲ…
ကောင်းပြီလေ။ ဒါက ချက်ပြုတ်ရေးအတွက် အသုံးချမယ်ဆိုရင်တော့ ကိစ္စဆိုးတစ်ခုတော့ မဟုတ်ပါဘူး…
ဝမ်ဝေ့က တွေးပြီးသည့်နောက်တွင် ဆက်လက် ပြောလိုက်သည်။ သူက သူ့လက်ထဲမှ အသုံးအဆောင်ပစ္စည်းကို လက်ညှိုးထိုးလိုက်ပြီးသည့်နောက်တွင် ဟွေ့မုန်ဝေ့၏ နဖူးထဲ ပေါင်းစည်းပေးလိုက်၏။
“မာနကြောင့် ငါက တစ်ရက်ကျရင် ကမ္ဘာပေါ်မှာ အကောင်းဆုံး စားသောက်ပွဲလုပ်မယ်ဆိုပြီးတော့ အလောင်းအစား လုပ်ခဲ့တယ်” ဝမ်ဝေ့က ဆက်ပြောလိုက်သည်။
“ငါ ငါ့ကတိကို တည်ရမယ်။ ဒါပေမဲ့ ငါက အရမ်းကို အလုပ်ရှုပ်နေတယ်လေ။ ချက်ပြုတ်ရေးတာအိုက နက်နဲတော့ ငါ့အနေနဲ့ တစ်စိတ်တစ်ပိုင်းပဲ လေ့လာမယ်ဆိုရင် အဲဒီအလောင်းအစားကို ဖြည့်စည်းဖို့ ဘယ်လောက်ထိ ကြာမြင့်မယ်ဆိုတာကို မသိဘူး”
ဝမ်ဝေ့က ဟွေ့မုန်ဝေ့ကို ကြည့်ရင်း ပြုံးလိုက်သည်။
“အဲဒါကြောင့် မင်းကို ကမ္ဘာပေါ်မှာ အကောင်းဆုံး စားဖိုမှူးဖြစ်လာဖို့ လေ့ကျင့်ပေးမဲ့ ဒီအသုံးအဆောင်ပစ္စည်းကို ပေးမယ်။ မင်းအနေနဲ့ ချက်ပြုတ်ရေးတာအိုကို အခြေခံတဲ့ မျိုးနွယ်တစ်ခုကို ဖန်တီးစေချင်တယ်။ ပြီးသွားရင် ကမ္ဘာပေါ်မှာရှိတဲ့ အကောင်းဆုံးနဲ့ အထူးကဲဆုံး ဟင်းလျာတွေကို ဖန်တီးရမယ်။ အဲဒီအခါကျရင် ငါ လာတွေ့လှည့်မယ်။ နားလည်လား”
“သခင်ကြီး” ဟွေ့မုန်ဝေ့က ချက်ချင်းဆိုသလို ဒူးထောက်လိုက်သည်။
“သခင်ကြီးရဲ့ တာဝန်အတွက် ကျွန်တော် မီးနဲ့ မိုးကြိုးကိုတောင် ဖြတ်သန်းရဲပါတယ်”
“ကောင်းပြီ။ မင်းရဲ့ စကားတွေကို မှတ်ထား” ဝမ်ဝေ့က ခေါင်းညိတ်လိုက်သည်။ သူက ဟွေ့မုန်ဝေ့ သို့မဟုတ် သူ့မိသားစုအား ချုပ်ထိန်းမထားဖို့ ဆုံးဖြတ်လိုက်သည်။ ဤနည်းဖြင့် ထိုသူ့အတွက် စမ်းသပ်ချက်အနေဖြင့် မှတ်ယူနိုင်လေ၏။ အကယ်၍ သူ့မိသားစုက တာဝန်ကို ဆက်လက်ထမ်းဆောင်ပြီး ဝမ်ဝေ့အား သစ္စာရှိရှိ ခစားမည်ဆိုပါက အဆင်ပြေလိမ့်မည်။ အကယ်၍ သူတို့က အာဏာကို ရရှိလာပြီး သူတို့၏ တာဝန်ကို ငြင်းဆန်ထားပါက ဝမ်ဝေ့က သူတို့ကို ရှင်းထုတ်ပြီး တခြားတစ်ယောက်ကို ရွေးချယ်ရလိမ့်မည်။
သူက လက်ဝှေ့ပြီးသည့်နောက်တွင် ဟွေ့မုန်ဝေ့၏ အိမ်သို့ ပြောင်းရွှေ့လိုက်သည်။ ထိုသူက အဖြစ်အပျက်ကြောင့် စိတ်ရှုပ်ထွေးနေဆဲဖြစ်ပြီးသည့်နောက်တွင် မသေမျိုးများ၏ နည်းလမ်းကို အမှန်တကယ် နားလည်သွားခဲ့သည်။
ဟွေ့မုန်ဝေ့က အားကျနေမိ၏။ သို့သော်လည်း နောင်အနာဂတ်တွင် သူက ထိုသို့သော စွမ်းအားမျိုး ရရှိလာနိုင်ကြောင်း နားလည်သည့်အတွက် အသိပြန်ကပ်လာမိသည်။ ဟွေ့မုန်ဝေ့က ချက်ချင်းဆိုသလို သူ့အခန်းမှ ထွက်မသွားသေးဘဲ အခွင့်အရေးကို ယူကာ သူ့စိတ်ထဲတွင်ရှိနေသည့် အသုံးအဆောင်ဖြင့် ဆက်သွယ်ဖို့ ကြိုးစားလိုက်သည်။
စကားဝိုင်းက တစ်နာရီကြာ ကြာမြင့်ခဲ့ပြီး ဟွေ့မုန်ဝေ့က ထူးထူးဆန်းဆန်း အမူအရာမျိုး ရှိနေလေ၏။
ဝမ်ဝေ့က ထိုအရာကို မြင်ကာ ပြုံးလိုက်သည်။
“ကောင်းပြီလေ။ မင်း ဇနီးတစ်ယောက်နဲ့ ကလေးနှစ်ယောက်ထဲနဲ့ ဘာလို့ ချက်ပြုတ်ရေးမျိုးနွယ်ကို တည်ဆောက်နိုင်မှာလဲ။ မင်း ငါ့ကို ကျေးဇူးတင်သင့်တယ်”
မှန်ပေသည်။ ဟွေ့မုန်ဝေ့၏ ပထမဦးဆုံးတာဝန်က ဇနီးတချို့နှင့် ကိုယ်လုပ်တော်တချို့ကို ရွေးချယ်ပြီး ဟွေ့မျိုးနွယ်၏ လူဦးရေကို တိုးမြှင့်ဖို့ရာဖြစ်၏။ ဝမ်ဝေ့က ထိုသူအား သူ့ကို ကျေးဇူးတင်ဖို့ ပြောခဲ့သည်မှာလည်း သူက ဟွေ့မုန်ဝေ့နှင့် သူ့မျိုးဆက်များအား ပါရမီရှင်များအား ပြောင်းလဲပေးနိုင်သည့် အရင်းအမြစ်လုံလုံလောက်လောက် ဆောင်ထားသည့်အတွက် ဖြစ်၏။ သူက အသုံးအဆောင်ပစ္စည်း စိတ်ဝိညာဉ်အား ချက်ပြုတ်ရေးတာအိုနှင့် ပတ်သက်သည့် စည်းမျဉ်းအပိုင်းအစများကို ဟွေ့မုန်ဝေ့၏ ပထမဦးဆုံး အမွေခံ ၃၃ ယောက်ထံ ချီးမြှင့်ပြီး ဟော်သဲ့ရုပ်ခန္ဓာများ ရယူဖို့ပြောခဲ့သည်။
ဝမ်ဝေ့က ဆက်လက် စောင့်မကြည့်တော့ဘဲ ရုတ်ချည်းဆိုသလို တစ်စုံတစ်ခုကို အမှတ်ရသွားလေ၏။
အဲဒီကောင်မလေးကိုလည်း သူ့ဆရာရှာပေးမယ်လို့ ကတိပေးခဲ့တယ် မဟုတ်ဘူးလား။ သွေးနဂါးက သူ့ကို ခေါ်သွားပေမဲ့ သူက ငါတို့ သတ်တဲ့အထဲ ပါသွားတယ်လို့တော့ မထင်ဘူး…
ဝမ်ဝေ့က မျက်မှောင်ကြုတ်လိုက်သည်။
အခုထိ ဘာမှစဉ်းစားနေဖို့တော့ မလိုသေးပါဘူး။ သွေးနဂါးက သူဘာတွေလုပ်ခဲ့တယ်ဆိုတာကို မှတ်တမ်းရှိတယ်ဆိုတော့ သတင်းအချက်အလက်တွေကို ဖတ်ရှုပြီးတဲ့နောက်မှာ တွေ့လာလိမ့်မယ်။ အဲဒီအခါကျရင် သူမရဲ့ ပါရမီတွေကို ကောင်းကောင်းအသုံးချတာပေါ့…
သူက လေဟာနယ်ကို လက်ညှိုးထိုးပြီးသည့်နောက်တွင် ထိုမိန်းကလေးနှင့် ဟွေ့မုန်ဝေ့ကြားတွင် ဆရာတပည့် ကံကြမ္မာဆက်ဆံရေးတစ်ခုကို ဖန်တီးလိုက်သည်။
သူမက တာအိုကို သက်သေပြတော့မှာဆိုတော့ သူမရဲ့ ဘေးကင်းမှုက တစ်နည်းနည်းနဲ့ အာမခံပေးနိုင်တယ်…
ဝမ်ဝေ့က ရေရွတ်လိုက်သည်။ သူက ထိုမိန်းကလေးအား ကောင်းကင်အလိုဆန္ဒကို ချီးမြှင့်ခဲ့သော်လည်း သူမအား ထာဝရဧကရာဇ်ဖြစ်လာနိုင်ချေကို တိုးမြှင့်ဖို့ရာအတွက် ချက်ချင်းအသုံးပြုခွင့်မပေးခဲ့ပေ။ သူက ချန်ကျစ်လန်သည် သူမဆရာ၏ ကာကွယ်မှုကြောင့် အနည်းငယ်တုံးအအ ဖြစ်နေသော်လည်း သူမ၏ ကျင့်ကြံရေးပါရမီက ထူးကဲလှသည်။ ထို့ကြောင့် သူမအနေဖြင့် ထာဝရဧကရာဇ်ဖြစ်လာဖို့ သိပ်ကြာမြင့်မည် မဟုတ်ပေ။
ဝမ်ဝေ့က အဟန့်အတားမရှိ တိုက်ခိုက်နေသည့် လူ ၇ယောက်ကို အာရုံစိုက်ထားလိုက်သည်။
“ဖိနှိပ်စမ်း”
သူ့အသံက မိုးမြေကြားတွင် ပဲ့တင်ထွက်သွားပြီး နေရာတစ်ဝန်းရှိ လူအားလုံးကို တုန်လှုပ်သွားစေသည်။ ထို့နောက် ကြောက်မက်ဖွယ် ဖိအားက ထိုသူများအား မြေကြီးပေါ် ဖိနှိပ်သွားစေ၏။
“အခုကစပြီး ဒါက ငါ့ပိုင်နက်ပဲ။ တိုက်ပွဲတွေကို တားမြစ်တယ်”
အသံက သေမျိုးများကို ထိတ်လန့်သွားစေသလို ကျင့်ကြံသူများလည်း သူတို့၏ အမှားကို အလျင်အမြန်ဝန်ခံလိုက်ကြသည်။ သူတို့က ဤသည်က ဟွေ့မုန်ဝေ့၏ အခြေခံအုတ်မြစ်တည်ဆောက်ဖို့ နေရာကောင်းဖြစ်သည့်အတွက် ဝမ်ဝေ့က သူ့အတွက် မတည်ငြိမ်သည့် အနေအထားအားလုံးကို ရှင်းထုတ်ပေးခဲ့သည်။
ဝမ်ဝေ့က သူ့ဟွင်သွမ်းမီးတောက်တချို့ကို ဖန်ဆင်းပြီး ဤနေရာဖြင့် ပေါင်းစည်းကာ အဟန့်အတားအနေဖြင့် ထားရှိခဲ့သည်။ ထို့နောက် သူက မိုးမြေ၏ လျှို့ဝှက်ချက်တချို့ကို ပြောင်းလဲခဲ့၏။ ဤနေရာကို မည်သူ သိမ်းယူသွားလဲဟု စူးစမ်းဖို့ ကြိုးစားသည့်သူတိုင်းက ဇစ်မြစ်မှာ အသိစိတ်ဝင်လာသည့် အရင်းအမြစ်ဟွင်သွမ်းမီးတောက်သာ ဖြစ်နေမှန်း သိသွားကြလိမ့်မည်။ ထိုအရာက ဝမ်ဝေ့နှင့် ပတ်သက်နေမည် မဟုတ်ပေ။
ကောင်လေး ငါ မင်းရဲ့ ကြီးထွားမှုနဲ့ ကြွယ်ဝမှုတို့ကို ဖြစ်အောင် ဘယ်လောက်တောင် အားထုတ်ထားတယ်ဆိုတာ ကြည့်ဦး။ ငါ့ရဲ့ အားထုတ်မှုတွေကို အလကား မဖြစ်စေနဲ့…
ဝမ်ဝေ့က တွေးပြီးသည့်နောက်တွင် ထိုနေရာမှ ပျောက်ကွယ်သွားလေသည်။
နောက်ထပ် ဘာလုပ်ရမလဲ…
သူက တွေးလိုက်၏။ သူက အနာဂတ်ဇနီးလောင်းဆီ သွားရောက်တွေ့ဆုံပြီး ရှင်းပြသင့်ပေသည်။
ဒါပေမဲ့ ဒီလိုလုပ်တာက ငါ့ကို ပိုပြီး အပြစ်ရှိစိတ် ခံစားရစေသလိုပဲ။
ငါ ဘာမှမလုပ်ခဲ့ပေမဲ့လည်း…
ဝမ်ဝေ့က စိတ်ထဲတွင် ညည်းတွားလိုက်သည်။ သူက ရှင်းပြလိုသော်လည်း သူ တစ်စုံတစ်ခုမှားယွင်းပြီး လုပ်ခဲ့သလိုမျိုး မဖြစ်လိုပေ။ သူက သက်ပြင်းချလိုက်၏။
ဘယ်ကမ္ဘာပဲဖြစ်ဖြစ် ချိန်းတွေ့ရတာက မလွယ်ကူခဲ့ဘူးကို…
သူက လက်ဝှေ့ပြီးသည့်နောက်တွင် အဆောင်နှစ်ခုကို ပို့ဆောင်လိုက်သည်။ တစ်ခုက သူ့အနာဂတ်ဇနီးလောင်းထံ သူရောက်ရှိမည့်အကြောင်းကို လှမ်းပြောခြင်းဖြစ်ကာ နောက်တစ်ခုကမူ ဧကရာဇ်ခုံဆီ ဖြစ်၏။
ဝမ်ဝေ့က ဧကရာဇ်ခုံဆီ အရင်ဆုံး သွားတွေ့ဖို့ ရွေးချယ်လိုက်သည်။ ပြောရလျှင် သူက ဘာမှမှားတာမျိုး လုပ်မထားပေ။
ငါ့အနေနဲ့ နည်းနည်းတော့ လေးနက်မှုကို ပြသင့်တယ်…
ဝမ်ဝေ့၏ အကြည့်များက ပြောင်းလဲသွားပြီး သူ့ကံကြမ္မာကြိုးမျှင်ကို မြင်လိုက်ရသည်။ ထိုကြိုးမျှင်များ အားလုံးက သူ့ကံကြမ္မာအနှောင်အဖွဲ့ကင်း ခန္ဓာကြောင့် သူ့ခန္ဓာကိုယ်နှင့် ထိတွေ့ခြင်းမရှိပေ။ တစ်ခုတည်းကသာ သူ့အား မဖယ်ရှားနိုင်ဖွယ် မျှော့ကောင်လိုမျိုး ကပ်နေလေ၏။ ဝမ်ဝေ့က ဓားတစ်ချောင်းကို ထုတ်ဖော်ကာ သူ့အဖေ၏ အကြွင်းမဲ့ပိုင်းဖြတ်ရေးကျမ်းကို သုံးပြီး ကံကြမ္မာကြိုးမျှင်ကို ဖြတ်တောက်လိုက်သည်။
ဟမ် သက်ရောက်မှုက ဆယ်ရာခိုင်နှုန်းပိုပြီး ကောင်းလာတာပဲ။ အဲဒီနည်းစနစ်က တကယ်ကို ထူးကဲတယ်။ အထူးသဖြင့် တိုက်ခိုက်ရေးအလားအလာနဲ့ ပတ်သက်ပြီးတော့ပေါ့…
ဝမ်ဝေ့က အက်သွားသည့် ကံကြမ္မာကြိုးမျှင်ကို ကြည့်ရင်း မှတ်ချက်ပေးလိုက်သည်။
ကံဆိုးတာက…
သူက ထိုကြိုးမျှင်ကို အပြီးတိုင်မဖြတ်တောက်နိုင်သော်လည်း အက်ကွဲသွားပြီဖြစ်သည့်အတွက် ကောင်းမွန်နေပြီ ဖြစ်၏။
သူမက ငါ့ရဲ့လေးနက်မှုကို နားလည်မှာပါ…
ဝမ်ဝေ့၏ ဦးတည်ရာက ဧကရာဇ်ခုံ တစ်ယောက် ဧကရာဇ်ဉာဏ်အလင်းပွင့်ကျောင်းတော်၏ ပင်မအဖွဲ့ကို တည်ဆောက်ထားရာဖြစ်သည့် တော်ဝင်ကျောင်းတော်နယ်မြေဆီ ဖြစ်သည်။ ထိုနယ်မြေတစ်ခုလုံးက ဒိုင်မေးရှင်းအနိမ့်ထက် ပိုမိုကြီးမားပြီး ကြီးကျယ်သည့် မြို့တစ်ခု ဖြစ်ပေသည်။
ဒါက အပြင်ဘက်ပိုင်းလား…
ဝမ်ဝေ့က တွေးရင်း ဤကျယ်ပြောလှသည့် မြို့အတွင်း လျှောက်လှမ်းလာလေ၏။ ဤနေရာအတွင်း သေမျိုးဟူ၍ မရှိဘဲ ကျင့်ကြံသူများသာ ရှိလေသည်။
ဒီနေရာက စွမ်းအင်စုစည်းမှုက အတော်လေးကောင်းတာပဲ။ ဒါက မြို့ရဲ့ အားအနည်းဆုံးအပိုင်းပဲ ရှိသေးတယ်။ ဒါပေမဲ့ လေထဲမှာ တစ်ခုခုရှိနေသလိုပဲ…
ဝမ်ဝေ့က သူပတ်ဝန်းကျင်ကို လေ့လာရင်း လျှောက်လှမ်းလာလိုက်သည်။
အငြိုးအတေးတွေကို ရှင်းထုတ်ခြင်း၊ ဝိညာဉ်ကို တည်ငြိမ်စေခြင်းနဲ့ အဆင့်(၁၀)အောက် ကျင့်ကြံသူတွေအတွက် နားလည်မှုကို တိုးမြှင့်နိုင်စွမ်းတို့ပဲ။ ဒါက သမာသမတ်ချီ အစီအရင်ဖြစ်သင့်တယ်။ ဧကရာဇ်ခုံရဲ့ အခြေခံက ငါ ထင်ထားတာထက်ပိုပြီး နက်နဲနေတာပဲ..
အကယ်၍ ထိုသို့သော အစီအရင်မျိုးကို ပါရမီထူးကဲသည့် ကျောင်းသားများအတွက် ရွေးချယ်ထားသည့် နေရာ၌သာ အသုံးပြုကြသော်လည်း တခြားတစ်ယောက်ကမူ အားလုံး အသုံးပြုဖို့ရာ အကြီးကြီး သုံးထားလေသည်။ ဝမ်ဝေ့ သိထားသလောက် အပြင်ဘက်ပိုင်းက ဧည့်သည်များနှင့် ကျောင်းတော်အတွက် အဖွဲ့သားများ လက်ခံရာ၌ လူများ စောင့်ဆိုင်းဖို့ရာသာ ဖြစ်သည်။ သို့သော်လည်း ထိုသို့သောပတ်ဝန်းကျင်မျိုးက ထိပ်တန်း ဖြစ်နေလေပြီ။ ထို့ကြောင့် သူက အတွင်းပိုင်းနှင့် အလယ်ပိုင်းကို တွေ့ရဖို့ မစောင့်ဆိုင်းနိုင်တော့ပေ။
ဝမ်ဝေ့က အားလုံးကို အကဲခတ်နေရင်း တစ်စုံတစ်ယောက်က အံ့မခန်း အလျင်နှုန်းဖြင့် ပျံသန်းကာ ရောက်ရှိလာလေသည်။ အပြင်ဘက်ပိုင်းတွင် ပျံသန်းရေးကို တားမြစ်ထားသည့်အတွက် အံ့အားသင့်သွားသော်လည်း ရောက်ရှိလာသည့်သူကို မြင်လိုက်ရသည်နှင့် အကြောင်းအရင်းကို နားလည်သွားခဲ့သည်။