ပြင်းထန်လွန်းတယ်

၎င်းတို့ကြားမှ ပဋိပက္ခကိုကြည့်၍ ယီချိုးမှာ ရွှေတံဆိပ်တော်အမတ်မင်းတို့အဖွဲ့နှင့်မတည့်မှန်း ဧကရာဇ်ရွယ်မင်သတိထားမိလိုက်သည်။ ယီချိုးအားသူ့ဘက်ပါအောင်ဆွဲခေါ်နိုင်လျှင် အင်ပါယာအတွက်သူအများကြီးပိုလုပ်နိုင်ပေလိမ့်မည်။

ချိုးယီ​၏ စိန်ခေါ်သံကြားသည်နှင့် အမတ်ကြီးယန်မှာစကားပင်မပြောနိုင်တော့ပေ။သူ့လက်အောက်တွင်အလုပ်လုပ်ပေးနေသော အဆင့်လွန်ထိပ်သီးပုဂ္ဂိလ်မရှိသောကြောင့်ပင်။အမတ်ကြီးယန်က ရွှေတံဆိပ်တော်အမတ်မင်းအားကြည့်လိုက်သည်။ ရွှေတံဆိပ်တော်အမတ်မင်းကိုယ်တိုင်လည်း ချိုးယီ​၏ လက်စကိုသိသောကြောင့် သူနှင့်မသက်ဆိုင်သလိုသာနေလိုက်လေသည်။ အကြောင်းမှာ အရိပ်သုံးပါးပညာရှင်များကိုသူ တာဝန်တစ်ခုပေးကာ အခြားပြည်နယ်သို့လွတ်လိုက်သောကြောင့်ပင်။ 

အားလုံးတိတ်ဆိတ်သွားသည့်အချိန်တွင် အသံတစ်သံထွက်ပေါ်လာခဲ့သည်။

"ဒီအဖိုးကြီးကကသူရဲကောင်းယီရဲ့ သိုင်းစွမ်းပကားကို သိချင်နေခဲ့တာကြာပြီ ဒီနေ့တော့စမ်းကြည့်ရတာပေါ့ ဟားဟား"

အားလုံး တောင်ပိုင်းစစ်သူကြီးယွမ်ကောလုံအားကြည့်လိုက်ကြသည်။ စစ်သူကြီးယွမ်သည် တာ့ယွမ်အင်ပါယာ​၏တစ်ချိန်ကစစ်နတ်ဘုရားဟုတင်စားရလောက်သည့်စစ်သူကြီးဖြစ်သည်။ တာ့ဟွမ်ပြည်ထောင်နှင့်နယ်စပ်စစ်ပွဲတွင် စစ်သူကြီးယွမ်ကြောင့် တာ့ဟွမ်ပြည်ထောင်​၏ တပ်သားငါးသောင်းရှိသည့် ကျားရဲတပ်မကြီးခုလုံးဖျက်စီးခံခဲ့ရလေသည်။ တာ့ဟွမ်ဧကရာဇ်အမုန်းဆုံးလူသည် စစ်သူကြီးယွမ်ဖြစ်ပြီး ယခုချိန်ထိလဲမုန်းနေဆဲဖြစ်သည်။

စစ်သူကြီးယွမ်​၏စကားကိုကြားတော့အကုန်လုံးလည်းပွဲကြီးပွဲကောင်းကြည့်ရတော့မည်ဟုခံစားလိုက်ရသည်။ချိုးယီစစ်သူကြီးယွမ်အားစိုက်ကြည့်လိုက်သည်။ စစ်သူကြီးယွမ်​၏အရှိန်အဝါသည်အလွန်ပြင်းထန်ပြီး ကြောက်မက်ဖွယ်သတ်ဖြတ်ခြင်းအငွေ့အသက်များကသူ့ခန္ဓာကိုယ်မှစိမ့်ထွက်နေခဲ့သည်။ ဤသည်မှာစစ်ပွဲပေါင်းရာချီတိုက်ခိုက်၍ရရှိလာခဲ့သော အရှိန်အဝါဖြစ်လေသည်။ ချိုးယီခေါင်းငြိမ့်ကာပြောလိုက်သည်။

"ကောင်းပြီ ဒီကစစ်သူကြီးကပညာချင်းဖလှယ်ချင်မှတော့ ကျုပ်ယီချိုးကပညာချင်းဖလှယ်ပါ့မယ်"

...............................

နန်းတော်ရှိ တိုက်ခိုက်ရေးပြိုင်ပွဲများကျင်းပရာ တိုက်ခိုက်ရေးစင်မြင့်တွင်....

မိုးပြာရောင်ဝတ်ရုံဖြင့်ချိုးယီသည်ညာဖက်လက်ဖြင့်ယက်တောင်အားကိုင်ထားပြီးဘယ်ဘက်လက်အားနောက်ပစ်ထားသည်။ တစ်ဖက်ရှိစစ်သူကြီးယွမ်မှာ သူ​၏ဓားသွားလှံအားကိုင်ဆောင်ကာ မပြိုကျနိုင်သည့်တောင်ကြီးကဲ့သို့မတ်တပ်ရပ်နေခဲ့သည်။

ဧကရာဇ်ရွယ်မင်နှင့်အမတ်များမှာ ထိုင်ခုံအသီးသီးတွင်နေရာယူထားပြီးဖြစ်လေသည်။ ရွယ်မင်က သူ့ဘေးရှိမတ်တပ်ရပ်နေသော ရွယ်ဝူဟန်အားခေါင်းစောင်းငဲ့ကာ မေးလိုက်​၏။

"ဘယ်သူနိုင်မယ်လို့ထင်လဲ ဝူဟန်"

ရွယ်ဝူဟန်က ချက်ချင်းပြန်မဖြေသေးဘဲ ချိုးယီနှင့် စစ်သူကြီးယွမ်တို့နှစ်ယောက်ကိုစေ့စေ့စပ်စပ်ကြည့်လိုက်ပြီး...

"စစ်သူကြီးယွမ်အနေနဲ့ စစ်ပွဲပေါင်းများစွာတိုက်ခိုက်ခဲ့ဖူးတာမို့ အတွေ့အကြုံပိုင်းမှာသေချာပေါက်ယီချိုးထက်ပိုများလိမ့်မယ်..သိုင်းပညာပိုင်းမှာတော့....."

 ရွယ်ဝူဟန်ဆက်မပြောတော့ဘဲ ရပ်လိုက်​၏။ ထို့နောက်  ရွယ်မင်အားဖြည်းညင်းစွာ ပြောလိုက်သည်။

"သူတို့တိုက်ပွဲကိုဘဲ အရင်စောင့်ကြည့်ရအောင် ပွဲပြီးရင်ဘယ်သူသာလဲ အရှင်မင်းကြီးသိရမှာဘဲ"

"ဟုတ်တာပေါ့ ကိုယ်တော် သိချင်ဇောနဲ့အတော်လောသွားတယ်"

ရွယ်မင် ခေါင်းငြိမ့်လိုက်သည်။ ထို့နောက်ကွင်းလယ်သို့ အာရုံစိုက်လိုက်သည်။ ချိုးယီလက်နက်မယူဆောင်လာတာကို မြင်တော့စစ်သူကြီးယွမ် မျက်ခုံးပင့်၍မေးလိုက်သည်။

"မောင်ရင် ဘာလို့လက်နက်မသုံးတာလဲ ဒီအဖိုးကြီးကိုအထင်သေးနေတာလား"

ပြောရင်းဆိုရင်းနှင့် သူ​၏ထိပ်တွင်ဓားသွားပါသောလှံအနောက်ဖက်အပိတ်ကို စင်ပေါ်သို့ဆောင့်ချလိုက်သည်။

"ဘန်း...."

မာကျောလှပါသည် ဆိုသောကျောက်တုံးများနှင့် တည်ဆောက်ထားသည့် စင်ကြီးပင်တုန်ခါသွားပြီး ဓားသွားလှံ​၏ ဖင်အပိတ်နှင့်တိုက်ရိုက်ထိသွားသောနေရာသည် အက်ကွဲကြောင်းများပင် ထနေလေပြီ။ စစ်သူကြီးယွမ်​၏ ဆောင့်ချလိုက်သောအတွင်းအားအရှိန်အဟုန်ကြောင့် အမတ်ကြီးများပင်၎င်းတို့ကိုပြင်းထန်သောလေကြမ်းတစ်ခုကလာရောက်တိုက်ခတ်သွားသလိုခံစားလိုက်ကြရသည်။ စင်ပေါ်တွင်ချိုးယီ​၏ဝတ်ရုံသည် စစ်သူကြီးယွမ်​၏အတွင်းအားအရှိန်အဟုန်ကြောင့် တဖျပ်ဖျပ်လွင့်လူးသွားလေသည်။ ချိုးယီပြုံးကာပြောလိုက်သည်။

"စစ်သူကြီးယွမ်ကိုကျုပ်အထင်မသေးရဲပါဘူးဗျာ ကျုပ်ရဲ့လက်ထဲမှာရှိတဲ့အရာက ကျုပ်ရဲ့လက်နက်ပါဘဲဗျာ"

"ကောင်းပြီ မင်းဘာသာမင်းရွေးခဲ့တာ ဒီအဖိုးကြီးကသက်ညာမှာမဟုတ်ဘူး"

ပြောရင်းနှင့် စစ်သူကြီးယွမ်ကစလှုပ်ရှားလိုက်သည်။ စစ်သူကြီးယွမ် ချိုးယီဆီသို့အရှိန်ပြည့်ဖြင့်တိုးလာပြီး သူ​၏လှံဓားသွားထိပ်ဖျားဖြင့် ချိုးယီအားလှမ်းခုတ်ချလိုက်သည်။

"ရွှီး...ဝှစ်"

ချိုးထိုတိုက်ခိုက်မှုအား ခန္ဓာကိုယ်ဘေးတစ်စောင်းဖြင့်ရှောင်ရှားလိုက်သည်။ ထို့နောက်သူ​၏ယပ်တောင်အားဖြန့်၍ စစ်သူကြီးယွမ်ဆီသို့ ဝေ့ရမ်းလိုက်သည်။

"ရွှစ်."

ထက်ရှသော အတွင်းအားလှိုင်းတစ်ခုသည် ယပ်တောင်မှထွက်ပေါ်လာပြီး စစ်သူကြီးယွမ်ဆီသို့တိုးဝင်သွားလေသည်။ သို့သောစစ်သူကြီးယွမ်မှာသူ​၏လှံဓားသွားကိုပြန်သိမ်းလိုက်ပြီး လှံဓားသွားဝေ့ရမ်း၍ ချိုးယီ​၏ထက်ရှသော အတွင်းအားတိုက်ခိုက်မှုကိုခုခံလိုက်သည်။ ချိုးယီအနည်းငယ်အံ့ဩသွားလေသည်။ အဆင့်လွန်ထိပ်သီးအဆင့်ထဲဝင်တာသိပ်မကြာသေးသည့် စစ်သူကြီးယွမ်သည် သူ​၏တိုက်ခိုက်မှုအားခုခံနိုင်လေသည်။ ချိုးယီပြုံးလိုက်ပြီးသူအရင်လှုပ်ရှားရန်ဆုံးဖြတ်လိုက်သည်။ တိုက်ပွဲအားအမြန်ဆုံးအဆုံးသတ်ရပေမည်မဟုတ်လျှင် သူ​၏စွမ်းပကားသည် တိမ်ကြားဓားပြအဖွဲ့အစည်းကိုမယှဉ်နိုင်ဟုသံသဃဝင်ခံရပေလိမ့်မည်။ ထို့နောက် ချိုးယီ နှင့် စစ်သူကြီးယွမ်ပြန်လည်တိုက်ခိုက်ကြလေသည်။ 

၎င်းတို့လေထုထဲတွင်တစ်ခါထိပ်တိုက်ဆုံတွေ့မိတိုင်းအတွင်းအားလှိုင်းဂရက်များသည် ပွဲကြည့်စင်များဆီသို့ အလွန်ပြင်းထန်သော လေကြမ်းများအသွင်ဖြင့်ရောက်ရှိသွား​၏။ ၎င်းတို့နှစ်ယောက်​၏တိုက်ခိုက်မှုနား နေမည်ဆိုပါက ထိပ်တန်းသိုင်းသမားပင် အတွင်းအားရိုက်ခတ်ခံရပြီး သေဆုံးသွားပေလိမ့်မည်။ဤသည်မှာ သိုင်းထိပ်သီးများ​၏ ယှဉ်ပြိုင်မှုပင်ဖြစ်ပေတော့သည်။ အမြင့်ဆုံးခုံတွင်ရှိနေသည့် ရွယ်မင်ကသဘောကျစွာရယ်မောလိုက်ပြီး....

"ကောင်းတယ်...သိပ်ကောင်းတယ်ဟားဟားဟား စစ်သူကြီးယွမ်ကိုကြည့်ရတာ သိုင်းလောကက သိုင်းထိပ်သီးတွေနဲ့ယှဉ်ဘောင်တန်းနိုင်နေပြီဘဲ...ဒါပေမယ့် ယီချိုးဒီလောက်တော်မယ်လို့ကိုယ်တော်မထင်ထားမိဘူး လက်နက်တောင်မသုံးဘဲစစ်သူကြီးယွမ်နဲ့သူတစ်ပြန်ကိုယ်တစ်ပြန်တိုက်ခိုက်နေတာ လက်နက်ခြင်းယှဉ်ရရင်ဘယ်လိုနေမလဲမသိဘူး"

"အရှင်မင်းကြီးမြင်တာမမှားပါဘူး စစ်သူကြီးယွမ်ကသိုင်းလောကမှာဆို အဆင့်လွန်သိုင်းထိပ်သီးအဆင့်ကိုရောက်နေပြီ ဒါပေမယ့် ချိုးယီကိုသေချာကြည့်လိုက်ရင် အစကနေအဆုံးထိ စစ်သူကြီးယွမ်ရဲ့တိုက်ခိုက်မှုတွေကိုတိတိကျကျနဲ့ခုခံပြီးပြန်လည်တိုက်ခိုက်နေတာ ကြည့်ရတာ ချိုးယီကလုံးဝကို အားကုန်မထုတ်ဘဲတိုက်ခိုက်နေတာ ကျွန်တော်မျိုးထင်တာမှန်ရင် နောက်သုံးကွက်အတွက်အတွင်းစစ်သူကြီးယွမ်ရှုံးလိမ်မယ်"

ရွယ်ဝူဟန်​၏သုံးသပ်ချက်ကိုကြားပြီးနောက် ရွယ်မင်မှာ ချိုးယီ​၏လျှို့ဝှက်ထားသောအစွမ်းအများကိုလုံးဝမသိမြင်နိုင်သလိုခံစားလိုက်ရသည်။ စင်မြင့်ပေါ်တွင် ချိုးယီသည် စစ်သူကြီးယွမ်​၏ အလျားလိုက်ပိုင်းဖြတ်မှုကို နောက်ဂျွမ်းထိုး၍ရှောင်ရှားလိုက်သည်။ ထို့နောက်ချိုးယီလေထဲကမကျခင် ဘယ်လက်ဝါးအားဆန့်ထုတ်ကာ လေထုအားရိုက်ချလိုက်သည်။

"ဖုန်း...."

ပြင်းထန်လှသော အတွင်းအားအဟုန်အား စစ်သူကြီးယွမ် လှံဓားသွားဖြင့်ခုခံကာကွယ်လိုက်ပြီး သူ​၏ခြေထောက်သည် တရွတ်တိုက်နောက်သို့ သုံးမီတာခန့်ဆုတ်ခွာလိုက်သည်။စစ်သူကြီးယွမ်​၏မျက်နှာသည်အလွန်တည်ကြည်နေပြီး လေးလေးနက်နက်ရေရွတ်လိုက်သည်။

"ဒီအတွင်းအား...အရမ်းပြင်းထန်လွန်းတယ်"

............................

ပြီး...