လိုအပ်သည့် လေ့ကျင့်မှုများ

ဝူဟုန်က ဝမ်ဝေ့နှင့် ထိပ်တိုက်ရင်ဆိုင်ဖို့ ပြေးသွားခဲ့သော်လည်း ကိစ္စများက ဤတစ်ကြိမ် ကွဲပြားသွားခဲ့သည်။ သူမက စည်းပိတ်ရေးတာအိုကို အသုံးမပြုဘဲ သူ့အား ခွန်အားသက်သက်ဖြင့် ရင်ဆိုင်နေ၏။

ဝမ်ဝေ့က သူမ၏ ရည်ရွယ်ချက်ကို အတိအကျ မသိသော်လည်း သူမအတိုင်း လိုက်လုပ်ခဲ့သည်။ ထိုသို့ဖြင့် သူတို့က ခန္ဓာကိုယ်ခွန်အားကို အသုံးပြု၍ ထိပ်တိုက်ရင်ဆိုင်ခဲ့သည်။ ထိပ်တိုက်ရင်ဆိုင်မှုတစ်ခုချင်းစီက ပတ်ဝန်းကျင်ကို ကမ္ဘာဦးဟွင်သွမ်းထံ အပျက်အစီးများစွာ ဖြစ်ပေါ်လာစေ၏။

ဝမ်ဝေ့က တိုက်ခိုက်ရင်း လေ့လာနေသည်။ ဝူဟုန်၏ ခန္ဓာကိုယ်ထိန်းချုပ်မှုက သူ့ထက် ပိုမိုကောင်းမွန်နေကြောင်း သဘောပေါက်သွားခဲ့သည်။ သူမက သူ့အစွမ်းထိန်းချုပ်ရေးပညာရပ်တွင် သူ့စံနှုန်းအရ အစစ်အမှန်ကောင်းကင်တာအိုထိန်းချုပ်သည့် အဆင့်သို့ ရောက်ရှိနေပြီ ဖြစ်သည်။

မဟုတ်သေးဘူး။ အစစ်အမှန် ကောင်းကင်ထိန်းချုပ်ရေးနဲ့ နီးကပ်နေတာ…

သူက သုံးသပ်လိုက်သည်။

သူမ၏ အဆင့်ကို ဖော်ညွှန်းဖို့ အကောင်းဆုံးနည်းလမ်းက သူတို့၏ ကမ္ဘာပေါ် အခြေခံ၍ ခွဲခြားထားသော ကောင်းကင်တာအိုအပေါ် မူတည်၍ ဖြစ်သည်။ အရင်းအမြစ်ဟွင်သွမ်းကမ္ဘာ၏ အစစ်အမှန်တာအိုက ထူးကဲသာလွန်မှုတစ်ပိုင်းအဆင့်ဖြစ်သည့်အတွက် သူတို့၏ စည်းမျဉ်း သို့မဟုတ် တာအိုထိန်းချုပ်ရေးက နောက်တစ်ဆင့် ဖြစ်ပေသည်။ သို့သော်လည်း သာမန်ဟွင်သွမ်းကမ္ဘာများဖြင့် ကွဲပြားလေ၏။

ဝူဟုန်၏ ထိန်းချုပ်ရေးအဆင့်က သာမန်ဟွင်သွမ်းကမ္ဘာ၏ အစစ်အမှန်ကောင်းကင်တာအိုနှင့် တူညီနေသင့်သည်။ ထို့အပြင် သူမက ထိုအဆင့်၏ ထိပ်သီးသို့ ရောက်ရှိနေပြီ ဖြစ်၏။ သူမက ထူးကဲသာလွန်မှုအဆင့်ထဲ ခြေတစ်လှမ်းဝင်ရောက်နိုင်သရွေ့ ထိုထိန်းချုပ်မှုအဆင့်ကို ရရှိနိုင်လိမ့်မည်။

ထိန်းချုပ်ရေး မြင့်မားတာကို ရပြီး ထူးကဲသာလွန်မှုတစ်ပိုင်းအဆင့်ရဖို့ ဖြစ်နိုင်မလား။ နမူနာအနေနဲ့ဆိုရင် စံပြတစ်ယောက်ရဲ့ စည်းမျဉ်းထိန်းချုပ်မှုက အရင်းအမြစ်ဟွင်သွမ်းကမ္ဘာရဲ့ အစစ်အမှန်ကောင်းကင်တာအိုအဆင့်ကို ရောက်သွားမယ်ဆိုရင် ဘယ်လိုဖြစ်သွားမှာလဲ။

ထိုအရာများကို ရေရွတ်ပြီးသည့်နောက်တွင် ဝမ်ဝေ့က ထိုလမ်းစဉ်သည် ဖြစ်နိုင်ကြောင်း ကောက်ချက်ချလိုက်သည်။ ထိုအရာက အရည်အချင်းမှတဆင့် ထူးကဲသာလွန်မှုကို ရယူသည့် ကဏ္ဍအောက်တွင် ပါဝင်နေ၏။

ဒီအကြံကတော့ ကောင်းတယ်။ ဒါပေမဲ့ တစ်ယောက်ယောက်က အဲဒီကို ဘယ်လိုလုပ် ရောက်နိုင်မှာလဲ။ သူတို့က အရင်းအမြစ်ကမ္ဘာရဲ့ ကောင်းကင်တာအိုဆီ တိုက်ရိုက်မဝင်ရောက်နိုင်သရွေ့တော့ မဖြစ်နိုင်ဘူး။ ဒီလိုနည်းစနစ်မျိုးက မိုးမြေရဲ့ စည်းမျဉ်းလုပ်ဆောင်မှုကို ဆန့်ကျင်ဘက်ဖြစ်သွားစေလိမ့်မယ်။

ထိုနည်းစနစ်မျိုးက ဖန်တီးဖို့ရာအတွက် လွယ်ကူသလို စိန်ခေါ်မှုလည်း ဖြစ်၏။ အကယ်၍ ကောင်းကင်တာအိုက ဂရုမစိုက်လျှင် ထိုလမ်းစဉ်က ဖြစ်နိုင်ပေသည်။ အကယ်၍ ကောင်းကင်တာအိုက တစ်စုံတစ်ယောက်အား သူတို့၏ အဓိကလျှို့ဝှက်ချက်များကို ချောင်းကြည့်ခွင့်မပြုပါက ထိုလမ်းစဉ်သည် လမ်းဆုံးနေပြီ ဖြစ်၏။

နောက်ထပ်နည်းလမ်းတစ်ခုကတော့ အရင်းအမြစ်ဟွင်သွမ်းကမ္ဘာ မဟုတ်တဲ့ဆီက အစစ်အမှန်ကောင်းကင်တာအိုတွေကို လေ့လာစောင့်ကြည့်တာပဲ။

ထိုကမ္ဘာပေါ် မူတည်၍ စံပြများက အရင်းအမြစ်ဟွင်သွမ်းကမ္ဘာ မဟုတ်သည့် ကောင်းကင်တာအိုများအပေါ် လွှမ်းမိုးနိုင်လိမ့်မည်။ ထိုချဉ်းကပ်မှုက ပိုမိုဖြစ်နိုင်လေ၏။ သို့သော်လည်း အောင်နိုင်ချေက ပိုမိုနည်းပါးသွားလေသည်။ အကြောင်းအရင်းကမူ အရင်းအမြစ်ကမ္ဘာမဟုတ်သည့် အစစ်အမှန်ကောင်းကင်တာအိုကို လေ့လာခြင်းမှ အရင်းအမြစ်ကမ္ဘာ၏ အစစ်အမှန်ကောင်းကင်တာအို ဖွဲ့စည်းတည်ဆောက်ပုံကို ကောက်ချက်ချဖို့ အချိန်များစွာ ကြာမြင့်လိမ့်မည်။

“ရှင် အာရုံများနေတာပဲ” ဝူဟုန်က ဝမ်ဝေ့ကို လက်သီးဖြင့် ထိုးချရင်း ပြောလိုက်သည်။

“ကျစ် မင်းရဲ့ ခန္ဓာကိုယ်က ဘာလို့ အဲ့လောက်တောင် အားကောင်းနေရတာလဲ။ မင်းက ဘယ်ခန္ဓာကိုယ်လေ့ကျင့်ရေးနည်းစနစ်ကို သုံးထားတာလဲ” ဝမ်ဝေ့က ညည်းတွားရင်း ပြောလိုက်သည်။

“မိုးမြေခန္ဓာလေ”

“ခန္ဓာဘိုးဘေးရဲ့ နည်းစနစ်လား”

“ဟုတ်တယ်။ ကျွန်မ အံ့ဖွယ်ခန္ဓာကိုယ်အဆင့်တုန်းက သူ ကမ္ဘာထဲမှာ ရှေ့ပြေးအနေနဲ့ ချန်ထားခဲ့တဲ့အမွေအနှစ်တစ်ခုကို တွေ့ခဲ့တယ်လေ။ အဲဒါ ကျွန်မရဲ့ စည်းပိတ်ရေးတာအိုနဲ့   အဆုံးသတ်ခဲ့လိုက်တာ” ဝူဟုန်က ရှင်းပြလိုက်သည်။

“အဲဒါက ကျင့်ကြံဖို့ ကမ္ဘာတွေ သုံးဖို့လိုတယ် မဟုတ်ဘူးလား”

“ကျွန်မက ပျက်စီးနေတဲ့ မဟာကမ္ဘာကို တွေးပြီးတော့ ကျင့်ကြံရေးအတွက် အသုံးပြုခဲ့တာလေ”

“အဲဒါဆို တက်လှမ်းလာပြီးတဲ့နောက်ရော။ တခြားနည်းစနစ်ကို ကျင့်ကြံခဲ့တာလား”

“မလိုဘူး။ ဒီနေရာမှာက ကျွန်မအတွက် အသုံးပြုဖို့ ဖျက်ဆီးခံထားရတဲ့ ကမ္ဘာတွေ ဒိုင်မေးရှင်းအများကြီး ရှိတယ်။ ကျွန်မအနေနဲ့ သူတို့ကို ခန္ဓာကိုယ်ထဲ စည်းပိတ်ပြီးတော့ ကျွန်မရဲ့ ခန္ဓာကိုယ်ကို လေ့ကျင့်ပေးဖို့ပဲ လိုတယ်။ နောက်ပိုင်းကျရင် စံပြဖြစ်လာပြီး ကမ္ဘာဦးဟွင်သွမ်းထဲ ဝင်သွားတဲ့နောက်မှာ မွေးဖွားလာကာစ ဟွင်သွမ်းကမ္ဘာတစ်ခုကို တွေ့လို့ စုပ်ယူခဲ့တာလေ”

“မင်းက ဘယ်လိုလုပ် ကိုယ့်ထက်တောင် ကံကောင်းနေရတာလဲ” ဝမ်ဝေ့က ညည်းတွားလိုက်သည်။

“ရှင်က ကံကြမ္မာရဲ့ သားတော်ဖြစ်ရင် ကျွန်မက ကံကောင်းမှုရဲ့ ချစ်မျက်ရှုလေးပဲ” ဝူဟုန်က ဂုဏ်ယူစွာ ပြောလိုက်သည်။

ဝမ်ဝေ့က ညည်းတွားလို၏။ သူက ကံကောင်းမှုအမြောက်အများရှိနေသော်လည်း ထူးကဲလှသည့် ကံအပြောင်းအလဲ အခွင့်အရေးများဖြင့် တွေ့ကြုံခဲ့သည်။ အကြောင်းအရင်းကမူ သူ့ကံကောင်းမှုက သူ့နောက်ခံဖြစ်သည့် တာအိုအခွင့်အလမ်းဂိုဏ်းအဖြစ် ပေါ်ထွက်လာ၍ ဖြစ်သည်။ ကျင့်ကြံရေးအတွက် သူလိုအပ်သည့် ရှားပါးပစ္စည်းအများစုကို ဂိုဏ်းဆီ တောင်းခြင်းဖြင့် ရယူနိုင်လေသည်။ ထို့ကြောင့် သူသည် ဝူဟုန်ထက် ကံကောင်းမှုနည်းပါးသလို မြင်နေရခြင်း ဖြစ်၏။ ထိုစဉ် သူမကမူ ဘာမှမရှိသည့်အနေအထားမှ မူလစည်းတံဆိပ်ကုန်းမြေကဲ့သို့ မျိုးဆက်တစ်ခုကို တည်ဆောက်ခဲ့ရသည်။ သူ့အနေဖြင့် ထိုကံအပြောင်းအလဲ အခွင့်အရေးများကို လိုအပ်ပေ၏။

“စကားပြောတာ တော်သင့်ပြီ” ဝူဟုန်က အလေးအနက် ပြောလိုက်သည်။

“ရှင်က တိုက်ခိုက်သူတစ်ယောက်အနေနဲ့ ဘယ်လောက်တောင် ဟာကွက်တွေ များနေလဲဆိုတာ သိလား”

“အဲ့လောက်ကြီး မဆိုးလောက်ပါဘူး” ဝမ်ဝေ့က သူ့ကိုယ်သူ ခုခံလိုက်၏။

“ကျွန်မ နည်းနည်း ပြောပြမယ်။ အရင်ဆုံးပတ်ဝန်းကျင်နဲ့ စတာပေါ့။ ရှင်က တိုက်ပွဲတွေထဲမှာ ပတ်ဝန်းကျင်ကို အသုံးချတတ်တယ်ဆိုတာ သေချာတယ်။  အဲဒီနည်းစနစ်က ရှင့်ရဲ့ လက်ရှိစွမ်းအားနဲ့  သက်ရောက်မှုရှိသေးတယ်လို့ ထင်နေတာလား” ဝူဟုန်က ပြောလိုက်သည်။

ဝမ်ဝေ့က သေချာ နားထောင်နေ၏။

“ကမ္ဘာဦးဟွင်သွမ်းက အသုံးချမှုအများကြီး ရှိတယ်” ဝူဟုန်က ဆက်ပြောလိုက်သည်။

“အဲဒါက အနှစ်သာရအပေါ်မှာ ထူးကဲတဲ့သက်ရောက်မှုမျိုးရှိတော့ ထိပ်တန်း မငြိမ်းသက်နိုင်ဖွယ် စံပြတွေကတောင် သူတို့က တိုက်ခိုက်ရင်းနဲ့ သူတို့ရဲ့ ခန္ဓာကိုယ်ကို လေ့ကျင့်ပေးမဲ့ နည်းစနစ်မျိုးကို ဖန်တီးကြလိမ့်မယ်။ တခြားနည်းနဲ့ပြောရမယ်ဆိုရင် တိုက်ပွဲက ကြာကြာတိုက်လေလေ သူတို့ပိုမိုတိုက်လေလေ သူတို့က ပိုအားကောင်းလေလေပဲ။

ပြီးတော့ သူတို့အဆင့်ရဲ့ ထိပ်သီးကို ရောက်ရှိနေတဲ့သူတွေအနေနဲ့တောင် အဲဒီနည်းစနစ်တွေက သူတို့ကို အားဖြည့်မှုအနည်းငယ် ဖြစ်လာစေလိမ့်မယ်။ သူမက အသုံးပြုမှုအများကြီးထဲက တစ်ခုပဲ ရှိသေးတယ်”

“အဲဒီအနေအထားမှာ ကျွန်မတို့ရဲ့ ခန္ဓာကိုယ်က အဆုံးမဲ့ သက်လုံ ရှိတယ်။ ပြောရမယ်ဆိုရင် ပြင်ပအင်အားတစ်ခု ဝင်ရောက်စွက်ဖက်မလာသရွေ့ပေါ့။ ရှင်သာ ရှင့်ခန္ဓာကိုယ်ကို အားနည်းစေမဲ့ တစ်စုံတစ်ခုကို တွေ့ခဲ့မယ်ဆိုတော့ ကမ္ဘာဦးဟွင်သွမ်းက ရှင့်ကိုယ်ရှင် ပြန်လည်အားဖြည့်ဖို့ အကောင်းဆုံးအရင်းအမြစ် တစ်ခုပဲ။ ကမ္ဘာဦးဟွင်သွမ်းအပေါ်မှာ အာရုံစိုက်ထားတာက မဟာတာအိုအရင်းအမြစ် အသုံးပြုမှုကိုလည်း သက်ရောက်မှုရှိစေတယ်။ အဲဒါဆိုရင် အရင်းအမြစ်ချီနေရာလွတ်က ချီတွေကို လုပ်ဆောင်နိုင်သလိုမျိုးပေါ့။ မကောင်းဆိုးဝါးနတ်ဘုရားတွေက အဲဒီနည်းစနစ်ရဲ့ ဆရာတွေပဲ။ ရှင် အဲဒါကို သင်ဖို့ လိုအပ်တယ်”

ဝမ်ဝေ့က မလုံမလဲ ပြုံးရင်း ခေါင်းညိတ်လိုက်သည်။

“မင်း ပြောချင်တာကို သဘောပေါက်ပြီ။ ဒါပေမဲ့ မင်းလည်း သိထားသင့်တယ် … ”

“ရှင့်ရဲ့ ကျင့်ကြံဆင့်က နိမ့်သေးတယ်ဆိုတာ သိတယ်။ ရှင်က ကမ္ဘာဦးဟွင်သွမ်းထဲကို မဝင်ဖူးသေးဘူး။ ဒါပေမဲ့ ရှင့်ရဲ့ ကံကြမ္မာက ရှင့်ကို ပြဿနာအများကြီးနဲ့ စောင့်ကြိုနေတယ်ဆိုတာကိုလည်း သိသင့်တယ်။ ရှင့်အနေနဲ့ မပြင်ဆင်ထားတဲ့ အနေအထားတစ်ခုကို တွန်းပို့ခံရမဲ့ အချိန်ရှိလာလိမ့်မယ်ဆိုတာကို ပြောနေဖို့တောင် မလိုဘူး”

“မင်း ပြောတာ မှန်တယ်”

“နောက်တစ်ခုက တိုက်ပွဲနဲ့ ပတ်သက်ပြီးတော့ စိတ်နေသဘောထားပဲ။ ကျွန်မ ပုံဖော်ပြတာ အကောင်းဆုံးပဲ” ဝူဟုန်က ဆက်ပြောလိုက်သည်။

ထို့နောက် သူမက လက်ဝှေ့ပြီး ဝမ်ဝေ့နှင့် တိုက်ခိုက်လိုက်သည်။ သူတို့၏ ထိပ်တိုက်ရင်ဆိုင်မှုအတွင်း ဝူဟုန်ဆီမှ လက်လေးဖက် ရုတ်ချည်းဆိုသလို ပေါ်ထွက်လာကာ ဝမ်ဝေ့၏ နံရိုးကို ထိုးချလိုက်သည်။ သူက သူ့ခန္ဓာကိုယ်ဝန်းကျင်တွင် ခုခံမှုအနေဖြင့် စက်ကွင်းတစ်ခုကို ဖန်တီးထားပြီး ကြောက်မက်ဖွယ် လက်သီးချက်လေးခုကို ပိတ်ဆို့နိုင်ခဲ့သည်။ သို့သော်လည်း ဝူဟုန်၏ ကျောဖက်မှ ထူးထူးဆန်းဆန်း ကင်းမြီးကောက် အမြီးတစ်ခု ပေါ်ထွက်လာကာ ခုခံမှုကို ထိုးခွင်းလာ၏။

 ဝမ်ဝေ့က ခုခံတော့မည့်ဆဲဆဲတွင် သူမ၏ ဆံပင်က ရုတ်ချည်းဆိုသလို ရှည်လျားလာပြီး သူ့ကို ဖမ်းဆီးလိုက်သည်။

“ကျွန်မတို့တွေက လူသားမဆန်ဘူး။ တိုက်ပွဲတွေက ကျွန်မတို့ လူသားအသွင်နဲ့ပဲ ကန့်သတ်ခံထားရမှာ မဟုတ်ဘူး။ ကျွန်မတို့ခန္ဓာကိုယ်ရဲ့ အစိတ်အပိုင်းတိုင်းက လက်နက်ပဲ။ ကျွန်မက တစ်ခါတုန်းက စံပြတစ်ယောက်ကို တံတွေးနဲ့ နှိမ်နင်းဖူးတယ်။ အနည်းဆုံးတော့ သူမက မမျှော်လင့်ထားဘူးပေါ့။ ကျွန်မရဲ့ တံတွေးကို မိုးမြေကြားထဲ တိုက်စားနိုင်ဆုံးအရာအဖြစ် ပြောင်းလဲခဲ့တာ။ သူမရဲ့ ခန္ဓာကိုယ်နဲ့ ဝိညာဉ်ကို အရည်ပျော်သွားစေခဲ့တယ်လေ”

ဝမ်ဝေ့က ဆွံ့အသွားလေ၏။ တစ်စုံတစ်ယောက်ထံ ရှုံးနိမ့်သွားသည်က ကိစ္စတစ်ခု ဖြစ်သည်။ တစ်စုံတစ်ယောက်၏ တံတွေးထဲ ရှုံးနိမ့်သွားသည်က နောက်ထပ်ကိစ္စတစ်ခု ဖြစ်ပေသည်။

ဤကဲ့သို့ အရှက်ကွဲမှုသည် စံပြသည် သူမ အသက်ပြန်ရှင်လျှင် မည်သို့ ခံစားရမလဲ သူ စဉ်းစားကြည့်နေမိသည်။

“အဲဒါကို ထူးဆန်းတယ်လို့ မထင်နဲ့။ ရှင် မကောင်းဆိုးဝါးနတ်ဘုရားတွေနဲ့ တိုက်ခိုက်တဲ့အချိန်မှာ လူသားမဆန်တဲ့ လူသားအသွင် သက်ရှိတွေက တိုက်ခိုက်ဖို့ ဘယ်လောက် ထူးဆန်းလဲဆိုတာကို သဘောပေါက်လာလိမ့်မယ်။ ကျွန်မက သူတို့ရဲ့ မုတ်ဆိတ်ကို ပြင်းထန်တဲ့ အာကာပြင်စွမ်းအားနဲ့ ကျင့်ကြံထားတဲ့ မကောင်းဆိုးဝါးနတ်ဘုရားကြောင့် သေလုနီးပါးဖြစ်ခဲ့သေးတယ်။ သူက ကျွန်မရဲ့ မသိတတ်မှုကို အခွင့်ကောင်းယူပြီးတော့ သူ့မုတ်ဆိတ်ကနေ ထက်ရှတဲ့ အာကာပြင်စွမ်းအားတွေ ထုတ်လွှတ်လာတာလေ။ ကျွန်မကို မပြီးမပြတ်အခြေအနေထဲ ရောက်စေတော့မလို့ပဲ”

“ကိုယ် သတိထားပါ့မယ်” ဝမ်ဝေ့က ခေါင်းညိတ်လိုက်သည်။

“ရှင့်ဆီမှာ စံပြအသုံးအဆောင်ပစ္စည်း ဘယ်လောက် ရှိလဲ” ဝူဟုန်က ရုတ်ချည်းမေးလိုက်သည်။

“တစ်ခုမှ မရှိဘူး” ဝမ်ဝေ့က ပြန်ဖြေလိုက်ပြီး သူမအား ထူးထူးဆန်းဆန်း ကြည့်လိုက်သည်။

“ဒါက ပြဿနာပဲ။ စံပြအဆင့်မှာ ရှင့်ရဲ့ ဝိညာဉ်က လက်နက်အများကြီးကို ထိန်းချုပ်ဖို့ အားကောင်းတယ်။ ဆိုလိုတာက ရှင့်အနေနဲ့ တာအိုသက်သေပြပစ္စည်းကိုပဲ မှီခိုနေဖို့ မလိုဘူး။ တကယ်တော့ စံပြအများစုက သူတို့ရဲ့ ဝှက်ဖဲအနေနဲ့ တစ်ခါသုံး စံပြပစ္စည်းတွေကို သန့်စင်ကြတယ်”

“တစ်ခါသုံးလား”

“ဟုတ်တယ်။ သူတို့က ပစ္စည်းရဲ့ ရှည်ကြာမှုကို အဆုံးစွန်စွမ်းအားအတွက် စတေးထားတာ” ဝူဟုန်က ခေါင်းညိတ်လိုက်သည်။

“တခြားနည်းနဲ့ပြောရမယ်ဆိုရင်တော့ စံပြတစ်ယောက်က ဘယ်လောက်အားကောင်းလဲဆိုတာကို ချမ်းသာကြွယ်ဝမှုနဲ့ တိုင်းတာလို့ ရတာပဲ” ဝမ်ဝေ့က  သက်ပြင်းချလိုက်သည်။

“အဲဒါကြောင့် စံပြအများစုက အင်အားစုတစ်ခု ဒါမှမဟုတ်ဘူးဆိုရင်လည်း သူတို့ကိုယ်ပိုင် တည်ဆောက်ပြီးတော့ ချမ်းသာကြွယ်ဝမှုတွေကို အုပ်စိုးကြတာပေါ့” ဝူဟုန် ခေါင်းညိတ်လိုက်သည်။

“ရှင့်အနေနဲ့ ကိုယ်ပိုင်အသုံးအဆောင်ပစ္စည်း ထိန်းချုပ်ရေးနည်းစနစ်လည်း ဖန်တီးဖို့ လိုအပ်လိမ့်မယ်။ ရှင့်ရဲ့ တာအိုက မလုံလောက်သေးဘူးဆိုပေမဲ့ ဝိညာဉ်ကတော့ လိုအပ်ချက်နဲ့ ကိုက်ညီတယ်”

“မင်းရဲ့ စုဆောင်းမှုကို ကြည့်လို့ရမလား”

“ရှင် စာကြည့်တိုက်မှာ ရှာကြည့်လို့ရတယ်။” ဝူဟုန်က ပြန်ဖြေလိုက်သည်။

“ကောင်းပြီ။ နောက်ထပ်ဟာကွက်တွေကရော”

“ကျွန်မတို့တွေ ပြောကာစပဲ ရှိသေးတယ်။ ရှင်က တိုက်ခိုက်တဲ့အခါမှာ ခြေထောက်ထက် လက်ကို ပိုပြီးတော့ အလေးပေးတယ်ဆိုတာကို သတိထားမိတယ်။ အဲ့လိုမျိုးစိတ်ထားမျိုးက ရှင့်ရဲ့ တိုက်ကွက်တွေကို ခန့်မှန်းရ ပိုပြီးလွယ်ကူစေတယ်။ ပြောရမယ်ဆိုရင်တော့ ခန့်မှန်းတယ်ဆိုမှ ရှင်က အများကြီးလည်း အတွေးလွန်လွန်းတယ်။ ရှင်က နောက်ထပ် ခြေလှမ်း သုံးလှမ်း၊ ငါးလှမ်းလောက် ကြိုတင်စဉ်းစားတာလေ”

“အဲဒါနဲ့ ပတ်သက်ပြီး တစ်ခုခုများ မှားနေလို့လား”

“တိုက်ပွဲ ၉၉ရာခိုင်နှုန်းမှာ ဒီနည်းလမ်းက ချဉ်းကပ်လို့ အကောင်းဆုံးပဲ။ ဒါပေမဲ့ ရှင့်ရဲ့ လှုပ်ရှားမှုတွေကို ပိုပြီးခန့်မှန်းနိုင်တဲ့သူ တစ်ယောက်နဲ့တွေ့တယ်ဆိုရင် ဘာဖြစ်သွားမှာလဲ” ဝမ်ဝေ့က သူ့ထက် ခန့်မှန်းနိုင်သည့်သူ မရှိနိုင်ကြောင်း ပြောလိုသော်လည်း သူ့ရှေ့တွင်ရှိသည့်သူက သူ့ထက် ပိုမိုကောင်းမွန်နေကြောင်း သတိထားမိသွားသည်။

ဤအချိန်တိုအတွင်း ဝူဟုန်က သူ့ခန့်မှန်းချက်များထက် အမြဲတမ်း တစ်လှမ်း ကြိုမြင်နေလေသည်။

“အလိုလိုသိစိတ်ပဲ” ဝမ်ဝေ့က ရေရွတ်လိုက်၏။

“ဟုတ်တယ်။ ရှင့်အနေနဲ့ သုံးသပ်ပြီး [တိုက်ခိုက်တဲ့ အနေအထား] နဲ့ [စစ်မှန်တဲ့ အလိုလိုသိစိတ် တိုက်ခိုက်ရေး အနေအထား]ကြားမှာ ပြောင်းလဲနိုင်ဖို့ သင်ယူဖို့ လိုတယ်”

“ကိုယ် နားလည်ပြီ”

“ရှင့်ရဲ့ အကြီးမားဆုံး အားနည်းချက်က ရှင့်ရဲ့ ဝိညာဉ်ပဲ”

“တကယ်ကြီးလား”

သူက စိတ်ပျက်လက်ပျက် ခေါင်းယမ်းလိုက်သည်။

“တိုက်ပွဲတစ်ခုလုံးမှာ ကျွန်မ ရှင့်စိတ်ကို ဖတ်နေတယ်ဆိုတာကို သတိမထားမိဘူးလား”

ဝမ်ဝေ့၏ အမူအရာက ပျက်ယွင်းသွားလေသည်။

“ရှင်က တိုက်ပွဲထဲမှာ ရှင့်ဝိညာဉ်အကြောင်း စိုးရိမ်စရာ မလိုတာကို နေသားကျနေတာ။ အဲဒါကြောင့် ကျွန်မလိုမျိုးလူနဲ့ တွေ့လာတဲ့အခါ ရှင့်က အသုံးမဝင်တော့တာပဲ”

“ဒါပေမဲ့ ကိုယ့်ဝိညာဉ်ကို လေ့ကျင့်ထားပါတယ်” ဝမ်ဝေ့က မျက်နှာအဖတ်ဆယ်သည့် အနေဖြင့် ပြောလိုက်သည်။

“ဒါပေမဲ့ ရှင့်ထက် အားနည်းတဲ့သူတွေအတွက်ပဲ အလုပ်ဖြစ်မှာလေ။ ရှင်နဲ့ ဝိညာဉ်အဆင့်ချင်းတူတဲ့သူကို တစ်ခါမှ ရင်မဆိုင်ဖူးဘူး။ ရှင့်ထက် အားကောင်းတဲ့သူဆိုရင် ပြောဖို့တောင် မလိုတော့ဘူး။ တိထျန်းနဲ့ ရင်ဆိုင်ပြီးတော့ ရှင် ရှုံးနိမ့်ပြီးတဲ့နောက်မှာ ဘယ်လိုတိုးတက်လာတယ်ဆိုတာကို ပြောပါဦး”

“ကိုယ့်ရဲ့ ဘဝမှာ အကြီးမားဆုံး တိုးတက်မှုပဲ”

“အတိအကျပဲ။ ဝိညာဉ်တိုက်ပွဲအတွက် တူညီတဲ့ အဆင့်အနေအထားရှိထားတဲ့ ပြိုင်ဘက် မရှိဘဲနဲ့ ရှင့်အနေနဲ့ အောင်မြင်မှုမျိုးကို ရဖို့ ဘယ်လိုများ မျှော်လင့်နေရတာလဲ”

ဝူဟုန်၏ အမြင်တွင် ဝမ်ဝေ့၏ ဝိညာဉ်အောင်မြင်မှုများက ကောင်းမွန်သော်လည်း ဤမျှသာ ဖြစ်၏။ သူမ အဆင့်လို ပညာရှင်မျိုးအနေဖြင့် သူ ဝိညာဉ်တိုက်ခိုက်ရေး အတွေ့အကြုံ လစ်ဟာနေမှုထဲ ဟာကွက်ကို ရှင်းရှင်းလင်းလင်း မြင်တွေ့နိုင်သည်။