ခေါင်းဆောင်ချန်၏ သဘောထား

" မျောက်သူတော်စင် ရောက်လာတာလား။စောစော မကြိုဆိုမိလို့ တောင်းပန်ပါတယ်"

ချန်ကောင်းကင်အိမ်တော်ကို ကိုယ်စားပြုပြီး ချန်မျိုးနွယ်၏ အကြီးဆုံးအစ်ကို ချန်ကျောက်က ဖော်ရွေစွာပြုံး၍ ရှေ့တက်လာသည်။ သို့သော် သူက ခြေလှမ်းနှစ်လှမ်းသာ လှမ်းလိုက်ရသေးချိန်တွင် သူ့အရပ်ထက် နှစ်ဆမြင့်သော ဆံပင်နီနီနှင့် ကြမ်းတမ်းသော လူတစ်ယောက်က ရှေ့သို့ ရုတ်တရက် ပေါ်လာသည်။ ထိုလူ၏ မျက်လုံးများက ခေါင်းလောင်းများကဲ့သို့ ကြီးမားပြီး လက်မောင်းများက လူအများစု၏ ခြေထောက်များထက် ပို၍ကြီးမားထူထဲကာ ချွန်ထက်သော သွားများရှိသည့် ရက်စက်သော အပြာရောင်မျက်နှာမှ မီးခိုးများ မှုတ်ထုတ်နေပြီး ရန်လိုသော အကြည့်ဖြင့် ကြည့်နေသည်။

ဝုန်း

ဆံပင်နီလူက ပေါ်လာသည်နှင့်တစ်ပြိုင်နက် ချန်ကျောက်၏ ခေါင်းကို တည့်တည့် ရိုက်ချလိုက်သည်။

"မင်း"

ချန်ကျောက်က ကြိုဆိုလိုက်သော်လည်း မျောက်သူတော်စင်၏ ငယ်သားက ရုတ်တရက် တိုက်ခိုက်လာမည်ဟု လုံးဝ မထင်ထားခဲ့ပေ။ သူက ထိုရိုက်ချက်ကို လမ်းကြောင်းပြောင်းရန် ချီစွမ်းအင်ကို အသုံးပြုလိုက်သော်လည်း အလစ်အငိုက်ခံလိုက်ရသောကြောင့် ကြီးမားသော အင်အားကို မခုခံနိုင်ခဲ့ပေ။

ဘုန်း

ရိုက်ချက်၏ အင်အားက ချန်ကျောက်ကို လွင့်ထွက်သွားစေပြီး လူအုပ်အတွင်း ပြိုလဲသွားစေသည်။ သူ၏ လက်များက ဒဏ်ရာရရှိသွားပြီး လည်ချောင်းထဲမှ ချိုမြိန်သော အရသာတစ်ခုနှင့်အတူ အမည်းရောင်သွေးများကို ထွေးထုတ်လိုက်သည်။ စကားတစ်ခွန်းမှ မပြောဘဲ ကြိုဆိုလာသော ချန်ကျောက်ကို ရိုက်နှက်ခဲ့သောကြောင့် ဤနတ်ဆိုး၏ ရိုင်းစိုင်းမှုနှင့် မောက်မာမှုက ထင်ရှားနေသည်။

"သရဲမျက်နှာ မျောက်ဝံ" ချန်ကျောက်က အားယူ၍ ထရပ်ကာ ဆံပင်နီနတ်ဆိုးကို စိုက်ကြည့်ကာ မေးခွန်းထုတ်လိုက်သည်။

"ငါက မင်းကို ဧည့်သည်အဖြစ် ဆက်ဆံခဲ့​ပေမယ့် မင်းက ငါ့ကို တိုက်ခိုက်ခဲ့တယ်။ ဒါက ဘာအဓိပ္ပာယ်လဲ"

ချန်မျိုးနွယ်ဝင် ထောင်ပေါင်းများစွာသည်လည်း ချန်ကျောက်နည်းတူ ဒေါသထွက်နေကြပြီး သူတို့အားလုံး၏မျက်နှာကို ရိုက်နှက်ခံလိုက်ရသကဲ့သို့ ခံစားနေရသည်။

"ဘာကို ဆိုလိုတာလဲ ဟုတ်လား။ မျောက်သူတော်စင်ရဲ့ သားတစ်ယောက်ကို မင်းတို့ လူသားတွေက သတ်လိုက်တယ်။ ငါတို့က တရားမျှတမှုအတွက် လာခဲ့တာ"

မျောက်နတ်ဆိုးက မဲ့ပြုံးတစ်ချက်နှင့် အေးစက်စက်ဖြေလိုက်သောအခါ ချန်မျိုးနွယ်ဝင်များသည် အကြည့်ချင်း ဖလှယ်လိုက်ပြီး နတ်ဆိုးတိမ်တိုက်အတွင်းရှိ ရွှေရောင်မျက်လုံးများထံ အာရုံပြောင်းသွားကြ၏။ ထိုတည်ရှိမှုက ဆံပင်နီနတ်ဆိုးထက် အဆပေါင်းများစွာ ပိုပြီး ကြောက်မက်ဖွယ်ကောင်းကြောင်း သိနားလည်ထားကြသည်။

"အသက်ရှူချိန် သုံးကြိမ်အတွင်း လူသတ်သမားကို ငါတို့ဆီ ပေးလိုက်၊ ဒါမှမဟုတ်ရင်"

စကားသံ မပြီးခင်မှာပင် ကောင်းကင်က တောက်ပသော အဖြူရောင်အလင်းဖြင့် ရုတ်တရက် လင်းလက်သွားသည်။

ဘုန်း

ကြီးမားသော လျှပ်စီးတစ်ချက်က ဆံပင်နီ နတ်ဆိုး၏ ခေါင်းကို တည့်တည့် ကျဆင်းလာကာ လျှပ်စီးကြောင်းများ တစ်ကိုယ်လုံးသို့ ထိမှန်သွားခဲ့သည်။ ၎င်းက တုန်လှုပ်စွာ အော်ဟစ်ကာ ပါးစပ်မှ အမြှုပ်တစီစီထွက်ပြီး ဒူးထောက်လျက်သား လဲကျသွားသည်။ သူ၏ ဆံပင်နီများက အမည်းရောင်အဖြစ် လောင်ကျွမ်းခံလိုက်ရပြီး ခန္ဓာကိုယ်အနှံ့ သွေးများပန်းထွက်လာကာ အပေါက်များ ဖြစ်ပေါ်လာခဲ့သည်။

"ဘယ်သူလဲကွ"

ဒဏ်ရာများက ချန်ကျောက်ထက် အခြေအနေ ပိုဆိုးသောကြောင့် သူ၏ မျက်နှာက နာကျင်စွာ ရှုံ့မဲ့နေပြီး ဒေါသတကြီး မော့ကြည့်လိုက်သည်။ ထိုအချိန်တွင် မိုးခြိမ်းသံ တဝုန်းဝုန်းထွက်ပေါ်လာကာ လျှပ်စီးကြောင်းများ ဝန်းရံနေသည့် အဖြူရောင် သံချပ်ကာဝတ် လူတစ်ယောက်က ကောင်းကင်မှ ဆင်းသက်လာပြီး ချန်ကျောက်ဘေးမှာ ဆင်းသက်လိုက်သည်။ သူ၏ ရင်ဘတ်ပေါ်ရှိ အဖြူရောင် ကျားပုံရိပ်က ကြမ်းတမ်းပုံရပြီး လျှပ်စီးများဖြင့် တောက်ပနေသော မျက်လုံးများက မယိမ်းယိုင်သော သူရဲကောင်း စိတ်ဓာတ်ကို ထင်ဟပ်နေသည်။

"စစ်သူကြီး"

"မျိုးနွယ်ခေါင်းဆောင်"

ချန်မျိုးနွယ်နှင့် ကိုးကောင်းကင်တပ်မတော်၏ အဖွဲ့ဝင်များက ရောက်လာသူကို မှတ်မိသွားသောအခါ ကြောက်စိတ်များ ပျောက်ကွယ်သွားကြောင်း ခံစားလိုက်ရသည်။

"ချန်ရှောင်၊ မင်းက အတော်လေး ရဲရင့်နေတာပဲ"

သရဲမျက်နှာ မျောက်ဝံကြီးက ထရပ်ရန် ကြိုးစားရင်း ဟိန်းဟောက်လိုက်သော်လည်း အဖြူရောင် လျှပ်စီးများ၏ တိုက်ခိုက်မှုကြောင့် တဒုန်းဒုန်းအသံဖြင့် သူ၏ ဒူးများက မြေပြင်နှင့် တစ်ဖန်ထိတွေ့သွားခဲ့ပြန်သည်။

"မျောက်သူတော်စင်"

သူက အကူအညီအတွက် ရွှေရောင်မျက်လုံးများထံ အားကိုးတကြီး ကြည့်လိုက်သည်။ ထိုအချိန်တွင် ရွှေရောင်မီးတောက်မျက်လုံးများနှင့် မိုးကြိုးမျက်လုံးများက အကြည့်ချင်းရင်ဆိုင်နေပြီး မုန်တိုင်းတစ်ခု ပေါက်ကွဲတော့မည့်အလား တင်းမာလာကာ ပတ်ဝန်းကျင်၌ အလွန်တိတ်ဆိတ်နေခဲ့သည်။ ဤအဖြစ်ကြောင့် ယွမ်ရှောင်က အနည်းငယ် စိတ်သက်သာရာရသွားပြီး ဓားဂူသုံးခုသည် နှိမ့်ချနေရသော်လည်း ကိုးကောင်းကင်အင်မော်တယ်တပ်မတော်၏ ခေါင်းဆောင်ချန်ရှောင်မှာမူ အထင်ကြီးစရာကောင်းလောက်အောင် အစွမ်းထက်ပေသည်။

ရိုးရှင်းသော လက်ဟန်ဖြင့် သူက ဆံပင်နီမျောက်ဝံကို မြေပြင်၌ ဖိနှိပ်ထားပြီး နတ်ဆိုးအုပ်စု ဒေါသတကြီး ဖြစ်နေသော်လည်း တည်ငြိမ်စွာ စကားစလိုက်၏။

"မိတ်ဆွေဟောင်းကြီး ဒီ ဆံပင်နီမျောက်က တော်တော်ရိုင်းစိုင်းပြီး ရောက်လာလာချင်း ငါ့အစ်ကိုကို တိုက်ခိုက်နေတယ်။ ငါတို့ရဲ့ ရင်းနှီးတဲ့ ဆက်ဆံရေးကို သူ မသိဘူးလား"

ဆံပင်နီမျောက်နတ်ဆိုးက အံ့သြတကြီးဖြစ်သွားကာ မျောက်သူတော်စင်၏ ရွှေရောင်မျက်လုံးများက အနည်းငယ် ကျဥ်းမြောင်းသွားပြီး တည်ငြိမ်သော အသံဖြင့် တုံ့ပြန်လာခဲ့၏။

"ဒီကောင်က တကယ်ကိုရိုင်းစိုင်းတယ်။ ဆုံးမပေးလို့ ကျေးဇူးတင်ပါတယ် သူငယ်ချင်း"

"မဖြစ်စလောက်လေးပါ။ ဝေးကွာတဲ့ အရပ်က ရောက်လာတာကို ငါတို့က ကြိုဆိုဖို့ ပျက်ကွက်ခဲ့တယ်။ ငါတို့ နောက်ဆုံး တွေ့ဆုံပြီးကတည်းက အချိန်အတော်ကြာသွားပြီ။ မင်းကို ဂုဏ်ပြုဖို့အတွက် သေရည်ပြင်ဆင်ထားတယ်။ ကျေးဇူးပြုပြီး ကြွပါ"

ခေါင်းဆောင်ချန်က တစ်ချက်ပြုံး၍ ဟန်ဆောင်အမူအရာနှင့် ဖိတ်ခေါ်လိုက်ခြင်းဖြစ်သည်။

"ဒီနေ့ ငါ မင်းတို့ကို အနှောင့်အယှက် မပေးပါဘူး။ မဟာကျောင်းတော်က စားသောက်ပွဲတစ်ခု ပြင်ဆင်ထားလို့ ငါက သူတို့ရဲ့ ဖိတ်ကြားမှုကို လက်ခံပြီးပြီ။ ဒါပေမယ့် ကိစ္စတစ်ခု ရှိသေးတယ်၊ မင်းတို့ လူသားတွေ လုပ်ခဲ့တဲ့ အရာတစ်ခုအတွက် တရားမျှတမှုကို ရှာဖွေရလိမ့်မယ်"

"ဘာကိစ္စများလဲ ပြောပါဦး"

"မကြာသေးခင်က ဓားတာအိုကျောက်တိုင်ရဲ့ အောက်ခြေမှာ ငါ့သားကို ချန်မျိုးနွယ်ဝင် တစ်ယောက်ယောက်က ရက်ရက်စက်စက် သတ်ဖြတ်ခဲ့တယ်"

မျောက်သူတော်စင်၏ အသံက ငြိမ်သက်နေသော ကန်ရေပြင်တစ်ခုပမာ ထူးဆန်းစွာ တည်ငြိမ်နေသော်လည်း ဘေးမှ မျောက်နတ်ဆိုးအုပ်စုက ခုန်ပေါက်ပြီး အော်ဟစ်ကာ ဒေါသတကြီး ဖြစ်နေကြ၏။

"အဲဒီလိုလား"

ခေါင်းဆောင်ချန်က အနည်းငယ် မျက်ခုံးပင့်ကြည့်လိုက်သည်။

" မျက်မြင်သက်သေတွေ အများကြီးရှိတယ်။ မင်းတို့ရဲ့ လူသားကျင့်ကြံသူတွေတောင် သက်သေပြနိုင်တယ်"

"ဘယ်သူလုပ်တာလဲ"

"ကျုပ် လုပ်တာ"

ခေါင်းဆောင်ချန်က ချန်မျိုးနွယ်ဝင်များဘက်လှည့်၍ မေးလိုက်သောအခါ

ယွမ်ရှောင်သည် ရှေ့ထွက်ကာ ဝန်ခံလိုက်၏။ ချန်ကျောက်၊ ချန်မိုနှင့် အခြားသူများသည် ကျောရိုးတလျှောက် အေးစိမ့်သွားကာ ဗြဟ္မာခေါင်းကြီးပိုက်ထားမိသကဲ့သို့ ခံစားလိုက်ရသည်။

"သခင်လေးရဲ့လက်ချက်လား"

ချန်မျိုးနွယ်ဝင် အစောင့်အနည်းငယ်က ယွမ်ရှောင် ယူလာသော တိရစ္ဆာန်ကို ပြန်သတိရသွားပြီး တုန်လှုပ်နေကြသည်။

"မင်းက မျောက်သူတော်စင်ရဲ့ သားကို သတ်လိုက်တာလား"

ခေါင်းဆောင်ချန်၏ မျက်နှာက လေးနက်သွားသည်။

"ဟုတ်တယ်"

ယွမ်ရှောင်က ခေါင်းညိတ်သည်။

"ချန်ရှောင်"

မျောက်သူတော်စင်၏ မျက်လုံးများက တောက်လောင်သွားပြီး ယွမ်ရှောင်ထံ အကြည့်ရောက်လာခဲ့သည်။

"ဒါက မင်းရဲ့ သမက်လား"

ခေါင်းဆောင်ချန်က ခေါင်းညိတ်ပြလိုက်သောအခါ သူက အေးစက်စက်ပြုံး၍ စကားဆက်လိုက်၏။

"မင်းနဲ့ ငါက သေခြင်းရှင်ခြင်းကို အတူရင်ဆိုင်ခဲ့ကြပေမယ့် မင်းရဲ့ သမက်က ငါ့သားကို လုပ်ကြံသတ်ဖြတ်လိုက်တာလား။ မင်းတို့က မျိုးနွယ်နှစ်ခုကြားက ငြိမ်းချမ်းရေးကို ဖျက်ဆီးပြီး စစ်ပွဲတစ်ခု အစပြုချင်နေတာလား"

"မဟုတ်ဘူး။ မင်းရဲ့သားကို သတ်တာက ငါ့ရဲ့ ကိုယ်ပိုင်ဆုံးဖြတ်ချက်ပဲ။ ဒါက ငါ့ ယောက္ခမနဲ့ ဘာမှ မသက်ဆိုင်ဘူး"

ယွမ်ရှောင်က ဖြတ်ပြောလိုက်ခြင်းပင်။

"ကိုယ်ပိုင်ဆုံးဖြတ်ချက်လား"

မျောက်သူတော်စင်၏ အသံက ပိုပြီး အေးစက်လာသည်။

"ဟုတ်တယ်"

"မင်းက ဓားကျင့်ကြံသူတစ်ယောက်လို့ ငါကြားထားတယ်။ ဓားဂူသုံးခုက မင်းကို ဒီလိုလုပ်ဖို့ ခိုင်းခဲ့တာလား"

မျောက်သူတော်စင်၏ အသံက ပေါက်ကွဲထွက်လာပြီး ယွမ်ရှောင်၏ နားများအတွင်း မိုးခြိမ်းသံကဲ့သို့ မြည်ဟိန်းနေသည်။

"ရယ်စရာကောင်းလိုက်တာ။ အဲဒီ တန်ဖိုးမရှိတဲ့ ဓားမျိုးနွယ်တွေက ငါ့ကို လွှမ်းမိုးနိုင်မယ်လို့ ထင်နေတာလား"

ယွမ်ရှောင်က ကြောက်ရွံ့မှု အရိပ်အယောင်မရှိဘဲ ပြန်ပြောလိုက်သည်။

"ငါက မင်းရဲ့သားကို အကြောင်းပြချက် တစ်ခုတည်းကြောင့် သတ်လိုက်တာ။ သူက သေဖို့ ထိုက်တန်လို့လေ"

"မင်းတို့ဓားကျင့်ကြံသူတွေရဲ့ မြင့်မြတ်တဲ့ အထိမ်းအမှတ်ကို သူက ညစ်ညမ်းအောင် လုပ်ခဲ့လို့လား"

မျောက်သူတော်စင်၏စကားက ထောင်ချောက်များဖြစ်ပြီး ယွမ်ရှောင်ကို ကျဥ်းထဲကကျပ်ထဲ ရောက်စေရန် ရည်ရွယ်ထားသည်။ သူ၏ သားက အသတ်ခံလိုက်ရပြီး လက်ရှိတွင် လက်စားချေရန်အတွက် နည်းလမ်းတစ်ခုကို ရှာဖွေလိုခြင်း ဖြစ်သည်။

မျောက်သူတော်စင်၏ နားကွဲလောက်သော ဟိန်းသံကို ရင်ဆိုင်ရင်း ယွမ်ရှောင်၏ မျက်လုံးများက ထက်ရှသွားပြီး ခေါင်းယမ်းလိုက်သည်။

"ဓားတာအိုကျောက်တိုင်က ငါနဲ့ ဘာဆိုင်လို့လဲ"

"မင်းက ဓားကျင့်ကြံသူတစ်ယောက်ပဲ။ မင်းနဲ့ ဘယ်လို မသက်ဆိုင်ရမှာလဲ"

မျောက်သူတော်စင်က စကားနှင့် ဆက်တိုက် ဖိအားပေးခဲ့သည်။

"ငါက တာအိုနဲ့ ဓား နှစ်ခုလုံးကို ကျင့်ကြံတယ်။ ငါ့ရဲ့ အဓိကလမ်းကြောင်းက တာအိုပဲ။ ငါ့အတွက် ဓားလမ်းကြောင်းက ဟန်ဆောင်ပြသဖို့အတွက် နည်းလမ်းတစ်ခုပဲ။ ဒီအတိုင်း ငါက လိုက်စားခဲ့တာပဲ"

ယွမ်ရှောင်၏ အကြည့်စူးစူးက မျောက်နတ်ဆိုးအုပ်စုထံ ပြောင်းလဲကျရောက်သွားသည်။

"နတ်ဆိုးသူတော်စင်ငယ်ကို ငါ သတ်လိုက်တဲ့အကြောင်းအရင်း၊ သူက ငါတို့ မျိုးနွယ်နှစ်ခုကြားက ငြိမ်းချမ်းရေးစာချုပ်ကို ချိုးဖောက်ရာမှာ ဦးဆောင်ခဲ့လို့ပဲ။ သူက ငါတို့ လူသားအမျိုးသမီးတွေကို ဖျက်ဆီးပြီး သတ်ဖြတ်ဖို့အတွက် မျောက်နတ်ဆိုးအုပ်စုတစ်ခုကို ရဲရဲတင်းတင်း ဦးဆောင်ခဲ့တယ်။ မျောက်သူတော်စင်၊ သူ့ရဲ့ အပြုအမူက မှန်ကန်တယ်လို့ပြောနိုင်လား။ နတ်ဆိုးတိုက်ကြီးရဲ့ နတ်ဆိုးတိုင်းက ကောင်းကင်နယ်မြေကို လာပြီး အိမ်ရှင်ကို လာစော်ကားနေတာ သည်းခံစရာလား"

ဓားကျင့်ကြံသူများအပေါ် အပြစ်ပုံချရန် တစ်ဖက်လူက စကားဖြင့် ထောင်ချောက်ဆင်ခဲ့သော်လည်း ယွမ်ရှောင်က ပါးနပ်စွာ ရှောင်တိမ်းပြီး အပြစ်တင်စွပ်စွဲလိုက်၏။

"ကိုးကောင်းကင်အင်မော်တယ်စစ်တပ်ရဲ့ အဖွဲ့ဝင်တစ်ယောက်အနေနဲ့ ကောင်းကင်နယ်မြေမှာ ငြိမ်းချမ်းရေး ထိန်းသိမ်းဖို့က ငါ့ရဲ့ တာဝန်ပဲ"

ထို့နောက် သူက ချန်ရှောင်ကို စိုက်ကြည့်ပြီး ကျယ်လောင်စွာ မေးခွန်းထုတ်ခဲ့သည်။

"ယောက္ခမ၊ ကျုပ်ရဲ့ လုပ်ရပ်က မှားလား"

"မှားတယ်ကွ။ နောက်တစ်ကြိမ်ကျရင် ငါတို့ လူသားအမျိုးသမီးတွေကို ဂုဏ်သိက္ခာမဲ့အောင် လုပ်တဲ့သူနဲ့ တွေ့ရင် ငါ့ကို ခေါ်လိုက်။ ငါတို့ အတူတူ သတ်ပစ်ကြမယ်"

ချန်ရှောင်၏ တုံ့ပြန်ပုံကြောင့် ပတ်ဝန်းကျင်၌ ဆူညံနေသော နတ်ဆိုးများပင် တိတ်ဆိတ်သွားသော်လည်း ဒေါသများ ပို၍ ဖြစ်တည်လာခဲ့သည်။

"မျောက်သူတော်စင်၊ ကောင်းကင်နယ်မြေမှာ အင်မော်တယ်စစ်ပွဲက ပြိုင်ဆိုင်မှုထက် မိတ်ဆွေဖွဲ့မှုကို ဦးစားပေးတယ်။ ဖြစ်ပျက်ခဲ့တဲ့အရာအတွက် ငါ စိတ််မကောင်းပေမယ့် ကိုးကောင်းကင်အင်မော်တယ်တပ်မတော်မှာ ငြိမ်းချမ်းရေးကို ထိန်းသိမ်းဖို့ တာဝန်ရှိတယ်ဆိုတာ နားလည်ပေးပါ။ ပြီးတော့ ငါ့ရဲ့ သမက်က နဂါးငွေ့တန်းတပ်ခွဲမှာ အမြင့်ဆုံး တပ်မှူးပဲ။ ဒီလို မြင့်မြတ်တဲ့ ရာထူးကြောင့် သူက တရားမျှတမှုအတွက် ပြတ်ပြတ်သားသား လုပ်ဆောင်ဖို့ တာဝန်ရှိတယ်။ စစ်ဘက်ဥပဒေအရ ငါက သူ့ကို အပြစ်ပေးလို့မရဘူး။ မျိုးနွယ်နှစ်ခုကြားက ကောင်းမွန်တဲ့ ဆက်ဆံရေးကို ထည့်စဉ်းစားပြီး မင်းရဲ့ နောက်လိုက်တွေကို ထိန်းချုပ်ပါ။ ငါတို့ နှစ်ယောက်လုံးကို မျက်နှာသာပေးဖို့အတွက် မျှော်လင့်ပါတယ်။ ဒါက မင်းလိုချင်သလို တရားမျှတတယ် မဟုတ်လား"

ချန်ရှောင်က ပြန်လှန်မေးခွန်းထုတ်ခွင့်မရှိသော လေသံမျိုးဖြင့် အထက်စီးမှ ပြောလိုက်သည်။

"သခင်လေးက ဘယ်အချိန်တုံးက နဂါးငွေ့တန်းတပ်ခွဲရဲ့ ရာထူးအမြင့်ဆုံး တပ်မှူး ဖြစ်သွားတာလဲ"

အစောင့်တစ်ယောက်က တီးတိုးမေးလိုက်သည်။

"သူ့ကို အခုမှ ရာထူးခန့်အပ်လိုက်တာ ထင်တယ်"

နောက်တစ်ယောက်က တီးတိုးပြောလိုက်သည်။

ဤအချက်အရ ချန်ရှောင်က ယွမ်ရှောင်ကို ကာကွယ်ရန် နတ်ဆိုးသူတော်စင်ငယ် လုပ်ခဲ့သော အမှားအား ပုံကြီးချဲ့နေကြောင်း ထင်ရှားသည်။ မျောက်သူတော်စင်က ချန်မျိုးနွယ်တစ်ခုလုံးနှင့် ဓားကျင့်ကြံသူများကို လက်စားချေချင်ခဲ့သော်လည်း သူက သမက်ဖြစ်သူကိုပင် အထိအခိုက်မခံကြောင်း ပြသနေ၏။ ရောက်ရှိလာသော နတ်ဆိုးများ၏ မျက်နှာက မည်းနက်သွားကာ မျက်လုံးများ သွေးရောင်တောက်ပ၍ အံကြိတ်ထားပြီး ဒေါကန်ကုန်သည်။

"သခင်၊ သူတို့ကို တိုက်ခိုက်လိုက်ရအောင်"

ဆံပင်နီမျောက်ကြီးက မျောက်သူတော်စင်ကို ကြည့်ရင်း တီးတိုးပြောလိုက်သော်လည်း တုံ့ပြန်ခြင်း မရှိခဲ့ပေ။ သူက ချန်ရှောင်ကို ခဏတာ အေးစက်စက် စိုက်ကြည့်ပြီးနောက် ရယ်မောကာ ပြောလိုက်သည်။

"မင်းသိလား၊ ငါ့မှာ သားတွေအများကြီးရှိတယ်။ မင်းရဲ့ ရပ်တည်ချက်ကို ငါ နားလည်ပါတယ်။ ဒီကိစ္စကို ဒီနေရာမှာ အဆုံးသတ်လိုက်ရအောင်"

"ကျေးဇူးတင်ပါတယ်။ မင်းက ငါ့အတွက် မိတ်ဆွေကောင်းတစ်ယောက်ပါပဲ"

"ငါတို့ မျောက်မျိုးနွယ်နဲ့ မင်းတို့ ချန်မျိုးနွယ်က အမြဲတမ်း ညီအစ်ကိုလိုပါပဲ။ ငါတို့ရဲ့ ပါရမီရှင်တွေက အင်မော်တယ်စစ်ပွဲမှာ ပိုပြီး တိုက်ခိုက်လို့ရအောင် မဟာကျောင်းတော်ရဲ့ ပညာရှိကို ငါတင်ပြလိုက်မယ်။ ငါတို့ မျိုးနွယ်နှစ်ခုကြားက ဆက်ဆံရေးကို ပိုပြီး နက်ရှိုင်းအောင် တိုက်ခိုက်ခြင်းကသာ လုပ်နိုင်တယ်"

မျောက်သူတော်စင်က ခြိမ်းခြောက်စကားဆိုပြီးနောက် နတ်ဆိုးတိမ်တိုက်များအတွင်း ရှိနေသော နတ်ဆိုးအုပ်စုကို ဦးဆောင်ကာ ကောင်းကင်မှ ထွက်ခွာသွားခဲ့သည်။

ထိုအချိန်၌ ချန်ရှောင်၏ အမူအရာက အေးစက်သွားပြီး ငယ်သားများကို အမိန့်ပေးလိုက်သည်။

"အမိန့်ထုတ်ပြန်တယ်။ ချန်မျိုးနွယ် အဖွဲ့ဝင်အားလုံး အင်မော်တယ်စစ်ပွဲက နုတ်ထွက်ရမယ်"

ထိုကြေညာချက်က လူထောင်ပေါင်းများစွာကို ကြောင်အသွားစေကာ ချန်မျိုးနွယ်၏ လူငယ် အများအပြားက နှစ်ပေါင်းများစွာ ပြင်ဆင်ခဲ့ကြပြီး အင်မော်တယ်စစ်ပွဲ၌ အစွမ်းပြသနိုင်ရန် မျှော်လင့်ထားခဲ့ကြသည်။

"တိတ်ကြစမ်း၊ မင်းတို့ အားလုံး အကြောင်းရင်းကို နားလည်သင့်တယ်"

သူ၏စကားသံက တီးတိုးရေရွတ်နေသံများအကြားမှ ဟိန်းထွက်လာခဲ့သည်။

" ခေါင်းဆောင် ကျုပ်တို့က သေရမှာကို မကြောက်ပါဘူး"

"သေခြင်းကို မကြောက်ဘူးဆိုတာက ငါတို့အနေနဲ့ အလဟဿ အသက်စွန့်ရမယ်လို့ မဆိုလိုဘူး။ စိတ်ချထားလိုက်၊ ငါတို့ မျိုးနွယ်အတွက် တစ်ယောက်ယောက်က ရပ်တည်ပြီး အမြင့်ဆုံး အောင်ပွဲကို ရှာဖွေလိမ့်မယ်"

ချန်ရှောင်က လူငယ်များကို ဖြောင်းဖြလိုက်ရင်း ချန်ရီထံ အကြည့်ရောက်သွားသည်။

"အစ်ကို၊ မင်းက ငါတို့ အားလုံး တိုက်ပွဲကနေ ဘေးထွက်နေရမယ်လို့ အခုလေးတင် ပြောခဲ့တာ မဟုတ်ဘူးလား"

ချန်မိုက အံ့အားသင့်စွာ မေးလိုက်သည်။

"မင်းမှာ ဦးနှောက်မရှိဘူးလား။ ရီအာက ဓားနယ်မြေကို ကိုယ်စားပြု​တာ"

"ဪ၊ ဟုတ်သားပဲ"

ချန်မိုက နားလည်သွားဟန်ဖြင့် ခေါင်းညိတ်သည်။

"အစ်ကိုကြီး၊ အဆင်ပြေရဲ့လား"

ချန်ရှောင်က ချန်ကျောက်ကို စိုးရိမ်စွာ မေးလိုက်၏။

"ငါ အဆင်ပြေပါတယ်။ ဒီ ဆံပင်နီ တိရစ္ဆာန်က ဂုဏ်သိက္ခာ မရှိဘူး။ သူသာ မှန်မှန်ကန်ကန်တိုက်ခိုက်ခဲ့ရင် ငါက သူ့ကို ကောင်းကောင်း ရိုက်ပစ်နိုင်တယ်"

သူက အံကြိတ်ထားရင်းမှ ခေါင်းညိတ်ပြခဲ့သည်။

ချန်ရီက အကြံအစည်တစ်ခုနှင့် ချဥ်းကပ်လာခဲ့သော်လည်း သူမ၏မျိုးနွယ်က စွမ်းဆောင်ရည်ရှိကြောင်း ယွမ်ရှောင်သည် စိတ်ထဲမှ မှတ်ချက်ပေးလိုက်၏။ ထို့နောက် သူက ချန်ရီဘက် လှည့်ပြီး နားမလည်ဟန်ဆောင်ကာ မေးလိုက်သည်။

"ဒီ မျောက်သူတော်စင်က ဘာကြောင့် ထွက်သွားတာလဲ။ သူ့သားက ငါ့ရဲ့ ဓားစက်ကွင်းအဖြစ် သန့်စင်ခံထားရတာကို သိနေတာတောင် မျက်တောင်တစ်ချက် မခတ်ဘူးလား။ သူက ကျင့်ဝတ်ပိုင်းဆိုင်ရာ အသာစီးရယူပြီး ငါ့ကို စိန်ခေါ်ချင်နေတာလား"

"ဒီနေ့မှာ သူ ဒေါသတကြီး ဖြစ်ခဲ့ရင်တောင် အကျိုးမရှိဘူးဆိုတာကို သူ သိတယ်။ သူက ပိုပြီး ဆိုးဝါးတဲ့ လက်စားချေမှုကို စီစဉ်ချင်နေတာ ရှင်းတယ်။ အဲဒီ လူလိမ်မျောက်"

ချန်ရီက စိတ်ပျက်လက်ပျက်ဖြစ်နေပြီး သူ့ကို လည်ပင်းညှစ်သတ်ချင်နေပုံရသည်။

"အဆင်ပြေပါတယ်။ ဒီအချိန်ကနေစပြီး ချန်မျိုးနွယ်အတွက် ဂုဏ်သိက္ခာကို ရှာဖွေရာမှာ မင်းကို ကူညီပေးမယ်။ ငါတို့ရဲ့ ညီအစ်ကိုတွေ၊ သူတို့ရဲ့ အိပ်မက်တွေကို ငါ့ရဲ့ ပခုံးပေါ်မှာ ထမ်းတင်ထားနိုင်တယ်"

ယွမ်ရှောင်က အာမခံလိုက်ပြီး ချန်ရီအနေဖြင့် စိုက်ကြည့်နေရုံသာ တတ်နိုင်ခဲ့သည်။

သူမက အစွမ်းထက်သော ဧကရီတစ်ပါးဖြစ်သော်လည်း ယွမ်ရှောင်ကြောင့် ဤအခြေအနေအထိ အကျပ်ရိုက်မည်ဟု ထင်မထားခဲ့ပေ။

"လာခဲ့။ မဟာကျောင်းတော်ကို သွားရအောင်"

သူမက ယွမ်ရှောင်၏ လက်မောင်းကို ဆွဲလိုက်သည်။

"မဟာကျောင်းတော်မှာ လူသားနဲ့ နတ်ဆိုး ထိပ်သီးကျင့်ကြံသူတွေကြားမှာ လျှို့ဝှက်အစည်းအဝေးတစ်ခု လုပ်နေတယ်မလား။ မင်းက အဲဒီကို သွားချင်တာလား"

"ငါရှိနေရင် ဘာကို ကြောက်ရမှာလဲ"

ချန်ရီက ယုံကြည်မှုအပြည့်နှင့် ပြန်ပြောလိုက်လေသည်။