အခန်း (၄၄၁)

ကျိုးဟန်ဖုန်း၏ခါးတွင် အဝတ်ဗလာ ကျင်းနေသည်။ ဖောင်းပွလာသော အရေပြားပေါ်တွင်လည်း ထူးဆန်းသော အမှတ်အသားများ ရှိနေပြီး ထိုနေရာမှ ခပ်မှိန်မှိန် အလင်းတန်းများ ထွက်ပေါ်လာနေသည်။ သူတို့ကတော့ နဂါးပျံများထက် မကောင်းဆိုးဝါးဝိညာဉ်များနှင့် ပို၍တူညီနေခဲ့၏။

သူ၏အစိမ်းရင့်ရောင် မျက်လုံးများထဲတွင် သွေးရောင်အလင်းတန်း အနည်းငယ် ရှိနေပြီး ရေခဲစွမ်းအင်များနှင့် ကြောက်မက်ဖွယ်ရာ သတ်ဖြတ်ချင်စိတ်များ ပြည့်နှက်နေသည်။ အသက် တစ်ကြိမ် ရှူလိုက်သည့်အချိန်တိုင်း သူတို့၏ပတ်ပတ်လည်တွင် ရှိနေသော အလင်းတန်းများက မှေးမှိန်သွား၏။

စုစည်းနေသော အနက်ရောင် တိမ်တိုက်များနှင့် မတူသည်မှာ ထိုအရာက ပို၍သိပ်သည်းလွန်းလှပြီး ကောင်းကင်ကြီးပေါ်တွင် လွှမ်းခြုံထားသော အနက်ရောင် အငွေ့များကဲ့သို့ ဖြစ်နေ၏။ အကယ်၍ သူ့ကို နှိုင်းယှဉ်ကြည့်လိုက်မည်ဆိုလျှင် ထိုအရာက ယခင်တစ်ခေါက် မုန့်ချီတို့ သွားခဲ့ဖူးသော နတ်ဆိုးကမ္ဘာအပိုင်းအစနှင့် တူညီနေသည်ဟု ပြောရပါလိမ့်မည်။

ဖိအားများကို ဖယ်ရှားရန်အတွက် မုန့်ချီ၏ ခန္ဓာကိုယ်ထဲမှနေ၍ ရွှေရောင်အလင်းတန်းများ ထွက်ပေါ်လာပြီး အနက်ရောင် အငွေ့များကို ခုခံလိုက်၏။

အနက်ရောင်အငွေ့များက ကျန်ရှိနေသော သစ်ပင်များကို ညှိုး‌ခြောက်သွားစေပြီး ကျောက်ခဲများကို ဖုန်မှုန့်များအဖြစ် ပြောင်းလဲသွားစေသည်။ မြေပြင်ကြီးပေါ်တွင်လည်း အက်ကွဲကြောင်းများ ပေါ်လာစေခဲ့၏။ သေဆုံးနေသော မြွေများ ၊ ကြွက်များနှင့် ပိုးကောင်များကလည်း မြေပြင်ပေါ်တွင် ပျံ့နှံ့နေသည်။ ထွက်ပြေးခဲ့ခြင်း မရှိသော သာမန်လူများကပင် မြေပြင်ပေါ်တွင် လဲကျသေဆုံးသွားခဲ့ပြီး သူတို့၏ ခန္ဓာကိုယ်ထဲမှနေ၍ အစိုဓာတ်များ စုပ်ယူခံလိုက်ရသလို အသားအရည်များက ရှုံ့တွနေခဲ့သည်။

သူက တူဟိုင်ရှန့်ကို စိုက်ကြည့်လိုက်၏။ တူဟိုင်ရှန့်ဆီတွင် ကြီးမားသော လက်တစ်စုံရှိနေသလို ကျောက်တုံးများ ၊ သတ္တုများကိုပင် အရည်ပျော်ကျသွားစေနိုင်သော အပူရှိန်များ ခံစားမိနိုင်ပြီး ယင်ကို ယန်အဖြစ် ပြောင်းလဲနိုင်သော အစွမ်းတစ်ခု ရှိသည်။

ကျိုးဟန်ဖုန်းက လေထဲတွင် ရပ်နေရင်း ညာဘက်လက်ကိုမြှောက်၍ နဂါးလက်သည်းနှင့် တူညီသော အဖိုးတန်လက်နက်ကို ကိုင်လိုက်သည်။ ထို့နောက် သူက လက်သီးနှင့် ထိုးလိုက်၏။ ထိုလက်သီးချက်က အပြာရင့်ရောင်ကဲ့သို့ဖြစ်နေပြီး မကောင်းဆိုးဝါးတစ်ကောင်ကဲ့သို့ အေးစက်လှသည်။

တစ်ချိန်တည်းတွင် ကျိုးဟန်ဖုန်း၏ ခန္ဓာကိုယ် မျက်နှာပြင်ပေါ်၌ အပြာရောင် ကြေးခွံများက ပေါ်လာပြီး ခေါင်းမှ ခြေဖျားထိအောင် လွှမ်းခြုံနေခဲ့သည်။ ထိုအရာက လူသားပုံသဏ္ဍာန် နဂါးတစ်ကောင်ကဲ့သို့ ဖြစ်နေ၏။ သူ၏သွေးမျိုးဆက် စွမ်းအားများကလည်း ကန့်သတ်ချက်တချို့ကို ချိုးဖောက်နိုင်သွားပုံသည်။

"ဘုန်း... "

လက်သီးနှင့် တိုက်ခိုက်လိုက်သည့်အချိန်တွင် အနီရောင်ရေခဲများက နည်းနည်းချင်းဆီအေးခဲလာပြီး အလွန်လှပသော ရေခဲရုပ်တု ဝင်္ကပါတစ်ခုကို မြင်တွေ့ရသည်။

တူဟိုင်ရှန့်ကတော့ နောက်သို့ လွင့်သွားပြီး လမ်းတလျှောက်တွင် မီးတောက်များ ကျန်နေခဲ့၏။ သူ၏ခန္ဓာကိုယ်တစ်ဝက်က အပြာရင့်ရောင် အလင်းတန်းများ ပြည့်နှက်နေပြီး တခြားတစ်ဝက်ကတော့ အနက်ရောင် အငွေ့များ လွှမ်းခြုံနေသည်။ သူက တည်ငြိမ်နေနိုင်ခြင်း မရှိတော့ဘဲ အံ့ဩမှင်တက်သွားပုံရ၏။

"ဒါ ဒါက ဘယ်လိုဖြစ်ရတာလဲ... ။ ကျိုးဟန်ဖုန်းရဲ့အစွမ်းက ဒီလောက်အဆင့်ထိ ဘယ်လိုဖြစ်ပြီး မြင့်တက်သွားရတာလဲ... ။ ဒါက မြေပြင်လှေကားအဆင့် (၉) မဟုတ်တော့ဘူး... ။ သူက မြေပြင်လှေကားအဆင့် (၆) ကို ရောက်ခါနီးနေပြီ။ သူ့ရဲ့ခန္ဓာကိုယ်ကလည်း မကောင်းဆိုးဝါး သွေးမျိုးဆက်တွေကြောင့် အသွင်ပြောင်းလာပြီ။ ဘယ်အရာက သူ့ကို ဒီလောက်ထိ အစွမ်းထက်အောင် လုပ်ပေးလိုက်တာလဲ... "

ကျိုးဟန်ဖုန်း၏ နဖူးမှနေ၍ အဖုကြီး (၂) လုံး ထွက်လာနေသည်။ သို့သော် သူတို့က အရေပြားကို ထိုးဖောက်လာခြင်းတော့ မရှိချေ။ သူက ဘယ်လက်နှင့် အပြာရောင် မုတ်ဆိတ်‌မွှေးကို သပ်လိုက်ပြီး လက်သီးနှင့် ထိုးလိုက်၏။ သူက ရှားရှားပါးပါးပြုံး၍ ပြောလိုက်သည်။

"ဆရာကြီးရင်ရဲ့ အနှစ်သာရတွေက တကယ့်ကို ကြီးမြတ်လွန်းတယ်... ။ သူတို့က ခန္ဓာကိုယ်နဲ့ စိတ်ဝိညာဉ်ကို နှိပ်စက်ပေမယ့် အကျိုးအမြတ်က တော်တော်ကြီးတယ်... "

သူက ပြောလိုက်၏။

"ငါက မင်းကို သိုင်းကွက် (၃) ကွက်အတွင်း အနိုင်ရနိုင်တယ်... "

ထိုအရာက အဆင့်တူ အချင်းချင်း ပြောနေသော စကားလုံးမျိုး မဟုတ်တော့ပေ။ သူက တူဟိုင်ရှန့်ကို နာမည်မရှိသော လူတစ်ယောက်အဖြစ် သတ်မှတ်ထားသလို ပုံစံမျိုးဖြစ်နေသည်။

သူက လေထဲသို့ ပျံသန်းသွားပြီး တူဟိုင်ရှန့်ဆီသို့ ဆင်းသက်လာခဲ့၏။ လက်သီးတစ်ဖက်က အပြာရင့်ရောင် အလင်းတန်းများ တောက်ပနေပြီး တခြားတစ်ဖက်က အနက်ရောင် အလင်းတန်းများ တောက်ပနေသည်။ သူတို့က မိုးရေစက်များကဲ့သို့ တောက်လျှောက် ကျဆင်းလာခဲ့၏။ အနက်ရောင် အငွေ့များကဲ့သို့ ကြိုးများကလည်း လေထုကြီးထဲတွင် စုစည်းလာပြီး ကြောက်စရာကောင်းသော စွမ်းအားများ ပြည့်နှက်နေသည်။

တူဟိုင်ရှန့်က ပင့်သက်ရှိုက်လိုက်မိပြီး သူ၏ခန္ဓာကိုယ်ထဲမှနေ၍ ရွှေရောင်အလင်းတန်းများ တောက်ပလာခဲ့၏။ သူက နေလုံးလေးတစ်စင်းကဲ့သို့ ဖြစ်နေပြီး အနက်ရောင်အငွေ့များကို ဖယ်ထုတ်၍ အပြာရင့်ရောင် ရေခဲများကို ပျော်ကျသွားစေခဲ့သည်။

သူက လက် (၁၀) ချောင်းကိုသုံးပြီး ပုံသဏ္ဍာန်များ ပြောင်းလဲ၍ ကမ္ဘာကြီး၏ အနှစ်သာရများကို ဖော်ထုတ်လိုက်၏။ ထိုအချိန်တွင် နေရောင်ခြည်တစ်ခုက အမှောင်ထုကြီးကို ဖြတ်ကျော်ပြီး တူဟိုင်ရှန့်၏ ခန္ဓာကိုယ်ပေါ်၌ ထွန်းလင်းတောက်ပနေခဲ့သည်။

သူ့နောက်တွင်တော့ နေလုံးကြီးတစ်ခု စုစည်းလာပြီး ထိုနေလုံးကြီးထဲတွင် ခြေ (၃)ချောင်း ငှက်တစ်ကောင် ရှိနေသည်။ ထိုအရာက ပုံရိပ်ယောင်ခန္ဓာ၏အစွမ်း ဖြစ်သည်။

သေခြင်းရှင်ခြင်း လျှို့ဝှက်တံခါး ပွင့်သွားပြီးနောက် သူတို့က အပြင်ပိုင်းကမ္ဘာကြီးနှင့် ချိတ်ဆက်နိုင်ပြီး ပုံရိပ်ယောင်ခန္ဓာကိုယ်ကို အစစ်အမှန် ဖြစ်လာအောင် စုစည်း၍ ရနိုင်သည်။ ကောင်းကင်သိစိတ်ဟူသည်မှာ ပြိုင်ဘက်ကင်းပြီး အစွမ်းများကလည်း အံ့သြစရာကောင်း၏။

ထိုအရာက ရွှမ်ပိုင်၏ ကစ္စတီဂါဗဗုဒ္ဓပုံစံ ၊ ဆူးခြုံမည်းကြယ်၏ တိုက်ခိုက်ရေးပုံစံ ၊ စုဝူမင်၏ အထွဋ်အထိပ်ဓားခန္ဓာ ၊ ဟယ်ကျူး၏ သဏ္ဍာန်မဲ့ဓားချီစွမ်းအင်နှင့် ဝမ်စစ်ယွမ်၏ သတ္တဂတဗုဒ္ဓပုံစံတို့ကဲ့သို့ ဖြစ်သည်။

အကယ်၍ တစ်စုံတစ်ယောက်ကသာ ဗုဒ္ဓလက်ဝါးကို လေ့ကျင့်လိုက်မည်ဆိုလျှင် သူ၏တိုက်ခိုက်မှု တစ်ခုချင်းဆီတိုင်းတွင် ဗုဒ္ဓပုံရိပ်များ ပေါ်လာနိုင်ပြီး ရွှေကိုယ်တော်ဗုဒ္ဓအဖြစ်ကို သေချာပေါက် ရရှိနိုင်သည်။ သို့သော် ပုံရိပ်ယောင်ခန္ဓာ မည်သို့ပေါ်လာမလဲ ဟူသည့် ပုံစံများက ကွဲပြားမှုများ ရှိနေ၏။

အချိန်ကြာလာသည်နှင့်အမျှ သူတို့က တဖြည်းဖြည်း ပို၍ထင်ရှားလာနိုင်သည်။ တခြားသော ပုံရိပ်ယောင်ခန္ဓာများကတော့ ဓမ္မကာရအဆင့် ပညာရှင်များဆီတွင် တွေ့နိုင်ပြီး သူတို့ကတော့ အဆင့်တိုးတက်မှုများနှင့် ရှားပါးသော စွမ်းရည်များအပေါ် မူတည်နေသည်။

သို့သော် ထိုပုံသဏ္ဍာန်များက ကနဦးအခြေအနေတွင် တည်ငြိမ်မှုမရှိဘဲ အချိန်ကြာမြင့်စွာ သုံးလိုက်လျှင် သူတို့၏ အုတ်မြစ်ကို ထိခိုက်နိုင်သည်။ ထို့ကြောင့် ကောင်းကင်လှေကားကို ဖြတ်ကျော်နိုင်ခြင်း မရှိသရွေ့ ဝေ့ကျင်းအဆင့် ပညာရှင်များက ဓမ္မကာရအဆင့်ကို ရောက်မှသာ ရှားရှားပါးပါး အသုံးပြုတတ်ကြသည်။

နတ်ဘုရားအမွေအနှစ်များကို လေ့ကျင့်ထားသော မျိုးဆက်များကလည်း အလားတူသာ ဖြစ်သည်။ ကန့်သတ်ချက်တချို့ကို ချိုးဖျက်လိုက်ပြီးနောက် သူတို့၏မွေးရာပါ သွေးမျိုးဆက်က ကမ္ဘာမြေကြီးကို လှုံ့ဆော်နိုင်ပြီး နတ်ဘုရားများ၏ ပုံရိပ်ရှိနေသော သွေးမျိုးဆက်ကို ထုတ်ဖော်နိုင်သည်။

ထိုအရာက အရေးကြီးသော အခြေအနေတစ်ရပ်ဖြစ်ပြီး တူဟိုင်ရှန့်က ထိုအရာကို များများအသုံးမပြုနိုင်ပေ။ သူက သွေးမျိုးဆက်ကို လှုံ့ဆော်ပြီး ပုံရိပ်ယောင် နေလုံးပုံစံကိုသာ ပြသနိုင်သည်။

"ဖျက်ဆီးလိုက်စမ်း…"

သူက ကျယ်လောင်စွာ အော်ဟစ်လိုက်ပြီး လက် (၂) ဖက်ကို တွန်းထုတ်လိုက်၏။

ထိုအခါ ရွှေကျီးကန်းက အတောင်ပံများကိုဖြန့်လာပြီး နေလုံးကြီးကလည်း သူ၏ခန္ဓာကိုယ်ပေါ်တွင် ပေါ်လာခဲ့သည်။ တခဏအတွင်း တောက်ပသော အလင်းရောင်များက အမှောင်ထုကြီးကို ဖြတ်ကျော်ပြီး ရေခဲအလွှာများကို အရည်ပျော်ကျသွားစေခဲ့သည်။ အနက်ရောင် အငွေ့များကိုလည်း ရှင်းပစ်လိုက်၏။

"တိုက်ကွက်ကောင်းပဲ…"

ကျိုးဟန်ဖုန်းက အံ့သြသွားသော်လည်း သူ၏အမူအရာက ပြောင်းလဲသွားခဲ့ခြင်း မရှိပေ။ သူက တူညီသော သိုင်းကွက်များကိုသာသုံးပြီး တူဟိုင်ရှန့်နှင့် ဆက်၍ တိုက်ခိုက်နေခဲ့၏။

"ဗုန်း... "

လေထဲတွင် ပေါက်ကွဲမှုကြီးများ ထွက်ပေါ်လာပြီး မှိုပွင့်ပုံသဏ္ဍာန် တိမ်တိုက်ကြီးများ ထွက်ပေါ်လာသည်။ လူတစ်ယောက်ကလည်း မြေပြင်ပေါ်တွင် ရှိနေသော တွင်းပေါက်ကြီးထဲသို့ ပြုတ်ကျသွားခဲ့၏။ ထိုအရာကတော့ တူဟိုင်ရှန့် ဖြစ်သည်။

တူဟိုင်ရှန့်၏ ခန္ဓာကိုယ်က လေထဲသို့ မြောက်တက်သွားပြီးနောက် မြေပေါ်သို့ အရှိန်ပြင်းစွာ ပြုတ်ကျသွားခြင်း ဖြစ်၏။ သူ၏နှုတ်ခမ်းထောင့်မှနေ၍ အနက်ရောင်သွေးများ စီးကျလာနေပြီး ထိုအရာများက အပြာရင့်ရောင်ပြောင်း၍ အေးခဲသွားခဲ့၏။

သူက အရာအားလုံးကို အသုံးပြုခဲ့သော်လည်း ကျိုးဟန်ဖုန်း၏ တိုက်ခိုက်မှုတစ်ခုကိုပင် ခံနိုင်ရည် မရှိတော့ပေ။ အကယ်၍ သူတို့ကသာ လေထဲ၌ တိုက်ခိုက်နေခြင်း မဟုတ်လျှင် ထိခိုက်မှုများက မိုင်ပေါင်းများစွာတွင် ရှိနေသော အရာအားလုံးကို လုံးဝဖျက်ဆီးပစ်နိုင်သည်။ လှုပ်ရှားမှုများက ပတ်ပတ်လည်သို့ ပျံ့နှံ့သွားပြီး တိမ်တိုက်များကို လွင့်ပါးသွားစေခဲ့၏။ ကျိုးဟန်ဖုန်း၏ ခန္ဓာကိုယ်ပေါ်တွင် ရွှေရောင်မီးတောက်များ တောက်လောင်နေသော်လည်း ထိုအရာများက အပြာရင့်ရောင် အကြေးခွံများကိုသာ လောင်ကျွမ်းသွားစေနိုင်သည်။

ရွှေရောင်မီးတောက်များ ပျောက်ကွယ်သွားတော့မည့်အချိန်တွင် ကျန်းကျိဝေက လှုပ်ရှားလိုက်၏။ သူမက နံရံကို ကျော်လာပြီး လေထဲသို့ ခုန်တက်လိုက်၏။ ထို့နောက် ညှိုးခြောက်နေသော သစ်ပင်ကြီးကို ခြေထောက်နှင့် ကန်လိုက်ပြီး ဓားရှည်နှင့် အရှိန်ပြင်းစွာ လှမ်းထိုးလိုက်သည်။

ညှိုးခြောက်နေသော သစ်ပင်ကြီးက သူမ ထိလိုက်သည့်အချိန်တွင် ဖုန်မှုန့်များအဖြစ် ပြောင်းလဲသွားခဲ့၏။ ‌ဓားက လင်းလက်တောက်ပလာပြီး ကမ္ဘာကြီးက မှေးမှိန်လာသည်။ အရိပ်ထက်ပင် ပို၍မှောင်လာသေးသည်။ အလင်းတန်းများ အားလုံးက တစ်နေရာတည်းတွင် စုစည်းသွားပြီး မိန်းမလှလေးနှင့်အတူ ပေါင်းစပ်သွားခဲ့သည်။

ကမ္ဘာမြေကြီးက အရာအားလုံးကို မေ့လျော့သွားသည့်အလား ငြိမ်သက်သွားခဲ့သည်။ ဤကမ္ဘာကြီးထဲတွင် ဓားအလင်းတန်း တစ်ခုတည်းသာ ရှိနေခဲ့၏။ ဓားချီစွမ်းအင်များ ထွက်ပေါ်လာပြီး တိမ်တိုက်များ ပြည့်နှက်လာသည်။ အဝေးမှ ကြည့်လိုက်လျှင်ပင် ထိုဓားက အမှောင်ထုကြီးကို ထက်ပိုင်းဖြတ်ပစ်လိုက်ကြောင်း ရှင်းရှင်းလင်းလင်း မြင်လိုက်၏။ မြေပြင်ပေါ်တွင်လည်း ချီစွမ်းအင်များ ထွက်ပေါ်လာသည်။

ကျိုးဟန်ဖုန်းက တူဟိုင်ရှန့်၏ တိုက်ခိုက်မှုကို ယခုလေးမှ ခုခံလိုက်ခြင်းဖြစ်ပြီး မီးတောက်များကို ငြှိမ်းသတ်ရန် အခွင့်အရေး မရှိသေးပေ။ ထိုအချိန်တွင် သူ၏ပင်မဝိညာဉ်က လှုပ်ရှားသွားခဲ့ရ၏။ ဓားအလင်းတန်း ထွက်ပေါ်လာပြီး သူ့ကို တိုက်ခိုက်လိုက်သည့်အချိန်တွင် သူက ထွက်ပြေးနိုင်ခြင်း မရှိသလို ထွက်ပြေးချင်စိတ်လည်း မရှိချေ။

သို့သော် သူ၏လက်ရှိစွမ်းအားများက ခန္ဓာကိုယ်ပေါ်တွင် လောင်ကျွမ်းနေသော ရွှေရောင်မီးတောက်များနှင့် ပေါင်းစပ်ပြီး ထူးခြားသော အခြေအနေတစ်ရပ် ဖြစ်နေ၏။ သူက အခြေခံအကျဆုံး တိုက်ခိုက်မှုကိုပင် ခုခံနိုင်ရန် အစွမ်းမရှိမှာ စိုးရိမ်နေခဲ့သည်။ သူက လက်တစ်ဖက်ကို မြှောက်လိုက်ပြီး ‌ဓားသွားကို သူ၏လက်ဝါး အလယ်နှင့် ခုခံလိုက်၏။

"ဖျောက်…."

လက်ဝါးအလယ်တွင် ရှိနေသော ကြေးခွံတွင် အပေါက်တစ်ခု ဖြစ်ပေါ်လာပြီး အပြာရောင် သွေးစက်တစ်စက် စီးကျလာသည်။

ကျန်းကျိဝေကတော့ နောက်သို့ လွင့်သွားခဲ့၏။ သူမ၏ညာလက်က တုန်ယင်နေပြီး နှာခေါင်းနှင့် ပါးစပ်ထဲမှနေ၍ သွေးများ စီးကျလာနေသည်။ သူမ၏ ခန္ဓာကိုယ်ပေါ်တွင်လည်း ရေခဲအလွှာတစ်ခု လွှမ်းခြုံလာသလို ခံစားနေရ၏။ သူမက တုန်တုန်ယင်ယင် အမူအရာနှင့် မြေပေါ်သို့ လဲကျသွားခဲ့ပြီး အချိန်မရွေး ပျက်စီးသွားနိုင်သည်။

ညာဘက်လက်ထဲတွင် ဓားမောက်ကို ကိုင်ထားသော မုန့်ချီက ကျန်းကျိဝေကို ပွေ့ထူပေးလိုက်ပြီး သူမ၏ အေးစက်မှုများ ပျောက်ကွယ်သွားစေရန် ကူညီပေးလိုက်သည်။ တစ်ချိန်တည်းတွင် စိတ်စွမ်းအားကို ဖြန့်ကျက်လိုက်ပြီး လက်ထဲတွင် ကိုင်ထားသော ယင်ယန်ကြေးမုံအတုကိုသုံး၍ အချုပ်အနှောင်များကို ဖယ်ရှားရန် ကြိုးစားကြည့်လိုက်သည်။

ကျိုးဟန်ဖုန်းက ဘယ်လက်ကို လက်သီးအဖြစ် သုံး၍ တိုက်ခိုက်လိုက်ပြန်၏။ သူ့ဆီ၌ ဒဏ်ရာရနေသည်ကိုပင် သူကတော့ မီးတောက်များ ပျောက်ကွယ်သွားမည့်အချိန်ကို စောင့်မနေတော့ချေ။

သူ ဆင်းသက်လာသည့်အချိန်တွင် တူဟိုင်ရှန့်က သူ့ဆီကို နောက်တစ်ကြိမ် ပြေးဝင်လာကြောင်း တွေ့လိုက်ရ၏။

"သူက သူသေကိုယ်သေ တိုက်ခိုက်နေတာပဲ…"

ကျိုးဟန်ဖုန်းက စိတ်ထဲတွင် တွေးလိုက်ပြီး ညာလက်ကို ဆန့်ထုတ်လိုက်၏။ လက် (၅)ချောင်းကိုလည်း လှုပ်ရှားလိုက်ပြီး တူဟိုင်ရှန့်ကို သိုင်းကွက် (၂) ကွက် (၃)ကွက်အတွင်း အနိုင်ယူရန် ပြင်ဆင်လိုက်သည်။

ရင်လန်းဟွေနှင့် ကျိုးယုံတို့က တူဟိုင်ရှန့်ကို မသတ်ရန် အကြိမ်ကြိမ် ပြောထားခဲ့ပြီး သူကလည်း ဘိုးဘေး၏ ဒေါသကို ကြောက်နေသေးသည်။ မဟုတ်လျှင် သူ့ကို ရင်ဆိုင်ရန် ထိုမျှ မခက်နိုင်ပေ။ အကယ်၍ သူက ဒဏ်ရာရနေလျှင်ပင် တူဟိုင်ရှန့်ကိုသတ်ရန် အခွင့်အရေး ရှိနေသေး၏။

ရင်လန်းဟွေက ကျိုးဟန်ဖုန်း၏ လှုပ်ရှားမှုကို မြင်သည့်အခါ တိတ်တဆိတ် ကျေနပ်သွားခဲ့၏။

"ဘိုးဘေးရဲ့အနှစ်သာရတွေက တကယ်အလုပ်ဖြစ်တာပဲ။ တကယ်လို့ သူတို့က တာဝန်မပြီးဆုံးဘူးဆိုရင်တောင် ကျိုးဟန်ဖုန်း၏အစွမ်းက သိသိသာသာ တိုးတက်လာနိုင်ပြီး ဘာအကူအညီမှမလိုဘဲ တူဟိုင်ရှန့်ကို အနိုင်ရနိုင်တယ်…"

တူဟိုင်ရှန့်က စွမ်းအား (၆၀) ၊ (၇၀) ရာခိုင်နှုန်းခန့်သာ ပြန်ကောင်းသေးသော်လည်း ဘိုးဘေး၏အနှစ်သာရများက အဓိကအကြောင်းပြချက် ဖြစ်သည်။ ကျိုးယုံ၏ သေဆုံးမှုကိုတော့ သူလည်း ဝမ်းနည်းနေသလို မခံစားရပေ။

သူက သေဆုံးသွားပြီ ဖြစ်သည့်အတွက် ဂိုဏ်းချုပ်ရာထူးက သူ့လက်ထဲကို ရောက်လာနိုင်ပြီး ဘိုးဘေးနှင့် ဆက်သွယ်ရမည့် အနှစ်သာရများကိုလည်း ပိုင်ဆိုင်နိုင်မည် မဟုတ်ပေလော။ ထိုလူများ၏ ကျေးဇူးကြောင့် သူက မြန်မြန်ဆန်ဆန် သေဆုံးသွားခြင်း ဖြစ်၏။ သူ့စိတ်ထဲတွင် ကျေနပ်သွားခဲ့ပြီးနောက် အရှိန်အဝါက တိုးတက်လာခဲ့သည်။ သူက ချီကျန်းရန်နှင့် ကျိုးဟုန်တို့ကို တစ်ကြိမ်တည်းနှင့် ရှင်းပစ်ရန် ပြင်ဆင်ထားခဲ့၏။

ရုတ်တရက်ဆိုသလို ညအချိန်တောက်ပသော လမင်းကြီးကဲ့သို့ သံစဉ်တစ်ခုကို ကြားလိုက်ရသည်။ သူ၏ခန္ဓာကိုယ်က အေးစက်သွားသလို ခံစားလိုက်ရပြီး ပင်မဝိညာဉ်ကပင် အေးခဲသွားခဲ့၏။

"ကွမ်ဟန်းကျိန်စာ…"

ရင်လန်း‌ဟွေက တုံ့ပြန်ရန် နှေးကွေးသွားသော်လည်း အလွန်အံ့ဩမှင်တက်သွားသည်။ စောင်းတီးနေသော မိန်းမပျိုက ကျိုးဟန်းဖုန်းကို တိုက်ခိုက်ခဲ့ခြင်းမရှိဘဲ သူ့ကို ရင်ဆိုင်ရန် ရောက်လာခဲ့သည်။ ထင်မြင်ချက်က မှားယွင်းသွားခဲ့၏။

ရွမ်ယုရှုက တံခါး (၈) ပေါက်အဆင့်သာ ရောက်နေသေးသည်။ သူမက လန်းဟွမ်ကောင်းကင်တေးသွား (၁၂) သွယ်ကို တီးခတ်လိုက်ပြီးနောက် ကွမ်ဟန်းကျိန်စာကို တီးခတ်ရန် စွမ်းအား ရှိနေသေးသည်။ သို့သော် သူမ၏ပစ်မှတ်ကို ရင်လန်းဟွေဆီသို့ ပြောင်းလဲလိုက်၏။

ကျိုးဟန်ဖုန်း၏အစွမ်းက ထင်မှတ်ထားသည်ထက် ကျော်လွန်နေသည့်အတွက် သူတို့က ပူးပေါင်းတိုက်ခိုက်ရန် လိုအပ်သည်။ သူတို့က ရင်လန်းဟွေကို အရင်ဆုံး သတ်ပစ်ရမည် ဖြစ်၏။

မုန်ချီက လျှို့ဝှက်ရတနာကို ထိန်းချုပ်ရန် ကြိုးစားနေပြီး ရင်လန်းဟွေ၏ ထူးဆန်းသော မှော်အရုပ်ပညာနှင့် အနှောင့်အယှက် မရှိစေရန် ကာကွယ်ထားသည်။ ထိုအရာက သူတို့ အနိုင်ရရန် အခွင့်အရေး ဖြစ်နေ၏။ မည်သို့ဖြစ်စေကာမူ တူဟိုင်ရှန့်က အစ်မကျိဝေ၏ အကူအညီနှင့် ကျိုးဟန်ဖုန်းကို ခုခံနိုင်သေးသည်။ ကွမ်ဟန်းကျိန်စာကို သုံးလိုက်ပြီးနောက် သူမက သွေးအဆီအနှစ်ကို လှုံ့ဆော်ပြီး သူတို့ကို ချက်ချင်း ကူညီပေးနိုင်သေး၏။

သူ၏စိတ်ဝိညာဉ်ထဲ၌ အေးစက်သွားသည့် အချိန်တွင် ရင်လန်းဟွေ၏စိတ်က ထုံကျင်သွားခဲ့ပြီး သူ၏တုံ့ပြန်မှုများကလည်း နှေးကွေးလာသည်။ ပုံမှန်အားဖြင့် ထိုကဲ့သို့ နှေးကွေးမှုက သူ့ကို အမှန်တကယ် သက်ရောက်စေနိုင်သော်လည်း ပညာရှင်(၂) ယောက်နှင့် တိုက်ခိုက်နေသည့်အချိန်တွင် ထိုလူများက သူ့ကို သတ်ပစ်နိုင်စွမ်း ရှိသည်။

ဘယ်လက်က နာကျင်နေသော်လည်း ကျိုးဟမ်က ဓားရှည်ကို ဝှေ့ယမ်းတိုက်ခိုက်လိုက်သည်။ သူကိုယ်တိုင်က ကြောက်စရာကောင်းသော နဂါးတစ်ကောင်အဖြစ် ပြောင်းလဲသွားသလို ထင်မှတ်ရသည်။ သူက ရင်လန်းဟွေ၏ ပတ်ပတ်လည်တွင် ရှိနေသော အနက်ရောင်အငွေ့များနှင့် ကူအဆိပ်ပိုးကောင်များကို လောင်ကျွမ်းပစ်လိုက်သည်။

မျက်စိတမှိတ်အတွင်း ချီကျန်းရန်ကလည်း သူ၏ရွှေနဂါးဓားနှင့် ခုတ်ချလိုက်၏။ ယခုတစ်ကြိမ်တော့ ကောင်းကင်ပေါ်တွင် ခရမ်းကြယ်မြစ်ကြီး မရှိတော့ပဲ နှင်းပွင့်လေးများသာ ကျဆင်းလာခဲ့သည်။

နှင်းပွင့်တစ်ခုချင်းဆီက အလွန်ထက်မြက်သော ဓားသွားများကဲ့သို့ ဖြစ်လာပြီး ရင်လန်းဟွေ၏ ခန္ဓာကိုယ်ကို ထိုးစိုက်နေကြသည့်အတွက် သွေးများ ဖြာထွက်နေသည်မှာ သွေးရောင်ရေခဲပွင့်များကဲ့သို့ ဖြစ်နေသည်။ စိမ်းပြာနှင်းမုန်တိုင်း၏ အစွမ်းကြောင့် ရင်လန်းဟွေက အဆုံးသတ်ကို ရောက်လာနေပုံရ၏။

သို့သော် ထိုအချိန်တွင် သူ၏ခန္ဓာကိုယ်က ပျက်စီးသွားခဲ့ပြီး စေးကပ်သော သွေးများအဖြစ် ပျော်ကျသွားခဲ့၏။ အဝေးမှနေ၍ အနက်ရောင် အလင်းတန်းတစ်ခုလည်း ထွက်ပေါ်လာပြီး ပင်မဝိညာဉ်က မကောင်းဆိုးဝါး ချီစွမ်းအင်များနှင့် ပေါင်းစည်းသွားပုံရသည်။

မှော်အရုပ်ပညာက အမှန်တကယ်ကို ထူးဆန်းလှ၏။ ရုတ်တရက်ဆိုသလို ရင်လန်းဟွေက တောင့်တောင့်ကြီး ဖြစ်သွားပြီး သူ၏မျက်လုံးထဲတွင် ခန့်မှန်း၍ မရနိုင်သော အမူအရာများ ပေါ်လာခဲ့၏။ အနက်ရောင်အလင်းတန်းများလည်း ပျောက်ကွယ်သွားပြီး ပင်မဝိညာဉ်က ရေခဲအဖြစ် ပြောင်းလဲသွားခဲ့၏။

"မဖြစ်နိုင်ဘူး...။ ဓားသွားမှာ ဒီလိုထူးဆန်းတဲ့ အကျိုးသက်ရောက်မှုမျိုး မရှိသင့်ဘူး...။ ဒါက မကောင်းဆိုးဝါးချီစွမ်းအင်တွေကို ပျောက်ကွယ်သွားစေနိုင်မှာ မဟုတ်ဘူး... "

ပင်မဝိညာဉ်ထဲတွင် အပြာရောင် အလင်းတန်းများ တောက်ပလာပြီးနောက် သူတို့က ရေခဲအပိုင်းအစလေးများအဖြစ် ပြောင်းလဲသွားခဲ့သည်။ ရင်လန်းဟွေက ရင်ထဲတွင် နာကြည်းမှုများနှင့်အတူ သေဆုံးသွားခဲ့၏။

ရင်လန်းဟွေ ရှုံးနိမ့်သွားသည်ကို သိသွားသည့်အတွက် ကျိုးဟမ် ၊ ချီကျန်းရန်နှင့် ရွမ်ယုရှုတို့က သူတို့၏ပစ်မှတ်ကို ကျိုးဟန်ဖုန်းဆီသို့ ပြောင်းလဲလိုက်သည်။ မူလကတည်းက တိုက်ပွဲက လျင်မြန်လွန်းလှ၏။

အနီးအနားတွင် ကာကွယ်နေသော ကျန်းရှန်းဟုန်နှင့် လန်တျယ်တို့က တိုက်ပွဲကို ရှင်းရှင်းလင်းလင်း မြင်နေရသည်။ ကျိုးယုံ အသတ်ခံလိုက်ရကြောင်း မြင်လိုက်ရသည့်အချိန်တွင် သူတို့က တခြားသူများကို အကူအညီပေးရန် ပြေးထွက်သွားခဲ့သည်။ ထိုအချိန်တွင် ရင်လန်းဟွေကလည်း အသတ်ခံလိုက်ရ၏။

လန်တျယ်က တစ်ကိုယ်လုံး တုန်ယင်နေ၏။ ကျိုးယုံက အလွယ်တကူ သေဆုံးသွားလိမ့်မည်ဟု သူမက လုံးဝ မယုံကြည်နိုင်ခဲ့ပေ။ ထိုအချိန်တွင် သူမ၏ အမူအရာက ပြောင်းလဲသွားခဲ့ပြီး လူအုပ်ကြီးထဲသို့ ရူးသွပ်စွာ ထွက်ပြေးသွားခဲ့၏။ ကျိုးယုံဆီတွင် ယင်ယန်ကြေးမုံ ရှိနေကြောင်း သူမက သိနေသည်။ ကျိုးဟန်ဖုန်းကပင် ထိုလူများကို အနိုင်မရနိုင်သည့်အတွက် သူမက သူ့ကိုစွန့်လွှတ်ပြီး ထွက်ပြေးသွားခဲ့ခြင်း ဖြစ်၏။

လန်တျယ်က ကြောက်လန့်သွားခဲ့ပြီး ကျိုးဟန်ဖုန်းက မကောင်းဆိုးဝါးဝိညာဉ် တစ်ကောင် ဖြစ်သွားသည်ကို မြင်သည့်အချိန်တွင် ကျန်းရှန်းဟုန်က ဇဝေဇဝါဖြစ်နေသည်။ သူက လက်ဝဲမြို့စား၏အစွမ်းကို ယုံကြည်ရမလား သို့မဟုတ် ချက်ချင်း သွားရောက် ကူညီရမလား မပြောတတ်တော့ပေ။

"ဖျောက်"

ထိုအချိန်တွင် တံဆိပ်က ပျက်စီးသွားသည့်အသံကို မုန့်ချီက ကြားလိုက်ရ၏။

"တော်တော်လေး နားထောင်ကောင်းတဲ့အသံပဲ…"

Translated by Hein Htet.