အခန်း (၇၆-၈၀)
Vol. 4 Ch. 76-80
နှစ်တစ်ရာကျင့်ကြံပြီးနောက်
အခန်း ၇၆ ။ အင်မော်တယ်ပိုင်လုံ
ယွင်တုန်းရှန်က တစ်ခုစဉ်းစားမိဟန်နှင့်
“အစောပိုင်းက နတ်ဆိုးသားရဲတွေ စုပြုံတိုက်ခိုက်မှုမျိုး မကြာခင်ထပ်ဖြစ်လာနိုင်တဲ့အတွက် ရွှေသံချပ်ကာရုပ်သေးအဆောင်တွေ ကြိုလုပ်ထားလို့ရလား၊ လိုအပ်တဲ့ကုန်ကြမ်းပစ္စည်းတွေကို ပြောပါ၊ အကုန်ဖြည့်ဆည်းပေးပါ့မယ်၊ အလကားလုပ်ခိုင်းမှာမဟုတ်ဘူး၊ ဒီရုပ်သေးအဆောင်တွေ လုပ်ပေးတဲ့အတွက် ထိုက်သင့်တဲ့ ချီးမြှင့်မှုမျိုး ပေးမှာပါ”
ယွင်တုန်းရှန်မှာ သိသိသာသာပင် ကျန်းချန်ရွှမ်၏ အကျိုးအတွက် လမ်းခင်းပေးလိုက်ခြင်းဖြစ်သည်။ သူ့ဆုံးဖြတ်ချက်မှန်ကန်ခြင်း၏ အကျိုးဆက်ကို ယခုပင် ခံစားနေရပြီဖြစ်သည်။
ကျန်းချန်ရွှမ်အနေနှင့် အဆင့်၂ အလယ်အဆင့် ရုပ်သေးအဆောင်ပြုလုပ်နည်းကို ရရှိရန် အဆင့်၂ အနိမ့်စား အဆောင် ၁၀ ခုကို ရေးဆွဲရမည့်ဟူသော စနစ်၏သတ်မှတ်ချက်ကို သတိရမိလိုက်သည်။ ယခုယွင်တုန်းရှန်၏ ကမ်းလှမ်းချက်မှာ ရေကန်အသင့် ကြာအသင့်ဖြစ်နေသည်။
ကျန်းချန်ရွှမ်က တွေးတွေးဆဆနှင့်
“လာမဲ့တိုက်ပွဲအတွက် ရုပ်သေးအဆောင်တွေ စီရင်ထားဖို့က ခက်ခဲတဲ့ကိစ္စမဟုတ်ပါဘူး၊ ဒါပေမဲ့ ကုန်ကြမ်းပစ္စည်းကတော့ လိုအပ်ပါတယ်”
ထို့နောက် လိုအပ်သော ကုန်ကြမ်းပစ္စည်းများကို ရွတ်ပြလိုက်ရာ ယွင်တုန်းရှန်နှင့် စီနီယာပုဂ္ဂိုလ်များမှာ အံ့သြကုန်ကြသည်။
“ရွှေဝါရောင်ကျောက်စိမ်းနဲ့ ကောင်းကင်ဝိဉာဉ်နှင်းရေစက် ဟုတ်လား”
ကျန်းချန်ရွှမ် တောင်းဆိုသောပစ္စည်းများကို သူတို့အားလုံး ကောင်းကောင်းသိပါသည်။ ထိုပစ္စည်းများမှာ လူကြိုက်များလှသည့် ရတနာပစ္စည်းမျိုးမဟုတ်ဘဲ ကျင့်ကြံသူအနည်းစုသာ လိုလိုလားလား ရှာဖွေတတ်ကြသည့် ပစ္စည်းများဖြစ်သည်။ သို့သော် မကြာမီအတွင်း ထိုပစ္စည်းများ၏ စျေးနှုန်းမှာ အရှိန်နှင့်ထိုးတက်တော့မှာ သေချာပါသည်။ ယွင်တုန်းရှန်က ခေါင်းညိတ်လိုက်ပြီး
“ကိစ္စမရှိပါဘူး လိုအပ်တဲ့ပစ္စည်းတွေ ပို့ပေးလိုက်မယ်”
ထို့နောက် ကျန်းချန်ရွှမ်က နှုတ်ဆက်စကားဆိုပြီး အဆောက်အအုံအပြင်သို့ အရင်ထွက်လာလိုက်သည်။ ရှန်းရူယန်က အပြင်တွင်စောင့်ဆိုင်းနေပြီး သူ့ကိုမြင်သည်နှင့် ခပ်သုတ်သုတ်လျှောက်လာကာ စိုးရိမ်တကြီး မေးရှာပါသည်။
“ယောက်ျား ဘိုးဘေးက ရှင့်ကိုဘာပြောလွှတ်လိုက်လဲ”
ကျန်းချန်ရွှမ်က ပြုံးလျက်
“မစိုးရိမ်ပါနဲ့”
နှစ်ယောက်သား စကားတပြောပြောနှင့် ကျင့်ကြံရာလှိုဏ်ဂူသို့ ပြန်လာခဲ့ကြသည်။ လမ်းတွင် ဖြစ်ခဲ့သမျှ အကြောင်းစုံကို ပြောပြလိုက်ရာ ရူယန်က
“ရှင့်ဆုံးဖြတ်ချက်မှန်တယ်၊ ကျွန်မ အင်မော်တယ်ပိုင်လုံအကြောင်း ကြားဖူးတယ်၊ ရှင့်လိုလူငယ်တစ်ယောက်ဆီက အဖိုးတန်တာတစ်ခုယူပြီးရင် တန်ဖိုးကြီးတာတစ်ခု ပြန်မပေးဘဲနေမှာ မဟုတ်ဘူး၊ ပြဿနာတစ်ခုတော့ရှိတယ်။ ရှင့်ရဲ့ ရွှေရောင်သံချပ်ကာရုပ်သေးက နောင်ဆိုရင် ရှင်တစ်ဦးတည်းပိုင်ဆိုင်တဲ့ လက်နက်မဟုတ်တော့မှာကိုပဲ”
ကျန်းချန်ရွှမ်က စိုးရိမ်ဟန်မပြဘဲ
“ဒါကို ဆုံးရှုံးမှုလို့ သတ်မှတ်လို့မရဘူး၊ အနာဂတ်မှာ ကိုယ်တို့ရရှိမဲ့အကျိုးက ဒီထက်အဆများစွာ ပိုနေလိမ့်မယ်”
ကျန်းချန်ရွှမ်၏ စကားကိုကြားပြီးနောက် ရှန်းရူယန်၏ နှလုံးခုန်နှုန်းမြန်ဆန်လာသည်။ သူတို့နှစ်ဦးမှာ စိတ်ချင်းဆက်သွယ်နေသည့်အတွက် ကျန်းချန်ရွှမ်၏ ဆိုလိုရင်းကို ချက်ချင်းနားလည်လိုက်သည်။ ရှန်းရူယန်က ခေါင်းညိတ်ရင်း
“ဒီအရေးကြီးပြီးရင် ကျွန်မတို့နှစ်ယောက်ကို အင်မော်တယ်ပိုင်လုံက သတိထားမိမှာအမှန်ပဲ၊ ဒီအခွင့်အရေးကို အရမ်းလိုချင်နေတဲ့ ကျီဖုအဆင့်ကျင့်ကြံသူတွေတင် မနည်းဘူး”
စကားတပြောပြောနှင့်ပင် နေထိုင်ရာဂူဗိမာန်တို့ ရောက်လာကြပြီး ကိုယ်စီကျင့်ကြံရာအခန်းများ အတွင်းသို့ ဝင်ရောက်အနားယူလိုက်ကြတော့သည်။
ရက်အနည်းငယ် ကြာပြီးနောက်…
ယွင်တုန်းရှန်က ကတိအတိုင်း ရွှေဝါရောင်ကျောက်စိမ်းနှင့် ကောင်းကင်ဝိဉာဉ်နှင်းရေစက်များကို အများအပြားပို့ပေးလိုက်သည်။ ရရှိသောကုန်ကြမ်းပမာဏအရ ရုပ်သေးအဆောင် တစ်ဒါဇင်ခန့် ဖန်တီးစီရင်နိုင်မည်ဖြစ်သည်။ ကျန်းချန်ရွှမ်က စိတ်လှုပ်ရှားစွာ သက်ပြင်းချလိုက်မိသည်။ စွမ်းအားကြီးသူတစ်ဦး နောက်ကွယ်တွင်ရှိနေခြင်းသည် ကျင့်ကြံခြင်းခရီးတွင် အလွန်အရေးပါမှန်း သူသိလိုက်ရသည်။ အရင်ကဆိုလျှင် ရွှေဝါရောင်ကျောက်စိမ်းနှင့် ကောင်းကင်ဝိဉာဉ်နှင်းရေစက်ကို ရှာဖွေဖို့ သူ့အနေနှင့် အစွမ်းကုန်ကြိုးစားခဲ့သော်လည်း ၆ စုံသာရရှိခဲ့သည်။
အခြားပုဂ္ဂိုလ်များအတွက်တော့ ငှက်ပျောသီးနွှာစားရသည်ထက် လွယ်ကူနေတော့သည်။ ရရှိထားသော ကုန်ကြမ်းပစ္စည်းကိုတွက်၍ စနစ်မှသတ်မှတ်ထားသော အရေအတွက်ကို ပြည့်မီမမီ ခန့်မှန်းလိုက်သည်။ မပြည့်မီနိုင်လျှင် အဆောင်အရေအတွက် အနည်းငယ်သာ ပြုလုပ်မည်ဖြစ်သည်။ ကျန်းချန်ရွှမ်တစ်ယောက် ရွှေသံချပ်ကာရုပ်သေးအဆောင်များ စတင်ဖန်တီးနေသည့်အချိန်တွင် ကန်းယန်ဂိုဏ်းတပ်စွဲထားသော စစ်မြေပြင်ကောင်းကင်ထက်တွင် ဂိုဏ်း၏အထွတ်အထိပ်သုံးဦးအနက် တစ်ဦးဖြစ်သူ ကျန်းပိုင်လုံသည် သူ့လက်ထဲရှိ ကျောက်စိမ်းပြားကို စိတ်ဝင်တစား ကြည့်ရှုနေသည်။
ထိုပုဂ္ဂိုလ်မှာ အသက်၄၀ကျော်ခန့်ရှိပြီး နူးညံ့ယဥ်ကျေးသည့် အသွင်ကိုဆောင်နေသည်။ သူ့ကိုမမြင်ဖူးသူလူစိမ်းတစ်ဦးသာ သူ့ကိုပထမဆုံးအကြိမ်တွေ့ပါက စာပေပညာရှင်တစ်ဦးနှင့် တူသည့် အဆိုပါပုဂ္ဂိုလ်ကို ရွှေအမြုတေအဆင့်ရှိ ကျန်းဖေးလုံဟုပြောလျှင် ယုံနိုင်မှာမဟုတ်ပေ။
“စိတ်ဝင်စားစရာပဲ”
ကျန်းဖေးလုံက ကျောက်စိမ်းပြားကို ပြန်ချလိုက်ပြီး ပြုံးလျက်ရေရွတ်လိုက်သည်။ ထို့နောက် သူ့ဘေးတွင်ရှိနေသော ဆံပင်အဖြူရောင်ရှိသည့် မိန်းကလေးတစ်ဦးကို လှည့်ကြည့်ရင်း ပြောလိုက်ပြန်သည်။
“မန်ရွှယ် မင်းရဲ့ရှန်းမိသားစုမှာ စိတ်ဝင်စားဖို့ကောင်းတဲ့ သားမက်တစ်ယောက်ရှိနေမှန်း ငါမသိခဲ့ပါလား”
“ ရှင်ဒီလိုမချီးကျူးတာ အတော်ကြာပြီမှတ်တယ်”
မန်ရွှယ်က ပြုံးရင်းပြောလိုက်သည်။
“ဒါဖြင့် ရှင်ဘယ်လိုလုပ်ချင်သလဲ၊ လူငယ်တစ်ယောက်ရဲ့ပစ္စည်းကို အလကားသိမ်းယူမှာတော့ မဟုတ်ပါဘူးနော်”
“ဘယ်ဟုတ်မလဲ”
ကျန်းပိုင်လုံက ပြုံးရယ်ရင်း ခေါင်းခါပြလိုက်သည်။
“မင်းအထင်ကြီးနေတဲ့ ဒီလူငယ်လေးက ရွှေအမြုတေအဆင့်ရောက်ဖို့ အလားအလာကောင်းတယ်၊ သူနဲ့ငါမိတ်ဆွေဖွဲ့ထားသင့်တာပေါ့”
ထို့နောက် ကျန်းပိုင်လုံက တိုကင်ပြားတစ်ခုကို ထုတ်ယူလိုက်ပြီး လေထဲတွင် ပစ်မြှောက်ဆော့ကစားလိုက်သည်။
“မှော်စွမ်းအင်တချို့ ထည့်သွင်းထားတဲ့ သေခြင်းကင်းလွတ်ခွင့် အမိန့်ပြားက သူ့အတွက် ငါ့ရဲ့မိတ်ဆက်လက်ဆောင်ပဲ၊ ဒီအမိန့်ပြားကို လူကြုံတစ်ယောက်နဲ့ ထည့်ပေးလိုက်မယ်၊ ဒီအမိန့်ပြားက ရွှေအမြုတေအဆင့်အောက်က တိုက်ခိုက်မှုအားလုံးကနေ သူ့ကိုကာကွယ်ပေးနိုင်လိမ့်မယ်၊ ရွှေအမြုတေအဆင့် တိုက်ခိုက်မှုနဲ့ ရင်ဆိုင်ရရင်တောင် တစ်ကြိမ်တော့ ကာကွယ်ပေးနိုင်မယ်”
ရှန်းမန်ရွှယ်က ထိုအမိန့်ပြားကို မြင်လိုက်သောအခါ အံ့အားသင့်သွားပြီးနောက်မှ ပြုံးရယ်လျက်
“ယောက်ျား ရှင်လည်း ဒီကောင်လေးကို အထင်ကြီးနေတာပဲမလား”
ကျန်းပိုင်လုံက ပြုံးလျက်
“မင်းကို ဘာမှဖုံးကွယ်လို့မရပါလား”
ထို့နောက် ခေါင်းကိုတဆတ်ဆတ်ညိတ်ရင်း
“ငါ့အတွက် တန်ဖိုးအရမ်းကြီးတဲ့ပစ္စည်းမဟုတ်ပါဘူး မင်းရဲ့သားမက်လေးနဲ့ ရင်းနှီးမှုရဖို့ ဒီလောက်တော့ ရင်းရမှာပေါ့”
တစ်နှစ်ခွဲခန့်အကြာ…
ကျန်းချန်ရွှမ်သည် ရှန်းယွမ်လုံနှင့် ယွင်တုန်းရှန်တို့ ထောက်ပံ့ထားသည့် ကုန်ကြမ်းပစ္စည်းများကို အသုံးပြုပြီး ရွှေရောင်သံချပ်ကာရုပ်သေးများကို အောင်မြင်စွာဖန်တီးနိုင်ခဲ့ပြီဖြစ်သည်။ ထိုအချိန်မှာပင် စနစ်ထံမှ အချက်ပေးသံတစ်ခု ဝင်လာသည်။
***
နှစ်တစ်ရာကျင့်ကြံပြီးနောက်
အခန်း ၇၇ ။ လျှို့ဝှက်အကျပ်အတည်း
[ ဂုဏ်ပြုပါသည် စနစ်ပိုင်ရှင်၊ ရွှေရောင်သံချပ်ကာရုပ်သေး အဆောင် ၁၀ ခုကို ဆက်တိုက်ဖန်တီးပြီးပါပြီ၊ အဆင့်၂ အလယ်အဆင့် ရွှေရောင်သံချပ်ကာ ရုပ်သေးအဆောင်ပြုလုပ်နည်းကို လက်ခံရရှိပါသည်]
စနစ်ထံမှ အချက်ပေးသံကိုကြားပြီးနောက် ကျန်းချန်ရွှမ်သည် ကျေနပ်စွာဖြင့် ရေရွတ်လိုက်သည်။
“ငါထင်ထားတဲ့အတိုင်းပဲ”
ထို့နောက် ကျန်းချန်ရွှမ်သည် အဆင့် ၂ အလယ်အဆင့် ရွှေရောင်သံချပ်ကာ ရုပ်သေးအဆောင် စီရင်နည်းကို အသေးစိတ်လေ့လာပါတော့သည်။ အသုံးပြုသော ပစ္စည်းများမှာ အနိမ့်စားအဆင့် အဆောင်ဖန်တီးနည်းကဲ့သို့ပင် ကောင်းကင်ဝိဉာဉ်နှင်းရေစက်ကို လိုအပ်နေသေးသော်လည်း ရွှေဝါရောင်ကျောက်စိမ်းနေရာတွင် ရွှေဝါရောင်ဝိညာဉ်ကျောက်စိမ်း ပြောင်းသွားသည်။ ဝိညာဉ်တစ်လုံးသာ ပိုသော်လည်း ကုန်ကြမ်းနှစ်မျိုး၏ စျေးနှုန်းမှာ မိုးနှင့်မြေလို ကွာခြားပါသည်။
ရွှေဝါရောင်ကျောက်စိမ်းကို ရုပ်သေးအဆောင်ပြုလုပ်ရာတွင် အဓိကအသုံးပြုသည်ဟူသော သတင်းများ မပျံ့နှံ့မီက ကျောက်စိမ်းတစ်တုံးလျှင် ဝိညာဉ်ကျောက်တုံး ၁၀၀၀ သာရှိသော်လည်း ရွှေဝါရောင် ဝိညာဉ်ကျောက်စိမ်းမှာ တစ်တုံးလျှင် ၈၀၀၀ ခန့်ရှိ၍ အဆင့်၂ အမြင့်ဆုံးအဆင့် အကာအကွယ်ပစ္စည်းတစ်ခု၏ စျေးနီးပါးခန့်ရှိသည်။ ထို့အပြင် ရွှေဝါရောင်ဝိညာဉ်ကျောက်စိမ်း၏ အသုံးဝင်ပုံမှာလည်း များစွာပိုပါသည်။
ကျန်းချန်ရွှမ်အနေနှင့် အဆင့်၂ အမြင့်ဆုံးအဆင့် ရွှေရောင် သံချပ်ကာရုပ်သေး အဆောင်များကို ဖန်တီးနည်းအား ရရှိလိုပါက အဆင့်၂ အလယ်အဆင့် ရွှေရောင်သံချပ်ကာရုပ်သေး အဆောင်များကို အရေအတွက်မနည်း အရင်ဖန်တီးရမည်ဖြစ်၍ သူ့အတွက် အချိန်ယူ၍စောင့်ဆိုင်းရမည်ဖြစ်ကြောင်း နားလည်လိုက်သည်။ သို့သော် အဆင့်၂ အလယ်အဆင့် ရုပ်သေးအဆောင်သည် အနိမ့်စားအဆင့်ထက် အဘက်ဘက်က သာလွန်သည်။
အလယ်အဆင့် ရုပ်သေးအဆောင်မှ ဆင့်ခေါ်သည့် သံချပ်ကာစစ်သည်၏ တိုက်စွမ်းရည်မှာ အခြေခံတည်ဆောက်မှုပဉ္စမအဆင့်နှင့် ညီမျှသည့်အပြင် ကြာချိန်မှာလည်း နာရီဝက်ဖြစ်သည်။ အလယ်အဆင့်ရုပ်သေး၏ ဖောက်ခွဲစွမ်းအားသည်လည်း အခြေခံတည်ဆောက်မှု သတ္တမအဆင့် ကျင့်ကြံသူတစ်ဦးကို ကောင်းကောင်းခြိမ်းခြောက်နိုင်စွမ်းရှိပါသည်။ အချိန်အတန်ကြာပြီးနောက် ကျန်းချန်ရွှမ်သည် နောက်ထပ် ရွှေရောင်သံချပ်ကာ ရုပ်သေးအဆောင် ရှစ်ခုပြီးစီးသွားပြန်သည်။ နောက်ဆုံးအကြိမ်နှင့်ယှဥ်လျှင် သူ၏အမြန်နှုန်းမှာ သိသိသာသာ တက်လာပါသည်။ တစ်ချိန်တည်းတွင် ကျန်းချန်ရွှမ်သည် သူ၏ကျင့်ကြံမှုကိုလည်း ပစ်ထားခြင်းမရှိပါ။
ယခုအခါ အခြေခံတည်ဆောက်မှုပဥ္စမအဆင့် ကျင့်ကြံမှုပမာဏကို အမြင့်ဆုံးစုဆောင်းပြီးဖြစ်၍ ကျင့်ကြံမှုအဆင့် တိုးမြှင့်ပေးသည့် ဆေးပြားအသုံးပြုလိုက်လျှင် ဆဌမအဆင့်ကို တက်လှမ်းနိုင်ဖို့ ၅၀% အထက် ယုံကြည်မှုရှိနေပြီဖြစ်သည်။ ထို့အပြင် သူ့ထံတွင် ကျန်းပိုင်လုံပေးအပ်ထားသည့် သေခြင်းကင်းလွတ်အမိန့်ပြား ရှိနေပြီဖြစ်သည့်အတွက် ရွှေအမြုတေအဆင့်အောက်ရှိ တိုက်ခိုက်မှုအားလုံးကို အလွယ်တကူ ကျော်လွှားနိုင်မည်ဖြစ်သည်။ ထိုမျှမကသေး ထိုအမိန့်ပြားပိုင်ဆိုင်ထားသော ကျန်းချန်ရွှမ်ကို တော်ရုံဦးနှောက်ရှိသူများအနေနှင့် မလေးမစားပြုလုပ်ရဲမည် မဟုတ်ပေ။
လအနည်းငယ်ကြာပြီးနောက် ရွှေရောင်သံချပ်ကာ ရုပ်သေးအဆောင်ငါးခုကို ဘိုးဘေးရှန်းယွမ်လုံလက်ထဲအပ်လိုက်သည်။ ရှန်းယွမ်လုံ၏မျက်နှာမှာ မကောင်းလှကြောင်း ကျန်းချန်ရွှမ် သတိထားမိ၍ မနေနိုင်တော့ဘဲ မေးမြန်းမိလိုက်သည်။
“ဘိုးဘေးခင်ဗျား တစ်ခုခုဖြစ်ခဲ့လို့လား”
ရှန်းယွမ်လုံက တုံ့ဆိုင်းနေပြီးမှ ခေါင်းညိတ်ဝန်ခံလိုက်သည်။
ဇီယွမ်စီရင်စုကို နတ်ဆိုးသားရဲတွေ စီးမိသွားပြီလို့ အခုပဲသတင်းရတယ်”
“ဘာ”
ကျန်းချန်ရွှမ်မှာ ထိုစကားကြောင့် အကြီးအကျယ်တုန်လှုပ်သွားသည်။ ဇီယွမ်စီရင်စုမှာ သူတို့၏ပင်းချွမ်စီရင်စုနှင့် အသွင်တူညီပြီး ထိုနေရာတွင် စောင့်ကြပ်နေသော ကျီဖုအဆင့်ကျင့်ကြံသူ အရေအတွက်မှာ ပင်းချွမ်စီရင်စုရှိ ကျင့်ကြံသူအင်အားထက်ပိုများသည်ဖြစ်ရာ ထိုနေရာမျိုးကို နတ်ဆိုးသားရဲများ သိမ်းပိုက်နိုင်လိုက်သည့် အကြောင်းအရင်းကို နားမလည်နိုင်ဖြစ်နေသည်။ ဇီယွမ်စီရင်စုတွင် သေမျိုးလူသားနှင့် ကျင့်ကြံသူများ သန်းရာဂဏန်းခန့်နေထိုင်လျက် ရှိသည်ဖြစ်ရာ…
ကျန်းချန်ရွှမ်၏အတွေးကို ရိပ်မိဟန်နှင့် ရှန်းယွမ်လုံက
“ဟုတ်တယ် မင်းထင်သလိုပဲ ဇီယွမ်စီရင်စုက သေမျိုးလူသားနဲ့ ကျင့်ကြံသူ သန်းရာနဲ့ချီပြီး သားရဲတွေအစာဖြစ်ကုန်ပြီ၊ ဒီကောင်တွေက ငါတို့ပင်းချွမ်နဲ့ တခြားစီရင်စုနှစ်ခုကို ဦးတည်တိုက်ခိုက်သလို လှည့်စားသွားတာ၊ သူတို့ပစ်မှတ်အစစ်က ဇီယွမ် ပဲ”
“ဘယ်လိုလုပ်ပြီး”
ရှန်းယွမ်လုံ၏စကားကိုကြားပြီးနောက် ကျန်းချန်ရွှမ်၏ ကျောရိုးမှာ စိမ့်တက်သွားသည်။ သားရဲများ၏ အဓိကပစ်မှတ်မှာ သူတို့၏ပင်းချွမ်စီရင်စုသာ ဖြစ်ခဲ့လျှင် ဆိုသည့်အတွေးက ရုတ်တရက်ဖိစီးလာသည်။ ထို့ကြောင့်ပင် ပထမဆုံးသားရဲတိုက်ခိုက်မှု ပြီးဆုံးကတည်းက ပင်းချွမ်စီရင်စုကို သားရဲများလာရောက်တိုက်ခိုက်မှုမျိုး မရှိတော့ခြင်းဖြစ်လိမ့်မည်။ ထိုအချိန်တွင် နတ်ဆိုးသားရဲများမှာ အကြံအစည်တစ်ခုရှိနေမှန်း သူတို့ခန့်မှန်းမိသော်လည်း ဇီယွမ်စီရင်စုကို ပစ်မှတ်ထားတိုက်ခိုက်လိမ့်မည်ဟု မတွေးမိခဲ့ပါ။
“ဘိုးဘေး အဲဒီမှာ အခြေအနေဘယ်လိုရှိလဲ၊ ကန်းယန်ဂိုဏ်းက ဘာလုပ်ဖို့စီစဉ်ထားလဲ”
ဇီယွမ်စီရင်စုမှာ လူသားမျိုးနွယ်၏ပိုင်နက်တွင် ပါဝင်သောကြောင့် ကန်းယန်ဂိုဏ်းအနေနှင့် တစ်ခုခုမလုပ်ဘဲ နေမည်မဟုတ်ပါ။
ရှန်းယွမ်လုံက ခေါင်းညိတ်ပြလိုက်ရင်း
“လောလောဆယ် ကန်းယန်ဂိုဏ်းက အကြီးအကဲ နန်ကုန်းနဲ့ တျန့်ချီတို့ တပည့်အသီးသီးကို ဦးဆောင်ပြီး ဇီယွမ်စီရင်စုကို ထွက်သွားပြီလို့ကြားတယ်၊ တခြားနေရာတွေက အင်အားတွေကိုလည်း ဇီယွမ်ကိုပို့ဖို့ စီစဉ်ထားတယ်၊ ငါတို့ပင်းချွမ်စီရင်စုက ကျင့်ကြံသူအင်အားအချို့ကိုပါ အဲဒီကိုပို့ဖို့ စီစဉ်ထားပေမဲ့ ငါ့အစ်မ ရှန်းမန်ရွှယ်ရဲ့ကန့်ကွက်မှုကြောင့် ပျက်သွားတယ်”
“ဘာကြောင့်လဲ”
ရှန်းမန်ရွှယ်တွင် ကောင်းကင်ဘုံလျှို့ဝှက်တွက်ချက်ခြင်း နည်းစနစ် ရှိနေသည်ဖြစ်၍ ပင်းချွမ်မှ ကျင့်ကြံသူအင်အားကို လျော့နည်းသွားခြင်း မရှိစေရန် သူမ၏ရည်ရွယ်ချက်က ပင်းချွမ်စီရင်စုတွင် အကျပ်အတည်း တစ်ခုရှိနေခြင်းကြောင့်ပေလားဟု ကျန်းချန်ရွှမ်တစ်ယောက် တွေးမိပါသည်။ ရှန်းယွမ်လုံက သူ့မေးခွန်းကို မဖြေနိုင်မီအတွင်းမှာပင် အရေးပေါ်ခေါင်းလောင်းသံကြားလိုက်ရပြီး ကောင်းကင်ထက်တွင် မီးလျှံကြီးတစ်ခု တိုးထွက်လာသည်ကို တွေ့လိုက်ရပါသည်။
“မကောင်းတော့ဘူး နတ်ဆိုးသားရဲတွေ အလုံးအရင်းနဲ့ တိုက်ခိုက်ပြီဆိုတဲ့ လက္ခဏာပဲ”
နှစ်ဦးစလုံးမှာ အချိန်မဆွဲဘဲ ရှေ့တန်းသို့ အလျင်အမြန် ပြေးထွက်လာကြပါတော့သည်။
ခဏအကြာတွင်…
အဆင့်၃ အကာအကွယ် အစီအရင်တံတိုင်းကြီးအတွင်း၌ ကျင့်ကြံသူအားလုံးစုဝေးပြီးဖြစ်သည်။ ယွင်တုန်းရှန်က တံတိုင်းအပြင်ဘက်ရှိ စစ်မြေပြင်နှင့်အပြည့် သားရဲအုပ်ကြီးကို ကြည့်လိုက်သည်။ ထို့နောက် တံတိုင်းအတွင်းရှိ မျက်နှာများတင်းမာနေသော ကျင့်ကြံသူအားလုံးကို ကြည့်လိုက်ပြန်သည်။
“ စိတ်မကောင်းပေမဲ့ အခြေအနေတွေက ထိန်းချုပ်လို့မရတော့ဘူး၊ အခုကျုပ်တို့ကို ဝိုင်းရံထားတဲ့ နတ်ဆိုးသားရဲအရေအတွက်က ဇီယွမ်စီရင်စုကိုဖျက်ဆီးသွားတဲ့ သားရဲအုပ်ကြီးနဲ့ တန်းတူရှိတယ်”
ယွင်တုန်းရှန်၏ စကားကြောင့် လူအုပ်ကြီးမှာ ကြက်သေသေငိုင်သွားကြသည်။ ထျန်းချင်က
“မဖြစ်နိုင်တာ နတ်ဆိုးသားရဲအုပ်ကြီးက ဇီယွမ်စီရင်စုအနားမှာပဲ ရှိသေးတယ်၊ အဲဒီသားရဲအုပ်ကြီးအင်အားနဲ့တန်းတူ နောက်ထပ် သားရဲအုပ်ကြီးက ဒီကိုရောက်လာစရာ အကြောင်းမရှိဘူး”
***
နှစ်တစ်ရာကျင့်ကြံပြီးနောက်
အခန်း ၇၈ ။ ဉာဏ်အလင်းပွင့်ခြင်း
ကျန်ပုဂ္ဂိုလ်အားလုံးမှာလည်း ထျန်းချင်နှင့် တစ်သဘောတည်းရှိပြီး ပင်းချွမ်စီရင်စုကို ယခုတိုက်ခိုက်ရန်ပြင်နေသည့် သားရဲတပ်ကြီး မည်သည့်နေရာမှ မည်သို့မည်ပုံ ရောက်ရှိလာသည်ကို နားလည်နိုင်ခြင်းမရှိကြပါ။ သို့မဟုတ် နတ်ဆိုးသားရဲမှာ တစ်ဖွဲ့တည်းမဟုတ်ဘဲ နောက်ထပ်နတ်ဆိုးအင်အားစုများ ပါဝင်ပတ်သက်နေသလားဟု တွေးမိကြကာ လူအားလုံးမှာ ကျောရိုးများစိမ့်သွားသည့်အထိ တုန်လှုပ်မိကုန်ကြသည်။ ယွင်တုန်းရှန်သည် လေးနက်တည်ကြည်သော အမူအရာနှင့် ခေါင်းညိတ်ပြလိုက်ပြီး
“အားလုံးတွေးနေကြတဲ့ အတွေးက မှန်ပါတယ်၊ ဒီနတ်ဆိုးသားရဲအဓိကရုဏ်းမှာ သီးခြားတောင်တန်းပေါ်က ဝံပုလွေဘုရင်ခေါင်းဆောင်တဲ့ အင်အားစုတစ်ခုတည်း ပါဝင်တာမဟုတ်ဘဲ မှင်စပါးအုံးမြွေတောင်ပေါ်က လေနက်မြွေဘုရင်လည်း ပါဝင်နေပါတယ်”
“ဘာ”
ယွင်တုန်းရှန်၏စကားကြောင့် ကျင့်ကြံသူအားလုံး တုန်လှုပ်သွားမိကြသည်။ သည်အရေးအခင်းကို အစပျိုးခဲ့သူမှာ သီးခြားတောင်တန်းပေါ်တွင် နေထိုင်သည့် ဝံပုလွေဘုရင်ဖြစ်ပြီး ထိုသူသည် လူသားမျိုးနွယ်၏ အကြီးဆုံးရန်သူတော်များအနက် တစ်ဦးဖြစ်သည်။ လွန်ခဲ့သည့် နှစ် ၆၀၀ အတွင်း ဖြစ်ပွားခဲ့သမျှသော နတ်ဆိုးသားရဲအဓိကရုဏ်းအားလုံးသည် အဆိုပါနတ်ဆိုးဘုရင်၏ လက်ချက်ဖြစ်သည်။ သို့သော် ယခုအခါတွင် လေနက်မြွေဘုရင်ပါ ဤပဋိပက္ခတွင် ပါဝင်ပတ်သက်လာပြီဖြစ်သည်။
လေနက်မြွေဘုရင်၏ စွက်ဖက်ပါဝင်လာမှုကို သူတို့အားလုံး ကြိုတင်ခန့်မှန်းနိုင်စွမ်း မရှိခဲ့ပါ။ သူတို့၏နတ်ဘုရားစိတ်အာရုံများကို တစ်ယောက်ယောက်က အကြံအစည်နှင့် တမင်ပိတ်ဆို့ခဲ့ခြင်းဖြစ်နိုင်သည်။ မဟုတ်လျှင် ရွှေအမြုတေအဆင့်ရှိ ကျန်းပိုင်လုံနှင့် ကောင်းကင်ဘုံတွက်ချက်နည်းစနစ်ပိုင်ရှင် ရှန်းမန်ရွှယ်တို့အနနှင့် ကြိုတင်မသိဘဲ နေလိမ့်မည်မဟုတ်ပါ။
“ဒါဆို ဘယ်လိုလုပ်ကြမလဲ”
တစ်ယောက်သောသူ၏မေးခွန်းကို ယွင်တုန်းရှန်က တည်တည်ငြိမ်ငြိမ်နှင့်ပင် ဖြေကြားလိုက်သည်။
“ကျုပ်ဆရာကို အကြောင်းကြားပြီးပြီ၊ သူနဲ့ စီနီယာပုဂ္ဂိုလ်တွေ အမြန်ဆုံးရောက်လာကြလိမ့်မယ်၊ ဒီအတောအတွင်းမှာ ကျုပ်တို့တာဝန်က ပင်းချွမ်စီရင်စုကို သားရဲတွေလက်ထဲ မကျသွားအောင် အစွမ်းကုန်ခုခံဖို့ပဲ၊ ကျုပ်တို့တတ်နိုင်တာ ဒါပဲရှိတယ်”
ထို့နောက် ယွင်တုန်းရှန်၊ ရှန်းယွမ်လုံ နှင့် ထျန်းချင်တို့၏ ဦးဆောင်မှုအောက်တွင် လူအားလုံးမှာ ခံတပ်များ၊ အရံအတားများ ပြင်ဆင်ကြသည်။ ကျန်းပိုင်ယန်နှင့် ဆောင်ဟွေ့တို့မှာ မူလအစီအစဉ်အတိုင်း ပင်းချွမ်စီရင်စု၏ မြောက်ပိုင်းကို ဆက်လက်စောင့်ကြပ်မည်ဖြစ်သည်။ မကြာမီတွင် အကာအရံအစီအရင်၏ အပြင်တွင် နတ်ဆိုးသားရဲများ အပြည့်အဝစုစည်းမိကြသည်။
ထိုနတ်ဆိုးသားရဲတို့မှာ အသေခံအမိန့် ပေးထားခံရသည့်အလား အဆင့်၃ အကာအရံအစီအရင် စက်ဝန်းကို အဆက်မပြတ် ပြေးဝင်ပစ်ဆောင့်ကြသည်။
ဒုန်း ဒုန်း ဒုန်း!
တစ်ခဏချင်းတွင် နတ်ဆိုးသားရဲအများအပြား သေဆုံးကုန်ကြသော်လည်း သားရဲအုပ်ကြီးမှာ နောက်ဆုတ်ခြင်းမရှိ ဆက်လက်ထိုးနှက်ပစ်တိုက်လျက်ရှိသည်။ ထိုမြင်ကွင်းကိုကြည့်ရင်း ယွင်တုန်းရှန်၊ ရှန်းယွမ်လုံနှင့် ထျန်းချင်တို့၏ စိတ်များမှာ မကြုံစဖူးလေးပင်နေကြသည်။ ရှန်းယွမ်လုံက
“ဒီအတိုင်း ရပ်ကြည့်နေလို့မဖြစ်တော့ဘူး၊ ဒီကောင်တွေထဲက အဆင့်နိမ့်သားရဲတွေကို အသေခံခိုင်းပြီး ကျုပ်တို့အစီအရင်ကို အားပျော့အောင်လုပ်နေတာ”
ထျန်းချင်က ခေါင်းညိတ်လျက် ထောက်ခံလိုက်သည်။
“ဟုတ်တယ် အစီအရင် အားပျော့လာရင် တဖြည်းဖြည်းနဲ့ တည်ငြိမ်မှုနည်းလာလိမ့်မယ်”
“ဒါဖြင့် ပြန်ချကြစို့ဗျာ”
ယွင်တုန်းရှန်က ထိုသို့ပြောလိုက်သည့် အခိုက်တွင် ပြွတ်သိပ်နေသော နတ်ဆိုးသားရဲတပ်ကြီး၏ အနောက်ဘက်တစ်နေရာတွင် ကြောက်မက်ဖွယ်သတ္တဝါ ငါးကောင် ပေါ်လာတော့သည်။ အဆင့်၃ နတ်ဆိုးသားရဲငါးကောင်ဖြစ်ပြီး ထိုအထဲမှ သုံးကောင်မှာ သူတို့နှင့်ရင်ဆိုင်ဖူးသော မျက်လုံးလေးခု နတ်ဆိုးမြွေ၊ မျက်လုံးသုံးခု လင်းယုန်ကြီးနှင့် ခရမ်းရောင်မျက်လုံး ဝံပုလွေ တို့ဖြစ်သည်။ နောက်ထပ်နှစ်ကောင်မှာ သုံးမြီး မီးပုတ်သင်ကြီးနှင့် မျက်လုံးပြာ မျောက်ဝံကြီးဖြစ်သည်။ နောက်ဆုံးနှစ်ကောင်၏ အော်ရာများသည် အဆင့် ၃ နောက်ဆုံးအဆင့်နီးပါးရှိနေပြီဖြစ်ပြီး ထိုနှစ်ကောင်၏ အဓိကရည်ရွယ်ချက်မှာ ကျီဖုနယ်ပယ် နောက်ဆုံးအဆင့်ကျင့်ကြံသူ ယွင်တုန်းရှန်ကို ကိုင်တွယ်ရန် ဖြစ်ဖို့များပါသည်။ သူတို့၏ အော်ရာများမှာ လေထုထဲတွင် တိုးတိုက်မိပြီး ပတ်ပတ်လည်ကို သဏ္ဌာန်မဲ့လှိုင်းများအဖြစ် ထုတ်လွှင့်လျက်ရှိသည်။
ချက်ချင်းဆိုသလိုပင် သားရဲနှစ်ကောင်၏ အမူအရာများမှာ မသိမသာပြောင်းလဲသွားသည်။ ယွင်တုန်းရှန်တို့သုံးဦးနှင့် ထိုသားရဲနှစ်ကောင်တို့မှာ တစ်ဖက်နှင့်တစ်ဖက် အကဲခတ်လျက်သာရှိပြီး မည်သည့်ဘက်ကမှ စတင်တိုက်ခိုက်ခြင်းမရှိသေးပါ။ လက်ရှိအချိန်တွင် သူတို့အနေနှင့် ပါဝင်ရန်မသင့်သေးကြောင်း နားလည်ထားကြပြီးဖြစ်သည်။
မြေပြင်ရှိ ကျန်းချန်ရွှမ်တို့အဖွဲ့မှာမူ အကာအကွယ် အစီအရင်အပြင်ဘက်ကို ထွက်ထွက်ချင်း နတ်ဆိုးသားရဲအုပ်ကြီး၏ အမဲဖျက်တိုက်ခိုက်ခြင်းကို ခံလိုက်ရသည်။ သို့သော် သူတို့နှစ်ဦး၏ စွမ်းအားအဆင့်မြင့်မားလာမှုကြောင့် အဆင့်၂ အမြင့်ဆုံးအဆင့်ရှိ သားရဲများသည်ပင် ပြဿနာမဟုတ်တော့ပါ။ ထို့ပြင် သူတို့တွင် ဝှက်ဖဲများစွာလည်း ရှိပါသေးသည်။
မကြာမီ နတ်ဆိုးသားရဲများစွာ သူတို့နှစ်ဦးလက်ချက်ဖြင့် အတုံးအရုံးသေဆုံးကုန်ကြပြီး ထိုအထဲတွင် အဆင့် ၂ သားရဲများစွာပါဝင်သည်။ ကျန်းချန်ရွှမ်သည် သူ့မြင်လွှာတွင် ပေါ်နေသော မစ်ရှင်အခြေအနေပြ ကိန်းတန်းမှာ တဖြည်းဖြည်းတက်လာသည်ကို ကြည့်ပြီး တွန့်ဆုတ်ခြင်းမရှိဘဲ ခရမ်းရောင်မီးလျှံဓားကို လေဝဲများအသွင်ပြောင်းပြီး သားရဲအုပ်အတွင်းသို့ ထိုးနှက်ပစ်လိုက်သည်။ နတ်ဆိုးသားရဲများမှာ တစ်ကောင်ပြီးတစ်ကောင် ဇီဝိန်ကြွေကုန်တော့သည်။ အချိန်အနည်းငယ်ကြာပြီးနောက် ကျန်းချန်ရွှမ်မှာ ပတ်ဝန်းကျင်လေထုနှင့် တစ်သားတည်းဖြစ်နေသလို ခံစားမိလိုက်သလို သူ့လက်ထဲရှိ ဓားမှာလည်း ဓားတစ်စင်းနှင့် မတူတော့ဘဲ လေစီးကြောင်းများ လူးလွန့်ရစ်ပတ်နေသည့် အသွင်ဆောင်နေသည်။
တဖြည်းဖြည်းနှင့် ကျန်းချန်ရွှမ်၏ ပုံရိပ်မှာ ဝေဝါးသထက် ဝေဝါးလာသလိုသူ၏လှုပ်ရှားမှုများမှာ တွက်ဆ၍မရတော့သည့်အပြင် လှုပ်ရှားမှုအမြန်နှုန်းမှာလည်း လိုက်မမီတော့သည်အထိ မြန်ဆန်လာသည်။
ထိုမြင်ကွင်းကို တွေ့လိုက်ရသော ရှန်းရူယန်၏မျက်လုံးများမှာ ရုတ်တရက်ဝင်းလက်သွားသည်။ ကျန်းချန်ရွှမ်တစ်ယောက် ဉာဏ်အလင်းပွင့်ခြင်း. အခြေအနေကို ဆိုက်ရောက်သွားသည်လား။ ယခုလို သေရေးရှင်ရေးအခြေအနေမျိုးတွင် ထိုဖြစ်စဉ်မှာ ရှားပါးလွန်းလှသည်။ သူမ၏ခင်ပွန်းသည် ရွှေအမြုတေအဆင့်. ကျင့်ကြံသူများပင် အငမ်းမရလိုချင်ကြသော ဉာဏ်အလင်းပွင့်ခြင်းကို ရရှိခဲ့ပြီလား။ ထိုအဖြစ်အပျက်မှာ ကြုံခေါင့်ကြုံခဲဖြစ်စဉ်မှန်း ရှန်းရူယန်ကောင်းကောင်းနားလည်ပါသည်။
ထို့ကြောင့် ကျန်းချန်ရွှမ်ကို မနှောင့်ယှက်ရန် ဆုံးဖြတ်လိုက်သည်။ အကယ်၍ သူ့ကိုနှောင့်ယှက်မိပါက ကျန်းချန်ရွှမ်သည် ထိုအခြေအနေမှ မဖြစ်မနေပြန်ထွက်လာရမည် ဖြစ်သည်။ ထို့ပြင် သူ့ထံတွင် အင်မော်တယ်ပိုင်လုံ၏ သေခြင်းကင်းလွတ်အမိန့်ပြား ရှိနေသည့်အတွက် ထိုသားရဲများမှာ ကျန်းချန်ရွှမ်ကို အန္တရာယ်ပြုနိုင်မည်မဟုတ်ပါ။
ကျန်းချန်ရွှမ်၏ ပုံရိပ်မှာ ဝိညာဉ်ဆန်သထက်ဆန်လာသည်။ သူ၏လှုပ်ရှားရွေ့လျားမှုများမှာ အရိပ်အယောင်ပင် မကျန်တော့ဘဲ လေထုနှင့်တစ်သားတည်း ဖြစ်တည်လျက် အသွင်သဏ္ဌာန်မဲ့သွားတော့သည်။ ထိုစဉ် ကျန်းချန်ရွှမ်ကို အနောက်မှ အလစ်တိုက်ခိုက်လိုက်သော အဆင့်၂ သားရဲတစ်ကောင်မှာ ခေါင်းပြတ်လျက် ခန္ဓာကိုယ်မှာ ဘယ်ညာယိမ်းထိုးပြီး မြေပြင်ထက်သို့ ဘုန်းကနဲကျသွားသည်။ ထိုမြင်ကွင်းကို ရှန်းရူယန်အပါအဝင် လူအတော်များများ မြင်တွေ့လိုက်ရသည်။ သူမ၏ခင်ပွန်းသည် အဆင့်၂ အမြင့်ဆုံးအဆင့်ရှိ သားရဲတစ်ကောင်ကို တစ်ချက်တည်းနှင့် သုတ်သင်နိုင်လိမ့်မည်ဟု မထင်ထားခဲ့ပါ။ အဆိုပါစွမ်းအားမျိုးသည် အခြေခံတည်ဆောက်မှုနောက်ဆုံးအဆင့်နှင့် ညီမျှသည်။
တစ်ချိန်တည်းမှာပင် ကျန်းချန်ရွှမ်ကို ဗဟိုပြု၍ အစိမ်းရောင်အလင်းဘီးများစွာသည် စက်ဝိုင်းများပမာ လည်ပတ်နေသည်။ ပထမတွင် အလင်းဘီးများမှာ အရွယ်ငယ်သော်လည်း တဖြည်းဖြည်းကြီးမားလာသလို လည်ပတ်မှုအရှိန်မှာလည်း မြန်သထက်မြန်လာသည်။ နောက်ဆုံးတွင် အစိမ်းရောင်အလင်းဘီးများမှာ တဖြည်းဖြည်းပျောက်ကွယ်သွားတော့သည်။ ကျန်းချန်ရွှမ်၏ ပတ်ပတ်လည် မီတာရာချီသည့် စက်ဝိုင်းဧရိယာအတွင်းရှိ နတ်ဆိုးသားရဲများမှာ တစ်ကောင်မျှ အသက်ရှင်လျက်မရှိတော့ချေ။
***
နှစ်တစ်ရာကျင့်ကြံပြီးနောက်
အခန်း ၇၉ ။ ချောင်းမြောင်းတိုက်ခိုက်မှု
မြင်ကွင်းက လူအားလုံးကို မှင်သက်သွားစေသည်။ ကျန်းချန်ရွှမ်၏ စွမ်းအားကို သူတို့နားလည်နိုင်စွမ်းမရှိပါ။ အချိန်တိုခဏအတွင်း နတ်ဆိုးသားရဲအများအပြားမှာ သူ့လက်ချက်ဖြင့် ဇီဝိန်ကြွေကုန်ကြသည်။ ရှန်းရူယန်သည်ပင် သူမ၏အံ့သြမှုကို မဖုံးကွယ်နိုင်တော့ပါ။ သူမ၏ခင်ပွန်းသည် သေရေးရှင်ရေးအချိန်မှာပင် ကျင့်ကြံမှုနောက်တစ်ဆင့်ကို တက်လှမ်းနိုင်ခဲ့ပြီဖြစ်မှန်း နားလည်လိုက်သည်။
ကျန်းချန်ရွှမ်၏ ချင်းဖုန်းဓားနည်းစနစ်မှာ ပြီးပြည့်စုံသည့်နယ်ပယ်ကို ရောက်ရှိသွားပြီဖြစ်သည်။ ဓားအမြန်နှုန်းမှာ အဆများစွာ တိုးတက်လာသည့်အပြင် အသုံးပြုရသော အဆီအနှစ် စွမ်းအင်ပမာဏမှာလည်း သိသိသာသာလျော့ကျသွားသည်။ ထို့ပြင် အရေးကြီးဆုံးအချက်မှာ ကျန်းချန်ရွှမ်သည် အခြေခံတည်ဆောက်မှု ဆဌမအဆင့်ကို အောင်မြင်စွာတက်လှမ်းနိုင်ခဲ့ခြင်းဖြစ်သည်။ သူ၏ စစ်မှန်မှုအဆီအနှစ် စွမ်းအင်မှာ ၃၀% အထိတိုးတက်လာသည်။
အဆိုပါတိုးတက်မှုအားလုံးသည် စနစ်မှပေးအပ်ခဲ့သော တိုက်စွမ်းရည် +၁ ဆုလာဘ်နှင့် ပတ်သက်လိမ့်မည်ဟု ကျန်းချန်ရွှမ်တွေးမိသည့်အတွက် သူ၏မြင်လွှာထက်ရှိ မစ်ရှင်အခြေအနေပြ ကိန်းတန်းကိုကြည့်မိလိုက်ရာ ၉၈% အထိရောက်ရှိနေသည်ကို တွေ့လိုက်ရတော့သည်။ မစ်ရှင်ပြီးမြောက်ဖို့ နောက်ထပ် အဆင့် ၂ သားရဲလေးကောင်ကို သတ်ဖြတ်ရန်သာ လိုတော့သည်။
ထိုစဉ် ကြောက်မက်ဖွယ်စူးရှပြင်းထန်သော အသံလှိုင်းတစ်ခုက ကျန်းချန်ရွှမ်ထံ ပြေးဝင်လာသည်။ ထိုအသံလှိုင်းတစ်လျှောက်တွင် အားပါးပြင်းထန်သော ဆင့်ကဲလှိုင်းများပါ ရိုက်ခတ်သွားသည့်အတွက် မြေပြင်အထက်ရှိ ကျောက်ဆောင်များပင် ကွဲကြေကုန်ကြသည်။ ကျန်းချန်ရွှမ်၏ မျက်လုံးများမှာ ပြူးကျယ်သွားသလို ရှန်းရူယန်သည်လည်း ရုတ်တရက်တုန်လှုပ်မိသွားသည်။
“အဆင့် ၃ နတ်ဆိုးသားရဲပဲ”
အဆင့် ၁ နှင့် ၂ သားရဲအုပ်ကြီးထဲတွင် လင်းနို့နှင့်တူသော နတ်ဆိုးသားရဲတစ်ကောင်သည် တောင်ပံများကိုဖြန့်ပြီး ထူးဆန်းသောအော်ရာတစ်မျိုးကို ထုတ်လွှင့်လျက် ကျန်းချန်ရွှမ်ကို စိုက်ကြည့်နေသည်။ အဆင့်နိမ့်သားရဲများကြားထဲတွင် အဆင့် ၃ နတ်ဆိုးသားရဲက ပုန်းကွယ်နေပြီး အခြေခံတည်ဆောက်မှုအဆင့် ကျင့်ကြံသူတစ်ဦးကို ခိုးကြောင်ခိုးဝှက်တိုက်ခိုက်လိမ့်မည်ဟု မည်သူမှထင်ထားကြမည်မဟုတ်ပေ။
ယခုသတ္တဝါလို ဉာဏ်များသော အဆင့် ၃ သားရဲနှင့် ရင်ဆိုင်ရပါက အခြေခံတည်ဆောက်မှုအဆင့် သာမန်ကျင့်ကြံသူတစ်ဦးမှာ မလွဲမသွေရှုံးနိမ့်မည်ဖြစ်သည်။ သို့သော် ကျန်းချန်ရွှမ်မှာ သာမန်ကျင့်ကြံသူမဟုတ်ပါ။ အန္တရာယ်အငွေ့အသက်ကို ခံစားမိလိုက်သည့် အခိုက်အတန့်တွင်ပင် သူ့တွင်ရှိသမျှ အဆင့်၂ ကာကွယ်ရေးအဆောင်အားလုံးကို ထုတ်ယူပစ်လွှတ်လိုက်သည်။ မြေဝိညာဥ်ဒိုင်း၊ မီးလျှံအလင်းအကာအရံ အဆောင်၊ ရေအနှစ် မဟာတံတိုင်းအဆောင်၊ လိပ်ခွံဝိညာဉ်အဆောင်စသည့် အဆောင်လက်နက်များဖြစ်သည်။
တစ်ချိန်တည်းတွင် အဆင့်၂ ကာကွယ်ရေးမန္တန် အများအပြားကို မန်းမှုတ်လိုက်ပြန်သည်။ ထိုမျှမကသေး အဆင့်၂ ဓမ္မလက်နက်များဖြစ်သည့် အဆင့်၂ အနိမ့်စား ခရမ်းဝါဝိညာဉ်ဒိုင်းနှင့် အဆင့်၂ အလယ်အဆင့် သစ်စိမ်းကောင်းကင်အလင်းဒိုင်း တို့ကိုပါထုတ်ယူပြီး အမြန်ကာကွယ်လိုက်သည်။
အသံလှိုင်းနှင့် ကာကွယ်ရေးအဆောင်လက်နက်များ လေထဲတွင် တိုးတိုက်မိကုန်ပြီး တဒိန်းဒိန်းအသံများ အဆက်မပြတ်ထွက်ပေါ်လာသည်။ အဆင့် ၂ ကာကွယ်ရေးအဆောင်လက်နက်များမှာ တစ်စစီကျိုးပဲ့ကုန်သလို ကျန်းချန်ရွှမ်၏ အဆင့်၂ မန္တန်များမှာလည်း အသံလှိုင်းကို တားဆီးနိုင်ခြင်းမရှိပါ။ အသံလှိုင်းကြီးသည် နောက်ဆုံးခံတပ်နှစ်ခုဖြစ်သော အဆင့်၂ ဓမ္မလက်နက်များနှင့် ထိပ်တိုက်တွေ့ကြသည်။
ခရမ်းဝါဝိညာဉ်ဒိုင်းမှာ ကြာကြာမခံလိုက်ဘဲ ကျိုးပဲ့ပျက်စီးသွားသည်။ သစ်စိမ်းကောင်းကင်အလင်းဒိုင်းကတော့ ခေတ္တမျှကြံ့ကြံ့ခံပေးခဲ့သော်လည်း အဆုံးတွင် လွင့်ထွက်ပျက်စီးသွားရတော့သည်။ အသံလှိုင်းမှာ ကျန်းချန်ရွှမ်ရှိရာသို့ ဆက်လက်ဦးတည်လာသည်ကို မြင်သောအခါ ကျန်းချန်ရွှမ်သည် အံကိုတင်းတင်းကြိတ်လျက် ရွှေသံချပ်ကာရုပ်သေးအဆောင်ငါးခုကို တစ်ပြိုင်နက်တည်း ပစ်လွှတ်လိုက်တော့သည်။ ရွှေရောင်သံချပ်ကာစစ်သည်ငါးဦးမှာ ဓားများကိုကိုင်မြှောက်လျက် အော်ရာအလင်းတန်းများ ထုတ်လွှတ်ကာ ကိုယ့်ကိုယ်ကိုဖျက်ဆီးဖောက်ခွဲလိုက်ကြသည်။ ခဏအကြာတွင် မှိုပွင့်ပုံတိမ်တိုက်ကြီးအဖြစ် ပေါက်ကွဲသွားသည်။
ကျန်းချန်ရွှမ်သည် မီတာရာဂဏန်း အကွာအဝေးအထိ ပျံသန်းတိမ်းရှောင်လိုက်ပြီး နောက်ဆုံးတွင် တောင်ကုန်းတစ်ခုထက်သို့ ဆင်းလိုက်သည်။ သူ့နှုတ်ခမ်းထောင့်တွင် သွေးအနည်းငယ်စီးကျနေသည်။ သူ၏ဝှက်ဖဲအားလုံးကို အသုံးပြုပြီးနောက် နောက်ဆုံးတွင် အသံလှိုင်းရန်မှ လွတ်မြောက်နိုင်ခဲ့ပြီဖြစ်သည်။
“ခွေးမသား မင်းသေချင်နေပြီ”
ရှန်းယွမ်လုံက ဒေါသကြီးစွာ ဟိန်းဟောက်လိုက်ပြီး သူ၏ဓမ္မရတနာဖြစ်သည့် စကြဝဠာဗလာနယ်ဓားကို အလင်းအသွင်ပြောင်းပြီး အဆင့်၃ လင်းနို့သားရဲကို ပစ်ခတ်လိုက်သည်။ အဆင့်နိမ့်သားရဲများကြားတွင် ပုန်းခိုနေပြီး ကောက်ကျစ်စွာ အလစ်တိုက်ခိုက်လိုက်သော လင်းနို့သားရဲကို ရှန်းယွမ်လုံတစ်ယောက် အတော်ပင် ဒေါသထွက်နေဟန်တူသည်။
အလင်းဓားမှာ လေဟုန်ခွင်းလိုက်ကာ ဗလာနယ်ကိုပင် ဆွဲဆုတ်လိုက်ဟန် အရှိန်မျိုးနှင့် လင်းနို့သားရဲထံ ပြေးဝင်သွားသည်။ လင်းနို့သားရဲမှာ အဆင့်၃ နယ်ပယ်သို့ ရောက်ရှိသည်မှာ မကြာသေး၍ ရှန်းယွမ်လုံ၏ တိုက်ခိုက်မှုကို ခုခံနိုင်စွမ်းမရှိပါ။ အလင်းဓားက တောင်ပံတစ်ဖက်ကို ဖောက်ဝင်သွားပြီး ခရမ်းရင့်ရောင်သွေးများမှာ လေထဲသို့ ပန်းထွက်လာသည်။ သို့သော် ရှန်းယွမ်လုံဆက်လက်တိုက်ခိုက်မည်အပြုတွင် ငြိမ်သက်စွာအကဲခတ်နေသော အဆင့်၃ နတ်ဆိုးသားရဲငါးကောင်မှာ စတင်လှုပ်ရှားပါတော့သည်။
ထို့ကြောင့် ယွင်တုန်းရှန်နှင့် ထျန်းချင်တို့လည်း ဝင်ရောက်တိုက်ခိုက်ရပါတော့သည်။ ကျီဖုအဆင့်ကျင့်ကြံသူ သုံးဦးနှင့် အဆင့်၃ နတ်ဆိုးသားရဲ ငါးကောင်အကြား ကောင်းကင်တိုက်ပွဲက စတင်ပြီဖြစ်သည်။ ကောင်းကင်ထက်တွင် မုန်တိုင်းကျသလို ပြင်းထန်ဆူညံသော အသံများကြားတွင် ရှန်းရူယန်မှာ လင်းနို့သားရဲကို မမှိတ်မသုန်ကြည့်ရှုနေသည်။
ကျန်းချန်ရွှမ်ကို အလစ်အငိုက်ဝင်တိုက်သည့် လင်းနို့သားရဲကို ရှန်းရူယန်တစ်ယောက် ဒေါသအကြီးအကျယ်ထွက်နေသည်မှာ ထင်ရှားသည်။ တိုက်ခိုက်ရန် အကောင်းဆုံးအချိန်ကို စောင့်ဆိုင်းရင်း သူမနှင့် လင်းနို့သားရဲကြား အကွာအဝေးကို တွက်ချက်နေသည်။
နောက်ဆုံးတွင် လင်းနို့သားရဲသည် ကောင်းကင်တိုက်ပွဲမှခွာပြီး မြေပြင်ထက်ရှိ အခြေခံတည်ဆောက်မှုအဆင့် ကျင့်ကြံသူများကို လက်စတုံးရန် တစ်ဟုန်ထိုးဆင်းလာသည်။ မြေပြင်ထက်တွင် အခွင့်ကောင်းကိုစောင့်နေသော ရှန်းရူယန်သည် လျှပ်စီးကြောင်းအသွင်ပြောင်းလိုက်ရာ ရောင်စုံလျှပ်စီးများ ယှက်သန်းသွားသည်။
အခြေခံတည်ဆောက်မှုအဆင့် ကျင့်ကြံသူတစ်ဦးအနေနှင့် အဆင့် ၃ နတ်ဆိုးသားရဲကို စတင်တိုက်ခိုက်ရဲမည်မဟုတ်ဟု တွေးထားသော လင်းနို့သားရဲမှာ မမျှော်လင့်သော တိုက်ခိုက်မှုကိုခံလိုက်ရကာ လျှပ်စီးအလင်းများကြောင့် မျက်စိများကျိန်းစပ်သွားသည်။ ထိုအချိန်တွင် အလျှံတညီးညီး တောက်လောင်နေသော ဓားပျံတစ်စင်းက သူ့ကိုယ်ပေါ်ကျရောက်သွားသည်။
အစောပိုင်းက ရှန်းယွမ်လုံကြောင့် ဒဏ်ရာရထားသော အတောင်ပံမှာ ရှန်းရူယန်လက်ချက်ဖြင့် လုံးဝပြတ်ထွက်သွားသည်။ ထိတ်လန့်တုန်လှုပ်လာသော လင်းနို့သားရဲသည် ကျီဖုအဆင့် ကျင့်ကြံသူတစ်ဦးက အမှောင်ထဲတွင်ပုန်းခိုပြီး တိုက်ခိုက်နေခြင်းဖြစ်သည်ဟု ထင်မှတ်ကာ အနောက်သို့ အလျင်အမြန် ဆုတ်ခွာလိုက်သည်။ သို့သော် သူ့အနောက်တွင် လျှပ်စီးပိုက်ကွန်တစ်ခုက အသင့်စောင့်ကြိုနေပြီး လင်းနို့သားရဲကြီးကို အုပ်လွှမ်းဖမ်းချုပ်လိုက်သည်။
ပိုက်ကွန်တစ်လျှောက်တွင် လျှပ်စီးများစီးဝင်နေသည့်အတွက် လင်းနို့နတ်ဆိုးသားရဲ၏ ကိုယ်ခန္ဓာမှာ ပြင်းထန်သောထုံကျင်မှုကို ခံစားလိုက်ရသည်။ သူ့အတွက် သေရေးရှင်ရေးအချိန်ဖြစ်ကြောင်း လင်းနို့သားရဲကြီး နားလည်လိုက်သော်လည်း အချိန်နှောင်းသွားပြီးဖြစ်သည်။ အစောပိုင်းက မီးလျှံဓားနှင့် လျှပ်စဳကြောင်းများမှာ ရာနှင့်ချီသော ဓားအရိပ်များအဖြစ် အသွင်ပြောင်းသွားပြီးနောက် ဓားအလင်းတန်းတစ်ခုတည်းအဖြစ် ပေါင်းစပ်လိုက်သည်။ ထို့နောက်တွင် ဓားအလင်းတန်းကြီးသည် လင်းနို့သားရဲ၏ကိုယ်ခန္ဓာကြီးကို ပိုင်းဖြတ်ပစ်လိုက်တော့သည်။
***
နှစ်တစ်ရာကျင့်ကြံပြီးနောက်
အခန်း ၈၀ ။ မမျှော်လင့်သောဖြစ်ရပ်
သွေးများက နေရာအနှံ့ပြန့်ကျဲသွားပြီး လင်းနို့သားရဲကြီးမှာ ကိုယ်ခန္ဓာနှစ်ပိုင်းပြတ်လျက် မြေပြင်ပေါ်သို့ လဲကျသွားတော့သည်။ လျှပ်စီးများနှင့် မီးလျှံအကြွင်းအကျန်များမှာ လင်းနို့အသေကောင်ကြီး၏ အလောင်းကို ဝါးမြိုလောင်ကျွမ်းလျက်ရှိသည်။ ထိုအချိန်တွင်ပင် ရှန်းရူယန်သည် ကျင့်ကြံသူအားလုံး၏မြင်ကွင်းတွင် ပြန်လည်ပေါ်လာတော့သည်။ ပတ်ဝန်းကျင်မှာ ရုတ်တရက်ငြိမ်သက်သွားပြီး လူအားလုံးသည် လင်းနို့သားရဲ အသေကောင်ကြီးကို မယုံကြည်နိုင်ဟန်ဖြင့် ကြည့်နေမိကြသည်။
ကျီဖုနယ်ပယ် ကျင့်ကြံသူတစ်ဦးနှင့် ညီမျှသော အဆင့် ၃ နတ်ဆိုးသားရဲကို အခြေခံတည်ဆောက်မှုအဆင့် ကျင့်ကြံသူတစ်ဦးက သတ်ဖြတ်နိုင်လိုက်သည့် မြင်ကွင်းထက် အံ့သြစရာကောင်းသည့်အရာ မရှိတော့ပါ။ လင်းနို့သားရဲကြီးမှာ ရှန်းယွမ်လုံလက်ချက်ကြောင့် ဒဏ်ရာရနှင့်ပြီးသားဖြစ်သည်မှာ မှန်သော်လည်း အခြေခံတည်ဆောက်မှုအဆင့်နယ်ပယ်ကျင့်ကြံသူ မှ အဆင့်၃ သားရဲကြီးကို သတ်ဖြတ်ပြလိုက်ခြင်းမှာ သူတို့အတွက် တုန်လှုပ်မင်သက်စရာဖြစ်စဉ်ဖြစ်သည်။
ကျန်းချန်ရွှမ်သည်ပင် အံ့သြခြင်းကို မဖုံးကွယ်နိုင်ပါ။ လင်းနို့သားရဲကြီးမှ သူအား အလစ်အငိုက် ဝင်ရောက်တိုက်ခိုက်စဉ်က ထိုသားရဲကြီး၏ စွမ်းအားကြီးမားပုံကို သူနားလည်ပြီးဖြစ်သည်။ သို့သော် ရှန်းရူယန်သည် သူမ၏ကျင့်ကြံမှုအဆင့် တစ်ခုတည်းကို အသုံးပြုပြီး လင်းနို့သားရဲကို သတ်ဖြတ်ပြလိုက်ပြီဖြစ်သည်။
ကျန်းချန်ရွှမ်မှာ ပြောစရာစကားလုံးပင် ရှာမရတော့။ တစ်ချိန်တည်းမှာပင် ရှန်းရူယန်၏ သူ့ကိုကာကွယ်လိုစိတ် ကြီးမားပုံကို ပြန်ပြောင်းတွေးရင်း ကြည်နူးမိသလို ခံစားလိုက်ရသည်။ ထိုစဉ် အဆင့် ၃ နတ်ဆိုး သားရဲငါးကောင်မှာ လင်းနို့သားရဲသေဆုံးမှုကြောင့် တုန်လှုပ်သွားရာမှ ရုတ်တရက်အသိပြန်ဝင်လာပြီး ဒေါသကြီးစွာ ဟိန်းဟောက်လိုက်ကြသည်။ လတ်တလောတွင် သားရဲငါးကောင်လုံး၏ စိတ်ထဲတွင်ရှိနေသည်က ရှန်းရူယန်ကို အမြန်ဆုံးသတ်ဖြတ်ဖို့ဖြစ်သည်။ သူမ၏ကျင့်ကြံမှုအဆင့် မြင့်မားလာသည်နှင့်အမျှ သူတို့နတ်ဆိုးသားရဲမျိုးနွယ်အတွက် ခြိမ်းခြောက်မှုလည်းပိုများလာမည်ဖြစ်သည်။ ကျန်းချန်ရွှမ်လည်း ထိုနည်းလည်းကောင်းပင်။ အခြေခံတည်ဆောက်မှုအလယ်အဆင့်သာ ရှိသော်လည်း ပြီးပြည့်စုံသော အခြေခံတည်ဆောက်မှုအဆင့်နှင့်ညီသော စွမ်းအားကိုပြသခဲ့သူဖြစ်သည့်အတွက် သူ့ကိုလည်း အမြန်ဆုံးရှင်းပစ်ရမည်ဖြစ်သည်။
“ငါနဲ့တိုက်နေတုန်း အာရုံလွင့်ရဲတယ်ပေါ့ ငါ့အကြောင်းကို မသိသေးဘူးမှတ်တယ်”
ယွင်တုန်းရှန်က ရယ်သွမ်းသွေးလိုက်ပြီးနောက်တွင် သူ့ဦးခေါင်းထက်ရှိ လခြမ်းကွေးပုံ ဓမ္မရတနာမှာ အလင်းတန်းများ ကွန့်မြူးလာပြီး ရောင်ခြည်တန်းများ ပစ်လွှတ်တိုက်ခိုက်လိုက်သည်။ သုံးမြီး မီးပုတ်သင်နှင့် မျက်လုံးပြာမျောက်ဝံကြီးတို့၏ ခန္ဓာကိုယ်များကို ထိမှန်ပြီး အပေါက်ရာများ ပေါ်လာကြသည်။
သားရဲကြီးနှစ်ကောင်မှာ နာကျင်စွာ ဟိန်းဟောက်ရင်း အမြန်ဆုတ်ခွာလိုက်သည်။ ထို့နောက် မီးပုတ်သင်ကြီး၏ အမြီးသုံးခုတွင် အနီ အပြာ နှင့် အဝါမီးလျှံများ ပေါ်ထွန်းလာသလို မျက်လုံးပြာမျောက်ဝံကြီးသည် ပါးစပ်ထဲမှ စိန်ပွင့်ပုံ ဓမ္မရတနာကို ထွေးထုတ်လိုက်ပြီး အဆိုပါရတနာနှင့် မိစ္ဆာစက်ဝန်းတစ်ခုကို ရေးဆွဲလိုက်သည်။ မီးပုတ်သင်နှင့် မျောက်ဝံကြီးနှစ်ကောင်မှာ အတူပူးပေါင်းလိုက်ပြီး ယွင်တုန်းရှန်၏အလင်းများကို အသည်းအသန်ကာကွယ်လိုက်ရသည်။
ထိုစဉ် ကောင်းကင်သည် ရုတ်တရက်မှိန်သွားပြီး မှုန်ပျပျကြယ်အလင်းတစ်ခု လေထုထဲတွင် တောက်ပလာသည်။ ထိုအလင်းပွင့်သည် ရုတ်တရက် ဓားမိုးအဖြစ်ပြောင်းလဲပြီး သားရဲကြီးနှစ်ကောင်ထံ အရှိန်အဟုန်ဖြင့် မနားတမ်းရွာသွန်းပစ်ခတ်လိုက်သည်။ အဆိုပါနည်းစနစ်မှာ ယွင်တုန်းရှန်၏ နာမည်ကျော် အလင်းခဲဓားမန္တန်ဖြစ်သည်။
ဓားအလင်းတန်းများသည် မိုးစက်မိုးပေါက်များပမာ သုံးမြီးမီးပုတ်သင်နှင့် မျောက်ဝံကြီးတို့၏ မိစ္ဆာစက်ဝန်းပေါ်သို့ အဆက်မပြတ်ကျရောက်ကုန်သည့်အတွက် ကောင်းကင်ယံ၌ အမြောက်ပစ်သလို တဒိန်းဒိန်းအသံများ တုန်ဟည်းသွားတော့သည်။ သားရဲကြီးနှစ်ကောင်မှာ ယွင်တုန်းရှန်၏တိုက်စစ်ကို မနည်းကြံ့ကြံ့ခံရင်း သူတို့၏ ကိုယ်ခန္ဓာများမှာ တုန်ရီလာသလို ပါးစပ်ထဲမှလည်း သွေးများစီးကျစပြုလာသည်။ ထိုအချိန်တွင် မျောက်ဝံကြီးသည် ကျယ်လောင်စွာနှင့် ဟိန်းဟောက်ရေရွတ်လိုက်သည်။
“မင်းတို့က အရှုံးမပေးချင်ဘူးပေါ့၊ မင်းတို့အကုန်လုံးကို တစ်ကောင်ပြီးတစ်ကောင် သတ်ပြမယ်”
နတ်ဆိုးသားရဲများမှာ အဆင့် ၃ သို့ရောက်သည်နှင့် လူသားတို့ထက် မနိမ့်ကျသော ဉာဏ်ရည်မျိုးကို ပိုင်ဆိုင်လာသည့်အပြင် ပုံမှန်လူသားကဲ့သို့ စကားပြောဆိုနိုင်စွမ်းလည်းရှိလာပါသည်။ ခြွင်းချက်တစ်ခုတော့ရှိသည်။ သူတို့၏ဉာဏ်ရည်မှာ မြင့်တက်လာသည် မှန်သော်လည်း သားရဲတို့၏ အရိုင်းစိတ်မှာ ကျန်ရှိနေသေး၍ အန္တရာယ်နှင့်ကြုံလျှင် သို့မဟုတ် ဒေါသထွက်လျှင် ဆင်ခြင်နိုင်စွမ်းကင်းမဲ့လာပြီး သားရဲသဘာဝအရ အလိုအလျောက်ပြုမူဆောင်ရွက်တတ်ကြခြင်းဖြစ်သည်။
ထိုအချိန်တွင် ကောက်ကျစ်စဉ်းလဲသည့် လက္ခဏာများ ယှက်သန်းနေသော ရယ်သံကြီးတစ်ခုကို သူတို့အားလုံးကြားလိုက်ရပါတော့သည်။ သားရဲနှစ်ကောင်ကို အသာစီးမှ ဖိတိုက်နိုင်နေသည့် ယွင်တုန်းရှန်မှာ မျက်နှာအကြီးအကျယ်ပျက်သွားပြီး အော်ဟစ်လိုက်သည်။
“အားလုံး သတိထားကြ”
သူ့သတိပေးချက်မှာ အချိန်နှောင်းသွားခဲ့သည်။ သူ့စကားဆုံးဆုံးချင်းမှာပင် အနက်ရောင်လက်သည်းတစ်ခုက ထျန်းချင်၏ရင်ဘတ်ကို ဖောက်ဝင်သွားပြီး နှလုံးကိုဆွဲထုတ်လိုက်သည်။
“အား….”
ထျန်းချင်မှာ ရုတ်တရက်တိုက်ခိုက်ခံရမည်ဟု မမျှော်လင့်ထားသည့်အတွက် အံသြစွာဖြင့် သူမ၏ရင်ဘတ်ကို ငုံ့ကြည့်လိုက်မိသည်။ ပါးစပ်အတွင်းမှလည်း သွေးများတလဟောစီးထွက်နေသည်။ ထို့နောက် ထျန်းချင်သည် မပီမသရေရွတ်လိုက်သည်။
“အရိပ်နတ်ဆိုး”
ထိုခဏတွင် အနက်ရောင်အလင်းတစ်ခု လက်သွားပြီး ထျန်းချင်၏ဦးခေါင်းမှာ ပြတ်ထွက်သွားပါတော့သည်။ ထိုအဖြစ်အပျက်ကို မြင်လိုက်ရသော လော့ရှားမန်ဂိုဏ်းသားများမှာ ဝမ်းပမ်းတနည်းနှင့် အော်ဟစ်လိုက်ကြသည်။
“အကြီးအကဲထျန်း”
ထိုအချိန်တွင် မျက်လုံးသုံးခုလင်းယုန်နှင့် ခရမ်းရောင်မျက်လုံး ဝံပုလွေနှစ်ကောင်ကို ရင်ဆိုင်နေရသော ရှန်းယွမ်လုံသည် အန္တရာယ်တစ်ခုချဉ်းကပ်လာသည်ကို သတိထားမိပြီး အလျင်အမြန်ဆုတ်ခွာလိုက်သည်။ သို့သော် ခြေတစ်လှမ်းနောက်ကျသွားသည်ဟု ပြောရမည်။
အနက်ရောင်အလင်းက သူ၏ညာလက်ကို လက်မောင်းရင်းမှ ဖြတ်ချလိုက်ပြီး အေးစက်စက် အနက်ရောင်မီးလျှံများက သူ၏ခန္ဓာကိုယ်ပတ်လည်ကို ရစ်ပတ်စပြုလာသည်။ သို့သော် ရှန်းယွမ်လုံက ဆုံးဖြတ်ချက်တစ်ခု ခပ်မြန်မြန်ချလိုက်သည်။
အရောင်မှိန်သွားသည့် စကြဝဠာဗလာနယ်ဓားမှာ ရုတ်တရက် စူးရှစွာ လင်းလာပြီး သူ၏ကိုယ်ပတ်လည်ကို စက်ဝိုင်းပမာ လှည့်ပတ်နေလိုက်သောအခါ အနက်ရောင်မီးလျှံများမှာ တဖြည်းဖြည်းငြိမ်းသတ်သွားသည်။ သို့သော် ရှန်းယွမ်လုံမှာ ဒဏ်ရာအကြီးအကျယ် ရရှိလိုက်ပြီး သူ့၏သက်တမ်းမှာလည်း အတိုင်းအတာတစ်ခုထိ လျော့ကျသွားပြီဖြစ်သည်။ သို့သော် ရှန်းယွမ်လုံက ဂရုစိုက်ဟန်မပေါ်ဘဲ သူ၏အကြည့်မှာ သူ့ညာဘက်ရှိ အရိပ်အသွင် ပုံသဏ္ဍာန်တစ်ခုအပေါ်သာ ရောက်ရှိနေသည်။ ထိုအရိပ်အသွင်ရှိသော ပုဂ္ဂိုလ်မှာ အနက်ရောင်အရိုးလက်သည်းကို ကိုင်လျက် မသတီစရာ ရယ်မောလျက်ရှိသည်။
“ကျေနပ်တာကွာ မင်းလိုတရားဘက်တော်သား ယောင်ယောင် ဘာယောင်ယောင်ကောင်က ဒီလိုနေ့မျိုးကြုံရမယ်လို့ ငါမထင်ထားခဲ့ဘူးကွ”
“အရိပ်နတ်ဆိုးလက်သည်းပဲ”
ရှန်းယွမ်လုံ နှင့် ယွင်တုန်းရှန်တို့မှာ ထိုသူ၏လှောင်ပြောင်ရယ်မောခြင်းကို ဂရုမပြုပါ၊ ထိုသူ့လက်ထဲရှိ အနက်ရောင်အရိုးလက်သည်းကိုသာ မမှိတ်မသုန်စိုက်ကြည့်နေပါသည်။
“မိစ္ဆာရတနာအစစ်ပဲ သေချာတယ်”
ယွင်တုန်းရှန်က အံကိုကြိတ်လိုက်သည်။ သူတို့ရှေ့မှောက်တွင် ရယ်မောနေသူ ကိုင်ဆောင်ထားသည်မှာ အဆင့်၄ နီးပါးရှိသည့် မိစ္ဆာရတနာဖြစ်ပြီး အရိပ်နတ်ဆိုးဟု လူသိများသော ရွှေအမြုတေအဆင့်ရှိ နတ်ဆိုးကျင့်ကြံသူတစ်ဦး၏လက်နက်ဖြစ်သည်။ ထိုလက်နက်ကြောင့် ထျန်းချင်သေဆုံးခဲ့သလို ရှန်းယွမ်လုံသည်လည်း ဒဏ်ရာအကြီးအကျယ်ရလိုက်သည်။
“သေပြီဟေ့”
ယွင်တုန်းရှန်တစ်ယောက် အံကြိတ်ရင်းရေရွတ်မိသည်။ ရယ်မောနေသည့် နတ်ဆိုးကျင့်ကြံသူအပြင် အခြားသော နတ်ဆိုးကျင့်ကြံသူအများအပြားလည်း ရောက်ရှိနေပြီဖြစ်သည်ကို မြင်လိုက်ရသည်။ ထိုသူတို့သည် နတ်ဆိုးသားရဲများ၏ မဟာမိတ်များဖြစ်သည် ဆိုသည့် အချက်မှာ သေချာလှပါသည်။
ထိုအချိန်မှာပင် အလွန်အမင်းကြောက်ရွံ့ဖွယ်ကောင်းသော အော်ရာများ ထုတ်လွှင့်နေသည့် ဧရာမသတ္တဝါကြီးများ ရောက်ရှိလာကြပြန်သည်။ နောက်ထပ် အဆင့်၃ နတ်ဆိုးသားရဲများဖြစ်သည်။
***
စာစဉ် ၄ ပြီး၏။