ချင်းလင်ဆော့ထုတ်ကုန်အသစ်?

ထျန်းဟိုင်အစားအသောက်ကုမ္ပဏီ_

ကျွမ်စစ်ရှီးက ဟန်၊ ဟင်နရီနှင့် ချင်းလင်ဆော့ကြား စီးပွားရေးစစ်ပွဲကိုမျက်စိဒေါက်ထောက်ကြည့်နေသည်။ ကြည့်အကောင်းဆုံးစီးပွားရေးစစ်ပွဲပင်။

ချင်းလင်ဆော့က ဟန်နှင့်ဟင်နရီမိသားစုကိုလိုက်​ပြိုင်မည်ဟု လုံးဝမထင်မိ။

နောက်ပြီး ကောင်းကင်ဘုံနှင့်လူ့ပြည်တိုက်ပွဲမှာ အထိအခိုက်များလိမ့်မည်။

ထျန်းဟိုင်ဆော့စျေးကွက်မှာ ထပ်ပြီးဘောင်ကျဉ်းသွားပြန်သည်။ မူလက ထျန်းဟိုင်အစားအသောက်ကုမ္ပဏီမှာ အလယ်အလတ်မှအဆင့်နိမ့်ဆော့ကို ၆ ယွမ်နှင့်သာရောင်းသည်။

ချင်းလင်ဆော့ကအဆင်မြင့်ထုတ်ကုန်ဖြစ်ပြီး ၁၅ ယွမ်ပေးရသည်။ အခု ၇ ယွမ်နှင့်ရောင်းနေပြီဖြစ်၍ သူတို့နှင့်အတူတူလောက်ကျသည်။

သူ့ထျန်းဟိုင်ဆော့ကို ဘယ်သူဝယ်မှာတဲ့လဲ?

အဓိကက ပြည်တွင်းဆော့မှာ ပွဲထဲဝင်ပါနိုင်စွမ်းတောင်မရှိ။ ညှင်းဆဲခံရဖို့သာရှိသည်။

ထိုအချိန်တွင် အတွင်းရေးမှူးကရုတ်တရက်ပြေးဝင်လာပြီး အစီရင်ခံသည်_

"ဥက္ကဌကျွမ်... ချင်းလင်အစားအသောက်ကုမ္ပဏီကဖိတ်တယ်... သူတို့သူဌေးက ရုံချန်းကိုလာစေချင်တယ်တဲ့''

ကျွမ်စစ်ရှီးကြောင်သွားသည်။

ချင်းလင်အစားအသောက်ကုမ္ပဏီသူဌေးက ဟန်နဲ့ဟင်နရီကြောင့် အလုပ်များနေမှာမလား?

ဘာလို့သူ့ကိုဖိတ်တာလဲ?

ဒါဆော့နဲ့ပတ်သက်ရမည်။ ပြီးတော့ ဒီလိုအခြေအနေမျိုးမှာ စူးစမ်းချင်စိတ်ကြောင့် သူသွားမည်ဖြစ်၍ အတွင်းရေးမှူးအား_

"လေယာဉ်လက်မှတ်ဖြတ်ပေးပါ''

"ကောင်းပါပြီ ဥက္ကဌကျွမ်!''

အတွင်းရေးမှူးက အလျင်စလိုထွက်သွားသည်။

မကြာမီ ကျွမ်စစ်ရှီးက သူ့ဒရိုင်ဘာနှင့်အတူမင်မြို့တော်ရောက်သွားသည်။ ထို့နောက် ဒရိုင်ဘာကိုကားငှားခိုင်းပြီး ရုံချန်းဆက်သွား၏။

ချင်းလင်အစားအသောက်ကုမ္ပဏီက ကျုံးမင်ဟိုတယ်တွင်အခန်းငှားပေးထားသောကြောင့် ရုံချန်းထဲဝင်လာသည်နှင့် ကျုံးမင်ဟိုတယ်သို့တန်းမောင်းခိုင်းသည်။

နောက်တစ်နေ့တွင် ကျွမ်စစ်ရှီးကိုချင်းလင်ကုမ္ပဏီသူဌေးနှင့်တွေ့ရန်ဖိတ်ကြားခံရသည်။ အောက်ထပ်ဆင်းလိုက်သောအခါ သူရင်းနှီးသောမျက်နှာတချို့ကိုမြင်ပြီး အံ့ဩသွားသည်။

ဒီလူတွေက ပြည်တွင်းဆော့ဘရန်းပိုင်ရှင်တွေ!

လောင်ကျိမြန့်ဆော့၊ လဲကျားဆော့၊ ကျိရှန်ဆော့၊ လီမင်းဆော့...

သူတို့ကလည်း ထိပ်တန်းဆော့ဘရန်း ၁၀ ခုထဲပါသည်။

ဒါပေမဲ့ ချင်းလင်ကုမ္ပဏီသူဌေးက ဘာလို့သူတို့အကုန်လုံးကိုဖိတ်ရတာလဲ?

တခြားဆော့ဘရန်းသူဌေးများကလည်း ကျွမ်စစ်ရှီးကိုမြင်ပြီး တအံ့တဩနှုတ်ဆက်ကြသည်။

"ဥက္ကဌကျွမ်''

"ဥက္ကဌကျွမ်လည်းရောက်နေတယ်''

"ဥက္ကဌကျွမ်.. မတွေ့တာကြာပြီ''

သူတို့အားလုံးခရမ်းချဉ်ဆော့ထုတ်သောကြောင့် တစ်ယောက်ကိုတစ်ယောက်သိကြသည်။

ကျွမ်စစ်ရှီးလည်း သူတို့ကိုနှုတ်ဆက်ပြီး စကားစမြည်ပြောတော့သည်။

ချင်းလင်ကုမ္ပဏီသူ​ဌေးက ဘာလို့သူတို့ကိုခေါ်လဲသိချင်နေကြသည်။ လောလောဆယ် မခန့်မှန်းနိုင်သေး။ နောက်ဆုံး ချင်းလင်ကုမ္ပဏီမှလာကြိုသောကားထဲသာ တက်လိုက်သွားတော့သည်။

မကြာမီ ကားကချင်းလင်အပန်းဖြေစံအိမ်ကားပါကင်ရောက်လာသည်။

ကျွမ်စစ်ရှီးတို့ကကားပေါ်မှဆင်းပြီး သူတို့ရှေ့မှစံအိမ်ကိုလည်းကောင်း၊ မယုံနိုင်အောင်ကောင်းသောလေနှင့်ရှုခင်းကိုလည်းကောင်း တအံ့တဩကြည့်လိုက်ကြသည်။

ကားထဲမှထွက်ထွက်ချင်း ရသောလေကြောင့် တစ်ကိုယ်လုံးလန်းဆန်းသွား၏။

"ဒါချင်းလင်အပန်းဖြေစံအိမ်လား?''

"တကယ်လှတာပဲ... လေကကောင်းလိုက်တာ''

"ချင်းလင်ကုမ္ပဏီသူဌေးက အကောင်းကိုတကယ်သိတာပဲ... ဒီလိုနေရာမျိုးဖန်တီးနိုင်တယ်''

ထိုအချိန်တွင် ကြိုစောင့်နေသောတန့်ကွမ်းရောက်လာပြီး_

"သူဌေးတို့.. တွေ့ရတာဝမ်းသာပါတယ်... သူဌေးကလာကြိုခိုင်းထားတာပါ''

ကျွမ်စစ်ရှီးက သူ့ကိုလည်းမှတ်မိသည်။ ချင်းလင်အစားအသောက်ကုမ္ပဏီတာဝန်ခံအနေနှင့် ကုမ္ပဏီသူဌေးထက်ပိုပြီး တန့်ကွမ်းကနာမည်ကြီးသည်။

ကျွမ်စစ်ရှီးကချက်ချင်း တန့်ကွမ်းကိုအပြုံးနှင့်နှုတ်ဆက်သည်_

"ဥက္ကဌတန့်... ခင်ဗျားအကြောင်းတွေအများကြီးကြားဖူးပါတယ်... ဒီနေ့တွေ့ရတာဂုဏ်ယူပါတယ်''

တခြားသူများလည်းရှေ့တိုးလာပြီး အားတက်သရောလက်ဆွဲနှုတ်ဆက်ကြသည်။

ချင်းလင်ဆော့စီးပွားရေးကဘယ်လိုပဲဖြစ်ဖြစ် ချင်းလင်အစားအသောက်ကုမ္ပဏီ၏အားဖြည့်လက်ဖက်ရည်နှင့်ဆေးဖျော်ရည်စီးရီးက စျေးကွက်ကိုသိမ်းပိုက်ထားပြီး အခုချင်းလင်ကုမ္ပဏီက သူတို့ထက်ပိုကြီးနေသည်။

ထို့ကြောင့် ချင်းလင်ကုမ္ပဏီတာဝန်ခံဖြစ်သောဥက္ကဌတန့်နှင့်မိတ်ဆွေဖြစ်ထားရင် အကျိုးမယုတ်ပေ။

တန့်ကွမ်းက ကျွမ်စစ်ရှီးတို့ကိုကြိုပြီး ချင်းလင်အပန်းဖြေစံအိမ်ဧည့်ခန်းထဲခေါ်လာသည်။

ဧည့်ခန်းထဲတွင် ချင်လင်ကအသင့်စောင့်နေ၏။

တန့်ကွမ်းလည်း ချင်လင်ကိုချက်ချင်းအစီရင်ခံလိုက်သည်_

"ဥက္ကဌချင်... အားလုံးရောက်ပါပြီ''

ကျွမ်စစ်ရှီးတို့ကဝင်ဝင်ချင်း ချင်လင်ကိုမြင်သော်လည်း သိပ်အာရုံမစိုက်မိ။ ဘာပဲဖြစ်ဖြစ် သူတို့အမြင်မှာ လူငယ်လေးတစ်ယောက်သာ။ ချင်းလင်ကုမ္ပဏီကသူတို့ကိုလွှတ်ထားသောဝန်ထမ်းလေးဟုထင်နေကြသည်။

သို့ရာတွင် တန့်ကွမ်းစကားကြောင့် လုံးဝအံ့ဩသွားလေသည်။

ဒါချင်းလင်ကုမ္ပဏီသူဌေး?

"ဟူး!''

ကျွမ်စစ်ရှီးမှာ ရုတ်တရက်ဗလောင်ဆူသွားသည်။

အမှန်ပင်။ ချင်းလင်ကုမ္ပဏီသူဌေးကဒဏ္ဍာရီဆန်သော်လည်း ဒီလောက်ငယ်မည်ဟုမထင်မိ။ ကောလိပ်ကျောင်းပြီးခါစ ဘွဲ့ရလူငယ်လောက်သာရှိသည်။

ချင်လင်လည်း ကျွမ်စစ်ရှီးတို့ကိုနေရာပေးလိုက်သည်_

"ထိုင်ကြပါ သူဌေးတို့... ဒီတစ်ခါတွေ့ချင်ရတာက ငွေဝင်မယ့်နည်းနှစ်နည်းပေးချင်လို့ပါ''

သူ့စကားကြောင့် ကျွမ်စစ်ရှီးတို့စိတ်ဝင်စားသွားသည်။

ဘာပဲဖြစ်ဖြစ် ငွေမကြိုက်တဲ့သူရှိလို့လား? ပြီးတော့ ဒီဥက္ကဌချင်လေးမှာ ငွေရမယ့်နည်းနှစ်နည်းရှိတယ်တဲ့။

ကျွမ်စစ်ရှီးကထိုင်ပြီး စူးစမ်းလိုက်သည်_

"ဥက္ကဌချင်... ခင်ဗျားပြောတဲ့ငွေဝင်နည်းက?''

ချင်လင်ကပြုံးလိုက်ပြီး_

"ကျွန်တော်တို့ချင်းလင်ဆော့က ဟန်နဲ့ဟင်နရီမိသားစုနဲ့စျေးချင်းပြိုင်နေတာ အားလုံးအသိပဲ... ပြီးရင် ကျွန်တော်စျေးညှိမှာပါ... ကျွန်တော်တို့က ၆ ယွမ်နဲ့စိန်ခေါ်မယ်''

"ပြီးရင် ဟန်နဲ့ဟင်နရီက နောက်ဆုတ်မလား ရှေ့တိုးမလားပဲ... သူတို့တုံ့ပြန်လိမ့်မယ်... ဒီအရင်းရှင်တွေယုံကြည်ထားတာက ကျွန်တော်ကထပ်ပြီးခြောက်တယ် အပြတ်ဖြတ်မယ်ပေါ့... သူတို့က ၆ ယွမ်နဲ့ဆက်လိုက်လိမ့်မယ်''

"ဒီတော့ ခင်ဗျားတို့ဖြန့်ဝေသူတွေကိုအသုံးချပြီး ဟန်နဲ့ဟင်နရီကဆော့နှစ်မျိုးမှာပေးဖို့ပြောချင်ပါတယ်... အခု ၆ ယွမ်ဆိုပေမဲ့ မကြာခင်စျေးတက်ပါလိမ့်မယ်... အဲဒီအချိန်ကျရင် ဒီအော်ဒါတွေကိုခင်ဗျားတို့ရဲ့သီးသန့်ကိုယ်စားလှယ်တွေအပေါ်ပုံချလို့ရတယ်... ဒါသေချာပေါက်ရမယ့်နည်းပါ''