ဉာဏ်အလင်းပွင့်ခြင်း

တိဟောက်သည် ရီဝူချင်းဆီသို့ လှမ်းသွားပြီး သူ၏ နတ်ဘုရားထောင်ချောက် ခေါင်းလောင်းက လူတိုင်း၏ ကျောရိုးတစ်လျှောက်ကို တုန်ခါသွားစေသည်။ ရီဝူချင်းသည် သူ၏ စိတ်က ပြင်းထန်သည့် တိုက်ခိုက်မှုအောက် ကျရောက်သွားသည်ဟု ခံစားလိုက်ရသည်။ သူ၏ ဓားအသိများက တုန်ရီနေသည်။

ဓားက သူ့စိတ်ထဲတွင် ပဋိပက္ခဖြစ်ကာ ကျယ်လောင်စွာ အော်မြည်နေပြီး တောက်ပသထက် တောက်ပလာသည်။ သို့သော်လည်း ခေါင်းလောင်း၏ ဖြတ်သန်းလာသည့် အသံအောက်တွင် ဓားသည် တုန်ခါနေသည်။

နတ်ဘုရား ထောင်ချောက် ခေါင်းလောင်းသည် ဓားကို တစ်စစီ ဖြစ်သွားသည်အထိ ဖျက်ဆီးပစ်လိုနေ၏။

တောက်ပသည့် အလင်းရောင်စဉ်တန်းသည် ဓားအတွင်း ရောယှက်သွားပြီး ကာကွယ်ပေးနေသည်။ ကြောက်မက်ဖွယ် ဓားအသိသည် သူ့မျက်လုံးများမှ ထွက်ပေါ်လာပြီး သူ့ဆီသို့ လျှောက်လာနေသော တိဟောက်၏ မျက်လုံးများဆီသို့ ထိုးဖောက်သွားသည်။

ရီဝူချင်း၏ ဓားဝိညာဉ်သည် သဘာဝအင်အားစုဝိညာဉ် ဖြစ်သည်။ ဓားတွင် သူ၏ အသိစိတ်စွမ်းအားများ ပါဝင်သည်။ ယင်းက ခိုင်မာပြီး မလှုပ်ခါနိုင်ပေ။ ထို့အပြင် သူ၏ ဓားအသိက အလွန်ခိုင်မာပေသည်။

ဓားသမား၏ စိတ်အခြေအနေက အစွန်းအထင်း ကင်းမဲ့ရသည်။ သူ၏ အသိကို ဖျက်ဆီးရန်မှာ မဖြစ်နိုင်ပေ။

ထိုသို့ဆိုသော်ငြား နတ်ဘုရားထောင်ချောက် ခေါင်းလောင်းကို တောင့်ခံရန်မှာ ခက်ခဲလှပေသည်။

သို့သော်လည်း သူသည် စိတ်ဆန္ဒတစ်ခုတည်းဖြင့် ရှေ့သို့ ဆက်လှမ်းနေဆဲဖြစ်ကာ သူ၏ ဓားအသိက သူနှင့်အတူ ရွေ့လျားနေသည်။ သူနှင့် တိဟောက်ကြားမှ ကမ္ဘာသည် ဓားပုံရိပ်ယောင်ကမ္ဘာတစ်ခု ဖြစ်သွားခဲ့သည်။ ဓားများက နေရာအနှံ့ ရှိနေသည်။

တိဟောက်၏ အကြည့်များသည် ပုံရိပ်ယောင်ဓားများပေါ်တွင် ရှိနေပြီး သာမန်မျှ ကြည့်နေသည်။ ခေါင်းလောင်းက ဆက်လက်၍ မြည်ဟည်းနေပြီး သူသည် မည်သည်က ပုံရိပ်ယောင်၊ မည်သည်က အစစ်ဆိုသည်ကို ခွဲခြားသိနိုင်ပေသည်။

ထိုတစ်ချိန်တည်းမှာပင် စွမ်းအားမြင့်ဖိုအိုးများ ပျံသန်း ထွက်ပေါ်လာသည်။ ၎င်းတို့သည် ထူးကဲသာလွန်လှသည့် နဂါးကြီးများကဲ့သို့ ပုံစံကို ထွင်းထုထားသည်။ အဆုံးမဲ့ စွမ်းအားမြင့်ဖိုအိုးများက ကျဆင်းလာပြီး ရီဝူချင်းကို ရိုက်ခတ်ကာ သူ့အနီးမှ အရာအားလုံးကို ဖျက်ဆီးရန် ကြိုးပမ်းနေသည်။

သတ္တမဓားသည် ဤနေရာ၌ မရှိတော့သောကြောင့် တိဟောက်သည် တာလီပြည်ထောင်မှ ရှန့်ထိုအဆင့်အောက်၌ ပြိုင်ဘက်ကင်း ဖြစ်လေသည်။ သူ၏ စွမ်းအားသည် သိသာစွာ အားကောင်းပြီး သူ၏ မဟာလမ်းစဉ် အသိပညာများမှာ ရှန့်ထိုအဆင့်အနီးသို့ အလွန့်အလွန် နီးကပ်နေပြီဟု မြင်ရသည်။ သူသည် ခြေတစ်လှမ်းဖြင့် ကြီးမားသော အကွာအဝေးကို ဖြတ်သန်းနိုင်ပေသည်။

ရီဝူချင်းသည် သူ တန်ပေါင်း ထောင်ချီသည့် ဖိအားအောက်သို့ ရောက်ရှိသွားသလို ခံစားလိုက်ရသည်။ သို့သော်လည်း သူသည် ဓားတစ်လက်ကဲ့သို့ မားမားမတ်မတ် ဖြောင့်တန်းစွာ ရပ်နေဆဲဖြစ်သည်။

သူ၏ ရှေ့တွင် ဓားကြာပန်းအသွင် ပေါ်လာပြီး ချက်ချင်းပင် ထောင်ပေါင်းများစွာသော ဓားများက လေထဲတွင် မျောလွင့်နေကာ သူ့ခန္ဓာကိုယ်အနီးတွင် ရစ်ပတ်နေပြီး လေထဲသို့ ညွှန်ပြနေသည်။

အဆုံးမဲ့ဓားများက ဓားဝင်္ကပါအသွင်ပေါ်လာပြီး ၎င်းတို့သည် ရီဝူချင်းကို ဝန်းရံကာ အော်မြည်နေကြသည်။ ဓားတစ်ချောင်းပြီး တစ်ချောင်းသည် လေထုကို ဟက်တက်ခွဲကာ ကောင်းကင်သို့ ဖြတ်သန်းသွားပြီး ကျဆင်းလာနေသည့် စွမ်းအားမြင့်ဖိုအိုးများဆီသို့ ပြေးဝင်သွားသည်။

ထိခတ်မိသည့် ထိတ်လန့်ဖွယ် အသံကြီးက ရီဝူချင်း၏ အထက်မှ ထွက်ပေါ်လာသည်။ စွမ်းအားမြင့်ဖိုအိုးများသည် လှည့်ပတ်ကာ ကျဆင်းလာနေရင်း သူ့အောက်တွင် ရှိသမျှ အရာအားလုံးကို ဖျက်ဆီးရန် ရှာဖွေနေသည်။ သို့သော်လည်း ရီဝူချင်း၏ ဓားစွမ်းရည်များက ယင်းတို့ကို ဝါးမျိုပြီး ပါဝင်သည့် မဟာလမ်းစဉ်၏ စွမ်းအားများကို ဖျက်ဆီးပစ်ရန် ကြိုးပမ်းလေသည်။

ပို၍ အားကောင်းသည့် ဓားအသိများက ရီဝူချင်းအနီးတွင် ရစ်ပတ်နေသည်။ သူသည် ဓားများဖြင့် ဖုံးလွှမ်းခြင်းကို ခံထားရသည်။

ဓားသမားဖြစ်ရန် လေ့ကျင့်သောအခါ ဓားများစွာက ပိုပြီး စွမ်းအားကြီးအောင် မပြုလုပ်နိုင်ဘဲ ဖန်တီးလိုက်သည့် ဓားများက မည်မျှအထိ စွမ်းအားကြီးခြင်းကသာ အရေးကြီး၏။

“ကျုပ် လမ်းကြောင်းအတွက် ဓားကို အသုံးပြုမယ်”

ရီဝူချင်းကို ကြည့်ရသည်မှာ အလွန်တည်ငြိမ်သည်။ သူသည် မျက်လုံးကို ပိတ်လိုက်ပြီး သူ့ရှေ့တွင် စည်းတစ်ခုချသည်။ နတ်ဘုရား အလင်းရောင်က သူ့ဆီမှ ပွင့်ထွက်လာကာ အတွေးအသိများက သူ၏ ဓားများဆီသို့ ပျံသန်းသွား၍ ယင်းတို့နှင့် ရောယှက်သွားသည်။

ရုတ်တရက် ရီဝူချင်း၏ ခန္ဓာကိုယ်က ဝေဝါးလာသည်။ သူသည် အစစ်အမှန် မဟုတ်တော့သကဲ့သို့ ထင်ရသည်။

ဓားအသိမျှင်များက သူ့ထံမှာ စီးဆင်းနေသည်။ သူ့ကို မြင်ရသည်မှာ ဓားအားလုံး၏ အစိတ်အပိုင်း ဖြစ်လာသကဲ့သို့ ဖြစ်သည်။ ဓားတစ်ခုချင်းစီက သူ့စိတ်ထဲတွင် ထွက်ပေါ်လာပြီး သူ၏ ခြေလက်များ ဖြစ်လာသကဲ့သို့ ဖြစ်သည်။ ၎င်းတို့သည် ယခုတွင် သူ၏ခန္ဓာကိုယ် အစိတ်အပိုင်းများ ဖြစ်လာသည်။

ဓားသည် ကောင်းကင်နှင့် မြေကြီး၏ အသိများကို လှည့်လည်စေပြီး ယင်းသည် လေထုကိုပင် ဖြတ်ပစ်နိုင်သည်။

“ပိတ်ဆို့စမ်း…” ဓားတစ်လက်သည် လေထုကို ဖြတ်သန်း၍ ကျဆင်းလာသည့် စွမ်းအားမြင့်ဖိုအိုးကို ရိုက်ခတ်သည်။ ဖိုအိုးတွင် ရေးထွင်းထားသည့် နဂါးပုံစံများမှာ အရိုင်းဆန်စွာ ထွက်ပေါ်လာသော်လည်း ဆက်လက်၍ ကျဆင်းနေသည်။

“ပိတ်ဆို့စမ်း …” ထို့နောက်တွင် နောက်ထပ် ဓားတစ်ချောင်း ပေါ်လာသည်။

ဓားတစ်ချောင်းပြီး တစ်ချောင်းက ကျဆင်းလာနေသည့် နဂါးသဏ္ဌာန် ရေးထွင်းထားသော ဖိုအိုးများကို ထိမိတိုက်မိသံများသည် မရပ်မနား ထွက်ပေါ်နေသည်။ အချိန်နှင့်အမျှ ဖိုအိုးသည် လေထုထဲမှာ ပြည့်နေသည့် ဓားများဆီသို့ ကျဆင်းလာပြီး ယင်းတွင် အက်ရာများ ပေါ်ထွက်လာသည်။

ကျယ်လောင်သော အသံကြီး ထွက်ပေါ်လာ၏။ လေထုက နှစ်ခြမ်းကွဲသွားခဲ့ပြီး စွမ်းအားမြင့်ဖိုအိုးများ အားလုံးသည်လည်း အစိတ်စိတ်အမြွှာမြွှာ ကွဲကြေသွားကာ ချက်ချင်းပင် ပျက်စီးသွားတော့သည်။

တိဟောက်သည် ရီဝူချင်းအား စိုက်ကြည့်သည်။ ထိုအချိန်၌ ဝိုးတဝါးမြင်နေရသည့် ရီဝူချင်းသည် ရုပ်တုကြီးတစ်ခုကဲ့သို့ မလှုပ်ရှားဘဲ ရပ်နေပေသည်။ သူ့ကို ကြည့်ရသည်မှာ မဟာလမ်းစဉ်၏ ဓားအသိများက သူကိုယ်တိုင် ဖြစ်လာသကဲ့သို့ ထင်မှတ်ရသည်။

ထိုအချိန်၌ ရီဝူချင်းတွင် ခုခံနိုင်သည့် စွမ်းအားမရှိလုနီးပါးပင် ဖြစ်သည်ကို သူ သိ၏။ အကယ်၍သာ ရီဝူချင်းက ဓားအသိများကို ချိုးဖောက် ဖြတ်သန်းနိုင်ခဲ့လျှင် သူ့အတွက် ပြဿနာများ လာပေလိမ့်မည်။

တိဟောက်သည် ရှေ့သို့ ခြေလှမ်းကာ လေထဲသို့ ဖြတ်၍ ရီဝူချင်း၏ ဦးခေါင်းထက်နေရာဆီသို့ ဦးတည်သည်။ သူ၏ စွမ်းအားမြင့်ဖိုအိုး သက်စောင့်ဝိညာဉ်သည် ရီဝူချင်း၏ ခေါင်းပေါ်မှ ကျဆင်းလာသည်။ ကျဆင်းလာသည့် ၎င်းသည် နတ်ဘုရားဖိုအိုးဖြစ်လာကာ နေကိုပင် ကွယ်သွားစေသည်ထိ အဆက်မပြတ် ကြီးမားလာသည်။ ယင်းတွင် မဟာလမ်းစဉ်၏ စွမ်းအားများ ပါဝင်နေသည်။

မဟာလမ်းစဉ် အလင်းရောင်စဉ်များက ဖိုအိုး၏ အထက်မှ ကျဆင်းလာပြီး အရာအားလုံးကို ဖျက်ဆီးပစ်ရန် လုံလောက်သော စွမ်းအားရှိပေသည်။ မရေတွက်နိုင်သည့် စွမ်းအားမြင့်ဖိုအိုးပုံရိပ်များက နောက်ဘက်တွင် ကျဆင်းလာသည်။ နေရာတစ်ခုလုံးက သေမင်းထောင်ချောက် တစ်ခုကဲ့သို့ ဖြစ်ပေါ်လာသည်။ ဓားများက အဆက်မပြတ် ထွက်ပေါ်လာသည်။ ၎င်းတို့မှာ ထိခိုက်ခံရပြီး မလှုပ်ရှားနိုင်တော့ပုံ ပေါ်သည်။

သို့သော်လည်း အော်မြည်နေသည့် ဓားများမှာ ဆက်လက်၍ လှည့်ပတ်နေပြီး စွမ်းအားမြင့်ဖိုအိုးများ၏ အသိကို ချိုးဖျက် ချိန်ညှိကာ လေထုကို ဖြတ်သန်း ဆုတ်ဖြဲနေသည်။ ၎င်းတို့ ထွက်ပေါ်လာပြီး စွမ်းအားမြင့်ဖိုအိုး ပုံရိပ်ယောင်များကို ဖြိုခွဲလိုက်ကာ တိဟောက်၏ စွမ်းအားမြင့်ဖိုအိုး သက်စောင့်ဝိညာဉ်ဆီသို့ ပစ်ခတ်သည်။

သို့သော်လည်း ယင်းတို့ ရောက်ရှိလာသည်နှင့် စွမ်းအားမြင့်ဖိုအိုးမှာ တုန်ခါသွားပြီး အလျင်အမြန်ပင် ဖိနှိပ်သည်။

ရီဝူချင်းက အခြားစည်းတစ်ခုကို လေထဲတွင် ရေးဆွဲလိုက်ပြီး ထောင်ပေါင်းများစွာသော ဓားအသိများ ထွက်ပေါ်လာကာ နဂါးသဏ္ဌာန် ရေးထိုးထားသည့် ဖိုအိုးဆီသို့ အရိုင်းဆန်စွာ ရိုက်ခတ်သည်။ အင်အားနှစ်ခုမှာ ပြင်းထန်စွာ ထိခတ်မိသွား၏။

အထက်ကောင်းကင်၌ တိဟောက်၏ ဓားဝိညာဉ်မှာ အော်မြည်လာသည်။ သူ့အနီးမှ အနှစ်သာရများမှာ ကျားယဲ့ဓားအတွင်းသို့ ပေါင်းစည်းသွားခဲ့သည်။

ကျားယဲ့ဓားများမှာ ရီဝူချင်းဆီသို့ ပြေးဝင်သွားပြီး စည်းများ ရေးဆွဲနေသည့် ရီဝူချင်း၏ လက်ချောင်းများကို ဖြတ်ပစ်ရန် ရည်ရွယ်လေသည်။

ဓားများက လေထုကို ဖြတ်၍ သူတို့ကြားမှ ကျယ်ပြောသည့် အကွာအဝေးကို လျစ်လျူရှုထားသည်။

ရီဝူချင်းသည် ဤသည်ကို ခံစားမိပုံပေါ်ကာ သူ့ဓားများက ရုတ်တရက် သူ့ရှေ့၌ စီတန်းသွားကာ သူ့ကို ကာကွယ်ပေးသည်။ ၎င်းတို့က ဦးတည်ချက် အများအပြားသို့ ပြေးထွက်သွားပြီး သူ့ဆီသို့ ဝင်လာနေသည့် ကျားယဲ့ဓားများနှင့် ထိခတ်မိသွားသည်။ ဓားများက အက်ကွဲရာများ ထင်လာကာ အချင်းချင်း ပြင်းထန်စွာ ဖျက်ဆီးသွားသည်။

တိဟောက်က ရှေ့သို့ ခြေလှမ်းလိုက်ပြီး သူ၏ ခေါင်းလောင်းမှ မြည်သံသည် ကောင်းကင်ကို တုန်ခါသွားစေသည်။ ကျားယဲ့ဓားသည်လည်း ပျက်စီးသွားသည်နှင့် အလျင်အမြန် ပြန်လည် ဖွဲ့စည်းသွားကာ ဆက်လက်၍ ပုံသဏ္ဌာန်ပေါ်ကာ တိုက်ခိုက်နေသည်။

“မင်းမှာ ဓားဘယ်လောက်များများ ရှိနေတာလဲ” တိဟောက်၏ အသံသည် မဟာလမ်းစဉ် ခေါင်းလောင်းသံနှင့် ရောယှက်နေပြီး မိုးကြိုးပစ်ချလိုက်သကဲ့သို့ ဖြစ်သည်။ မတူညီသည့် စွမ်းအားသုံးမျိုး၏ တိုက်ခိုက်မှုအောက်တွင် ရီဝူချင်းသည် ကြီးမားသော ဖိအားဒဏ်ကို ခံနေရပေသည်။ တောက်ပသည့် သွေးစီးကြောင်းက သူ့ပါးစပ်ထောင့်မှ စီးကျလာသည်။ သို့သော်လည်း သူသည် မည်သည့်အသံမျှ မပြုပေ။ သူက ထိုနေရာ၌ ရပ်နေဆဲဖြစ်ကာ မျက်လုံးများကို မှိတ်ထားသည်။

သွေးနဂါးမြစ်ကမ်းဘေးမှ လူများတွင် ရီဝူချင်း၏ တိုက်ပွဲကို ကြည့်နေသူမှာ သိပ်အများကြီး မရှိပေ။ အများစုမှာ ယူချင်းနှင့် ဥဒေါင်းအင်ပါယာဘုံမှ တန်ခိုးရှင်သုံးယောက်၏ တိုက်ခိုက်မှုကဲ့သို့သော အခြားတိုက်ပွဲများကို ကြည့်နေကြသည်။ သူတို့၏ တိုက်ခိုက်မှုကြောင့် လေထုမှာ တုန်ခါနေသည်။ တိုက်ခိုက်မှုတိုင်းတွင် မှန်းဆမရသည့် စွမ်းအားများ ပါဝင်နေသည်။ ထိုသည်မှာ အလွန်ပင် အံ့အားသင့်ဖွယ် ကောင်းလှသည်။‌

သို့သော်လည်း ရီဖူရှင်းသည် ရီဝူချင်း၏ တိုက်ပွဲကို ပို၍ အာရုံစိုက်နေပေသည်။

ဤသည်မှာ အိပ်မောကျနဂါးပြိုင်ပွဲ မဟုတ်ပေ။ ဤနေရာ၌ ယူချင်းသည် ရီဝူချင်းနှင့် အခြားလူများကို ကူညီရာလျှင်ပင် အသုံးဝင်မည် မဟုတ်ပေ။

သူတို့သည် ဤတိုက်ပွဲ၌ ပါဝင်ချင်ခဲ့ကြသည်။ သူတို့သည် ထိုကဲ့သို့ တိုက်ပွဲအမျိုးအစားကို အတွေ့အကြုံ လိုချင်ကြခြင်း ဖြစ်၏။ အကယ်၍ ယူချင်းက သူတို့ကို လာရောက်ကူညီလျှင် သူတို့အတွက် မည်သည့်ကောင်းကျိုး ရှိနိုင်တော့မည်နည်း။

တိဟောက်၏ သက်စောင့်ဝိညာဉ်သုံးခုက အားလုံး ထွက်ပေါ်လာသည်။ သူသည် မဟာလမ်းစဉ်နှင့် အလွန်နီးကပ်နေပြီး တိုက်ခိုက်ရန် စွမ်းအားကို အပြည့်အဝ အသုံးချနိုင်ပေသည်။ ဝူချင်းသည် ဖိအားအများအပြား ခံစားရမည် မှန်သော်လည်း ထိုတိုက်ပွဲမှတစ်ဆင့် သူ၏ စွမ်းအားများ အလွန် တိုးတက်လာနိုင်ပေသည်။

ရီဝူချင်း တစ်ယောက်တည်းသာ မဟုတ်ဘဲ ထိုအချိန်တွင် ဟောင်ကျူဂီသည်လည်း ဒွန်ချန်း၏ ဖိနှိပ်ခြင်းကို ခံနေရသည်။

ဒွန်ချန်း၏ ဗာဂျရာခန္ဓာကိုယ်သည် မြင့်မားပြီး စွမ်းအားများက နတ်ဘုရားဗာဂျရာကဲ့သို့ပင် ဖြစ်သည်။ ၎င်း၏ လက်တံများမှ များပြားလှသည့် လက်ဝါးရိပ်များ ထုတ်လွှတ်လိုက်ပြီး သူ့လမ်းကြောင်းမှ အရာရာကို ဖျက်ဆီးပစ်တော့မလိုပင် ဖြစ်၏။

ဟောင်ကျူဂီ၏ သက်စောင့်ဝိညာဉ်က ထွက်ပေါ်လာပြီး သူ၏ ရန်ဟောင်ခန္ဓာကိုယ်မှာ မြင့်မားကာ တော်ဝင်ဆန်လှသည်။ သို့သော်လည်း ကံမကောင်းစွာပင် ၎င်းသည် ရန်ဟောင်ပုံသဏ္ဌာန်သာ ဖြစ်၍ စွမ်းအားမဟုတ်ပေ။ သို့ပေမဲ့ ယင်းသည် ဓားတစ်ချောင်းကိုင်ကာ ကောင်းကင်သို့ ညွှန်ပြနေပြီး လာနေသည့် လက်ဝါးရိပ်များကို ဖျက်ဆီးပစ်သည်။ လက်ဝါးရိပ်များမှ စွမ်းအားကြီးလှသည့် ဖိအားများသည် နောက်ဆုံးထိတိုင် သူထံသို့ ရောက်ရှိလာခဲ့ပြီး သူ့ကို မြေပြင်သို့ ရိုက်ချကာ လှုပ်ရှားရန် ခက်ခဲစေရန် ပြုလုပ်ထားသည်။ သူ၏ လက်မောင်းများက အနည်းငယ် တုန်ရီနေသည်။

ဒွန်ချန်းသည် သူ့ကို ပြန်တိုက်ခိုက်ရန် အခွင့်အရေး မပေးပေ။ သူ့ကို ရိုက်ချပြီးသည့် နောက်၌ ထောင်ပေါင်းများစွာသော ပုံရိပ်ယောင်တို့သည် အော်မြည်ကာ ရှေ့သို့ တိုးဝင်လာပြီး ဟောင်ကျူဂီ၏ အပေါ်မှ ကျဆင်းလာသည်။ များပြားလှသည့် အရိပ်များသည် တစ်ခုတည်းအဖြစ်သို့ ပေါင်းစည်းသွားသည်။ သူသည် ဟောင်ကျူဂီ၏ မျက်နှာသို့ လက်တစ်ချောင်းတည်းနှင့် တိုက်ခိုက်သည်။

ဒွန်ချန်းသည် တိုက်ခိုက်မှုစွမ်းအား အလွန် ပြည့်ဝသည့် နတ်ဘုရား ဖျက်ဆီးချေမှုန်းသူ ဖြစ်သည်။ ကျဆင်းလာသည့် လက်ချောင်းတွင် မဟာလမ်းစဉ်၏ တိုက်ခိုက်မှုစွမ်းအားများ ပါဝင်နေပြီး ၎င်းသည် လူသား၊ နတ်ဘုရားနှင့် သရဲများကိုပင် ဖျက်ဆီးနိုင်စွမ်းရှိသည်။

ဟောင်ကျူဂီသည် ဒွန်ချန်းကို စိုက်ကြည့်ပြီး ကျယ်လောင်စွာ အော်ဟစ်သည်။ ရန်ဟောင်တစ်ပါး၏ အလင်းများက သူ့အပေါ်တွင် စီးဆင်းနေပြီး မနှိုင်းယှဉ်နိုင်အောင် သာလွန်သည့် စွမ်းအားများ ထွက်ပေါ်လာကာ ဒွန်ချန်းကို ရိုက်ခတ်လိုက်သော်လည်း ဒွန်ချန်း၏ လက်ချောင်းကို တားဆီးနိုင်စွမ်း မရှိခဲ့ပေ။

လက်ချောင်းက ကျဆင်းလာပြီး အသက်ရှူကျပ်စေသည့် ကြောက်မက်ဖွယ် စွမ်းအားများက ဟောင်ကျူဂီဆီသို့ အကြမ်းပတမ်း တိုးဝင်လာသည်။ ထိုသည်က သူ့စိတ်ထဲမှ အရာအားလုံးကို ဖျက်ဆီးလိုသည့် စိတ်ဆန္ဒများကို နှိုးဆွပေးသည်။

ထိုအချိန်၌ ဟောင်ကျူဂီ၏ မျက်ခုံးများကြားသို့ သွေးများ စီးဆင်းလာသည်။ သူသည် မျက်လုံးများကို မှိတ်လိုက်ပြီး သူ၏ ရန်ဟောင်အသိများက သူ့စိတ်ဝိညာဉ်အသိများကို ကာကွယ်ပေးထားသည်။ သို့သော်လည်း ဒွန်ချန်း၏ လက်ချောင်းက သူ၏ စိတ်ဝိညာဉ်အသိစွမ်းအား များကို ဆက်လက်၍ တိုက်ခိုက်လာသည်။

“မင်း အခုထိ အရှုံးမပေးသေးဘူးလား” ဒွန်ချန်းက ပြောသည်။ ထိုအသံက ဟောင်ကျူဂီ၏ စိတ်ထဲ၌ တုန်ခါသွားစေသည်။

ဟောင်ကျူဂီ၏ စိတ်ထဲမှ စိတ်ဝိညာဉ်အသိသည် အဆက်မပြတ် ပေါက်ကွဲထွက်ကာ ပျောက်ကွယ်သွားသည်။ တောက်ပနေသည့် နတ်ဘုရား အလင်းတန်းများသည် သူ့ကို လွန်ခဲ့သည့် နှစ်ပေါင်းများစွာသို့ ခေါ်ဆောင်သွားခဲ့သည်။

တော်ဝင်ဂူသင်္ချိုင်း တိုက်ပွဲ၌ သူ့အဖေက ဂူသင်္ချိုင်းကို ကာကွယ်ရင်း သေခဲ့ရသည်။ သူက သူ့အသက်နှင့် အလဲအထပ်ပြုကာ ဟောင်ကျူဂီကို ဂူဗိမာန်အတွင်းသို့ ဝင်စေကာ ဘိုးဘေးတို့၏ စွမ်းအား အမွေကို ဆက်ခံစေခဲ့သည်။

သူသည် မဟာလမ်းစဉ်၏ စွမ်းအားများကို အမွေဆက်ခံခဲ့ပြီး သူ၏ ဘိုးဘေးများသည် ရန်ဟောင်အသိကို သုံးကာ သူ၏ စိတ်ဝိညာဉ် အသိစွမ်းအားကို သန့်စင်ပေးခဲ့ကာ သူ့ကို စွမ်းအားများ ပေးအပ်ရန် သဘောတူခဲ့သည်။

သို့ဆိုလျှင် သူက မည်သည့်အတွက်ကြောင့် ဉာဏ်အလင်းပွင့်ခြင်း အဆင့်ကို မရောက်သေးသနည်း။

သူသည် သေဆုံးသွားသည့် အဖေနှင့် ဘိုးဘေးများ၏ အသရေကို ညှိုးနွမ်း နေစေခဲ့သည်။

သွေးများက သူ့မျက်ခုံးကြားတွင် ဆက်လက် စီးဆင်းနေပြီး အလင်းကလည်း ဆက်လက်၍ တောက်ပနေသည်။ ဟောင်ကျူဂီသည် လက်လျှော့မည် မဟုတ်ပေ။

ရီဖူရှင်းသည် ထိုမြင်ကွင်းကို မြင်သော် စိတ်မသက်မသာ ခံစားမိလိုက်သော်လည်း ဘာမှမပြောပေ။ တော်ဝင်ဂူသင်္ချိုင်းတိုက်ပွဲ အပြီး ဟောင်ကျူဂီ၏ စရိုက်သဘာဝမှာ ပြောင်းလဲသွားခဲ့သည်။ သူသည် ယခင်ကကဲ့သို့ မရဲရင့်တော့သလို သဘောထားလည်း မကြီးတော့ပေ။ တဖြည်းဖြည်း ကိုယ့်ကိုယ်ကိုယ် ပိတ်လှောင်ကာ နှုတ်ဆိတ်လာသည်။

ထိုတိုက်ပွဲတွင် ဟောင်စီသည် အသက်နှင့်လဲကာ သူ့သားကို ဘိုးဘေးများ၏ အသိများကို ဆက်ခံနိုင်စေရန် လုပ်ဆောင်ပေးခဲ့သည်။

ဖြစ်တန်ရာသည်မှာ ဟောင်ကျူဂီသည် လေးလံသည့် ဝန်ထုပ်ဝန်ပိုးကို သယ်ဆောင်ထားပြီး ဝူချင်းမှာ ကျူဂီထက်ပို၍ လွတ်လပ်သော စိတ်ကို ပိုင်ဆိုင်ပေသည်။ သူ၏ ဓားသည် ရိုးရှင်းကာ အစွန်းအထင်း ကင်းမဲ့သည်။

သူသည် တစ်နေ့တွင် ဟောင်ကျူဂီ ထိုအရာများကို ချိုးဖျက်နိုင်ရန် မျှော်လင့်မိလေသည်။

ပုံရိပ်များက ဟောင်ကျူဂီ၏ စိတ်ထဲတွင် ဖြတ်ပြေးနေသည်။ သူသည် သူ့ဘိုးဘေးများ၏ စွမ်းအားကို ဆက်ခံနေသည့် မြင်ကွင်းကအစ မြင်နိုင်ပေသည်။

သူ၏ ဘိုးဘေးများမှာ ရန်ဟောင်စွမ်းအားများ ရှိကြသည်။ သူတို့၏စစ်ရထားများက လောကကို အုပ်စိုးခဲ့သည်။ လူတိုင်းက သူတို့ကို ဦးညွှတ်ရပေသည်။ သူတို့၏ ဓားနှင့် ညွှန်လိုက်သည့် နေရာမှန်သမျှ ကောင်းကင်နှင့် မြေကြီးသည် အရောင်ပြောင်းလဲ သွားလိမ့်မည်။

ဓားရှည်နှင့် လေးတို့ ကိုင်စွဲ၍ သူတို့သည် အမျက်ဒေါသသိုခဲ့မိလျှင် နတ်ဘုရားတို့၏ စွမ်းအားနှင့် ကံကြမ္မာကိုပင် ဆန့်ကျင်နိုင်လေသည်။

မည်မျှ ခမ်းနားထည်ဝါ လိုက်သနည်း။

သို့သော်လည်း ယခုမှာတော့ သူသည် ဘိုးဘေးများ၏ စွမ်းအားကို အမွေဆက်ခံခဲ့ရသော်လည်း သူများထံတွင် ရိုက်ချခံခဲ့ရသည်။ ထိုအပြင်သူသည် ဉာဏ်အလင်းပွင့်ခြင်း အဆင့်သို့ပင် မရောက်ရှိနိုင်သေးပေ။

ကမ္ဘာကြီးက ကသောင်းကနင်းဖြစ်နေပြီး သူနှင့်အတူ တည်ရှိနေသည့် ရန်ဟောင်အသိများက ကြီးမား ကျယ်ပြန့်လှသည်။ ယင်းသည် ကောင်းကင်နှင့် မြေကြီးကို ဖြတ်သန်းပျံ့နှံ့စေပြီး အသက်ရှူကျပ်စေသည့် ဖိအားကို နေရာတစ်ခုလုံးသို့ ပြည့်နှက်စေသည်။ ကြည့်ရသည်မှာ ရန်ဟောင်တစ်ပါး အမှန်တကယ် ရောက်ရှိလာသကဲ့သို့ ဖြစ်သည်။

ဟောင်ကျူဂီသည် သူ၏ မျက်လုံးများကို ပို၍ တင်းကျပ်စွာ ဖိမှိတ်ထားသည်။ သူသည် တိုက်ခိုက်မှုအောက်တွင် ရောက်နေသည်အား မေ့နေဟန်တူ၏။ သူ မြင်နိုင်သမျှ အရာအားလုံးမှာ ထိုခမ်းနား ထည်ဝါလှသည့် မြင်ကွင်းများသာ ဖြစ်သည်။

သူသည် စွမ်းအားနိယာမများ အကြောင်းမေ့သွားခဲ့သည်။ သူသည် မဟာလမ်းစဉ်အကြောင်း မေ့သွားခဲ့သည်။ သူ၏ စွမ်းရည်များ အားလုံးကို သူ့ရှေ့မှ ပုံရိပ်များအား ခံစားနိုင်ရန်အတွက်သာ အသုံးပြုခဲ့၏။ သူ့အဖေ မသေခင်က သူသည် ရန်ဟောင်ဘိုးဘေး၏ စွမ်းအားများကို အသုံးပြု၍ မဟာလမ်းစဉ်ကို ထိတွေ့ခဲ့သည်။ ဟောင်ကျူဂီသည် သူ ယခုမြင်သည့် ခမ်းနားထည်ဝါသော အရာများကို မြင်ဖူးခဲ့ပါသလား။

ဒွန်ချန်း မျက်မှောင်ကြုတ်သည်။ သူသည် ရုတ်တရက် ကြီးမားသည့် ဖိအားကို ခံစားလိုက်ရသည်။ နေရာတိုင်းတွင် ရန်ဟောင်တစ်ပါး၏ စွမ်းအားရှိနေသကဲ့သို့ ဖြစ်သည်။

ကြည့်ရသည်မှာ ဤနေရာ၌ အခြားဘယ်သူ့ တိုက်ခိုက်မှု လမ်းကြောင်းတွင်မှ ပါဝင်နေပုံလည်း မပေါ်ပေ။

ဟောင်ကျူဂီ၏ ရန်ဟောင်ခန္ဓာကိုယ်မှာ ပို၍ ကြီးမားကာ စွမ်းအားများလည်း တိုးတက်လာသည်ကို မြင်ရသည်။ စွမ်းအားများက သူ့ဆီမှ ပေါက်ကွဲထွက်လာပြီး ဒွန်ချန်း၏ ဗာဂျရာခန္ဓာကိုယ်ကို ကြီးမားလှသည့် ဖိအားအောက် ရောက်သွားစေသည်။

ထိုအချိန်၌ ဟောင်ကျူဂီသည် သူ့မျက်လုံးများကို ဖွင့်သည်။ ယင်းမျက်လုံးများသည် ပြောင်းလဲသွားပုံရကာ ပို၍ လွှမ်းမိုးနိုင်လာသည်။ သူ့ကို ကြည့်လိုက်ရုံမျှနှင့် ဒွန်ချန်းသည် ဦးညွှတ်ကာ အညံ့ခံသင့်သည်ဟူသော ခံစားချက်များ ပေါက်ဖွားလာသည်။

ဟူး …

ကြမ်းတမ်း ရိုင်းစိုင်းသည့် အရှိန်အဝါ ထွက်ပေါ်လာသည်။ ကြောက်မက်ဖွယ် ပုံရိပ်ယောင်များ ပေါ်ပေါက်လာပြီး တိုက်ပွဲဝင်္ကပါသည် ကောင်းကင်နှင့် မြေကြီးကို ဖိနှိပ်ကာ စွမ်းအားများ တိုးမြင့်လာပြီး ဒွန်ချန်းကို ပြင်းထန်စွာ ရိုက်ခတ်သည်။ သူ၏ အသိက အလွန် ဦးဆောင်နိုင်စွမ်း ရှိသည်ကို ခံစားမိသည်။

ဤသည်မှာ ရန်ဟောင်တစ်ပါး၏ လမ်းစဉ်ဖြစ်သည်။ ဒွန်ချန်းသည် ဘယ်တုန်းကမှ ဉာဏ်အလင်းပွင့်ခြင်း မရရှိဖူးသော်လည်း သူနှင့် တိုက်ခိုက်နေသူ၏ ခန္ဓာကိုယ်တစ်ခုလုံး၌ ရန်ဟောင်၏ သွေးများ စီးဆင်းနေသည်ကို မြင်နိုင်သည်။

အခုချိန်တွင် သူသည် ရန်ဟောင်တစ်ပါး၏ လမ်းစဉ် စွမ်းအားများကို ခံစားနိုင်ပေသည်။

***