မသန်စွမ်းအရုပ်ခန်းမကို နင်းချေလိုက်ပြီ

သူသည် မသန်စွမ်းအရုပ် ခန်းမရဲ့ နံ့သာသခင် ဖြစ်သည်။ ဤခန်းမအတွင်းရှိ ကိစ္စအဝဝကို တာဝန်ယူသည်။ ယခုအချိန်တွင် ထောင့်တိုင်းတွင် ချောင်းမြောင်းနေသော တပည့် အယောက် ၂၀ ကျော်ရှိလေသည်။

ယွိတောက်ကျစ် ဧည့်သည်ထံမှ ဖိအားကို ခံစားလိုက်ရသည်။

ဒီလူဟာ ခြံရှေ့ကို ဖောက်ထွင်းဝင်ရောက်ပြီး နည်းပြဆရာနှစ်ဦး အပါအဝင် လူတိုင်းကို အသက်တစ်ချက် ရှုသွင်းလိုက်တဲ့ အချိန်တိုလေးအတွင်းမှာ သတ်သွားတာကြောင့် တကယ့်ကို အစွမ်းထက်တယ်လို့ ဆိုရမည်။

သူ့ပြိုင်ဘက်ရဲ့ လေ့ကျင့်မှုအဆင့်က သူ့လောက်မကောင်းမှန်း သိတာတောင်မှ ပြင်းပြင်းထန်ထန် မတိုက်ခိုက်ရဲသေးချေ။ သူသည် ပြိုင်ဘက်၏ ရောင်ဝါကို အာရုံမခံနိုင်၊ သူ့အသက်ရှုသံ နှင့် နှလုံးခုန်သံများကိုသာ အာရုံခံနိုင်သည်။

ဤလေ့ကျင့်နည်းက အလွန်အဆင့်မြင့်သော ကျင့်စဥ် နတ်အာရုံတစ်ခုသာ ဖြစ်ပေမည်။ နတ်အာရုံလို့ ခေါ်တဲ့အရာက စိတ်အာရုံ စူးစိုက်မှုကို ဆိုလိုခြင်းပင်။ စိတ်သည် နက်နဲသော အဆင့်သို့ အာရုံစူးစိုက်ပြီးလျှင် အလွန်ငြိမ်သက်နေပေ၏၊ နှောင့်ယှက်သော အတွေးမရှိ၊ အသက်ရှူရန်ပင် မေ့လျော့ကာ နှလုံးခုန်သံကိုသာ အာရုံပြုသည်။

မိမိအသက်ရှုခြင်းကို နတ်သန္ဓေသား၏ အသက်ရှုသံဖြင့် အစားထိုးပြီး နှလုံးခုန်နှုန်းကိုလည်း ရွှေအမြုတေ လှုပ်ရှားမှုဖြင့် အစားထိုးလိုက်သည်။

ယွီတောက်ကျစ် ထိုသို့သော ကျင့်ကြံနည်းကို ကြားဖူးရုံမျှသာ။ သူ ရွှေအမြုတေ နယ်ပယ်က ကျင့်ကြံသူ များစွာကို တွေ့ဖူးသော်လည်း ဤမြင့်မြတ်သော စိတ်အာရုံကို သိသူ ဘယ်သူ့ကိုမှ မတွေ့ဖူးခဲ့ပေ။

နှလုံးခုန်နှုန်းကို အစားထိုးရန်အတွက် ရွှေအမြုတေကို သုံးနိုင်တာက ဒဏ္ဍာရီတစ်ခုလို့သာ တစ်ချိန်က သူ ထင်ခဲ့ဖူးသည်။ အဲဒါကတော့ သူ ဒီတံတိုင်းကို ဖြတ်ပြီး လူကို သတိထားမိတဲ့အထိပါပဲ။

"အဲဒီလူရဲ့အရှိန်က နည်းနည်းနှေးသွားပြီ သူက နောက်ပြန်ဆုတ်နေတာပဲ..."

ယွီတောက်ကျစ် ချန်ရှီရဲ့ တုံ့ဆိုင်းမှုကို သတိပြုမိသည်။ သူသည် အစွမ်းထက်ပေမယ့် အောင်ပွဲရရန် မသေချာကြောင်းကိုလည်း သတိပြုမိသွားတာ ဖြစ်နိုင်သည်။

ယွီတောက်ကျစ်: "အားလုံး နောက်ပြန်ဆုတ်ဖို့ အဆင်သင့် ပြင်ထား!... လူတိုင်း နောက်ကို ခြေတစ်လှမ်းဆုတ်လိုက်... ပင်လယ်နဲ့ ကောင်းကင်က ပိုတောက်ပတယ် မသန်စွမ်းအရုပ် ခန်းမရဲ့ ဆရာနဲ့ တပည့်တွေကို လက်စားချေပြီးပြီ... သူ အရှက်မရအောင် ခြေတစ်လှမ်း ဆုတ်နေပြီ!"

သူသည် အမြဲလိုလို ငြိမ်သက်နေခဲ့သည်။

တစ်ဖက်သားက မတိုက်လာရင် သူလည်း မတိုက်ပါ။

ဒီလူက နောက်ဆုတ်သွားတဲ့အခါ ကောင်းကင်အဘွားကို နှိုးဖို့ ခန်းမတစ်ခုစီက ဆရာတွေ၊ နံ့သာသခင်တွေနဲ့ ခန်းမသခင်တွေကို စုပြီး နောက်ကျမှ သတ်ပစ်လိုက်လို့လည်း ရသည်။ ကောင်းကင်အဘွားအဖွဲ့အစည်းနဲ့ ကုံကျိုး ပြည်နယ်မြို့တော်ကဲ့သို့ အန္တရာယ်ရှိသော နေရာများတွင် သူသည် သတိနှင့် တည်ငြိမ်မှုတို့ကြောင့် ယခုအချိန်အထိ အသက်ရှင်နေနိုင်ခဲ့တာပင်။

မသေချာမရေရာသော တိုက်ပွဲကို မတိုက်ခိုက်ခြင်းက သူ့အသက်ကို ကယ်တင်နိုင်တဲ့ နည်းလမ်းတစ်ခု ဖြစ်သည်။

သူ အဲဒီနှစ်တုန်းက တခြားသူတွေကို ရန်တိုက်နေချိန်ကို မှတ်မိနေပါသေးသည်။ အဲဒီလူက သူ့အတန်းဖော် ဖြစ်ပြီး သူဟာ စာမေးပွဲဖြေဖို့ ပိုက်ဆံရှာဖို့ အတန်းဖော်ကို ခြံတစ်ခြံမှာ ရောင်းဖို့စီစဉ်ထားပေမယ့် အတန်းဖော်က သိသွားခဲ့သည်။ မူလက သူ့လောက်မသန်မာပေမယ့် သေရေးရှင်ရေး အခိုက်အတန့်မှာ အံ့သြစရာကောင်းတဲ့ တိုက်ပွဲဝင် စွမ်းအားတွေကြောင့် သူ ပေါက်ကွဲထွက်လုနီးပါး ဖြစ်သွားခဲ့ရသည်။

နောက်ပိုင်းမှာ ထုံဆေးအာနိသင်နဲ့ အတန်းဖော်က ဆုံးသွားခဲ့သည်။ ထိုအချိန်မှစ၍ လုံးဝ သေချာသည်အထိ စုံစမ်းပြီးမှသာ တိုက်ခိုက်သင့်ကြောင်း သဘောပေါက်လာခဲ့သည်။

ဒါကို တွေးနေချိန် တစ်ဖက်သားရဲ့ နှလုံးခုန်သံကို ရုတ်တရက် ခံစားလိုက်ရ၏။ ပြိုင်ဘက်ရဲ့ တည်ငြိမ်မှုက ပျက်ပြားသွားပြီ။

ဆယ်ပေကျော်မြင့်သော စစ်ဗုံတစ်လုံးကို အဝါရောင်စစ်သူရဲ တစ်ဦး ထုနေသလိုမျိုး နှလုံးခုန်သံများကို ကြားလိုက်ရသည်။ နှလုံးခုန်သံသည် အဲဒီလူရဲ့ ခြေလက်နှင့်လက်ဖျားများ အားလုံးဆီသို့ ချီစွမ်းအင်နှင့် သွေးများ ချက်ချင်း ပို့လွှတ်နေသည်။

သံရိုင်းရနံ့ရှိသော မီးဖိုထဲတွင် လေမှုတ်ထုတ်​နေသည့် ဖားကြီးတစ်ကောင်လို တစ်ဖက်ကလူရဲ့ အသက်ရှူသံကို ခံစားနေရသည်။ ထိုလူက ဝေလငါးတစ်ကောင်ရဲ့ အရှိန်အဝါဖြင့် အရာအားလုံးကို အရူးအမူး ရှူသွင်းလျက် ရှိသည်။ နတ်အာရုံစူးစိုက်မှုက အလွန်အမင်း ငြိမ်သက်ခြင်းရဲ့ ဖော်ပြချက်တစ်ခု ဖြစ်သည်။

သို့သော် ယခု ဤလူသည် သူ့နတ်အာရုံကနေ ရုန်းထွက်ပြီး ကြမ်းတမ်းသော အခြေအနေသို့ ရောက်ရှိသွားလေပြီ။ အလွန်ရိုင်းစိုင်း၊ ကြီးစိုးပြီး ရန်လိုနေပါပြီ။

"ငါ ဒီလေနဲ့ မိုးကြိုးကို လိုချင်တယ်!"

ခြံရှေ့မှ မိုးခြိမ်းသံတစ်ချကိ ထွက်ပေါ်လာပြီး ကောင်းကင်ကို လှုပ်ခါသွားသည်။ မိုးကြိုးကြောင့် ကောင်းကင်ကြီးတောင် ရုတ်တရက် တောက်ပလာ၏။

ယွီတောက်ကျစ် ခေါင်းကို မြှောက်လိုက်သော် လေထဲတွင် ဆိုင်းငံ့ထားသော ချီသွေးဖြင့် ရေးထားသည့် အဆောင်စာလုံးများကို တွေ့လိုက်ရသည်။ အပေါ်ပိုင်းတွင် စာလုံးသုံးလုံးပါပြီး အောက်ပိုင်းတွင် ကောင်းကင်ကိုးလွှား မိုးကြိုးကို ဆင့်ခေါ်သော 'ကောင်းကင်ဘုံရှင်' ဟူသော အမည်ကို ရေးထားသည်။

ချီသွေးများသည် လေထုအလယ်၌ အလင်းများ ထွက်လာပြီး ကောင်းကင်နှင့် မြေကြီးကြားမှ လျှို့ဝှက်ဆန်းကြယ်သော စွမ်းအားများကြောင့် အသက်ဝင်လာသည်။

ဟူး!

လေကြမ်းတွေ တိုက်ခတ်လာသည်။

ဝုန်း!

မိုးခြိမ်းသံကြီး ကျရောက်သည်။

ယွီတောက်ကျစ်ရဲ့ အမူအရာ ရုတ်တရက် ပြောင်းလဲသွားကာ အခြေတည်ဝိညာဉ်ကို နတ်ကွန်းထဲသို့ ကမန်းကတန်း ပြန်ထည့်ထားလိုက်သည်။ သူ့အင်္ကျီလက်ထဲရှိ အဆောင်လက်ဖွဲ့ကို တစ်ဖက်ကထုတ်ရင်း တစ်ချိန်တည်းမှာပင် အားလုံးကြားအောင် အော်လိုက်သည်။

"တပည့်တွေ အမိန့်ကို နာခံ! မိုးဒဏ်ခံအဆောင်လက်ဖွဲ့နဲ့ ရွှင့်ဖုန်းအဆောင်လက်ဖွဲ့ကို အမြန်ရှာကြ! မြန်မြန်သွား!"

ထိုစကားကို ကြားပြီးနောက် တပည့်အားလုံး ဝိုင်းအော်လိုက်ကြသည်။

"ရွှေအမြုတေကို မထုတ်နဲ့! ရွှေအမြုတေကို မထုတ်ကြနဲ့! ကောင်းကင်က မိုးကြိုးပစ်နေတယ်!"

ရုတ်တရက် မိုးခြိမ်းသံ​ကြီးတစ်ခု ကောင်းကင်မှ ပြုတ်ကျလာခဲ့သည်။ အိမ်နောက်ဖေးရှိ သစ်ပင်ကြီးသည် နှစ်ရာနှင့်ချီ သက်တမ်းရှိ သစ်ပင်ကြီးတစ်ပင် ဖြစ်သော်လည်း မိုးကြိုး ထိမှန်သွားတဲ့အခါ အလယ်ဗဟိုမှ နှစ်ပိုင်း ကွဲသွားတော့သည်။

ယွီတောက်ကျစ်လည်း သူ့ခန္ဓာကိုယ်ထဲက နာကျင်မှုကို ခံစားလာရသည်။ သူ ထိုသစ်ပင်ထဲတွင် ကင်းခြေများ တစ်ကောင်ကို မွေးထားခဲ့၏။ မသန်စွမ်းအရုပ်များကို ရိတ်သိမ်းပြီး ခုတ်လိုက်သောအခါ ခြေလက်တွေကို ကင်းခြေများအား နှစ်ပေါင်းများစွာ မွေးမြူ၊ ကျွေးမွေးရန်အတွက် အသုံးပြုခဲ့သည်။

ထိုကင်းခြေများသည် သူ့အတွက် ရတနာတစ်ခုလို ပြောင်းလဲသွားသည်။ ကင်းခြေများကို ထိန်းချုပ်လိုက်တာနဲ့ ၎င်း၏ လက်တံများသည် ဦးခေါင်းခွံကို အလွယ်တကူဖွင့်ကာ ဦးနှောက်ကို ခွဲထုတ်နိုင်သော ဓားရှည်များ ဖြစ်သွားလိမ့်မည်။

ကင်းခြေများ အဆိပ်ဖြန်းပြီးတာနဲ့ အဆိပ်က လူ့ခန္ဓာကိုယ်ထဲသို့ လွယ်ကူစွာ စိမ့်ဝင်သွားနိုင်သည်။

သို့သော် ဤကင်းခြေများသည် ခြေလက်များ အများအပြား စားပြီး လူ့သွေးကို အလွန်အကျွံသောက်ခြင်းကြောင့် ၎င်းတို့၏ ယင်စွမ်းအင်သည် ပြင်းထန်လွန်းသဖြင့် မိုးကြိုးပစ်တာကို အရင်ခံခဲ့ရသည်။

ရုတ်​တရက်​ ​နောက်​ထပ်​ ​ဟောက်​သံ​ကြောင့်​ နံရံနှင့်​ တံခါးများ ကွဲကွားသွားကာ ကျိုးသွား​သော အုတ်​ချပ်​များကြားမှာ ဧရာမသတ္တဝါတစ်ကောင် ​ပေါ်ထွက်​လာသည်​။ သူ ခြေနှစ်လှမ်းကျော်ပြီးတာနဲ့ နံရံနောက်ကွယ်မှာ ပုန်းနေတဲ့ တပည့်နှစ်ယောက် ပါးစပ်ထဲက သွေးတွေ စီးကျလာပြီး နောက်တဆင့်မှာတော့ သူ့ဆီ ရောက်လာခဲ့သည်။

လူသတ်နတ်ဘုရားတွင် ဦးခေါင်းသုံးလုံးနှင့် လက်ခြောက်ဖက် ပါရှိသည်။ ခေါင်းတစ်လုံးက လူဦးခေါင်းဖြစ်ပြီး မျက်နှာသည် အသက်တစ်ဆယ့်သုံးနှစ်ခန့်သာ ရှိသေးသည်။

ကျန်လူဦးခေါင်း တစ်ခုစီတွင် ချီသွေးများဖြင့် ပေါင်းစပ်ထားသော နတ်ဆိုးများ၏ အသွင်အပြင် ဖြစ်သည်။ ၎င်းတို့၏ လည်ပင်းတွင် ပြင်းထန်ပြီး ကြောက်မက်ဖွယ်ကောင်းသော လည်ဆွဲများ ပါလေ၏။

သူ့ခန္ဓာကိုယ်ပေါ်ရှိ အ၀တ်အစားများသည် စုတ်ပြဲသွား​ပြီ။ ချီစွမ်းအင်နှင့် ချီသွေးများ ပေါင်းစပ်ဖွဲ့စည်းထားသည့် ချပ်ဝတ်တန်ဆာက ရွှေရောင်တောက်နေသည်။ ရှုံ့မဲ့နေသော ပါးစပ်ကြီးထဲတွင် အစွယ်များ ထွက်​​နေကာ ပါးစပ်က အောက်ခြေမရှိသော တွင်းပေါက်တစ်ခုလို ဖြစ်နေသည်။

သူသည် လက်နက်ခြောက်ခုကို ပုဆိန်၊ လေးနှင့်မြှား၊ ဓားများ၊ ဧကရာဇ်ခေါင်းလောင်းများ၊ တံလျှပ်များကို ကိုင်ဆောင်ထားပြီး အားလုံးကလည်း ချီသွေးများနှင့် ဖန်တီးထားတာ ဖြစ်ပေ၏။ ခန္ဓာကိုယ်တစ်ဝိုက်တွင် ရစ်ပတ်နေသော သွေးရောင် စမ်းချောင်းများသည် ချီစွမ်းအင်နှင့် သွေးများ ဖြစ်ကာ ပုခုံးနှင့် ချိုင်းကြားများကို ဖြတ်သန်းကာ ခေါင်းနောက်ဘက်အထိ လှပစွာ စီးဆင်းသွားသည်။

ဓားသည် ဆယ်ပေနီးပါးရှည်ပြီး လူသတ်နတ်ဘုရား၏ လှည့်ပတ်နေသော ခန္ဓာကိုယ်အတိုင်း ခုတ်ချပစ်လိုက်သည်။

ယွီတောက်ကျစ်လည်း မိုးဒဏ်ခံအဆောင်လက်ဖွဲ့ကို ရှာတွေ့မတွေ့ ဂရုမစိုက်နိုင်တော့ဘဲ အခြေတည်ဝိညာဥ် နယ်ပယ်တစ်ခုကို တည်ဆောက်ရန် သူ၏ မှော်အစွမ်းကို ချက်ချင်း စုဆောင်းလိုက်သည်။

စွမ်းအင်နှင့် သွေး၏ ပြင်းထန်သော သက်ရောက်မှုကြောင့် သူ့အမြင်အာရုံက သွေးနီရောင်ပြောင်းသွားသည်။ မော့ကြည့်လိုက်တော့ နတ်ဆိုးနတ်ဘုရားသည် သွေးစွန်းသော အလင်းရောင်များကြား သူ့ဆီသို့ ရောက်ရှိလာသည်။

သူရဲ့ လေ့ကျင့်မှုအဆင့်သည် သူ့​ပြိုင်ဘက်ထက် အဆပေါင်းများစွာ ကွာဟသော်လည်း ပြိုင်ဘက်ရဲ့ ရန်လိုမှုနှင့် သတ်ပစ်ချင်နေတဲ့ အငွေ့အသက်တွေကတော့ သူ့ကို အတော်လေး ကျော်လွန်နေပြီ။ ရုတ်တရက် သူအရင် ထိုအတန်းဖော်အား ဆေးခတ်ပြီး ပိုက်ဆံရဖို့ လယ်ထဲ သွားရောင်းရန် ပြင်ဆင်ချိန်ကို ပြန်သတိရသည်။

ပြိုင်ဘက်ရဲ့ လေ့ကျင့်မှုအခြေခံနဲ့ ခွန်အားက သူ့လောက်မကောင်းမွန်ပေမယ့် သူ့ကို သတ်မိလုနီးပါးပါပဲ။ သူ့ရှေ့က အရွယ်မရောက်သေးဘဲ ကလေးဆန်တဲ့ ကလေးရဲ့ ​အငွေ့အသက်ကလည်း သူ့ကို သေရမှာ ကြောက်ရွံ့လာစေသည်။

ရှည်လျားသော ဓားရှည်သည် အော်ဟစ်သံနှင့်အတူ သူ၏ အခြေတည် ဝိညာဉ်စွမ်းအား နယ်ပယ်ထဲသို့ ဖြတ်သွားကာ နောက်တခဏတွင် သူ့လည်ပင်းအနား ရောက်ရှိလာခဲ့သည်။ ယွီတောက်ကျစ် မျက်လုံးများ ပြူးကျယ်လာပြီး နဖူးမှ အေးစက်သော ချွေးများ အထိန်းအကွပ်မဲ့ စီးကျလာကာ ဓားရှည်ကို ပိတ်ဆို့ရန် သူ့လက်ကို မြှောက်လိုက်သည်။

သူ့လက်ဖဝါးမှ ရွှေရောင်အလင်းတန်းများ ထွက်ပေါ်လာသည်။ ၎င်းသည် သူ လေ့ကျင့်ထားသည့် မင်ဧကရာဇ် ရွှေရောင်အလင်းမန္တန်ဟု ခေါ်သော ရွှေကိုယ်ထည် နည်းလမ်းတစ်ခုဖြစ်သည်။ တာအိုကျင့်ကြံသူ အဖြစ် ဆယ့်သုံးနှစ်ကြာ အပြင်းအထန် လေ့ကျင့်ပြီးနောက် သူသည် ရွှေရောင်ကိုယ်ထည်ကို လက်ဝယ် ပြုပြင်နိုင်ခဲ့သည်။

ဓားရှည်သည် အခြေတည်ဝိညာဉ်ရဲ့ စွမ်းအားစက်ကွင်းကြောင့် ရပ်တန့်သွားသည်။ ၎င်း၏ရွှေလက်နှင့် တိုက်မိချိန်တွင် ကျိုးသွားသော ဓားစွမ်းအင်က သူ့မျက်နှာနှင့် ရင်ဘတ်ကို ခြစ်ထုတ်ကာ သွေးများစွာ ထွက်ကျလာခဲ့သည်။

ယွီတောက်ကျစ်ချာ ဓားမှထွက်သော ကြောက်စရာကောင်းသော စွမ်းအားကြောင့် ထိန်းမနိုင်သိမ်းမရ ဆုတ်ခွာသွားခဲ့ရသည်။ သူ့ခန္ဓာကိုယ်က တံခါးကို ဝင်တိုက်ကာ တံခါးနှစ်ပေါက်လည်း ကွဲထွက်သွားသည်။

ချန်ရှီ သူ့ခြေထောက်ကို လှည့်လိုက်သော် ပုဆိန်က သူ့ခန္ဓာကိုယ်နဲ့အတူ ပတ်ချာလည်ပြီး ဟောက်သံတစ်ချက်နဲ့ ခုတ်ချလိုက်သည်။

"ငါက နူးညံ့တဲ့ ပန်းသီးမဟုတ်ဘူး!"

ယွီတောက်ကျစ် ခိုင်မြဲစွာ မတ်တပ် ပြန်ရပ်နေကာ ရှက်စိတ်နှင့် ဒေါသလှိုင်းများ ထွက်လာတော့သည်။ သူ့ခန္ဓာကိုယ် တုန်ခါသွားတဲ့အခါ နတ်ဆိုးဝိညာဉ်များက သူ့ခန္ဓာကိုယ်ထဲမှ ပျံထွက်သွားကာ မြေပြင်ပေါ်သို့ လျင်မြန်စွာ တွားသွားရင်း ချန်ရှီဆီသို့ ပြေးဝင်သွားခဲ့သည်။

သူတို့ တွားသွားရင်း၊ အော်ဟစ်ရင်း၊ ပျံသန်းရင်းဖြင့် ချန်ရှီကို ထိုးကြိတ် ကိုက်ခဲကြသည်။

သူ၏ နတ်ဆိုးဝိညာဉ်သည် မသန်စွမ်းအရုပ် သန့်စင်ဖို့ အသက်ရှင်ရာ အဆင့်တွင် သေဆုံးသွားသော ကလေးငယ်များ၏ ဝိညာဉ်များမှ သန့်စင်ထားခြင်း ဖြစ်သည်။ နတ်ဆိုးဝိညာဉ်သည် ခန္ဓာကိုယ်မရှိသည့်အပြင် တစ္ဆေတစ်ကောင်သာဖြစ်သော်လည်း ၎င်းအား အလွန်အစွမ်းထက်အောင် သန့်စင်ထားသည်။

သူသည် အားနည်းချက်များစွာ ရှိသောကြောင့် အချည်းနှီးသေဆုံးသွားသော သရဲတစ္ဆေများကို ဖမ်းဆီးကာ မိမိအသွေးနှင့် ကျွေးမွေးသည်။ အမွှေးတိုင်တွေ ပူဇော်ပြီး နေ့ညမပြတ် ပူဇော်ခဲ့သည်။

၎င်းကို ပြီးပြည့်စုံအောင် သန့်စင်​ပြီးသောအခါ တစ္ဆေရွှေဆေး ဖြစ်လာလိမ့်မည်။ ၎င်းသည် အလွန်အစွမ်းထက်ပြီး မသန်စွမ်းအရုပ်များလို အိုးထဲထည့်ထားရတဲ့ အားနည်းချက် မရှိချေ။

သူ၏ အခြေတည်ဝိညာဥ် စွမ်းအားနယ်ပယ်သည် ရွှေအမြုတေ စွမ်းအားနယ်ပယ်ထက် အဆမတန် အားကောင်း၏။ အဆိုပါ အခြေတည်ဝိညာဥ် စွမ်းအားနယ်ပယ် တစ်ခုတည်းဖြင့် ရွှေအမြုတေနယ်ပယ် ကျင့်ကြံသူအား အသေ ချေမှုန်းနိုင်သည်။

ရန်သူရဲ့ ရွှေအမြုတေဟာ လျင်မြန်စွာ အရည်ပျော်ပြီး အခြေတည်သော စိတ်စွမ်းအား နယ်ပယ်အတွင်းသာ ပျက်စီးသွားလိမ့်မည်။ အဲဒီအချိန်မှာ အခြေတည်ဝိညာဥ်က လေထဲမှာ ထိုင်နိုင်ပြီး ဘာကမှ မထိခိုက်စေနိုင်ပါ။

အခြေတည်ဝိညာဥ်က လူအများကို သတ်နိုင်သည်။ ၎င်းသည် လူများကို ခုခံကာကွယ်နိုင်စွမ်း မရှိသောကြောင့် သို့မဟုတ် ပျက်စီးစေဖို့ ဆင်းသက်လာသောကြောင့် တစ်ကြိမ်တည်းဖြင့် သတ်ပစ်နိုင်ရမည်။ ဒုတိယမြောက် ထိုးနှက်ရန် မလိုအပ်ပါ။

သို့သော် ယခု မိုးကြိုးသည် သူ့အထက်တွင် ရှိနေသောကြောင့် သူသည် အခြေတည်ဝိညာဉ်ကို မလွှတ်နိုင်ဘဲ မှော်စွမ်းအင်ကိုသာ သုံးနေရသည်။

ထိုနတ်ဆိုးဝိညာဉ်များသည် ချန်ရှီဆီသို့ ပြေးသွားကြသည်။ ချီသွေးများဖြင့် ဖွဲ့စည်းထားသော ချပ်ဝတ်တန်ဆာများက ဆီးတားထားသော်လည်း ဖန်တီးထားသည့် ချပ်ဝတ်တန်ဆာကို ဖွင့်လိုက်ကြပြီး ချန်ရှီ၏ အသွေးများကို နေရာအနှံ့ ကိုက်ပစ်ကြသည်။

တစ်ချိန်တည်းမှာပင် နတ်ဆိုးဝိညာဥ်သည် ချန်ရှီရဲ့ လည်ဆွဲကို ပတ်ကာ ပျံတက်သွားစဥ် လည်ဆွဲက အသက်ဝင်လာလေရာ ထိုနတ်ဆိုးဝိဥာဉ်များ အချင်းချင်း ကိုက်ကုန်သည်။

ထိုစဥ် ချန်ရှီဗိုက်ပေါ်ရှိ တစ္ဆေဘုရင် မျက်နှာသည်လည်း ပါးစပ်အကျယ်​​ကြီး ဖွင့်ကာ ၎င်း၏လျှာရှည်ကြီးကို ထုတ်၍ နတ်ဆိုးဝိညာဉ်များကို ရစ်ပတ်ကာ သူ့ပါးစပ်ထဲသို့ ဆွဲထည့်ပစ်လိုက်သည်။

ချန်ရှီသည် သူ့ခန္ဓာကိုယ်ပေါ်ရှိ ဒဏ်ရာများကို လျစ်လျူရှုကာ ပုဆိန်ကို ခုတ်ချဖို့ ခြေလှမ်းများကို နောက်တစ်ကြိမ် လှည့်လိုက်သည်။ ယွီတောက်ကျစ်လည်း ခက်ခက်ခဲခဲ ဖမ်းဖို့ သူ့လက်ကို မြှောက်လိုက်စဥ် ပုဆိန်က ကျိုးသွားရာ လက်နက်အပိုင်းအစက ပြေးလာပြန်သည်။

ယွီတောက်ကျစ် နောက်ပြန် လဲကျသွားစဥ် မွှေးပျံ့သော ဆီမီးခွက်ကို နင်းမိသွားသည်။ ထိုစဥ် ချန်ရှီဆီက ဧကရာဇ် ခေါင်းလောင်းကြီး ရောက်လာ​လေပြီ။ ယွီတောက်ကျစ်ဆီက ညည်းတွားသံတစ်ချက် ထွက်ပေါ်လာဟာ သူ့မျက်လုံး၊ နား၊ ပါးစပ်နှင့် နှာခေါင်းတို့သည် ဧကရာဇ်ခေါင်းလောင်းကို ထိမှန်ပြီးနောက် သွေးတွေ ထွက်လာသည်။

ဧကရာဇ်ခေါင်းလောင်း ကျိုးသွားတဲ့အခါ ခန္ဓာကိုယ်အနှံ့ ကြိုးရှည်ကြီးက ရစ်ပတ်လိုက်သည်။

ယွီတောက်ကျစ်သည် ကြိုးရှည်ဖြင့် ဆွဲထုတ်ခံလိုက်ရသဖြင့် ချန်ရှီဆီသို့ လွင့်သွားခဲ့သည်။ တစ်ဆက်တည်း ချန်ရှီက လှည့်ကာ လေးနှင့်မြှားကို ကိုင်၍ မြှားတစ်စင်း ပစ်ခတ်လိုက်လေသည်။ မြှားက သူ့ရင်ဘတ်ကို ထိုးဖောက်ကာ နောက်ပြန် လွင့်ပျံသွားစေပြီး နံ့သာခန်းမ နံရံကို ချိတ်ဆွဲပြီးသား ဖြစ်သွားသည်။

ဒီမြှားကို အခြေတည်ဝိညာဥ်ရဲ့ စွမ်းအားနယ်ပယ် အလွှာတွေက အားပျော့သွားစေလို့ သူ့ရဲ့ ရင်ဘတ်ကို ဖြတ်သွားပေမယ့် သူ့နှလုံးနဲ့ အဆုတ်တွေကို မထိခိုက်စေခဲ့ချေ။

ယွိတောက်ကျစ် ထိတ်လန့်သွားသည်။

နံရံအောက်မှာတော့ ကောင်းကင်အဘွားရဲ့ ရုပ်တုရှိသည်။

နံ့သာခန်းမရှိ ကောင်းကင်အဘွား ရုပ်တုသည် သဘာဝအားဖြင့် မူလကိုယ်ထည်မဟုတ်ဘဲ အမွှေးတိုင် ပူဇော်ရန် အသုံးပြုသည့် ပြန်လည်ဖန်တီးထားသော ရုပ်တုသာ ဖြစ်သည်။ ရုပ်တုပေါ်တွင် သူ့သွေးများ ပတ်ဖြန့်ပစ်စဥ် ချန်ရှီက ပြင်းထန်သော မျက်နှာဖြင့် သူ့ဆီ ပြေးလာနေတာ မြင်လိုက်ရတော့ အကြီးအကျယ် တုန်လှုပ်သွားသည်။

"အဘွား... ကျွန်တော့်ကို ကယ်ပါ!"

ကောင်းကင်အဘွားရဲ့ နတ်ကိုယ်ပွားက ချက်ချင်း နိုးလာပြီး ကြီးမားသော တန်ခိုးကိုပြသကာ ထူးဆန်းစွာ ရယ်မောလာသည်။

"အရည်အချင်း မရှိတဲ့ အရာလေးအတွက် အဘွားကိုယ်တိုင် လှုပ်ရှားဖို့ လိုသေးတယ်ပေါ့..."

ချန်ရှီ၏ ခေါင်းနောက်တွင် ဘုံကျောင်းငယ်တစ်ခု ပေါ်လာပြီး ကောင်းကင်အဘွား မလှုပ်ရှားမီတွင် အလင်းတန်းတစ်ခု လင်းလက်သွားခဲ့သည်။ ရုပ်တုမှာ ရုတ်ချည်း ပျောက်ကွယ်သွားကာ နောက်အခိုက်အတန့်တွင် ဘုံကျောင်းငယ်ထဲက နတ်ကွန်းပေါ်တွင် ပေါ်ထွက်လာခဲ့သည်။

ချီစွမ်းအင်များ တိုးဝင်လာကာ ရုပ်တုကို ထိန်းချုပ်ပစ်လိုက်သည်။

နတ်ကိုယ်ပွားလည်း ထိတ်လန့်သွားပြီး စတင်ရုန်းကန်းသော်လည်း ဘုံကျောင်းငယ်လေးရဲ့ လျှို့ဝှက်ဆန်းကြယ်သော စွမ်းအားကို တိုက်ဖျက်ရန် ခွန်အား မရှိခဲ့ပေ။

တောင်နီမယ်မယ်သည် ဘုံကျောင်းငယ်လေးထဲက ဖယ်ထုတ်ခံလိုက်ရတာကြောင့် ခန်းမထဲမှာ ဖြစ်ပျက်ခဲ့တာကို အံ့သြတကြီးနဲ့ လှည့်ပတ်ကြည့်​နေလိုက်သည်။

ချန်ရှီသည် ကောင်းကင်အဘွား၏ နတ်ကိုယ်ပွားကို ယဇ်ပူဇော်သော်လည်း အဘွားကြီး၏ လွင့်မျောနေသည့် ဦးခေါင်းကြီးကို သူမြင်လိုက်ရပြီး မရေမတွက်နိုင်သော လျှာများက ပြေးထွက်လာကာ နံရံတွေကို ဆွဲချနေသည်။

ချန်ရှီ၏ စွမ်းအင်နှင့် သွေးများ တဟုန်ထိုး တက်လာပြီး နောက်ထပ် လက်နက် ခြောက်လက်ကို စုဆောင်းလိုက်သည်။ ဓားရှည်သည် သူ့ရင်ဘတ်ကို လှိုင်းလုံးကြီးဖြင့် ထိုးဖောက်ဝင်ရောက်ကာ ဓားစောင်းကို ခက်ခက်ခဲခဲ လှည့်ကာ စက်ဝိုင်းပုံ အပြည့် ပြုလုပ်လိုက်သည်။

ယွီတောက်ကျစ်ရဲ့ လည်ပင်းကို ပုဆိန်နဲ့ ထိမှန်သွားပြီး ဧကရာဇ်ခေါင်းလောင်းသံက သူ့ခေါင်းကို ထိသွားသည်။ နောက်ထပ် လက်နက် တစ်ခုကလည်း သူ့ရင်ဘတ်ကို ထိုးဖောက်ဝင်ရောက်သွားပါ၏။ ယွီတောက်ကျစ်လည်း သူ့သွားများကို အံကြိတ်ကာ ချန်ရှီကို မျက်နှာမူလိုက်သည်။

"ငါနဲ့အတူ သေလိုက်!"

အခြေတည်ဝိညာဉ်က ချန်ရှီမျက်ခုံးများကို ထိုးဖောက်ဝင်ရောက်တော့မည် ဖြစ်သော်လည်း မိုးခြိမ်းသံတစ်သံက ကောင်းကင်မှ ​ပြိုကျလာခဲ့သည်။ အခြေတည်ဝိညာဥ်လေးမှာ ဖုန်မှုန့်နှင့် မီးခိုးအမှုန်အမွှားလေးတွေလို ပျောက်ကွယ်သွားသည်။

ယွီတောက်ကျစ် တစ်ခဏလောက်သာ အံ့အားသင့်သွားရသည်။ မျက်လုံးများ မှိန်သွားကာ သူ၏ တက်ကြွမှုတွေ ပျောက်ကွယ်သွား၏။

ချန်ရှီမှာ ဓားရှည်ကြီးကို ဆွဲထုတ်ရန် ခွန်အားရှိသမျှ အသုံးပြုခဲ့သော်လည်း သူ့ခန္ဓာကိုယ်ပေါ်ရှိ နတ်ဆိုးဝိညာဉ်များစွာသည် သူ၏ ချီနှင့် သွေးသံချပ်ကာများကို အပိုင်းပိုင်း ဖြတ်ကာ ဝါးစားသွားခဲ့သဖြင့် သူ့​​ခွန်အားမှာ ယခင်ကလို မပြင်းထန်တော့ပေ။

ယွီတောက်ကျစ် သေဆုံးသွားတော့မှ နတ်ဆိုးဝိညာဉ်တွေအပေါ် ထိန်းချုပ်မှုလည်း ဆုံးရှုံးသွားသဖြင့် ချန်ရှီကို တိုက်ခိုက်နေတာတွေလည်း ရပ်တန့်သွားသည်။

ချန်ရှီ သူ့ခြေထောက်ကို မြှောက်လိုက်ပြီး ယွီတောက်ကျစ်ရဲ့ ခန္ဓာကိုယ်ကို ဓားရှည်နဲ့ သံရိုက်သလိုမျိုး ထိုးထည့်ကာ ကန်ထုတ်လိုက်သည်။ ပြီးတာနဲ့ အပြင်ဘက်ကို လှည့်ကြည့်လိုက်၏။

အိမ်နောက်ဖေးတွင် လေပွေကဲ့သို့ ခုတ်ထစ်ခြင်း၊ မြှားများ ပစ်လွှတ်ခြင်း၊ ကြိုးရှည်များ ပျံဝဲကာ၊ လှံတံများ လွင့်ပျံလို့ ဓားစွမ်းအင်များကလည်သ လှည့်ပတ်ပျံသန်းနေပါသည်။ သိပ်မကြာခင်မှာပဲ ကျောက်ဆောင်တွေ ပြိုကျပြီး သစ်ပင်တွေ ကျိုးပဲ့ကုန်သည်။ အခုအချိန်မှာ အိမ်နောက်ဖေးလည်း ပြိုကျလုနီးပါး ဖြစ်နေပါပြီ။

ချန်ရှီ ခြေထောက်ကို မြှောက်လိုက်ပြီး မသန်စွမ်းအရုပ်ခန်းမ တပည့်တစ်ဦး၏ ဦးခေါင်းကို ကြိတ်လိုက်သည်။ လေးကြိုးကို ဆွဲ၍ ထွက်ပြေးသွားသော အခြားတပည့်ကို ပစ်သတ်လိုက်ရာ နောက်ဆုံးတွင် ပတ်ဝန်းကျင် တစ်ခုလုံး ငြိမ်သက်သွားခဲ့သည်။

ချန်ရှီ ဒေါသတကြီးဟောက်ပြီး လှည့်ပတ်ကြည့်ရင်း အသက်ရှင်နေတဲ့လူကို ရှာပေမယ့် သူကလွဲလို့ ဘယ်သူမှ မရှိတော့ပေ။

သူ့ခန္ဓာကိုယ်ကို ဖုံးအုပ်ထားသော ချီစွမ်းအင်နှင့် သွေးများ တဖြည်းဖြည်း ငြိမ်သက်သွားပြီး ခန္ဓာကိုယ်မှ ထွက်လာသော ခေါင်းသုံးလုံးနှင့် လက်ခြောက်ချောင်းတို့ ပျောက်သွားသည်။ ခေတ္တရပ်ပြီး ခြံရှေ့သို့ လျှောက်သွားနေချိန်၌ သူ့ခြေလှမ်းများက အနည်းငယ် တုန်ယင်နေသည်။ တောင်နီမယ်မယ်ကလည်း သူ့နောက်ကို အမြန် ပြေးလိုက်လာသည်။

ချန်ရှီ​ကြောင့် အိမ်ရှေ့ခြံမှ အိမ်နောက်ဖေးဆီအထိ တံခါးပေါက်များ ပြိုကျပြီး ပျက်စီးသွားပါပြီ။

ကျောက်ခိုင်းယွင်သည် ကျိုးနေသော အုတ်နှင့် အုတ်ကြွပ်များကို ကိုက်ရန် အံသွားများကို သုံးနေရဆဲ။ သူက အပျက်အစီးများပေါ်သို့ တွယ်တက်ကာ ကျိုးနေသော နံရံကို မှီရင်း အိမ်နောက်ဖေးသို့ မျက်နှာမူ​နေခဲ့သည်။