ဘိုးဘေးနယ်မြေသို့ အဝင်တံခါး

နေမင်းရဲတိုက်၏ ထိပ်ဖျားတွင် ပုံရိပ်နှစ်ခုသည် ပြင်းထန်စွာ ထိပ်တိုက်တွေ့ဆုံကြသည်။

ရီဖူရှင်းသည် နေဝန်းမီးတောက်များနှင့် လွှမ်းခြုံထားသည်။ သူသည် သုံးချောင်းထောက်ဖိုအိုးအဖြစ် ပြောင်းလဲသွားပြီး ရှေးဟောင်းစာလုံးများက သူ့အနီးတွင် ဝန်းရံထားကာ စွမ်းရည်အားလုံးကို သန့်စင်၍ သူ၏ ခန္ဓာကိုယ်အတွင်းသို့ ပေါင်းစပ်ပေးသည်။ သူသည် စွမ်းအားပြည့်ဝလှသော တိုက်ခိုက်မှုကို ဖော်ထုတ်သည်။

ရင်ထျန်းကျောက်သည် အင်ပါယာဝူ၏ မင်းသမီးဖြစ်ကာ ရန်ဟောင်မျိုးဆက် ကျင့်ကြံသူတစ်ဦး ဖြစ်သည်။ ထိုကြောင့်ပင် သူမသည် တိုက်ပွဲတွင် မည်သို့ အစွမ်းထက်သည်ကို သိသာစေနိုင်သည်။

သူမသည် အင်ပါယာဝူ၏ ပါရမီကိုလည်း ဆက်ခံထားတာကြောင့် သူမ၏ တိုက်ကွက်များသည် အလွန် အစွမ်းထက်လှပေသည်။

သူမသည် မဟာလမ်းစဉ်၏ မီးတောက်များကို သူမ၏ တိုက်ခိုက်မှုတွင် ပေါင်းစပ်ထားသည်။ ထိုအခိုက်တွင် မီးတောက်များသည် သိုင်းပညာအသိများနှင့် ပေါင်းစပ်ကာ သူမ၏ ခန္ဓာကိုယ်မှ ပေါက်ကွဲထွက်လာသည်။ သို့သော်လည်း ထိုသည်မှာ ရှီချန်နှင့် ကွာခြားလှပေသည်။ ရှီချန်သည် နေကိုးစင်း နတ်ဘုရားခန္ဓာအဖြစ် ပြောင်းလဲခဲ့သော်လည်း ထိုသည်မှာ နေမင်း၏ စွမ်းအားများကို ငှားယူအသုံးပြုခြင်းနှင့် ဆင်တူပေသည်။

သို့ရာတွင် ရင်ထျန်းကျောက်သည် စစ်နတ်ဘုရားမအသွင်သို့ ပြောင်းလဲသွားခြင်း ဖြစ်သည်။ လောင်ကျွမ်းနေသည့် မီးလျှံများသည် သူမ၏ အနီးတွင် ရစ်ပတ်နေပြီး သူမသည် လောကတစ်ခွင်ရှိ စွမ်းအားများကို ငှားယူသုံးစွဲလေသည်။ သူမ၏ တိုက်ခိုက်မှုတိုင်း သူမ၏ လှုပ်ရှားမှုတိုင်းက ဖျက်ဆီးမှုစွမ်းအားများနှင့် ပြည့်နှက်နေပေသည်။

ထိုအချိန်၌ ရင်ထျန်းကျောက်သည် သူမ၏ လက်သီးကို မြှောက်လိုက်ကာ ရီဖူရှင်းထံသို့ ဖိနှိပ်ထိုးနှက်သည်။ သူမသည် အလွန်အစွမ်းထက်ကာ သန်မာလွန်းလှသည်။ သူမ၏ တိုက်ခိုက်မှုဖြစ်သည့် သံသယကင်းစင်ခြင်းအဆင့် မီးတောက်၏ ပြန်လည်မွေးဖွားခြင်း လက်ဝါးရိပ်သည် ကောင်းကင်ကို ဖုံးလွှမ်းထားပြီး ရီဖူရှင်းထံသို့ ရိုက်ခတ်သည်။

မီးလျှံလှိုင်းများသည် လွှမ်းခြုံလာပြီး ကျယ်လောင်သည့် အော်မြည်သံကြီး ထွက်ပေါ်လာသည်။

ရီဖူရှင်းသည် ပညာရှိကျမ်းကို အသက်သွင်းလိုက်ကာ သူ၏ ခန္ဓာကိုယ်အတွင်းသို့ မီးလျှံများကို ဆွဲယူလိုက်၍ သူ့ကိုသူ မဟာမီးပြင်းဖိုအဖြစ် ပြောင်းလဲသည်။ သူသည်လည်း လက်သီးကို မြှောက်လိုက်ပြီး ရွှမ်ယွင်ခြေလှမ်းသိုင်းကို သုံးကာ ရှေ့သို့ တက်လာသည်။ လေထုသည် မဟာလမ်းစဉ်ဖြင့် တုန်ခါနေ၏။

သူသည် ဟွမ်ထန်းလက်သီးအားကို သုံး၍ ရှေ့သို့ ပြင်းထန်စွာဖြင့် ထပ်ကာ ထပ်ကာ ထိုးနှက်လိုက်ပြီး သူ၏ တိုက်ခိုက်မှုသည် ကောင်းကင်ကို ဖုံးလွှမ်းနေသည့် လက်ဝါးရိပ်ကြီးကို ရိုက်ခတ်မိသွားသည်။ မိုးချုန်းသံကဲ့သို့ ဆူညံသံကြီး ထွက်ပေါ်လာပြီး လက်ဝါးရိပ်သည် တုန်ခါလာကာ အက်ကွဲရာများ ဖြစ်ပေါ်လာသည်။ ထို့နောက်တွင် ပြိုကွဲပျက်စီးသွားလေသည်။

သို့သော်လည်း ရင်ထျန်းကျောက်၏ တိုက်ခိုက်မှုသည် ရပ်တန့်မသွားခဲ့ပေ။ သူမသည် ရှေ့သို့ ဆက်လက်၍ တိုးလာပြီး လက်သီးနှင့် လက်ဝါးနှစ်ခုလုံးကို တစ်ချိန်တည်း ထုတ်ဖော်သည်။ သူမ၏ ရှည်လျားသည့် ဝတ်စုံက မီးတောက်များဖြင့် ဖုံးလွှမ်းနေသည်။ သူမကို ကြည့်ရသည်မှာ ခမ်းနားထည်ဝါ၍ စွမ်းအားပြည့်ဝလှသည်။

သူမသည် သိုင်းနတ်ဘုရားမကဲ့သို့ သူမ၏ လက်သီးများကို ဆန့်ထုတ်လိုက်ကာ သူမ၏ မီးလက်ဝါးရိပ်သည် သူ့လမ်းကြောင်းရှိ အရာအားလုံးကို ကြေမွပျက်စီးသွားစေသည်။

၎င်းနှစ်ခုသည် အတူတကွ တိုက်ခိုက်လိုက်ပြီး အဖျက်အဆီးစွမ်းအား စီးကြောင်းများသည် သူတို့၏ ကြောက်မက်ဖွယ် ထိခတ်သွားမှုမှ ထွက်ပေါ်လာသည်။

ကျယ်လောင်သည့် အသံကြီး ထွက်ပေါ်လာပြီး နှစ်ဖက်လုံး နောက်ပြန်ဆုတ်လိုက်ကြသည်။ ရီဖူရှင်း၏ အကြည့်များသည် သူ့ ပြိုင်ဘက်အပေါ်တွင် တည်မြဲနေ၏။ ဤမိန်းမသည် ထိုကဲ့သို့ စွမ်းအားကြီးလှသည့် တိုက်ခိုက်မှုအား ထုတ်ဖော်နိုင်သည်ကို သူက အနည်းငယ် အံ့သြနေသည်။ သူမက ဒေသနန်းတော်သို့ ဝင်ရောက်၍ ကျင့်ကြံနိုင်ခြင်းမှာ အံ့သြစရာ မရှိတော့ပေ။ သူမသည် ဒေသနန်းတော်တွင် ယူချင်းနှင့် တိုက်ခိုက်ခဲ့သေးသလား သူ သိချင်သွားမိသည်။

ရင်ထျန်းကျောက်သည် သူမ၏ နှလုံးက ပြင်းထန်စွာ ဗြောင်းဆန်သွားသည်ကို ခံစားလိုက်ရသည်။ သူမသည် ရီဖူရှင်းကို မရိုက်နိုင်ရုံမျှမက သူသည် သူမကို တိုက်ရိုက်ပင် တိုက်ခိုက်လိုက်သေး၏။ ဤလူသည် ဒေသနန်းတော်မှ ဟိုအကောင်နှင့် တူလှပေသည်။ သူက တကယ့်ကို မကောင်းဆိုးဝါးပင် ဖြစ်၏။ ထို့အပြင် သူသည် သူမကဲ့သို့ပင် မီးတောက်၏ စွမ်းအားများကို တိုက်ခိုက်မှုဆီသို့ ပေါင်းစပ် အသုံးပြုနိုင်သည့် စွမ်းရည်ရှိပုံ ရလေသည်။

တစ်နည်းအားဖြင့် သူတို့ကြားမှ တိုက်ပွဲသည် မည်သည့်နေရာတွင်မဆို ဖြစ်ပွားနိုင်သည်မျိုး မဟုတ်ပေ။

သူမသည် ရီဖူရှင်းကို ကြည့်လိုက်ပြီး သူမ၏ သွေးများ ဆူပွက်လာသည်။ ရန်ဟောင်သွေးများက သူမ၏ သွေးကြောများကို ဖြတ်ကာ စီးဆင်းလာသည်။

ပို၍ စွမ်းအားပြည့်ဝလှသည့် မီးတောက်မှ အလင်းတန်းသည် ကောင်းကင်သို့ ထိုးတက်သွားသည်။ နတ်ဘုရားမီးတောက်သည် သူမအနီးတွင် ရစ်ပတ်နေပြီး တောက်ပသည့် မီးတောက်အလင်းများအဖြစ် ပြေးလွှားနေသည်။ ၎င်းကို ကြည့်ရသည်မှာ ရွှေရောင်နတ်ဘုရား မီးတောက်က သူမ၏ ခန္ဓာကို ကျွမ်းလောင်ကာ သူမ၏ စွမ်းအားကို ပို၍ အစွမ်းထက်လာစေရန် ပံ့ပိုးပေးနေသည်။ ရိုင်းစိုင်းကြမ်းကြုတ်သည့် အရှိန်အဝါများက သူမထံမှ ထွက်ပေါ်လာသည်။

ရီဖူရှင်း၏ မျက်နှာထက်တွင် အံ့အားသင့်သည့် အကြည့်များ ထွက်ပေါ်လာသည်။ ရင်ထျန်းကျောက်၏ အရှိန်အဝါသည် ပို၍ တိုးပွားလာပြီး သန်မာလာလေသည်။ လမ်းစဉ်မီးတောက်များသည် သူမ၏ တိုက်ပွဲစွမ်းရည်ကို တိုးမြှင့်ပေးလိုက်ပုံရ၏။

ရွှေရောင်မီးတောက်များသည် သူမ၏ မျက်ဝန်းများမှ ထွက်ပေါ်လာပြီး ရီဖူရှင်း၏ မျက်လုံးများကို ထိုးဖောက်သည်။ တစ်ခဏအတွင်းတွင် ရီဖူရှင်းသည် သူ၏ စိတ်ထဲတွင် ကြောက်မက်ဖွယ် နတ်ဘုရားမီးတောက်များဖြင့် လောင်ကျွန်းခံရပြီး သူ၏ စိတ်ဝိညာဉ်စွမ်းအားများကိုပါ တိုက်စားလောင်မြိုက်နေသည်ဟု ခံစားလိုက်ရသည်။

ဟူး  ...

ရင်ထျန်းကျောက်သည် ရှေ့သို့ ခြေလှမ်းလိုက်ပြီး နတ်ဘုရားမီးတောက်များက သူမ၏ ခန္ဓာကိုယ်ကို ရစ်ပတ်ကာ လက်အများကြီး ရှိသည့် မီးလျှံစစ်နတ်ဘုရားမ အဖြစ်သို့ ပြောင်းလဲသွားစေသည်။

နတ်ဘုရားမသည် သူမ၏ လက်သီးချက်များကို ရီဖူရှင်းထံသို့ ဦးတည်သွားစေကာ သူ့ကို ပြင်းထန်စွာ ထိုးနှက်နိုင်ရန် လေထုကို ဖျက်ဆီး၍ သူ့ကို ဖုံးလွှမ်းထားသည်။

ရီဖူရှင်း၏ မျက်လုံးများထဲတွင် လေးနက်ဟန်များ ဖြစ်ပေါ်လာသည်။ သူသည် ရောက်လာနေသည့် လက်သီးများကို မော့ကြည့်လိုက်ပြီး ကြောက်မက်ဖွယ် မီးတောက်စီးကြောင်းများက သူ့ထံမှ ထွက်ပေါ်လွှမ်းမိုးလာသည်။

ထိုအချိန်တွင် ထိတ်လန့်ကြောက်ရွံ့ဖွယ်ရာ နတ်ဘုရားမီးလျှံသည် သူ၏ မျက်လုံးများထဲမှ ထိုးထွက်လာသည်။ သူသည် ရင်ထျန်းကျောက်ကို ကြည့်သည်။ သူမသည် နှိုင်းမယှဉ်သာသော ကြီးမားသည့် မီးလျှံနတ်ဘုရားတစ်ပါးကို မြင်လိုက်ရသည်ဟု ထင်မှတ်လိုက်မိသည်။

ထိုမြင်ကွင်းသည် သူမနှင့် ရင်းနှီးနေပေသည်။

ပြင်းထန်သည့် နေရောင်သည် ကောင်းကင်မှ ကျဆင်းလာသည်။ နေမင်းကြီးသည်ပင် မီးတောက်နေသကဲ့သို့ ဖြစ်ပေသည်။ မီးတောက်များသည် ရီဖူရှင်း၏ ခန္ဓာကိုယ်ပေါ်သို့ ကျဆင်းလာပြီး ထိုမီးတောက်များသည် သူ့အနီးတစ်ဝိုက်တွင် လွှမ်းခြုံထားကာ ပို၍ ပို၍ အားကောင်းလာသည်။

မဟာမျိုးနွယ်စုကိုးခုမှ တန်ခိုးရှင်များသည် သူ့ကို ကြည့်နေပြီး သူတို့၏ နှလုံးများမှာ တုန်ယင်နေကြသည်။ သူတို့သည်လည်း ထိုအရှိန်အဝါမှာ ရင်းနှီးနေသည်ဟု ခံစားမိကြလေသည်။

“ရန်ဟောင်လမ်းစဉ်မီးတောက်တွေ” သူတို့သည် သူ့ကို ကြည့်ကာ ပြောလိုက်ကြသည်။

ဤလူက များပြားလှသော ရန်ဟောင်လမ်းစဉ်မီးတောက်များကို သန့်စင်၍ သူ့ခန္ဓာကိုယ်ထံ ပေါင်းစပ်စေကာ သူ့ကိုယ်ပိုင်အဖြစ် အသုံးပြုနိုင်သည်လား။ ရင်ထျန်းကျောက်၏ မီးတောက်များသည်လည်း ရန်ဟောင် လမ်းစဉ်မီးတောက်များဟု ခေါ်နိုင်ပေသည်။ သူမ၏ ဖခင် အင်ပါယာဝူသည် ရန်ဟောင်တစ်ပါးဖြစ်ပြီး သူမ၏ ပါရမီအရည်အချင်းများမှာ ဖခင်ဖြစ်သူထံမှ ဆင်းသက်လာခြင်း ဖြစ်သည်။

သို့ဆိုလျှင်ပင် သူမသည် သူမ၏ ကျင့်ကြံခြင်း တိုးတက်သန်မာလာမှသာ တဖြည်းဖြည်း အစွမ်းထက်လာအောင် လုပ်ဆောင်နိုင်စွမ်းရှိသည်။

သူမ၏ လမ်းစဉ်မီးတောက်များသည် ရီဖူရှင်း သန့်စင်ထားသည့် မီးတောက်များထက် ပို၍ အစွမ်းထက်နေသင့်ပေသည်။ အဆုံးတွင်တော့ သူမသည် ဖခင်ထံမှ တိုက်ရိုက်ဆက်ခံခဲ့ရပြီး ရီဖူရှင်းသည်တော့ နောက်ပိုင်းမှသာ ရရှိခဲ့သည်မဟုတ်ပါလား။

သို့သော်လည်း ရီဖူရှင်းထံမှ ပေါက်ကွဲထွက်လာသည့် အရှိန်အဝါစွမ်းအားကို ကြည့်ရလျှင် အနည်းဆုံးတော့ သူမထက် အားနည်းခြင်း မရှိပေ။ ထပ်ပေါင်းဆိုရလျှင် ရန်ဟောင်စွမ်းအားများသည် ပေါင်းစပ်လောင်ကျွမ်းနေပေသည်။ သူသည် ဤအပျက်အစီးနယ်မြေ အတွင်းရှိ စွမ်းအားများကို အသုံးပြုနေခြင်း ဖြစ်ပေသည်။ နေမင်း၏ ပြင်းထန်သည့် အလင်းရောင်သည် သူ့အပေါ်သို့ တောက်ပကျဆင်းနေသည်။

ဘုန်း ...

ရီဖူရှင်း၏ မီးပြင်းဖိုသည် သူ့အနီး ပတ်ဝန်းကျင်ရှိ မီးတောက်များကို ဝါးမျို၍ ရိုင်းစိုင်းကြမ်းတမ်းသည့် စွမ်းအားများကို ထွက်ပေါ် လွှမ်းခြုံလာသည်။ သူ၏ ခန္ဓာကိုယ်သည် မြင့်မားပြီး ထည်ဝါခန့်ညားသည့်အသွင် ဖြစ်ပေါ်လာသည်။ ၎င်းသည် အင်ပါယာခွာက လောကကြီးထံသို့ ဆင်းသက်လာသကဲ့သို့ ထင်မှတ်ရပေသည်။

သူသည် လက်ကို မြှောက်လိုက်ပြီး လေထဲသို့ ဖမ်းဆုပ်သည်။ ကြီးမားသည့် လက်ဝါးရိပ်ကြီးသည် ရင်ထျန်းကျောက်၏ တစ်ဟုန်ထိုးလာနေသော လက်သီးများကို ရိုက်ခတ်လာကာ ကွဲထွက်ပျက်စီး သွားစေသည်။

သူက ရှေ့သို့ ခြေလှမ်းလိုက်လျှင် လေထုသည် တုန်ခါလာသည်။ မဟာလမ်းစဉ်၏ စွမ်းအားများသည် အော်မြည်နေပြီး သူ့မျက်လုံးမှ မီးတောက်များ ထိုးထွက်လာကာ ရင်ထျန်းကျောက်ဆီမှ ထွက်လာသော ရွှေရောင်မီးတောက်များနှင့် တွေ့ဆုံခဲ့သည်။ အလွန်ကြီးမားသည့် စွမ်းအားနှစ်ခုသည် ထိပ်တိုက်တွေ့ဆုံခဲ့လေသည်။

ရင်ထျန်းကျောက်၏ အမူအရာက ပြောင်းလဲသွားသည်။ သူမသည် ရီဖူရှင်းထံသို့ လျှောက်သွားသည်။ မီးတောက်များ၏ အောက်ခြေတွင် သူမသည် မယှဉ်သာအောင် လှပသည့် နတ်ဘုရားမတစ်ပါး သဖွယ် ထင်မှတ်ရသည်။

ရီဖူရှင်းသည်လည်း တစ်ချိန်တည်း၌ ရှေ့သို့ လှမ်းလာကာ သူ့ လက်သီးချက်အား ထုတ်ဖော်၏။ ကောင်းကင်ဘုံ မဟာလမ်းစဉ်၏ သုံးချောင်းထောက် မီးပြင်းဖိုသည် လမ်းစဉ်မီးတောက်များမှ ပုံပေါ်လာကာ သူ့လက်အတွင်း၌ ပေါ်ပေါက်လာသည်။  သူ့ကိုယ်တွင်းမှ မီးတောက်များကို ထိုအတွင်းသို့ လောင်းထည့်ပြီးနောက် ရင်ထျန်းကျောက်ထံသို့ ပစ်လွှတ်လွှမ်းခြုံစေသည်။

ရင်ထျန်းကျောက်သည် သူမ၏ ရွှေရောင် နတ်ဘုရားမီးတောက်များကို ထုတ်လွှတ်ကာ နတ်ဇာမဏီအဖြစ် ပြောင်းလဲသည်။ သူမနှင့်အတူ များပြားလှသည့် အခြား မြင့်မြတ်သားရဲများသည် ရှေ့သို့ တစ်ဟုန်ထိုး ဝင်ရောက်လာကြသည်။

သို့သော်လည်း နတ်ဘုရား မီးပြင်းဖိုသည် ကြီးမားသထက် ကြီးမားလာကာ ၎င်းတို့ အားလုံးကို ဝါးမျိုသည်။ မီးလျှံနတ်ဘုရားသားရဲများသည် နစ်မြုပ်သွားကာ ချက်ချင်းပင် ကွဲကြေပျက်စီးသွားခဲ့သည်။ သူတို့သည် မထိုးဖောက်နိုင်ခဲ့ကြပေ။

ဘုန်း ...

မီးလျှံ နတ်ဘုရား သားရဲများသည် မီးပြင်းဖိုအတွင်း၌ အရည်ပျော်ကုန်ကြ၏။ ရင်ထျန်းကျောက်သည် ဖြူဖျော့သွားသည်။ ကြောက်မက်ဖွယ် မီးပြင်းဖိုသည် သူတို့ အားလုံးကို ဆက်လက်၍ ဝါးမျိုနေပြီး အဆုံးမဲ့ နတ်ဘုရားမီးလျှံများသည် ရှေ့သို့ တိုးဝင်လာသော်လည်း မီးလျှံသားရဲများသည် ၎င်းကို မဖျက်ဆီးနိုင်ပေ။ မီးပြင်းဖိုသည် ရန်ဟောင်မီးတောက်မှ ဖြစ်ပေါ်လာတာကြောင့် အခြားမီးတောက်စွမ်းအားများကို ဝါးမျိုနိုင်ပေသည်။

ထိုမီးပြင်းဖိုသည် မဟာလမ်းစဉ်စွမ်းအားများ ပျော်ဝင်နေပြီး ၎င်းသည် ကောင်းကင်နှင့် မြေကြီးရှိ မီးတောက်များ အားလုံးကို သန့်စင်နိုင်သည်။

ရီဖူရှင်းသည် ရှေ့သို့ ခြေလှမ်းလိုက်ပြီး မီးပြင်းဖိုကို ရိုက်ကာ လေထုကို ဖြတ်၍ ရင်ထျန်းကျောက်ဆီသို့ ဦးတည်စေသည်။ ၎င်းသည် သူမဆီသို့ ပြေးဝင်ကာ ဖိနှိပ်နေပြီး သူမသည် လက်နှစ်ဖက်ထံ မြှောက်ကာ မီးပြင်းဖိုကို ပိတ်ဆို့ တားဆီးထားလိုက်သော်လည်း ယင်းမှ ထွက်ပေါ်လာသည့် မီးတောက်များသည် သူမပေါ်သို့ လွှမ်းခြုံလာကာ ဝါးမျိုရန် ကြိုးစားပေသည်။ သူမသည် နောက်သို့ ပျံသန်းဆုတ်ခွာရသည်ထိ ၎င်းက သူမကို အဆက်မပြတ် ဖိအားပေးနေပြီး ပါးစပ်အပြည့် သွေးတစ်ပွက်ပင် အန်ထုတ်လိုက်ရသည်။ သူမ၏ မျက်နှာသည် သွေးဆုတ်ဖြူရော်နေလေသည်။

ရီဖူရှင်းသည် သူမ၏ ဒဏ်ရာကို ဂရုစိုက်သည့်ပုံ မရှိဘဲ ရှေ့သို့ ဆက်လက် တိုးဝင်လာသည်။ သူသည် တစ်ဖန်ထပ်၍ မီးပြင်းဖိုကို သူမထံ တွန်းလွှတ်ကာ သူမအပေါ် ဆက်လက်၍ တိုက်ခိုက်သည်။ သူမသည် မြေပြင်သို့ ရိုက်ခတ်မိကာ လဲပြိုကျသွားသည်။ နောက်ဆုံးတွင် သူမသည် တောင့်ခံနိုင်စွမ်း မရှိတော့ပေ။ သူမသည် မြေပြင်တွင် လဲလျောင်းကျသွားလျက်က နီရဲရဲသွေးများသည် သူမ၏ ပါးစပ်ထောင့်မှ စီးကျလာပေသည်။

ရီဖူရှင်း၏ ပုံရိပ်သည် လျှပ်တစ်ပြက်အတွင်း သူမရှေ့သို့ ဆင်းသက်လာသည်။ သူသည် သူမထံသို့ ဦးတည် လျှောက်လှမ်းလာသည်။

နေမင်းရဲတိုက်နံရံပေါ်ရှိ ကျူးမျိုးနွယ်တန်ခိုးရှင်များ၏ မျက်နှာသည် သံမဏိများအလား တင်းမာခက်ထန်နေသည်။

ရင်ထျန်းကျောက်သည် အမှန်တကယ်ပင် ရီဖူရှင်း၏ လက်ချက်ဖြင့် ရှုံးနိမ့်ခဲ့လေသည်။

မျိုးနွယ်စုကိုးခုအားလုံးတွင် ဝူမျိုးနွယ်စုမှ ရီဖူရှင်းသည်သာလျှင် အဆုံး၌ သူ၏ ပြိုင်ဘက်အားလုံးကို အနိုင်ရရှိခဲ့ပေသည်။

“မြို့စားရီ” ကျူးမျိုးနွယ်တန်ခိုးရှင်က ခေါ်သည်။ ရီဖူရှင်းသည် သူ့ကို တစ်ချက်သာ ကြည့်လိုက်ပြီးနောက် လျစ်လျူရှုကာ ရှေ့သို့ ဆက်လျှောက်သွားလေသည်။

သူ့ကို ကြည့်နေကြသည့် မျိုးနွယ်စုကိုးခုမှ တန်ခိုးရှင်များသည် ဆွံ့အသွားကြလေသည်။ ကျူးမျိုးနွယ်၏ တန်ခိုးရှင်သည် ဤရလဒ်ကို ပြောင်းလဲနိုင်ခြင်းမရှိသလို ရီဖူရှင်းသည်လည်း အညံ့ခံရန် ရည်ရွယ်ချက် မရှိပေ။

သူသည် ရင်ထျန်းကျောက်ဆီသို့ လျှောက်သွားကာ သူမထံမှ မီးလျှံစွမ်းအားများကို ယူဆောင်သည်။

အထက်ကောင်းကင်မှ ကျဆင်းနေသည့် နေရောင်ခြည်တန်းမှ နေမင်းရဲတိုက်ပေါ်ရှိ ရောင်ခြည်တန်းကိုးခုသည် တစ်ခုတည်းအဖြစ်သို့ ပေါင်းစည်းသွားကာ ရီဖူရှင်းပေါ်သို့ ကျရောက်လာသည်။

ရွှေရောင်အလင်းများသည် သူ့အနီးတွင် ရစ်ပတ်ထားလိုက်ကာ ကျယ်ပြောလှသည့် နေရာကို ဖုံးလွှမ်းသွားသည်။

မဟာလမ်းစဉ်၏ စွမ်းအားများသည် နေရောင်ခြည်နှင့်အတူ စီးဆင်းနေပြီး ရီဖူရှင်း၏ စွမ်းအား အရှိန်အဝါများကို သန်မာသည်ထက် သန်မာလာအောင် ပြုလုပ်ပေးနေသည်။ သူ့ကို ကြည့်ရသည်မှာ နေမင်းနှင့် တသားတည်းပေါင်းစပ်သွားကာ တစ်ခုတည်း ဖြစ်လာသကဲ့သို့ ထင်မှတ်ရပေသည်။

ထိုမျှမကသေးဘဲ နေမင်းရဲတိုက်ပေါ်တွင် စောင့်ကြပ်နေသည့် တန်ခိုးရှင်များထဲမှ ဝူမျိုးနွယ်သွေးဆက်များသည်လည်း တောက်ပလာပေသည်။ အခြားသော မျိုးနွယ်ရှစ်ခုမှ တန်ခိုးရှင်များသည် မှေးမှိန်သွားခဲ့သည်။

ကြည့်ရသည်မှာ ၎င်းတို့၏ စွမ်းအားများကို နေမင်းက ဝါးမျိုသွားပြီး လူတစ်ဦးတည်းဆီသို့ ပေးပစ်လိုက်ပုံရလေသည်။

ဝူယုံးသည် ရဲတိုက်တံတိုင်းပေါ်တွင် စောင့်ကြပ်နေသည့် အစောင့်အရှောက်ပုံရိပ်များထံသို့ လှမ်းကြည့်သည်။ နေမင်းရောင်စဉ်များသည် သူ့အပေါ်တွင် တောက်ပလာပြီး သူသည် ရီဖူရှင်းထံသို့ သွားရောက်သည်။

“မခုခံပါနဲ့။ သူက မင်းကို ဘိုးဘေးနယ်မြေဝင်ပေါက် တံခါးကို ဖွင့်ဖို့ ကူညီပေးလိမ့်မယ်” ဝူယုံးက ရီဖူရှင်းကို ပြောသည်။

ပုံရိပ်တစ်ခုက ရီဖူရှင်းထံသို့ လျှောက်လာပြီး သူ့ခန္ဓာကိုယ်ထဲသို့ တိုက်ရိုက်သွားကာ မီးလျှံအလင်းတန်းအဖြစ် ပြောင်းလဲသွားသည်ဟု ထင်မှတ်ရသည်။

ကြည့်ရသည်မှာ ရဲတိုက်တံတိုင်းပေါ်၌ စောင့်ကြပ်နေသည့် တန်ခိုးရှင်များမှာ အစစ်အမှန်မဟုတ်ဘဲ သန့်စင်သည့် အသိအပိုင်းအစများသာ ဖြစ်ပုံရလေသည်။

ရီဖူရှင်း၏ ရွှေရောင်အလင်းများသည် တောက်ပသည်ထက် တောက်ပလာပြီး လမ်းစဉ်မီးတောက်မှုများကို သန့်စင်မှုသည် ပို၍ လျင်မြန်လာသည်။ တောက်ပသည့် မီးလျှံအလင်းများသည် နေမင်းရဲတိုက်ကို ဖုံးလွှမ်းထားသည်။

ကြောက်မက်ဖွယ် အလင်းရောင်စဉ်တန်းသည် ဘိုးဘေးနယ်မြေ ဝင်ပေါက်တံခါးရှိရာသို့ ပြေးဝင်သွားလေသည်။

နေမင်း၊ ရီဖူရှင်း၏ ခန္ဓာကိုယ်နှင့် ဘိုးဘေးနယ်မြေသို့ ဝင်ပေါက် အားလုံးသည် တစ်ခုပြီးတစ်ခု တောက်ပလင်းလက်လာသည်။ ကြောက်မက်ဖွယ် ရွှေရောင်မီးတောက်များ၏ အလင်းအောက်မှာပင်လျှင် ဝင်ပေါက်တံခါးသည် တုပ်တုပ်မျှလှုပ်မလာခဲ့ပေ။ ထိုမှထွက်လာသည့် အပူသည် နီရဲပူပြင်းလာသည့်တိုင် ၎င်းသည် ခိုင်မာစွာ ရှိနေဆဲ ဖြစ်သည်။

“ဖွင့်လိုက်ပါ။ ဒါဆို ကျုပ်တို့ ဘိုးဘေးနယ်မြေကို သွားလို့ရပြီ” ရီဖူရှင်းဘေးမှ ဝူယုံးက ပြောသည်။

ရီဖူရှင်းသည် ဤနောက်ဆုံးအဆင့်ကို ပြီးမြောက်စေကာ ဘိုးဘေးနယ်မြေသို့ သွားရောက်နိုင်မည့် ဝင်ပေါက်တံခါးကို ဖွင့်နိုင်မည်ဟု မျှော်လင့်မိလေသည်။

မျိုးနွယ်စုကိုးခုမှ တန်ခိုးရှင်များသည် ရီဖူရှင်းကို ကြည့်နေကြသည်။ သူသည် နောက်ဆုံးအဆင့်စမ်းသပ်မှုကို ပြည့်စုံစွာ ပြီးမြောက်နိုင်ပြီး ဘိုးဘေးနယ်မြေသို့ ဝင်ရောက်ခွင့် ရရှိနိုင်မလား၊ မရနိုင်မလား သူတို့ မသိရှိကြပေ။

***