အခန်း (၅၁-၅၅)
Vol. 3 Ch. 51-55
နှစ်တစ်ရာကျင့်ကြံပြီးနောက်
အခန်း ၅၁ ။ လူရွေးပြီ
အတိတ်တွင် ရှန်းမျိုးနွယ်စုသည် နတ်ဆိုးသားရဲတို့၏ ပယောဂကြောင့် ရွှေအမြုတေအဆင့် မျိုးနွယ်စုဖြစ်လာနိုင်မည့် အခွင့်အရေးကို လက်လွှတ်ခဲ့ရသလို နောက်ပိုင်းတွင် မျိုးနွယ်စု၏ အရှိန်အဝါမှာ တဖြည်းဖြည်းကျဆင်းလာပြီး အခြေခံတည်ဆောက်မှုအဆင့် မိသားစုအဆင့်အထိ ကျဆင်းသွားခဲ့ရဖူးသည်။ ထို့ကြောင့် နတ်ဆိုးသားရဲသောင်းကျန်းမှု ကပ်ဘေးကို မုန်းတီးသူများစာရင်းတွင် ရှန်းမျိုးနွယ်စုဝင်များမှာ ထိပ်ဆုံးနားတွင် ရှိပါလိမ့်မည်။
ထို့အပြင် နောက်ထပ် ထည့်သွင်းစဉ်းစားရမည့် အချက်ရှိသေးသည်။ ထိုအချက်ကို မည်သူမှ လူသိရှင်ကြား ထုတ်ဖော်ဆွေးနွေးလိုဟန်မတူပါ။ ထိုအချက်မှာ နတ်ဆိုးသားရဲအဓိကရုဏ်းမှာ သတ်မှတ်ထားသည်ထက် များစွာစောပြီး ဖြစ်ပွားလာမည်ကို ထောက်ချင့်၍ ကျင့်ကြံမှုအဆင့်မြင့်သော လူသားကျင့်ကြံသူများနှင့် နတ်ဆိုးသားရဲတို့အကြား အခြေအနေမှာ ပိုမို၍ တင်းမာလာသည်ကို ပြနေခြင်းဖြစ်သည်။ သည်အချက်ကိုတော့ သူတို့လို အဆင့်နိမ့်ကျင့်ကြံသူများအနေနှင့် ဝင်ရောက်စွက်ဖက်နိုင်စွမ်းမရှိပါ။ လူအများအပြားမှာ သူတို့အနာဂတ်ကို မကောင်းမြင်စိတ်များ လွန်ကဲလာရသည့် အဓိကအကြောင်းရင်းမှာ ထိုအချက်ကြောင့်ဖြစ်သည်။
ထို့အပြင် အမှောင်ထဲတွင် လှုပ်ရှားနေသော နတ်ဆိုးကျင့်ကြံသူများအရေးလည်း ရှိနေသေးသည်ဖြစ်ရာ သာမန်ကျင့်ကြံသူများနှင့် သေမျိုးလူသားတို့မှာ အနှစ်သာရကိုးပါး အင်မော်တယ်ကျင့်ကြံမှုကမ္ဘာတွင် သူတို့အတွက် နေစရာမရှိတော့သလို ခံစားလာကြရသည်။ ဤသို့ဖြင့် အချို့သောကျင့်ကြံသူများသည် အမှောင်လောက၏ သွေးဆောင်မှုအောက်ဝယ် ဖြားယောင်းခံလိုက်ရပြီး မိစ္ဆာလမ်းစဉ်သို့ ကူးပြောင်းသွားကုန်ကြခြင်းဖြစ်သည်။
အားလုံးမှာ ရှန်းယွမ်လုံရှေ့ဆက်မည့် စကားကို စောင့်လင့်နေမိကြသည်။ ရှန်းယွမ်လုံသည်လည်း အားလုံး၏စိတ်ခံစားချက်ကို နားလည်လိုက်သည်ဖြစ်ရာ အချိန်မဆွဲတော့ဘဲ
“နတ်ဆိုးသားရဲကိစ္စကို ထိထိရောက်ရောက် ရင်ဆိုင်နိုင်ဖို့အတွက် တခြားပြဿနာတွေကို အရင်ရှင်းဖို့လိုတယ်။ ကွယ်လျှိုးနေတဲ့ အန္တရာယ်တွေကို အရင်ကိုင်တွယ်ရလိမ့်မယ်”
ခန်းမထဲရှိ လူအားလုံးမှာ ရုတ်တရက် ငြိမ်သက်တိတ်ဆိတ်သွားကြသည်။ ရှန်းယွမ်လုံဆိုလိုသည့် အကြောင်းအရာကို သူတို့အားလုံး အကြမ်းဖျင်းနားလည်ထားကြပြီးဖြစ်သည်။ အမှောင်ထဲတွင် ကျင်လည်ကျက်စားနေသော နတ်ဆိုးကျင့်ကြံသူများကိစ္စဖြစ်သည်။ ထိုစဉ် ဒဏ်ရာမှ သက်သာလာစဖြစ်သည့် ရှန်းရူရွှမ်က ထ၍
“ဘိုးဘေးရှင့်၊ ဒီကိစ္စကို ဘယ်လိုရှင်းမလဲ သိချင်ပါတယ်၊ မျိုးနွယ်စုနဲ့ ဂိုဏ်းတွေက သူတို့နယ်ကို သူတို့ သီးခြားရှင်းမှာလား၊ ဒါမှမဟုတ် ကန်းယန်ဂိုဏ်းရဲ့ စီစဉ်မှုအောက်မှာ သွားရမှာလား”
သူမပြောလိုက်သည့် နှစ်ချက်မှာ အတော်လေးကွဲပြားပါသည်။ အကယ်၍ အင်မော်တယ်မျိုးနွယ်စုအသီးသီးနှင့် ဂိုဏ်းအသီးသီးမှာ သူတို့ပိုင်ဆိုင်သော နယ်မြေအတွင်းရှိ နတ်ဆိုးကျင့်ကြံသူများကို ကိုယ်စီအစီအမံနှင့် ရှင်းလင်းသုတ်သင်မည်ဆိုလျှင် သူတို့ကိုယ်ပိုင်အစီအစဉ်များကို လွတ်လပ်စွာ ချမှတ်ဆောင်ရွက်နိုင်မှာဖြစ်သည်။ သို့သော် သူတို့၏အင်အားမှာ အကန့်အသတ်ရှိသောကြောင့် နတ်ဆိုးကျင့်ကြံသူအားလုံးကို အပြတ်ရှင်းလင်းရန် အခက်အခဲများရှိနိုင်သည်။
ကန်းယန်ဂိုဏ်း၏ ခေါင်းဆောင်မှုကို လက်ခံလိုက်မည်ဆိုပါက မိသားစုအားလုံးနှင့် ဂိုဏ်းအားလုံးတို့မှာ ကန်းယန်ဂိုဏ်း၏ လက်ဝေခံအင်အားစုများ ဖြစ်သွားကြမည်ဖြစ်သလို ကန်းယန်ဂိုဏ်း၏ အမိန့်ကို မလွဲမသွေနာခံရတော့မည်ဖြစ်သည်။
ထိုအခါ ကန်းယန်ဂိုဏ်း၏ သေစေရှင်စေအမိန့်ကို မဖြစ်မနေ လိုက်နာရတော့မည်ဖြစ်ပြီး လိုက်နာခြင်းမရှိလျှင် ကျင့်ကြံမှုလောကမှ ရာသက်ပန်ဖယ်ကြဉ်ခံရမည်ဖြစ်သည်။ ထို့ကြောင့်ပင် အကန့်အသတ်များရှိနေသော်လည်း မျိုးနွယ်စုအားလုံးမှာ နတ်ဆိုးကျင့်ကြံသူများကို ကိုယ့်အစီအစဉ်နှင့်ကိုယ်သာ ကိုင်တွယ်လိုနေကြခြင်းဖြစ်သည်။
သို့သော် ရှန်းယွမ်လုံ၏ အဖြေက အားလုံးကိုစိတ်ပျက်သွားစေသည်။ ရှန်းယွမ်လုံက ခေါင်းယမ်းလိုက်ပြီး တည်ငြိမ်စွာဖြင့်
“ငါတို့အားလုံး သီးခြားလှုပ်ရှားမဲ့ကိစ္စကို ကန်းယန်ဂိုဏ်းက ပယ်ချလိုက်တယ်။ အခြေခံတည်ဆောက်မှုအဆင့်နဲ့ အထက်မှာရှိတဲ့ အင်မော်တယ်မျိုးနွယ်စုတွေနဲ့ ဂိုဏ်းအားလုံးက လူအင်အားတွေကို တစ်ပတ်အတွင်း သူတို့ဂိုဏ်းကို စေလွှတ်ပေးဖို့ အမိန့်ထုတ်ပြန်ထားတယ်”
ရှန်းယွမ်လုံက ခေတ္တနားလိုက်ပြီး စကားပြန်ဆက်သည်။
“ကန်းယန်ဂိုဏ်းကို ငါနဲ့အတူလိုက်ပြီး မိစ္ဆာကျင့်ကြံသူတွေကို နှိမ်နင်းဖို့ စစ်ဆင်ရေးမှာ ပါဝင်မဲ့သူတွေကို ရွေးရမဲ့အချိန်ရောက်ပြီ၊ စည်းမျဉ်းအရ ငါတို့ရှန်းမိသားစုကနေ အနည်းဆုံးအခြေခံတည်ဆောက်မှုအဆင့် ကျင့်ကြံသူလေးဦးနဲ့ ချီသန့်စင်ခြင်းအဆင့်ကျင့်ကြံသူ ၂၀၀ ပို့ပေးရမယ်၊ ကဲ အားလုံးဘယ်လိုတွေးထားကြလဲ”
ရှန်းယွမ်လုံစကားဆုံးသည်နှင့် ရှန်းချန်နန်က ထရယ်လိုက်ပြီး
“ကျုပ်ပါမယ်၊ ဒီကောင်တွေကို မသတ်ရတာကြာပြီ၊ ဒီကောင်၊ ကောင်မတွေကို ကောင်းကောင်းဆုံးမပေးရမယ်”
“ကျွန်တော်လည်း မပါလို့ဘယ်ဖြစ်မလဲ၊ လိုက်မယ်ဗျာ”
ရှုန်းဝမ်တောက်ကလည်း ထအော်သည်။ ထိုစဉ် ရွှီချန်းဟယ်က ပြုံးရင်း
“တိုက်ပွဲမှာ ကျုပ်လို အစီအရင်ကွက် ဖန်တီးတဲ့ဆရာလည်း ကျိန်းသေလိုမှာပဲ၊ ကျုပ်လည်းလိုက်မယ် မချန်ထားနဲ့”
အစည်းအဝေးကို လူကိုယ်တိုင်မတက်ဘဲ အစီအရင်အသုံးပြု၍ ပုံရိပ်ထုတ်လွှင့်ကာ တက်ရောက်နေသော ရှန်းတောက်ဖုန်းနှင့် ရှန်းပိုင်ဖေးတို့ကလည်း အားကျမခံထပြောသည်။
“ဘိုးဘေး၊ ကျုပ်တို့လည်းပါမယ်၊ သေမျိုးလူသားတွေနေတဲ့ မြို့တော်မှာ ဒီကောင်တွေ ပြဿနာရှာသွားတဲ့ကိစ္စကို ခုထိမရှင်းရသေးဘူး”
စစ်ဆင်ရေးတွင် လိုလိုလားလား လိုက်ပါလိုသူများ၏ ခံစားချက်များကို ကြားပြီးနောက် ကျန်းချန်ရွှမ်၏ရင်ထဲတွင် နက်နက်နဲနဲခံစားလိုက်ရသည်။ ကန်းယန်ဂိုဏ်းသို့သွားပြီး နတ်ဆိုးကျင့်ကြံသူနှိမ်နင်းမည့် စစ်ဆင်ရေးသည် အန္တရာယ်များကြောင်း သူတို့မသိမဟုတ်၊ သိကြပါသည်။ ကျီဖုအဆင့် ကျင့်ကြံသူများအနေနှင့် အနာတရမရှိဘဲ လွတ်မြောက်နိုင်သော်လည်း အခြေခံတည်ဆောက်မှုအဆင့်နှင့် ချီသန့်စင်ခြင်းအဆင့်ကျင့်ကြံသူများမှာ သတိတစ်ချက်လွတ်သည်နှင့် အသက်ဆုံးသွားနိုင်ပါသည်။ အတိတ်တွင်လည်း ထိုသို့ဖြစ်ခဲ့သည့် ကြေကွဲဖွယ် သာဓကများရှိပါသည်။
ထိုအကြောင်းကို သိသိလျက်နှင့်ပင် ရှန်းချန်းနန်တို့လူစုမှာ ကြောက်ရွံ့သွားခြင်းမရှိပါ။ အထူးသဖြင့် ပြင်ပအကြီးအကဲများသာဖြစ်သည့် ရှုန်းဝမ်တောက်နှင့်ရွှီချန်းဟယ်တို့ ကိုယ်တိုင်ကပင် လိုလိုလားလား ဆန္ဒပြုနေခြင်းကို ကျန်းချန်ရွှမ်တစ်ယောက် နားမလည်နိုင်ပါ။ ဒဏ်ရာမှ သက်သာလာစ ရှန်းရူရွှမ်မှာလည်း အားကျမခံ ဆန္ဒပြုမည်အလုပ်တွင် ရှန်းယွမ်လုံက
“အားလုံးလိုက်ချင်တယ်ဆိုတော့ ငါကပဲဆုံးဖြတ်ပေးလိုက်ပါမယ်”
ထို့နောက် ရှန်းယွမ်လုံက လူအားလုံးကို အကဲခတ်လိုက်ပြီး
“ပထမဆုံး အဆင့်၂ အစီအရင်အကွက် ဖန်တီးရှင်၊ အဆင့်၂ အဆောင်ပစ္စည်းစီရင်သူ နဲ့ အဆင့်၂ အဂ္ဂိရတ်ပညာရှင်တွေဖြစ်တဲ့ အကြီးအကဲရွှီ၊ ကျန်းချန်ရွှမ်နဲ့ ရှန်းရူရွှမ် မင်းတို့သုံးယောက်နေခဲ့ရမယ်၊ ရှန်းရူယန် မင်းလည်းနေခဲ့၊ ရှန်းတောက်မင်၊ မင်းကလည်း လက်ရှိမျိုးနွယ်စုအကြီးအကဲဖြစ်တဲ့အတွက် မင်းလည်းနေခဲ့ရမယ်၊ ဒီမှာပဲနေပြီး မိသားစုကို စီမံခန့်ခွဲပါ။ ချန်းနန်၊ တောက်ဖုန်း၊ ပိုင်ဖေးနဲ့ အကြီးအကဲရှုန်းတို့ အသင့်ပြင်ထားကြပါ၊ မင်းတို့လေးယောက်လုံး သုံးရက်အတွင်း ငါနဲ့အတူ ကန်းယန်ဂိုဏ်းကို လိုက်ရမယ်။ ကျန်တဲ့ ချီသန့်စင်ခြင်းအဆင့် တပည့် ၂၀၀ အတွက်တော့ မင်းတို့ပဲ သင့်တော်သလို ရွေးလိုက်ပါ၊ ပြီးတော့…”
ထိုအချိန်တွင် ရှန်းယွမ်လုံ၏မျက်နှာသည် တည်ကြည်လေးနက်သွားသည်။
“နေခဲ့မဲ့လူတွေက ရေသာခိုနေလို့မရဘူး။ လာမဲ့နတ်ဆိုးသားရဲအဓိကရုဏ်းမှာ မင်းတို့က အဓိကတိုက်ပွဲဝင်ရမဲ့အုပ်စုပဲ၊ မင်းတို့ရဲ့တာဝန်က ပိုကြီးတဲ့အတွက် ဒီအတောအတွင်း ကောင်းကောင်းကျင့်ကြံထားပြီး စွမ်းအားအဆင့်ကို မြှင့်နိုင်သမျှ မြှင့်တင်ထားပါ”
စကားဆုံးသည်နှင့် အကြီးအကဲများ၏ တင်ပြချက်ကို နားမထောင်တော့ဘဲ ရှန်းယွမ်လုံ၏ ပုံရိပ်မှာ အစည်းအဝေးခန်းမထဲမှ ပျောက်ကွယ်သွားတော့သည်။
…
နှစ်ရက်ကြာပြီးနောက်…..
ရှန်းတောက်မင်သည် ကျန်းချန်ရွှမ်တို့နှစ်ဦး၏ ဂူသို့ရောက်ချလာပြီး
“ချန်ရွှမ်နဲ့ ရူယန်၊ တောက်ဖုန်းနဲ့ ဦးလေးပိုင်ဖေးတို့ မနက်ဖြန် ကန်းယန်ဂိုဏ်းကိုသွားရမယ်၊ လတ်တလောမှာ သူတို့နှစ်ယောက်က ဝိညာဉ်သွေးကြောနဲ့ အဆင့်၂ စျေးကို စောင့်ကြပ်နေတာ။ သူတို့ခရီးထွက်နေတုန်း သူတို့နေရာကို တစ်ယောက်ယောက်က အစားဝင်ပေးဖို့လိုတယ်။ ဝိညာဉ်သွေးကြောကို စောင့်ကြပ်ဖို့ အကြီးအကဲရွှီကို တာဝန်ပေးပြီးပြီ၊ ကျန်တဲ့ အဆင့်၂ စျေးက ရှန်းမိသားစုရဲ့ လုပ်ငန်းတွေအတွက် အရေးကြီးတဲ့နေရာပဲ၊ အဲဒီနေရာမှာ မလိုလားအပ်တာတွေမဖြစ်အောင် မင်းတို့နှစ်ယောက် သွားပြီးစောင့်ကြပ်ပေးစေချင်တယ်။ ဘယ်လိုသဘောရလဲ”
ရှန်းတောက်မင်၏ စကားကိုကြားပြီးနောက် ကျန်းချန်ရွှမ်နှင့် ရှန်းရူယန်တို့မှာ တစ်ဦးမျက်နှာ တစ်ဦးကြည့်လိုက်မိကြပြီး သဘောတူလိုက်ကြသည်။
“ကန့်ကွက်စရာမရှိပါဘူး”
“ဒါဖြင့် အချိန်မဖြုန်းဘဲ အမြန်ဆုံးသွားဖို့ ပြင်ပေတော့။ သြော် နောက်ပြီး အဲဒီစျေးမှာ ၁၅နှစ်တစ်ခါ ကျင်းပတဲ့ ရတနာပစ္စည်းဖလှယ်ပွဲက မကြာခင် ကျင်းပဖို့ရှိတယ်၊ ဒီပြပွဲကိုလည်း မင်းတို့ပဲ အိမ်ရှင်အဖြစ် တာဝန်ယူကျင်းပပေးလိုက်ပါ။ ဖလှယ်ပွဲဖွင့်လှစ်ဖို့ မိသားစုရတနာတိုက်က ရတနာပစ္စည်းသုံးခုကိုပါ တစ်ခါတည်းယူသွားပါ”
***
နှစ်တစ်ရာကျင့်ကြံပြီးနောက်
အခန်း ၅၂ ။ ရတနာဖလှယ်ပွဲကျင်းပခြင်း
မိုးမခပင်ထောင်ချီစျေးပြီးလျှင် ကျောက်စိမ်းဖြူစျေးသည် ရှန်းမျိုးနွယ်စု၏ ဒုတိယအကြီးဆုံးစျေးဖြစ်သည်။ သို့သော် မိုးခပင်ထောင်ချီစျေး ပျက်စီးပြီးနောက် ရှန်းမိသားစု၏ ပိုင်ဆိုင်မှုအတော်များများကို ကျောက်စိမ်းဖြူစျေးသို့ ပြောင်းရွှေ့ခဲ့သည်ဖြစ်၍ လတ်တလောတွင် ကျောက်စိမ်းဖြူစျေးသည် ရှန်းမိသားစု၏ထိန်းချုပ်မှုအောက်တွင်ရှိသည့် စျေးများအားလုံးအနက် အကြီးဆုံးစျေးဖြစ်လာပြီဟု ဆိုနိုင်ပါမည်။ ဤစျေးသည် ရှန်းမျိုးနွယ်စုအတွက် တစ်နှစ်လျှင်.ဝိညာဉ်ကျောက်တုံး တစ်သိန်းခန့် ရှာဖွေပေးနေပါသည်။
ကျောက်စိမ်းဖြူစျေးအတွင်းရှိ ကျောက်စိမ်းဖြူနန်းတော်ဟု ခေါ်သော အဆောက်အဦးတစ်ခုအတွင်းတွင် ကျန်းချန်ရွှမ်နှင့် ရှန်းရူယန်တို့ ဇနီးမောင်နှံသည် စျေးအခြေအနေနှင့် အရောင်းအဝယ်စီးဆင်းမှုကို တင်ပြထားသော အစီရင်ခံစာကို ဖတ်ရှုလျက်ရှိသလို တစ်ချိန်တည်းမှာ စျေးသူစျေးသားများ၏ တင်ပြမှုအသီးသီးကို နားထောင်ပေးနေသည်။ ကျောက်စိမ်းဖြူစျေးသို့ သူတို့နှစ်ဦး ရောက်ရှိသည်မှာ သုံးရက်ရှိပြီဖြစ်သည်။
စျေးတစ်ခုကိုစီမံခန့်ခွဲရာတွင် လုပ်ငန်းစဉ်တာဝန်များစွာ ရှိပါသည်။ စျေး၏လုံခြုံရေးနှင့် လည်ပတ်မှုစနစ်ကို ထိန်းသိမ်းခြင်း၊ စျေးအတွင်း ဖြစ်ပျက်မှုပေါင်းစုံကို စစ်ဆေးအဖြေရှာရခြင်း၊ အခြားကျီဖုအဆင့်မိသားစုများ၏ အုပ်ချုပ်မှုအောက်ရှိ စျေးများနှင့် ချိတ်ဆက်ဆောင်ရွက်ခြင်းစသည်တို့ဖြစ်ရာ ထိုလုပ်ငန်းအားလုံးကို ကျန်းချန်ရွှမ်နှင့် ရှန်းရူယန်တို့နှစ်ဦးတည်း တာဝန်ခံရမည်ဆိုပါက ကျင့်ကြံမှုအတွက် သီးခြားအချိန်ပေးနိုင်တော့မည်မဟုတ်ပါ။ သို့သော် ကျန်းချန်ရွှမ်တို့နှစ်ဦးသည်လည်း စျေးသို့မရောက်ရှိခင်ကတည်းက ထိုအချက်ကို စဉ်းစားပြီးဖြစ်သည်။ သူတို့အနေနှင့် စျေးလုပ်ငန်းစဥ်အားလုံးကို ယေဘုယျအနေဖြင့်သာ ထိန်းချုပ်ပြီး မတက်မဖြစ်သည့် ပွဲအချို့ကိုသာ တက်ရောက်မည်ဖြစ်ကာ ကျန်အသေးစိတ်လုပ်ငန်းအားလုံးကို လက်အောက်ငယ်သားများနှင့် လွှဲအပ်ထားမည်ဖြစ်သည်။
နိုင်သူစားစတမ်း ကျင့်ကြံမှုလောကတွင် ခွန်အားနှင့် ကျင့်ကြံမှုအဆင့်တိုးတက်ရေးကသာ အရာရာဖြစ်သည်မဟုတ်ပါလား။ လတ်တလောတွင် စျေးသူစျေးသားများ၏ တင်ပြမှုကို နားထောင်ပြီးသွားပြီဖြစ်၍ ရှန်းရူယန်က အသက်၇၀ ကျော်ခန့်ရှိပြီဖြစ်သော ရှန်းပိုဟုန်ဆိုသည့် အဘိုးကြီးတစ်ဦးကို မေးခွန်းထုတ်လိုက်သည်။
“အကြီးအကဲပိုဟုန်ရှင့်၊ စျေးနဲ့ပတ်သက်တဲ့ လုပ်ငန်းအဝဝကို ရှင်နဲ့ရှင့်လူတွေ လက်ထဲအပ်ပါတယ်၊ အရေးကြီးကိစ္စရှိမှသာ ကျွန်မတို့ကို အကြောင်းကြားလိုက်ပါ။ လောလောဆယ် ပြောချင်တာ ဒါအကုန်ပါပဲ”
ရှန်းပိုဟုန်နှင့် စျေးတာဝန်ခံများက နားလည်ကြောင်း ခေါင်းညိတ်ပြလိုက်ကြသည်။ သက်လတ်ပိုင်းအရွယ်ရှိသော ရှန်းဖေးယန်ဆိုသည့် မိန်းမတစ်ဦးက
“ရတနာပစ္စည်းဖလှယ်ပွဲက သုံးရက်အတွင်း အကြီးအကျယ် ကျင်းပမှာဆိုတော့ အဲဒီရက်ပိုင်းအတွင်းမှာ အကြီးအကဲတို့ အနီးကပ်ကြီးကြပ်ပေးစေချင်ပါတယ်”
“ရပါတယ်ဗျာ”
ကျန်းချန်ရွှမ် နှင့် ရှန်းရူယန်တို့လည်း သဘောတူလိုက်ကြသည်။ ရှန်းရူယန်က
“နားလည်ပါတယ်၊ ဖလှယ်ပွဲကို ကျွန်မတို့ကိုယ်တိုင် ဦးစီးကျင်းပပေးသွားမှာပါ”
ထို့နောက် ရှန်းပိုဟုန်တို့ စျေးတာဝန်ခံများလည်း ကြာကြာမနေတော့ဘဲ ကျန်းချန်ရွှမ်တို့ဇနီးမောင်နှံကို ဦးညွတ်ဂါရဝပြုပြီး ခပ်သုတ်သုတ်ပြန်သွားကြတော့သည်။
ထိုအခါ ရှန်းရူယန်က ကျန်းချန်ရွှမ်ကို ပြုံးစစနှင့်ကြည့်ပြီး
“နောက်သုံးရက်ကျမှ ရတနာဖလှယ်ပွဲကို အတူတက်ရအောင်၊ ပြပွဲမှာ ကျွန်မတို့အတွက် အကျိုးရှိမဲ့ပစ္စည်းတွေ တွေ့နိုင်လောက်တယ်။ ဥပမာ ရှင့်ကို အခြေခံတည်ဆောက်မှုအလယ်အဆင့်ကို တက်နိုင်အောင် ကူညီပေးနိုင်တဲ့ ကောင်းကင်ဘုံအနှစ်သာရဆေးပြားလို ပစ္စည်းမျိုးပေါ့၊ နတ်ဆိုးသားရဲအဓိကရုဏ်းမဖြစ်ခင် ကျွန်မတို့ကျင့်ကြံမှုအဆင့်ကို တတ်နိုင်သမျှမြှင့်ထားရမယ်”
ပြောရင်းဆိုရင်းနှင့်ပင် စားပွဲထက်ရှိ ပစ္စည်းပစ္စယများကို သိမ်းဆည်းပြီး ကျင့်ကြံမည့်အခန်းအတွင်းသို့ နှစ်ဦးသား ဝင်ရောက်သွားကြတော့သည်။ တစ်ချိန်တည်းတွင် ရှန်းချန်းနန်တို့ အခြေခံတည်ဆောက်ခြင်းအဆင့် ကျင့်ကြံသူလေးဦးသည် ဘိုးဘေးရှန်းယွမ်လုံ ကွပ်ကဲမှုအောက်တွင် ကန်းယန်ဂိုဏ်းသို့ ရောက်ရှိသွားကြပြီဖြစ်သည်။ ရှန်းမန်ရွှယ်က သူတို့အား စောင့်ကြိုလျက်ရှိသည်ကိုတွေ့ရသည်။ သူမ၏ဆံနွယ်များမှာ အရင်လို ဆွတ်ဆွတ်ဖြူလျက်ရှိနေသော်လည်း ရှန်းယွမ်လုံသည် ညီမဖြစ်သူထံမှ သေခြင်းအော်ရာအချို့ကို ခံစားမိလိုက်သည်။ ရှန်းယွမ်လုံက စိုးရိမ်တကြီးဖြင့်
“ကျန်းမာရေးကောင်းရဲ့လား”
“ဘာမှမဖြစ်ပါဘူး”
ရှန်းမန်ရွှယ်က ပြုံးလျက် ခေါင်းခါပြသည်။
“ကောင်းကင်ဘုံလျှို့ဝှက်ချက်ကို တူးဆွလိုက်လို့ သက်တမ်းတချို့ ကုန်သွားတာပါ”
ထိုသို့ပြောနေစဉ် ရှန်းမန်ရွှယ်၏ အမူအရာမှာ ထူးထူးခြားခြား တည်ငြိမ်လျက်ရှိသည်။ ထို့နောက် မသိမသာနှင့် စကားလမ်းကြောင်းပြောင်းလိုက်ပြီး
“ဒီတစ်ခါ စစ်ဆင်ရေးနဲ့ပတ်သက်ပြီး စိတ်ထဲထင့်နေတယ်၊ အစ်ကိုတို့ ရှန်းမျိုးနွယ်စုဝင်အားလုံး အကြီးအကဲနန်ကုန်းနဲ့ ဝေးဝေးနေကြဖို့ မှာချင်တယ်၊ ငါဒီလိုပြောတဲ့အကြောင်းကိုလည်း ဘယ်သူကိုမှ လျှောက်မပြောနဲ့ဦး”
ရှန်းမန်ရွှယ် ရည်ညွန်းသည့် အကြီးအကဲနန်ကုန်းဆိုသူမှာ ကန်းယန်ဂိုဏ်း၏ ရွှေအမြုတေအဆင့်ရှိ အင်မော်တယ်တစ်ဦးဖြစ်ပြီး သည်တစ်ခေါက် နတ်ဆိုးကျင့်ကြံသူများကို နှိမ်နင်းမည့် စစ်ဆေးရေးကို ကွပ်ကဲမည့်သူဖြစ်သည်။ ထိုစကားကြောင့် ရှန်းယွမ်လုံ၏ စိတ်ထဲတွင် ထူးထူးခြားခြား လေးပင်သွားမိသည်။ ရှန်းယွမ်လုံအနေနှင့် ညီမဖြစ်သူ၏စကားကို ဘယ်သောအခါမှ ပေါ့ပေါ့တန်တန် သဘောမထားခဲ့ပါ။ ရှန်းမန်ရွှယ်၏ အကြံပေးမှုကြောင့် ရှန်းမိသားစုအနေနှင့် ဘေးအန္တရာယ်များစွာကို ကျော်လွှားနိုင်ခဲ့သည်လေ။ သည်တစ်ခါ ရှန်းမန်ရွှယ်၏သတိပေးမှုက ပုံမှန်ထက် အရေးကြီးဟန်တူသည်။ အခန့်မသင့်ပါက သူတို့ရှန်းမျိုးနွယ်စုမှာ ကျင့်ကြံသူအားလုံး ဘေးဒုက္ခဆိုက်သွားနိုင်ကြောင်း ရှန်းယွမ်လုံနားလည်လိုက်သည်။
ရှန်းယွမ်လုံတို့ ကန်းယန်ဂိုဏ်း ရောက်ရှိပြီးသုံးရက်အကြာတွင် ကျန်းချန်ရွှမ်နှင့် ရှန်းရူယန်တို့ နှစ်ဦးသားမှာ ကျောက်စိမ်းဖြူစျေးအတွင်းရှိ တိမ်လွှာပွဲကြည့််စင်ဟုခေါ်သော ခန်းတစ်ခုအတွင်းသို့ ရောက်လာကြသည်။ တိမ်လွှာပွဲကြည့်စင်သည် ရတနာဖလှယ်ပွဲကျင်းပမည့်နေရာလည်းဖြစ်သည်။ ခန်းမအတွင်းသို့ ဝင်ရောက်မိသည်နှင့် မျက်နှာစိမ်းများအကြားတွင် လျှိုယွင်ဂိုဏ်းလက်အောက်ရှိ စျေးတစ်ခုတွင် ကျင်းပခဲ့သော ရတနာဖလှယ်ပွဲတွင် သူမြင်ဖူးခဲ့သည့် ပုဂ္ဂိုလ်အချို့ကို ကျန်းချန်ရွှမ်သတိထားမိလိုက်သည်။
ထိုသူများမှာ လျှိုယွင်ဂိုဏ်းမှ ဝမ်တုန်လဲ့၊ လော့ရှားမန်ဂိုဏ်းမှ ရန်ကျွန်းလန်၊ ယဲ့အင်မော်တယ်မိသားစုမှ ယဲ့ဖေးချန်းနှင့် ကုကျန်းမင်ဟုခေါ်သော ချန်ထျန်းဂိုဏ်းမှ အခြေခံတည်ဆောက်မှုအဆင့်ကျင့်ကြံသူ တစ်ဦးဖြစ်သည်။ ရှန်းရူယန်ကတော့ ပွဲလာသူအများစုကို သိရှိထားပြီးဖြစ်သည့်အတွက် ထိုလူများအကြောင်းကို ကျန်းချန်ရွှမ်အား အသံပို့စနစ်ဖြင့် မိတ်ဆက်ပေးနေသည်။
“ဒီလူက ကျန်းမိသားစုက အခြေခံတည်ဆောက်မှုအဆင့် အကြီးအကဲ ကျန်းခိုင်ရွှမ် တဲ့၊ ဒီဘက်ကတစ်ယောက်က တစ်ကိုယ်တော်ကျင့်ကြံသူ ဟွမ်ဟယ်၊ ညာဘက်ကလူက ပိုင်ဟောင် ဆိုလားပဲ၊ သူ့နာမည်ပြောင်က အရူးဓားသမားတဲ့၊ ဓားကိုအထူးပြုကျင့်ကြံသူပေါ့”
ထိုစဉ် လော့ရှားမန်ဂိုဏ်းမှ ရန်ကျွန်းလန်က သူတို့နှစ်ဦးရှိရာသို့ လျှောက်လာပြီး နှုတ်ဆက်လိုက်သည်။
“တာအိုရောင်းရင်းကျန်း မတွေ့ရတာကြာပြီနော်”
ထို့နောက် သူမသည် ကျန်းချန်ရွှမ်ဘေးတွင်ရှိနေသည့် ရှန်းရူယန်ကို စူးစမ်းသလိုကြည့်လိုက်သည်။ ထို့ကြောင့် ကျန်းချန်ရွှမ်လည်း မနေသာတော့ဘဲ မိတ်ဆက်ပေးလိုက်ရသည်။
“တာအိုရောင်းရင်းရန်ရေ ဒီအမျိုးသမီးက ကျုပ်ရဲ့တာအိုကျင့်ကြံဖက် ရှန်းရူယန် တဲ့၊ ရူယန်၊ ဒါက လော့ရှားမန်ဂိုဏ်းက ရန်ကျွန်းလန်တဲ့၊ ချိုးယီရွှေရဲ့ ဂျူနီယာညီမပေါ့”
ရန်ကျွန်းလန်က ရှန်းရူယန်ကို လက်သီးဆုပ်၍ ဂါရဝပြုလိုက်သည်။
“ရှင်က တာအိုရောင်းရင်းကျန်းရဲ့ လက်တွဲဖော်ကိုး တွေ့ရတာဝမ်းသာပါတယ်ရှင်”
ရှန်းရူယန်ကလည်း တစ်ဖန်ပြန်လည်၍ ယဥ်ကျေးစွာ နှုတ်ဆက်လိုက်သည်။ ကျန်းချန်ရွှမ်က ရန်ကျွန်းလန်ကိုကြည့်နေရင်း နားမလည်ဟန်ဖြင့်
“ဒါနဲ့ တာအိုရောင်းရင်း ရန် ချိုးယီရွှေ ဘာလို့လိုက်မလာတာလဲ”
ကျန်းချန်ရွှမ်၏ အမေးကိုကြားသောအခါ ရန်ကျွန်းလန်မှာ အနည်းငယ်ငေးငိုင်သွားပြီး
“အစ်မချိုးက ကန်းယန်ဂိုဏ်းက ခေါ်လို့ လိုက်သွားရတယ်၊ အသေးစိတ်တော့ မသိရသေးဘူး”
***
နှစ်တစ်ရာကျင့်ကြံပြီးနောက်
အခန်း ၅၃ ။ ရွှေသံချပ်ကာရုပ်သေးကို နောက်တစ်ကြိမ်ဖန်တီးခြင်း
ကျန်းချန်ရွှမ်တစ်ယောက် စိတ်မကောင်းဖြစ်မိသွားသည်။ ကန်းယန်ဂိုဏ်းနှင့်အတူ လိုက်သွားရခြင်းသည် ကံကောင်းခြင်းလား ကံဆိုးခြင်းလား ယခုအချိန်တွင် အတပ်မပြောနိုင်သေး။ ရန်ကျွန်းလန်အား နှစ်သိမ့်စကား အနည်းငယ်ပြောဆိုပြီးနောက် စကားစဖြတ်လိုက်ကြပြီး မျက်နှာရင်းပုဂ္ဂိုလ်အချို့ကို နှုတ်ဆက်လိုက်သည်။ များမကြာခင် ရတနာဖလှယ်ပွဲစတင်ပါတော့သည်။
ကျန်းချန်ရွှမ်နှင့် ရှန်းရူယန်တို့ နှစ်ဦးလည်း စင်မြင့်ပေါ်သို့ တက်လိုက်ပြီး ကိုယ့်ကိုယ်ကို မိတ်ဆက်လိုက်ကြသည်။ ထို့နောက် ရတနာပစ္စည်းသုံးခုကို ထုတ်ယူလိုက်ပြီး ရှေ့တွင်ရှိသည့် ကျောက်စိမ်းစားပွဲပေါ်တွင် တင်လိုက်သည်။ ကျန်းချင်းရွှမ်က ပွဲလာပရိသတ်ကို ပြုံးပြလိုက်ကာ
“ခင်ဗျားတို့ရှေ့မှာရှိနေတဲ့ ရတနာပစ္စည်းသုံးခုက အဆင့် ၂ အမြင့်ဆုံးအဆင့်ရှိ မီးဆူးမြက်ရယ်၊ အဆင့်၂ အမြင့်ဆုံးအဆင့်ပဲဖြစ်တဲ့ အဆီအနှစ် ရွှေရောင်ကျောက်စိမ်းရယ်၊ အဆင့်၂ ဆေးပြားဖြစ်တဲ့ နဂါးအားဖြည့်ဆေးတို့ပဲဖြစ်ပါတယ်၊ ဒီပစ္စည်းတွေအကြောင်း အသေးစိတ်ရှင်းပြဖို့မလိုဘူး ထင်ပါတယ်။ မီးဆူးမြက်က အဆင့်၂ အမြင့်ဆုံးအဆင့်ရှိ ဆေးပြားဖြစ်တဲ့ ယန်သုံးပါးဆေးလုံးကို သန့်စင်တဲ့နေရာမှာ အဓိကသုံးတဲ့ ပစ္စည်းဖြစ်ပြီး ရွှေရောင်ကျောက်စိမ်းကတော့ အစီအရင်အကွက်တွေ ဖန်တီးတဲ့နေရာနဲ့ အဆင့်၂ အမြင့်ဆုံးအဆင့် ဓမ္မလက်နက်တွေကို ဖန်တီးတဲ့နေရာမှာ အဓိကသုံးပါတယ်။ အခု ရှန်းမိသားစုက အဆင့်၂ ဝိညာဉ်အမြစ်ရဲ့ အဆင့်ကို တိုးမြင့်ပေးနိုင်တဲ့ ရတနာပစ္စည်း ဒါမှမဟုတ် ဝိညာဉ်အမြစ်ကို ကျင်ကြံနည်းတစ်ရပ်နဲ့ ဒီရတနာတွေကို လဲလှယ်ချင်ပါတယ်၊ ဒီပစ္စည်းတွေမရှိရင်လည်း တန်ဖိုးတူပစ္စည်းတွေနဲ့ လဲလှယ်လို့ရပါသေးတယ်”
ကျန်းချန်ရွှမ်တစ်ယောက် ရှေ့ဆောင်ရှေ့ရွက်ပြု၍ ရတနာပစ္စည်းများကို ပြသလိုက်ခြင်းမှာ ရတနာပစ္စည်းများကို အမှန်တကယ် ဖလှယ်လိုခြင်းထက် ပြပွဲပိုင်ရှင်ဖြစ်ကြောင်း ပြသလိုက်သည့် သဘောဖြစ်သည်။ အကယ်၍ ပွဲလာသူပရိသတ်များအနေနှင့် သူတောင်းဆိုသည့်ရတနာပစ္စည်းများ မရှိ၍ ဝိညာဉ်ကျောက်တုံးများဖြင့်သာ ဝယ်ယူလိုပါသည်ဆိုလျှင်လည်း သူ့အနေနှင့် ရွေးစရာမရှိဘဲ လက်ခံရမည်သာဖြစ်သည်။ သို့သော် ကံကောင်းပါသည်။ သူဖလှယ်လိုသော ရတနာပစ္စည်းကို ပိုင်ဆိုင်ထားသူရှိသည်။ ပစ္စည်းအမည်မှာ ဝိညာဉ်သန့်စင်ဆေးရည်ဟုခေါ်သည်။ သို့သော် ထိုပစ္စည်းသုံးခုတည်းနှင့် ကျန်းချန်ရွှမ်တို့၏ ရတနာသုံးခုလုံးကို လဲလှယ်ရန်မဖြစ်နိုင်၍ အဆီအနှစ်ရွှေရောင်ကျောက်စိမ်း နှင့် နဂါးအားဖြည့် ဆေးရည်တစ်ပုလင်းကို ဝိညာဉ်သန့်စင်ဆေးရည်နှင့်လဲ၍ မီးစူးမှန်သားကို လိပ်ပြာဝိညာဉ်ပန်းဟုခေါ်သည့် အဆင့်၂ အမြင့်ဆုံးအဆင့်ရှိ ဝိညာဉ်ဆေးဝါးတစ်မျိုးနှင့် လဲလှယ်လိုက်ရသည်။
ရှန်းမိသားစုကိုယ်စား ရတနာဖလှယ်ပွဲကို ဖွင့်လှစ်ပေးပြီးနောက် ကျန်းချန်ရွှမ်နှင့် ရှန်းရူယန်တို့မှာ သူတို့ကိုယ်ပိုင် ရတနာပစ္စည်းများကို ခင်းကျင်းပြသ၍ လဲလှယ်လိုသည့်ပစ္စည်းများကို ကြေငြာကြပါတော့သည်။ ကျန်းချန်ရွှမ်က အဆင့် ၂ အဆောင်ပစ္စည်း များနှင့် အခြားတန်ဖိုးရှိရတနာများကို ပြသ၍ စိမ်းဝါရောင်ကျောက်စိမ်းနှင့်ကောင်းကင်ဝိညာဉ်နှင်းစက် ဆေးပုလင်းများကို အလိုရှိကြောင်းကြေညာသည်။ ထို့အပြင် အခြေခံတည်ဆောက်မှု စတုတ္ထအဆင့်ကို တက်လှမ်းရာတွင် အထောက်အကူပြုနိုင်သည့် အဆီအနှစ် ကောင်းကင်ဘုံဆေးပြားကိုလည်း တောင်းဆိုလိုက်သည်။ ရှန်းရူယန်ကမူ အဆင့် ၂ အမြင့်ဆုံးအဆင့်ရှိ ရတနာပစ္စည်းများဖြစ်သည့် ဝိညာဉ်ဆေးဝါးများမှင့် တန်ဖိုးကြီးကုန်ကြမ်းပစ္စည်းများကို ပြသ၍ လျှပ်စီးကောင်းကင်ဘုံသလင်းကျောက်ကို အလိုရှိနေကြောင်း ကြေငြာလိုက်သည်။ ထိုသလင်းကျောက်တွင် လျှပ်စီးဒြပ်စင်များ ကိန်းအောင်းနေပြီး လျှပ်စီးဓာတ် အခြေခံဓမ္မလက်နက်များ သန့်စင်ရာတွင် အဓိကအသုံးပြုသည့်ပစ္စည်းဖြစ်သည်။
မျှော်လင့်ထားသည့်အတိုင်း ကျန်းချန်ရွှမ်နှင့် ရှန်းရူယန်တို့ အလိုရှိနေသော ပစ္စည်းများကို ဖလှယ်မည့်သူနှစ်ဦး ပေါ်လာပါသည်။ ပထမတစ်ယောက်က တစ်ကိုယ်တော်ကျင့်ကြံသူ ဟွမ်ဟယ်ဖြစ်ပြီး ကျန်တစ်ဦးမှာ ကျန်းချန်ရွှမ်၏ မိတ်ဆွေ ရန်ကျွန်းလန်ဖြစ်သည်။ ဟွမ်ဟယ်ထံတွင် စိမ်းဝါရောင်ကျောက်စိမ်း၊ လျှပ်စီးကောင်းကင်ဘုံ သလင်းကျောက်နှင့် အဆီအနှစ် ကောင်းကင်ဘုံဆေးပြားတို့ရှိပြီး ရန်ကျွန်းလန်လက်ထဲတွင် စိမ်းဝါရောင်ကျောက်စိမ်း၊ ကောင်းကင်ဝိညာဉ် နှင်းရေစက်တစ်ပုလင်းနှင့် လျှပ်စီးဓာတ်ပြောင်း သလင်းကျောက်များရှိသည်။ အဆီအနှစ် ကောင်းကင်ဘုံဆေးပြားတော့မရှိပါ။ ကျန်းချန်ရွှမ်တို့နှစ်ဦးလည်း အချိန်မဆိုင်းဘဲ ကိုယ်စီ အလိုရှိရာပစ္စည်းများကို ခပ်သွက်သွက်ဖလှယ်လိုက်သည်။ ရှိရင်းစွဲပစ္စည်းတန်ဖိုးနှင့် မလောက်ငှ၍ ဝိညာဉ်ကျောက်တုံး ၈၀၀၀ ကိုပါ အပိုထပ်ဆောင်းပေးလိုက်ရသော်လည်း သူတို့အတွက် အကျိုးရှိသည့် ဖလှယ်မှုမျိုးဟု ဆိုနိုင်မည်ဖြစ်သည်။ ထို့နောက်တွင် စင်မြင့်ပေါ်သို့ လူများ အသီးသီးတက်ရောက်ကာ ရတနာဖလှယ်ပွဲကြီးကို ကြိတ်ကြိတ်တိုး ဆင်နွှဲကြပါတော့သည်။
နတ်ဆိုးသားရဲအဓိကရုဏ်းနှင့်အတူ ကန်းယန်ဂိုဏ်း၏ နတ်ဆိုးကျင့်ကြံသူနှိမ်နင်းရေး တိုက်ပွဲများကြောင့် ဓမ္မလက်နက်ပစ္စည်းများ၊ ကုသရေးဆေးဝါးရတနာများ နှင့် တိုက်ပွဲတွင် အထောက်အကူပြုနိုင်သည့် အဆောင်လက်နက်များ၏ ဝယ်လိုအားမှာ အထူးမြင့်တက်နေသည်ဟု ဆိုရပေမည်။ စားပွဲပေါ်တွင် ထိုပစ္စည်းများကို ခင်းကျင်းပြသလိုက်သည်နှင့် အလျှိုလျှိုလဲလှယ်သွားကြသည်။ ဖလှယ်ပွဲပြီးခါနီးတွင် ဝိညာဉ်ကျောက်တုံး ၃၀၀၀ ဖြင့် အဆင့်၂ အလယ်အလတ်အဆင့် စုတ်တံတစ်ချောင်းကို ကျန်းချန်ရွှမ်ဝယ်ယူလိုက်ပြီးနောက် ဖလှယ်ပွဲတွင် သူ့အတွက် အသုံးဝင်နိုင်သောပစ္စည်းများမရှိတော့ပါ။ ခင်မင်ရာမိတ်ဆွေအချို့ကို နှုတ်ဆက်ပြီးနောက် ဇနီးမောင်နှံနှစ်ဦးလည်း နေထိုင်ရာ ကျောက်စိမ်းဖြူနန်းတော်သို့ ပြန်လာခဲ့ကြတော့သည်။
ကျန်းချန်ရွှမ်နှင့် ရှန်းရူယန်တို့မှာ စကားအနည်းငယ် ပြောဆိုကျီစယ်ပြီးနောက် ကိုယ်စီကျင့်ကြံရာ အခန်းများအတွင်းသို့ ဝင်ရောက်အနားယူလိုက်ကြတော့သည်။ အခန်းထဲတွင် ကျန်းချန်ရွှမ်သည် သူရရှိလိုက်သော စိမ်းဝါရောင်ကျောက်စိမ်းသုံးခုနှင့် ကောင်းကင်ဝိညာဉ်နှင်းရေစက် ပုလင်းတို့ကိုထုတ်ယူလိုက်သည်။ နဂိုရှိပြီး တစ်ပုလင်းနှင့်ပေါင်းလျှင် စုစုပေါင်းနှစ်ပုလင်းရှိသွားပြီဖြစ်၍ ရွှေသံချပ်ကာရုပ်သေးအဆောင် နှစ်ခုအထိ ဖန်တီးနိုင်မည်ဖြစ်သည်။ သို့သော် ကျန်းချန်ရွှမ်၏ အဆောင်ဖန်တီးခြင်း အဆင့်မှာ အဆင့် ၂ အလယ်အဆင့် ရောက်ရှိသွားပြီဖြစ်သလို အဆင့်၂ အလယ်အလတ်အဆင့် စုတ်တံကောင်းကောင်း တစ်ချောင်းကိုလည်း ရရှိခဲ့ပြီဖြစ်ရာ အဆောင်သုံးခုအထိ ဖန်တီးနိုင်လောက်မည်ဟု သူတွေးမိသည်။
သို့နှင့် အချိန်မဆွဲတော့ဘဲ လုပ်ငန်းစရန်ပြင်လိုက်သည်။ ပထမဆုံးအနေနှင့် စုတ်တံကို သန့်စင်ရန်လိုမည်ဖြစ်သည်။ တစ်လကြာပြီးနောက် အဆင့်၂ အလယ်အဆင့် စုတ်တံကို အောင်မြင်စွာသန့်စင်နိုင်ခဲ့ပြီဖြစ်ပြီး ရွှေသံချပ်ကာ ရုပ်သေးအဆောင်များကို စတင်ရေးဆွဲပါသည်။ ကုန်ကြမ်းပစ္စည်းများမှာ အကန့်အသတ်ရှိသောကြောင့် အဆောင်သုံးခုအထိ ဖန်တီးရာတွင် အနည်းငယ်လက်ဝင်သည်ဟု ဆိုရမည်။ မလိုအပ်ဘဲ ကုန်ကြမ်းပစ္စည်းများကို မဖြုန်းတီးမိရန် အထူးဂရုစိုက်နေရသော်လည်း ကံကောင်းစွာနှင့် စနစ်မှချီးမြှင့်ထားသော အဆောင်ဖန်တီးခြင်း ပါရမီစွမ်းရည်မှာ အထူးအသုံးဝင်သွားသည်။ တစ်နှစ်ကြာပြီးနောက် ရွှေသံချပ်ကာရုပ်သေး အဆောင်သုံးခုကို အောင်မြင်စွာ ဖန်တီးနိုင်လိုက်ပြီဖြစ်သည်။
နဂိုရှိပြီးအဆောင်များနှင့်ပေါင်းလျှင် စုစုပေါင်းအဆောင်၆ခုထိ ရှိလာပြီဖြစ်သည်။ တစ်ချိန်တည်းတွင် ကျန်းချန်ရွှမ်၏ ကျင့်ကြံမှုအဆင့်မှာ တတိယအဆင့် အထွတ်အထိပ်သို့ ရောက်ရှိသွားပြီဖြစ်၍ သူရရှိထားသော အဆီအနှစ်ကောင်းကင်ဘုံဆေးပြားကို သုံးစွဲရန် အချိန်ကျလာပြီဖြစ်သည်။ သည်တစ်ခါ အခြေခံတည်ဆောက်မှု အလယ်အဆင့်ဖြစ်သည့် စတုတ္ထအဆင့်ကို တက်လှမ်းနိုင်ပါက သူ၏ခွန်အားမှာ အဆပေါင်းစွာ ခုန်တက်လာနိုင်မည်ဖြစ်ပြီး အခြေခံတည်ဆောက်မှု နောက်ဆုံးအဆင့် ကျင့်ကြံသူတစ်ဦးကိုပင် ထိပ်တိုက်ရင်ဆိုင်နိုင်စွမ်းရှိလာမည်ဖြစ်သည်။ ထို့နောက် ကျန်းချန်ရွှမ်သည် အဆီအနှစ် ကောင်းကင်ဘုံဆေးပြားကို မျိုချလိုက်ပြီး ဒြပ်ငါးပါးစစ်မှန်မှု နည်းစနစ်ကို လည်ပတ်လိုက်တော့သည်။
***
နှစ်တစ်ရာကျင့်ကြံပြီးနောက်
အခန်း ၅၄ ။ ယဲ့မျိုးနွယ်စုမှ သတင်းစကား
အုံး!
ထိုအခိုက်တွင် ကျန်းချန်ရွှမ်၏ ကိုယ်တွင်းမှ ဆေးစွမ်းအင်မှာ ရုတ်တရက်ထိုးတက်ပေါက်ကွဲသွားသည်။ အာရုံမပျံ့လွင်ရန် အထူးဂရုပြု၍ ဒြပ်ငါးပါးနည်းစနစ်ကို ပုံမှန်လှည့်ပတ်ပေးလိုက်ပြီး ဆေးစွမ်းအင်ကို သွေးကြောများရှိရာသို့ လမ်းညွန်ပို့ဆောင်လိုက်သည်။ မကြာမီ ပေါက်ကွဲနေသော ဆေးစွမ်းအင်မှာ သန့်စင်သော စစ်မှန်မှုအဆီအနှစ်အဖြစ်သို့ ဖြည်းဖြည်းချင်း ကူးပြောင်းသွားတော့သည်။ နောက်တစ်နှစ်အကြာတွင်….
ကျန်းချန်ရွှမ်၏အခန်းထဲမှ ပြင်းထန်အားပါသော အော်ရာလှိုင်းများ ထိုးထွက်လာတော့သည်။ ကျန်းချန်ရွှမ်တစ်ယောက် အခြေခံတည်ဆောက်မှု စတုတ္ထအဆင့်သို့ တက်လှမ်းနိုင်ခဲ့ပြီဖြစ်သည်။ ကျန်းချန်ရွှမ်က မျက်လုံးများကို ဖြည်းညင်းစွာ ဖွင့်လိုက်သည်။ သူ့မျက်နှာထက်တွင် အပြုံးတစ်ပွင့်က ဆင်ယင်လျက်။
သူ့ခန္ဓာကိုယ်ကို စေ့စပ်စွာ စစ်ဆေးကြည့်လိုက်ရာ သူ၏ စစ်မှန်မှုအဆီအနှစ် စွမ်းအင်ပမာဏမှာ နဂိုရှိရင်းထက် ၅၀% တိုးတက်လာပြီဖြစ်သည်ကို တွေ့ရသည်။ ယခုအခါ သူ၏စစ်မှန်မှု အဆီအနှစ်စွမ်းအင်အဆင့်မှာ အခြေခံတည်ဆောက်ခြင်း သတ္တမအဆင့် ကျင့်ကြံသူ များနှင့်ပင် တန်းတူယှဥ်ပြိုင်နိုင်ပြီဖြစ်သလို ဓမ္မလက်နက်များ၊ အဆောင်ပစ္စည်းများနှင့် မန္တန်များ အကူအညီနှင့်ဆိုလျှင် အခြေခံတည်ဆောက်မှု နောက်ဆုံးအဆင့်တွင် ရှိနေသော ကျင့်ကြံသူများကိုပင် ရင်ဆိုင်နိုင်စွမ်း ရှိလာပြီဖြစ်သည်။ နောက်ထပ်တစ်နှစ်အတွင်းတွင် ရရှိပြီး ကျင့်ကြံမှုအဆင့်ကို အခြေခိုင်အောင် မွမ်းမံပြီးနောက် နောက်ဆုံးတွင် ကျင့်ကြံရာအခန်းမှ ထွက်လာခဲ့တော့သည်။
အပြင်ရောက်လျှင် ရှန်းရူယန်မှာ သူ့ထက်အရင် ကျင့်ကြံမှုပြီးဆုံးနေသည်ကို တွေ့လိုက်ရသည်။ သူမသည် ဆက်သွယ်ရေးကျောက်စိမ်း အဆောင်ကိုထုတ်ယူစစ်ဆေးလျက်ရှိပြီး ကျန်းချန်ရွှမ်မှာ ဇနီးဖြစ်သူထံတွင် ပြောင်းလဲမှုများရှိနေသည်ကို အာရုံခံမိပြီးနောက် အံ့သြသွားမိသည်။ ရှန်းရူယန်တစ်ယောက် နောက်တစ်ဆင့်ကို တက်လှမ်းလိုက်ပြန်ပြီဖြစ်သည်။ ယခုအခါ အဌမအဆင့်ကို ရောက်ရှိနေပြီဖြစ်သည်။ ရှန်းရူယန်မှာလည်း ကျန်းချန်ရွှမ်၏ ကျင့်ကြံမှုအဆင့် ပြောင်းလဲသွားပုံကို သတိထားမိသွားပြီး ကျန်းချန်ရွှမ်ကို ပြုံးလျက်ကြည့်ရင်း
“ယောက်ျား ရှင်ဒီတစ်ခါ ဂူပိတ်ကျင့်ကြံလိုက်တာ အတော်လေး တိုးတက်လာပုံပဲ၊ အခြေခံတည်ဆောက်မှု အလယ်အဆင့်ကို ရောက်သွားပြီပဲ၊ ဂုဏ်ပြုပါတယ်ရှင်”
ကျန်းချန်ရွှမ်က ပြုံးလျက် ခေါင်းညိတ်ပြလိုက်သည်။
“ကိုယ့်ရလဒ်က သိပ်မဆိုးဘူးပြောရမှာပဲ၊ ဒါပေမဲ့ ရူယန်၊ မင်းရဲ့သွေးကြောဖွဲ့စည်းပုံက အရင်နဲ့မတူတော့ဘူး၊ နောက်တစ်ဆင့်ကို တက်လှမ်းနိုင်ခဲ့ပြီပေါ့၊ တကယ်ကိုအထင်ကြီးမိပါတယ်”
ထို့နောက်တွင် ဇနီးမောင်နှံနှစ်ဦးမှာ နှစ်နှစ်တာ ဂူပိတ်ကျင့်ကြံမှု ကာလအတွင်းက အတွေ့အကြုံများကို ဖလှယ်ရင်း ကြည်နူးစွာ စကားဖောင်ဖွဲ့နေပါတော့သည်။ ထိုစဉ် ကျန်းချန်ရွှမ်က
“ဒါနဲ့ ရူယန်၊ ခုနက ဆက်သွယ်ရေးကျောက်စိမ်းပြားကို ကြည့်နေတာတွေ့တယ်၊ မိသားစုက ပို့လိုက်တာလား”
“မဟုတ်ဘူး ယဲ့မျိုးနွယ်စုက ပို့လိုက်တာ”
“ယဲ့မျိုးနွယ်စု ဟုတ်ရဲ့လား”
ကျန်းချန်ရွှမ်တစ်ယောက် မျက်မှောင်ကုပ်သွားမိသည်။
“ဟုတ်တယ်၊ ကြက်သွေးရောင်ရွှေ သတ္တုတွင်းတစ်ခုကို တွေ့ထားတယ်တဲ့၊ အသေးစိတ်အခြေအနေကို မသိရသေးပေမဲ့ သူတို့နဲ့အတူ ဝင်ရှာဖို့ ဖိတ်ခေါ်ထားတာ။ ကျွန်မတို့ကို ၂၀% ဝေစုပေးမယ်လို့ပြောသေးတယ်”
ကျန်းချန်ရွှမ်မှာ တိုး၍အံ့သြမိပြန်သည်။ ကြက်သွေးရောင်ရွှေသည် သန့်စင်ခြင်းလုပ်ငန်းတွင် အဓိကကုန်ကြမ်းပစ္စည်းဖြစ်ပြီး သတ္တုအများစုသည် အဆင့်၂ အနိမ့်စားအဆင့် အများဆုံးရှိကြပြီး အချို့သတ္တုများမှာ အဆင့်၂ အမြင့်ဆုံးအဆင့်အထိပင် ရှိတတ်ကြသည်။ ကျန်းချန်ရွှမ်၏ အဆင့် ၂ အနိမ့်စား ဓမ္မလက်နက်ဖြစ်သော ကြက်သွေးရောင်ရွှေ ဝိညာဉ်ဒိုင်းကို ကြက်သွေးရောင်ရွှေသတ္တုနှင့် အဓိကပြုလုပ်ထားခြင်းဖြစ်သည်။
ထို့ကြောင့် ကြက်သွေးရောင် ရွှေသတ္တုတွင်းတစ်တွင်းသည် အရွယ်အစားသေးငယ်သည်ဆိုဦးတော့ လူအများလိုချင်တပ်မက်ဖွယ် တန်ဖိုးကြီးရင်းမြစ်တစ်ခုဖြစ်သည်။ ထိုသတ္တုတွင်းမျိုးကို ယဲ့မိသားစုက တွေ့ရှိပြီးနောက် ဖုံးကွယ်ခြင်းမရှိသည့်အပြင် ရှန်းမိသားစုကို အသိပေး၍ ဝေစု ၂၀% ပေးမည်ဟုပင် ကမ်းလှမ်းလိုက်သေးသည်။ ကျန်းချန်ရွှမ်ကတော့ ထိုအချက်မှာ သံသယဖြစ်ဖွယ်ကောင်းသည်ဟု ထင်မိသည်။
နောက်တစ်ချက်က သတ္တုတွင်းကို တစ်ဖွဲ့တည်းရှာဖွေရန် အင်အားမလုံလောက်၍ ပြင်ပအကူအညီ ယူလိုသည်ထား၊ ရှန်းမိသားစုကို တိုက်ရိုက်ဆက်သွယ် အကူအညီမတောင်းဘဲ၊ သူတို့နှစ်ဦးကို အဘယ်ကြောင့် တကူးတက အကြောင်းကြားရပါသလဲ။ ထို့အပြင် ကျီဖုအဆင့်ရှိသော ဂုဏ်သိက္ခာကြီးမြင့်သည့် မိသားစုတစ်ခုအနေနှင့် သတ္တုတွင်းတစ်တွင်းကိုပင် မကိုင်တွယ်နိုင်ဘူးလား ဆိုသည့်အချက်လည်းရှိနေသေးသည်။
စဉ်းစားလေလေ ကျန်းချန်ရွှမ်အဖို့ မသင်္ကာစရာများလေလေ ဖြစ်လာသည်။ ရှန်းရူယန်ကို သူ့အမြင်ပြောပြကြည့်သောအခါ ရူယန်ကလည်း ထောက်ခံသည်။
“ဟုတ်တယ်၊ သူတို့ပြောတာကတော့ ကုန်ကျစရိတ်လျှော့ချင်လို့တဲ့၊ ဒါပေမဲ့ ရှန်းမိသားစုတစ်ခုလုံးနဲ့ ပူးပေါင်းဆောင်ရွက်ရင် ၂၀% အထက်ပေးရမှာပဲ၊ သူတို့တစ်ခုခု ဖုံးကွယ်ထားတယ်လို့ထင်တယ်။ ထောင်ချောက်တစ်ခုဖြစ်နိုင်တယ်။ ဒါကြောင့် ငြင်းလိုက်ကြရင် မကောင်းဘူးလား”
ကျန်းချန်ရွှမ်က ဇနီးဖြစ်သူ၏ ဆုံးဖြတ်ချက်ကို သဘောတူလိုက်သည်။ သူ့အမြင်အရသည်လို အရှုပ်အရှင်းမကင်းသည့် အရေးကိစ္စများတွင် လက်ရှောင်သည်က အကောင်းဆုံးဖြစ်သည်။ အထူးသဖြင့် နတ်ဆိုးသားရဲကပ်ဘေးကြီး တဖြည်းဖြည်း နီးကပ်လာချိန်တွင် အစစအရာရာကို သတိကြီးကြီးဖြင့် ချဉ်းကပ်ရန်လိုအပ်သည်။ ယဲ့မိသားစုအား အကြောင်းပြန်ချက်ပေးပြီး သုံးရက်အကြာ သတ္တုကြောတစ်ခု၏ ဝင်ပေါက်နားတွင်.....
ယဲ့မျိုးနွယ်စုဝင် ကျင့်ကြံသူလေးဦးမှာ တစ်စုံတစ်ရာကို တိုင်ပင်ဆွေးနွေးနေကြသည်။ ထိုလူစုထဲတွင် ကျန်းချန်ရွှမ်၏ အသိအကျွမ်းဖြစ်သူ ယဲ့ဖေးချန်လည်းပါဝင်သည်။ ကျန်သုံးဦးမှာ ယဲ့မိသားစု၏ ပထမအကြီးအကဲဖြစ်သူ ယဲ့ဖေးယန်၊ စတုတ္ထအကြီးအကဲ ယဲ့ဝမ်ကျူ နှင့် အဌမအကြီးအကဲ ယဲ့တုန်းရှန်တို့ဖြစ်သည်။ ယဲ့တုန်းရှန်က
“ပထမအကြီးအကဲ အခြေအနေဘယ်လိုရှိလဲ၊ ဘယ်နှစ်ယောက်လာမှာတဲ့လဲ”
ယဲ့ဖေးယန်မှာ မျက်မှောင်ကုပ်လျက် တည်ငြိမ်စွာဖြေသည်။
“ကျန်းချန်ရွှမ်နဲ့ ရှန်းမိသားစုဝင် သူ့မိန်းမရယ်၊ ကျန်းမိသားစုက ကျန်းခိုင်ရွှမ်ရယ်၊ ချန်ထျန်းဂိုဏ်းက ကုချန်းရှန်ရယ်၊ လော့ရှားမန်ဂိုဏ်းက အကြီးအကဲတချို့ရယ် ဒီလူတွေအားလုံး ငြင်းထားတယ်”
“ဘယ်လို....ဘာလို့ငြင်းတာတဲ့လဲ”
ယဲ့ဖေးယန်၏ အဖြေကိုကြားလျှင် ကျန်သုံးဦးမှာ ဒေါပွကုန်ကြသည်။ အဖြူရောင်ဝတ်စုံ ဆင်မြန်းထားသည့် ယဲ့ဝမ်ကျူက အေးစက်စက်လေသံနှင့်
“ဒါဘာသဘောလဲ၊ ဒီလူတွေက ယဲ့မိသားစုကို အထင်သေးတာလား”
ယဲ့ဖေးချန်းက ပြေရာပြေကြောင်း ဝင်ပြောသည်။
“ကြည့်ရတာ ကျုပ်တို့နည်းနည်းလောသွားပုံပဲ၊ ကျန်းချန်ရွှမ်၊ ကျန်းခိုင်ရွှမ် နဲ့ ကုချန်းရှန် ဒီသုံးယောက်က သတိကြီးကြီးထားတဲ့ လူစားမျိုးတွေပဲ၊ ကျုပ်တို့ကမ်းလှမ်းချက်က မပြည့်စုံတဲ့အတွက် အရဲမစွန့်ချင်ကြလို့ ဖြစ်ပါလိမ့်မယ်”
ယဲ့တုန်းရှန်က သူ့စကားကို ထောက်ခံလိုက်သည်။
“အမှန်ပဲ၊ ငါတို့မှာ အချိန်မရှိခဲ့တဲ့အတွက် အခြေအနေကို အသေးစိတ်မပြောပြလိုက်နိုင်ခဲ့ဘူး၊ မဟုတ်ရင် သူတို့ငြင်းမှာမဟုတ်ဘူး”
“အခုမှပြောနေလို့ ဘာထူးတော့မှာလဲ၊ ဒီလူတွေ မလာရင် ဘာဆက်လုပ်ကြမလဲ”
ယဲ့ဝမ်ကျူက မကျေမချမ်းနှင့် ရေရွတ်နေသည်။ ပထမအကြီးအကဲ ယဲ့ဖေးယန်က တွေးတွေးဆဆနှင့် ပြောသည်။
“လာကြမဲ့လူတွေရှိမှာပါ၊ အကျိုးအမြတ်အတွက် မစဉ်းစားဘဲ စွန့်စားမဲ့လူတွေ ရှိပါတယ်”
***
နှစ်တစ်ရာကျင့်ကြံပြီးနောက်
အခန်း ၅၅ ။ အရေးပေါ်အစည်းအဝေး
ပထမအကြီးအကဲ ယဲ့ဖေးယန်၏ စကားကြောင့် ကျန်သုံးဦးမှာ မတိုင်ပင်ဘဲ ပြိုင်တူကြည့်မိလိုက်ကြသည်။ ထိုစဉ် ယဲ့ဖေးယန်၏ လက်ထဲရှိ ဆက်သွယ်ရေးကျောက်စိမ်းပြားမှာ ရုတ်တရက်လင်းသွားပြီး ယဲ့ဖေးယန်က ကျေနပ်စွာပြုံးလိုက်သည်။
“လျှိုယွင်ဂိုဏ်းက ဝမ်တုန်လဲ့နဲ့ သူ့ရဲ့ဂျူနီယာညီ မားချန်းရှန်တို့က တစ်ရက်အတွင်း ဒီကို လာခဲ့မယ်လို့ပြောတယ်”
“တကယ်လား”
သည်သတင်းကြောင့် ယဲ့ဖေးချန်၊ ယဲ့တုန်းရှန်နှင့် ယဲ့ဝမ်ကျူတို့မှာ ဟန်မဆောင်နိုင်လောက်အောင်ပင် ပျော်ရွှင်သွားကြသည်။ ထို့နောက် ယဲ့ဝမ်ကျူက
“ဒါဆိုအခုဦးစားပေးရမဲ့ကိစ္စက……..”
တစ်လကြာပြီးနောက် ထိတ်လန့်တုန်လှုပ်ဖွယ် သတင်းတစ်ခုက ကျင့်ကြံသူများနှင့် ဂိုဏ်းအသီးသီးကြားတွင် တောမီးလောင်သလို ပျံ့နှံ့သွားသည်။ လျှိုယွင်ဂိုဏ်းလက်အောက်ရှိ အဆင့် ၂ စျေးနှစ်ခုကို အမျိုးအမည်မသိရသော ကျင့်ကြံသူများ ဝင်ရောက်တိုက်ခိုက်သွားသည်။ စျေးကိုစောင့်ကြပ်သူနှစ်ဦးဖြစ်သည့် ဝမ်တုန်လဲ့နှင့် မားချန်းရှန်တို့နှစ်ဦးမှာ တိုက်ခိုက်ခံရချိန်တွင် ရှိမနေသောကြောင့် စျေးများကို ကာကွယ်ထားသည့် ခံစစ်အစီအရင်မှာ အလွယ်တကူပင် ကျိုးပျက်သွားသလို စျေးရှိရတနာအားလုံး လုယက်ခံလိုက်ရသည်။ စျေးရှိ ကျင့်ကြံသူအားလုံးလည်း အသတ်ခံလိုက်ရသည်။
ဤဖြစ်ရပ်ကြောင့် လျှိုယွင်ဂိုဏ်း၏ ထိပ်သီးအကြီးအကဲများမှာ ဒေါသပေါက်ကွဲပြီး လျှိုယွင်ဂိုဏ်း၏ ကျီဖုအဆင့်ကျင့်ကြံသူ ကျင်းဝူချန်မှ ကျန်ရှိနေသော အခြေခံတည်ဆောက်မှုအဆင့် နှင့် ချီသန့်စင်ခြင်းအဆင့် ကျင့်ကြံသူများကို ဦးဆောင်၍ အဆိုပါကိစ္စအား စုံစမ်းအရေးယူရန် ခရီးထွက်လာရာ လမ်းခုလတ်တွင် ချုံခိုတိုက်ခိုက်ခံလိုက်ရပြန်သည်။ ကျန်းဝူချန်မှာ ရုတ်တရက်ရောက်လာသော ကျီဖုအဆင့် ကျင့်ကြံသူသုံးဦး၏ ညှပ်ပူးညှပ်ပိတ် တိုက်ခိုက်မှုကို ခံလိုက်ရပြီး သေဆုံးသွားသလို တပည့်များဖြစ်သည့် အခြေခံတည်ဆောက်မှုအဆင့် နှင့် ချီသန့်စင်ခြင်းအဆင့် ကျင့်ကြံသူများမှာလည်း အမည်မသိ ကျီဖုအဆင့်ကျင့်ကြံသူသုံးဦးနှင့် နောက်ပါများ လက်ချက်ဖြင့် တစ်ယောက်မကျန် အမြစ်ဖြုတ်သုတ်သင်ခံလိုက်ရသည်။
ဇာတ်လမ်းက သည်တွင်မရပ်ဘဲ ကန်းယန်ဂိုဏ်းသို့ နတ်ဆိုးကျင့်ကြံသူနှိမ်နင်းရာတွင် ပါဝင်ရန် ခရီးသွားနေသော လျှိုယွင်ဂိုဏ်းသားများမှလွဲ၍ ကျန်ရစ်ခဲ့သော လျှိုယွင်တစ်ဂိုဏ်းလုံးနီးပါးမှာ အမည်မသိကျင့်ကြံသူများလက်ချက်ဖြင့် ချေမှုန်းသုတ်သင်ခံလိုက်ရပြန်သည်။ ကန်းယန်ဂိုဏ်းတွင် ရောက်ရှိနေသော လျှိုယွင်ဂိုဏ်းသားများနှင့် ကျီဖုအဆင့် ဂိုဏ်းချုပ်အကြီးအကဲဖြစ်သူ ရွှီဟိုင်သာ ကံကောင်းထောက်မ၍ မကျန်ခဲ့ပါက ယွင်နိုင်ငံတွင် နှစ်ထောင်ချီရပ်တည်လာခဲ့သည့် ကျီဖုအဆင့်ရှိသော လျှိုယွင်ဂိုဏ်းကြီးမှာ အစအနမကျန် ပျောက်ကွယ်သွားမည်ဖြစ်သည်။
အဆိုပါတုန်လှုပ်ဖွယ်သတင်းက အင်မော်တယ်မျိုးနွယ်စုအားလုံးနှင့် ဂိုဏ်းအသီးသီးကို တပ်လှန့်လိုက်သလို ဖြစ်သွားသည်။ လူအားလုံးက ထိုဖြစ်ရပ်အတွက် ယဲ့အင်မော်တယ်မိသားစုကို သဘာဝကျစွာပင် လက်ညှိုးထိုးကြသည်။ အဆိုပါအဖြစ်အပျက်မတိုင်မီ ယဲ့မိသားစုက ဂိုဏ်းအသီးသီးနှင့် မျိုးနွယ်စုအသီးသီးမှ အကြီးအကဲများကို သံသယဖြစ်ဖွယ် ဆက်သွယ်စည်းရုံးခဲ့သည်မဟုတ်ပါလား။ များမကြာခင် ချန်ထျန်းဂိုဏ်း၊ လော့ရှားမန်ဂိုဏ်းနှင့် ကျန်းမျိုးနွယ်စုတို့ စုပေါင်းပြီး ယဲ့မိသားစုအိမ်တော်သို့ ချီတက်ကြတော့သည်။ သို့သော် ယဲ့အိမ်တော်ရောက်သည့်အခါ ယဲ့မျိုးနွယ်စုဝင်အများအပြားတို့မှာ အတုံးအရုံး သေဆုံးနေကြသည်ကို တုန်လှုပ်ဖွယ်တွေ့ရပြီး အလောင်းများသည်လည်း နတ်ဆိုးကျင့်ကြံသူများ၏ ယဇ်ပူဇော်ခြင်းခံရသလို ခြောက်ကပ်လျက်ရှိသည်။ ကျီဖုအဆင့်ကျင့်ကြံသူများ၏ ခန့်မှန်းချက်အရ ယဲ့ဖေးယန်နှင့် အပေါင်းအပါသုံးဦး၏ လက်ချက်ဖြစ်သည်ဟု ဆိုကြသည်။
ထိုခန့်မှန်းချက်သာမှန်သည်ဆိုလျှင် မိမိ၏ မျိုးနွယ်စုတစ်ခုလုံးနှင့် ယဲ့အိမ်တော်ရှိ သာမန်သေမျိုးလူသား သောင်းဂဏန်းကို သတ်ဖြတ်ပစ်သော ယဲ့ဖေးယန်တို့လေးဦးတို့၏ အကြံအစည်မှာ သွေးပျက်ဖွယ် ကြမ်းကြုတ်လွန်းလှသည်။
ထို့ထက်အရေးကြီးသည်မှာ အဆိုပါ သွေးပျက်ဖွယ် ကပ်ဘေးကြီးဆိုက်ရောက်ပြီး ဂိုဏ်းကြီးနှစ်ခု ပျက်သုဉ်းလုမတတ် ဖြစ်သွားသည်ကို ကျီဖုအဆင့် မျိုးနွယ်စုများနှင့် ဂိုဏ်းအသီးသီးမှာ ကြိုတင်ခန့်မှန်းနိုင်ခြင်းမရှိခဲ့သလို တုံ့ပြန်နိုင်စွမ်းလည်း မရှိဘဲ လက်ပိုက်ကြည့်နေခဲ့ရခြင်းဖြစ်သည်။ ကျင့်ကြံသူအားလုံးအနေနှင့် အဆိုပါဖြစ်စဉ်၏ နောက်ကွယ်တွင် ယဲ့ဖေးယန်တို့ကို ကြိုးကိုင်နေသူများ ရှိကိုရှိရမည်ဟု ယူဆထားကြသည်။
ထိုအချိန်တွင် ကျောက်စိမ်းဖြူစျေးရှိ ကျောက်စိမ်းဖြူနန်းတော်တွင် ကျန်းချန်ရွှမ်တို့ ဇနီးမောင်နှံသည် အစီအရင်ထုတ်လွှင့်နည်းသုံး၍ ယွီဟွာတောင်တွင် ရှိနေသော ရှန်းတောက်မင်နှင့် ရှန်းရူရွှမ်၊ အဆင့်၂ ဝိညာဉ်သွေးကြောကို စောင့်ကြပ်နေသော ရွှီချန်းဟယ်တို့နှင့် အရေးပေါ်စည်းဝေးလျက်ရှိသည်။ ရှန်းတောက်မင်က
“ယဲ့မျိုးနွယ်စုက ကျန်နေသေးတဲ့ အခြေခံတည်ဆောက်မှုအဆင့်နဲ့ အထက် ကျင့်ကြံသူတွေ နတ်ဆိုးလမ်းစဉ်နောက် လိုက်သွားပြီလို့ သတင်းကြားတယ်၊ ယဲ့မျိုးနွယ်စုကနေ ကန်းယန်ဂိုဏ်းကို စေလွှတ်ထားတဲ့အထဲက ခေါင်းဆောင်တချို့လည်း ထွက်ပြေးသွားတယ်။ အခုကန်းယန်ဂိုဏ်းက ကျန်ရစ်ခဲ့တဲ့ ယဲ့မျိုးနွယ်စုဝင်အားလုံးကို ထိန်းသိမ်းထားတယ်။ နောက်ပြီး လျှိုယွင်ဂိုဏ်းရဲ့ ဂိုဏ်းချုပ်အကြီးအကဲ အင်မော်တယ်ရွှီဟိုင်လည်း လုပ်ကြံခံရတယ်။ လျှိုယွင်ဂိုဏ်းရဲ့ ဆုံးရှုံးမှုတွေကြောင့် နတ်ဆိုးကျင့်ကြံသူနှိမ်နင်းတဲ့ စစ်ဆေးရေးမှာ မဆင်ခြင်ဘဲ ဒေါသတကြီးလှုပ်ရှားရာကနေ နတ်ဆိုးကျင့်ကြံသူတွေရဲ့ ထောင်ချောက်မိသွားခဲ့တာ၊ ဒါပေမဲ့ ကံကောင်းထောက်မစွာနဲ့ အသက်တော့မသေခဲ့ဘူး။ ဒဏ်ရာအကြီးအကျယ် ရသွားတယ်လို့ပြောတယ်။ ကျုပ်တို့ ရှန်းမျိုးနွယ်စုကတော့ ဘာအထိအခိုက်မှမရှိသေးပါဘူး”
ထို့နောက် ရှန်းတောက်မင်၏ မျက်နှာအမူအရာမှာ တင်းမာလေးနက်လာပြီး
“နတ်ဆိုးကျင့်ကြံသူတွေက လမ်းမှန်ကျင့်ကြံသူတွေနဲ့ ဂိုဏ်းအဖွဲ့တွေအကြား ချစ်ကြည်မှုကို သွေးထိုးဖျက်ဆီးနေတာ သိသာတယ်။ နောက်ထပ် ဘယ်မိသားစုက ယဲ့မိသားစုလမ်းစဥ်နောက် ထပ်လိုက်သွားမလဲ မပြောနိုင်ဘူး”
နတ်ဆိုးကျင့်ကြံသူများ၏ အကြံအစည်မှာ ပိရိကောက်ကျစ်လှသည်။ အထူးသဖြင့် ကန်းယန်ဂိုဏ်းအနေနှင့် သီးခြားရပ်တည်နေသော မျိုးနွယ်စုများနှင့် ဂိုဏ်းများအပေါ် သံသယဝင်လာပါက နတ်ဆိုးသားရဲအရေး မတိုင်ခင်တွင်ပင် ယွင်နိုင်ငံမှာ တစ်စစီပြိုလဲသွားနိုင်ပေသည်။ ထိုအချက်ကို နားလည်သော ကျန်းချန်ရွှမ်နှင့် ကျန်နှစ်ဦးမှာလည်း နှုတ်ဆိတ်လျက်ရှိသည်။ ယခုအခြေအနေမှာ အမှားမခံနိုင်သော ထိလွယ်ရှလွယ် အနေအထားမျိုးဖြစ်သလို သည်အတိုင်းဆက်သွားပါက မျိုးနွယ်စုများနှင့် ဂိုဏ်းများအားလုံး တစ်ညီတညွတ်တည်း စုပေါင်းပြီး နတ်ဆိုးသားရဲကပ်ဘေးကို ရင်ဆိုင်ခုခံနိုင်တော့မည်မဟုတ်ပါ။
“ဒါဖြင့်ဘယ်လိုလုပ်သင့်သလဲ၊ ဘယ်လိုလုပ်ရမှာလဲ”
ရွှီချန်းဟယ်က မေးခွန်းထုတ်သည်။ အားလုံး၏ အကြည့်က ရှန်းတောက်မင်ထံ ရောက်သွားသည်။
“စစ်ဆေးရမယ်။ ရှန်းမျိုးနွယ်စုဝင်အားလုံး အစစ်ဆေးခံရမယ်။ မျိုးနွယ်စုထဲက လူအားလုံး အသိစိတ်စင်မြင့်ပေါ်တက်ပြီး မိစ္ဆာလမ်းစဥ်နောက် လိုက်နေမှုရှိမရှိ၊ နတ်ဆိုးကျင့်ကြံသူတွေနဲ့ ရှိမရှိဆိုတာကို စစ်ဆေးရလိမ့်မယ်၊ ခင်ဗျားတို့ ကိုယ်စီတာဝန်ယူထားတဲ့ နေရာတွေမှာ အဆင့်၂ အသိစိတ်စင်မြင့်တွေရှိတယ်၊ အချိန်ကျတာနဲ့ ချီသန့်စင်ခြင်းအဆင့် ကျင့်ကြံသူအားလုံးကို စင်မြင့်ပေါ်တက်ခိုင်းပြီး စစ်ဆေးပါ။ အခြေခံတည်ဆောက်မှုအဆင့် ကျင့်ကြံသူတွေကိုတော့ အဆင့် ၃ နလုံးထွင်းစစ်ဆေးခြင်း အဆောင်ပစ္စည်းတွေသုံးပြီး စစ်ဆေးပါ။ သူတို့ထဲက နတ်ဆိုးကျင့်ကြံသူတွေနဲ့ ဆက်စပ်နေကြောင်း ပေါ်လာရင် ကျုပ်ကိုတင်ပြစရာမလိုဘူး၊ ချက်ချင်းသုတ်သင်ပစ်ပါ”
ရှန်းတောက်မင်၏ လေသံမှာ စိုးရိမ်ပူပန်ဟန်နှင့် ဒေါသမာန်များ ပေါင်းစပ်ကာ တည်ကြည်လေးနက်နေသည်။ ယဲ့မိသားစုသည် ကျန်းချန်ရွှမ်နှင့် ရှန်းရူယန်တို့ နှစ်ဦးကိုလည်း စည်းရုံးခဲ့သေးကြောင်း သူသိပြီးသောအခါ အတော်ပင်တုန်လှုပ်သွားမိခဲ့သည်။ ကျန်းချန်ရွှမ်တို့သာ ယဲ့ဖေးယန်၏စကားကို နားယောင်ခဲ့ပါက လျှိုယွင်ဂိုဏ်းနေရာတွင် ရှန်းမျိုးနွယ်စုဖြစ်သွားနိုင်ချေရှိသည် မဟုတ်ပါလား။
သူတို့လေးဦး တိုင်ပင်ဆွေးနွေးနေချိန် ကန်းယန်ဂိုဏ်းဌာနချုပ်မှ ကီလိုမီတာ ထောင်ချီဝေးသော ရေကန်ကြီးတစ်ကန်အနီးတွင် နန်းကုန်းပိုင်ကျန်းသည် သူ့ရှေ့မှောက်ရှိ လူအုပ်ကြီးကို စူးစူးရဲရဲ အကဲခတ်နေသည်။ ထို့နောက် နန်းကုန်းသည် သူ့လက်တစ်ဖက်ကို အသာဝှေ့ယမ်းလိုက်သည်။ ကျယ်လောင်သော အသံတစ်ခု မြည်ဟိန်းသွားပြီး မီတာဒါဇင်ပေါင်းများစွာ မြင့်သော လှေကားရှည်ကြီးတစ်ခု ပေါ်လာသည်။ ထိုလှေကားကြီးသည် ကန်းယန်ဂိုဏ်းပိုင်ဆိုင်သော အသိစိတ်စင်မြင့် နှစ်ခုအနက် တစ်ခုဖြစ်ပြီး အဆင့်၄ ရှိသည်။ ထို့နောက် နန်းကုန်းပိုင်ကျန်းက မတုန်မလှုပ်လေသံဖြင့်
“မင်းတို့အားလုံး ဘာရာထူး ဘာအဆင့်ရှိရှိ အကုန်လုံး ဒီပေါ်တက်ပြီး စစ်ဆေးခံရမယ်”
***