မင်းတော့ကွိုင်(ပြဿနာ)တက်ပြီချိုးယီ

"ရွှမ်း...."

ဓားတစ်ချောင်းသည်ချိုးယီ​၏ ဘေးတစ်ဖက်မှဝင်ရောက်လာခဲ့သည်။ ချိုးယီလည်းရုတ်တရက်မို့ထိတ်လန့်သွားပြီး အတွင်းအားထုတ်သုံးချိန်မရဘဲ ဘေးတစ်ဖက်သို့ ခန္ဓာကိုယ်အား သုံးပတ်ခန့်လှည့်ကာရှောင်ရှားလိုက်သည်။ ထို့နောက် သူ​၏ယပ်တောင်အား အတွင်းအားအသုံးပြု၍ သူ့အားတိုက်ခိုက်လာသူ​၏ ဦးတည်ဖက်သို့ဖြန့်ထုတ်လိုက်သည်။ 

"ဝုန်း...အုန်း"

အတွင်းအားလှိုင်းလုံးကြီးသည် တစ်ဖက်ရန်သူဆီသို့အရှိန်အဟုန်ဖြင့်တိုးဝင်သွား​၏။ တစ်ဖက်ရှိအဖြူရောင်ပုံရိပ်တစ်ခုသည် လည်း ခန္ဓာကိုယ်အားလေထဲတွင်တစ်ပတ်လှည့်လိုက်ပြီး လက်ဝါးတစ်ချက်အသုံးပြုကာ အတွင်းအားလှိုင်းအားဖော်ထုတ်လိုက်သည်။

"အုန်း....ဘန်း"

အတွင်းအားနှစ်ခုသည် ထိပ်တိုက်တွေ့ဆုံသွားပြီး အတွင်းအားလှိုင်း​၏ ပြင်းထန်မှုကြောင့် ပတ်ပတ်လည်ရှိသစ်ပင်များပင် ယိမ်းထိုးသွားလေသည်။ အတွင်းအားနှစ်ခု​၏ ထိတ်တိုက်တွေ့ရာနေရာဆိူလျှင် သစ်ရွက်များ ကျောက်ခဲများပင် ပတ်ပတ်လည်သို့လွင့်စင်ကုန်ကြလေသည်။ချိုးယီ လေထဲတွင် နောက်သို့အနည်းငယ်လွင့်ထွက်သွားပြီး ခန္ဓာကိုယ်အားလေထဲတွင်လှည့်ပတ်ကာ လေ​၏အဟုန်အားထိန်းချုပ်၍ မြေပြင်ပေါ်သို့ဆင်းသက်လိုက်သည်။ တစ်ဖက်ရှိပုံရိပ်သည်လည်း လေထဲတွင်လွင့်စင်သွားပြီး အနောက်ဖက်ရှိသစ်ပင်အား အားပြုကာ တစ်ဆင့်ခုန်၍ မြေပြင်ပေါ်သို့ပြန်လည်ဆင်းသက်လိုက်သည်။

ချိုးယီသူ​၏ယပ်တောင်အား ခေါက်ကာ သက်ပျင်းချ၍ စိတ်ပျက်လက်ပျက်ဖြင့်အနောက်သို့လှည့်ကာစကားပြောလိုက်သည်။

"ခင်ဗျားကဘယ်သူတုန်း ဘာကိစ္စကျုပ်ကိုတိုက်...."

ချိုးယီစကားပြောရင်းနောက်သို့လှည့်ကြည့်လိုက်သောအခါ သူစကားပြော၍ပင်မဆုံးသေးချေ စကားတစ်ဝက်ခန့်တွင်ရပ်လိုက်ရသည်။ ချိုးယီအလွန်အံ့အားသင့်သွားပြီး စကားပင်ဆက်မပြောနိုင်တော့ချေ။ အလွန်လှပသော မျက်နှာလေးတစ်ခုသည် ချိုးယီအားဆီးကြိုနေပြီး ချိုးယီ​၏ စကားများကိုရပ်တန့်သွားစေခဲ့သည်။ ယောက်ျားတိုင်းစွဲမက်စေနိုင်သောခန္ဓာကိုယ်အချိုးအစားနှင့် အဖြူရောင်ဝတ်စုံအားဝတ်ဆင်ထားသော ဟယ်ရှီးယွင်ပင်ဖြစ်လေသည်။ ဟယ်ရှီးယွင်သည် ချိုးယီအားညို့ယူနိုင်သောပင်လယ်နက်ပြာကဲ့သို့မျက်လုံးများဖြင့်စိုက်ကြည့်နေခဲ့ပြီး ချိုးယီလည်း သူ​၏စိတ်သည် လောကကြီးနှင့်အဆက်အသွယ်ပျက်နေသည့်အတိုင်းပင်။ တစ်ယောက်နှင့်တစ်ယောက်အချိန်အကြာကြီးစိုက်ကြည့်နေပြီးမှ ချိုးယီသတိပြန်ဝင်လာပြီး မျက်နှာအမူအရာအား ရေကဲ့သို့ကြည်လင်နေအောင်ပြန်ထိန်းသိမ်းလိုက်သည်။ ထို့နောက် ချိုးယီ လက်နှစ်ဖက်အားစုလိုက်ပြီး တည်ငြိမ်သောအသံဖြင့်မေးလိုက်သည်။

"ဒီကမိန်းကလေး ဘာလို့ကျုပ်ကိုတိုက်ခိုက်ရတာလဲကျုပ်တို့ရန်ငြိုးရန်စများရှိခဲ့သလားဆိုတာ သိခွင့်ရှိမလား"

ဟယ်ရှီးယွင် အပြုံးလေးတစ်ခုဆင်မြန်းလိုက်ပြီး လက်တီးစုကာ ပေါ့ပါးသောအသံဖြင့်ပြောလိုက်သည်။

"ရှင်ကသူများတွေပြောသလိုဘဲ ငယ်ရွယ်ပေမဲ့ သိုင်းပညာကတော့ ဩချရလောက်အောင်မြင့်မားတာပဲ ကျွန်မနာမည်က ဟယ်ရှီးယွင်ပါ ရှင့်ကိုဒီမှာတွေ့ရမယ်မထင်ထားဘူး"

"ချီးကျူးပေးလို့ကျေးဇူးပါမိန်းကလေး ဟယ်ရှီးယွင် ကျွန်တော်က သူများတွေပြောသလောက်မတော်ပါဘူး အကုန်လုံးကချဲ့ကားပြောကြတာပါ"

ချိုးယီလက်နှစ်ဖက်အားနောက်ပစ်၍ နှိမ့်ချစွာပြုံး၍ပြောလိုက်သည်။ထို့နောက်ချိုးယီ ဟယ်ရှီးယွင်အား ကြည့်ကာချီးကျူးလိုက်သည်။

"မိန်းကလေး ဟယ်ရှီးယွင်ရဲ့ သိုင်းပညာက သူများတွေပြောသလိုဘဲ တကယ်ကို ဖောက်မမြင်နိုင်လောက်အောင်မြင့်မားလွန်းလှပါတယ်ကျွန်တော်တကယ်လေးစားမိပါတယ်"

ချိုးယီ​၏ ချီးကျူးစကားကြောင့်ဟယ်ရှီးယွင် ​၏ မျက်နှာရှိအပြုံးအားပိုမိုထင်ပေါ်သွားစေပြီး ပါးချိုင့်လေးများကိုပင်မြင်သာစေခဲ့သည်။ ဟယ်ရှီးယွင်​၏ အပြုံးသည်ကြာဖူးလေးများဖူးပွင့်သကဲ့သို့လှပလွန်းသောကြောင့်ချိုးယီပင်လျှင် နစ်မျှောသွားပြီး မနည်းပြန်ထိန်းချုပ်လိုက်ရလေသည်။ သို့သော် သူ​၏ ရင်ထဲတွင်တော့ထိုအပြုံးမှာထာဝရစွဲထင်သွားလေသည်။

'တကယ်ကိုလှတာဘဲ'

"ကျွန်မကို အဲ့လောက်ကြီးလဲ ချီးကျူးမနေပါနဲ့ အမှန်အတိုင်းပြောရရင် တခြားဘယ်သူ့ကိုမဆိုနိုင်ဖို့ယုံကြည်ချက်ရှိပေမဲ့ ရှင့်ကိုနိုင်မယ်လို့တော့ ကျွန်မယုံကြည်ချက်မရှိဘူးဖြစ်နေတယ်"

ဟယ်ရှီးယွင်​၏ စကားကြောင့် ချိုးယီရယ်မောလိုက်ပြီး ရယ်မောမောဖြင့်ပြောလိုက်သည်။

"ကျွန်တော်ဘက်ကလဲ မိန်းကလေးဟယ်ကိုနိုင်ဖို့မသေချာပါဘူး မိန်းကလေး ဟယ်ရဲ့သိုင်းပညာက ကျုပ်မြင်ဖူးသမျှလူတွေထဲမှာ အဖိုးချင်ဖုန်း ပြီးရင်အစွမ်းအထက်ဆုံးပါပဲဗျာ အကြီးအကဲဟိုင်ချန်းလွေ့နဲ့ အကြီးအကဲကွေယွေ့ ထက်တောင်ပိုပြီးအဆင့်မြင့်သေးတယ် မိန်းကလေးဟယ်အဲ့လောက်နိမ့်ချစရာမလိုပါဘူး"

အမှန်ပင် ချိုးယီပင်လျှင် ဟယ်ရှီးယွင်အား လွယ်လွယ်နှင့်အနိုင်မယူနိုင်ပေ။ ပေးဆပ်မှုမရှိပဲနဲ့တော့ ဟယ်ရှီးယွင်အားသူလုံးဝအနိုင်မယူနိုင်ပေ။ သူတွေ့သမျှထဲတွင် သိုင်းပညာမြင့်မား၍ အချိတ်အဆက်မိမိတိုက်ခိုက်နိုင်သော အရိပ်ပညာရှင်သုံးပါးပင်လျှင် ဟယ်ရှီးယွင်အားအနိုင်ယူနိုင်လိမ့်မည်မဟုတ်ပေ။ခုနကသိုင်းတစ်ကွက်သာဖလှယ်ခဲ့ကြသော်လည်း နှစ်ယောက်လုံးသိုင်းပညာအလွန်မြင့်မားလှသည်မို့ တစ်ယောက်သိုင်းပညာနှင့်တစ်ယောက်အတွင်းအားအကြောင်းအလွယ်တကူပင်နားလည်နိုင်သည်။ ဟယ်ရှီးယွင်​၏ သိုင်းပညာသည် ပြိုင်စံရှားပညာရှင်များလောက်ကို အစွမ်းထက်ပြီး အကယ်၍ပြိုင်စံရှားပညာရှင်ဆယ်ယောက်ရွေးချယ်ပွဲသာထပ်လုပ်ပါက သူမသေချာပေါက် ပြိုင်စံရှားပညာရှင်တစ်ယောက်ဖြစ်လာပေလိမ့်မည်။ ဟယ်ရှီးယွင်​၏ စိတ်ထဲတွင်လည်း ချိုးယီနည်းတူ တွက်ဆမိသည်။ ချိုးယီ​၏ အတွင်းအားသည်သူမထက်ပိုမိုနက်ရှိုင်းသည်ကိုခံစားလိုက်ရသည်။ ထို့အပြင်ချိုးယီမှာ ဓားကိုပင်အသုံးမပြုရသေးချေ။ အကယ်၍ချိုးယီသာဓားကိုအသုံးပြုခဲ့လျှင် သူမချိုးယီအားအနိုင်ယူနိုင်မည်မဟုတ်ချေ။သို့သော် သူတို့နှစ်ယောက်​၏ သိုင်းပညာသည် သိပ်မကွာခြားလှပေ။ ချိုးယီကောင်းကင်သို့မော့ကြည့်လိုက်ပြီး မိုးချုပ်လာသည်ကိုမြင်ရသောအခါ နှုတ်ဆက်စကားပြောလိုက်သည်။

"မိန်းကလေးဟယ် ကျွန်တော်လုပ်စရာရှိသေးလို့ အရင်သွားပါဦးမယ် ခွင့်ပြုပါဦး"

ဟယ်ရှီးယွင် သူမ​၏ မျက်လုံးများအားမှေးကျဉ်းလိုက်ပြီးစိတ်ထဲတွင်တွေးလိုက်သည်။

'ကောင်စုတ်လေး ငါ့ကိုတမင်ရှောင်ချင်နေတာပဲ ဒီအမကြီးက မင်းကိုစားမှာကျနေတာဘဲ အဟမ်းဒါပေမဲ့လည်း မင်းကစိတ်ဝင်စားစရာကောင်းလို့လွတ်ပေးလိုက်ပါမယ် နောက်တစ်ခေါက်ဆိုရင်တော့လွယ်လွယ်နဲ့ရမယ်မထင်နဲ့'

ဟယ်ရှီးယွင်​၏ မဲနက်နေသော နှလုံးသားသည် တစ်ဖန်ပြန်လည်ထွက်ပေါ်လာခဲ့သည်။ သူမသည် သိုင်းလောကတွင်လွတ်လွတ်လပ်လပ်သာနေပြီး လုပ်ချင်သည့်အရာများရှိလျှင် ထိုအရာကိုသေချာပေါက်ကိုပြုလုပ်တတ်သည်။ သို့သော်လည်း ဟယ်ရှီးယွင် ချိုးယီအားနူးနူးညံ့ညံ့လေးသာပြုံးပြ၍နှုတ်ဆက်လိုက်သည်။

"ဒါဆိုနှုတ်ဆက်ပါတယ် သူရဲကောင်းယီ နောက်တစ်ခါထပ်တွေ့ကြတာပေါ့"

ချိုးယီပြုံး၍ခေါင်းငြိမ့်ပြလိုက်ပြီး နောက် ကိုယ်ဖော့သိုင်းအားအသုံးပြုကာ တည်းခိုခန်းဆီသို့လျင်မြန်စွာဦးတည်လိုက်သည်။အချိန်အနည်းငယ်ကြာပြီးနောက် တည်းခိုခန်းဆီသို့ရောက်ရှိလာခဲ့သည်။ ချိုးယီ နှစ်ခန်းပါခြံဝင်းထဲသို့သွားလိုက်သောအခါ ခြံဝင်းအလယ်ရှိ သစ်ပင်အောက်တွင် သေရည်သောက်နေသော ရှီဖုန်းအားတွေ့လိုက်ရသည်။ ချိုးယီ ခုံတစ်ခုံတွင်ဝင်ထိုင်လိုက်ပြီး သေရည်ဗူးအားယူကာ ခွက်ထဲသို့ငဲ့လိုက်သည်။ ထို့နောက်တစ်ကြိုက်တည်းသောက်ချလိုက်ပြီး သက်ပျင်းချလိုက်သည်။

"ညီအကို ခင်ဗျားပြောတာတကယ်မှန်တယ် အဲ့ဒီဟယ်ရှီးယွင်ဆိုတဲ့ မိန်းကလေးက တကယ်အန္တရာယ်များတဲ့ မိန်းမပျိုဘဲ ပြီးတော့ ကျုပ်မြင်ဖူးသမျှထဲမှာ အလှပဆုံးနဲ့ အထူးဆန်းဆုံးအမျိုးသမီးဘဲ"

"မင်းသူနဲ့တွေ့ခဲ့တာလား"

ရှီဖုန်း သေရည်ခွက်အားကိုင်ကာတစ်ကြိုက်ဇိမ်ခံသောက်ရင်းမေးလိုက်သည်။ ချိုးယီလည်းကူရာမဲ့စွာပြောလိုက်သည်။

"ကျုပ်ကသွားတွေ့တာမဟုတ်ဘူး သူက ကျုပ်ကိုတမင်ရှာပြီးပညာတောင်စမ်းလိုက်သေးတယ် တော်သေးတယ် ကျုပ်လဲအားနည်းချက်ကိုမထုတ်ပြမိလို့"

ချိုးယီ ​၏စကားကြားသောအခါ ရှီဖုန်း​၏မျက်နှာသည်ရှုံ့မဲ့သွားလေသည်။ ထို့နောက်ချိုးယီအားသနားသောလေသံဖြင့်ပြောလိုက်သည်။

"မင်းတော့ပြဿနာတက်ပြီ ချိုးယီ..."

.............................

ပြီး...