ကောင်းကင်မှာ ဥပဒေသရှိသလို သတ္တဝါအားလုံးမှာ ကံကြမ္မာရှိတယ်

ညသန်းခေါင်ပိုင်းတွင် ယွမ်ရှောင်သည် အရုဏ်ဦးခြံဝန်းသို့ သွားနေစဉ် နောက်ဆုံး၌ ကြယ်မျှော်စင်ကို ထုတ်ယူရန် အချိန်ရသွားသည်။

"မင်း နားလည်သွားပြီလား" သူက ကြယ်ပြာကို မေးလိုက်သည်။

"ကြာပြီကွ"

သူ့ရင်ဘတ်ထဲမှ အနက်ရောင် သတ္တဝါလေးတစ်ကောင် ထွက်လာပြီး နက်ပြာရောင် မျက်လုံးနှစ်လုံးက အနည်းငယ် တောက်ပနေသည်။

"ငါ့ကို ပြောပြ"

ယွမ်ရှောင်က ကြယ်မျှော်စင်ကို မြှောက်ကြည့်လိုက်သဖြင့် မျက်နှာပေါ်သို့ အလင်းရောင် ထွန်းလင်းဖြာကျနေသည်။

"ဒါက ရှေးဟောင်း အင်မော်တယ်ပစ္စည်းတစ်ခုပဲ။ အာကာသကြယ်ကိုးလုံး ပါဝင်ပြီး ကောင်းကင်ကိုးခု ကြယ်ကျင့်စဥ်လည်း ပါဝင်တယ်။ အဆင့်တစ်ခု တိုးလာတိုင်း ကြယ် တစ်လုံးကို အသက်သွင်းနိုင်ပြီး ကြယ်ကိုးလုံးစလုံး စီတန်းပြီးရင် ထိပ်တန်း အာကာသ အင်မော်တယ်တစ်ပါး ဖြစ်လာလိမ့်မယ်။ ဒီအဆင့်မှာ ရုပ်ပိုင်းဆိုင်ရာ ခန္ဓာကိုယ်နဲ့ ဟင်းလင်းပြင်ကို ဖြတ်ကျော်နိုင်သလို တစ်ချက်တည်းနှင့် တောတောင်တွေကို ဖျက်ဆီးနိုင်လိမ့်မယ်။ အတွေးတစ်ချက်တည်းနဲ့ စကြဝဠာကို ဖြတ်ကျော်နိုင်ပြီး သက်တမ်းရှည်လျားတဲ့ နေနှင့်လလို ထာဝရ ကံကြမ္မာမျိုး ပိုင်ဆိုင်နိုင်တယ်။ ဒါက လူတစ်ယောက်ရဲ့ ရုပ်ပိုင်းဆိုင်ရာ ခွန်အားကို မြှင့်တင်ဖို့ ထိပ်တန်း အင်မော်တယ်နည်းစနစ်တစ်ခုပဲ"

ကြယ်ပြာက ရှည်လျားထွေပြားစွာ ရှင်းပြလိုက်၏။

"အံ့သြစရာပဲ"

ယွမ်ရှောင်၏ မျက်လုံးများက တောက်ပသွားသည်။

"ငါက ဘယ်အချိန်မှာ ကျင့်ကြံလို့ရနိုင်မှာလဲ"

လက်ရှိ၌ သူသည် ရှေးဟောင်း ဟင်းလင်းပြင်ကျင့်စဥ်ကိုသာ ကျင့်ကြံနေရသောကြောင့် ရုပ်ပိုင်းဆိုင်ရာ ခန္ဓာကိုယ်က အနည်းငယ် အားနည်းသည်ဟု ခံစားနေရသည်။

"အဲဒီအကြောင်း မတွေးနဲ့"

လနီက ဝင်ရောက်ကန့်ကွက်လိုက်သဖြင့် ယွမ်ရှောင်ကို အံ့အားသင့်သွားစေသည်။

"ဒီလို ရတနာတစ်ခုကို ငါက ဘာလို့ မကျင့်ရမှာလဲ"

"ရတနာတစ်ခုလား၊ဒါက အမှိုက်ဟ"

ထိပ်တန်း အာကာသ အင်မော်တယ်တစ်ပါး ဖြစ်လာနိုင်သော ကျင့်စဥ်ကို ကြယ်ပြာက အမှိုက်ဟု ရည်ညွှန်းနေခဲ့သည်။

"ဟုတ်တယ်။ ဒါက မင်းရဲ့ အလားအလာကို လျှော့ချပစ်လိမ့်မယ်။ ဒီကျင့်စဥ် ကျင့်ကြံလိုက်တာနဲ့ မင်း အဆုံးသတ်သွားပြီ"

ယွမ်ရှောင်က ဆွံ့အသွားသော်လည်း ခဏတာစဥ်းစားပြီးနောက် စိတ်ကူးတစ်ခု ရလိုက်သဖြင့် ထွက်သွားရန် ပြင်ဆင်ခဲ့၏။

"ငါက ဒါကို မသုံးနိုင်ရင် အစ်မကျောက်ကို ပေးလို့ရတယ်"

"အစ်ကို​ကြီး ဒါက မင်းရဲ့ မင်္ဂလာဦးညနော်"

ကြယ်ပြာက သူ၏ ဝတ်ရုံကို ဆွဲကာ တားမြစ်လိုက်သော်လည်း စတင် ပြေးလွှားနေပြီဖြစ်သည်။

"ငကြောက် မင်းက ဒီအချိန်မှာ ထွက်ပြေးချင်နေတာလား၊ မဟုတ်သေးဘူးနော်။ မင်းရဲ့ ဆုံးဖြတ်ချက်က မမှန်ဘူး"

အရုဏ်တက်နတ်ဧကရီသည် မင်္ဂလာအခန်းမှာ စောင့်နေသော်လည်း သူက ကျောက်ရန်ရန်ကို လက်ဆောင်တစ်ခု ပေးရန် အောက်နယ်မြေသို့ ဦးတည်နေခဲ့သည်။ ယွမ်ရှောင်က ဧကရီနှင့် မင်္ဂလာညကို အတူတကွ မဖြတ်သန်းလိုသဖြင့် ရှောင်တိမ်းနေခြင်းပင်။ လျှပ်တစ်ပြက်အတွင်းမှာ သူက ချန်အိမ်တော်မှ ခိုးထွက်သွားပြီး ညသန်းခေါင်တွင် ကောင်းကင်နယ်မြေကို ဖြတ်သန်းခဲ့သည်။

"ရပ်စမ်း လူမိုက်။ သူမနဲ့ တစ်ည ဖြတ်သန်းလိုက်ရင် မှော်စွမ်းအား ဆယ်ပုံတစ်ပုံကို ရမှာဖြစ်ပြီး ကောင်းကင်နယ်မြေမှာ မင်းအတွက် အခြေခိုင်ဖို့ လုံလောက်သွားပြီ။ မင်းက ဘာလို့ ဒီလို အခွင့်အရေးကို လက်လွှတ်မှာလဲ"

ကြယ်ပြာသည် ဒေါသတကြီး တားမြစ်နေကာ လနီကမူ ရယ်မောနေခဲ့သည်။

"သူမက စတွေ့ပြီးကတည်းက မင်းကိုပဲ မျက်စိကျနေတာ။ ငါ ပြောခဲ့သလိုပဲ၊ မင်း ဘယ်ကိုပဲ သွားသွား သူမဆီကနေ မလွတ်နိုင်ဘူး အစ်ကိုကြီး"

"ငါ ထွက်ပြေး​နေတာမဟုတ်ဘူး။ ဒီအကြောင်းကို တွေးဖို့ အချိန်ပိုလိုတယ်"

"ဘာအကြောင်းကို တွေးတောဖို့လဲ။ မင်းရဲ့ ဦးနှောက်က တစ်ခန်းလွတ်သွားတာလား"

ယွမ်ရှောင်၏အမြင်တွင် သူမက ချန်ရီ၏ ပုံရိပ်အောက်မှာ အင်မော်တယ်စစ်ပွဲ၌ ပါဝင်ရန် စီစဉ်ထားသည်။ ဤအချက်က နတ်ဆိုးတိုက်ကြီး၏ ပါရမီရှင်အားလုံးကို အံ့အားသင့်စေပြီး အပြတ်ရှင်းရန် နည်းဗျူဟာမြောက် အကြံတစ်ခု ဖြစ်နိုင်ပေ။ ထို့ကြောင့် သူမက ချန်ရီ၏ ပုံရိပ်ကို ယုံကြည်လောက်အောင် ပြင်ဆင်ခဲ့ပြီး မာ်သူမှ အရုဏ်တက်နတ်ဧကရီဖြစ်သည်ဟု သံသယဝင်မည် မဟုတ်ချေ။

"နှစ်ကိုယ်တူ ကျင့်ကြံမှုကို စတင်တာက ပြန်လှည့်စရာ လမ်းမရှိဘူး။ ငါတို့က လမ်းကြောင်းချင်း တူညီတဲ့အပြင် သူမက ငါ့ကို ကောင်းကောင်းမွန်မွန် ဆက်ဆံခဲ့တယ်"

ယွမ်ရှောင်က ရှင်းပြသည်။

"သေချာတာပေါ့၊ မင်းတို့ နှစ်ယောက်လုံးက တူညီတဲ့ လမ်းကြောင်းပေါ်မှာ ရှိနေတယ်။ ဒါပေမယ့် သူမက ပထမဆုံး အကွက်ရွှေ့လိုက်ရင် မင်း ပြဿနာတက်သွားလိမ့်မယ်ဟ။ သူမရဲ့ နောက်ကွယ်မှာ ရည်ရွယ်ချက်တွေ ရှိတယ်"

"ငါ သိတယ်။ ဒါကြောင့် ငါက ဒီညမှာ သူမကို နောက်ဆုံးအခွင့်အရေးတစ်ခု ပေးနေတာ။ သူမက ငါ့ရည်ရွယ်ချက်တွေကို နားလည်ပြီး ကိုယ့်ကိုကိုယ် ထိန်းချုပ်ဖို့ ရွေးချယ်ရင် ငါတို့က ရဲဘော်ရဲဘက်တွေ ဖြစ်နိုင်တယ်။ ဒါပေမယ့် သူမက ခေါင်းမာနေရင် ငါလည်း လူကောင်းလေး မလုပ်တော့ဘူး"

ယွမ်ရှောင်က ချန်ကောင်းကင်အိမ်တော်၏ ဦးတည်ရာကို ကြည့်ပြီး ပြန်ဖြေလိုက်သည်။

"ဖန်ဆင်းရှင် အင်မော်တယ်ဖြစ်ပြီး မင်းက အရာရာကို ရှုပ်ထွေးအောင် လုပ်နေတယ်။ ငါသာဆိုရင် တွေ့တဲ့ ယောက်ျားတိုင်း—သေပြီ၊ တွေ့တဲ့ မိန်းမတိုင်းလည်း...။ ထားပါ၊ သူတို့ကို တွန်းချလိုက်မယ်"

"ပြီးတော့ ဘယ် နတ်ဆိုးနို့မဆို ငါ သောက်မယ်"

ကြယ်ပြာက ခေါင်းကုတ်နေပြီး လနီ၏ ကြုံးဝါးသံကြောင့် ယွမ်ရှောင်ကို ဆွံ့အသွားစေသည်။

"မင်း သိလား၊ တတိယအကြိမ်မှာ သူမရဲ့ ချီစွမ်းအင်အားလုံးကို စုပ်ယူဖို့ မလိုဘူး။ သူမအတွက် ခုနစ်ဆယ်ရာခိုင်နှုန်းကနေ ရှစ်ဆယ်ရာခိုင်နှုန်းလောက် ချန်ထားလိုက်မယ်ဆိုရင် လူသားမျိုးနွယ်ကို ကာကွယ်ဖို့ အခက်မတွေ့လောက်ဘူး"

ကြယ်ပြာက လေးနက်စွာစဥ်းစား၍ အကြံပေးလိုက်၏။

"မင်း ငါ့ကို လှည့်စားနေတာမလား"

ယွမ်ရှောင်က မျက်ခုံးပင့်လိုက်သည်။

"ငါက ကိုယ့်ညီအစ်ကိုကို လှည့်စားတဲ့သူမျိုးနဲ့ တူလား"

ကြယ်ပြာက ဟန်ဆောင်ပြီး ဂုဏ်သိက္ခာရှိစွာ ပြန်ပြောလိုက်သည်။

"လနီ၊ သူက ငါ့ကို လိမ်နေတာလား"

ယွမ်ရှောင်၏ အကြည့်က လနီထံ ကျရောက်သွားသည်။

"မလုပ်ဘူး"

"အမှန်အတိုင်း ပြောရင် မင်းကို အခု နွားတစ်ကောင်ဆီ ခေါ်သွားမယ်"

"လိမ်နေတာ"

သူ၏မက်လုံးကြောင့် လနီ၏ မျက်လုံးများက တောက်ပသွားကာ အမှန်တရားကို ထုတ်ပြောလိုက်သည်။

"မင်း သစ္စာဖောက်ကောင်၊ ဒီလောက် လွယ်လွယ်ကူကူနဲ့ သွေးဆောင်ခံလိုက်ရပြီလား..."

" ငါလည်း လိမ်နေတာ"

ယွမ်ရှောင်က ရယ်မောလိုက်သဖြင့် လနီမှာ စိတ်ပျက်အားလျော့သွားရသည်။

ကောင်းကင်ဖြတ်ကျော်ခြင်းဂိတ်သည် ကောင်းကင်နယ်မြေမှ အင်မော်တယ်ပြည်ထောင်၏ နယ်မြေအမျိုးမျိုးထံ သွားနိုင်သော တံခါးပေါက်ဖြစ်၏။ အရွယ်အစားအမျိုးမျိုးရှိသော နတ်သင်္ဘောများစွာက ကျောက်ချထားပြီးရတနာနန်းတော်၏ စီးပွားရေးဖြစ်သောကြောင့် အခကြေးငွေရှိလျှင် ခရီးသွားလာနိုင်သည်။

"ဦးလေး၊ တစ်ရက်အတွက် ဒီလှေကို ငှားဖို့ ဘယ်လောက်ကုန်ကျလဲ"

ယွမ်ရှောင်က အသေးဆုံး နတ်သင်္ဘောကို ညွှန်ပြလိုက်ပြီး ၎င်းသည် အပေါ်ပိုင်းဖွင့်ထားသော ဆယ်မီတာ ရှည်သည့် လှေငယ်တစ်စင်းအလားပင်။

"ဝိညာဉ်ကျောက် သန်း ၅၀"

ရိုးရိုးရှင်းရှင်း ဝတ်ဆင်ထားသော သက်ကြီးရွယ်အို လှေသမားက ရိုးသားသည့် မျက်နှာဖြင့် ပြန်ဖြေသည်။

"ဝိညာဉ်ကျောက် သန်း ၅၀ လား။ ငါ့မှာ ဝိညာဉ်ကျောက် ၅၀၀,၀၀၀ ပဲ ရှိတယ်"

ယွမ်ရှောင်က သွေးတိုးစမ်းလိုက်ခြင်းဖြစ်သည်။

"အဲဒါဆို ရတယ်။ ကျေးဇူးပြုပြီး တက်ပါ"

လှေသမား၏ မျက်လုံးများက တောက်ပသွားသဖြင့် သူ့ကို ဆွံ့အသွားစေကာ လိမ်လည်ခံရသယောင် ခံစားနေရ၏။ သူက လာလမ်းတွင် အလောင်းများ၏ ရတနာများကို ရယူပြီးနောက် ဝိညာဉ်ကျောက် သန်း ၅၀၀ အထိ ပိုင်ဆိုင်လာခဲ့သည်။ သူ့တွင် ဆေးလုံး ထောင်ကျော်ရှိပြီး ကပ်ဘေးဖြတ်ကျော်လျှင် အသုံးဝင်သည့် လေမီးဆေးလုံးများစွာလည်း ပါဝင်နေသည်။ နဂါးနယ်ပယ်ကို ရောက်ပြီးနောက် ဆေးအာနိသင်က လျော့နည်းသွားပြီး ကောင်းကင်တာအိုဆေးလုံးများစွာကို လိုအပ်နေသောကြောင့်သာမဟုတ်လျှင်လျင်မြန်စွာ တိုးတက်လာနိုင်ပေလိမ့်မည်။

"ကောင်းကင်နယ်မြေကို အသွားအပြန် ခရီးစဉ်တစ်ခုက အသူရာဓားဂိုဏ်း တစ်ဂိုဏ်းလုံးရဲ့ ကြွယ်ဝမှုတစ်ဝက်လောက် ကုန်ကျတယ်။ ဒါကြောင့် သူတို့အတွက် ကောင်းကင်နယ်မြေက ဘယ်လောက်အထိ လက်လှမ်းမမီနိုင်ဘူးဆိုတာကို ပြသနေတယ်"

သင်္ဘောပေါ်ရောက်သောအခါ ယွမ်ရှောင်က ကျင့်ကြံရန် စတင်လိုက်သည်။

"သင်္ဘောက ထွက်တော့မယ်။ လေနည်းနည်း တိုက်နေလို့ တင်းတင်းကျပ်ကျပ် ဆုပ်ကိုင်ထားတာ အကောင်းဆုံးပဲ"

ရိုးရိုးရှင်းရှင်း ဝတ်ဆင်ထားသော လှေသမား အဘိုးကြီးက ရယ်မောပြီး အဝါရောင်သွားများပေါ်အောင် ပြုံးပြလိုက်သည်။ နတ်သင်္ဘောက မြောက်တက်လာသောအခါ ပြင်းထန်စွာ လေတိုက်နေသောကြောင့် ယွမ်ရှောင်၏ ဆံပင်ရှည်နှင့် အဝတ်အစားများ ပြင်းထန်စွာ လွင့်ပျံနေပြီး အနည်းငယ် မသပ်မရပ်ဖြစ်သွားစေသည်။ သူက မှတ်ချက်မပေးဘဲ မနေနိုင်ဘူး။

အသူရာဝိညာဉ်တောင်တန်း ညနက်ပိုင်းတွင် အဖြူရောင်ဝတ် လူငယ်တစ်ယောက်က သူ၏ဓားကို ကျွမ်းကျင်စွာ ထိန်းချုပ်ပြီး ရုတ်တရက် ရပ်တန့်သွားကာ ကျက်သရေရှိစွာ ဆင်းသက်လိုက်သည်။ ဤဒေသ၏ချီစွမ်းအင်က ဆယ်ဆကျော် တိုးလာပြီး ဓားပင်လယ်၏ အဆင့်ထက်ပင် သာလွန်သွားသောကြောင့် လူ့ကမ္ဘာတစ်ခုလုံး အကျိုးရှိပေလိမ့်မည်။ နတ်ဘုရားတိုက်ကြီးတွင် ဝိညာဉ်စွမ်းအင် တိုးတက်လာခြင်းက နတ်ဆိုးတိုက်ကြီးထက် များစွာ ပိုမြင့်ပေလိမ့်မည်။ မင်္ဂလာပွဲအပြီး၌ ကောင်းကင်ဘုံနယ်မြေ၏ စကားဝိုင်းများတွင် ရဲရှင်းချန်၏ သေဆုံးခြင်းနှင့် အင်မော်တယ်စွမ်းအင် တိုးပွားလာခြင်း အကြောင်းသာဖြစ်ပြီး သူတို့အားလုံးက ဓားကြီးနှင့် အင်မော်တယ်ဧကရာဇ်များကို မေ့လျော့သွားခဲ့ကြသည်။

"အစ်မကျောက်က ဘာလုပ်နေလဲ မသိဘူး"

ယွမ်ရှောင်က တွေးရင်း တိမ်အိမ်တော်အတွင်း ဆင်းသက်ပြီး အတွင်းကို ချောင်းကြည့်လိုက်ရာ ဝိုးတဝါးပုံရိပ်တစ်ခုကို မြူမှုန်အကြား မြင်နေရသည်။ သူက တံခါးကို ညင်သာစွာ ဖွင့်လိုက်သောအခါ ရေချိုးကန်မှ ထွက်လာသည့် စင်ကြယ်သော ပုံရိပ်တစ်ခု၏ ခန္ဓာကိုယ်မှ ရေများ စီးကျရင်း ရပ်နေသဖြင့် အလွန်လှပနေသည်။ သူမက အရှိန်အဝါကို ခံစားမိသဖြင့် ခန္ဓာကိုယ်ကို ရေချိုးပုဝါနှင့် ရစ်ပတ်ထားကာ အနည်းငယ် ကြောင်အနေပုံရသည်။

"မောင်လေးယွမ် မင်းရောက်လာတဲ့ အချိန်က မှားနေတယ်"

လှပသော မျက်နှာက နီမြန်းနေပြီး တီးတိုးပြောလိုက်သည်။

"မဟုတ်ဘူး။ ဒါက ပြီးပြည့်စုံတယ်"

ဓားအိမ်တော်၏ ချောက်ကမ်းပါးထိပ်တွင် ကျောက်ရန်ရန်က အနက်ရောင် ၀တ်စုံကို ဝတ်ဆင်ထားပြီး ခြေထောက်များကို အစွန်းပေါ်တွင် လွှဲချကာ သာယာနာပျော်ဖွယ် သီချင်းတစ်ပုဒ်ကို ညည်းနေသည်။ သူမ၏ ဘေးတွင် ယွမ်ရှောင်က လှဲနေပြီး သူ၏ ခေါင်းက သူမ၏ ချောမွေ့သော ပေါင်တွင် အုံးထားသည်။ သူမ၏ မျက်လုံးတွင် နူးညံ့စွာ ကြည့်နေရင်း လက်ချောင်း​လေးများက သူ၏ ဆံပင်ကို ထိုးဖွနေပြီး ဤမြင်ကွင်းသည် ငြိမ်းချမ်းသော အလှတရားကို ပုံဖော်နေသည်။

ယွမ်ရှောင်က လှဲလျောင်းရင်း တိမ်များနှင့် လကို မော့ကြည့်နေကာပတ်ဝန်းကျင်မြင်ကွင်း၌ နစ်မျောပျော်ဝင်သွားသည်။ အင်မော်တယ် လမ်းကြောင်းသည် သစ္စာဖောက်မှု၊ လှည့်စားမှုနှင့်အရှုပ်အထွေးများဖြင့် ပြည့်နှက်နေသော်လည်း ကျောက်ရန်ရန်၏ ငြိမ်းအေးသော ရင်ခွင်အတွင်း အရာအားလုံးက နူးညံ့ပြီး အေးချမ်းနေရာ ဖော်ပြမရနိုင်လောက်အောင် သက်တောင့်သက်သာရှိနေခဲ့၏။

ရဲကုရင်က အဆုံးသတ်သွားသော်လည်း ယွမ်ရှောင်၏ နှလုံးသားမှာ ဒေါသတရားကြောင့် ဆူပွက်နေပြီး တစ်ကြိမ်တည်းသော သေရွာပြန်လာခြင်းသည် သူ့ကို မုန်းတီးမှု စွဲထင်စေခဲ့သဖြင့် ဖြစ်ကောင်းဖြစ်နိုင်သည်မှာ ဖန်ဆင်းရှင် အင်မော်တယ်ထံမှ လက်ဆောင် သို့မဟုတ် ကျိန်စာတစ်ခု ဖြစ်ပေလိမ့်မည်။ ဤဒေါသကြောင့် ယွမ်ရှောင်၏ အဆုံးမရှိသော အစုလိုက်အပြုံလိုက် သတ်ဖြတ်ခြင်းက မရပ်တန့်ခဲ့ချေ။ စိတ်အားထက်သန်မှု လွှမ်းမိုးထားပြီး သူက အကန့်အသတ်မဲ့ စကြဝဠာ၏ အမြင့်ဆုံးသို့ ရောက်ရန် ဆန္ဒရှိကာ စောင့်မျှော်နေသော မြင်ကွင်းများကို စိတ်ဝင်စားပေသည်။

တိမ်တိုင်းပြည်တွင် ယွမ်ရှောင် အဆုံးသတ်သွားသော နေ့၌ သူက လုံးဝ အားနည်းနေပြီး ရဲကုရင်၏ ဓားတစ်ချက်တည်းနှင့် သားကောင်ဖြစ်ခဲ့ရသည်။ ထိုအချိန်မှစပြီး သူက ကြောက်မက်ဖွယ် အမှန်တရားတစ်ခုကို နားလည်လာခဲ့ပြီး မှန်းဆမရနိုင်လောက်အောင် ကျယ်ဝန်းသည့် လောကတွင် တောဥပဒေသာ ကြီးစိုးနေသည်။ ထိုမြင့်မြတ်ပုံရသော အင်မော်တယ်များနှင့် တွေ့လိုက်လျှင် ငြိမ်းချမ်းသည့် အခိုက်အတန့်အားလုံးက ထင်ယောင်ထင်မှား အိပ်မက်များအဖြစ် ပြောင်းလဲသွားပေလိမ့်မည်။ သူ၏ ဝိညာဉ် ကောင်းကင်သို့ ပျံတက်သွားချိန်သည် လုံးဝ ပြန်မကြုံချင်သော ခံစားချက်တစ်ခု ဖြစ်သောကြောင့် အခိုက်အတန့်တိုင်းမှာ သူက ကံကြမ္မာကို ကိုယ့်လက်နှင့်ကိုယ် ဖန်တီးရပေလိမ့်မည်။

ယွမ်ရှောင်က ဓားတစ်ချက်တည်းနှင့်မိုးကောင်ကင်ကို ဖွင့်ပြီး များပြားလှသော မတရားမှုများကို ဖယ်ရှားချင်ခဲ့သည်။ ထို့ကြောင့် သူက ရက်စက်ရန် လိုအပ်ပြီး ကျောက်ရန်ရန်မှာ စိတ်ဓာတ်ချင်း တူညီသူဖြစ်၏​။ သူမ၏ လက်ချောင်းများက သူ၏ မျက်နှာနှင့် လည်ပင်းကို ညင်သာစွာ ထိတွေ့လိုက်သည့်အခိုက်တွင် နှလုံးသားက နွေးထွေးမှုကို ခံစားလိုက်ရသည်။

"မောင်လေးယွမ် လူတစ်ယောက်က သူ့ရဲ့ ခရီးကို စတင်ရမယ်၊ သက်တောင့်သက်သာဖြစ်ရုံနဲ့ ကျေနပ်မနေသင့်ဘူး"

အချိန်တစ်ခုကြာသောအခါ ကျောက်ရန်ရန်က ခေါင်းငုံ့၍ နှုတ်ခမ်းများနှင့် သူ၏ နားကို ကပ်ကာ တီးတိုးပြောလိုက်သည်။

"မင်းရင်ဘတ်က ငါ့ကို ဖိနေတယ်"

"လူဆိုးကောင်၊ ကောင်းကင်နယ်မြေကို တစ်ရက်ပဲ တက်သွားတာနဲ့ မင်းက သတို့သား ဖြစ်နေပြီ"

အလျင်စလို ပြန်လာခဲ့ရသည့်အတွက် အဝတ်အစားလဲချိန်မရခဲ့သဖြင့် သတို့သားဝတ်စုံကြောင့် သူမက နှုတ်ခမ်းကိုက်လိုက်မိသည်။

"ငါက မင်္ဂလာဦးညမှာ မင်းကို လာတွေ့တာတောင် သဝန်တိုနေတာလား"

ယွမ်ရှောင်က ပြုံးပြီး ပြန်ဖြေလိုက်သည်။

"ငါက နည်းနည်းလေးမှ သဝန်မတိုပါဘူး"

ကျောက်ရန်ရန်က လျစ်လျူရှုလိုက်သည်။

"ဘာလို့လဲ"

"မင်းက ခမ်းနားတဲ့ အင်မော်တယ်တစ်ယောက် ဖြစ်လို့ပဲ။ ဒါ့အပြင် ငါ့ရဲ့ တစ်သက်လုံးမှာ ချစ်ခဲ့တဲ့ အရာတွေက မင်းနဲ့ သေရည်ပဲရှိတယ်။ မင်း မြန်မြန် ပြန်သင့်တယ်။ သတို့သမီးကို စိတ်မဆိုးစေချင်ဘူး မဟုတ်လား"

သတို့သမီးဆိုသော စကားလုံးကို သူမက အလေးပေးပြောဆိုနေသဖြင့် ယွမ်ရှောင်သည် မည်သူ့ကို ရည်ညွှန်းနေကြောင်း အတိအကျ သိလိုက်သည်။

"သူမဘာသာ ဖြေရှင်းနိုင်ပါလိမ့်မယ်"

ယွမ်ရှောင်က ထထိုင်ပြီး ဝတ်ရုံထဲမှ ကြယ်မျှော်စင်ကို ထုတ်လိုက်သည်။

"ဒါက ဘာလဲ"

ကျောက်ရွှမ်ရန်က အနည်းငယ် အံ့အားသင့်သွားပြီး ကြယ်ရောင်သည် သူမ၏ မျက်နှာပေါ်မှာ ထင်ဟပ်နေ၍ ပိုပြီး ဆွဲဆောင်မှုရှိစေသည်။

"ဒါက ခမ်းနားတဲ့ ရတနာတစ်ခု၊ မင်းကို ကြီးမြတ်တဲ့ အင်မော်တယ်တစ်ပါး အဆင့်မျိုးအထိ မြှင့်တင်ပေးနိုင်တဲ့ တစ်ခုပေါ့"

"ကောင်းကင်နယ်မြေက မင်းရဲ့အသိနဲ့ နှိုင်းယှဉ်ရင် ငါက အလားအလာ နည်းတယ်။ ဘာကြောင့် ငါ့ကို ပေးတာလဲ။ အလဟဿဖြစ်သွားလိမ့်မယ်"

ယွမ်ရှောင်က ၎င်းကို ကမ်းပေးလာသော်လည်း ကျောက်ရန်ရန်သည် ခေါင်းခါပြီး ငြင်းဆန်နေခဲ့၏။

"ဒါက ငါ့အတွက် မသုံးမဝင်လို့ မင်းကို ပေးလိုက်ရင် ကောင်းမယ်လို့ တွေးထားတာတယ်"

"ဒါဆိုလည်း ငါ လက်ခံလိုက်ပါမယ်"

ကြယ်ပြာနှင့် လနီက ကြယ်မျှော်စင်၏ အဘိုးအိုပုံရိပ် စားသုံးပြီးနောက် သေးငယ်သော ရောင်စုံဆေးလုံးတစ်ခုကို အန်ထုတ်ခဲ့သည်။ ၎င်းက ဝိညာဉ်မရှိသည့်အတွက် ကိုယ်ပိုင်အသိစိတ် မရှိသော်လည်း ကျောက်ရန်ရန်ကို သူမ၏ ကျင့်ကြံခြင်း၌ အထောက်အကူ ဖြစ်စေနိုင်သည်။ ယွမ်ရှောင်၏ အကူအညီနှင့် သူမက ဆေးလုံးကို ဝိညာဉ်နှင့် ပေါင်းစပ်လိုက်သော ကြယ်မျှော်စင်၏ပိုင်ရှင် ဖြစ်သွားခဲ့သည်။

"ဒါက အသုံးမဝင်ဘူးဆိုတာ သေချာလား"

"ငါ့ကို ယုံပါ။ ဒါက အထူးအခွင့်အရေးရတဲ့သူတွေအတွက် ပုံမှန်ရတနာတစ်ခုပဲ"

ယွမ်ရှောင်က ပေါ့ပေါ့ပါးပါး ပြန်ဖြေလိုက်သည်။

"ငါ မင်းကို ကောင်းကင်ကိုးထပ် ကြယ်ကျင့်စဥ်ရဲ့ အခြေခံတွေကို ပြမယ်"

ယွမ်ရှောင်က သူမကို အာကာသ ကြယ်ရောင်စွမ်းအင်အား ထိန်းချုပ် စုပ်ယူတတ်စေရန် လမ်းညွှန်ပေးလိုက်တယ်။

" ပထမဆုံး ကြယ်ကို စုပ်ယူရင်ချီစွမ်းအားက လျော့ကျသွားမှာလား"

"လုံးဝ မဟုတ်ဘူး။ အဲ့ဒီအဘိုးကြီးက အသုံးမဝင်ပေမယ့် ကောင်းကင်တာအိုဆေးလုံးကြောင့် သူမက အဆင်ပြေလိမ့်မယ်"

ကြယ်ပြာက ယုံကြည်မှုရှိစွာ အာမခံလိုက်သည်။ ယွမ်ရှောင်က ဤလုပ်ငန်းစဥ်ကို ချောမွေ့မည်ဟု ထင်ထားသော်လည်း စိန်ခေါ်မှုတစ်ခုနှင့် ရင်ဆိုင်ခဲ့ရသည်။

"အစ်မ ကျောက်၊ မင်းက ဘာလို့ ဒီလောက် လက်တုံးနေတာလဲ။ လမ်းကြောင်းပြောင်းတာက ဒီသွေးကြောအမှတ်ကနေ စတာလေ။ ဘာလို့ လမ်းလွဲသွားတာလဲ"

"ငါ မထိန်းချုပ်နိုင်ဘူး"

သူမက နှုတ်ခမ်းဆူ၍ ပြန်ဖြေလိုက်သောကြောင့် အစ်မကြီးထက် ညီမငယ်လေးတစ်ယောက်နဲ့ ပိုတူနေသည်။

"ပြန်လုပ်"

"ဟုတ်..."

ယွမ်ရှောင်သည် အစပထမက အခက်ဆုံးအပိုင်းဟု ယုံကြည်ထားသော်လည်အဆင့်တိုင်းတွင် ကိုယ့်ဆံပင်ကို ဆွဲနုတ်ချင်စိတ်ပေါက်လာသည်။

"ဒီမှာ အာရုံစိုက်ပါ။ စွမ်းအင်ကို ဒီနေရာ တွန်းပို့"

"မင်းက သာမန်လူတစ်ယောက်ကို အင်မော်တယ်ကျင့်စဥ် တတ်စေချင်တာ မဟုတ်ဘူးလား။ အခု မိုက်မဲတယ်လို့ ခံစားနေရ​ြပီလား"

ကြယ်ပြာက ကဲ့ရဲ့လိုက်သည်။

"တိတ်စမ်း။ သူမက ကျောက်တုံးလောက် မိုက်မဲရင်တောင် ငါက ကျောက်မျက်ရတနာအဖြစ် တောက်ပအောင် လုပ်မယ်"

ယွမ်ရှောင်က ကြုံးဝါးလိုက်ပြီး ကျောက်ရန်ရန်၏ ကံကြမ္မာကို လက်မခံနိုင်ခဲ့ပေ။

"သတ္တဝါတိုင်းမှာ သူတို့ရဲ့ ကံကြမ္မာရှိတယ်။ မင်း ထာဝရကို ရှာဖွေနေချိန်မှာ တသူမက ခဏလေးပဲ တည်ရှိဖို့ ကံပါလာတာ ဖြစ်နိုင်တယ်"

ကြယ်ပြာက တွေးတွေးဆဆ ပြောလိုက်၏။

"ဘယ်သူက အဲဒီလို ဆုံးဖြတ်တာလဲ"

"ဖန်ဆင်းရှင် အင်မော်တယ်"

" ဒါက ငါ မဟုတ်ဘူးလား။ ဒီနေ့ကစပြီး ငါ အဲဒီစည်းမျဉ်းကို ပြောင်းလဲပစ်မယ်"

ယွမ်ရှောင်၏စကားကြောင့် ကြယ်ပြာက မင်သက်သွားကာ စိုက်ကြည့်နေခဲ့လေသည်။