နှစ်နှစ်ဆယ်

လင်းယွမ်၏ စကားများကို ကြားသောအခါ ဧကရာဇ်လျိုရှစ်က မှင်သက်သွား၏။

သူက သာမန်အဖြေများကိုသာ တွေးထားခဲ့သည်။ ဥပမာ လင်းယွမ်က သတ္တမမင်းသမီးကိုယ်စား တောင်းပန်ရန် သို့မဟုတ် သတ္တမမင်းသမီးအား လက်နက်စစ်သည်တစ်ယောက် ဖြစ်လာခြင်းမှ တားဆီးရန်အတွက် နောက်ထပ် ရွေးချယ်မှုများ ပြုလုပ်ရန် စသည်တို့ဖြစ်၏။

ပို၍ ရက်စက်စွာ တုန့်ပြန်သည်နှင့် ဧကရာဇ်လျိုရှစ်က သူ့ကို ပို၍ အသိအမှတ်ပြုပေလိမ့်မည်။ တော်ဝင်မျိုးနွယ်အနေဖြင့် နိုင်ငံအတွက် စွန့်လွှတ်ခြင်းမှာ သာမန်မျှသာ ဖြစ်၏။ သို့သော် သူက လင်းယွမ်၏ ယခုအဖြေကို မမျှော်လင့်ထားခဲ့ပေ။

လက်နက်စစ်သည်ကို မလိုအပ်ဘဲ သူ့ကို အချိန်သာပေးလျှင် လက်နက်စစ်သည်များထက် သာလွန်အောင် လုပ်ပြမည်ဖြစ်သည်။

နတ်လက်နက်စစ်သည်များ၏ နောက်တွင် နတ်လက်နက်တစ်ခု ရှိလေသည်။ အလယ်ပိုင်းလွင်ပြင်၏ နိုင်ငံ ၃၆နိုင်ငံတွင် နတ်လက်နက်များက ကောင်းကင်ဘုံဖြစ်လေသည်။

နတ်လက်နက်စစ်သည်များကို ကျော်လွန်ခြင်းက နတ်လက်နက်များကို ကျော်လွန်ခြင်းနှင့် အတူတူပင် ဖြစ်၏။

ထိုကဲ့သို့ ကောင်းကင်ကို ဆန့်ကျင်သော စကားများသာ ပျံ့နှံ့သွားလျှင် နိုင်ငံ ၃၆ ခုလုံးက မဟာယန်နိုင်ငံကို အာရုံစိုက်ကြပေလိမ့်မည်။

ထိုအချိန်တွင် တရားရုံးကလည်း ယိမ်းယိုင်သွားမည်ဖြစ်ပြီး လင်းယွမ်၏ အိမ်ရှေ့စံမင်းသားနေရာကလည်း တည်မြဲတော့မည်မဟုတ်ပေ။

သို့သော် ဧကရာဇ်လျိုရှစ်က လင်းယွမ်၏ ဖခင်အနေဖြင့် ထိုစကားများကို ပေါက်ကြားစေမည်မဟုတ်ပေ။

" ယွမ်အာက တကယ်ကို အံ့ဩစရာကောင်းတဲ့ ရည်ရွယ်ချက်တွေ ရှိတာပဲ။ " ဧကရာဇ်လျိုရှစ်က လေးစားစွာ ပြောလိုက်သည်။

လင်းယွမ်က အသက်သုံးဆယ် သို့မဟုတ် လေးဆယ်ရောက်လျှင် နတ်လက်နက်တစ်ခု၏ စွမ်းအားကို မြင်တွေ့ရပေလိမ့်မည်။ နတ်လက်နက်တစ်ခု၏ တည်ရှိမှုကို အဆင့်မြင့်သူများအားလုံး နားလည်ထားကြလေသည်။

သို့သော် လင်းယွမ်က ခြောက်နှစ်အရွယ်သာ ရှိသေးသည်။ ကလေးတစ်ယောက်၏ အံ့ဩစရာကောင်းသော ရည်မှန်းချက်များက ဘာမှမဟုတ်ပေ။ ဧကရာဇ်လျိုရှစ် ငယ်စဉ်ကလည်း ကောင်းကင်က နေမင်းကိုပင် ဆွဲချရန် ဆန္ဒရှိခဲ့လေသည်။

" ဒါပေမယ့် ယွမ်အာ ဒီစကားတွေကို ခမည်းတော်ကလွဲပြီး ဘယ်သူမှမပြောနဲ့။ " ဧကရာဇ်လျိုရှစ်က သတိပေးလိုက်သည်။

အိမ်ရှေ့စံမင်းသားတစ်ပါးအနေဖြင့် လင်းယွမ်၏ စကားလုံးများနှင့် လုပ်ရပ်တိုင်းက အရေးပါလေသည်။

" နားလည်ပါပြီ။ " လင်းယွမ်က ဧကရာဇ်လျိုရှစ်ကို ကြည့်လိုက်သည်။

သူ၏ စကားများအား အလေးအနက်မထားသည်ကို သူသိလေသည်။ ၎င်းက လင်းယွမ်မျှော်မှန်းထားသည့်အရာ ဖြစ်၏။

ဧကရာဇ်လျိုရှစ်က လင်းယွမ်နှင့် စကားအနည်းငယ် ပြောပြီးနောက် ထွက်ခွာသွားသည်။ ထွက်သွားသော ဧကရာဇ်လျိုရှစ်ကို ကြည့်ပြီး လင်းယွမ်၏ မျက်လုံးများက တည်ငြိမ်နေသည်။

သူ၏ လက်ရှိလေ့ကျင့်နေသော နည်းလမ်းများနှင့် သိုင်းသူတော်စင်တစ်ယောက်ကို ဖိနှိပ်ပြလိုက်လျှင် ဧကရာဇ်လျိုရှစ်က သူ၏စကားများကို ယုံကြည်သွားပေလိမ့်မည်။ သို့သော် ထိုလုပ်ရပ်က မဟာစွန့်စားမှုကြီးတစ်ခု ဖြစ်၏။ အဓိက အကြောင်းရင်းမှာ မဟာယန်နိုင်ငံ၏ ဧကရာဇ်လျိုရှစ်က နိုင်ငံကာကွယ်ရေး နတ်လက်နက်၏ ကိုယ်စားလှယ်ဖြစ်သောကြောင့် ဖြစ်သည်။

အာရုံခံနိုင်သော နည်းလမ်းအချို့ကို သူ၏ ခန္ဓာကိုယ်ထဲသို့ ပေါင်းထည့်ထားလျှင် တစ်စုံတစ်ခုကို အာရုံခံမိသွားပေလိမ့်မည်။

လင်းယွမ်၏ ခွန်အားကို နတ်လက်နက်များ သတိထားမိသွားသည်နှင့် နောက်ပြန်မဆုတ်နိုင်သော အကျိုးဆက်များ ဖြစ်လာနိုင်လေသည်။ နတ်လက်နက်များက လူသားမျိုးနွယ်များကို စားသောက်ကြခြင်း ဖြစ်သည်။ လူသားတစ်ယောက်၏ ခွန်အားနှင့် သန်စွမ်းမှု ပိုအားကောင်းလေ သူတို့အတွက် ပိုအရသာ ရှိလေဖြစ်သည်။

သန်မာသော စိတ်ဝိညာဉ်ရှိသူများကို နတ်လက်နက်စစ်သည်ဘွဲ့ပေးပြီး သူတို့၏ ဝိညာဉ်ကို ဖြည်းညင်းစွာ စားသုံးကြလေသည်။ ဝိညာဉ်၊ သွေးနှင့်ချီ သန်မာမှုတွင် အလယ်ပိုင်းလွင်ပြင်၏ နိုင်ငံ ၃၆ခုလုံးတွင် လင်းယွမ်နှင့် ဘယ်သူမှမယှဉ်နိုင်ပေ။

လင်းယွမ်၏ အော်ရာသာ ထွက်ပေါ်သွားသည်နှင့် မဟာယန်နိုင်ငံ၏ နတ်လက်နက်က ရူးသွပ်သွားမည်မှာ သေချာလေသည်။ မဟာယန်နိုင်ငံ၏ နတ်လက်နက်သာမက အခြား ၃၅နိုင်ငံလုံးမှ နတ်လက်နက်များလည်း နိုးထလာပြီး လင်းယွမ်ကို စားသောက်ကြပေလိမ့်မည်။ လင်းယွမ်က နတ်လက်နက်များကို လေ့လာပြီးနောက် သူ၏ လှုပ်ရှားမှုများကို လျှော့ချရန် ဆုံးဖြတ်ခဲ့သည်။ သူ လှုပ်ရှားခဲ့လျှင်တောင် နတ်လက်နက်ဘိုးဘေးနယ်မြေ၊ နတ်လက်နက်နှင့် အလွန်နီးကပ်သော ဧကရာဇ်လျိုရှစ်တို့နှင့် ဝေးရာတွင် ရှိနေရပေလိမ့်မည်။ လျိုရှစ်က သူ၏သားကို သစ္စာဖောက်မည်မဟုတ်သော်လည်း အချို့ကိစ္စများက သူ ထိန်းချုပ်နိုင်သည်ထက် ကျော်လွန်လေသည်။

" ဒီကမ္ဘာရဲ့ ကျင့်ကြံခြင်းစနစ်ကို ငါ့ရဲ့ သိုင်းတာအိုထဲ အပြည့်အဝပေါင်းစပ်ပြီးတဲ့အချိန်မှာ ငါ့ရဲ့ လက်ရှိခွန်အားက သိုင်းသူတော်စင်အဆင့်ထက် ကျော်လွန်သွားပြီ။ "

" ဒီအဆင့်ကို သိုင်းနတ်ဘုရားအဆင့်လို့ ခေါ်တာပေါ့။ " လင်းယွမ်က ထိုင်ပြီး စဉ်းစားနေသည်။

သိုင်းနတ်ဘုရားအဆင့်က ခန္ဓာကိုယ်မှာ အချုပ်အနှောင်များမှ လွတ်မြောက်ပြီး နတ်ဘုရားတစ်ပါးကဲ့သို့ မယုံကြည်နိုင်လောက်အောင် အစွမ်းထက်လေသည်။

မူလကမ္ဘာတွင် သိုင်းနတ်ဘုရားအဆင့်က တတိယအလွှာ၏ အဆင့်နှစ်၊ အဆင့်သုံးတို့နှင့် ညီမျှလေသည်။ လင်းယွမ်၏ သန့်စင်နည်းစနစ်က ရုပ်ခန္ဓာကို အခြေခံ၊ ထိုက်ကျိလမ်းစဉ်နှင့် ဖွဲ့စည်းပြီး မူလကမ္ဘာမှ ဆင့်ကဲပြောင်းလဲခြင်းလမ်းစဉ်များကို သွေးနှင့် အသားအဖြစ် အသုံးပြုလေသည်။ ထို့အပြင် ဤကမ္ဘာ၏ ခန္ဓာသန့်စင်ခြင်းနည်းလမ်းကို ပေါင်းစပ်လိုက်သောအခါ သန့်စင်ခြင်းနည်းစနစ်အားလုံးထက် ကျော်လွန်သွားခဲ့သည်။

" ဒါပေမယ့် ရှေ့ဆက်ရမယ့်လမ်းက မလွယ်တော့ဘူး။ " လင်းယွမ်က သူ၏ မျက်လုံးများကို ဖွင့်ပြီး စဉ်းစားလိုက်သည်။ ဤကမ္ဘာသို့ ရောက်ရှိလာသော ခြောက်နှစ်အတွင်း လင်းယွမ်က သိုင်းနတ်ဘုရားအဆင့်သို့ ရောက်နေပြီဖြစ်သည်။

သူက ဤကမ္ဘာ၏ ပြည့်စုံသော ခန္ဓာသန့်စင်ခြင်းနည်းစနစ်ကို ပေါင်းစပ်ခြင်း မပြုခဲ့ဘဲ သူ၏ ယခင်အသိအမြင်များကိုသာ အသုံးပြုလျှင် သိုင်းနတ်ဘုရားအဆင့်သို့ တစ်နှစ်နှစ်နှစ် စောပြီး ဝင်ရောက်နိုင်လေသည်။ သို့သော် အားသာချက်များက ရှိနေဆဲ ဖြစ်သည်။

ရှေ့ဆက်ရမည့်လမ်းကြောင်းအတွက် လင်းယွမ်က သူ့ဟာသူ ရှာဖွေရပေလိမ့်မည်။ ကောင်းကင်ကိုဆန့်ကျင်သော နားလည်နိုင်စွမ်းဖြင့်ပင် သူ၏ အနာဂတ် ကျင့်ကြံခြင်းအရှိန်က အလွန်နှေကွေးသွားပေလိမ့်မည်။

" ငါက ဒီကမ္ဘာမှာ နှစ် ၁၆၀ နေရမှာပဲ။ အခု ခြောက်နှစ်ပဲကုန်သေးတယ်။ ဖြည်းဖြည်း သွားတာပေါ့။ " လင်းယွမ်က မျက်လုံးများ မှိတ်ပြီး ဆက်လက်ကျင့်ကြံလိုက်သည်။

နတ်လက်နက်က အလင်းထဲတွင် ရှိနေပြီး လင်းယွမ်က အမှောင်ထဲတွင် ရှိနေလေသည်။ လင်းယွမ်က သူ့ကိုသူ မဖော်ပြဘဲ နတ်လက်နက်က သူ၏ ခွန်အားကို ရှာတွေ့နိုင်မည်မဟုတ်ပေ။ ထို့အပြင် ကောင်းကင်ကိုဆန့်ကျင်သော နားလည်နိုင်စွမ်းဖြင့် လင်းယွမ်က အချိန်တိုင်း သန်မာလာနေသည်။ သူက အတားအဆီးများ ကြုံတွေ့လျှင်တောင် သူ့အတွက် လိုအပ်သည်မှာ အချိန်သာ ဖြစ်လေသည်။

မဟာယန်နိုင်ငံက လက်နက်စစ်သည်တစ်ယောက် ထွက်ပေါ်လာသည်နှင့် အလယ်ပိုင်းလွင်ပြင် ၃၆နိုင်ငံကြားမှ အခြေအနေက ပြန်လည်တည်ငြိမ်သွားခဲ့သည်။

အခြားနိုင်ငံများနှင့် ဆက်ဆံရာတွင် မဟာယန်နိုင်ငံက သူတို့၏ ယုံကြည်မှုကို ပြန်လည်ရရှိသွားပြီဖြစ်သည်။ အပြင်ပိုင်း ခြိမ်းခြောက်မှုများ ပျောက်ကွယ်သွားပြီးနောက် အတွင်းပိုင်းမတည်ငြိမ်မှုများ ကျန်နေသေးသည်။

ဧကရာဇ်လျိုရှစ်က မပြတ်သားသော လူတစ်ယောက်မဟုတ်ပေ။ ထို့အပြင် လင်းယွမ်၏ မကြာခန သတိပေးမှုများအောက်တွင် နိုင်ငံ၏ ခွန်အားက ပို၍ တိုးပွားလာသည်။

အထူးသဖြင့် လင်းယွမ်က အခြားနိုင်ငံများနှင့် ကုန်သွယ်မှုကို တိုးမြှင့်ရန် အကြံပေးခဲ့ပြီး ကုန်သွယ်မှုလမ်းကြောင်းများစွာကို ဖွင့်လှစ်ပေးခဲ့သည်။ မဟာယန်နိုင်ငံက ကြွယ်ဝချမ်းသာလာသည်။

ရလဒ်အနေဖြင့် လင်းယွမ်က နိုင်ငံသားများစွာ၏ ထောက်ခံမှုကို ရရှိခဲ့သည်။ လင်းယွမ်၏ လုပ်ရပ်များက မဟာယန်နိုင်ငံကို နောက်မျိုးဆက်တစ်ခုအထိ တိုးတက်ကြီးပွားစေပေလိမ့်မည်။

သမိုင်းတွင် အဖေနဂါး၊ သားခွေး ဖြစ်ခဲ့သော ဧကရာဇ်များ ရှိခဲ့ပြီး နိုင်ငံကို ကြီးကြီးမားမား ဆုတ်ယုတ်စေခဲ့သည်။

လင်းယွမ်က အလွန်စွမ်းရည်ရှိပြီး နိုင်ငံရေးအရ လိမ္မာပါးနပ်သူဖြစ်လေသည်။ သူက ဧကရာဇ်၏ ယုံကြည်မှုကိုလည်း ရရှိခဲ့ပြီး တရားရုံးမှ ဝန်ကြီးများကလည်း သူ့ကို အလေးအနက် ထားလာကြသည်။ ထို့အပြင် ဆရာသခင်ကလည်း လင်းယွမ်ကို သူ့ထက်သာသည်ဟု ပြောခဲ့လေသည်။

အမှန်တော့ သူက အရည်အချင်းမရှိသည်မဟုတ်ဘဲ လင်းယွမ်က အလွန်တော်လွန်းနေခြင်း ဖြစ်သည်။ သို့သော် အစပိုင်းတွင် ဝန်ကြီးအချို့က လက်မခံဘဲ ဆရာသခင်ကို လှောင်ပြောင်ခဲ့ကြသည်။ အဆုံးတွင် လင်းယွမ်က ခြောက်နှစ်အရွယ် ကလေးတစ်ယောက်ပင် မဟုတ်ပါလား။

သို့သော် လင်းယွမ်က သူ၏ စွမ်းရည်အချို့ကို ထုတ်ပြလိုက်သောအခါ အရာရှိများနှင့် ဝန်ကြီးများကလည်း သူ့ကို ယုံကြည်လာကြပြီး သူ၏ ဂုဏ်သတင်းကလည်း မြင့်တက်လာခဲ့သည်။

ဧကရာဇ်က လင်းယွမ်ကို တိတ်ဆိတ်စွာ ကြည့်နေခဲ့ပြီး သူ၏ မျက်နှာပေါ်မှ သဘောကျသည့်အမူအရာကိုတော့ မဖုံးကွယ်ထားနိုင်ပေ။ လူများကို ထိန်းချုပ်ပြီး ဟန်ချက်ညီအောင် ထိန်းညှိခြင်းတွင် သူ၏ သားက မွေးရာပါလက်ဆောင်တစ်ခု ဖြစ်လေသည်။

အချိန်များက လျင်မြန်စွာ ကုန်ဆုံးလာပြီး မျက်စိတစ်မှိတ်အတွင်း နှစ်နှစ်ဆယ် ကြာသွားခဲ့သည်။

ကမ္ဘာအမျိုးမျိုးတွင် တာအိုများကို လေ့လာဖန်တီးခြင်း