အခန်း (၄၁-၄၅)
Vol. 3 Ch. 41-45
နှစ်တစ်ရာကျင့်ကြံပြီးနောက်
အပိုင်း ၄၁ ။ ရန်သူကိုထောက်လှမ်းခြင်း
“ကျွန်မတို့လည်း သွားကြရအောင်။”
ရှန်းတောက်မင်ထွက်သွားသည်ကိုကြည့်ပြီးနောက် ရှန်းရူယန်က ကျန်းချန်ရွှမ်ဘက်သို့လှည့်ကာပြောလိုက်သည်။
ကျန်းချန်ရွှမ်လည်း ခေါင်းညိတ်လိုက်ကာ မကြာခင်မှာပဲ သူတို့နှစ်ဦး မိုးမခထောင်ချီဈေးရှိရာအရပ်သို့ ဦးတည်ထွက်ခွာခဲ့ကြသည်။
မိုးမခထောင်ချီဈေးနှင့်နီးကပ်လာသည့်အချိန်မှာတော့ ကျန်းချန်ရွှမ်တစ်ယောက် ရှန်းရူယန်ကို ကြည့်လိုက်ကာ၊
“အကြီးအကဲရူယန်၊ ဘိုးဘေးယွမ်လုံနဲ့ ဘိုးဘေးမန်ရွှယ်က ဘယ်လိုလူမျိုးတွေလည်းဆိုတာ ကျွန်တော့်ကိုပြောပြပေးလို့ရမလား?”
ကျန်းချန်ရွှမ်ဘာကြောင့် ဒီမေးခွန်းမေးမှန်း ရှန်းရူယန်နားလည်ပေသည်။ ဒါကြောင့် သူမပြန်မဖြေခင် ခဏမျှပြန်စဉ်းစားလိုက်သည်။
“ဂျူနီယာတစ်ယောက်အနေနဲ့ ဘိုးဘေးနှစ်ယောက်ရဲ့စရိုက်လက္ခဏာနဲ့ပတ်သတ်ပြီး ကျွန်မမှာ ဘာမှတ်ချက်မှပေးဖို့မရှိဘူး။
ကျွန်မသိသလောက်ကတော့ သူတို့ရဲ့အကြီးမားဆုံးသောဆန္ဒရာက ရှန်းမျိုးနွယ်စုကို အရင်လိုဂုဏ်အရှိန်အဝါမျိုးပြန်ရှိလာဖို့ဆိုတာပဲ။ ကံမကောင်းစွာနဲ့ ပြီးခဲ့တဲ့နှစ်တွေအတွင်း ရှန်းမျိုးနွယ်စုရဲ့တိုးတက်မှုက…”
ရှန်းရူယန်က သက်ပြင်းချကာ ခေါင်းအသာယမ်းလိုက်သည်။
“တကယ်တော့ ဘိုးဘေးယွမ်လုံအကြောင်း ပြောစရာအများကြီးမရှိပါဘူး။ ဒါပေမယ့် ဘိုးဘေးမန်ရွှယ်ကတော့ အစောပိုင်းနှစ်တွေမှာ သူက ကောင်းကင်ဘုံလျှို့ဝှက်ချက်ကိုတွက်ချက်ခြင်းဆိုတဲ့ ဂမ္ဘီရပညာကိုကျင့်ကြံခဲ့တာ။ ဒီတွက်ချက်ခြင်းနည်းပညာက ဘိုးဘေးမန်ရွှယ်ကို ရွှေအမြုတေအဆင့်နတ်ဆိုးကျင့်ကြံသူတစ်ယောက်အပါအဝင် ကန်းယန်ဂိုဏ်းရဲ့အင်အားကြီးရန်သူပေါင်းများစွာကို ဖယ်ရှားရာမှု အကူအညီကြီးကြီးမားမားပေးခဲ့တယ်။
ဒါကြောင့်လည်း ဒီနေ့ဒီအချိန်အထိ သူ့ရဲ့အဆင့်အတန်းက ကန်းယန်ဂိုဏ်းမှာ အရမ်းထူးခြားနေသေးတာပေါ့။ တခြားဂိုဏ်းရဲ့ရွှေအမြုတေအဆင့်အကြီးအကဲကြီးနှစ်ယောက်တောင်မှ ဘိုးဘေးကို အရမ်းလေးစားကြတယ်လို့ပြောတယ်။
ပြောရရင်တော့ ကန်းယန်ဂိုဏ်းမှာ ဒီလိုလေးစားမှုခံရတာက သူ့ရဲ့တာအိုလက်တွဲဖော်မသေမျိုး ပိုင်လုံတစ်ယောက်တည်းကြောင့်မဟုတ်ဘူးပေါ့။”
ရှန်းရူယန်ပြောသွားသည့် မသေမျိုးပိုင်လုံဆိုသူမှာ ရှန်းမန်ရွှယ်၏တာအိုလက်တွဲဖော်၊ ကန်းယန်ဂိုဏ်း၏ရွှေအမြုတေအဆင့်အကြီးအကဲသုံးယောက်ထဲမှ တစ်ဦးလည်းဖြစ်သည်။
သူ့နာမည်က ကျန်းပိုင်လုံဟုဖြစ်ကာ မသေမျိုးပိုင်လုံဟု ခေါ်ဆိုကြသည်။
“ဒါပေမယ့် ကျွန်မကြားထားသလောက်တော့ ဘိုးဘေးမန်ရွှယ် အဲ့ဒီတွက်ချက်ချင်းနည်းလမ်းကိုအသုံးပြုတဲ့အခေါက်တိုင်း သူမရဲ့သက်တမ်းကိုအများကြီး ကုန်ဆုံးသွားစေတယ်တဲ့”
ထိုစကားပြောချိန် ရှန်းရူယန်မှာ စိုးရိမ်သည့်ပုံစံဖြစ်နေသည်။
“ဒါကြောင့်ပဲ အသက်၂၀၀ကျော်ပဲရှိသေးတာတောင် သူ့ရဲ့တစ်ခေါင်းလုံး ဖြူနေရတာပဲ။”
ကျီဖုအဆင့်ကျင့်ကြံသူတစ်ယောက်၏ဘဝသက်တမ်းမှာ အနှစ်၄၀၀အထိ ရှည်ပေသည်။
တချို့သော သက်တမ်းကိုဆွဲဆန့်နိုင်သည့်ဝိညာဉ်ပစ္စည်းများနှင့်ဆိုလျှင် အသက် ၅၀၀လောက်အထိ နေနိုင်ဖို့ဆိုသည်က ပြဿနာတစ်ရပ်မဟုတ်တော့ပေ။
သို့သော်လည်း ရှန်းမန်ရွှယ်သည်တော့ အသက် ၂၀၀ တောင်မပြည့်သေးသော်လည်း သူမ၏ဆံပင်တွေအားလုံးကတော့ ဖြူစွတ်နေခဲ့ပေပြီ။ ဤသည်ကိုကြည့်ခြင်းအားဖြင့် သူမ၏ဘဝသက်တမ်းမှာ အတော်များများကုန်ဆုံးသွားပြီဖြစ်ကြောင်း ပြောနိုင်သည်။
ဤကဲ့သို့အခြေအနေမျိုးတွင် သက်တမ်းတိုးစေသည့်ဝိညာဉ်ပစ္စည်းများအသုံးပြုလျှင်တောင်မှ သူမအတွက် အကူအညီများများစားစားဖြစ်စေနိုင်တော့မည်မဟုတ်ပေ။
“သူတို့ ရှင့်ကို အခုလိုဆက်ဆံရတဲ့အကြောင်းအရင်းကတော့..”
ရှန်းရူယန်က ကျန်းချန်ရွှမ်ကို နက်ရှိုင်းစွာကြည့်ကာ ဖြည်းညှင်းစွာပြောလာခဲ့သည်။
“ဘိုးဘေးမန်ရွှယ်က ရှင့်အပေါ်မှာတစ်စုံတစ်ခုကို မြင်ထားတာကြောင့်ဖြစ်နေမှာစိုးရတယ်။ ဘိုးဘေးမန်ရွှယ်ကပဲ ဘိုးဘေးယွမ်လုံကို ရှင့်ကိုဂရုစိုက်ဖို့တောင်းဆိုထားတာဖြစ်လောက်မယ်။
ရှင်အများကြီးစိုးရိမ်နေဖို့တော့မလိုပါဘူး။ သူတို့ဘက်က ရှင့်ကိုကောင်းမွန်တဲ့သဘောထားပြလာတာက ရှင့်ကိုထိခိုက်စေဖို့ရည်ရွယ်တာတော့မဟုတ်ဘူး။”
သူတို့နှစ်ဦးသား စကားပြောနေရင်းဖြင့်ပင် မိုးမခထောင်ချီဈေးသို့ရောက်ရှိလာခဲ့ကြသည်။
သို့သော်လည်း ကျန်းချန်ရွှမ်သည်တော့ သူ့စိတ်ကိုသူ မနည်းလျှော့ချနေရသည်။
ရှန်းရူယန်ပြောသွားသည့်စကားများအရ ဘိုးဘေးမန်ရွှယ်က ကောင်းကင်ဘုံလျှို့ဝှက်ချက်ကိုတွက်ချက်ခြင်းနည်းလမ်းကိုကျင့်ကြံထားသူဖြစ်ကြောင်း ပြောနိုင်ပေပြီ။
ဒါကြောင့်ပဲ သူမက သူ့ကို မတူကွဲပြားစွာ ဆက်ဆံနေရတာပေါ့။
ဒါဆို သူမဘာကိုမြင်ထားလို့လဲ?
သူ့မှာ သူ့ကိုကူညီပေးမယ့် အလိမ်အညာစနစ်တစ်ခုရှိနေတယ်ဆိုတာ သိသွားလို့လား?
ထိုဖြစ်နိုင်ချေကိုတော့ ကျန်းချန်ရွှမ် အမြန်အဆန်ပဲ ပယ်ဖျက်လိုက်သည်။
အကြီးအကဲမန်ရွှယ်သာ သူ့လျှို့ဝှက်ချက်ကို တကယ်ပဲသိထားပြီးခြင်းကြောင့်ဆိုလျှင် သူမ၏အပြုအမူက ဒီလောက်အထိ သူ့အပေါ်ကောင်းမွန်နေမှာမဟုတ်သလို သူ့ကို ရှန်းမျိုးနွယ်စုကနေ ဒီလောက်အလွယ်တကူထွက်သွားစေဖို့လည်း မဖြစ်နိုင်ပေ။
သူ လူတွေကို အရမ်းအဆိုးမြင်မနေချင်သော်လည်း လူတွေ ဘယ်လောက်တောင်မှ လောဘကြီးကြောင်း ကျန်းချန်ရွှမ် သိပေသည်။
သူ့ဆီမှာရှိနေသည့် စနစ်ကိုလုယူချင်သည့်အတွေးမျိုးကို သူတို့ဘယ်လိုမှ တွန်းလှန်နိုင်လိမ့်မည်မဟုတ်ပေ။
ဒီတော့ ဘိုးဘေးမန်ရွှယ် သူ့ကိုအထူးတလည်သဘောကောင်းနေရသည့်အကြောင်းအရင်းက တခြားအကြောင်းကြောင့်သာဖြစ်ပေလိမ့်မည်။
ထိုသို့တွေးမိပြီးနောက် ကျန်းချန်ရွှမ်တစ်ယောက် သူ့ဘေးရှိ ရှန်းရူယန်ကိုလှည့်ကြည့်လိုက်ရာ မျက်လုံးချင်းဆုံသွားလေသည်။
ရှန်းရူယန်ကလည်း သူ့ကိုပြန်ပြုံးပြလိုက်ကာ စကားလမ်းကြောင်းကို ပြောင်းလိုက်သည်။
“အကြီးအကဲကျန်း၊ ကျွန်မတို့ ဒီနေရာမှာပဲ လမ်းခွဲလိုက်ပြီး၊ နတ်ဆိုးကျင့်ကြံသူအကြွင်းအကျန်တွေကို လိုက်ရှာပြီးမှ ပြန်ဆုံကြရင်ရော?”
ထိုသို့ပြောနေချိန်မှာပဲ အလင်းတန်းဒါဇင်ပေါင်းများစွာက သူတို့ဘက်သို့ ပျံသန်းလာခဲ့သည်။
အနားနီးလာချိန်မှာတော့ ထိုသူအားလုံးမှာ ရှန်းမျိုးနွယ်စု၏ကျင့်ကြံသူများသာဖြစ်ကြောင်း သိလိုက်ရသည်။
ချီသန့်စင်ခြင်းနဝမအဆင့်တွင်ရှိသည့် သက်လတ်ပိုင်းအရွယ်ကျင့်ကြံသူက အရင်ရှေ့သို့တိုးလာကာ ဦးညွှတ်လိုက်ပြီး၊
“အကြီးအကဲတို့ကို နှုတ်ခွန်းဆက်သပါတယ်။”
မတိုင်ခင်ကတည်းက သူတို့လာမည့်အကြောင်း မျိုးနွယ်စုက အကြောင်းကြားထားပြီးသားဖြစ်ပုံပင်။
ရှန်းရူယန်လည်း ခေါင်းအသာညိတ်ကာ မေးမြန်းလိုက်သည်။
“အခု အခြေအနေတွေဘယ်လိုဖြစ်သွားပြီလဲ? နတ်ဆိုးကျင့်ကြံသူတွေရဲ့သဲလွန်စတွေ ရှာတွေ့ထားတာရှိလား?”
သက်လတ်ပိုင်းအမျိုးသားက ခေါင်းယမ်းလိုက်ကာ ဒုက္ခရောက်နေသည့်ဟန်အမူအရာကို ချိတ်ဆွဲရင်း၊
“ဝေးပါသေးတယ်။ ကျွန်တော်တို့ ဘယ်နတ်ဆိုးကျင့်ကြံသူကိုမှ မတွေ့သေးဘူး။ ဒီလူတွေအားလုံး မျက်စိတ်တစ်မှိတ်အတွင်း အစအနမကျန်အောင် ပျောက်သွားသလိုပဲ။”
ရှန်းရူယန်၏လှပသောမျက်ဝန်းများက မှေးကျဉ်းသွားကာ ပြတ်ပြတ်သားသားပြောလာခဲ့သည်။
“ရှင်တို့ မရှာနိုင်တာနဲ့ပဲ သူတို့ ထွက်သွားပြီလို့မဆိုလိုဘူး။
သူတို့တွေ ပင်းချွမ်စီရင်စုမှာရှိနေသေးသ၍ ခြေရာလက်ရာတွေကျန်ခဲ့မှာပဲ။”
ထို့နောက် ရှန်းရူယန်က ကျန်းချန်ရွှမ်ကို ကြည့်လိုက်ကာ၊
“အကြီးအကဲကျန်း၊ လူနည်းနည်းလောက်ခေါ်ပြီး လိုက်ရှာကြည့်ရအောင်။
ဒီကြွက်တွေ ဒီလိုပုံစံမျိုးနဲ့ အစအနမကျန်အောင် ပုန်းနိုင်လိမ့်မယ်လို့ ကျွန်မကတော့ မယုံဘူး။”
ကျန်းချန်ရွှမ်အနေနှင့် ထိုအကြံကို ငြင်းဆန်စရာအကြောင်းမရှိတာကြောင့် ချက်ချင်းခေါင်းညိတ်လိုက်သည်။
ထို့နောက် သူနှင့်ရှန်းရူယန်တို့ လူနည်းနည်းစီခွဲခေါ်ကာ မိုးမခထောင်ချီဈေးတွင် စုံစမ်းရှာဖွေခြင်းကို စတင်ခဲ့ကြသည်။
တိုက်တိုက်ဆိုင်ဆိုင်ပင် ချီသန့်စင်ခြင်းနဝမအဆင့်ရှိ သက်လတ်ပိုင်းကျင့်ကြံသူသည် သူ့့အဖွဲ့ထဲတွင် တာဝန်ကျလာခဲ့သည်။
သူအပါအဝင် ကျန်းချန်ရွှမ်၏အဖွဲ့ထဲတွင် အသက် ၂၀ မှ ၃၀အတွင်းမှ လူများလည်းပါသေးသည်။
တစ်ယောက်နှင့်တစ်ယောက် အကျဉ်းချုံးမိတ်ဆက်လိုက်ကြပြီးနောက် သက်လတ်ပိုင်းကျင့်ကြံသူသည် ထုန်ပိုင်ယွမ်ဟုခေါ်ကြောင်း ကျန်းချန်ရွှမ် သိလိုက်ရပေသည်။ ထိုသူသည် တကယ်တမ်းတွင် ရှန်းမျိုးနွယ်စု၏အစေခံတစ်ယောက်ဖြစ်သည်။ နောက်ပိုင်း သူ၏ဝိညာဉ်အမြစ်ကို စမ်းသပ်မိသွားကာ အသိစိတ်နယ်ပယ်ကို စမ်းသပ်မှုအောင်မြင်သွားခဲ့သည်။ ထို့နောက်မှာတော့ မသေမျိုးကျင့်ကြံခြင်းနည်းစနစ်ကို စတင်သင်ယူခဲ့ပေသည်။
ဒါကတော့ ကျန်းချန်ရွှမ် မမျှော်လင့်ထားသည့်ဇာတ်ကြောင်းပင်။
ရှန်းမျိုးနွယ်စုတွင် မင်းက အစေခံတစ်ယောက်ဖြစ်နေလျှင်တောင်မှ ချမှတ်ထားသည့်စမ်းသပ်မှုများကို အောင်မြင်ခဲ့မည်ဆိုလျှင် ကျင့်ကြံသူတစ်ယောက်မဖြစ်လာနိုင်စရာအကြောင်းမရှိပေ။ ဒါကြောင့်ပဲ ရှန်းမျိုးနွယ်စုတွင် ဘာကြောင့် သစ္စာခံကျင့်ကြံသူများစွာရှိနေခြင်းဖြစ်ပေသည်။
ကျန်းချန်ရွှမ် အတွေးများကိုပြန်ရုတ်သိမ်းလိုက်ကာ ထုန်ပိုင်ယွမ်နှင့်အဖွဲ့ဝင်များကို ပြောလိုက်သည်။
“အားလုံးပဲ၊ လူခွဲရှာကြတာပေါ့။ အဖွဲ့ငယ်လေးတွေအဖြစ်ခွဲဖို့တော့မမေ့နဲ့။ မင်းတို့တစ်ခုခုရှာတွေ့တာနဲ့ အလျင်စလိုမလှုပ်ရှားကြနဲ့။ မင်းတို့ရဲ့လုံခြုံရေးက အရေးအကြီးဆုံးဆိုတာ သတိရပါ။”
အမိန့်ကိုလက်ခံရပြီးနောက် ထုန်ပိုင်ယွမ်နှင့်အဖွဲ့ဝင်များက ဦးညွှတ်ကာ ခေါင်းညိတ်လိုက်ကြသည်။ ထို့နောက်တွင်တော့ ဒါဇင်ပေါင်းများစွာသော လူများသည် အစုငယ်များအဖြစ် ခွဲလိုက်ကြသည်။
ကျန်းချန်ရွှမ်သည်လည်း အခြားသူများကဲ့သို့ပင် နတ်အသိစိတ်ကိုဖြန့်ကျက်ကာ ပတ်ဝန်းကျင်ကို စစ်ဆေးခဲ့သည်။
သို့သော်လည်း ထိုအချိန်မှာပဲ သူ့စိတ်ထဲတွင် စနစ်၏အသံက ရုတ်တရက် ထွက်ပေါ်လာလေသည်။
[ဒင်! အောင်မြစ်မှုစနစ်မှ တာဝန်အသစ်ထုတ်ပြန်လာပါပြီ။ ကျေးဇူးပြုပြီး ရန်သူရှာဖွေခြင်းကို အကြိမ်တစ်ရာပြီးမြောက်အောင် ဆောင်ရွက်ပါ Host]
[တာဝန်ပြီးမြောက်မှု : ၁ ရာခိုင်နှုန်း]
***
နှစ်တစ်ရာကျင့်ကြံပြီးနောက်
အပိုင်း ၄၂ ။ အတွင်းစိတ်ဝိညာဉ်မျက်လုံး (၁)
ကျန်းချန်ရွှမ်တစ်ယောက် သတိလက်လွတ်ဖြစ်သွားခဲ့သည်။ ဒီတစ်ခေါက်တော့ စနစ်က သူ့ကိုဤသို့သောတာဝန်မျိုးပေးလာလိမ့်မည်ဟု မထင်ထားခဲ့ပေ။ သို့သော်လည်း အတော်လေးတော့ အဆင်သင့်လှသည်။
သူက ချက်ချင်းဆိုသလို မိုးမခထောင်ချီဈေးကိုရှာဖွေစစ်ဆေးရန်အတွက် နတ်အသိစိတ်ကို ဖြန့်ကျက်လိုက်သည်။
မကြာခင်မှာပဲ သူ၏တာဝန်ပြီးမြောက်မှုက တဖြည်းဖြည်းတိုးလို့လာလေသည်…
၅ရာခိုင်နှုန်း၊ … ၈ရာခိုင်နှုန်း… ၁၄ရာခိုင်နှုန်း၊ … ၂၁ရာခိုင်နှုန်း….
သုံးရက်ကြာပြီးနောက်တွင်တော့…
တာဝန်ပြီးမြောက်မှု ၁၀၀ရာခိုင်နှုန်းပြည့်သွားသည်နှင့် သူ့စိတ်ထဲတွင် စနစ်၏အသံကို တဖန်ပြန်ကြားလိုက်ရသည်။
[ရန်သူရှာဖွေခြင်း အကြိမ် ၁၀၀ ပြုလုပ်မှု အောင်မြင်ခဲ့တဲ့အတွက် ဂုဏ်ယူပါတယ်၊ host။ မင်းအတွက် ‘အတွင်းစိတ်ဝိညာဉ်မျက်လုံး’ ဆုအဖြစ်ရရှိပါတယ်။]
[အတွင်းစိတ်ဝိညာဉ်မျက်လုံး : ဒါကတော့ မင်းရဲ့လက်ရှိကျင့်ကြံဆင့်ထက်ကျော်လွန်သည့် ရုပ်ဖျက်နည်းလမ်းများကို ဖောက်ထွင်းမြင်စေနိုင်ပါတယ်။ ဒါ့အပြင် အမျိုးမျိုးသော ပုံရိပ်ယောင်များကို ချိုးဖြတ်ပြီး အစစ်အမှန်ကို မြင်တွေ့စေနိုင်ပါတယ်။]
ထိုအချိန်မှာပဲ ကျန်းချန်ရွှမ်၏မျက်လုံးမှာ မရေမတွက်နိုင်လောက်သည့် စူးရှရှနာကျင်မှုများအပြင် မှိန်ဖျော့သည့်လောင်ကျွမ်းသွားသလို ခံစားမှုကိုပါ နာကျင်ခံစားလိုက်ရသည်။
ကံကောင်းစွာဖြင့် ထိုနာကျင်မှုက မကြာမြင့်ခဲ့ပေ။
ဆယ်မိနစ်ခန့်ကြာပြီးနောက်တွင်တော့ မျက်လုံးက ပုံမှန်အခြေအနေအတိုင်းပြန်ဖြစ်သွားခဲ့သည်။ သို့သော်လည်း တကယ်တမ်း သူ့မျက်လုံးတွေက အရင်နှင့်မတူတော့မှန်းကိုတော့ ကျန်းချန်ရွှမ် ခံစားမိနိုင်ပေသည်။
ကျန်းချန်ရွှမ်တစ်ယောက် အတွင်းစိတ်ဝိညာဉ်မျက်လုံးကို အသက်သွင်းဖို့ကြိုးစားလိုက်သည်နှင့် အစိမ်းရောင်အလင်းလွှာတစ်ခုက သူ့မျက်လုံးထဲတွင် ပေါ်လာခဲ့သည်။
ထို့နောက် သူ အလင်းစက်များစွာကို မြင်တွေ့လိုက်ရသည်။
ထိုအလင်းစက်များသည် နေရာအနှံ့တွင် နတ်ဆိုးကျင့်ကြံသူများကို ရှာဖွေနေကြသည့် ရှန်းမျိုးနွယ်စုမှ ကျင့်ကြံသူများကို ကိုယ်စားပြုကြပေသည်။
ထို့အပြင် အဖြူရောင်ဝိညာဉ်ချီစီးကြောင်းနှင့်အတူ ပျောက်ကွယ်လုနီးပါး မှိတ်တုတ်မှိတ်တုတ်ဖြစ်နေသည့် အနက်ရောင်ဝိညာဉ်ချီစီးကြောင်းကိုလည်း တွေ့ရသေးသည်။
နေပါဦး!
ရုတ်တရက် ထင်ယောင်ထင်မှားဖြေစ်စေသော ဖောက်ထွင်းမြင်ရသည့်ပုံရိပ်အချို့ကို ကျန်းချန်ရွှမ် မြင်လိုက်ရသည်။
မရေမတွက်နိုင်လောက်အောင် များပြားသည့် တွန့်လိမ်ကာ ရူးသွပ်နေကြသည့် ကြမ်းကြုတ်သောတစ္ဆေများသည် သူတို့အနားတွင် ပတ်လည်ဝိုင်းလို့နေလေသည်။
ကျန်းချန်ရွှမ်လည်း ချက်ချင်းပင် ရှန်းရူယန်အား အကြောင်းကြားလိုက်တော့သည်။
သူကိုယ်တိုင်သည်တော့ ထိုဖောက်ထွင်းမြင်ရသည့်ပုံရိပ်များဆီသို့ တိတ်တဆိတ် ချဉ်းကပ်သွားခဲ့သည်။
ခဏကြာပြီးနောက် ရှန်းရူယန်တစ်ယောက် ကျန်းချန်ရွှမ်အနားတွင် ပေါ်လာခဲ့သည်။
သူမက စကားတိုက်ရိုက်မပြောဘဲ ကျန်းချန်ရွှမ်ထံ အသံလှိုင်းပို့လွှတ်လိုက်ပြီး၊ “အကြီးအကဲကျန်း၊ ရှင် နတ်ဆိုးကျင့်ကြံသူတွေရဲ့သဲလွန်စတွေ့ထားတယ်လို့ ပြောလိုက်တာလား?”
ကျန်းချန်ရွှမ်ကလည်း ခေါင်းညိတ်လိုက်ကာ အသံလှိုင်းဖြင့် ပြန်ဖြေလေသည်။
“သူတို့က ဒီရှေ့မှာ သိပ်မဝေးဘူး။ ကြည့်ရတာ သူတို့ဆီမှာ ကျွန်တော်တို့ရဲ့ နတ်အသိစိတ်ကို ကာကွယ်နိုင်တဲ့ပစ္စည်းတစ်ခုခုရှိနေပုံပဲ။
အတူတူ ဝင်တိုက်ကြရအောင်။ ကျွန်တော်တို့ ပေါင်းရင် သူတို့ကို အနိုင်ယူနိုင်လောက်မယ်ထင်တယ်။”
တချိန်တည်းမှာပင်…
ကျန်းချန်ရွှမ်နှင့်ရှန်းရူယန်တို့ရှိနေသည့်နေရာနှင့် မလှမ်းမကမ်းရှိ သစ်ပင်ကြီးတစ်ပင်၏အရိပ်အောက်၌၊
နတ်ဆိုးကျင့်ကြံသူအနည်းငယ်က စကားပြောနေကြသည်။
နှာတံကောက်ကောက်ဖြင့် နတ်ဆိုးကျင့်ကြံသူတစ်ဦးက၊ “မင်းတို့မှာ ဝိညာဉ်ကျောက်တုံးဘယ်လောက်ရှိလဲ? အားလုံးထုတ်လိုက်။
ငါတို့ရဲ့လက်ရှိအခြေအနေကို မင်းလည်းသိမှာပါ။
ရှန်းမျိုးနွယ်စုရဲ့စစ်ဆေးရှာဖွေမှုကို ငါတို့ရှောင်နိုင်မှ ဒီတစ်ကြိမ် လွတ်မြောက်ဖို့ဖြစ်နိုင်မယ်။
သူတို့စစ်ဆေးတာကိုရှောင်နိုင်ဖို့ဆိုရင် ငါ့လက်ထဲက အဆင့် ၂ ကိုယ်ပျောက်အစီအရင်ပြားကို အသက်သွင်းထားတာ မရပ်သွားဖို့လိုတယ်။
မဟုတ်ရင် ငါတို့တွေပေါ်သွားတာနဲ့ ငါတို့ရှေ့က အခြေတည်အဆင့်ကျင့်ကြံသူနှစ်ယောက်တည်းကတင် ငါတို့အားလုံးကို လက်စတုံးပစ်နိုင်တယ်။”
ထိုလူ၏စကားများကိုကြားပြီးနောက် နတ်ဆိုးကျင့်ကြံသူများမှာ တစ်ယောက်ယောက်တစ်ယောက် ပြန်ကြည့်မိလိုက်ကြသည်။ နတ်ဆိုးကျင့်ကြံသူများသည် တစ်ကိုယ်ကောင်းဆန်ကာ တစ်ယောက်ကိုယ်တစ်ယောက် ခြေထိုးဖို့ကြံစည်နေကြသူများဖြစ်သော်လည်း လက်ရှိအချိန်တွင်တော့ သူတို့သာ စည်းစည်းလုံးလုံးမရှိလျှင် အသက်ရှင်လျက်လွတ်မြောက်နိုင်မည့်အခွင့်အရေးမရှိကြောင်း နားလည်ကြပေသည်။
ဤအချက်ကို သဘောပေါက်လိုက်ကြပြီးနောက် သူတို့တွင်ရှိသည့် ဝိညာဉ်ကျောက်တုံးများကို ထုတ်ယူလိုက်ကာ နှာတံကောက်ကောက်နှင့်နတ်ဆိုးကျင့်ကြံသူအား ပေးလိုက်ကြတော့သည်။
ကလူမြူတတ်သောပုံစံရှိသည့်နတ်ဆိုးကျင့်ကြံသူအမျိုးသမီးက တခစ်ခစ်ရယ်လိုက်ကာ၊ “အစ်ကိုချွေ့၊ ကျွန်မ ဒီဘေးဆိုးကြီးကနေ လွတ်မြောက်နိုင် မလွတ်မြောက်နိုင်က ရှင့်အပေါ်မူတည်သွားပြီနော်။ ကျွန်မသာ ဒီဘေးဆိုးကြီးကနေ လွတ်မြောက်နိုင်ခဲ့ရင် ရှင့်ကိုဆုကောင်းကောင်းချဖို့ မမေ့ဘူး။”
သူမကပြောရင်း ခန္ဓာကိုယ်ကလည်း အငြိမ်မနေစွာ တွန့်လိမ်လို့နေသည်။
အစ်ကိုချွေ့ဟုခေါ်သည့် နှာတံကောက်ကောက်နှင့် နတ်ဆိုးကျင့်ကြံသူက သူမစကားများကိုကြားသည်နှင့် သူ့မျက်လုံးထဲတွင် တပ်မက်မှုများထွက်ပေါ်လာကာ ခပ်ဟဟရယ်လိုက်ပြီး၊ “ငါသာ အသက်ရှင်နေသ၍ မင်းကိုကာကွယ်ပေးသွားမှာပါ။ ဒီကပ်ဘေးကြီးပြီးဆုံးသွားရင် ဝူစန်းနျန်က ငါနဲ့အတူ အရိုးဖြူတောင်ကိုလိုက်ခဲ့ပေါ့။”
ထိုအချိန်တွင်ပဲ တဖျက်ဖျက်နှင့်တောက်ပစွာလင်းလက်နေသည့် မိုးကြိုးသွားတစ်ခုက သူတို့၏အမြင်အာရုံထဲသို့ ဝင်ရောက်လာကာ ပုန်းကွယ်နေကြသည့် နတ်ဆိုးကျင့်ကြံသူများ၏အမူအရာများကို သိသိသာသာ ပြောင်းလဲသွားစေခဲ့သည်။
“ဘယ်လိုလုပ်..?”
ဘုန်း!
သူတို့အားလုံး မတုံ့ပြန်နိုင်ခင်တွင်ဘဲ မိုးကြိုးသွားက သူတို့ပုန်းကွယ်နေသည့်အစီအရင်ကို ဆုတ်ပြဲသွားစေလေသည်။
ထို့နောက် ချက်ချင်းဆိုသလိုပင် အလွန်အမင်းအေးစက်သည့်အအေးဓာတ်များပါဝင်နေသော အဖြူရောင်အလင်းတန်းတစ်ခုက နတ်ဆိုးကျင့်ကြံသူများထံကျရောက်သွားကာ…
ခရက်ခ်.. ခရက်ခ်.. ခရက်ခ်
ထိုနတ်ဆိုးကျင့်ကြံသူများ၏ခန္ဓာကိုယ်များက ချက်ချင်းဆိုသလို ရေခဲလွှာတစ်ခုဖြင့် ဖုံးအုပ်ခြင်းခံလိုက်ရတော့သည်။
ထို့နောက် ခရမ်းရောင်မီးတောက်များဖြင့် ဓားပျံတစ်လက်နှင့် ရောင်စဉ်ခုနှစ်သွယ်ဖြာထွက်နေသော ဓားပျံတစ်လက်တို့က နှာတံကောက်ကောက်ဖြင့်နတ်ဆိုးကျင့်ကြံသူအပါအဝင် တခြားသောနတ်ဆိုးကျင့်ကြံသူများ၏ခေါင်းကိုပါ ဖြတ်တောက်လိုက်ကြသည်။
သူတို့အားလုံး မျက်လုံးများပြူးကျယ်နေပြီး သူတို့ဘယ်လိုရှာထုတ်ခံရမှန်းပင်မသိလိုက်ဘဲ သေဆုံးသွားကြလေသည်။
အစ်ကိုချွေ့လက်ထဲရှိ ကိုယ်ပျောက်အစီအရင်ပြားဆိုသည်မှာ အခြေတည်နဝမအဆင့်ကျင့်ကြံသူတစ်ဦး၏ ရှာဖွေစစ်ဆေးမှုကိုပင် ဖုံးကွယ်ထားနိုင်စွမ်းရှိသည့် အစီအရင်တစ်ခုဖြစ်ပေသည်။
ဘာတွေဖြစ်ကုန်တာလဲ?
ကံမကောင်းစွာဖြင့် သူတို့တွင် အဖြေကိုသိသွားဖို့ အခွင့်အရေးမရှိလိုက်ပေ။
ဝှီး…
သို့သော်လည်း ထိုအချိန်မှာပဲ ခန္ဓာကိုယ်တစ်ခုထဲမှ ပမာဏများပြားလှသည့် သွေးမြူများ ရုတ်ချည်းထွက်ပေါ်လာကာ တစ္ဆေတစ်ကောင်လိုမျိုး မျက်စိတစ်မှိတ်အတွင်းမှာပင် မိုင်ဒါဇင်ပေါင်းများစွာသို့ လှစ်ခနဲထွက်ပြေးသွားတော့သည်။
ထိုသည်မှာ ကလူမြူတတ်သည့်အမျိုးသမီးနတ်ဆိုးကျင့်ကြံသူ ဝူစန်းနျန်ပင်ဖြစ်ပေသည်။
သူမသုံးသွားသည့်ထွက်ပြေးလွတ်မြောက်ခြင်းနည်းလမ်းကို သွေးအရိပ်လွတ်မြောက်ခြင်းဟု ခေါ်ပေသည်။ ထိုနည်းလမ်းဖြင့်ဆိုလျှင် သူမခန္ဓာကိုယ်ရှိ သွေး ၇၀ရာခိုင်နှုန်းကိုအသုံးပြုကာ အခြေတည်နှောင်းပိုင်းအဆင့်ကျင့်ကြံသူတစ်ယောက်ထံမှပင် ထွက်ပြေးနိုင်သည့်အရှိန်ကိုရရှိပေသည်။
သာမာန်အခြေတည်နှောင်းပိုင်းအဆင့်ကျင့်ကြံသူများအတွက်တော့ လိုက်ဖက်ရန်အလွန်ခက်ခဲလှသည့် နည်းစနစ်တစ်ခုပင်။
ကျန်းချန်ရွှမ်နှင့် ရှန်းရူယန်တို့၏လက်ရှိ အရှိန်ဖြင့်ဆိုလျှင်တော့ သေချာပေါက် လိုက်ဖမ်းဖို့မဖြစ်နိုင်ပေ။
ရန်သူကိုလွတ်သွားတာကြောင့် ရှန်းရူယန်၏အမူအရာက အလွန်အရုပ်ဆိုးသွားရသည်။
“သေစမ်း! ထွက်ပြေးသွားပြီ။”
သို့သော်လည်း ကျန်းချန်ရွှမ်သည်တော့ ပြုံးသာပြုံးလိုက်သည်။
“စိတ်မပူပါနဲ့။ သူမ အဝေးကြီးမပြေးနိုင်ပါဘူး။ သူမရဲ့အသက်ဓာတ်ကိုလောင်ကျွမ်းစေတဲ့ တားမြစ်နည်းလမ်းက အမြဲတမ်းလွတ်မြောက်အောင် လုပ်ပေးနိုင်မယ်မထင်ဘူး။”
ကျန်းချန်ရွှမ်၏မျက်လုံးထဲ အစိမ်းရောင်းအလင်းတစ်ပျက တဖန်ပြန်လင်းလာပြန်သည်။
သူက ရှန်းရူယန်ကိုခေါ်ပြီး ဝူစန်းနျန်ထွက်ပြေးသွားသည့် လမ်းကြောင်းအတိုင်း ဖြည်းညှင်းစွာ လိုက်သွားလိုက်သည်။
သို့သော်လည်း ဝူစန်းနျန်က ပြေးတာမြန်လွန်းတာကြောင့် မကြာခင်မှာပဲ သူမကျန်ခဲ့သည့်သဲလွန်စမှာ ပျက်သွားတော့သည်။
ကီလိုမီတာရာပေါင်းများစွာသို့ တစ်ချက်တည်းနှင့်ပြေးသွားနိုင်သည့် ဝူစန်းနျန်သည်လည်း ကျန်းချန်ရွှမ်နှင့် ရှန်းရူယန်တို့၏အရှိန်အဝါကို မခံစားမိတော့တာကြောင့် သက်ပြင်းအသာချနိုင်သွားသည်။
ထို့နောက် သူမ၏မျက်နှာထက်တွင် မကျေနပ်ဟန်များပေါ်လာကာ၊
“သေသင့်တဲ့ရှန်းမျိုးနွယ်ကကျင့်ကြံသူတွေ၊ နင်တို့စောင့်နေလိုက်ကြဦး။ ငါ့ဒဏ်ရာတွေပြန်ကောင်းသွားတာနဲ့ နင်တို့လက်အောက်က မြို့တွေမှာရှိတဲ့ သေမျိုးတွေအပေါ် ငါ့ဒေါသကို ဖြေဖျောက်ပြမယ်!”
သူမကပြောရင်း သူမကိုယ်သူမဖုံးကွယ်နိုင်မည့်မန္တာန်တချို့ကိုရေးဆွဲလိုက်သည်။ ထို့နောက် ဆေးလုံးလက်တစ်ဆုပ်စာအပြည့်ကို ထုတ်ကာ မြိုချလိုက်လေသည်။
အားလုံးပြုလုပ်ပြီးနောက် အသက်ပြင်းပြင်းတစ်ချက်ရှူလိုက်ကာ ဆက်လက်ပျံသန်းခဲ့ပြီး သူမပုန်းအောင်းနိုင်မည့် ဂူတစ်ခုသို့ မရောက်မချင်း မရပ်တန့်တော့ပေ။
…
ဒီတစ်ခေါက်တော့ သူမနောက်ကလူနှစ်ယောက်ကို တုန်လှုပ်သွားအောင် အောင်အောင်မြင်မြင်ဆောင်ရွက်နိုင်ခဲ့သည့် ယုံကြည်လို့နေလေသည်။
“ဟမ့်! နင်တို့က ငါ့ကိုအဆိုးဆုံးအခြေအနေအထိရောက်အောင် တွန်းချတယ်ပေါ့လေ? ဒီလောက်နဲ့မပြီးသွားဘူး။ နင်တို့ကို ပြန်ပေးဆပ်ရအောင်လုပ်ပြမယ်…”
***
နှစ်တစ်ရာကျင့်ကြံပြီးနောက်
အခန်း ၄၃ ။ အတွင်းစိတ်ဝိညာဉ်မျက်လုံး (၂)
ရှန်းရူယန်၏ အခြေအနေသက်သာလာပြီး တားမြစ်နည်းစနစ်၏ တန်ပြန်ထိခိုက်မှုကို ထိန်းချုပ်နိုင်လာသည့်အခါ ကျန်းချန်ရွှမ်သည် ဝူစန်းနျန်ပုန်းအောင်းနေသော ဂူရှိရာသို့ လမ်းပြခေါ်ဆောင်သွားသည်။
“အကြီးအကဲကျန်းက အဲဒီမိန်းမရှိတဲ့နေရာကို သိနေတာလား”
ဂူရှိရာသို့ ပျံသန်းနေစဉ် ရှန်းရူယန်က မေးလိုက်ခြင်းဖြစ်သည်။ ကျန်းချန်ရွှမ်၏ မျက်လုံးများနှာ စိမ်းပြာရောင် အလင်းများတောက်ပနေလျက်ပင် ရှိသေးသည်။
“မစိုးရိမ်ပါနဲ့ သူဘယ်မှာပုန်းနေလဲသိပါတယ် ကျုပ်ထင်တာမမှားရင် ဒဏ်ရာကိုကုနေတုန်းပဲ ရှိဦးမယ်၊ ဒီတစ်ခါတော့ သူ့ကိုရှင်းနိုင်မှာပါ”
စကားတပြောပြောနှင့်ပင် နှစ်ဦးသား ဝူစန်းနျန်ပုန်းအောင်းနေသော ဂူအနီးသို့ ရောက်ရှိလာတော့သည်။ သွေးအရိပ်လွတ်မြောက်ခြင်းနည်းစနစ်ကြောင့် ဒဏ်ရာရရှိနေသော ဝူစန်းနျန်သည် ရုတ်တရက်စိတ်များလေးလံသွားပြီး သွေးတစ်လုပ်အန်ချလိုက်မိသည်။
“ဘာတွေဖြစ်ပြန်ပြီလဲ ဟိုနှစ်ယောက်လိုက်လာတာလား၊ မဖြစ်နိုင်ဘူး”
ထိုအချိန်တွင် ဂူတံခါးမှာ ရုတ်တရက်ပေါက်ကွဲသွားပြီး လျှပ်စီးစည်းတံဆိပ်တစ်ခုနှင့် ခရမ်းရောင်မီးလျှံဓားပျံတစ်စင်း ပြေးဝင်လာသည်ကို မြင်လိုက်ရသည်။
“မင်းတို့…. မင်းတို့ငါ့ကိုဘယ်လိုရှာတွေ့လဲ”
ဝူးစန်းနန်တစ်ယောက် တုန်လှုပ်သွားသည်။ သည်နှစ်ယောက်ကို သူမျက်ချေဖြတ်နိုင်ခဲ့သည်မှာ သေချာပါသည်။ ယခုတော့….
ဝူစန်းနျန်က စဉ်းစားမနေတော့ဘဲ သွေးနီရောင်ဓားမောက်ရှည်ကို ဆွဲထုတ်လိုက်သည်။ ဓားမောက်ရှည်မှာ နတ်ဆိုးအော်ရာများ ထုတ်လွှတ်နေပြီး ပတ်ဝန်းကျင်ရှိ အလင်းများမှာ စွေးစွေးနီသွားတော့သည်။ သို့သော် ကျန်းချန်ရွှမ်၏ ခရမ်းရောင်မီးလျှံဓားနှင့် ရှန်းရူယန်၏ မိုးကြိုးတံဆိပ်တော်ကို ယှဥ်နိုင်စွမ်းမရှိတော့ပါ။ ထို့နောက် အနီးကပ်တိုက်ပွဲတစ်ခုဖြစ်ပွားပြီး ပေါက်ကွဲမှုများ အဆက်မပြတ်ဖြစ်ပေါ်လာတော့သည််။ သွေးရောင်ဓားမောက်ရှည်မှာ မိုးကြိုးများအဆက်မပြတ်ပစ်ခတ်ခံရခြင်းကြောင့် ဓားသွားထက်ရှိ သွေးများပင် အရောင်လွင့်လာသည်။ နောက်ဆုံးတွင် ကျီယန်ဓားက သူမ၏ဦးခေါင်းကို ပိုင်းဖြတ်လိုက်နိုင်သည်။
များမကြာမီ မိုးမခထောင်ချီစျေးအတွင်း ပုန်းအောင်းနေသော အခြေခံတည်အဆင့် နတ်ဆိုးကျင့်ကြံသူလေးဦးစလုံးကို ရှာဖွေသတ်ဖြတ်နိုင်ခဲ့တော့သည်။ ထိုတာဝန်ကို လွယ်ကူစွာအပြီးသတ်နိုင်ရခြင်းမှာ ကျန်းချန်ရွှမ်၏ ဝိညာဉ်မျက်လုံးအစွမ်းလည်းပါဝင်သလို ထိုလေးဦးမှာ ဒဏ်ရာအကြီးအကျယ်ရထားနှင့်သည့် အချက်လည်းပါဝင်သည်။ မည်သို့ပင်ဆိုစေ ကျန်းချန်ရွှမ်နှင့် ရှန်းရူယန်တို့၏ ကျင့်ကြံမှုအဆင့်နှင့် နှိုင်းစာလျှင် ခက်ခဲသော တာဝန်တစ်ရပ်ကို ဆောင်ရွက်နိုင်ခြင်းဟု သတ်မှတ်ရပါမည်။ ဝူစန်းနျန်၏ သိုလှောင်အိတ်ကို သိမ်းဆည်းပြီးနောက် ရှန်းရူယန်သည် ကျန်းချန်ရွှမ်အား အံ့သြစွာကြည့်လျက်
“အကြီးအကဲကျန်း ခုနကရှင်သုံးသွားတာ ဘာအစွမ်းလဲ၊ ဒီမိန်းမပုန်းနေတဲ့နေရာကို ဘယ်လိုရှာတွေ့တာလဲ”
ကျန်းချန်ရွှမ်၏မျက်လုံးမှာ စူးကနဲဖြစ်သွားသည်။ ထိုကြောင့် ဤဝိညာဉ်မျက်လုံးကို အချိန်တစ်ခုအထိ အသုံးပြု၍ရဦးမည် မဟုတ်ကြောင်း သူနားလည်လိုက်သည်။ ထို့ကြောင့် သူကပြုံးလျက်
“ဘာမှမဟုတ်ပါဘူး လူတွေကို ခြေရာခံနိုင်တဲ့စွမ်းရည်တစ်မျိုးပါပဲ၊ မွေးရာပါအစွမ်းပေါ့”
ရှန်းရူယန်မှာ ကျန်းချန်ရွှမ်၏အဖြေကြောင့် အံသြမိသွားသည်။ အချို့သောလူများတွင် နတ်ဆိုးသားရဲများ၏ ပင်ကိုယ်အစွမ်းနှင့် ဆင်တူသော မွေးရာပါအစွမ်းများရှိနေကြောင်း သူမကြားဖူးသည်။ သို့သော် ကျန်းချန်ရွှမ်တွင် သည်လိုအစွမ်းမျိုး ရှိနေမည်ဟု သူမမထင်ထားခဲ့ပါ။ ရှန်းရူယန်က တစ်ခုခုပြောမည်ပြင်ပြီးမှ တွန့်ဆုတ်သွားသည်။ ထိုအခြင်းအရာကို မြင်လိုက်သော ကျန်းချန်ရွှမ်က ပြုံးလျက်
“အကြီးအကဲရှန်း ကျုပ်ကို နတ်ဆိုးကျင့်ကြံသူတွေကို ခြေရာခံရှာစေချင်တာလား”
“ဟုတ်တယ် ကျွန်မအဲဒီလိုတွေးမိလို့”
ထို့နောက် ရှန်းရူယန်သည် ခေတ္တရပ်လိုက်ပြီးမှ တွေးတွေးဆဆနှင့်ပြောသည်။
“ရှင်ဆန္ဒမရှိရင်တော့ အတင်းအကြပ်မခိုင်းချင်ပါဘူး၊ ရှင့်အစွမ်းကို လူတွေသိသွားရင်လည်း ကောင်းကျိုးထက်ဆိုးကျိုးပိုများနိုင်တယ်လေ”
ဝန်ခံရလျှင် ကျန်းချန်ရွှမ်သည်လည်း လူအများအာရုံစိုက်ခံရခြင်းကို မလိုလားပေ။ သို့သော် ပြဿနာမှာ ကျင့်ကြံမှုလောကရှိ အရေးပါသော ဖြစ်စဉ်ဝဲဂယက်တစ်ခုအတွင်းသို့ သူကိုယ်တိုင်ပင် မသိလိုက်ဘဲ ဝင်ပါမိရန် အကြောင်းဖန်နေခြင်းဖြစ်သည်။ နတ်ဆိုးကျင့်ကြံသူနှစ်ဦးကို သတ်ဖြတ်မိသည့်အချိန်မှစ၍ ဤပြဿနာတွင် မဖြစ်မနေဝင်ပါနေရတော့မည်ဟု သူနားလည်လိုက်သည်။ ထို့ပြင် လာမည့်နှစ်၂၀ အတွင်း နတ်ဆိုးသားရဲအဓိကရုဏ်းကပ်ဘေးကြီး ဖြစ်ပွားလာမည်ဖြစ်ရာ ထိုအချိန်တွင် မပါဝင်ချင်လည်း ပါဝင်ပတ်သက်ရဦးမည်ဖြစ်သည်။
ထိုကပ်ဘေးကို ကျော်လွှားရှင်သန်ရန် တစ်ခုတည်းသောနည်းလမ်းမှာ ကျင့်ကြံမှုအဆင့်ကို အမြင့်ဆုံးမြှင့်ထားနိုင်ဖို့ဖြစ်သည်။ ယွင်နိုင်ငံတစ်ခုလုံးတွင် ရှန်းမျိုးနွယ်စုထက် သူ့ကျင့်ကြံမှုကို အကျိုးပြုနိုင်မည့်နေရာမျိုးမရှိပါ။ ထို့ကြောင့် ရှန်းရူယန်၏စကားကို ကြားပြီးနောက် ရှည်ရှည်ဝေးဝေး တွေးမနေတော့ဘဲ ခေါင်းညိတ်လိုက်သည်။
“ကျုပ်ကူညီမယ်၊ ဒါပေမဲ့ ကျုပ်ရဲ့မွေးရာပါအစွမ်းကို လူတွေမသိအောင် လျှို့ဝှက်ထားပေးပါ၊ အချိန်တစ်ခုအတွင်းပေါ့”
ရှန်းရူယန်၏ မျက်နှာထက်တွင် အပြုံးတစ်ပွင့် ပေါ်လာသည်။
“ဒါကပြဿနာမဟုတ်ပါဘူး၊ ကျွန်မအစ်ကိုကိုပြောပြီး ရှင့်ရဲ့လျှို့ဝှက်ချက်မပေါက်ကြားအောင် အမိန့်ထုတ်ခိုင်းလိုက်ပါ့မယ်၊ ပြီးတော့ ဒီအစွမ်းကို အမြဲတမ်းသုံးလို့မရဘူးမလား”
လက်ရှိရှန်းမိသားစု၏ အကြီးအကဲဖြစ်သူ ရှန်းတောက်မင်၏ညီမရင်းဖြစ်သူ ရှန်းရူယန်အနေနှင့် ကျန်းချန်ရွှမ်၏ မွေးရာပါအစွမ်းကဲ့သို့သော စွမ်းရည်များအကြောင်းကို ကြားဖူးနားဝရှိထားပုံရသည်။
“ဟုတ်တယ်၊ တစ်ခါသုံးပြီးရင် နောက်တစ်ကြိမ်သုံးဖို့ တစ်ရက်၊ နှစ်ရက်စောင့်ရတယ်၊ မဟုတ်ရင် မျက်လုံးဒဏ်ဖြစ်တယ်ခင်ဗျ”
“ကောင်းပြီလေ ဒါဆိုကျွန်မအစ်ကိုကို နှစ်ရက်အတွင်း သွားတွေ့လိုက်မယ်၊ နတ်ဆိုးကျင့်ကြံသူတွေကို ကိုင်တွယ်ပြီးရင် ထပ်စုံစမ်းရမဲ့ကိစ္စတွေရှိသေးတယ်၊ ဒါတွေပြီးရင် ကျွန်မအစ်ကိုကို အမိန့်ထုတ်ခိုင်းလိုက်ပါ့မယ်၊ မစိုးရိမ်ပါနဲ့”
ရှန်းရူယန်သည် ကိစ္စအားလုံးကို အကျိုးအကြောင်းသင့်စွာ ကိုင်တွယ်တတ်သည်ဟု ဆိုရပေမည်။ နှစ်ရက်ကြာပြီးနောက် သူတို့နှစ်ဦးမှာ ရှန်းတောက်မင်ရှိနေသည့် ရှာဖွေရေးဧရိယာသို့ ရောက်ရှိလာတော့သည်။ ရှန်းတောက်မင်သည် သူတို့နှစ်ယောက်အားမြင်လျှင် အံ့အားသင့်စွာဖြင့်
“အကြီးအကဲကျန်းနဲ့ ရူယန် မင်းတို့နှစ်ယောက် ဘယ်လိုလုပ်ပြီး ရောက်လာတာလဲ၊ ဒါတွေက….”
သူ့စကားမဆုံးခင်ပင် ရှန်းရူယန်က သိုလှောင်အိတ်များကို လှမ်းပေးလိုက်သည်။ ထိုအခါ ရှန်းတောက်မင်၏မျက်လုံးများမှာ အံ့အားသင့်မှုကြောင့် ပြူးကျယ်သွားတော့သည်။
***
နှစ်တစ်ရာကျင့်ကြံပြီးနောက်
အခန်း ၄၄ ။ ဆုခွဲဝေခြင်း
“မင်းတို့ဘက်ခြမ်းက နတ်ဆိုးကျင့်ကြံသူတွေကို အကုန်ရှင်းလိုက်ပြီလား”
ရှန်းတောက်မင် အနည်းငယ်အံ့သြသွားသည်။ ရှန်းရူယန်ပစ်ပေးလိုက်သော သိုလှောင်အိတ်များမှာ ဝူစန်းနျန်အသုံးပြုသော အိတ်များဖြစ်ကြောင်း သူသိလိုက်သည်လေ။ ရှန်းရူယန်က ပြုံးရယ်လျက်
“ဟုတ်ပါ့ရှင်၊ဒါတွေအားလုံးက အကြီးအကဲကျန်းရဲ့ ကျေးဇူးကြောင့်ပါ”
ရှန်းတောက်မင်က အကြီးအကဲကျန်းကို အံ့အားသင့်စွာ ကြည့်မိလိုက်သည်။ ထို့နောက် ရှန်းရူယန်က ကျန်းချန်ရွှမ်၏ မွေးရာပါမျက်လုံးအစွမ်းအကြောင်း ရှင်းပြလိုက်ရာ ရှန်းတောက်မင်မှာ တိုး၍ပင် အံ့သြသွားတော့သည်။ ထိုစွမ်းရည်မှာ နတ်ဆိုးကျင့်ကြံသူများ၏ တည်နေရာကို ရှာဖွေရာ၌ အသုံးဝင်လှသည်။ ထို့နောက် ရှန်းရူယန်က
“အကြီးအကဲကျန်းမှာ ဒီစွမ်းရည်ရှိနေကြောင်း လူတွေသိသွားရင် အကျိုးမရှိလို့ ဒီကိစ္စကို လောလောဆယ်ဖုံးကွယ်ထားမှဖြစ်မယ်”
ရှန်းတောက်မင်ကလည်း ရှန်းမိသားစုကို အုပ်ချုပ်စီမံနေသော ခေါင်းဆောင်ပီပီ ဆိုလိုရင်းကို နားလည်လိုက်သည်!
“ဒါပေါ့ ဒီကိစ္စကို ဖုံးကွယ်ထားမှ တို့အားလုံးအတွက် အကျိုးရှိမှာပေါ့”
ထို့နောက် ရှန်းတောက်မင်က ကျန်းချန်ရွှမ်ကို စိုက်ကြည့်လျက်
“အကြီးအကဲကျန်း မစိုးရိမ်ပါနဲ့ ကျုပ်အကုန်စီစဉ်လိုက်မယ်”
“ဒါဖြင့် မိသားစုခေါင်းဆောင်ကို ဒုက္ခပေးရတော့မှာပဲ”
ကျန်းချန်ရွှမ်က ပြုံးလျက်ခေါင်းညိတ်ပြလိုက်သည်။
ထို့နောက်တွင် ကျန်းချန်ရွှမ်သည် ရှန်းတောက်မင်၊ ရှန်းရူယန်တို့နှင့် ပူးပေါင်းလျက် နတ်ဆိုးကျင့်ကြံသူများ ပုန်းခိုကျက်စားနေသောနေရာများကို ပိုက်စိပ်တိုက်ရှာဖွေပါတော့သည်။ အခြေခံတည်ဆောက်မှုအဆင့်နှင့် ချီသန့်စင်ခြင်းအဆင့် နတ်ဆိုးကျင့်ကြံသူ အတော်များများမှာ ရှန်းတောက်မင်လက်ချက်နှင့် သေဆုံးကုန်ကြသည်။ ဆယ်ရက်ခန့်ကြာပြီးနောက် ရှန်းမျိုးနွယ်စုပိုင်ဆိုင်သော ဧရိယာများတွင် ခိုအောင်းနေကြသော နတ်ဆိုးကျင့်ကြံသူအားလုံးကို အပြီးတိုင်ရှင်းလင်းပစ်နိုင်လိုက်သည်။
များမကြာမီ သူတို့အားလုံး ယွီဟွာတောင်ထိပ်ရှိ ဗဟိုခန်းမထဲတွင် စုဝေးမိကြသည်။ နတ်ဆိုးကျင့်ကြံသူများထံမှ သိမ်းဆည်းရရှိခဲ့သော သိုလှောင်အိတ်များမှာ ၂၀ ခန့်ရှိသည်။ ရှန်းတောက်မင်သည် ခန်းမထဲရှိ စားပွဲဝိုင်းထိပ်ဆုံးတွင် ထိုင်လျက် အားရကျေနပ်စွာပြုံးရင်း
“အားလုံးပဲ၊ ဒီတစ်ခေါက်စစ်ဆင်ရေးမှာ စီရင်စုထဲက နတ်ဆိုးကျင့်ကြံသူအားလုံးနီးပါးကို သုတ်သင်နိုင်ခဲ့တယ်၊ ဒီစင်ဆင်ရေး အောင်မြင်ချောမောစွာ ပြီးသွားတာ ဒီက အကြီးအကဲကျန်းရဲ့ ဆောင်ရွက်မှုတွေ အများကြီးပါတယ်၊ အားလုံးလက်ခံကြတယ်မလား”
လူအားလုံးမှာ ရှန်းတောက်မင်၏စကားကို ကန့်ကွက်ခြင်းမရှိ သဘောတူလိုက်ကြသည်။ အမှန်တကယ်လည်း ကျန်းချန်ရွှမ်၏အကူအညီ မပါလျှင် ဉာဏ်များလွန်းတ နတ်ဆိုးကျင့်ကြံသူများကို ရှာတွေ့နိုင်မည်မဟုတ်သလို သည်စစ်ဆင်ရေးအတွက် အချိန်၊ငွေကြေးနှင့် လူအင်အားကို အဆများစွာ ပိုမိုသုံးစွဲခဲ့ရမည်ဖြစ်သည်။ ထို့နောက် ရှန်းတောက်မင်က ဆက်လက်ပြီး
“အားလုံးသဘောတူကြရင် ရှန်းမျိုးနွယ်စုရဲ့ စည်းမျဉ်းအရ သိမ်းဆည်းရရှိခဲ့တဲ့ ပစ္စည်းအားလုံးရဲ့ ၄၀% ကို ကျန်းချန်ရွှမ်ကို ပေးအပ်မှာဖြစ်သလို ဒီပစ္စည်းတွေကိုလည်း သူကအရင်ဆုံး ရွေးချယ်ခွင့်ရမှာဖြစ်တယ်၊ သဘောတူကြလား”
ရှန်းရူယန်က အရင်ဆုံးထောက်ခံလိုက်သည်။
“ကျွန်မသဘောတူတယ်”
ရှုန်းဝမ်တောက်ကလည်း မဆိုင်းမတွ ခေါင်းညိတ်ပြလိုက်သည်။
“ကျုပ်လည်းတူတယ်”
ရွှီချန်းဟယ်နှင့် ရွှီချန်းနျန်တို့မှာ တစ်ယောက်မျက်နှာ တစ်ယောက်ကြည့်ပြီးနောက်
“ကျုပ်တို့လည်း သဘောတူတယ်”
ထို့နောက် ရှန်းတောက်မင်က ကျန်းချန်ရွှမ်ကို ပြုံးရင်းဖိတ်ခေါ်လိုက်တော့သည်။
“ဒါဖြင့် အကြီးအကဲကျန်း ကြွပါ”
ကျန်းချန်ရွှမ်လည်း အားမနာတော့ဘဲ ရှေ့ထွက်၍ သိုလှောင်အိတ်များကို စေ့စပ်စွာ ကြည့်ရှုလေ့လာပါတော့သည်။ အိတ်များအတွင်းရှိ ပစ္စည်းများတွင် အရည်အသွေးနိမ့်သည့်အရာများ မပါဝင်သလောက်ဖြစ်ပြီး ဝိညာဉ်ကျောက်တုံး အရေအတွက်တင် ၁၈၀၀၀ ခန့်ရှိသည်။ ထိုအထဲမှ သူ့အတွက် ခွဲတမ်းအဖြစ် ၇၂၀၀ ရရှိမည်ဖြစ်သည်။
ထိုအရေအတွက်မှာ အခြေခံတည်ဆောက်မှုအဆင့်ကျင့်ကြံသူ တစ်ဦးအတွက် မနည်းလှသည့် ပမာဏဖြစ်သည်။ ထို့ပြင် အိတ်များထဲတွင် အဖိုးတန်ပစ္စည်းများဖြစ်သည့် ဆေးပြားများ၊ ဓမ္မလက်နက်ပစ္စည်းများအပြင် မိစ္ဆာကျင့်ကြံသူများ အသုံးပြုသည့် အစီအရင်ပစ္စည်းများလည်းပါဝင်သည်။ သို့သော် ထိုပစ္စည်းများကို ရှန်းမိသားစုက လက်ဖျားဖြင့်ပင် ထိမည်မဟုတ်ဘဲ ချက်ချင်းဖျက်ဆီးပစ်မည်ဖြစ်သည်။ ကျန်းချန်ရွှမ်သည် အိတ်များကို စိတ်ကြိုက်လှန်လှောရှာဖွေပြီးနောက် ပစ္စည်းတစ်ပုံတပင်ကို သယ်ယူလိုက်သည်။ ထိုပစ္စည်းအများစုကို အဆောင်လက်နက်များ ဖန်တီးပြုလုပ်ရာတွင် အသုံးပြုမည်ဖြစ်သည်။ ထိုပစ္စည်းများထဲတွင် ရွှေဝါရောင်ကျောက်စိမ်းနှင့် ကောင်းကင်ဝိညာဉ် နှင်းစက် သုံးပုလင်းကို တွေ့လိုက်ရ၍ ကျန်းချန်ရွှမ် အံ့သြမိသွားသည်။ ထိုပစ္စည်းများကို အချိန်များစွာ သုံးစွဲရှာဖွေခဲ့သော်လည်း လောက်လောက်လားလား မရရှိခဲ့၊ ယခုတော့ ပမာဏအတော်များများကို ရေကန်အသင့်ကြာအသင့် တွေ့လိုက်ရပြီဖြစ်သည်။
ထို့နောက် ကျန်းချန်ရွှမ်သည် နောက်ဆုံးပိတ် အိတ်နှင့်လွယ်သည့် အနေနှင့် ဖုံးကွယ်အစီအရင်ပြားတစ်ခုကို သိမ်းဆည်းလိုက်တော့သည်။ ကျန်ပစ္စည်းများကို ရှန်းတောက်မင်က ခန်းမထဲရှိ လူအားလုံးကို အညီအမျှခွဲဝေပေးလိုက်သည်။ ထို့နောက်တွင် ရှန်းတောက်မင်က မှာကြားစရာရှိသည်များကို ပြောဆိုမှာကြားပြီးနောက် သူတို့အားလုံးခန်းမထဲမှ ထွက်ခွာလာခဲ့ကြသည်။
“အကြီးအကဲကျန်း ရှင်နေတဲ့ဂူကို တန်းပြန်တော့မှာလား”
တောင်ထိပ်မှဆင်းလာလာချင်း ရှန်းရူယန်၏အသံကို ကြားလိုက်ရသည်။
သူကပြုံးရင်းခေါင်းယမ်းကာ
“လိုတဲ့ပစ္စည်းတွေကို အရင်လဲလိုက်ဦးမယ်၊ ခင်ဗျားရော အကြီးအကဲရှန်း”
ဤတစ်ခေါက်စစ်ဆင်ရေးတွင် နတ်ဆိုးကျင့်ကြံသူများကို ခြေရာခံပြီး ကူညီသတ်ဖြတ်ပေးနိုင်ခဲ့သည့်အတွက် ကျန်းချန်ရွှမ်အတွက် ရှန်းမိသားစုထံမှ ထောက်ပံ့မှုအမှတ်အတော်များများ ရရှိလိုက်သည့်အတွက် ထိုအမှတ်များကို ကျင့်ကြံမှုခရီးအတွက် လိုအပ်သည့် ဆေးဝါး၊ရတနာများနှင့် ဖလှယ်နိုင်မည်ဖြစ်သလို ဝိညာဉ်ကျောက်တုံးအရေအတွက် ၁၂၀၀၀ ခန့်ရရှိလိုက်ပြီဖြစ်၍ လာမည့် နတ်ဆိုးသားရဲအဓိကရုဏ်း အရေးအတွက် လုံလောက်စွာ ကြိုတင်ပြင်ဆင်နိုင်မည်ဖြစ်သည်။
သူရရှိထားသော အရင်းအမြစ်များကို ကျင့်ကြံမှုအဆင့်တိုးတက်ရေးအတွက် အသုံးပြုခြင်းမရှိခဲ့လျှင် လာမည့်သားရဲကပ်ဘေးတွင် အခက်တွေ့မည်ဖြစ်သည်။ ရှန်းရူယန်က ကျန်းချန်ရွှမ်၏စကားကိုကြားလျှင် လှပစွာပြုံးလိုက်ပြီး
“ တိုက်တိုက်ဆိုင်ဆိုင်ပဲ ကျွန်မလည်း ပစ္စည်းလဲမလို့၊ အတူသွားကြရအောင်လား”
“ကောင်းပြီလေ”
မကြာခင် နှစ်ဦးသားမှာ ရှန်းမျိုးနွယ်စု ကျမ်းစာခန်းမနှင့် ရတနာတိုက်သို့ ထွက်ခွာလာကြတော့သည်။ စူထရာသိုလှောင်ခန်းမတွင် ကျန်းချန်ရွှမ်က သူ၏ရမှတ်များကို အဆင့်၂ အလယ်အလတ်အဆင့် မန္တန်နှစ်ခုနှင့် လဲလှယ်လိုက်သည်။ ထိုမန္တန်နှစ်ခုအနက် တစ်ခုမှာ ပင်လယ်ပြာလောင်မီး မန္တန်ဖြစ်ပြီး မီးဓာတ်အခြေခံသော ဧရိယာအလိုက်အသုံးပြုသည့် မန္တန်ဖြစ်သည်။ ကျန်တစ်ခုမှာ မြေဓာတ်အခြေခံ လိပ်ခွံဝိညာဉ်ဒိုင်းဖြစ်သည်။ ထိုမန္တန်နှစ်ခုလုံးမှာ အခြေခံဓာတ်ငါးပါးတွင် ပါဝင်သောကြောင့် ကျန်းချန်ရွှမ်တစ်ယောက် အောင်မြင်စွာကျင့်ကြံအသုံးပြုနိုင်လျှင် သာမန်ထက် တစ်ဆမှနှစ်ဆအထိ ပိုမိုအစွမ်းထက်လာနိုင်သည့် မန္တန်များဖြစ်သည်။ ထို့နောက် ရှန်းရူယန်နှင့်အတူ ရတနာတိုက်သို့ သွားရောက်ပြီး အဆင့်၂ အလယ်အဆင့် ဓမ္မလက်နက်ပစ္စည်းတစ်ခုကို လဲလှယ်လိုက်သည်။
***
နှစ်တစ်ရာကျင့်ကြံပြီးနောက်
အခန်း ၄၅ ။ အခြေခံတည်ဆောက်မှု တတိယအဆင့်
လက်နက်အမည်မှာ သစ်သားစိမ်းကောင်းကင်အလင်းဒိုင်းဖြစ်ပြီး အဆင့် ၂ ရတနာပစ္စည်းများဖြစ်သည့် သစ်သားချပ်ဝတ်သလင်းကျောက်နှင့် စစ်မှန်သော သစ်သားကျောက်စိမ်းတို့ဖြင့် စီရင်ဖန်တီးထားခြင်းဖြစ်ကာ အကာအကွယ် မှော်အက္ခရာများ ထွင်းထုထားသည်။ အတိုက်ခိုက်ခံရပါက ဒိုင်းသည် အစိမ်းရောင်အလင်းများ အလိုအလျောက်ထုတ်လွှတ်မည်ဖြစ်ပြီး ထောင့်တစ်ခု သို့မဟုတ် ထောင့်ပေါင်းစုံမှ တိုက်ခိုက်မှုများကိုကာကွယ်ပေးမည်ဖြစ်သည်။ သို့သော် ထောင့်အားလုံးမှ တိုက်ခိုက်မှုများကို တစ်ပြိုင်နက်တည်း ကာကွယ်ရပါက ဒိုင်း၏ခံနိုင်ရည်မှာ အနည်းငယ်လျော့ကျမည်ဖြစ်သည်။ သို့သော်လည်း အဆိုပါဒိုင်းလက်နက်မှာ ရှားပါးအဖိုးတန်သော ကာကွယ်ရေးအစီအရင်တစ်ခုဖြစ်ပြီး ကျန်းချန်ရွှမ်၏ နဂိုမူလ ကျီကျင်းဝိဉာဉ်ဒိုင်းထက် အဆများစွာ အစွမ်းထက်ပါသည်။
ထို့နောက် ကျန်းချန်ရွှမ်သည် အဆင့်၂ ဓမ္မလက်နက်ဖြစ်သည့် အရိပ်ခွဲဓားကို ဝိညာဉ်ကျောက်တုံး ၃၅၀၀ ဖြင့်ဝယ်ယူလိုက်သည်။ သည်လက်နက်၏ အဓိကအားသာချက်မှာ အလစ်ဖမ်းတိုက်ခိုက်မှုမျိုးတွင် လွန်စွာအသုံးဝင်ခြင်းဖြစ်သည်။ အကာအကွယ်မန္တန်များကို ထိုးဖောက်ရာတွင် အားကောင်းသည့်အပြင် လျင်မြန်တိတ်ဆိတ်သော လုပ်ကြံရေးလက်နက်တစ်ခုလည်းဖြစ်သည်။ ရန်သူအနေနှင့် ဤရတနာလက်နက်ကို ခြေရာခံထောက်လှန်းရန် ခက်ခဲမည်ဖြစ်သည်။ နောက်ဆုံးတွင် ကျန်းချန်ရွှမ်သည် အဆောင်ပစ္စည်းများ ဖန်တီးပြုလုပ်ရာတွင် အသုံးပြုသည့် ကုန်ကြမ်းပစ္စည်းအမြောက်အများဝယ်ယူလိုက်သည်။
မိစ္ဆာကျင့်ကြံသူများထံမှ ရရှိခဲ့သော ကုန်ကြမ်းပစ္စည်းများနှင့်ပေါင်းလျှင် အဆင့်၂ အနိမ့်စား အဆောင်လက်နက်များ အရေအတွက် တစ်ရာခန့်ဖန်တီးနိုင်မည်ဖြစ်သည်။ အဆိုပါအဆောင်ပစ္စည်းများသည် ကျန်းချန်ရွှမ်အနေနှင့် ရန်သူအား ကျင့်ကြံမှုအဆင့် သက်သက်နှင့် အနိုင်ယူနိုင်စွမ်းမရှိလျှင် အသုံးဝင်သည့် လက်နက်များဖြစ်လာပါလိမ့်မည်။ လိုအပ်သည်များကို ဝယ်ယူပြီးနောက် ကျန်းချန်ရွှမ်သည် အချိန်မဖြုန်းတော့ဘဲ ရှန်းရူယန်ကို နှုတ်ဆက်ကာ နေထိုင်ရာဂူသို့ပြန်လာခဲ့တော့သည်။
ဂူဝသို့ရောက်လျှင် အဆင့် ၂ ဖုံးကွယ်အစီအရင်ပြားကို သန့်စင်ပြီးနောက် ဂူတံခါးအထက်တွင် ထားရှိလိုက်သည်။ ထို့နောက် ကျန်းချန်ရွှမ်သည် ရှေ့ဆက်ရမည့် လုပ်ငန်းစဉ်ကို ချမှတ်ရန်ပြင်ဆင်ပါတော့သည်။ ရှန်းမန်ရွှယ်ပေးခဲ့သော မြေစွမ်းအင်အဆီအနှစ်ဆေးလုံးများ အကူအညီနှင့် အခြေခံတည်ဆောက်မှုတတိယအဆင့်ကို တက်လှမ်းရန်မခက်ခဲတော့ပါ။ အဓိကပြဿနာမှာ နတ်ဆိုးသားရဲအဓိကရုဏ်း မစတင်မီ အခြေခံတည်ဆောက်မှု အလယ်အဆင့်ဟု ခေါ်ကြသည့် စတုတ္ထအဆင့်ကို တက်လှမ်းနိုင်ရန်ဖြစ်သည်။ ဒုတိယတစ်ဆင့်က သူဝယ်ယူထားသော ဓမ္မလက်နက်များကို သန့်စင်ရန်ဖြစ်သည်။ အရေးကြီးဆုံးပစ္စည်းမှာ ရှန်းမျိုးနွယ်စု၏ ဘိုးဘေး ရှန်းယွမ်လုံချီးမြှင့်ခဲ့သည့် အဆင့်၂ အမြင့်ဆုံးအဆင့်ရှိ ဓားပျံလက်နက်ဖြစ်သည်။ ဗလာနယ်နဂါးဓားဟုခေါ်တွင်ပြီး သတ္တုဖြင့်ဖန်တီးထားခြင်းဖြစ်သည်။ ဓားသွားပေါ်တွင် နဂါးတစ်ကောင်ပုံစံထွင်းထုထားပြီး လက်နက်၏ အဓိကထူးခြားချက်မှာ အမြန်နှုန်းနှင့် ထက်မြက်မှုဖြစ်သည်။ ထိတွေ့နိုင်သော အရာများနှင့် မထိတွေ့နိုင်သော အရာများအားလုံးကို တစ်ခဏချင်း ဖြတ်တောက်နိုင်စွမ်းရှိသည့်အတွက် ကျန်းချန်ရွှမ်၏နောက်ဆုံး ပွဲသိမ်းလက်နက် ဖြစ်လာမည်ဖြစ်သည်။
ထို့နောက်တွင် သစ်သားစိမ်း ကောင်းကင်အလင်းဓားနှင့် အရိပ်ခွဲဓားတို့မှာ ဒုတိယနှင့်တတိယ အကောင်းဆုံးလက်နက်များ အဖြစ် အသုံးတော်ခံမည်ဖြစ်သည်။ ပထမတစ်ခုမှာ အကာအကွယ်လက်နက်ဖြစ်ပြီး ကျန်းချန်ရွှမ်အတွက် အလွန်အသုံးဝင်နိုင်သလို ဒုတိယတစ်ခုမှာ သေရေးရှင်ရေးအချိန်များတွင် အသုံးချနိုင်မည်ဖြစ်သည်။
ထိုလက်နက်သုံးခုအပြင် ရှန်းမိသားစု၏ စူထရာသိုလှောင်ခန်းမမှ ဝယ်ယူလဲလှယ်ခဲ့သော အဆင့်၂ မန္တန်များကိုလည်း ကျင့်ကြံရန် လိုအပ်မည်ဖြစ်သည်။ ပထမတစ်ခုမှာ ပင်လယ်ပြာလောင် မီးမန္တန်ဖြစ်ပြီး ဒုတိယတစ်ခုမှာ လိပ်ခွံမြေဝိညာဉ်ဒိုင်း ဖြစ်သည်။ မန္တန်နှစ်ခုလုံးမှာ သူ၏အခြေခံစွမ်းအားကို တိုးမြင့်စေမည်ဖြစ်သည်။
နောက်ဆုံးအနေဖြင့် အဆင့်၂ အဆောင်ပစ္စည်းနှစ်ခုကို ဖန်တီးဖို့လိုအပ်မည်ဖြစ်သည်။ ပထမတစ်ခုက စနစ်မှချီးမြှင့်လိုက်သော ရွှေသံချပ်ကာရုပ်သေးအဆောင် ဖြစ်သည်။ ရွှေဝါရောင်ကျောက်စိမ်း သုံးခုနှင့် ကောင်းကင်ဝိဉာဉ်နှင်းရေစက် လေးပုလင်းရှိထားသည်ဖြစ်၍ အဆောင်သုံးခုထိ စီရင်နိုင်မည်ဖြစ်သည်။ အဆိုပါ အဆောင်များသည် အခြေခံတည်ဆောက်မှုအဆင့် ကျင့်ကြံသူတစ်ဦးနှင့် ညီမျှသော ရုပ်သေးစစ်သည်များကို ဆင့်ခေါ်နိုင်မည်ဖြစ်ပြီး ကြာချိန်မှာ ၁၀ မိနစ်သာရှိသော်လည်း မှန်ကန်စွာ အသုံးပြုနိုင်လျှင် ကျန်းချန်ရွှမ်၏ အကောင်းဆုံး ပွဲသိမ်းလက်နက်ဖြစ်လာနိုင်၏။
ရန်သူမှာ ကြိုတင်ပြင်ဆင်ထားခြင်းမရှိလျှင် အခြေခံတည်ဆောက်မှုအဆင့် အလယ်အလတ် ကျင့်ကြံသူတစ်ဦးကိုပင် သေဆုံးသည်အထိ ဒုက္ခပေးနိုင်မည်ဖြစ်သည်။ ရွှေသံချပ်ကာရုပ်သေးအဆောင်အပြင် အခြားသော အဆင့်၂ အဆောင်ပစ္စည်းများကိုလည်း ဖန်တီးရန် စီစဉ်ထားသည်။ ထိုအဆောင်များအနက် အသုံးဝင်ဆုံးမှာ အချုပ်အနှောင် အဆောင်ပစ္စည်းဖြစ်ပြီး ရန်သူကို မလှုပ်ရှားနိုင်အောင် ကန့်သတ်ချုပ်နှောင်နိုင်မည်ဖြစ်သည်။ ချိန်သားကိုက် အသုံးပြုနိုင်ပါက ရန်သူကို အလစ်အငိုက်ဖမ်းနိုင်မည်ဖြစ်သည်။
သို့သော် အဆိုပါအဆောင်ပစ္စည်းများကို စီရင်ရန် ကျန်းချန်ရွှမ်အနေနှင့် အစီအရင်ကျင့်ကြံမှုအဆင့်ကို အဆင့် ၂ အလယ်အဆင့်ထိ တက်ထားရန်လိုပေမည်။ အနှစ်ချုပ်လျှင် ကျန်းချန်ရွှမ်အနေနှင့် အဆိုပါအစီအစဉ်အားလုံးကို ပြီးမြောက်ရန် ရှစ်နှစ်မှ ဆယ်နှစ်အထိ အချိန်ယူရမည်ဖြစ်သည်။
ထိုအချိန်တွင် ရှန်းတောက်မင်သည် ဘိုးဘေးရှန်းယွမ်လုံ၏ ဆင့်ခေါ်မှုကြောင့် ယွီဟွာတောင်ထိပ်သို့ ရောက်ရှိလာသည်။ ရှန်းယွမ်လုံသည် ကျောက်ကုလားထိုင်တစ်ခုတွင် ထိုင်လျက်ရှိပြီး ရှန်းတောက်မင်ကို မြင်သောအခါ ခေါင်းညိတ်ပြလိုက်ပြီး စကားစသည်။
“ဖြစ်ခဲ့တာတွေအားလုံးကို ငါသိပြီးပြီဖြစ်လို့ တင်ပြစရာမလိုတော့ပါဘူး၊ မင်းကိုခေါ်လိုက်တာက မင်းညီမ ရှန်းရူယန်ကို ကျန်းချန်ရွှမ်နဲ့ စေ့စပ်ပေးမဲကိစ္စကို ဘယ်လိုမြင်လဲ မေးမလို့ပဲ”
ဘိုးဘေး၏ မမျှော်လင့်ထားသော စကားကြောင့် ရှန်းတောက်မင်တစ်ယောက် အထူးအံ့သြသွားသည်။
“ဘာဖြစ်လို့လဲ ပြဿနာရှိလား”
“ဘိုးဘေးရဲ့ဆုံးဖြတ်ချက်က မလောလွန်းဘူးလား”
ထိုသို့ပြောပြီးနောက် ရှန်းတောက်မင်မှာ ခေတ္တမျှတိတ်ဆိတ်သွားသည်။ ထို့နောက် ရှန်းတောက်မင်က ဆက်လက်၍
“မေးစရာလည်းရှိပါတယ်၊ ဘိုးဘေးနဲ့ ဘိုးဘေးမန်ရွှယ်တို့က ဒီလူငယ်ကို ဘာလို့တန်ဖိုးအရမ်းထားနေကြတာလဲ”
သို့သော် ရှန်းယွမ်လုံက ခေါင်းယမ်းလိုက်သည်။
“ဒါ ကောင်းကင်ဘုံလျှို့ဝှက်ချက်ပဲ၊ ဒီလျှို့ဝှက်ချက်ကို သိခွင့်ရဖို့ မင်းတို့ဘိုးဘေးမန်ရွှယ် သူ့သက်တမ်းကာလတစ်ခုကို အဆုံးခံခဲ့ရတယ်၊ မင်းကိုပြောပြလိုက်ရင် သူ့ကိုဒုက္ခပေးသလိုဖြစ်နေမယ်”
ထို့နောက် ရှန်းယွမ်လုံသည် ရှန်းတောက်မင်အား စူးစိုက်ကြည့်ရှုလိုက်ပြီး
“မင်းလည်း ကျန်းချန်ရွှမ်ကို နားလည်သင့်သလောက် နားလည်ထားပြီးထင်ပါတယ်၊ ဘာကြောင့်လဲဆိုတာ မင်းမမှန်းတတ်ဘူးလား”
ထိုစကားကြောင့် ရှန်းတောက်မင်၏ နှလုံးခုန်နှုန်း မြန်သွားသည်။ ဘိုးဘေးတို့နှစ်ဦးမှာ နောက်ပြောင်ခြင်းမရှိ၊ အတည်သာ ပြောဆိုတတ်သူများ ဖြစ်ကြသည်လေ။ ရှန်းတောက်မင်က အနည်းငယ်စဉ်းစားလိုက်ပြီးမှ
“ကျွန်တော့်အနေနဲ့ ကန့်ကွက်စရာမရှိပါဘူး၊ ဒါပေမဲ့ အကြီးအကဲကျန်းနဲ့ ရူယန်တို့ သဘောထားကိုလည်း မေးသင့်တယ်ထင်တယ်”
“ဒီအတွက်တော့ မစိုးရိမ်နဲ့”
ရှန်းယွမ်လုံက ကျေနပ်စွာပြုံးရင်း
“အဲဒီအချိန်ကျရင်သာ သူတို့နှစ်ယောက်ကို ငါ့ဆီခေါ်လာခဲ့”
……
အချိန်များမှာ မြန်ဆန်စွာကုန်လွန်သွားသည်။ မျက်စိတစ်မှိတ်အတွင်းမှာပင် သုံးနှစ်ကုန်လွန်သွားလေပြီ။ ကျန်းချန်ရွှမ်၏ဂူအတွင်း၌ ပြင်းထန်သိပ်သည်းသည့် အော်ရာတစ်ခု တိုးထွက်လာသည်။ မျက်လုံးမှိတ်လျက် ငြိမ်သက်စွာ ထိုင်နေသော ကျန်းချန်ရွှမ်သည် မျက်လုံးကို ဖွင့်လိုက်ပြီး ကျေနပ်စွာပြုံးလိုက်သည်။ အခြေခံတည်ဆောက်ခြင်း တတိယအဆင့်ကို တက်လှမ်းနိုင်ခဲ့ပြီဖြစ်သည်။ ရှန်းမန်ရွှယ်ပေးအပ်ခဲ့သော မြေစွမ်းအင်အဆီအနှစ်ဆေးလုံး အကူအညီဖြင့် သုံးနှစ်တာ မရပ်မနား ကျင့်ကြံမှုအပြီးတွင် အခြေခံတည်ဆောက်မှု တတိယအဆင့်ကို ရောက်ရှိနိုင်ခဲ့လေပြီ။
***