အခန်း (၄၉၆)

လက်ဖဝါးက သူ့ဆီသို့ ရောက်လာသည့်အချိန်တွင် မုန့်ချီက အိပ်တန်းတက် ဇာမဏီဗျပ်စောင်း၏ ကွဲပြားမှုကို သတိထားမိခဲ့သည်။ ထိုအရာက တိတ်ဆိတ်နေပြီး ချီစွမ်းအင်များကို သယ်ဆောင်ထားခြင်း မရှိချေ။ ထိုဗျပ်စောင်းပေါ်တွင် အနက်ရောင် အရိပ်များသာ ရှိနေခဲ့၏။

သူတို့ (၂) ယောက်၏ကြားထဲတွင် မီတာပေါင်း မြောက်မြားစွာ ကွာဝေးနေသော်လည်း ရွမ်ယုရှုအတု၏ လက်ဖဝါးက လေဟာနယ်ကို ထိုးဖောက်လာသလို ထင်မှတ်ရပြီး လေထဲတွင် ဝဲကတော့လေးများ ဖြစ်သွားစေခဲ့သည်။

တခဏအတွင်း ထိုအရာက မုန့်ချီ၏ရှေ့ကို ရောက်လာခဲ့၏။ သူမက ဖုံးကွယ်ခြင်းစွမ်းရည်တစ်ခုခုကို အသုံးပြုနေခြင်း ရှိမရှိ သေချာမသိသော်လည်း အိပ်မက်ဝင်္ကပါ၏ ဖုံးကွယ်ထားမှုကို ကောင်းကောင်း အသုံးချခြင်း ဖြစ်နိုင်သလို လေဟာနယ်ထဲတွင်လည်း အစစ်အမှန် အက်ကွဲကြောင်းတစ်ခု ရှိနေနိုင်သည်။

"ဖျောက်..."

သူက မီးတောက်များ လွှမ်းခြုံနေသော ဓားနှင့် လက်ဝါးကို တားဆီးလိုက်သည့်အတွက် အသံတစ်ခု ထွက်ပေါ်လာခဲ့သည်။ သူ၏ခန္ဓာကိုယ်က အနည်းငယ် ကိုင်းသွားပြီး တစ်ချိန်တည်းလိုလိုပင် သူ့ဓားနှင့် ခုတ်ချလိုက်၏။ ဓားက ထူးဆန်းသော အနေအထားအတိုင်း ပျံသန်းသွားခဲ့ပြီး ပတ်ပတ်လည်တွင် ငွေရောင်လျှပ်စီးကြောင်းများ စီးဆင်းနေခဲ့သည်။

"ချွမ်..."

ဓားမောက်တိုက်ခိုက်မှုနှင့် ထပ်တိုး ပေါင်းစပ်လိုက်သည့်အချိန်တွင် မုန့်ချီ၏ညာလက်က ထုံကျင်သွားသလို ခံစားလိုက်ရ၏။ သူ၏သွေးကြောများ၊ အရိုး၊ ကြွက်သားနှင့် သွေးများ တစ်စစီ ပျက်စီးသွားသလို ခံစားလိုက်ရသည်။

ထိုအရာက ဒေါ်လေးပိုင်နှင့် တိုက်ခိုက်နေသည့်အချိန်တွင်ပင် ထွက်ပေါ်လာခြင်း မရှိသေးသော အခြေအနေတစ်ရပ် ဖြစ်၏။ သူက ဓားကို ရိုးရှင်းစွာ ခုတ်ချလိုက်သည့်အတွက် ပြိုင်ဘက်၏ အားနည်းချက်များကို တိုက်ခိုက်နိုင်ခြင်း မရှိချေ။ တခြားသော အကြောင်းပြချက် တစ်ခုကတော့ ထူးဆန်းသော ကျင့်စဉ်နည်းလမ်းနှင့် သာလွန်သော ခွန်အားကြောင့် ဖြစ်သည်။

ပြိုင်ဘက်၏အစွမ်းကို ခံနိုင်ရည်မရှိသည့်အတွက် မုန့်ချီက နောက်ကို ခြေတစ်လှမ်း ဆုတ်လိုက်ရပြီး အခွင့်အရေးယူ၍ ကိုယ်ဖော့ပညာကို သုံးလိုက်ရ၏။ သူက နောက်ဆုတ်သွားချင်ယောင်ဆောင်ပြီး နောက်ထပ်ရောက်လာသည့် ရွမ်ယုရှုအတု၏ လက်ဝါးချက်များကို ရှောင်တိမ်းလိုက်သည်။

ထိုအချိန်ကျမှသာ သူ့ပြိုင်ဖက်၏ အငွေ့အသက်များ ပြောင်းလဲသွားကြောင်း မုန့်ချီလည်း နားလည်သွားခဲ့သည်။ ထိုလူက ရွမ်ယုရှုအဖြစ် ဆက်လက် ဟန်ဆောင်နေခြင်း မရှိတော့ပေ။ သူ၏မျက်နှာက မထင်မရှားဖြစ်နေပြီး သူ၏ခန္ဓာကိုယ်က ကြီးမားပြီး ကြွက်သားများ ထွက်လာခဲ့သည်။ ထိုအရာက မုန့်ချီ သိခဲ့သော အရာတစ်ခု မဟုတ်ချေ။

သူက ရေလှိုင်းမီးတောက်ဓားကို ဆွဲထုတ်လိုက်သည်။ ယခုတစ်ကြိမ်တော့ သူက ဓားမောက် ဓားရှည် (၂) ချောင်းလုံးကို ကိုင်ထား၏။ သူက အနည်းငယ်လေးပင် သတိမထားဘဲ မနေရဲပေ။ ထိုအရာက ဒေါ်လေးပိုင်ထက်ပင် ပို၍အန္တရာယ်များသော ပြိုင်ဘက်တစ်ယောက် ဖြစ်၏။ ထို့ပြင် သူ့ပြိုင်ဘက်ဆီ၌ သတ်ဖြတ်ချင်စိတ်များ ပြည့်နှက်နေသည်။

ထိုလူ၏အရှိန်က အမှောင်ထဲတွင် ပေါင်းစပ်နေသလို ထင်မှတ်ရပြီး အတော်လေး အံ့သြစရာကောင်း၏။ ထိုလူ၏လက်ဖဝါးများက သူ့ဆီကို ရောက်လာသည့်အချိန်တွင် မုန့်ချီက သူ၏ဓားကို မနည်းဆုပ်ကိုင်လိုက်ရသည်။ သူကတော့ တစ်ဖက်လူ၏ အငွေ့အသက်ကို ဖမ်းဆုပ်ရန် အခွင့်အရေးပင် မရခဲ့ပေ။

အစောပိုင်းတွင် အလစ်ချောင်း တိုက်ခိုက်သကဲ့သို့ သူ၏အငွေ့အသက်ကို ဖုံးကွယ်ထားရန် မလိုတော့သည့်အတွက် ယခုတစ်ကြိမ် တိုက်ခိုက်မှုများက ဆူညံသံများ ထွက်ပေါ်လာသည်။ သူ၏လက်ဖဝါးကလည်း အဆိပ်များ သုတ်လိမ်းထားသည့်အလား သတ္တုများကဲ့သို့ ဖြစ်နေ၏။

မုန့်ချီက လူသားနှင့်ကောင်းကင်တစ်သားတည်းအဆင့်ကို ရောက်ရှိနေပြီး မူလအခြေအနေကို ပြန်ရောက်နေသည်မှာ အတော်လေး ကြာခဲ့ပါပြီ။ သူက တစ်ချိန်လုံး သဘာဝတရားကြီးနှင့် ပေါင်းစပ်နေနိုင်ပြီး ပတ်ဝန်းကျင်တွင် ဖြစ်ပျက်နေသော အရာအားလုံးက သူ့ခေါင်းထဲတွင် နည်းနည်းချင်းဆီ ပေါ်လာခဲ့၏။

ကျောက်တုံးများ၊ စီးဆင်းနေသောရေများ၊ မှောင်မည်းနေသော ဖုန်းဆိုးမြေကြီး၊ အိပ်မက်နယ်မြေ၏ ဝင်္ကပါကို တုပဖန်တီးထားသော အရာတစ်ခု၊ စသည့်အရာများအားလုံးက သူ့ခေါင်းထဲတွင် တိတ်တဆိတ် ပေါ်လာခဲ့သည်။

သူက ခန္ဓာကိုယ်ထဲသို့ ပေါင်းစပ်လာနေသော အလွန်များပြားသည့် ချီစွမ်းအင် ပင်လယ်ကြီးကိုပင် ခံစားမိနိုင်၏။ ထိုအရာများ ပေါင်းစပ်လာမှုကြောင့် သူ၏ချီစွမ်းအင်၊ ခွန်အားနှင့် စိတ်ဝိညာဉ် စွမ်းအားများက တဖြည်းဖြည်း ပြန်ပြည့်လာနိုင်သည်။

သို့သော် လက်ဖဝါးနှင့် သူ့ကို ရိုက်ချလိုက်သည့်အချိန်တွင် ကမ္ဘာမြေကြီးနှင့် တစ်သားတည်းဖြစ်နေသော အခြေအနေက ချက်ချင်း ပြောင်းလဲသွားခဲ့သည်။ သူ၏ချီစွမ်းအင်ပင်လယ်ကြီးထဲသို့ ကြမ်းတမ်းခက်ထန်စွာ ကျရောက်လာသော လှိုင်းလုံးတစ်ခုကို ခံစားလိုက်မိ၏။

ကျောက်တုံးကြီးများက အစိတ်စိတ်အမွှာမွှာ ပျက်စီးသွားခဲ့ပြီး စီးဆင်းနေသော ရေများက ခမ်းခြောက်သွားသည်။ ဖုန်းဆိုးမြေကြီးက အက်ကွဲသွားပြီး ကောင်းကင်ကြီးက မည်းမှောင်သွားခဲ့၏။ သူ့ခေါင်းထဲတွင် မြင်နေရသော မြင်ကွင်းများက ကမ္ဘာပျက်သည့်နေ့ကို ကျရောက်နေသလို ဖြစ်နေခဲ့သည်။ သူက ကမ္ဘာမြေကြီး၏ အစွမ်းကိုငှားယူပြီး လူသားနှင့်ကောင်းကင် တစ်သားတည်းအဆင့်ကို ထိန်းသိမ်းထားရန် ခက်ခဲနေသည်။

"သတ်ဖြတ်ခြင်း (၆) သွယ် မကောင်းဆိုးဝါးလူသားလား...။ သူက ပြီးပြည့်စုံတဲ့ ဝေ့ကျင်းတစ်ဝက်အဆင့် ပညာရှင်တစ်ယောက်ပဲ…"

အလွန်ကြောက်စရာကောင်းသော ခံစားမှုကို ကြုံတွေ့လိုက်ရပြီးနောက် သူ့ခေါင်းထဲတွင် ထိုအတွေးက ပေါ်လာခဲ့သည်။ သူကတော့ တည်ငြိမ်အေးချမ်းမှုကို နှောင့်ယှက်ခွင့် မပေးနိုင်ပေ။ သူက ကိုယ်ဖော့ပညာကို ပြောင်းလဲလိုက်ပြီး ရှေ့ကို အနည်းငယ်ကိုင်း၍ ဓားမောက်ကို လေထဲတွင် လွှဲယမ်းလိုက်သည်။

သူ၏ဓားမောက်က တစ်ခါတစ်ရံ ခိုင်မြဲပြီး တစ်ခါတစ်ရံ သွက်လက်ပေါ့ပါး၏။ တစ်ခါတစ်ရံ ယင်စွမ်းအားများ ရှိနေပြီး တစ်ခါတစ်ရံ ယန်စွမ်းအားများ ရှိနေသည်။ တစ်ခါတစ်ရံ တိုက်ခိုက်ပြီး တစ်ခါတစ်ရံ ခုခံ၏။ သူက ထိုက်ကျိနန်းတော်၏ ပတ်ပတ်လည်ကို ရောက်သွားသလို ထင်မှတ်ရသည်။ယင်နှင့်ယန်ကို အသုံးပြုလိုက်မှသာ သူက ပြိုင်ဘက်၏ အားနည်းချက် နေရာများကို တိုက်ခိုက်နိုင်ခဲ့၏။

ထိုလူကတော့ မည်းမှောင်နေသော လက်ဝါးကို တိတ်တဆိတ် ပြန်လည်ရုပ်သိမ်းလိုက်ပြီး မည်သည့်လေလှိုင်းမျှ ထွက်ပေါ်လာခြင်း မရှိဘဲ ဓားမောက်၏ အရှိန်အဝါကို ဖျက်ဆီးလိုက်သည်။

မုန့်ချီ၏ အရေပြားကတော့ ရွှေရောင်အလင်းတန်းများ တောက်ပနေပြီး သူ့လက်ကလည်း ထုံကျင်နေခဲ့၏။ သူ၏အတွင်းအားများကို တစ်စုံတစ်ခုက ဖျက်ဆီးပစ်နေသလို ခံစားနေရသည်။ သူက ခြေလှမ်းပေါင်းများစွာ နောက်ဆုတ်သွားလိုက်ရပြီး သူ၏စွမ်းအားများအားလုံးကို ဖယ်ရှားလိုက်ရ၏။

သူ့ပြိုင်ဘက်ကတော့ သူ့နောက်မှ တောက်လျှောက်လိုက်လာပြီး လက်ဝါးနှစ်ဖက်နှင့် တစ်ချိန်တည်း တိုက်ခိုက်လိုက်သည်။ သူကတော့ မုန့်ချီကို သူတို့ (၂) ယောက်၏ ကြားထဲတွင် ဝေးသွားခွင့်ပင် မပေးခဲ့ပေ။

……………..

ကျိုးဟမ်က အားနည်းသော လူငယ်ပေါင်းများစွာကို ရှောင်တိမ်းပြီး တဟုန်ထိုး ပြေးနေခဲ့၏။ သူက လက်တစ်ဖက်ကို လက်သီးဆုပ်ထားပြီး တခြားတစ်ဖက်ကတော့ ဓား၏ လက်ကိုင်ကို ဆုပ်ကိုင်ထားသည်။

ကမ္ဘာမြေထိတ်လန့်ခြင်း သိုင်းကွက်တစ်ခုချင်းဆီကြောင့် သူက သံသရာကမ္ဘာကြီးထဲမှ လဲလှယ်လာခဲ့သော အရာများကို အသုံးပြုရန် မလိုအပ်ခဲ့ပေ။ ထိုသို့ဆိုရာတွင် သူ၏အဆင့်နှင့် သိုင်းကွက်များက သူ ရင်ဆိုင်နေရသော ပြိုင်ဘက်များအားလုံးထက် ပို၍အဆင့်မြင့်နေခဲ့၏။

ထို့ကြောင့် သူတို့က သူ၏တိုက်ခိုက်မှုကို ခုခံရန် ခက်ခဲနေကြသည်။ ထိုအချိန်တွင် သူ၏ပြိုင်ဘက်များက တိုက်ခိုက်နိုင်စွမ်း ဆုံးရှုံးသွားကြပြီး သူတို့၏မိသားစု အကြီးအကဲများက ဝင်္ကပါအပြင်ဘက်ကို ခေါ်ထုတ်သွားနိုင်ကြ၏။

သို့သော် သူ၏လက်ဝါးတိုက်ခိုက်မှုကြောင့် ကီမိသားစုမှ လူငယ်တစ်ယောက်က မြေပေါ်တွင် လဲကျသွားကြောင်း မြင်လိုက်ရသည့်အခါ ကျိုးဟမ်က မျက်မှောင်ကြုတ်လိုက်မိသည်။ သူက ဝင်္ကပါထဲမှ ထွက်သွားမည့် လက္ခဏာမျိုး မရှိချေ။

"ဝင်္ကပါနဲ့ အကြီးအကဲတွေရဲ့ အငွေ့အသက်က တစ်ခုခု ဖြစ်နေတာလား…"

ကျိုးဟမ်ကတော့ တစ်စုံတစ်ခု လွဲမှားနေသည်ကို စဉ်းစားမိခဲ့သည်။ သူက တခြားတစ်နေရာသို့သွားပြီး အားနည်းသော ပြိုင်ပွဲဝင်များကို ရှင်းပစ်ရန် မစဉ်းစားတော့ပေ။ သူက သူ့အဖော်များနှင့် မြန်မြန်တွေ့ဆုံချင်ခဲ့၏။

သူက သိပ်မကြာခင် မိန်းမပျိုတစ်ယောက်၏ ရယ်သံကို ကြားလိုက်ရသည်။

"ငါက မင်းသားဝေနဲ့ တွေ့လိုက်ရတာပဲ။ ဒီလိုအခွင့်အရေးမျိုးကို လက်လွှတ်ခံလို့ရမလား…"

ထိုမိန်းမပျိုကတော့ ဒေါ်လေးပိုင်ဖြစ်သည်။ သူမဆီတွင် တိုက်ခိုက်ချင်စိတ်များ ပြည့်နှက်နေခဲ့၏။ သူမက မင်းသားကျင်း၏ကိုယ်စား ကျိုးဟမ်ကို တိုက်ပွဲကွင်းပြင်ထဲမှ ကန်ထုတ်ချင်နေခဲ့သည်။

သူမက ရက်စက်ကြမ်းကြုတ်သော မှော်သားရဲတစ်ကောင်ကဲ့သို့ သူ့ဆီကို ပြေးဝင်လာခဲ့၏။ သူမ၏ လက်သီးကလည်း မျက်နှာတည့်တည့်ကို ရောက်လာသည့်အတွက် သူလည်း အသက်ရှူရန် မနည်းကြိုးစားနေရသည်။ သူမ၏လက်သီးက သူ့အပေါ်ကို ဖိနှိပ်လာပြီး သူ၏လှုပ်ရှားမှုများ အားလုံးကို ဖိနှိပ်ထားသည်။

ဒေါ်လေးပိုင်က ဝင်္ကပါထဲတွင် မထင်မှတ်ထားသည့် အရာများဖြစ်လာမည့် အခွင့်အရေးကို မပေးနိုင်ပေ။ သူမကတော့ ပစ်မှတ်ကို လုံးဝ အလွတ်မပေးရဲပေ။ အကယ်၍ သူသာ တိုက်ခိုက်ခံရမည်ဆိုလျှင် ဝင်္ကပါထဲမှ ထွက်ပြေးနိုင်တော့မည် မဟုတ်ချေ။

ကျိုးဟမ်ကတော့ အတော်လေးကို မျက်နှာပျက်နေခဲ့၏။ သူက ဓားကို ထောင်လိုက်ကိုင်ထားပြီး ကောင်းကင်ဘုံကို ဆုတောင်းနေသည့်အလား မျက်ခုံးနှင့် တစ်တန်းတည်း ကိုင်ထားသည်။

ထို့နောက် ဓားကို လှမ်းထိုးလိုက်ရာ ဓားချက်နှင့်အတူ ရာသီဥတုများ ပြောင်းလဲသွားခဲ့၏။ လေလှိုင်းများလည်း ထွက်ပေါ်လာပြီး မြူခိုးများက အစစ်အမှန် နဂါးတစ်ကောင်အဖြစ် ပြောင်းလဲသွားခဲ့သည်။ သူ၏ဓားသိုင်း လှုပ်ရှားမှုက ကမ္ဘာမြေကြီး၏အမိန့်ကို သယ်ဆောင်ထားသည့်အလား တခဏအတွင်း ဒေါ်လေးပိုင်ကို ပစ်မှတ်ထားလိုက်သည်။

သိုင်းကွက်အနည်းငယ်အတွင်း ကမ္ဘာမြေကြီးက သူမကို ဖယ်ရှားနေသလို ခံစားလာရ၏။ သူတို့ (၂) ယောက်၏သိုင်းကွက် လှုပ်ရှားမှုက အလွန်လျင်မြန်နေပြီး ပတ်ပတ်လည်တွင် ဖုန်မှုန့်များ မြင့်တက်လာခဲ့သည်။

သူတို့၏နောက်တွင်တော့ ဓားမောက်ကိုင်ထားသော လူတစ်ယောက် ပေါ်လာခဲ့၏။ သူ၏မျက်နှာက သပ်သပ်ရပ်ရပ်နှင့် လေးထောင်ကျကျဖြစ်ပြီး အတော်လေးကို အစွမ်းထက်ကာ ပြတ်သားပုံရသည်။

"ရန်ချုံ… မြန်မြန်လာပြီး ငါ့ကိုကူညီပေး..."

ဒေါ်လေးပိုင်က အသာစီးရနေသော်လည်း မကြာခင် အတောအတွင်း အနိုင်ရန် ခက်ခဲနေသည်။ မင်းသားကျင်းက အရင်ဝင်္ကပါထဲမှ အထုတ်ခံရမှာကို သူမက စိုးရိမ်နေခဲ့၏။ ထိုလူကို မြင်သည့်အခါ သူမက ဝမ်းမြောက်ဝမ်းသာ အကူအညီ တောင်းလိုက်သည်။

ရန်ချုံက သူမကို ညင်သာစွာ ခေါင်းညိတ်ပြလိုက်ပြီး ရုတ်တရက် ထွက်ပေါ်လာသော လှိုင်းလုံးတစ်ခုအလား သူ့ဓားနှင့် လှမ်းထိုးလိုက်၏။

"အခြေအနေက တစ်ခုခုပဲ…”

ကျိုးဟမ်၏ စကားမဆုံးသေးခင် သူတို့ (၂) ယောက်က ဝိုင်းရံတိုက်ခိုက်လိုက်ကြသည်။ အန္တရာယ်များသော အခြေအနေမျိုးတွင် သူက စကားပြောနေရန် အခြေအနေ ရှိဦးမည်လော။

…………..

ချီကျန်းရန်က သစ်တောကြီးကို ကွေ့ပတ်သွားခဲ့ပြီး လူတစ်ယောက်ယောက်နှင့် တွေ့သည့်အချိန်မှသာ လမ်းရှာရန် ကြိုးစားနေခဲ့၏။ ထိုအချိန်တွင် သာမန်ဝတ်စုံ ဝတ်ဆင်ထားပြီး လက်ထဲတွင် ပုတီးစေ့ကိုင်ထားသော ဘုန်းတော်ကြီးတစ်ပါးကို တွေ့လိုက်ရသည်။

သူကတော့ အိမ်ရှေ့မင်းသား၏ နောက်လိုက်တစ်ယောက်ဖြစ်ပြီး သူနှင့်အတူ ဝင်္ကပါထဲသို့ လူ (၂) ယောက် ခေါ်လာခဲ့သည်။

"အော်မီတော်ဖော်..."

ထိုဘုန်းတော်ကြီးက ချီကျန်းရန်ကို အလစ်ချောင်း တိုက်ခိုက်ရန် ကြိုးစားခဲ့ခြင်း မရှိချေ။ သူက 'အော်မီတော်ဖော်' ဟု ရေရွတ်လိုက်ပြီး လက်အုပ်ချီလိုက်၏။

ထို့နောက် နေမင်းစက်လုံးအမှတ်အသားနှင့် လှမ်း၍ တိုက်ခိုက်လိုက်၏။ သူ့လက် (၂)ဖက်ကြားထဲတွင် ရှိနေသော‌ လေဟာနယ်ထဲမှနေ၍ လင်းလက်တောက်ပသော အလင်းရောင်များ ထွက်ပေါ်လာပြီး ကမ္ဘာမြေပေါ်ကို နေလုံးကြီး ကျဆင်းလာသလို ထင်မှတ်ရသည်။

အလင်းတန်းများက အလွန်တောက်ပနေပြီး သူ၏လက်ဖဝါးထဲတွင် အပူစွမ်းအင်များ ပြည့်နှက်နေခဲ့၏။ ချီကျန်းရန်က သူ့ဓားကို ဆွဲထုတ်လိုက်ရာ အနီရောင်တိမ်တိုက်များ ပေါ်လာခဲ့သည်။

ထိုအချိန်တွင် ဘဲတစ်ကောင်က ကောင်းကင်ပေါ်ကို ပျံသန်းသွားခဲ့ပြီး ဖုံးကွယ်ထားသော နေဝင်ဆည်းဆာဓားသိုင်းကို သယ်ဆောင်ထားသည်။ ထိုအရာက ဘုန်းတော်ကြီး၏ နေမင်းစက်လုံးကို အဝေးသို့ ခေါ်ဆောင်သွားခဲ့၏။ သူ၏မျက်လုံးထဲတွင်တော့ ခရမ်းရောင်ကြယ်များ ပြည့်နှက်နေသည့်အလား ဖြစ်နေပြီး စကြဝဠာကြီးကဲ့သို့ ထင်မှတ်ရသော အရာတစ်ခု ပေါ်လာခဲ့သည်။

သူကတော့ နေရောင်ခြည်ကို ကြောက်လန့်နေခြင်း မရှိခဲ့ပေ။ ထိုဘုန်းတော်ကြီးက အဖိုးတန်ပန်းအိုးတံဆိပ်၊ မိုးကြိုးတံဆိပ်၊ ကျားသစ်တံဆိပ်နှင့် အတွင်းချုပ်နှောင်ခြင်းတံဆိပ်တို့ကို ဆက်တိုက်ဆိုသလို အသုံးပြုလိုက်ပြီး ချီကျန်းရန်ကို ဖိနှိပ်ထားခဲ့သည်။

သို့သော် ချီကျန်းရန်ကတော့ ဖရိုဖရဲကျင့်စဉ်နှင့် ဟွမ်ဟွာဓားဂိုဏ်း၏ ဓားသိုင်းပညာများကို အတော်လေး ကျွမ်းကျင်ထားပုံရ၏။ သူက ဓားကို လွတ်လပ်စွာ လှုပ်ရှားနေသည်မှာ ကောင်းကင်ကြီးပေါ်ကို စီးဆင်းနေသော ကြယ်မြစ်တစ်စင်းပမာ ဖြစ်နေသည်။ တစ်ခါတစ်ရံ အဝေးမှ တိုက်ခိုက်လိုက်သော ရေခဲအလင်းတန်းတစ်ခုကဲ့သို့ ဖြစ်နေ၏။

သူကတော့ သူ့ထက် သာလွန်သော ရန်သူတစ်ယောက်နှင့် ရင်ဆိုင်ရသည့် အချိန်တွင်ပင် ရှုံးနိမ့်ခြင်းမရှိသလို ထင်မှတ်ရသည်။ ထိုအစား သူကတော့ ကာကွယ်လိုက် တိုက်ခိုက်လိုက်နှင့် တစ်လှည့်ဆီ လုပ်ဆောင်နေခဲ့၏။

…………….

ရွမ်ယုရှုက သူမ၏စောင်းကို ပိုက်ပြီး ဖုန်းဆိုးမြေ၏ ပတ်ပတ်လည်တွင် လျှောက်နေခဲ့သည်။ မိန်းကလေးငယ်လေး တစ်ယောက်ကို အနိုင်ကျင့်ချင်နေသည့် လူတိုင်းကို တွေ့သည့်အချိန်တိုင်း သူမ၏အတွေးအခေါ် နတ်ဘုရားသံစဉ်နှင့် နှလုံးလှုပ်ရှားခြင်းသံစဉ်တို့ကို အသုံးပြုလိုက်သည်။

ထို့နောက် သွေးကြော (၆) သွယ် ဓားသိုင်းပညာနှင့် သူတို့ကို အဝေးသို့ မောင်းထုတ်တတ်၏။ သူမကတော့ စွန့်လွှတ်ခြင်းကျိန်စာ၊ ကွမ်ဟန်းကျိန်စာနှင့် သံသရာသံစဉ်တို့ကို အသုံးပြုရန်ပင် မလိုအပ်ခဲ့ပေ။

ထိုအချိန်တွင် သူမဆီကို လမ်းလျှောက်လာသော လူငယ်တစ်ယောက်ကို တွေ့လိုက်ရ၏။ ထိုလူငယ်ကတော့ ပွင့်လင်းပုံရပြီး သူ့ဆီတွင် စွမ်းအားများ ပြည်နှက်နေသည်။ ထိုအရာက ကွေကျီ ဖြစ်၏။

သူမကို မြင်သည့်အချိန်တွင် သူက အားရပါးရ ပြုံးလိုက်သည်။

"ဒီနေရာမှာ ညီမလေးယုရှုနဲ့တွေ့ရတာ တော်တော်အံ့သြဖို့ ကောင်းတာပဲ။ ကြည့်ရတာတော့ ငါက နတ်ဘုရားသံစဉ်တွေကိုနားထောင်ဖို့ ကံပါလာတယ်ထင်တယ်…"

ကလေးဘဝကတည်းကစပြီး သူ၏ဝါသနာက သံစဉ်တီးခတ်ရခြင်း ဖြစ်သည်။ သူက ရွမ်မိသားစု၏ နတ်ဘုရားသံစဉ်များကို စမ်းသပ်ရန် အလွန်စိတ်ဝင်စား၏။

ရွမ်ယုရှုကလည်း စိန်ခေါ်မှုမှ နောက်ဆုတ်သွားခဲ့ခြင်း မရှိချေ။ သူမက ကွေကျီထက် အဆပေါင်းများစွာ သာလွန်သော အစွမ်းထက် ရန်သူပေါင်းများစွာကို ရင်ဆိုင်ခဲ့ရသည်။ သူမက ဘယ်လက်ထဲတွင် ဗျပ်စောင်းကို ကိုင်ထားပြီး ညာလက်နှင့် စောင်းကြိုးလေးများကို တီးခတ်လိုက်သည်။

ရုတ်တရက်ဆိုသလို ကွေကျီက အံ့ဩမှင်တက်သွားပြီး မျက်မှောင်ကြုတ်လိုက်မိ၏။

"အပြင်ဘက်မှာ မထင်ထားတဲ့ကိစ္စတွေ ဖြစ်နေတယ်။ ဝင်္ကပါထဲမှာ ဆက်ပြီးနေရတာက တော်တော်လေး အန္တရာယ်များတယ်။ ညီမလေးယုရှု နင်လည်း ချက်ချင်းထွက်သွားသင့်တယ်…"

ထိုစကား ပြောပြီးသွားသည့်အချိန်တွင် သူလည်း ရေမျက်နှာပြင်ပေါ်မှ ဖြတ်ကျော်သွားခဲ့ပြီး ရွမ်ယုရှု၏ မျက်စိရှေ့မှ ပျောက်ကွယ်သွားခဲ့သည်။

သူတော်စင်အင်ပါယာတံဆိပ်ကြောင့် ဖြစ်ပေါ်လာသော မထင်မှတ်ထားသည့် အခြေအနေများကို ကွေမိသားစုက သတိထားနေခဲ့သည်။ ကွေကျီက ဝင်္ကပါထဲသို့ဝင်ရန် မလုံခြုံသလိုဖြစ်မှာ စိုးသည့်အတွက် သူတို့က လုံခြုံစေရန် တခြားအစီအစဉ်တချို့ကိုလည်း လုပ်ဆောင်ပေးထားခဲ့၏။

ထို့ကြောင့်လည်း ကွေကျီက ပထမဆုံး ရှာတွေ့သွားခဲ့ပြီး ဝင်္ကပါထဲမှ ထွက်လာခဲ့ခြင်း ဖြစ်သည်။ ထို့နောက် ဝမ်ကိုက်က နောက်မှ ထွက်လာခဲ့၏။ သူကတော့ ဒုတိယမြောက် ဖြစ်သည်။

ကွေကျီ၏စကားကို ကြားသည့်အခါ ရွမ်ယုရှုက မျက်မှောင်ကြုတ်လိုက်မိ၏။ သူမက အရှိန်မြန်လိုက်ပြီး သူမ၏မိတ်ဆွေများကို သတိပေးရန် ရှာဖွေချင်ခဲ့သည်။ အချိန်ခဏကြာ လျှောက်လာပြီးနောက် သူမက တောင်ကုန်းတစ်ခုပေါ်ကို ရောက်လာပြီး အဝေးမှနေ၍ မိုးကြိုးများ ကျဆင်းလာသည့်အသံကိုကြားလိုက်ရသည်။

သူမက လှမ်းကြည့်လိုက်သည့်အချိန်တွင် လူ (၂) ယောက် တိုက်ခိုက်နေသည်ကို မြင်လိုက်ရသည်။ တစ်ယောက်က ဓားရှည်နှင့် တိုက်ခိုက်နေပြီး တခြားတစ်ယောက်က လက်ဝါးနှင့် တိုက်ခိုက်နေသည်။ ထိုအချိန်တွင် မိုးကြိုးများ လျှပ်စီးကြောင်းများ တောက်ပနေခဲ့၏။ တစ်ခါတစ်ရံ မီးတောက်တစ်ခု ထွက်ပေါ်လာသည်။ သို့သော် အကျိုးသက်ရောက်မှု (၂) ခုလုံးက လျင်မြန်စွာ ပျက်စီးသွားခဲ့၏။

သူမ၏ပတ်ပတ်လည်တွင် ရှိနေသော အရာအားလုံးက နက်မှောင်နေသည့်အတွက် ကမ္ဘာပျက်ချိန်ကို ရောက်လာတော့မလို ခံစားနေရသည်။ လူ (၂) ယောက်က အနီးကပ် တိုက်ခိုက်နေကြသည့်အတွက် သူမက ရှင်းရှင်းလင်းလင်း မမြင်ရပေ။

လက်ရှိအချိန်တွင် မုန့်ချီက အတော်လေး အရေးနိမ့်နေခဲ့ပြီး ပြိုင်ဘက်ဆီမှ လွတ်မြောက်နိုင်ခြင်း မရှိပေ။ ရွမ်ယုရှုက အလွန်အေးစက်သော်လည်း ထိုအခြေအနေကို မြင်လိုက်ရသည့်အချိန်တွင် ပင့်သက်ရှိုက်လိုက်မိ၏။ သူမက စောင်းသံ ရောက်နိုင်သော တောင်ကုန်းပေါ်သို့ ပြေးသွားရန် စဉ်းစားလိုက်သည်။ ထို့နောက် လန်းဟွမ်မှော်တေးသွား (၁၂) သွယ်ကိုသုံးပြီး မုန့်ချီကို ကူညီ၍ သူ၏ပြိုင်ဘက်များကို အနိုင်ရရန် ကူညီပေးချင်ခဲ့သည်။

ထိုအချိန်တွင် သူမ၏ရင်ထဲ၌ တစ်စုံတစ်ခု လှုပ်ရှားလာသည့်အတွက် သူမက နောက်ပြန်လှည့်ကြည့်လိုက်ရာ မျက်နှာဖုံးဝတ်ထားသော အနက်ဝတ် လူတစ်ယောက်ကို မြင်လိုက်ရ၏။ သူက အလွန်လျင်မြန်သော အရှိန်နှင့် ရောက်လာခဲ့သည်။

"ကောင်းကင် (၉) သွယ်က မိုးကြိုးနတ်ဘုရား..."

သူမက ထိတ်လန့်မှုကြောင့် အလွန်အံ့ဩသွားခဲ့၏။ မိုးကြိုးနတ်ဘုရားကတော့ ဝင်္ကပါ၏ချုပ်နှောင်ခြင်းကို ခံထားရသည့်အလား ပျံသန်းရန် ခက်ခဲနေသည်။ သို့သော် သူက ထူးထူးခြားခြားကို လျင်မြန်လွန်းလှပြီး မျက်စိတမှိတ်အတွင်း မီတာ (၁၀၀) ကျော် ရောက်လာခဲ့၏။

သူမ အသက်ရှုနေစဉ် အတောအတွင်း မိုးကြိုးနတ်ဘုရားက မုန့်ချီကို တွေ့သွားပြီး တိုက်ခိုက်ရန် ပြင်လိုက်သည်။

မုန့်ချီကတော့ ဓား‌မောက်သိုင်းပညာနှင့် ဓားရှည်သိုင်းပညာများကို မချွင်းမချန် ထုတ်သုံးနေခဲ့၏။ သူကတော့ အရှိန်အဝါကို ဆုံးရှုံးသွားခြင်းမရှိဘဲ အနှစ်သာရ မျိုးစုံကိုသုံးပြီး ပြိုင်ဘက်၏ အားနည်းချက်ကို တိုက်ခိုက်နိုင်သည့်အပြင် ထောင်ချောက်များလည်း ဆင်နိုင်သေးသည်။

ရံဖန်ရံခါ ခရမ်းမိုးကြိုး စွမ်းအားများကိုသုံးပြီး ရံဖန်ရံခါ ရေလှိုင်းမီးတောက်ဓား၏ အစွမ်းများကိုငှားယူ၍ တိုက်ခိုက်ခဲ့၏။ သို့သော် သူ၏ဓားရှည်နှင့် ဓားမောက်သိုင်းကွက်များက လုံးဝကို အသုံးမဝင်သလို ထင်မှတ်ရသည်။

သူ၏တိုက်ခိုက်မှုကသာ နက်မှောင်နေသော လက်ဖဝါးပေါ်သို့ ကျရောက်သွားမည်ဆိုလျှင် သူ၏စွမ်းအားများက ကုန်ဆုံးသွားနိုင်သည်။ သူ၏ဓားမောက် အရှိန်အဝါကလည်း ပျက်စီးသွားနိုင်ပြီး ရေလှိုင်းမီးတောက်ဓားက လွင့်ထွက်သွားနိုင်၏။ သူ၏ဓားရှည်တိုက်ခိုက်မှု တစ်ခုချင်းဆီတိုင်းက နှောင့်ယှက်ခံနေရသည်။

သတ်ဖြတ်ခြင်း (၆) သွယ် မကောင်းဆိုးဝါးလူသားက မုန့်ချီကို ဖိနှိပ်ရန် အဆင့်(၂)ကျင့်စဉ်ကို သေချာရွေးချယ်ထားခဲ့ပြီး မုန့်ချီကို ထွက်ပြေးခွင့် အနည်းငယ်လေးပင် မပေးခဲ့ချေ။ သူက ပို၍တိုက်ခိုက်လာလေလေ မုန့်ချီကတော့ သူ၏ပတ်ပတ်လည်တွင် ပြင်းထန်စွာ လှုပ်ရှားနေသော ချီစွမ်းအင်ပင်လယ်ကြီးကို ခံစားမိလာလေလေ ဖြစ်သည်။

သူကတော့ သဘာဝတရားကြီးနှင့် တစ်သားတည်းဖြစ်နေသော အခြေအနေကိုပင် ဖန်တီးရန် လုံးဝမဖြစ်နိုင်တော့ပေ။ အကယ်၍ သူ၏ချီစွမ်းအင်များ ရှိနေသေးလျှင်တော့ သူက အဆင်ပြေနေသေး၏။ သို့သော် ခွန်အားနှင့် စိတ်ပိုင်းဆိုင်ရာ စွမ်းအားများကတော့ တဖြည်းဖြည်း ကုန်ဆုံးလာနေခဲ့သည်။

သူက လူသားနှင့်ကောင်းကင် တစ်သားတည်းအဆင့်ကို ထိန်းသိမ်းထားရန် အတော်လေး ပြဿနာများနေ၏။ အဘယ်ကြောင့်ဆိုသော် သဘာဝတရားကြီးက သူ၏ပတ်ပတ်လည်တွင် ပျက်စီးနေခြင်းကြောင့် ဖြစ်သည်။

အင်မော်တယ်ဖိနှိပ်ခြင်းကျင့်စဉ်ထက် ပို၍ကြောက်စရာကောင်းသော ခံစားမှုတစ်ခုက တဖြည်းဖြည်း ကျယ်ပြန့်လာနေပြီး မုန့်ချီ၏ ခန္ဓာကိုယ်ကိုလည်း ဖျက်ဆီးစေနိုင်ခဲ့၏။ အင်မော်တယ်ဖိနှိပ်ခြင်းကျင့်စဉ်က ထိုကဲ့သို့ ထူးဆန်းပြီး လျှို့ဝှက်ဆန်းကြယ်သော တိုက်ခိုက်မှုကို ဖယ်ရှားပေးနိုင်စွမ်း ရှိသည်။ အသွင်ပြောင်း (၇၂) မျိုးကျင့်စဉ်နှင့် ရွှေရောင်အလင်းတန်းများကြောင့်သာ မဟုတ်လျှင် သူ၏ခန္ဓာကိုယ် ပျက်စီးမှုကြောင့် သေဆုံးသွားခဲ့သည်မှာ ကြာလောက်ပါပြီ။

သတ်ဖြတ်ခြင်း (၆) သွယ် မကောင်းဆိုးဝါးလူသားက အတော်လေးကို စိတ်ရှည်နေခဲ့သည်။ သူက မုန့်ချီနှင့် မဆုံးနိုင်အောင် တိုက်ခိုက်နေခဲ့ပြီး သူ့ကို သတ်ဖြတ်ရေးသိုင်းကွက်များ အသုံးပြုရန် အခွင့်အရေး မပေးခဲ့ပေ။ သို့သော် ထိုအချိန်တွင် သူကိုယ်တိုင်ကလည်း အတိအကျ အနိုင်ရရန် အခွင့်အရေးတစ်ခု မတွေ့နိုင်သေးပေ။

"သူက တစ်ခုခုကို စောင့်နေသလိုပဲ…"

ထိုအရာက မုန့်ချီ ခံစားမိခဲ့သော အရာတစ်ခု ဖြစ်သည်။

ချီစွမ်းအင်များ၏ ချုပ်နှောင်မှုကြောင့် သတ်ဖြတ်ခြင်း (၆) သွယ် မကောင်းဆိုးဝါးလူသားက အလွန်လေးလံသော ခံစားမှုတစ်ခုကို ခံစားမိခဲ့သည်။ ထို့ကြောင့် မုန့်ချီ၏အရှိန်အဝါက မြင့်တက်လာခဲ့၏။ သို့သော် ပြိုင်ဘက်က လှည့်ပတ်သွားလာနေသော တိုက်ခိုက်ရေးပုံစံကြောင့် ထိုအရာကလည်း ကန့်သတ်မှုများ ရှိနေသည်။

ကောင်းကင် (၉) သွယ်မှ မိုးကြိုးနတ်ဘုရား ချဉ်းကပ်လာသည်ကိုကြည့်ပြီး ရွမ်ယုရှုဆီတွင် ပထမဆုံး ပေါ်လာခဲ့သည်မှာ အကြောက်တရားများ ဖြစ်သည်။ ထို့နောက် သူမက ပင့်သက်ရှိုက်လိုက်မိပြီး တင်ပျဉ်ခွေထိုင်၍ သူမ၏ဗျပ်စောင်းပေါ်သို့ လက် (၂) ဖက်ကို တင်လိုက်၏။

ထိုအချိန်တွင် သူမ၏အဘိုး (၉) ဖြစ်သော ရွမ်ကန်ဆီမှ အသံတစ်ခု ထွက်လာခဲ့သည်။

"အခြေအနေက ပြောင်းလဲသွားပြီ။ ဝင်္ကပါက အရမ်းကိုအန္တရာယ်များတယ်…"

မျက်စိတစ်မှိတ်အတွင်း သူမဆီတွင် အတွေးပေါင်းများစွာ ပေါ်လာခဲ့၏။ နောက်ဆုံးတွင်တော့ ရွမ်ကန်က သူမကို ရှာတွေ့သွားခဲ့သည်။ ရွမ်ယုရှုက ထိတ်လန့်နေသည့်အချိန်တွင် ရွမ်ကန်က တစ်စုံတစ်ခုကို ပြောပြနေပြီး ပတ်ဝန်းကျင်ကို အာရုံခံရန် သူ၏အငွေ့အသက်ကို အသုံးချလိုက်သည်။

"အနားမှာ ဝေ့ကျင်းအဆင့် ပညာရှင်တစ်ယောက် ရှိနေတာလား။ မြန်မြန်ပြန်လာခဲ့တော့..."

ကောင်းကင် (၉) သွယ်မှ မိုးကြိုးနတ်ဘုရားကို ခံစားမိသည့်အချိန်တွင် သူ့လေသံက အတော်လေးကို ပျက်သွားခဲ့သည်။ သူကတော့ ဝင်္ကပါထဲတွင် စွမ်းအားများများ အသုံးပြုနိုင်ခြင်း မရှိခဲ့ပေ။ ရွမ်ယုရှုကို ပြန်ခေါ်ရန်သာ လုံလောက်၏။

ထိုအချိန်တွင် သူမ၏ခန္ဓာကိုယ်က လှုပ်ရှားလာနေကြောင်း ရွမ်ယုရှုက ခံစားမိခဲ့၏။ သူမ၏မျက်နှာပေါ်တွင်လည်း ရှားရှားပါးပါး အမူအရာတစ်ခု ပေါ်လာခဲ့သည်။ သူမကတော့ တိုက်ပွဲထဲတွင် ထိန်းချုပ်ခံထားရသော မုန့်ချီကို လှည့်ကြည့်လိုက်၏။

ချီကျန်းရန်နှင့် ကျိုးဟမ်တို့ကလည်း တိုက်ခိုက်နေကြောင်း မြင်လိုက်ရသည်။ နောက်ဆုံးတွင်တော့ သူမက တောင်ကုန်းဆီသို့ လျင်မြန်စွာ ချဉ်းကပ်လာနေသော မိုးကြိုးနတ်ဘုရားကိုကြည့်ပြီး သူမ၏ခံစားချက်များက ခိုင်မာသွားခဲ့၏။

"ကလေးမ …ဘာတွေလုပ်နေတာလဲ…"

ရွမ်ကန်၏အသံက ပျောက်ကွယ်သွားခဲ့ပြီး သူ၏အငွေ့အသက်များက ထူးဆန်းစွာ ပျောက်ကွယ်သွားခဲ့သည်။

ရွမ်ယုရှုက ခေါင်းငုံ့ပြီး ပြောလိုက်၏။

"အဘိုး…

သမီးက ဉာဏ်ကောင်းတဲ့ကလေးတစ်ယောက်လို့ အဘိုးက အမြဲတမ်းပြောတယ်။ ဒါပေမဲ့ သမီးက တကယ့်ကို ဉာဏ်တုံးပါတယ်။ သမီးက အသက်ရှင်ရပ်တည်ဖို့ လွယ်ကူတဲ့လမ်းကို လက်လျှော့ပြီး သေခြင်းတရားတွေပြည့်နေတဲ့ လမ်းကြောင်းကိုပဲ ရွေးချယ်ခဲ့တယ်…"

သူမက အိပ်တန်းတက်ဇာမဏီဗျပ်စောင်းကို လေထဲသို့မြှောက်လိုက်ပြီး စောင်းကြိုးများကို တီးခတ်လိုက်သည်။ ထို့နောက် ကောင်းကင် (၉) သွယ်မှ ဇာမဏီငိုကြွေးသံ စတင် ပေါ်ပေါက်လာခဲ့၏။

Translated by Hein Htet.