ရေတွင်းအောက်ခြေမှ ဖားသူငယ်...

အချိန်များက တရွေ့ရွေ့ ​ကုန်ဆုံးသွားပြီး မျက်စိတစ်မှိတ်အတွင်း နှစ်ဝက်ကြာသွားခဲ့သည်။ ထိုအချိန်အတွင်း အော်သံတစ်ချက်နှင့် နန်းတော်ကို ဖရိုဖရဲဖြစ်သွားစေခဲ့သော လင်းယွမ်၏ သတင်းက တစ်လောကလုံး ပျံ့နှံ့သွားခဲ့သည်။

တော်ဝင်နန်းတော်က သတင်းများကို ဖုံးကွယ်ထားသော်လည်း အပြင်မှ သိုင်းပညာရှင်များက မျက်မမြင်နားမကြားများ မဟုတ်ပေ။ သက်လတ်ပိုင်းဘုန်းကြီးပင် နန်းတော်အတွင်းရှိ အော်ရာများ ပြောင်းလဲသွားသည်ကို ခံစားမိခဲ့သောကြောင့် အခြားသိုင်းပညာရှင်များလည်း သိကြမည်မှာ သေချာလေသည်။

ထို့အပြင် တလီဧကရာဇ်က နန်းတော်ထဲမှ ထွက်လာပြီး လင်းယွမ်အား အရိုအသေးပေးခဲ့သည်ကို လူများစွာက မြင်တွေ့ခဲ့ရလေသည်။ ထူးဆန်းသော ဘုန်းကြီးတစ်ပါးက တလီနန်းတော်သို့ ထိုးဖောက်ဝင်ရောက်ခဲ့သည်ကို လူများက ခန့်မှန်မိကြလေသည်။

တလီနိုင်ငံက ကမ္ဘာကို နှစ်ပေါင်းနှစ်ရာနီးပါး အုပ်ချုပ်ခဲ့ပြီး သိုင်းပညာရှင်များအားလုံး ဖိနှိပ်ခံခဲ့ရသည်။ တလီမင်းဆက်ကို အရှက်ခွဲပြီး ဦးညွှတ်စေခဲ့ခြင်းက လူအများကို ကျေနပ်အားရစေလေသည်။ လူအများ၏ အာရုံက တလီနိုင်ငံကိုသာမက ဆန်းကျယ်သော ကိုရင်လေးအပေါ်တွင်လည်း ရှိနေကြသည်။

တလီနိုင်ငံက အားနည်းခြင်းမရှိဘဲ ကြောက်စရာကောင်းအောင် သန်မာလှသည်။ မဟာဆရာသခင် တည်ထောင်သူဘိုးဘေးက သေဆုံးသွားခဲ့သော်လည်း တလီနိုင်ငံ၏ ခွန်အားက လောကကို ဖိနှိပ်နိုင်ဆဲ ဖြစ်သည်။ ထို့အပြင် တလီနန်းတော်ကလည်း လက်ရွေးစင် သိုင်းပညာရှင်များ စုစည်းနေသော နေရာဖြစ်လေသည်။

ထိုဆန်းကျယ်သော ကိုရင်လေး၏ ခွန်အားက သံသယဝင်စရာမလိုဘဲ မဟာဆရာသခင်အဆင့် ဖြစ်ပေလိမ့်မည်။

တလီနိုင်ငံ၏ သိုင်းခန်းမထဲတွင် လင်းယွမ်က တည်ငြိမ်စွာ ထိုင်နေသည်။ သူက နန်းတော်ထဲသို့ ဝင်ရောက်ခဲ့သည်မှာ နှစ်ဝက်ရှိပြီဖြစ်သော်လည်း ထွက်မသွားသေးပေ။

တလီဧကရာဇ်က လင်းယွမ်ကို ဘယ်သူမှနှောက်ယှက်ခွင့်မပြုဘဲ သိုင်းခန်းမကို တားမြစ်နေရာအဖြစ် ကန့်သတ်ခဲ့သည်။ ထို့အပြင် စားသောက်စရာများကိုလည်း သေချာ ပြင်ဆင်ပေးခဲ့သည်။ အစားအသောက်များက နန်းတွင်းစာဖိုမှူးများ ကျွမ်းကျင်စွာ ချက်ပြုတ်ထားရုံသာမက ယွမ်စွမ်းအားကိုလည်း အားဖြည့်ပေးလေသည်။

" ဒီသိုင်းပညာတွေက မလုံလောက်သေးဘူး။ " လင်းယွမ်က စိတ်ထဲမှ သက်ပြင်းချလိုက်သည်။

နှစ်ဝက်အတွင်း လင်းယွမ်က သိုင်းခန်းမထဲမှ သိုင်းပညာအားလုံးကို နားလည်ခဲ့လေသည်။ သိုင်းခန်းမထဲမှ သိုင်းပညာများက မဟာဇင်ဘုရားကျောင်းရှိ သိုင်းပညာထက် သာလွန်လေသည်။

လင်းယွမ်က ယခု ဘယ်သူမှမရောက်ဖူးသော ဒဏ္ဍာရီအဆင့်တွင် ရှိနေသောကြောင့် သိုင်းပညာများနှင့် နားလည်မှုများကလည်း သာမန်ထက် ပိုလိုအပ်သည်မှာ သေချာလေသည်။ သို့သော် သူ၏ ကောင်းကင်ကိုဆန့်ကျင်သော နားလည်နိုင်စွမ်းနှင့် သိုင်းခန်းမမှ သိုင်းပညာအားလုံးကို ပေါင်းစပ်ခဲ့သော်လည်း ဒဏ္ဍာရီအဆင့်မှ မချိုးဖျက်နိုင်သေးပေ။

" ဒီကမ္ဘာမှာ မှတ်တမ်းတင်ထားတဲ့ သိုင်းပညာတွေက နည်းနည်းပဲ ရှိလိမ့်မယ်။ နောက်ထပ် သိုင်းပညာတွေက ကမ္ဘာပေါ်က သိုင်းပညာရှင်တွေဆီမှ ပျံ့နှံ့နေလိမ့်မယ်။ " လင်းယွမ်က တိတ်ဆိတ်စွာ တွေးလိုက်သည်။

ထိုသိုင်းပညာများက အဆင့်မမြင့်လျှင်တောင် ၎င်းတို့၏ ကိုယ်ပိုင်အသိအမြင်များ ရှိကြလေသည်။ သူတို့က လက်ရှိ သိုင်းပညာများနှင့် ကွဲပြားပေလိမ့်မည်။

လင်းယွမ်က သိုင်းတာအိုကို အခြားရှုထောင့်မှ သိမြင်နိုင်လျှင် အဆင့်တက်ရန် အကူအညီဖြစ်ပေလိမ့်မည်။

" ဝင်ခဲ့ပါ။ " လင်းယွမ်က တံခါးဆီသို့ ကြည့်ပြီး ပြောလိုက်သည်။

" ဟုတ်ကဲ့။ " တော်ဝင်မျိုးနွယ်၏ အသန်မာဆုံးဘိုးဘေးက ရိုသေစွာဖြင့် ဝင်လာခဲ့သည်။ လင်းယွမ်က သူ့ကို လမ်းညွှန်မှုအချို့ ပေးပြီးကတည်းက သူက ဘယ်မှမသွားတော့ဘဲ သိုင်းခန်းမ၏ အပြင်တွင်သာ စောင့်ဆိုင်းနေခဲ့သည်။ ထိုလမ်းညွှန်မှုက သူ ဆယ်နှစ် သို့မဟုတ် နှစ်နှစ်ဆယ်လောက် ကြိုးစားမှုရလဒ်နှင့် ညီမျှလေသည်။

" ကျုပ် မြို့တော်မှာ သိုင်းပြိုင်ပွဲကြီး ကျင်းပဖို့ စဉ်းစားထားတယ်။ ဟောက်ထျန်း ဒါမှမဟုတ် ရှန်ထျန်းအဆင့်က ဘယ်သိုင်းပညာရှင်မဆို ပါဝင်နိုင်တယ်။ အနိုင်ရတဲ့ ထိပ်တန်းဆယ်ယောက်ကို အဆင့်မြင့်သိုင်းပညာ သုံးမျိုး စိတ်ကြိုက်ရွေးချယ်ခွင့်ပေးမယ်။ " လင်းယွမ်က ပြောလိုက်သည်။

သူ၏ ကောင်းကင်ကိုဆန့်ကျင်သော နားလည်နိုင်စွမ်းဖြင့် သိုင်းပညာများကို သင်ယူရန် မလိုအပ်ဘဲ ကြည့်ရုံနှင့် ထိုးထွင်းသိမြင်နိုင်လေသည်။ လွန်ခဲ့သော ဆယ်နှစ်ကပင် လင်းယွမ်က မဟာဇင်ဘုရားကျောင်းရှိ ဘုန်းကြီးများ လောဟန်လက်သီးသိုင်း လေ့ကျင့်နေသည်ကို ကြည့်ပြီး လောဟန်ဗုဒ္ဓလက်သီးသိုင်း နားလည်ခဲ့ခြင်းက ဥပမာဖြစ်လေသည်။

သိုင်းပညာရှင်များကို သူတို့၏ သိုင်းပညာများ ပေးအပ်စေခြင်းက လက်တွေ့မကျပေ။ သိုင်းဂိုဏ်းများမှ မဟုတ်သော သိုင်းပညာရှင်များကို ဖိအားပေးလိုက်လျှင် သူတို့က ဘယ်သူမှ မတွေ့နိုင်သော တောတန်းနှင့် သစ်တောများထဲသို့ ထွက်ပြေးသွားပေလိမ့်မည်။

သို့သော် သူတို့ကို သိုင်းပညာများဖြင့် ဆွဲဆောင်ပြီး သူ၏ ကောင်းကင်ကိုဆန့်ကျင်သော နားလည်နိုင်စွမ်းဖြင့် စောင့်ကြည့်ခြင်းက အကောင်းဆုံး ဖြစ်လေသည်။

ကမ္ဘာပေါ်မှ သိုင်းပညာရှင်များ လိုအပ်သောအရာမှာ ကျော်ကြားမှု သို့မဟုတ် အကျိုးအမြတ်သာ ဖြစ်လေသည်။ သိုင်းပညာရှင်များအတွက် နောက်ထပ် အရေးပါသော အရာတစ်ခုမှာ သူတို့၏ သိုင်းအဆင့်ပင် ဖြစ်သည်။

အဆင့်မြင့်သိုင်းပညာများက ရှားပါးပြီး သိုင်းပညာတစ်ခုတည်းဖြင့် အမွေအနှစ်အတွက် အခြေခံအုတ်မြစ်အဖြစ် အသုံးပြုနိုင်လေသည်။ မဟာဇင်ဘုရားကျောင်းကဲ့သို့ ဂိုဏ်းကြီးတစ်ဂိုဏ်းပင် အဆင့်မြင့် သိုင်းပညာ ၇၂မျိုးသာ ရှိလေသည်။

ကမ္ဘာအမျိုးမျိုးတွင် တာအိုများကို လေ့လာဖန်တီးခြင်း