အခန်း (၅၂၃)

တိမ်တိုက်ပြာဘိုးဘေး မျက်နှာဖုံး ဝတ်ဆင်ထားသော ချူချမ်းနင်က အလွန်ရှေးကျသည့် နတ်ဘုရားကမ္ဘာကြီး အကြောင်းကို ပြောပြခဲ့သည်။ သူမက လေးလေးနက်နက် အမူအရာနှင့် ပြောလိုက်၏။

"လက်ရှိနတ်ဘုရားကမ္ဘာကြီးထဲမှာ အင်မော်တယ်တွေနဲ့ ပတ်သက်တဲ့ ပုံပြင်၊ ဒဏ္ဍာရီတွေ ရှိသေးတယ်။ သူတို့ကတော့ ချန်းအဖွဲ့အစည်းနဲ့ ကျဲအဖွဲ့အစည်းပဲ။ သူတို့က အင်မော်တယ်တစ်ချို့နဲ့ တွေ့ဆုံခဲ့ရပြီး သူတို့ရဲ့ရတနာတွေ၊ စွမ်းရည်တွေကို အမွေဆက်ခံရရှိခဲ့တယ်ဆိုတဲ့ ပုံပြင်၊ ဒဏ္ဍာရီတွေလည်း အများကြီး ရှိတယ် ။ ဒါပေမဲ့ ငါတို့က ဘယ်လောက်ပဲ ကြိုးစားစေကာမူ အစစ်အမှန် အင်မော်တယ်တွေကိုတော့ ရှာမတွေ့ခဲ့ဘူး…”

“အဲဒီအတွက်ကြောင့် ဘိုးဘေးကတောင် သူ့ရဲ့အစီအစဉ်တွေကို ချောချောမွေ့မွေ့ မလုပ်နိုင်ခဲ့ဘူး။ ဘိုးဘေးနဲ့ တစ်ခြားသူတွေက စိမ်းပြာနန်းတော်ကို ရှာတွေ့ခဲ့တဲ့ အချိန်မှာ ငါတို့က အကြိမ်ပေါင်းများစွာ အောင်မြင်ဖို့ နီးစပ်ခဲ့တယ်။ သူတို့က ယွင်ကျုံးကျိ သေဆုံးသွားခဲ့တဲ့ အစစ်အမှန်နေရာကိုလည်း ရှာတွေ့ခဲ့တယ်။ ထူးဆန်းတဲ့ အရာကတော့ အဲဒီနေရာမှာ နောက်ဆုံးစကားလုံးတွေ၊ ပစ္စည်းတွေက လွဲလျှင် အင်မော်တယ်အလောင်းတွေတောင် မရှိတာပဲ…”

“စိမ်းပြာနန်းတော်ကြီးကို ဥပမာအနေနဲ့ သတ်မှတ်လို့ရတယ် ။ အဲဒီနေရာမှာ ဘာမှမရှိပေမဲ့ ဝါးကျောက်စိမ်း သိုင်းကျမ်းတွေ၊ ကျင့်စဉ်သိုင်းကျမ်းတွေကို သပ်သပ်ရပ်ရပ် စီစဉ်ထားပြီး ပိုင်ရှင်က အပန်းဖြေခရီးသွားနေသလိုမျိုးပဲ။ တကယ်လို့ အသက်မရှိတဲ့ ဆေးရည်တွေကြောင့်သာ မဟုတ်လျှင် ဘိုးဘေးက စိမ်းပြာနန်းတော်ထဲမှာ လှုပ်ရှားရဲမှာတောင် မဟုတ်ဘူး။ အနည်းဆုံးတော့ အင်မော်တယ်တစ်ယောက်က သူတို့ကို လက်တုန့်ပြန်မှာ ကြောက်သေးတယ်လေ.."

"အဲဒါက တကယ့် အစစ်အမှန် စိမ်းပြာနန်းတော်လား…"

မုန့်ချီက ပတ်ပတ်လည်ကို လှည့်ကြည့်ပြီး အံ့သြနေခဲ့၏။

"ကောင်းကင်မြင့်မား တမန်တော်က ဘယ်နေရာမှာလဲ။ တကယ်လို့ သူတစ်နေ့နေ့ ပြန်ရောက်လာမယ်ဆိုရင် ကျွန်တော်တို့က ပြဿနာများပြီ။ ဘိုးဘေးက စိမ်းပြာနန်းတော်ကို ဘယ်နေရာမှာ ရှာတွေ့ခဲ့တာလဲ…"

မုန့်ချီက မေးလိုက်သည်။

ချူချမ်းနင်က သူ့ကို မျက်ခုံးပင့်၍ ကြည့်လိုက်၏။

"မင်းက နတ်ဘုရားကမ္ဘာကြီးကိုတောင် မရောက်ဖူးသေးဘူး ။ နေရာသိတော့ရော ဘာလုပ်မှာလဲ ။ အဲဒါဟန်နယ်မြေထဲမှာ ရှိတဲ့ ခွမ်းလွန်တောင်ပေါ်မှာ ဖြစ်နိုင်တယ်…"

"ခွမ်းလွန်တောင်တန်းလား။ "

မုန့်ချီက အတော်လေးကို နားမလည်နိုင် ဖြစ်သွားခဲ့၏။

"ငါ့ကို လာနောက်နေတာလား…"

သို့သော် သိပ်မကြာခင် သူကိုယ်သူ ထိန်းချုပ်လိုက်ပြီး မျက်မှောင်ကြုတ်၍ စဉ်းစားနေခဲ့သည်။

"ငါကတော့ အဲဒီအရာက ပြင်ပနယ်မြေထဲမှာလို့ တွေးထားခဲ့တာ။ ဒါဆိုရင် ကျောက်စိမ်းပုံရိပ်ယောင်နန်းတော်က ဘယ်နေရာမှာလဲ…"

ရုတ်တရက်ဆိုသလို သူက တစ်စုံတစ်ခုကို ခံစားမိသွားသည်။

"ဟန်နယ်မြေ ဟုတ်လား။ ဒါဆိုရင် အဲဒီနေရာက နတ်ဘုရားကမ္ဘာကြီးကနေ နှစ်ပေါင်း (၅၀၀) ကြာ နွေဦးရာသီနဲ့ နွေရာသီ ကြားကာလမှာလား။ ဟန်နယ်မြေက ဘယ်နေရာမှာလဲ…"

ချူချမ်းနင်က မုန့်ချီ၏ သံသယများကို သတိမထားမိခဲ့သည့်အတွက် ဆက်ပြောလိုက်သည်။

"ကမ္ဘာကြီးရဲ့အစစ်အမှန် သမိုင်းကြောင်းအရ ပြောရရင် နတ်ဘုရားကမ္ဘာကြီး ပြီးဆုံးသွားပြီးနောက် ရှဲ့အင်ပါယာရဲ့ မျိုးဆက်တွေက နယ်မြေတွေကို သိမ်းပိုက်ခဲ့တယ်။ သိပ်မကြာခင် အလယ်ပိုင်းအုပ်စိုးမှုက ပျက်စီးသွားခဲ့ပြီး ဝင်ရိုး(၄)ခုက နယ်မြေ(၄) ခု ခွဲထွက်သွားခဲ့တယ်။ နယ်မြေတစ်ခုချင်းဆီတိုင်းကလည်း ပျက်စီးသွားခဲ့တယ်…”

“နှစ်ပေါင်း (၁၀၀) အတောအတွင်း မင်းသားတစ်ပါးဆီက အာဏာယူပြီး အချင်းချင်း တိုက်ခိုက်ခဲ့ကြတယ်။ တော်ဝင်အမိန့်တွေကလည်း အကျိုးသက်ရောက်မှု မရှိတော့ဘူး။ ဒါမှမဟုတ် မင်းသားတွေက အချင်းချင်း ပစ်မှတ်ထားနေလို့လဲ ဖြစ်နိုင်တယ်။ အရာအားလုံးက ပျက်စီးနေပြီး သိပ်မကြာခင် သူတို့က ပြည်နယ်တစ်ခုအဖြစ် ထွက်ပေါ်လာခဲ့ကြတယ်။ လီစနစ်ကို ဖျက်သိမ်းလိုက်ပြီးတဲ့နောက် ပညာရှင်တွေ အများကြီးလည်း ထွက်ပေါ်လာခဲ့တယ်…"

"အဲဒီမင်းသားတွေက ဘယ်နေရာကနေ ရောက်လာတာလဲ.."

မုန့်ချီက သူတို့အကြောင်း သိထားခြင်း ရှိမရှိ စစ်ဆေးချင်ခဲ့သည်။

ချူချမ်းနင်က လက်ချောင်းလေးများနှင့် ရေတွက်နေခဲ့၏။

"သူတို့ကတော့ ဟန်၊ ချင်၊ ချူး ၊ ထန် ၊ မင်၊ ရန်၊ ကျိုး၊ လု၊ ဝူ၊ စုန့်နဲ့ တစ်ခြားသူတွေပဲ…"

"သူတို့တွေက ငါသိထားတဲ့အရာတွေနဲ့ တကယ့်ကို ကွဲပြားတာပဲ…."

မုန့်ချီ၏မျက်လုံးများက လှုပ်ရှားသွားခဲ့သည်။ ကြည့်ရသည်မှာ အင်မော်တယ် ဝင်္ကပါထဲတွင် မင်းသားပေါင်းများစွာက သေဆုံးထွက်ပေါ်လာပုံရသည်။ ထို့ကြောင့် မတူညီသော မင်းသားများက ဦးဆောင်ပြီး မတူညီသော အခြေအနေများ ဖွံ့ဖြိုးတိုးတက်လာခြင်း ဖြစ်၏။

"အဲဒီမင်းသားတွေက အင်မော်တယ်တွေ၊ သူတော်စင်တွေရဲ့ မျိုးဆက်တွေပဲ ။ သူတို့က မီးခိုးတွေကို မှုတ်ထုတ်နိုင်သလို လေလှိုင်းနဲ့အတူ ပျံသန်းနိုင်ကြတယ်။ သူတို့က မှော်နည်းလမ်းမျိုးစုံ ပိုင်ဆိုင်ထားပြီး နတ်ဘုရားလက်နက်တွေတောင် ပိုင်ဆိုင်ထားသေးတယ်…"

ချူချမ်းနင်က မုန့်ချီကို လေးလေးနက်နက် သတိပေးလိုက်သည်။

"မင်းက တော်တော်သတိထားဖို့ လိုလိမ့်မယ်။ ဂိုဏ်းတွေရဲ့ မျိုးဆက်တွေ၊ အင်မော်တယ်တွေရဲ့ မျိုးဆက်တွေက အသက်ရှင်နေသေးတယ်။ နတ်ဘုရားကမ္ဘာကြီးထဲက ပစ္စည်းတွေကို သူတို့က လျှို့ဝှက်ရတနာတွေ ဖန်တီးထားနိုင်တယ်…”

“လျှို့ဝှက်ရတနာတစ်ခုရဲ့အစွမ်းက ကြောက်စရာကောင်းသလို ထူးလည်းထူးဆန်းတယ် ။ ငါတို့ကမ္ဘာကြီးထဲမှာ ရှိတဲ့အရာတွေက ဘာမှမယှဉ်နိုင်ဘူး။ မင်းထက် ပိုပြီးအားနည်းတဲ့ လူတစ်ယောက်ကတောင် မင်းကို လျှို့ဝှက်ရတနာတစ်ခုနဲ့ သတ်ပစ်နိုင်လိမ့်မယ်…”

“အင်မော်တယ်တွေထဲမှာ အဲဒီကမ္ဘာကြီးထဲက ဂိုဏ်းတစ်ချို့နဲ့ ပြဿနာတက်ခဲ့တဲ့ ရွှမ်ထျန်းအရှင်ဆိုတာ ရှိတယ်။ သူက ကျိန်စာမှတ်တမ်းကို ရခဲ့တဲ့အချိန်မှာ သူတို့ရဲ့လျှို့ဝှက်ရတနာနဲ့ သတ်တာကို ခံလိုက်ရတယ်။ ဘိုးဘေးကတောင် လက်တုန့်ပြန်ဖို့ ရန်သူကို ရှာမတွေ့ခဲ့ဘူး…"

မုန့်ချီက အံ့သြမှင်တက်သွားခဲ့သည်။

"ရွှမ်ထျန်းအရှင် ကျိုးကုန်မင်လား။ သူက ကျိန်စာမှတ်တမ်းအတုနဲ့ သတ်တာကို ခံခဲ့ရတာလား။ ဒါဆိုရင်တော့ ဒါက သူ့ရဲ့ကံကြမ္မာလို့ပဲ ပြောရလိမ့်မယ်…"

မုန့်ချီက လျှို့ဝှက်ရတနာများကြောင့် အံ့သြမှင်တက်နေသည်ဟု တွေးမိခဲ့သည့်အတွက် ချူချမ်းနင်က ဆက်ပြောလိုက်သည်။

"အဲဒီအပြင် သူတို့ဆီမှာ ရင်ဆိုင်ဖို့ ခက်ခဲတဲ့ မှော်နည်းလမ်းတွေလည်း ရှိသေးတယ်။ ငါက ဝေ့ကျင်းအဆင့်ကို ရောက်နေတဲ့ ရန်သူတစ်ယောက်နဲ့ တစ်ကြိမ်တွေ့ခဲ့ဖူးတယ်။ ပထမတော့ ငါက သူ့ကို အပိုင်းပိုင်းအစစ ဖျက်စီးနိုင်တော့မလို့ပဲ။ ဒါပေမဲ့ ရုတ်တရက်ဆိုသလို သူ့ရဲ့နှာခေါင်းထဲကနေ အဖြူရောင် အလင်းတန်းတစ်ခု ထွက်လာခဲ့တယ်။ ငါ့ရဲ့ပင်မဝိညာဉ်ကလည်း သူ ဖမ်းချုပ်တာကို ခံလိုက်ရတယ်။ တကယ်လို့ ငါနဲ့အတူ တစ်ခြားအဖော်တွေသာ ပါမလာခဲ့ရင် ငါက ဆိုးဆိုးဝါးဝါး သေဆုံးသွားခဲ့မှာပဲ…"

"စစ်သူကြီးဟန်နှင့် သူ၏ဆက်ခံသူ…"

မုန့်ချီက အတွေးနှင့် ခေါင်းညိတ်ပြလိုက်သည်။

ချူချမ်းနင်က ပြောပြလိုက်ပြီးနောက် မုန့်ချီက နတ်ဘုရားကမ္ဘာကြီး အကြောင်းကို ယေဘုယျအားဖြင့် နားလည်လာခဲ့သည်။ ထိုလက်အောက်ခံ ပြည်နယ်များက အသေးစိတ်အားဖြင့် အနည်းငယ် ကွဲပြားသော်လည်း သူတို့က လီစနစ် ကျဆုံးသွားသည့်အချိန်တွင် ပေါ်လာခဲ့ခြင်းဖြစ်သည်။ ထိုအချိန်တွင် သူတော်စင်များက ပျောက်ကွယ်သွားခဲ့ပြီး အတွေးအခေါ်ကျောင်းများကလည်း ဆုတ်ယုတ်လာခဲ့၏။

အင်မော်တယ်နယ်မြေထဲမှ ထွက်လာပြီးနောက် မုန့်ချီက သေမင်းပင်လယ်ထဲကို ရောက်လာပြီး နောက်တစ်ကြိမ် ပိုမီကို ပြန်ရောက်လာခဲ့သည်။ ထိုအချိန်တွင် ပိုမီနယ်မြေထဲ၌ ရှိနေသော အနီရောင်မြူခိုးများက ပါးလွှာသွားခဲ့၏။

နောက်ထပ်(၁၀)စုနှစ် အနည်းငယ်ကြာပြီးသွားလျှင် မူလမဟုတ်သော ရေများက လုံးဝပျောက်ကွယ်သွားနိုင်ကြောင်း မုန့်ချီက မျှော်လင့်ထားခဲ့သည်။ ထိုနေရာတွင် ပုန်းအောင်းနေသူများကလည်း ပုန်းအောင်းရန် တစ်ခြားနေရာကို ရှာဖွေရတော့မည် ဖြစ်သည်။ မုန့်ချီက သူတို့ကို သနားနေခြင်းမရှိခဲ့ပေ။

သူက ပိုမီအပြင်ဘက်တွင် လျှို့ဝှက်နေရာတစ်ခုကို ရှာဖွေကြည့်လိုက်ပြီး နေကျောက်တုံး၊ ကျယ်ပြန့်မြေသားနှင့် တစ်ခြားသော တွင်းထွက်ပစ္စည်းများကို ထုတ်လိုက်သည်။

သူက အသွင်ပြောင်း(၇၂) မျိုးကျင့်စဉ်နှင့် ကောင်းကင်ရွှေကျင့်စဉ်၏ ဝေ့ကျင်းအဆင့် ကျင့်စဉ်ထဲတွင် ပါဝင်နေသော အရာများကို စုစည်းပြီး စတင်လေ့ကျင့်လိုက်သည်။ နေလုံးကြီး၏ အစစ်အမှန် နေမီးတောက်များက နေကျောက်တုံးဆီမှ တောက်ပစွာ ထွက်ပေါ်လာခဲ့သည်။

မုန့်ချီက အနည်းငယ် ရှုရှိုက်လိုက်ရာ သူတို့အားလုံးက သူ၏နှာခေါင်းထဲကို ဝင်ရောက်သွားခဲ့၏။ အသွင်ပြောင်း(၇၂)မျိုးကျင့်စဉ်၏ ချီစွမ်းအင်များ လွှမ်းခြုံနေသော သူတို့က သူ၏သွေးကြောမှတ်များကို ဖြတ်၍ သင့်လျော်သော တံခါးပေါက်များထဲသို့ ဝင်ရောက်သွားသည်။

သူတို့က နေလုံးကြီးနှင့် ဖြည်းညင်းစွာ ပေါင်းစပ်သွားပြီး အတွင်းအပြင် လွှမ်းမိုးမှုက တဖြည်းဖြည်း ပို၍စစ်မှန်လာခဲ့သည်။ သိပ်မကြာခင် အနီရောင်အလင်းတန်းများက မုန့်ချီ၏ ပတ်ပတ်လည်တွင် တောက်ပလာခဲ့၏။ ရေလှိုင်းမီးတောက်ဓား၏ စွမ်းအင်များကလည်း သူ၏နှာခေါင်းထဲသို့ ဝင်ရောက်လာခဲ့ပြီး နှာခေါင်းထဲမှ အဖြူရောင်အငွေ့များ ထွက်လာခဲ့သည်။

မြူခိုးများနှင့် မြူခိုးငွေ့များက နတ်ဘုရားတစ်ပါး ပေါ်လာသည့်အလား သူ၏ ပတ်ပတ်လည်တွင် လွင့်မျောနေခဲ့၏။ ကောင်းကင် (၄) သွယ် ဝေ့ကျင်းအဆင့်၏ အောက်တွင် ရှိသော ပညာရှင်များက ကမ္ဘာမြေကြီး၏ ချီစွမ်းအင်များကို ရှူရှိူက်ပြီး လေ့ကျင့်မှုကို အာရုံစိုက်ရန် လိုအပ်သည်။

ထို့နောက် သူတို့က သင့်လျော်သော သွေးကြောမှတ်များဆီသို့ စုစည်းပြီး ပုံရိပ်ယောင်ခန္ဓာကိုယ်ကို အစစ်အမှန်ဖြစ်လာအောင် စုစည်းရသည်။ အတွင်းပိုင်း ပင်မဝိညာဉ်၊ ခန္ဓာကိုယ်နှင့် ပေါင်းစပ်နေသည့်အချိန်တွင် ပုံရိပ်ယောင်ခန္ဓာကိုယ်ကို ဖန်တီးနိုင်သည်။

ကမ္ဘာမြေကြီးက လှုပ်ရှားလာပြီး အတွင်းနှင့်အပြင် ကမ္ဘာကြီးများ ဆက်သွယ်ထားသည့် အချိန်တွင် သူတို့က ဖြစ်ပေါ်လာသည်။ လူတစ်ယောက်၏ လမ်းကြောင်းကို ကိုယ်စားပြုပြီး သွေးကြောမှတ်များထဲတွင် အမြစ်တွယ်နေသည့် သူတို့က အတွင်းပိုင်းထဲကို အခြေခံထားသည်။

သူတို့၏ အဓိက အစိတ်အပိုင်းက ပင်မဝိညာဉ်သာ ဖြစ်သည်။ သွေးကြောမှတ်များ အတွင်းပိုင်းအနှစ်သာရများက မတူညီသောစွမ်းအင်များ၊ လမ်းကြောင်းများကို ကွဲပြားသွားစေသည်။

ဥပမာအနေနှင့် ပြောရလျှင် ကျော်ကြားခြင်း(၇) သွယ် မကောင်းဆိုးဝါး၏ ပုံသဏ္ဍာန်က အတွင်းပိုင်းထဲကို အခြေခံထားပြီး သွေးကြောမှတ်များအားလုံးက အဖွဲ့(၇) ဖွဲ့အဖြစ် ကွဲပြားနိုင်သည်။ သွေးကြောမှတ် အစုတစ်ခုချင်းဆီတိုင်းကလည်း အနှစ်သာရတစ်ခုဆီ လေ့ကျင့်နိုင်ပြီး တူညီသော ချီစွမ်းအင်များကို အသက်ရှူနိုင်သည်။

ကမ္ဘာမြေကြီး၏ ချီစွမ်းအင်များက သွေးကြောမှတ်များ၊ အတွင်းပိုင်းနှင့် ပုံရိပ်ယောင်များထဲတွင် ပေါင်းစပ်လာပြီးနောက် ဖြည်းညင်းစွာ အခဲဖြစ်လာကြသည်။ ပထမကောင်းကင်လှေကားကို ဖြတ်ကျော်လာပြီးနောက် ပုံရိပ်ယောင်ခန္ဓာက အနှစ်သာရနှင့် နီးကပ်နေပြီ ဖြစ်ပြီး ခန္ဓာကိုယ်၏အပြင်ဘက်တွင် တိုက်ရိုက်ဖော်ထုတ်နိုင်သည်။

ထိုအရာက ဝေ့ကျင်းအဆင့် ပညာရှင်များ၏ ထိပ်တန်း သိုင်းကွက်တစ်ခုလည်း ဖြစ်၏။ ထို့နောက် လူတစ်ယောက်က ပုံရိပ်ယောင်ခန္ဓာကိုယ်ကို လေ့ကျင့်နိုင်ပြီး ကမ္ဘာမြေကြီး၏ အနှစ်သာရများကို ဖမ်းဆုပ်၍ ခန္ဓာကိုယ်နှင့် ပေါင်းစပ်ရသည်။

ထိုအရာကို လုပ်နိုင်မည်ဆိုရင်တော့ သူက ပြိုင်ဘက်ကင်း သိုင်းပညာရှင် တစ်ယောက်ဟု သတ်မှတ်နိုင်ပါလိမ့်မည်။ ဒုတိယကောင်းကင်လှေကားကို ဖြတ်ကျော်ပြီးသွားလျှင်တော့ ပုံရိပ်ယောင်ခန္ဓာနှင့် အနှစ်သာရများက ကနဦး ပေါင်းစပ်ပြီးသွားသည့်အချိန်တွင် သိုင်းသခင်တစ်ယောက်ဟု သတ်မှတ်နိုင်သည်။

နောက်ဆုံးတတိယကောင်းကင်လှေကားကို ဖြတ်ကျော်ပြီးသွားလျှင်တော့ ပုံရိပ်ယောင်ခန္ဓာက ခန္ဓာကိုယ်နှင့် ပေါင်းစပ်လာပါလိမ့်မည်။ လူတစ်ယောက်က အနှစ်သာရများနှင့် ပေါင်းစပ်ပြီး သူ၏လှုပ်ရှားမှုထဲတွင် ကြောက်စရာကောင်းသော အစွမ်းများကို ပြသနိုင်၏။ သူ့ဆီတွင် အံ့သြစရာကောင်းသော နည်းလမ်းပေါင်းစုံ ရှိနေနိုင်ပြီး သူ့ကို အဆင့်မြင့် သိုင်းသခင်တစ်ယောက်ဟု သတ်မှတ်နိုင်၏။

ဝေ့ကျင်းအဆင့် ပထမကောင်းကင်(၃) ခုကတော့ သူတို့ ဖွင့်ထားခဲ့သော တံခါးပေါက်များအပေါ် မှီခိုနေသည်။ တံခါးပေါက် တစ်ဝက်ကျော် ဖွင့်ပြီးသွားသည့်သူက ဒုတိယကောင်းကင်အဆင့်ဟု သတ်မှတ်နိုင်သည်။ သွေးကြောမှတ်များအားလုံးကို ဖွင့်နိုင်မည်ဆိုလျှင်တော့ တတိယကောင်းကင်အဆင့်ဟု သတ်မှတ်နိုင်၏။ နောက်ဆုံးတွင်တော့ ပုံရိပ်ယောင် မြင်ကွင်းများက ရုပ်လုံးပေါ်လာပြီး ပထမကောင်းကင်လှေကားကို ဖြတ်ကျော်နိုင်ပါလိမ့်မည်။

မူလတွင်တော့ လူတိုင်းက ကမ္ဘာမြေကြီး၏ချီစွမ်းအင်များကို အသက်ရှူ၍ လေ့ကျင့်နိုင်ကြသည်။ သို့သော် ပြောင်းလဲမှုများ ဖြစ်ပေါ်လာပြီးနောက် သက်တမ်းက တိုသွားပြီး ချီစွမ်းအင်များက တဖြည်းဖြည်း ပို၍ပါးလွှာလာသည်။ ထို့ကြောင့် သိုင်းပညာရှင်များက သူတို့၏လေ့ကျင့်မှု လျင်မြန်လာစေရန် ပင်မချီစွမ်းအင်များအစား ရှားပါးတွင်းထွက်ပစ္စည်းများကို အသုံးပြုကြရသည်။

အထူးသဖြင့် သွေးကြောမှတ်တစ်ခုချင်းဆီတိုင်းတွင် စကြာဝဠာတစ်ခုဆီ ပိုင်ဆိုင်ထားသော မုန့်ချီအတွက် ဖြစ်သည်။ ထို့ကြောင့် သူက ကမ္ဘာမြေကြီး၏ မတူညီသော ချီစွမ်းအင်များကို အာရုံစိုက်ရန် လိုအပ်၏။ ရှားပါးတွင်းထွက်ပစ္စည်းများ၏ အကူအညီ မရှိလျှင် သူ၏လေ့ကျင့်မှု ပြီးဆုံးရန် နှစ်သန်းပေါင်းများစွာ အချိန်ပေးရနိုင်၏။

ထို့ကြောင့် သူက အဆင့်မြင့်တက်လာခဲ့ပြီး ကောင်းကင်ကပ်ဘေး(၄)ကြိမ် ကြုံတွေ့ခဲ့ရပြီးနောက် မုန့်ချီ၏ခန္ဓာကိုယ်အတွင်းပိုင်းက ကမ္ဘာမြေကြီး၏ အနှစ်သာရများနှင့် နီးစပ်နေခဲ့ခြင်း ဖြစ်သည်။

အစစ်အမှန် မီးတောက်နှင့် ချီစွမ်းအင်များက သူ၏ခန္ဓာကိုယ်ထဲသို့ ဝင်ရောက်လာပြီး ပုံရိပ်ယောင်ခန္ဓာနှင့် ပေါင်းစပ်သွားနေခဲ့သည်။ သူတို့က နောက်ထပ်စုစည်းလာခြင်း မရှိဘဲ ပေါင်းစပ်မှုက အမှန်တကယ်ကို လျင်မြန်လာ၏။

သိပ်မကြာခင် (၂) လဟူသော အချိန်ကုန်ဆုံးသွားခဲ့သည်။

အဝါရောင် အလင်းတန်းလေးတစ်ခုက ပိုမီနယ်မြေ၏ အပြင်ဘက်တွင် ပေါ်လာခဲ့၏။ သူမက ပတ်ပတ်လည်ကို လှည့်ကြည့်နေသည့်အချိန်တွင် အဝေးမှ ရယ်သံတစ်ခု ကြားလိုက်ရသည်။

"မိန်းကလေး..

မင်းရဲ့ မျက်ခုံးကြားထဲမှရှိတဲ့ လေဟာနယ်က ကျောက်စိမ်းလို ဖြူဖွေးနေတယ်။ မိန်းကလေးဆီမှာ ဆိုးဝါးတဲ့ ကံကြမ္မာတွေမရှိဘူး။ ကံကောင်းမှုတွေနဲ့ အဆင့်တက်မှု တစ်ချို့တွေပဲ ရှိတယ်.."

ကျန်းကျိဝေက အံ့သြသွားပြီး ရယ်လိုက်မိသည်။ သူမက အနက်ရောင်ဝတ်စုံ ဝတ်ထားသော မုန့်ချီကို ပြန်လှည့်ကြည့်လိုက်၏။

"ငါ အဆင့်တက်သွားတာကို နင် မြင်ရတာလား။ နင်က ဘယ်အချိန်တုန်းကများ ကံကြမ္မာဟောပြောသူတစ်ယောက် ဖြစ်သွားရတာလဲ.."

မုန့်ချီက ကောင်းကင်ရွှေကျင့်စဉ်၏ ကံကြမ္မာကို စတင်လေ့ကျင့်ခဲ့ပြီးနောက် ကံကြမ္မာကွင်းဆက်က အထွဋ်အထိပ်ကို တဖြည်းဖြည်း ပို၍ နီးလာခဲ့သည်။ ထိုအရာက အစစ်အမှန် ပုံသဏ္ဍာန် ပေါ်လာတော့မည်ဖြစ်၏။ ထို့ကြောင့် သူက တစ်ခြားသူများ၏ ကံဆိုးခြင်း၊ ကံကောင်းခြင်းကို မြင်နိုင်သည်။ သူပြောသည့်အရာက မျက်လုံးနှင့် မမြင်နိုင်သော အရာများဖြစ်၏။

သူက ပြုံးလိုက်မိသည်။

"ငါက လက်ချောင်းလေးတွေနဲ့ တွက်ချက်လိုက်တာပဲလေ.."

သူက အပြုံးနှင့် ထပ်ပြောလိုက်၏။

"နင်လဲထားတဲ့ အချိန်က တစ်နှစ်နီးပါးလောက် ကျန်သေးတယ်။ ပြီးတော့ နင်က တံခါးပိတ်လေ့ကျင့်နေခဲ့ပြီး တာဝန်တစ်ခု လုပ်ဆောင်ရတယ်။ တကယ်လို့ နင်က ဦးလေးစုလို တစ်နှစ်မှာ အဆင့်တစ်ဆင့် မတက်နိုင်ဘူးဆိုရင်တောင် အနည်းဆုံးတော့ သွေးကြောမှတ် တစ်ဝက်လောက်ကိုတော့ စုစည်းနိုင်မှာပဲလေ။ ဒီတော့ ဒုတိယကောင်းကင်အဆင့်ကို တက်လှမ်းသွားပြီပေါ့။ ဒါက ခန့်မှန်းရတာ လွယ်ပါတယ်။"

ကျန်းကျိဝေက လှပစွာပြုံးလိုက်ပြီး မုန့်ချီကို ခြေဆုံးခေါင်းဆုံး ကြည့်နေခဲ့သည်။

"ငါလည်း ခန့်မှန်းကြည့်မယ်လေ။ နင်ရဲ့မျက်နှာက လန်းဆန်းနေတယ်။ ကြည့်ရတာ နင်လည်း တော်တော်လေး အကျိုးအမြတ်ရှိခဲ့တယ်ထင်တယ်။ နင့်ပုံစံကို ကြည့်ရတာ စိုးရိမ်နေပုံ မရတဲ့အပြင် အပူအပင်မဲ့တောင်ကြားနဲ့ ပတ်သက်ပြီး ဘာမှမပြောခဲ့ဘူး။ နင်က အဲဒီအရာကို ရှာပြီးသွားပြီလား…"

မုန့်ချီက ချောင်းဟန့်လိုက်ပြီး ခြောက်ကပ်စွာ ရယ်လိုက်မိသည်။

"ဒါကတော့ အခွင့်အရေး နဲ့ အချိန်အခါကြောင့်ပါ။ ငါတို့ ပထမကောင်းကင်လှေကားကို ဖြတ်ကျော်ပြီးသွားရင် လုပ်ဖို့လိုတဲ့ အရာတစ်ခုရှိတယ်။ စကားမစပ် ငါက ကျိလော်ကျူးဆီက ပစ္စည်းတစ်ခု ရခဲ့တယ်။ အဲဒါက ပြည့်စုံခြင်းတံခါးကို ဖွင့်ရတဲ့ တံဆိပ်ပြားတစ်ခုလို့ ပြောတာပဲ။ ငါတို့က သွားကြည့်သင့်လား…"

"ကောင်းတယ်လေ…"

ကျန်းကျိဝေက တွေဝေနေခြင်း မရှိဘဲ အပြုံးနှင့် ပြောလိုက်သည်။

သူတို့(၂)ယောက်က သဲမုန်တိုင်းများကြားထဲတွင် ပျံသန်းသွားခဲ့ပြီး ငါးပင်လယ်ဆီကို ဦးတည်သွားခဲ့သည်။ လမ်းတစ်လျှောက်တွင်တော့ မုန့်ချီက အပူအပင်မဲ့တောင်ကြားနှင့် ပတ်သက်သောအရာများကို သူမ သိအောင် ပြောပြခဲ့သည်။ သို့သော် သူက ရေခဲနတ်သမီး၏ ယုံကြည်မှုကို မည်သို့ရခဲ့ကြောင်း ရှင်းမပြခဲ့ပေ။

ကျန်းကျိဝေကလည်း ထိုမေးခွန်းကို မမေးခဲ့ပေ။ သူတို့က ပျံသန်းလာပြီး ရက်အနည်းငယ် ကြာပြီးနောက် မြစ်အရှေ့ပိုင်းငယ်လေးဟုခေါ်သော ငါးပင်လယ်ကို ရောက်လာခဲ့သည်။ သူတို့က ကွမ်လင်းလမ်းထဲတွင် ခြံဝန်းတစ်ခုလုံးကို တွေ့လိုက်ရ၏။

"စကားမပြောတဲ့ တံခါး(၉) ပေါက်အဆင့် ပညာရှင် တစ်ယောက် စောင့်နေတယ်။ ကျိလော်ကျူးက ဒီခြံဝန်းကို တော်တော် အလေးအနက်ထားတာပဲ…”

မုန့်ချီနှင့် ကျန်းကျိဝေတို့က ခြံဝန်းပေါ်မှ ပျံသန်းလာပြီး အမှောင်ထဲတွင် ရောယှက်သွားခဲ့သည်။

ကျန်းကျိဝေက ခေါင်းညိတ်ပြီး ထင်မြင်ချက်ပြောလိုက်၏။

"ပြည့်စုံခြင်းအင်မော်တယ်ရဲ့အုတ်ဂူက နှင်းတောင်တန်းထဲမှာ မြှုပ်နှံထားတယ်လို့ ပြောကြတယ်။ ဒါက ပြည့်စုံခြင်းတံခါးနဲ့ တစ်ခုခု ပတ်သက်နေနိုင်တယ်…"

တာအိုလမ်းစဉ်တွင် ဘိုးဘေးဟူသော နာမည်၏ နောက်တွင် အင်မော်တယ်များ ရှိသည်။ မုန့်ချီက ပြည့်စုံခြင်းအင်မော်တယ်အကြောင်း အနည်းငယ်လေးသာ သိထား၏။

မုန့်ချီက သူ၏စိတ်ဝိညာဉ်စွမ်းအားကို ထုတ်လွှတ်ပြီး ခြံဝန်းထဲတွင် ရှိနေသော ကမ္ဘာမြေကြီးနှင့် ပေါင်းစပ်၍ မြေတိုက်ခန်းကို ရှာဖွေလိုက်သည်။ သိပ်မကြာခင် သူက လျှို့ဝှက်အခန်းတံခါးကို တွေ့သွားခဲ့၏။

သူတို့(၂) ယောက်က အခန်းထဲကို တိတ်တဆိတ် ပျံသန်းလာပြီး လျှို့ဝှက်အခန်းတံခါးရှေ့တွင် ရပ်လိုက်သည်။ သူတို့က မျက်နှာချင်းဆိုင်တွင် ရှိနေသော သော့ပေါက်ထဲသို့ အန်ကုန်ရှဲ့၏သော့ကို ထိုးစိုက်လိုက်သည်။ ထိုသော့ကို ညင်သာစွာ လှည့်လိုက်သည့်အချိန်တွင် လျှို့ဝှက်တံခါးက ဖြည်းညင်းစွာ ပွင့်သွား၏။

မုန့်ချီနှင့် ကျန်းကျိဝေတို့က သတိထား၍ လျှောက်လာကြပြီး လှေကားမှ ဆင်းမသွားခင် တံခါးကို ပြန်ပိတ်လိုက်သည်။ ထိုလှေကား၏ အဆုံးတွင်တော့ နောက်ထပ် ကျောက်တုံးတံခါးရှိနေ၏။

ယခုတစ်ကြိမ်တွင်တော့ မုန့်ချီက ကျိလော်ကျူး၏ သော့နှင့် ဖွင့်လိုက်သည်။ တံခါး၏ နောက်ဘက်တွင်တော့ မည်သည့်အရာမျှ မရှိသလို သေတ္တာတစ်ခုလည်း မတွေ့ရပေ။ အလယ်ခေါင်တွင် တံခါးတစ်ချပ်တည်းသာ ရှိနေပြီး တံခါးပေါ်တွင် အင်းကွက်များစွာ ရေးဆွဲထား၏။ ထိုအရာက အလွန်ထူးဆန်းပုံရပြီး ရှေးဟောင်းအငွေ့အသက်များ ပြည့်နှက်နေသည်။

"ပြည့်စုံခြင်းတံခါး…"

မုန့်ချီက တံဆိပ်ပြားကို ထုတ်လိုက်ပြီး တံခါးပေါ်သို့ တင်လိုက်သည်။

တံခါးထဲမှ မှော်သားရဲတစ်ချို့ထွက်လာမှာဆိုးသည့်အတွက် ကျန်းကျိဝေက သူမ၏ နေဖောက်သက်တန့်ဓားကို ဆွဲထုတ်လိုက်၏။ ထိုအချိန်တွင် တံဆိပ်ပြားထဲမှနေ၍ အစိမ်းရောင်အလင်းတန်းများ ထွက်ပေါ်လာပြီး တံခါးကို လွှမ်းခြုံသွားခဲ့သည်။

မုန့်ချီက တံခါးကို ညင်သာစွာ တွန်းဖွင့်လိုက်၏။ တံခါး၏ နောက်ဘက်တွင်တော့ မီးတောက်များ လောင်ကျွမ်းနေပြီး ချော်ရည်များ အရည်ပျော်ကျနေခဲ့သည်။

"ဒါက ချော်ရည်ထဲမှာပဲ။ ဒီတံခါးက တစ်ခြားနယ်မြေတစ်ခုကို ဦးတည်နေတာလား.."

မုန့်ချီနှင့် ကျန်းကျိဝေတို့က အချင်းချင်း ကြည့်လိုက်မိကြပြီး စိတ်ဝိညာဉ်နှင့် ဆက်သွယ်နေကြသည်။ နောက်ဆုံးတွင်တော့ သူတို့က အတွင်းထဲကို ဖြည်းညင်းစွာ လျှောက်လာခဲ့ကြ၏။ သူတို့အတွင်းထဲကို ဝင်လာခဲ့သည့်အချိန်တွင် ဤကမ္ဘာမြေကြီး၏ ချီစွမ်းအင်များက နည်းပါးနေကြောင်း မုန့်ချီက ခံစားမိလိုက်သည်။

"ဒါက တစ်ခြားကမ္ဘာကြီးတစ်ခုထဲကို ဝင်သွားသလိုမျိုးပဲ…"

ထိုတံခါးက မီးတောက်အဆုံးတွင် ရှိနေသော ကျောက်နံရံတစ်ခုကို ဦးတည်ထား၏။

သူတို့(၂) ယောက်က လေထဲတွင် လွင့်မျောနေကြရင်း ချီစွမ်းအင်များနှင့် လွှမ်းခြုံထားသည့်အတွက် မီးတောက်များ၊ အပူရှိန်များ လက်ထဲမှ လွတ်မြောက်သွားသည်။

ရုတ်တရက်ဆိုသလို ကျန်းကျိဝေက အနည်းငယ် အံ့သြသွားခဲ့၏။

"ဒီနေရာမှာ နေကျောက်တုံးတွေရဲ့ အငွေ့အသက်တွေ တွေ့တယ်။ အဲဒီအရာတွေကို ယူသွားနေတာပဲ။ ခိုးယူသွားတာများလား…"

ကျိလော်ကျူး၏ နေကျောက်တုံးများက မုန့်ချီ၏ ခေါင်းထဲတွင် ချက်ချင်း ပေါ်လာခဲ့သည်။

"အပြင်ဘက်ကို သွားကြည့်ကြစို့…"

မုန့်ချီက တီးတိုးပြောလိုက်ပြီး မီးတောင်အပြင်ဘက်ကို ပျံသန်းလာခဲ့သည်။

အပြင်ဘက်တွင် နေလုံးကြီးက တောက်ပစွာ ထွက်ပေါ်လာနေပြီး အဝေးတွင်လည်း အစက်အပြောက်ကဲ့သို့ ရွာလေးများ ရှိနေသည်။ တောင်တန်းပေါ်တွင် ငှက်တစ်ကောင် ပျံသန်းလာသော်လည်း ထိုငှက်၏ခန္ဓာကိုယ်တစ်ခုလုံးက နက်မှောင်နေပြီး သက်ရှိစွမ်းအားများမရှိပေ။

" ဒါက ငှက်စက်ရုပ်လား…"

ကျန်းကျိဝေကလည်း ထိုအရာကို မြင်လိုက်ရသည်။

Translated by Hein Htet