အခန်း (၆၁-၆၅)
Vol. 4 Ch. 61-65
နှစ်တစ်ရာကျင့်ကြံပြီးနောက်
အပိုင်း ၆၁ ။ အခြေအနေစုံစမ်းခြင်း
ရှန်းတောက်မင်၏ စကားကိုကြားပြီးနောက် ရှန်းရူယန်က
“မိုင်းတွင်းအကြောင်းကို သိထားတာ ကျွန်မတို့အပြင် ဘယ်သူတွေရှိသေးလဲ”
ရှန်းရူယန်၏မေးခွန်းကြောင့် ကျန်လူအားလုံး၏ မျက်နှာများမှာ ရုတ်ချည်းဆိုသလိုလေးနက်သွားကြသည်။ အမှန်တကယ်လည်း ကြက်သွေးရောင်ရွှေသတ္တုတွင်းလို နေရာမျိုးတည်ရှိနေမှုမှာ အလွန်အရေးပါပြီး သတ္တုတွင်း၏တည်နေရာကို တတ်နိုင်သမျှလျှို့ဝှက်ထားရမည်ဖြစ်သည်။ ဤအချက်ကို အားလုံးလည်း သဘောပေါက်ထားပြီးဖြစ်သည်။
ရှန်းတောက်မင်က
“အခုထိတော့ ငါတို့အပြင် ကြက်သွေးရောင်ရွှေသတ္တုတွင်းကို စတွေ့ခဲ့တဲ့ ရှန်းအန်ပေ့တစ်ယောက်တည်းပဲသိသေးတယ်။ ကောင်လေးကနပ်တယ်၊ သတ္တုတွင်းကို တွေ့တွေ့ချင်း နှုတ်ဖွာပြီးလျှောက်မအော်ဘူး။ ငါ့ဆီချက်ချင်းအကြောင်းကြားတယ်၊ ဒီကိစ္စအရမ်းအရေးကြီးမှန်းကိုလည်း နားလည်အောင်ပြောပြီးပြီ၊ သူဘယ်သူ့ကိုမှ လျှောက်ပြောမှာမဟုတ်ပါဘူး”
“တော်သေးတာပေါ့”
အားလုံး၏စိတ်တွင် ဘဝင်ကျသွားပြီး ခေါင်းညိတ်လိုက်မိကြသည်။
သတ္တုတွင်းသတင်းမပေါက်ကြားရေးကိစ္စမှာ လောလောဆယ် ပြေလည်သွားသော်လည်း နောက်ထပ်ပြဿနာတစ်ခုက ဤသတ္တုတွင်းကို ဘယ်လိုဘယ်ပုံကိုင်တွယ်ကြမလဲ ဆိုသည့်အရေးပင်ဖြစ်သည်။ ယခုလိုများပြားလှသည့် ရတနာသိုက်ကြီးကို ရှန်းအင်မော်တယ်မျိုးနွယ်စုက လက်လွှတ်ခံမည်မဟုတ်သည်ကတော့ သေချာပါသည်။ ထိုစဉ် ရွှီချန်းဟယ်က
“ကျွန်တော့်အတွေးမမှားရင် အခုလို လူတွေမဖော်ထုတ်ရသေးတဲ့ အနီရောင်သတ္တုတွင်းမျိုးက အန္တရာယ်တွေနဲ့ပြည့်နေမှာသေချာတယ်။ ပထမဆုံးအန္တရာယ်က သတ္တုတွင်းထဲမှာကြီးစိုးနေမဲ့ ကြက်သွေးရောင်မီးမိစ္ဆာတွေပဲ၊ ဒီမိုင်းတွင်းရဲ့အရွယ်အစားအရ အထဲမှာရှိနေမဲ့ မီးမိစ္ဆာတွေရဲ့အဆင့်က အဆင့် ၂ အထက်တော့ရှိရမယ်၊ ဒါပေမဲ့ ဒီကြက်သွေးရောင်ရွှေတွင်းက အလတ်စားအရွယ်မရောက်မချင်း အဆင့်၃ မီးမိစ္ဆာတွေကို မွေးထုတ်နိုင်မှာမဟုတ်ဘူး၊ အသေးဆုံးနဲ့ အငယ်စားအရွယ် ကြက်သွေးရောင်ရွှေသတ္တုတွင်းတွေက အဆင့် ၃အထက် မီးမိစ္ဆာတွေကိုမွေးထုတ်ပေးနိုင်တယ်ဆိုတာ အရမ်းရှားတယ်လေ”
ရွှီချန်းဟယ်၏အတွေးကို အားလုံးက လက်ခံသဘောတူဟန်ဖြင့် ခေါင်းညိတ်လိုက်ကြသည်။
တစ်ဖန် ရှန်းတောက်မင်က စကားဆက်သည်။
“ကျုပ် ရှန်းအန်ပေ့ကိုသေချာမေးပြီးပြီ၊ သူ့အပြောအရဆိုရင် ဒီသတ္တုတွင်းက လွန်ရောကျွံရော အငယ်စားအဆင့်ပဲရှိလိမ့်မယ်၊ ကျုပ်ကိုယ်ပိုင်အမြင်အရဆိုရင် အသေးဆုံးအဆင့်ပဲရှိဖို့များတယ်”
“အသေးဆုံးအဆင့်တဲ့လား”
အားလုံးမှာ ယခုမှစိတ်သက်သာရာရသွားကြသည်။ အမှန်တကယ်အသေးဆုံးအဆင့်သတ္တုတွင်းဖြစ်သည်ဆိုလျှင် လက်ရှိရှန်းမျိုးနွယ်စု၏ အင်အားဖြင့် သတ္တုတွင်းတစ်ခုလုံးကိုသိမ်းဆည်းဖို့ ခက်ခဲမည်မဟုတ်ပါ။ အကယ်၍အငယ်စားအရွယ်ဆိုပါက ရှန်းမျိုးနွယ်စုအတွက် အတော်လေးအားထုတ်ရုန်းကန်ရမည်မှာသေချာပြီး အလတ်စားအရွယ် သတ္တုတွင်းသာဖြစ်နေပါက ကျီဖုအဆင့်ရှိသူ ဘိုးဘေးရှန်းယွမ်လုံရှိနေလျှင်တောင် ရှန်းမျိုးနွယ်စုအနေနှင့် သတ္တုတွင်းကို လက်ဝါကြီးအုပ်ရန်အလွန်ခက်ခဲလိမ့်မည်ဖြစ်သည်။ ထိုစဉ် ရှန်းရူယန်က
“ဒါတွေခဏထားလိုက်ပါ လောလောဆယ်အရေးကြီးတာက ကိုယ်တိုင်သွားကြည့်ပြီးမှ ဆုံးဖြတ်ဖို့ပဲ၊ သတ္တုတွင်းရဲ့အဆင့်ကို အရင်အတည်ပြုပြီးမှ ဘာဆက်လုပ်ရမလဲစီစဉ်ရင်လည်း နောက်မကျပါဘူး”
ရူယန်၏အကျိုးအကြောင်းညီသောစကားကို အားလုံးကလက်ခံလိုက်ကြသည်။
“ပြဿနာက ကျုပ်တို့ထဲက ဘယ်သူ့ကိုသွားကြည့်ခိုင်းသင့်လဲဆိုတာပဲ”
ရှန်းတောက်မင်က ရှိနေသည့်လူအားလုံးကို အကဲခတ်ရင်း ပြောလိုက်ခြင်းဖြစ်သည်။ ထိုစဉ် အခြေခံတည်ဆောက်ခြင်းနယ်ပယ်အဆင့်ကျင့်ကြံသူတစ်ဦးဖြစ်သည့် ရှန်းတောက်ယွမ်က
“ကျုပ်သွားမယ်လေ၊ လတ်တလော ဘာတာဝန်မှမရှိလို့ ပျင်းနေတာ၊ သတ္တုတွင်းကိုသွားကြည့်ပြီး စနည်းနာရုံပဲမလား၊ ပြဿနာမရှိလောက်ပါဘူး”
ရှန်းတောက်ယွမ်က လိုလိုလားလားဆန္ဒပြုသည်ကိုမြင်တော့ ရှန်းတောက်မင်လည်း ထွေထွေထူးထူးမပြောတော့ဘဲ အသာခေါင်းညိတ်ပြလိုက်သည်။
“ကောင်းပြီ ဒီအရေးကို တောက်ယွမ်လက်ထဲအပ်လိုက်မယ်၊ ကိုယ့်လုံခြုံရေးကိုဦးစားပေးပါ၊ မလိုဘဲမစွန့်စားနဲ့၊ တစ်ခုခုအကြောင်းထူးရင် ချက်ချင်းအကြောင်းကြားပါ”
“ကောင်းပါပြီ”
ရှန်းတောက်ယွမ်က ခေါင်းညိတ်ပြလိုက်သည်။
ရက်အနည်းငယ်အကြာတွင် ရှန်းတောက်ယွမ်မှ လှမ်းအကြောင်းကြားသည်။ ရှန်းအန်ပေ့၏ဖော်ပြချက်မှာ မှန်ကန်ပြီး ကြက်သွေးရောင်ရွှေသတ္တုတွင်း အမှန်တကယ်တည်ရှိနေသည့်အပြင် အရွယ်မှာလည်း အငယ်ဆုံးအဆင့်သာဖြစ်ကြောင်း၊ သို့သော်လည်း ရှန်းတောက်ယွမ်၏လေ့လာချက်အရ သတ္တုတွင်းမှာလက်ရှိတွင် အသေးဆုံးအဆင့်ဖြစ်သော်လည်း အငယ်စားအဆင့်သို့ ကူးပြောင်းလုနီးနီးအဆင့်ကိုရောက်ရှိနေပြီဖြစ်ကြောင်း၊ မကြာမီအချိန်အတွင်း အငယ်စားအဆင့်သို့ကူးပြောင်းနိုင်လိမ့်မည်ဖြစ်ကြောင်း ဖော်ပြထားသည်။
ရှန်းတောက်ယွမ်၏သတင်းမှာ ရှန်းမျိုးနွယ်စုအတွက် အလွန်အရေးကြီးသောသတင်းဖြစ်နေ၍ ရှန်းတောက်မင်က အစည်းအဝေးတစ်ခု အလျင်အမြန်ခေါ်ပြီး ရရှိထားသောသတင်းကို အားလုံးသိစေရန်ပြောပြလိုက်သည်။ စကားအဆုံးတွင် ရှန်းတောက်မင်က လေးနက်တည်ကြည်စွာဖြင့်
“အခြေအနေကိုအကြမ်းဖျဉ်းသိရပြီဆိုတော့ ဒီသတ္တုတွင်းကို ဘယ်လိုသိမ်းပိုက်ရမလဲစဉ်းစားဖို့ အချိန်တန်ပြီထင်တယ်၊ သတ်မှတ်ထားတဲ့အချိန်ရောက်ရင် အဖွဲ့တစ်ဖွဲ့ကို ကျုပ်ကိုယ်တိုင်ဦးဆောင်ပြီး သတ္တုတွင်းထဲဝင်မယ်၊ ကျုပ်နဲ့အတူ မိသားစုရဲ့ရတနာဖြစ်တဲ့ ပင်လယ်ပြာခေါင်းလောင်းကိုပါ တစ်ပါတည်း လိုရမယ်ရယူသွားမယ်”
ပင်လယ်ပြာခေါင်းလောင်းမှာ ဘိုးဘေးခန်းမဆောင်တွင် ထားရှိသည့် အဆင့်၃ ဓမ္မရတနာဖြစ်ပြီး ကျင့်ကြံခြင်းလောကတွင် ရှန်းမျိုးနွယ်စုကြံ့ကြံ့ခံရပ်တည်နိုင်ရန် အားကိုးအားထားပြုခဲ့ရသည့် လက်နက်ရတနာလည်းဖြစ်သည်။ အဆိုပါရတနာမျိုးကို လက်ရှိအရေးတွင် အသုံးပြုတော့မည်ကိုထောက်လျှင် ရှန်းတောက်မင်တစ်ယောက် ယခုစစ်ဆင်ရေးကို အလွန်ဂရုစိုက်နေကြောင်းသိသာနေပါသည်။
“ဒါဆို ကျုပ်လည်းလိုက်မယ်၊ အထဲမှာ ပုံစံအတားအဆီးတို့ ဘာတို့ရှိရင်
ကျုပ်ကူဖျက်ပေးလို့ရတယ်လေ”
ရွှီချန်းဟယ်၏ဆန္ဒကိုကြားသောအခါ ရှန်းတောက်မင်သည် ခေတ္တမျှတွေဝေသွားပြီးနောက်မှ သဘောတူသည့်အနေနှင့် ခေါင်းညိတ်ပြလိုက်သည်။ သတ္တုတွင်းကိုသိမ်းပိုက်ပြီးလျှင်တောင် အစီအရင် အတားအဆီးများဆောင်ရွက်ရန် ရွှီချန်းဟယ်ကို လိုအပ်ဦးမည်ဖြစ်သည်။ ပထမဆုံးအနေနှင့် သတ္တုတွင်း၏တည်ရှိမှုကိုဖုံးကွယ်ရမည်ဖြစ်ပြီး ဒုတိယအချက်မှာ သတ္တုတွင်းကို တစ်ပါးသူများခိုးယူမသွားနိုင်ရန် ကာကွယ်ရမည်ဖြစ်သည်။
ထိုအချိန်တွင်…….
ကျန်းချန်းရွှမ်နှင့် ရှန်းရူယန်တို့မှာ တစ်ဦးကိုတစ်ဦးကြည့်လိုက်ပြီး ရှန်းတောက်မင်ကိုပြောလိုက်သည်။
“အစ်ကို ကျွန်မတို့နှစ်ယောက်လည်းလိုက်ခဲ့မယ်၊ ကျွန်မတို့မရှိတုန်းမှာ ယွမ်ဇီကိုခေါ်ပြီး ဌာနချုပ်ကိုကြည့်ခိုင်းထားလို့ရတယ်မလား”
ရှန်းတောက်မင်က ရှန်းရူယန်၏စကားကိုကြားပြီးနောက် ခေတ္တစဉ်းစားလိုက်ပြီး သဘောတူလိုက်သည်။ လောလောဆယ်တွင် သူ့အနေနှင့် ကျန်းချန်ရွှမ်နှင့် ရှန်းရူယန်၏အကူအညီကို လိုအပ်နေသည်လေ။ ရှန်းရူယန်မှာ အဂ္ဂိရတ်ပညာရှင်အဖြစ်နှင့် ယွီဟွာတောင်ကိုစောင့်ကြပ်ဖူးသည့် အတွေ့အကြုံလည်းရှိသည်။ ရှန်းတောက်ယွမ်မှာလည်း အခြေခံတည်ဆောက်ခြင်းအဆင့်ကို မကြာသေးခင်ကမှရရှိသူဖြစ်သည့်အတွက် သူ့ထံမှပြောပလောက်အောင် အကူအညီရမည်မဟုတ်။ ထို့အတွက် ကျန်းချန်ရွှမ်နှင့် ရှန်းရူယန်တို့မရှိသည့်အတောအတွင်း ရှန်းတောက်ယွမ်ကို ကျောက်စိမ်းဖြူစျေးသို့စေလွှတ်စောင့်ကြည့်ခိုင်းထားသည်က ပိုသင့်လျော်မည်ဖြစ်သည်။ စျေးထဲတွင်ဖွဲ့စည်းထားသော အစီအရင်၏အကူအညီဖြင့် ရှန်းတောက်ယွမ်မှာ တော်ရုံအကျပ်အတည်းလောက်တော့ အလွယ်ဖြေရှင်းနိုင်မည်ဖြစ်သည်။
သို့သော် ရွှီချန်းဟယ်ထွက်ခွာသွားလျှင် ကူယန်မြို့ရှိ ဝိညာဉ်သွေးကြောမှာ အကာအကွယ်မဲ့ကျန်ရစ်ခဲ့မည်ဖြစ်ပြီး အခြေခံတည်ဆောက်မှုအဆင့် ကျင့်ကြသူအများစုမှာလည်း ကန်းယန်ဂိုဏ်းကိုထွက်ခွာသွားသည်ဖြစ်၍ ရှန်းမျိုးနွယ်စုတွင် လူအင်အားနည်းပါးလျက်ရှိနေပါသည်။
သို့သော် ကံကောင်းစွာဖြင့် ထိပ်တန်းအဆင့် ၂ အစီအရင်ပညာရှင် ရွှီချန်းဟယ်က သူမထွက်ခွာမီ အကာအကွယ်အစီအရင်တစ်ခုဖန်တီးပေးနိုင်သည်ဟု အာမခံ၍ ပြဿနာမှာပြေလည်သွားပါသည်။
နောက်ဆုံးတွင် သတ္တုတွင်းစစ်ဆင်ရေးတွင် ပါဝင်မည့်အဖွဲ့ဝင်များကို အပြီးသတ်ဆုံးဖြတ်လိုက်ကြသည်။
မျိုးနွယ်စု၏အကြီးအကဲဖြစ်သလို အခြေခံတည်ဆောက်မှုနယ်ပယ် အဆင့်၉ ရှိသူ ရှန်းတောက်မင်က အဖွဲ့ကိုဦးဆောင်မည်ဖြစ်ပြီး အဖွဲ့ဝင်များမှာ ရွှီချန်းဟယ်၊ ကျန်းချန်ရွှမ်နှင့် ရှန်းရူယန်တို့ဖြစ်သည်။
***
နှစ်တစ်ရာကျင့်ကြံပြီးနောက်
အခန်း ၆၂ ။ ကြက်သွေးရောင်မီးသလင်းကျောက်
တစ်ရက်ကြာပြီးနောက်…..
ကျောက်စိမ်းဖြူစျေးသို့ ရှန်းတောက်ယွမ်ရောက်ရှိလာပြီး ကျန်းချန်ရွှမ်နှင့် ရှန်းရူယန်တို့ထံမှ တာဝန်ကိုလက်လွှဲရယူပါသည်။ ကျန်းချန်ရွှမ်တို့မှာ စျေးမှ သူတို့ခေတ္တထွက်ခွာမည့်အကြောင်းကို မည်သူ့ကိုမှ အသိပေးထားခြင်းမရှိ၍ တာဝန်လွှဲပြောင်းမှုမှာ တိတ်တိတ်ဆိတ်ဆိတ်နှင့်ပြီးသွားပါသည်။ ရှန်းတောက်ယွမ်ကိုလည်း ရတနာပွဲကြည့်စင်မှလူများကို သတိထားရန်နှင့် ထိုလူများပြဿနာရှာလာပါက ညှာတာမနေဘဲ လိုအပ်သလို အရေးယူဆောင်ရွက်ရန်နှင့် စျေးအတွင်းချထားသော အစီအရင်ကွက်ကို အသက်သွင်း၍ ထိုလူစုအားသင်ခန်းစာကောင်းကောင်းပေးရန် မှာကြားလိုက်ပါသေးသည်။
သူတို့နှစ်ဦးမရှိသည့်အတောအတွင်း မည်သည့်ပြဿနာမှမဖြစ်ပွားသည်ကတော့ အကောင်းဆုံးဖြစ်ပေလိမ့်မည်။
ရှန်းတောက်ယွမ်မှာ စျေးကို နှစ်များစွာစောင့်ကြပ်လာသည့် အတွေ့အကြုံရှိသည့်အပြင် လမ်းဘေးပြဿနာများကို ကိုင်တွယ်ရာတွင်ထူးချွန်သူလည်းဖြစ်သည့်အတွက် တည်ငြိမ်စွာ ခေါင်းညိတ်ပြလိုက်ပြီး
“မစိုးရိမ်နဲ့ ကျုပ်ဘာလုပ်ရမလဲသိပါတယ်”
“ဒါဖြင့် ဒီကကိစ္စတွေကို အစ်ကိုတောက်ယွမ်လက်ထဲ စိတ်ချလက်ချအပ်ထားခဲ့မယ်နော်”
နှစ်ဦးသား ရှန်းတောက်ယွမ်ကိုနှုတ်ဆက်ပြီးနောက် အချိန်မဆွဲဘဲ ရုပ်ဖျက်ပြီး စျေးမှတိတ်တဆိတ်ထွက်ခွာလာကြသည်။ သူတို့၏ဦးတည်ရာက ကြက်သွေးရောင်ရွှေသတ္တုတွင်းဆီသို့။
နှစ်ရက်ကြာပြီးနောက်….
သတ္တုတွင်း၏အဝင်ဝတွင် ကျန်းချန်ရွှမ်၊ ရှန်းရူယန်၊ ရှန်းတောက်မင်နှင့် ရွှီချန်းဟယ်တို့ လေးဦးလုံးစုစည်းမိကြသည်။ သတ္တတွင်း၏ဝင်ပေါက်နှင့် ဘေးဘီပတ်ဝန်းကျင်ကိုလည်း စေ့စပ်စွာလေ့လာစုံစမ်းပြီးဖြစ်သည်။ အန္တရာယ်ရှိသည့်လက္ခဏာ မပေါ်ကြောင်း အတည်ပြုပြီးသောအခါ ရှန်းတောက်မင်က တစ်ဖွဲ့လုံးကိုကြည့်လိုက်ပြီး
“ဒါဆို သတ္တုတွင်းထဲဝင်ပြီး လေ့လာကြည့်ကြရအောင်”
“ကောင်းပြီ”
သတ္တုတွင်းထဲမဝင်မီ ရွှီချန်းဟယ်က သူ့အိတ်ထဲမှအစီအရင်ပြား အနည်းငယ်ကိုထုတ်ယူပြီး ဝင်ပေါက်နှင့် ဝဲယာဝန်းကျင်တဝိုက်၌ နေရာချထားလိုက်သည်။ ယာယီအားဖြင့် သတ္တုတွင်းကို လူမြင်ကွင်းမှဖျောက်ထားနိုင်ပါလိမ့်မည်။
အစီအရင်ချပြီးနောက် သတ္တုတွင်းအတွင်းသို့ လေးဦးစလုံး စတင်ခြေချ ဝင်ရောက်လိုက်ပါတော့သည်။ ဝင်ဝင်ချင်းခဏမှာပင် သူတို့၏ပတ်ပတ်လည်တွင် အလွန်အမင်းပူပြင်းသော မီးဒြပ်စင်များ၏အငွေ့အသက်ကို ခံစားမိလိုက်ကြရသည်။ အနီရင့်ရောင်အလင်းများက ပြိုးခနဲပြက်ခနဲ လင်းလက်နေသည်။ ကျန်းချန်ရွှမ်တို့၏ ဘေးဘီ၊ အထက်နှင့်အောက်တို့တွင် အနီရောင်ကျောက်ဆောင်များ နေရာအနှံ့တည်ရှိနေပြီး ထိုကျောက်များထံမှ မကြာခဏဆိုသလို မီးပွားမီးစများပွင့်ထွက်နေလိုက်သေးသည်။
သူတို့၏ကိုယ်ခန္ဓာပတ်လည်ကိုကာရံထားသော စစ်မှန်မှုအဆီအနှစ်အကာအကွယ်ကို ထိုမီးပွားများထိခတ်မိသောအခါ မီးကိုရေလောင်းလိုက်သလို တရှဲရှဲမြည်သံများ ထွက်ပေါ်လာသော်လည်း အန္တရာယ်တော့ပေးနိုင်စွမ်းမရှိပါ။ လေးဦးစလုံးမှာ ကျင့်ကြံသူများဖြစ်နေသည့်အချက်ကြောင့်လည်း ပါဝင်ပြီး သာမန်သေမျိုးတစ်ဦးသာ ဤနေရာကိုဝင်လာလျှင် ထိုသေမျိုးလူသားမှာ အစွမ်းအထက်ဆုံးသိုင်းပညာရှင်ဖြစ်နေပါစေ မိုင်းတွင််း၏ အပူချိန်နှင့် မီးလျှံတို့်၏ဝါးမျိုမှုကြောင့် ပြာအဖြစ် ချက်ချင်းပြောင်းသွားမည်ဖြစ်သည်။
မိုင်းတွင်း၏အတွင်းပိုင်းသို့တိုးဝင်လာမိသည်နှင့်အမျှ ကျန်းချန်ရွှမ်တို့၏လက်ထဲတွင် အရွယ်စုံကျောက်တုံးများ များသထက်များလာတော့သည်။ ကျောက်များ၏ အပူချိန်မှာမြင့်မားရုံမက မျက်နှာပြင်များပေါ်တွင်လည်း သတ္တုကဲ့သို့အလွှာတစ်မျိုး ဖုံးအုပ်ထားသည်ကိုတွေ့ရသည်။ သည်အခြင်းအရာမှာ ကြက်သွေးရောင်ရွှေသတ္တု၏ ထူးခြားမှုတစ်ရပ်ဖြစ်သည်။ သို့သော် ကျန်းချန်ရွှမ်တို့ ကောက်ယူလာသော ကျောက်တုံးများမှာ အရည်အသွေးမကောင်းလှဘဲ အလွန်ဆုံး အဆင့်၁ အလတ်စားခန့်သာရှိပြီး ထိုကျောက်များမှာ ချီသန့်စင်ခြင်းနယ်ပယ် ကျင့်ကြံသူများအတွက် တန်ဖိုးရှိမည်ဖြစ်သော်လည်း ကျန်းချန်းရွှမ်တို့ လူစုအတွက်တော့ တန်ဖိုးကြီးသည့်ရတနာများ မဟုတ်ပါ။
ထိုနေရာမှ ရှေ့သို့အနည်းငယ်သွားပြီးချိန်တွင် ပုံသဏ္ဌာန်မျိုးစုံနှင့် အရွယ်အစားစားရှိသော မိစ္ဆာများကို ကျန်းချန်ရွှမ်တို့တွေ့လိုက်ရပါတော့သည်။ မိစ္ဆာများမှာ မြွေ၊ လင်းယုန်၊ ကျား၊ ကျားသစ်၊ လူသား ပုံစံမျိုးစုံပါဝင်သော်လည်း သူတို့အားလုံးတွင် တူညီနေသည့်အချက်က သူတို့၏ခန္ဓာကိုယ်ပေါ်တွင် နီညိုရောင်မီးလျှံတစ်မျိုးလွှမ်းခြုံထားပြီး သတ်ဖြတ်လိုသောအော်ရာများ ထွက်ပေါ်နေခြင်းဖြစ်သည်။ အဆိုပါသတ္တဝါများမှာ သတ္တုတွင်းကိုကြီးစိုးနေသော ကြက်သွေးရောင်မီးမိစ္ဆာများဖြစ်သည််မှာ သေချာသလောက်ရှိပါသည်။
ထိုမိစ္ဆာများတွင် အသိဉာဏ်လုံးဝမရှိဘဲ ကျန်းချန်ရွှမ်တို့လူစုကို မြင်လိုက်သည့်ခဏ၌ တစ်ဟုန်ထိုးပြေးဝင်တိုက်ခိုက်ကြပါတော့သည်။ ကျန်းချန်ရွှမ်တို့လည်း နောက်သို့အလျင်အမြန်ဆုတ်ကာ ပြန်လည်ခုခံကြရသည်။ မျက်စိတစ်မှိတ်အတွင်းတွင် အဆိုပါအဆင့် ၁ မိစ္ဆာများအားလုံးကို သုတ်သင်ပစ်လိုက်နိုင်ပြီး ကျန်းချန်ရွှမ်တို့ ခရီးဆက်နိုင်ခဲ့ကြသည်။ သတ္တုတွင်း၏ဗဟိုရှိရာသို့ နက်ရှိုင်းစွာတိုးဝင်လာမိသည်နှင့်အမျှ ရွှေသတ္တုများမှာ အရည်အသွေး ကောင်းသထက်ကောင်းလာသလို လမ်းတွင်ရင်ဆိုင်ရသည့် မီးမိစ္ဆာများ၏စွမ်းအားမှာလည်း မြင့်သထက်မြင့်လာသည်။
ထိုနေရာတစ်ဝိုက်ရှိ အဆင့် ၂ မိစ္ဆာများကိုသုတ်သင်ပြီးသောအခါ ကျန်းချန်ရွှမ်တို့မှာ သတ္တုတွင်း၏ ဗဟိုချက်မဧရိယာကို ရောက်ရှိလာကြပြီဖြစ်သည်။ ဗဟိုချက်မ၏ အလယ်တည့်တည့်တွင် ပေပေါင်းရာနှင့်ချီမြင့်သည့် အနီရင့်ရောင်တောင်ကုန်းတစ်ခု တည်ရှိနေသည်ကိုတွေ့လိုက်ကြရပြီး ထိုတောင်ကုန်း၏ပတ်လည်တွင် ချော်ရည်ကဲ့သို့အရည်တစ်မျိုးစီးဆင်းနေသည်။
“ဒါကြီးက…..”
ရွှီချန်းဟယ်၏မျက်နှာတွင် တုန်လှုပ်သောအရိပ်အယောင်ပေါ်လာပြီး အံ့အားသင့်စွာရေရွတ်လိုက်သည်။ ကျန်းချန်ရွှမ်နှင့် ရှန်းတောက်မင်တို့လည်း ရွှီချန်းဟယ်ကို ကမန်းကတန်းလှည့်ကြည့်မိသည်။
ရှန်းတောက်မင်က
“အကြီးအကဲရွှီ ဒီတောင်က ဘာလဲ”
ရွှီချန်းဟယ်က တည်ကြည်သောလေသံဖြင့်
“ကျုပ်ထင်တာမမှားရင် ကျုပ်တို့ရှေ့က တောင်ကုန်းက ကြက်သွေးရောင်မီးလျှံ မီးတောင်ကြီး ပဲ”
“ကြက်သွေးရောင်မီးတောင် ဟုတ်လား”
“ဟုတ်တယ် “
ရွှီချန်းဟယ်က ခေါင်းညိတ်ပြပြီး ဆက်ပြောသည်။
“ကြက်သွေးရောင်မီးတောက်ရှိတဲ့ ကြက်သွေးရောင်ရွှေသတ္တုတွင်းတိုင်းဟာ ရွှေသတ္တုတွင်းအကြီးစားအဖြစ်ကို ကူးပြောင်းနိုင်တဲ့ အလားအလာရှိတယ်တဲ့၊ အနိမ့်ဆုံးအနေနဲ့ အလတ်စားအရွယ်ထိ ရောက်နိုင်တယ်၊ ဒါကအရေးမကြီးသေးဘူး၊ အဓိကအရေးကြီးတာက ကြက်သွေးရောင်မီးတောင်က နှစ် ၃၀၀ မှာတစ်ကြိမ် ကြက်သွေးရောင်မီးသလင်းကျောက်ကို မွေးထုတ်ပေးနိုင်တယ်ဆိုတဲ့အချက်ပဲ”
“ကြက်သွေးရောင်မီးသလင်းကျောက် ဟုတ်လား”
ရွှီချန်းဟယ်၏စကားကိုကြားလိုက်ရချိန် ကျန်းချန်ရွှမ်နှင့် ရှန်းတောက်မင်တို့၏မျက်နှာများမှာ လေးနက်သွားကြသည်။
ကျီဖုအဆင့် (ခရမ်းရောင်နန်းတော်နယ်ပယ်) ကိုတက်လှမ်းနိုင်ရန်အတွက် အကောင်းဆုံးရတနာမှာ ခရမ်းရောင်တိမ်လွှာကျောက်စိမ်းဖြစ်သည်ကို သူတို့အားလုံးသိရှိပြီးဖြစ်သည်။
အဆိုပါရတနာသည် ကျင့်ကြံသူတစ်ဦးအား ကျီဖုအဆင့်ကိုရောက်ရှိနိုင်ချေကို ၅၀% နီးပါးထိ တိုးမြှင့်ပေးသလို တစ်ချိန်တည်း၌ ကျင့်ကြံသူ၏စိတ်နှင့်ခန္ဓာကို ကာကွယ်ပေးထားနိုင်သည်ဖြစ်၍ ထိုကျင့်ကြံသူမှာ ကျီဖုအဆင့်သို့မတက်လှမ်းနိုင်ခဲ့လျှင်တောင် ဆိုးဆိုးဝါးဝါးဒဏ်ရာရရှိမည်မဟုတ်ဘဲ နှစ်အနည်းငယ်မျှအနားယူရုံနှင့် ဒုတိယအကြိမ်ပြန်လည်ကြိုးစားခွင့်ရရှိမည်ဖြစ်သည်။
သို့သော် ကျီဖုနယ်ပယ်ကိုရောက်ရှိရန် ကူညီပေးနိုင်သည့်ရတနာမှာ ဤရတနာတစ်ခုတည်းမဟုတ်ဘဲ ဒြပ်စင်ငါးပါးကိုကိုယ်စားပြုသော ဝိညာဉ်ရတနာငါးမျိုးရှိနေပါသေးသည်။ ထိုရတနာများမှာ သစ်သားဓာတ်ဖြစ်သော အဇူရာနဂါး သစ်သားသလင်းကျောက်တုံး၊ မီးဓာတ်ဖြစ်သော ကြက်သွေးရောင်မီးသလင်းကျောက်တုံး၊ မြေဓာတ်ဖြစ်သော ကမ္ဘာမြေဝိညာဉ်သလင်းကျောက်တုံး၊ သတ္တုဓာတ်ဖြစ်သော အဖြူရောင်ဧကရာဇ် ရွှေသလင်းကျောက်တုံး နှင့် ရေဓာတ်ဖြစ်သည့် လိပ်နက်သလင်းကျောက်တုံးတို့ဖြစ်ကြသည်။
အဆိုပါရတနာများမှာ ခရမ်းရောင်တိမ်လွှာကျောက်စိမ်းလောက် အာနိသင်မရှိသော်လည်း ကျင့်ကြံသူတစ်ဦးအား ကျီဖုနယ်ပယ်သို့ ရောက်ရှိနိုင်ချေကို ၃၀% အထိ တိုးမြှင့်ပေးနိုင်ပါသည်။ ကျင့်ကြံသူတွင် ခရမ်းသွေးပြာဆေးလုံးရှိထားသည်ဆိုပါက ကျီဖုနယ်ပယ်သို့ တက်လှမ်းရန်ကြိုးစားပိုင်ခွင့်ရှိပြီး မအောင်မြင်ခဲ့လျှင်တောင် ဆေးလုံးအစွမ်းကြောင့် အသက်အန္တရာယ်ထိိခိုက်မည်မဟုတ်ပါ။ ထို့ပြင် အဆိုပါ ဝိညာဥ်ရတနာများသည် အဆင့် ၃ အလယ်အလတ်အဆင့် သို့မဟုတ် အမြင့်ဆုံးအဆင့် ဓမ္မလက်နက်ပစ္စည်းများကို သန့်စင်ရာတွင် အဓိကအသုံးပြုသည့် အဖိုးအလွန်ထိုက်တန်သော ပစ္စည်းများလည်းဖြစ်နေသေးသည်။
ထို့ကြောင့် ရွှီချန်းဟယ်၏စကားကိုကြားပြီးပြီးချင်း ကျန်းချန်းရွှမ်၊ ရှန်းတောက်မင်နဲ့ ကျန်လူအားလုံး၏ စိတ်ထဲတွင် ပထမဆုံးတွေးမိသည်က ရှန်းမျိုးနွယ်စုတော့ ဒီတစ်ခါပွပေါက်တိုးပြီဟူ၍ ဖြစ်သည်။
ဒုတိယအတွေးက ဤသတ္တုတွင်းတည်ရှိနေမှုကို အစွမ်းကုန်လျှို့ဝှက်ထားဖို့လိုသည် ဆိုသောအချက်ဖြစ်သည်။ ကြက်သွေးရောင်မီးလျှံသလင်းကျောက်သည် အဆင့် ၃ ရှိသည့် ဝိညာဉ်ရတနာဖြစ်သလို အဆင့်၃ ရတနာများအားလုံးအနက် အရည်အသွေးအမြင့်ဆုံးလည်းဖြစ်သည်။ ကျီဖုနယ်ပယ်အဆင့်ကျင့်ကြံသူတစ်ဦးသာ ဤသတ္တုတွင်းအကြောင်း သိရှိသွားလျှင် အလစ်သုတ် မောင်ပိုင်စီးရန် နှောင့်နှေးနေမည်မဟုတ်ပါ။ ထို့အတွက် ရှန်းအင်မော်တယ်မျိုးနွယ်စုအနေနှင့် သည်သတ္တုတွင်းကို အစွမ်းကုန်ကာကွယ်ထားဖို့လိုပေလိမ့်မည်။
***
နှစ်တစ်ရာကျင့်ကြံပြီးနောက်
အခန်း ၆၃ ။ ဥက္ကာမီးလျှံဓားနည်းစနစ်
ကျန်းချန်ရွှမ်တို့အဖွဲ့ မျက်စိရှေ့မှောက်တွင်ရှိနေသော မီးတောင်ကိုကြည့်ရင်း ပျော်မြူးနေကြချိန်တွင် အရေအတွက်အားဖြင့် အလွန်များပြားသောမီးလျှံမိစ္ဆာများ မီးတောင်ပေါ်တွင် ရုတ်တရက်ပေါ်လာတော့သည်။ ခဏချင်းတွင် မီးမိစ္ဆာများသည် ကျန်းချန်ရွှမ်တို့အဖွဲ့ကိုဦးတည်၍ ပြေးဝင်တိုက်ခိုက်ကြသည်။ မိစ္ဆာအားလုံးနီးပါးမှာ အဆင့် ၁ အမြင့်ဆုံးအဆင့်များဖြစ်ပြီး ရှေ့ဆုံးကနေဦးဆောင်ပြေးဝင်လာသော တစ်ဒါဇင်ခန့်ရှိသည့်မိစ္ဆာတို့မှာ အဆင့်၂ တွင်မှ အနိမ့်ဆုံးနဲ့ အလယ်အဆင့်များဖြစ်ကြသည်။
ထိုမိစ္ဆာများကို ကျန်းချန်ရွှမ်တို့အဖွဲ့အနေနှင့် မစိုးရိမ်ပါ။ ထိုသတ္တဝါများသည် သူတို့ကိုပြောပလောက်အောင် ခြိမ်းခြောက်နိုင်စွမ်းမရှိ။ သူတို့အမှန်တကယ်စိုးရိမ်နေရသည်က မိစ္ဆာအုပ်ထဲမှာ ထူးခြားသောသတ္တဝါနှစ်ကောင်ဖြစ်သည်။ ထိုမိစ္ဆာနှစ်ကောင်တွင် တောင်ပံနှင့် ဦးချိုနှစ်ဖက်ရှိသည့်အပြင် မျက်လုံးများမှလည်း ပြာလဲ့လဲ့မီးလျှံများထွက်ပေါ်နေသည်။
ထိုနှစ်ကောင်ထံမှ ဖြာထွက်နေသောအော်ရာမှာ ကျန်မိစ္ဆာများအားလုံးထက် ပိုမိုကြောက်မက်ဖွယ်ကောင်းနေသည်။ နှစ်ကောင်စလုံးမှာ အဆင့်၂ ၏ အမြင့်ဆုံးအဆင့်ကိုပင် ကျော်လွန်နေပြီဖြစ်ပြီး အဆင့် ၃ သို့ရောက်လုနီးပြီဖြစ်သည်။
“ကြက်သွေးရောင်မီးလျှံမိစ္ဆာဘုရင် ပဲ”
ရွှီချန်းဟယ်၏မျက်နှာမှာ ရုတ်ခြည်းဖြူဆုတ်သွားသည်။ အဆင့် ၃ နီးပါးရှိသည့် မီးလျှံမိစ္ဆာဘုရင်နှစ်ကောင်ကို ယခုလို အငယ်ဆုံးသတ္တုတွင်းအဆင့်မျိုးတွင် တွေ့ရမည်ဟု သူတို့အားလုံးမမျှော်လင့်ထားကြသလို ပုံမှန်အားဖြင့်လည်း တွေ့နိုင်စရာအကြောင်းမရှိပါ။ မီးတောင်၏ ပယောဂကြောင့်သာ ထိုမိစ္ဆာဘုရင်နှစ်ကောင်ရှိနေခြင်း ဖြစ်နိုင်သည်။ ထိုအခြင်းအရာကိုတွေးမိသော ရှန်းတောက်မင်က ကျန်လူများဖက်ကိုလှည့်ကာ အသံအုပ်အုပ်ဖြင့်
“အကြီးအကဲရွှီ၊ ချန်ရွှမ်နဲ့ ရူယန် ကျန်တဲ့ မီးလျှံမိစ္ဆာတွေကို မင်းတို့ကိုင်တွယ်လိုက်။ ဘုရင်နှစ်ကောင်ကို ငါထိန်းထားလိုက်မယ်”
စကားဆုံးဆုံးချင်းမှာပင် ရှန်းတောက်မင်၏လက်ထဲတွင် နှစ်မီတာရှည်၍ တစ်မီတာခန့် အပြန့်ရှိသော အလွန်ကြီးမားလေးလံသည့်ဓားကြီးနှစ်စင်း ရောက်ရှိလာသည်။ တစ်စင်းမှာအဖြူဖြစ်ပြီး နောက်တစ်စင်းမှာအနက်ဖြစ်သည်။ ထိုဓားများသည် ရှန်းတောက်မင်၏ အဆင့်၂ အမြင့်ဆုံးအဆင့်ရှိ ဓမ္မလက်နက်ပစ္စည်းများဖြစ်ကြပြီး တာအိုအဖြူနှင့် တာအိုအနက်ဓားဟုခေါ်သည်။ ဓားနှစ်စင်းမှာ ချက်ချင်းဆိုသလို အဖြူနှင့်အနက် အလင်းစီးကြောင်းများအဖြစ် အသွင်ပြောင်းသွားပြီး မီးမိစ္ဆာဘုရင်နှစ်ကောင်အား ခုတ်ပိုင်းလိုက်ကြသည်။
ကျန်းချန်ရွှမ်တို့သုံးဦးမှာလည်း အချိန်ဆွဲမနေတော့ဘဲ ဓမ္မလက်နက်များကို ကိုယ်စီဆွဲထုတ်လိုက်ကြပြီး မီးလျှံမိစ္ဆာများကို ဦးတည်တိုက်ခိုက်လိုက်ကြသည်။
ရွှီချန်းဟယ်က အစီအရင်အလံ ဒါဇင်ပေါင်းများစွာကို ပစ်လွှတ်လိုက်သည်။ အလံများသည် ချေမှုန်းရေးအစီအရင်များ၊ ထောင်ချောက်အစီအရင်များနှင့် ပုံရိပ်ယောင် အစီအရင်များအဖြစ်သို့ ပြောင်းလဲသွားသည်။ မျက်စိတစ်မှိတ်အတွင်း မီးလျှံမိစ္ဆာများမှာ အစီအရင်လက်နက်များအောက်ဝယ် အတုံးအရုံးသေဆုံးကုန်ကြသည်။
ထိုအထဲတွင် အဆင့် ၂ မီးမိစ္ဆာအတော်များများ ပါသွားကြသည်။ တစ်ချိန်တည်းတွင် ရှန်းရူယန်သည်လည်း မိုးကြိုးစည်းတံဆိပ်ကို ဆွဲထုတ်လိုက်သည်။ ရုတ်တရက်ဆိုသလို မီးလျှံမိစ္ဆာများအပေါ်သို့ ကောင်းကင်မှမိုးကြိုးများ အဆက်မပြတ်ကျဆင်းပစ်ခတ်ပြီး မိစ္ဆာများမှာ နေရာတွင်ပင် မီးသွေးခဲဖြစ်ကုန်ကြသည်။ တစ်ဆက်တည်းမှာပင် ရှန်းရူယန်က လက်သင်္ကေတအချို့ကိုပြုလုပ်လိုက်ရာ လျှပ်စီးမြွေများ ရုတ်တရုတ်ထွက်ပေါ်လာပြီး မိစ္ဆာများကို အလုအယက်ဝါးမြိုကြပြန်သည်။ ရူယန်အသုံးပြုသောနည်းစနစ်မှာ လေခွင်းလျှပ်စီးမြွေ နည်းစနစ်ဖြစ်ပြီး အဆင့်၂ အလယ်အလတ်အဆင့်ရှိ နည်းစနစ်တစ်ခုဖြစ်သည်။ ဆုံးခန်းတိုင်သည်အထိ ကျင့်ကြံနိုင်ခဲ့လျှင် အဆင့် ၂ အမြင့်ဆုံးအဆင့်စွမ်းအားကို ပိုင်ဆိုင်နိုင်သည်။
ထိုအချိန်တွင် ကျန်းချန်ရွှမ်မှာ လေပြေဓားနည်းစနစ်ဖြင့် မိစ္ဆာရှစ်ကောင်ခန့် သတ်ဖြတ်ပြီးဖြစ်သည်။ ထိုခဏ၌ သူ့စိတ်ထဲတွင် စနစ်၏အချက်ပေးသံကို ရုတ်တရက်ကြားလိုက်ရသည်။
[ဒင်! အောင်မြစ်မှုစနစ်မှ တာဝန်အသစ်ထုတ်ပြန်လာပါပြီ။ ကျေးဇူးပြုပြီး မီးလျှံမိစ္ဆာအကောင် ၁၀၀ ကိုသတ်ဖြတ်ပါ၊ စနစ်ပိုင်ရှင်။]
[တာဝန်ပြီးမြောက်မှု : ၂၃%]
ယခုလိုအချိန်မျိုးတွင် စနစ်ကအချက်ပေးလာမည်ကို ကျန်းချန်ရွှမ် မျှော်လင့်ထားခြင်းမရှိ၍ အံ့အားသင့်မိသွားသည်။ ထို့နောက် သူ့အထက်ကိုမော့ကြည့်လိုက်ရာ မီးလျှံမိစ္ဆာ အကောင်တစ်ရာနီးပါးကျန်နေသေးသည်ကို တွေ့လိုက်ရ၍ သူ၏မျက်လုံးအစုံမှာ ကျဉ်းမြောင်းသွားပြီး နောက်ထပ်ဓားတစ်စင်းနှင့်အတူ အဆင့်၁ နှင့် အဆင့် ၂ အနိမ့်စား ချေမှုန်းရေးအဆောင်များကို ထုတ်ယူပစ်လွှတ်လိုက်သည်။
“ရူယန်၊ အကြီးအကဲရွှီ ဒီကောင်တွေကို ကျုပ်တာဝန်ထား၊ ကျုပ်ရှင်းလိုက်မယ်”
ဂျိန်း!
ပစ်လွှတ်လိုက်သောအဆောင်များသည် ရေခဲပန်းဆွဲများ၊ ရေဓားများနှင့် နွယ်ပင်များအဖြစ်သို့ပြောင်းလဲသွားပြီး မိစ္ဆာများကို ပုံသဏ္ဌာန်အမျိုးမျိုးဖြင့် သတ်ဖြတ်ပါတော့သည်။ အဆင့် ၂ အဆောင်လက်နက်များ၏ လက်ချက်မိပါက အဆင့် ၁ မီးမိစ္ဆာများမှာ ပွဲချင်းပြီးသေဆုံးကုန်ကြသည်။ ကျန်းချန်ရွှမ်၏အပြုအမူကိုကြည့်ရင်း ရှန်းရူယန်နှင့် ရွှီချန်းဟယ်တို့မှာ ဇဝေဇဝါဖြစ်နေကြသည်။ ကျန်းချန်ရွှမ်တစ်ယောက် မီးလျှံမိစ္ဆာများကို အသည်းအသန်သတ်ဖြတ်နေလိုရသည့် အကြောင်းအရင်းကိုသူတို့နားမလည်ပါ။ ကျန်းချန်ရွှမ်ပစ်လွှတ်တိုက်ခိုက်နေသော အဆောင်ပစ္စည်းများမှာ အဆင့်၂ အနိမ့်စားအဆင့်သာရှိသော်လည်း တစ်ခုကို ဝိညာဉ်ကျောက်တုံး ၁၀၀၀ မှ ၂၀၀၀ အတွင်း ကုန်ကျပါသည်။
လက်ရှိအချိန်တွင် ကျန်းချန်ရွှမ်အနေနှင့် သူတို့ကိုရှင်းပြချိန်မရှိသလို ရှင်းပြလိုစိတ်လည်းမရှိပါ။ ကျန်းချန်ရွှမ်မှာ ဓားနဲ့လူတစ်သားတည်းဖြစ်သွားပြီး ဓားအလင်းတန်းမှာ မိစ္ဆာအုပ်အတွင်းသို့ ရှေ့နောက်လွန်းထိုး၍ တရစပ်ပိုင်းဖြတ်နေသည်။ အဆင့် ၂ အနိမ့်စားနှင့် အလယ်အလတ်အဆင့်ရှိသော မီးလျှံမိစ္ဆာများပင် ကျန်းချန်းရွှမ်၏ ပြီးပြည့်စုံသောအဆင့်ရှိသည့် တိုက်လေဓားနည်းစနစ်ကို ခံနိုင်စွမ်းမရှိဘဲ မီးလျှံအခိုးအငွေ့များအဖြစ် ပြောင်းလဲကာသေဆုံးကုန်ကြသည်။
နောက်ထပ် အဆင့်၂ အနိမ့်စား မီးလျှံမိစ္ဆာနှစ်ကောင်အား သတ်ဖြတ်ပြီးနောက်တွင် စနစ်မှအချက်ပေးသံကို ကြားလိုက်ရပြန်သည်။
[ဂုဏ်ပြုပါတယ် Host၊ ကြက်သွေးရောင်မီးလျှံမိစ္ဆာ ၁၀၀ အားသတ်ဖြတ်ပြီးပါပြီ၊ အဆင့် ၂ အမြင့်ဆုံးအဆင့်ရှိ ဓားနည်းစနစ်ကို သင်လက်ခံရရှိလိုက်ပါပြီ၊ နည်းစနစ်၏အမည်မှာ ဥက္ကာမီးလျှံဓားနည်းစနစ်ဖြစ်သည်။]
[ ဤနည်းစနစ်ဖြင့် ဥက္ကာခဲနှင့်တူသော မီးဓားစွမ်းအင်ကို ထုတ်ဖော်နိုင်မည်ဖြစ်ပြီး နည်းစနစ်ကို ဆုံးခန်းတိုင်သည်အထိ ကျင့်ကြံနိုင်ပါက မီးဥက္ကာခဲ ၉၉ လုံးကို တစ်ပြိုင်နက်တည်း ဆင့်ခေါ်တိုက်ခိုက်နိုင်မည်ဖြစ်သည်။ ဤနည်းစနစ်၏စွမ်းအားမှာ အဆင့်၃ အနိမ့်စား မန္တန်တစ်ခုနှင့်ယှဉ်နိုင်သည်။]
ကျန်းချန်းရွှမ်တစ်ယောက် အနည်းငယ်အံ့အားသင့်သွားသည်။ ဒီတစ်ခါ စနစ်ကချီးမြှင့်လိုက်သော ဓားနည်းစနစ်က အဆင့်၃ အနိမ့်စားမှော်စွမ်းအားနှင့် အဆင့်တူသည်တဲ့။ အဆင့် ၂ အမြင့်ဆုံးအဆင့် နည်းစနစ်များနှင့် မန္တန်များတွင် အဆင့် ၃ အနိမ့်စားအဆင့် မန္တန်များကိုယှဥ်နိုင်သည့် နည်းစနစ်မှာ ရှာမှရှားလှသည်လေ။ ထိုခဏတွင် ကျန်းချင်းရွှမ်၏စိတ်ခန္ဓာအတွင်းသို့ မှတ်ဉာဏ်အသစ်တစ်ခု ဝင်ရောက်လာပါသည်။ ထိုမှတ်ဉာဏ်သစ်မှာ ဥက္ကာမီးလျှံဓားနည်းစနစ်ပင်ဖြစ်သည်။ မှတ်ဉာဏ်နှင့်အတူ နက်နဲလွန်းသော စွမ်းအားသစ်တစ်ရပ်သည်လည်း သူ့ခန္ဓာကိုယ်တွင်းသို့ ဝင်ရောက်လာကာ ထိုဓားနည်းစနစ်ကို တစ်ခဏချင်း တတ်မြောက်သွားပါသည်။
မျက်စိတစ်မှိတ်အတွင်းမှာပင် အဆိုပါဓားနည်းစနစ်၏ ကနဦးအဆင့်ကို တက်လှမ်းသွားနိုင်ပါတော့သည်။ စက္ကန့်ပိုင်းမျှအကြာတွင် ကျန်းချန်းရွှမ်မှာ နောက်ဆုံးအဆင့်ကိုရောက်ရှိသွားခဲ့ပြီဖြစ်ပြီး ဓားနည်းစနစ်၏စွမ်းအားမှာ အဆင့် ၃ နားအထိ မြင့်တက်သွားပါသည်။ ယခုအချိန်တွင် အဆင့် ၃ အောက်ရှိ ကျင့်ကြံသူများ၊ နတ်ဆိုးမိစ္ဆာများအားလုံးသည် ဥက္ကာမီးလျှံဓားနည်းစနစ်၏ ဓားချက်တစ်ချက်ကိုပင် ခံနိုင်စွမ်းရှိကြတော့မည်မဟုတ်ပါ။ သို့သော် ပြဿနာတစ်ခုက နောက်ဆုံးအဆင့်ကိုရောက်ရှိသောအခါ ဓားနည်းစနစ်ကိုထုတ်ဖော်လိုက်တိုင်း သူ့ကိုယ်တွင်းမှ စစ်မှန်မှုအဆီအနှစ်အများစုမှာ ရုတ်ခြည်းဆိုသလို ကုန်ဆုံးသွားခြင်းဖြစ်သည်။ တစ်နည်းဆိုရလျှင် သူ၏လက်ရှိကျင့်ကြံမှုအဆင့်ဖြစ်သော အခြေခံတည်ဆောက်ခြင်းနယ်ပယ်အဆင့်တွင် ဥက္ကာမီးလျှံဓားနည်းစနစ်ကို တစ်ကြိမ်သာအများဆုံး ထုတ်ဖော်နိုင်မှာဖြစ်သည်။ သို့ဖြစ်၍ ဤနည်းစနစ်ကို နောက်ဆုံးပွဲသိမ်းလက်နက်အဖြစ်သာ အသုံးပြုရန် ကျန်းချန်းရွှမ်ဆုံးဖြတ်လိုက်သည်။
ထိုအချိန်တွင် မီးလျှံမိစ္ဆာအားလုံးနီးပါးမှာ ကျန်းချန်ရွှမ်၏လက်ချက်ဖြင့် သေဆုံးကုန်ကြပြီဖြစ်ပြီး ကျန်မိစ္ဆာများကိုလည်း ရှန်းရူယန်နှင့် ရွှီချန်းဟယ်တို့က ပွဲသိမ်းပေးလိုက်ကြသည်။ နောက်ဆုံးကျန်နေသည်က မီးလျှံမိစ္ဆာဘုရင်နှစ်ကောင်ဖြစ်သည်။ အဆင့်၃ နီးပါးရှိသော မီးမိစ္ဆာဘုရင်နှစ်ကောင်မှာ ရင်ဆိုင်ရအလွန်ခက်ခဲပြီး အခြေခံတည်ဆောက်ခြင်းနယ်ပယ် နဝမအဆင့်တွင်ရှိသူ ရှန်းတောက်မင်သည်ပင် အဆင့် ၂ အမြင့်ဆုံးအဆင့် ဓမ္မလက်နက်များအကူအညီဖြင့် တိုက်ခိုက်နေသော်လည်း အရေးနိမ့်နေသည်ကိုတွေ့ရသည်။ ရှန်းတောက်မင်ရှုံးလုဆဲဆဲတွင် ကျန်းချန်ရွှမ်၊ ရှန်းရူယန်နှင့် ရွှီချန်းဟယ်တို့ ကူညီရန်အပြေးရောက်ရှိလာကြသည်။
***
နှစ်တစ်ရာကျင့်ကြံပြီးနောက်
အခန်း ၆၄ ။ ကြက်သွေးရောင်မီးမိစ္တာဘုရင်များကို သတ်ဖြတ်ခြင်း
ရွှီချန်းဟယ်က အစီအရင်အလံအချို့ကို ပစ်လွှတ်ကာ ရှန်းတောက်မင်ကို တိုက်ခိုက်နေသော မိစ္ဆာဘုရင်နှစ်ကောင်ကို တားဆီးဖို့ကြိုးစားလိုက်သည်။ သို့သော် သာမန်မီးမိစ္ဆာများကို အလွယ်တကူချုပ်နှောင်နိုင်သော ရွှီချန်းဟယ်၏အစီအရင်များမှာ မိစ္ဆာဘုရင်နှစ်ကောင်လက်ချက်ဖြင့် ပြာမှုန့်အဖြစ်သို့ လောင်ကျွမ်းသွားပါတော့သည်။
ချွင်!
တစ်ချိန်တည်း၌ ရှန်းရူယန်၏အဆင့်၂ ဓမ္မလက်နက်ဖြစ်သော ကျိန်စာအလင်းတန်းဓားမှာ မိစ္ဆာဘုရင်တစ်ကောင်၏ကိုယ်ကို ပိုင်းဖြတ်မိပြီး ဒဏ်ရာအပေါက်တစ်ခုဖြစ်ပေါ်လာသော်လည်း စက္ကန့်အနည်းငယ်အတွင်း ဒဏ်ရာမှာ အလိုလိုကျက်သွားပြန်သည်။ ဤသည်ကိုမြင်လိုက်ရသော ကျန်းချန်ရွှမ်နှင့် ရွှီချန်းဟယ်တို့မှာ ပါးစပ်အဟောင်းသားဖြစ်သွားရသည်။ အဆင့်၂ အမြင့်ဆုံးအဆင့်ဖြစ်သော ဓားပျံလက်နက်မှာ မိစ္ဆာဘုရင်နှစ်ကောင်ကို ပြောပလောက်သည့်ဒဏ်ရာမျိုး မပေးနိုင်ပေ။
ကျန်းချန်ရွှမ်လည်း မစဉ်းစားတော့ဘဲ အဆင့်၂ အလယ်အလတ် အဆောင်လက်နက်သုံးလေးခု ထုတ်ယူပြီး အားကုန်ပစ်လွှတ်လိုက်သည်။ ထိုအဆောင်များထဲတွင် နတ်ဆိုးကျင့်ကြံသူတစ်ဦးထံမှ ရရှိထားသည့် နတ်ဘုရားလေ အဆောင်လည်းပါဝင်သည်။
နတ်ဘုရားများ၏စွမ်းအားနှင့် အလားတူသည့် လေပွေများတဝီဝီတိုက်ခတ်လာသည်။ တွဲဖက်ပစ်လွှတ်လိုက်သော ချုပ်နှောင်မှုအဆောင်ကလည်း မိစ္ဆာဘုရင်နှစ်ကောင်ကို လေထဲမှာပင် လော့ချချုပ်နှောင်နိုင်လိုက်သည်။ သို့သော် လက်တဖျစ်စာအချိန်အတွင်းမှာပင် နတ်ဘုရားလေပွေမှာ ပျောက်လွင့်သွားပြီး ချုပ် မိစ္ဆာဘုရင်နှစ်ကောင်၏စွမ်းအားကို ထိန်းချုပ်နိုင်ခြင်းမရှိတော့ဘဲ လောင်ကျွမ်းသွားပါတော့သည်။
ထိုစဉ် ချုပ်နှောင်မှုအဆောင်မှ လွတ်မြောက်လာသော မိစ္ဆာဘုရင်နှစ်ကောင်အနက် တစ်ကောင်ကိုယ်ခန္ဓာကို ရေခဲအလွှာပါးတစ်ခု ရုတ်တရက်ဖုံးလွှမ်းသွားသည်။ ရှန်းတောက်မင်က အခွင့်အရေးကိုလက်လွှတ်မခံပါ။ သူ့လက်ထဲရှိ ပင်လယ်ပြာခေါင်းလောင်းမှာ ဧရာမခေါင်းလောင်းကြီးအဖြစ်ပြောင်းသွားပြီး ဟိန်းသံတစ်ခုထွက်ပေါ်လာကာ မိစ္ဆာဘုရင်ကောင်ထံ ပစ်လွှတ်လိုက်ပါသည်။ ထိုခဏတွင် မီးလျှံမိစ္ဆာဘုရင်၏ကိုယ်မှာ တစ်စစီပေါက်ကွဲသွားပြီး မီးပွားများအဖြစ် ပြန့်ကျဲသွားပါသည်။
ဤအဖြစ်ကိုမြင်လိုက်ရသော ကျန်းချန်ရွှမ်နှင့် ရွှီချန်းဟယ်တို့မှာ မအံ့သြဘဲမနေနိုင်တော့။ အဆင့် ၃ လက်နက်ရတနာတစ်ခုက ယခုလို အလွန်အစွမ်းထက်နေလိမ့်မည်ဟု သူတို့မမျှော်လင့်ထားကြပါ။ အစောပိုင်းက သူတို့အစွမ်းကုန် အားသွန်တိုက်ခိုက်ခဲ့ကြသော်လည်း မိစ္ဆာဘုရင်နှစ်ကောင်ကို ခြစ်ရာလေးတစ်ခုထင်ဖို့ပင် အနိုင်နိုင်ဖြစ်နေချိန် အဆင့် ၃ လက်နက်ရတနာတစ်ခုအတွက်တော့ မိစ္ဆာဘုရင်တစ်ကောင်ကို သတ်ဖြတ်ရန် တစ်ချက်တည်းသာ လိုသည်လေ။ သို့သော် ရတနာလက်နက်ကို အသုံးပြုပြီးသည်နှင့် ရှန်းတောက်မင်၏ ခန္ဓာကိုယ်မှာ လဲပြိုလုမတတ် အားအင်များကုန်ခန်းလုနီး ဖြစ်သွားရပါသည်။ မျက်နှာမှာလည်း သွေးဆုတ်သလိုဖြူလျော်သွားသလို ကိုယ်ခန္ဓာမှာလည်း ယိုင်လဲလုနီးဖြစ်သွားသည့်အတွက် ပင်လယ်ပြာခေါင်းလောင်းကို နောက်တစ်ကြိမ်အသုံးပြုနိုင်စွမ်းမရှိတော့ပါ။
ကျန်နေသေးသော မီးလျှံမိစ္ဆာဘုရင်မှာ သူ့အဖော်အသတ်ခံလိုက်ရသည်ကို မြင်ပြီးနောက် ဒေါမာန်ပြင်းစွာဖြင့်ဟိန်းလိုက်သလို ခန္ဓာကိုယ်မှလည်း အလျှံတငြီးငြီးတောက်လောင်နေသော မီးလျှံကြီးများ ပေါ်ထွက်လာသည်။ ထိုမီးများမှာ အနီရောင်မှ ပြာလဲ့လဲ့အဖြစ်သို့ အသွင်ပြောင်းနေသည်။
“မကောင်းတော့ဘူး ဒီကောင် အဆင့်၃ ကိုတက်နေတာ၊ ကျုပ်တို့အမြန်ဆုံးတားမှဖြစ်မယ်”
ရွှီချန်းဟယ်က စိုးရိမ်ကြီးစွာဖြင့် လောဆော်လိုက်သော်လည်း ရှန်းတောက်မင်မှာ ဆက်လက်တိုက်ခိုက်နိုင်စွမ်းမရှိတော့ပါ။ ထိုစဉ် ရှန်းရူယန်က ရုတ်တရက်ရှေ့ထွက်လာပြီး တစ်စုံတစ်ခုကို ပစ်လွှတ်လိုက်သည်။ ရူယန်ပစ်လိုက်သောအရာမှာ အဆင့် ၃ အဆင့်ရှိ လေနက်အဆောင်ဖြစ်မှန်း ကျန်းချန်ရွှမ်မြင်လိုက်ရသည်။ တစ်ခဏချင်းပင် အနက်ရောင်လေဆင်နှာမောင်းတစ်ခုက မိစ္ဆာဘုရင်ကို တစ်ဟုန်ထိုးဖြတ်ဝှေ့သွားသည်။ လေဆင်နှာမောင်းခဲတွင် ချာလပတ်ယမ်းနေသော မိစ္ဆာဘုရင်၏ကိုယ်ပေါ်ရှိ မီးလျှံများမှာငြိမ်းသွားပြီး ခန္ဓာကိုယ်ကြီးမှာလည်း ပြာအဖြစ်လောင်ကျွမ်းပျောက်ကွယ်သွားပါတော့သည်။
ကျန်းချန်ရွှမ်မှာ နောက်တစ်ကြိမ် ပါးစပ်အဟောင်းသားဖြစ်ရပြန်သည်။ အဆင့်၃ အနိမ့်စားအဆင့်ရှိ အဆောင်လက်နက်၏စွမ်းပကားမှာ တုန်လှုပ်ဖွယ်ကောင်းလှသည်။ အဆင့် ၃ အနိမ့်စားအဆင့် ဓမ္မရတနာဖြစ်သော ပင်လယ်ပြာခေါင်းလောင်းကဲ့သို့ပင် အဆင့် ၃ နီးပါးရှိနေသည့် မီးလျှံမိစ္ဆာဘုရင်တစ်ကောင်ကို တစ်ချက်တည်းနှင့် သုတ်သင်နိုင်စွမ်းရှိသည်။
သို့သော် ထိုအဆောင်လက်နက််၏စျေးနှုန်းကို မြင်ယောင်ကြည့်လိုက်ချိန် ကျန်းချန်ရွှမ်မှာ စိတ်ထိခိုက်သွားရသည်။ ရူယန်ပစ်လွှတ်လိုက်သော လေနက်အဆောင်တစ်ခုသည် ဝိညာဉ်ကျောက်တုံးပေါင်း သောင်းဂဏန်းနှင့်ညီသည်။
သို့သော် သည်တစ်ခါစစ်ဆင်ရေးသည် ရှန်းမျိုးနွယ်စုအကျိုးစီးပွားနှင့်ယှဥ်သော စစ်ဆင်ရေးဖြစ်၍ ရူယန်တစ်ယောက် အဆင့် ၃ အဆောင်လက်နက်ကို အသုံးပြုလိုက်ရသော်လည်း သူမ၏မိသားစုက အချိန်မရွေးပြန်လည်ဖြည့်ဆည်းပေးနိုင်ပါသည်။
“အစ်ကို ဘာဖြစ်သွားသေးလဲ”
ရူယန်က ရှန်းတောက်မင်ကို လှည့်ကြည့်ပြီး စိုးရိမ်တကြီးနှင့် မေးလိုက်သည်။ ကျန်းချန်ရွှမ်နှင့် ရွှီချန်းဟယ်တို့လည်း ရှန်းတောက်မင်ဘေးနား ရောက်လာကြသည်။ ရှန်းတောက်မင်က စစ်မှန်သောအဆီအနှစ်ကို ပြန်လည်ဖြည့်တင်းပေးသော ဆေးပြားကိုသောက်ပြီး မျက်လုံးမှိတ်လျက် အသက်ရှုနှုန်းကို ချိန်ညှိလိုက်ပြီးမှ ပြုံးရယ်ရင်း ခေါင်းခါပြလိုက်သည်။
“ဘာမှမဖြစ်ဘူး အဆီအနှစ်စွမ်းအင်ကို သုံးတာများသွားလို့ပါ၊ အခုပြန်ကောင်းနေပြီ”
ထို့နောက် ရှန်းတောက်မင်က သူတို့၏ရှေ့တွင် ရှိနေသည့် မီးတောင်ကိုစိုက်ကြည့်လိုက်ပြီး
“သွားစို့ မိစ္ဆာတွေကိုရှင်းပြီးပြီဆိုတော့ မီးတောင်ကိုလေ့လာရမဲ့ အချိန်ရောက်ပြီ”
မကြာမီ လေးဦးသား မီးတောင်ရှိရာသို့ ပျံသန်းလာကြပါတော့သည်။ မီးတောင်အနီးသို့ ချဉ်းကပ်မိသည့်အချိန် မီးဒြပ်စင်၏ သိပ်သည်းဆကို ကျန်းချန်ရွှမ်နှင့်အဖွဲ့သားများ ခံစားမိလိုက်ကြသည်။ မီးတောင်ထိပ်ဝမှ အတွင်းအူတိုင်သို့ အနည်းငယ်ဝင်ရောက်ပြီးချိန်၌ သွေးကဲ့သို့စွေးစွေးနီသော ဝိညာဉ်ဂျင်ဆင်းများမှာ ချော်ရည်နှင့်တူသော အရည်တစ်မျိုးပေါ်တွင် မျောလျက်ရှိသည်ကို တွေ့ရသည်။
“ဒါ ချော်ရည်ဂျင်ဆင်းတွေပဲ”
ထိုမြင်ကွင်းကို ရှန်းတောက်မင်နှင့် ရွှီချန်းဟယ်တို့ အံ့သြတကြီးဖြစ်သွားသည်။ ချော်ရည်ဂျင်ဆင်းမှာ အဆင့် ၂ မီးဓာတ်အမျိုးအစား ဝိညာဉ်ဆေးဝါးဖြစ်ပြီး သက်တမ်းအပေါ်မူတည်ပြီး အဆင့်အတန်းနဲ့ အာနိသင် အစားစားရှိသည်။ သူတို့မြင်နေရသော ဂျင်ဆင်းများမှာ နှစ်တစ်ရာသက်တမ်းရှိသော အဆင့်၂ အနိမ့်စားဆေးမြစ်များဖြစ်သည်။ သို့သော် ရှေ့သို့အနည်းငယ် ခရီးဆက်လိုက်ချိန်တွင် နှစ်ပေါင်း ၁၅၀ သက်တမ်းရှိသော အဆင့်၂ အလယ်အလတ် ဂျင်ဆင်းများကို တွေ့ရပါတော့သည်။ မီးတောင်၏ဗဟိုချက်မအနီး ရောက်သည့်အခါ နှစ် ၂၀၀ သက်တမ်းရှိသည့် အဆင့်၂ အမြင့်ဆုံးအဆင့် ဂျင်ဆင်းများကိုပင် တွေ့ရပါသည်။
ထိုမျှမကသေး။ သူတို့ရှေ့မှောက်ရှိ ချော်ရည်အိုင်တစ်ခုအတွင်း၌ ဖြည်းညင်းစွာမျောနေသော အနီရင့်ရောင်သလင်းကျောက်တစ်ခုကို တွေ့လိုက်ရပါတော့သည်။
“ဒါ… ဒါကြီးက ဒြပ်စင်ငါးပါးထဲက မီးဒြပ်စင်ဖြစ်တဲ့ ကြက်သွေးရောင်မီးသလင်းကျောက်ပဲ”
ကျန်းချန်ရွှမ်နှင့်အဖွဲ့သားတို့၏ မျက်လုံးများမှာ အရောင်လက်သွားကြသည်။
ရှန်းတောက်မင်က ရွှီချန်းဟယ်ဖက်ကိုလှည့်ပြီးမေးသည်။
“အကြီးအကဲရွှီ ဒီမီးသလင်းကျောက်က အပြည့်အဝ သိပ်သည်းပြီးထားတဲ့ကျောက်လား”
ရွှီချန်းဟယ်သည် ရှေ့အနည်းငယ်တိုးလိုက်ပြီး နတ်ဘုရားစိတ်အာရုံဖြင့် စစ်ဆေးလိုက်ပြီးနောက် ခေါင်းယမ်းပြလိုက်သည်။
“မသိပ်သည်းရသေးဘူး”
ထို့နောက် ခေတ္တမျှစဉ်းစားလိုက်ပြီးမှ ရွှီချန်းဟယ်က စကားကိုဆက်သည်။
“ဒါပေမဲ့ ကျုပ်လေ့လာမိသလောက် ဒီမီးသလင်းကျောက်က အပြည့်အဝသိပ်သည်းမိဖို့ သိပ်မလိုတော့ပါဘူး၊ အကြမ်းဖျင်းမှန်းရရင် ဆယ်နှစ်ကနေ နှစ်နှစ်ဆယ်အတွင်းတော့ ကြာလိမ့်မယ်၊ အဲဒီအချိန်ရောက်ရင် ခရမ်းပြာဆေးလုံးအကူအညီနဲ့ ဒီမီးသလင်းကျောက်ကိုသုံးပြီး ကျီဖုနယ်ပယ်ကို တက်လှမ်းလို့ရပါပြီ”
ရွှီချန်းဟယ်၏အဖြေကိုကြားပြီး ရှန်းတောက်မင် အနည်းငယ်စိတ်ပျက်သွားသည်။ နတ်ဆိုးသားရဲအဓိကရုဏ်းက ရှိနေသေးသည်မဟုတ်ပါလား။ ရှန်းတောက်မင်သာအဆိုပါကိစ္စမတိုင်ခင် ကြိုတင်ပြီး မီးသလင်းကျောက်အကူအညီဖြင့် ကျီဖုအဆင့်ကို တက်လှမ်းထားနိုင်ခဲ့လျှင် ရှန်းမျိုးနွယ်စုတစ်ခုလုံးကို သူအနေနှင့် လွယ်ကူစွာကာကွယ်နိုင်လိမ့်မည်ဖြစ်သည်။ ယခုတော့ကံမကောင်းစွာနှင့်ပင် နတ်ဆိုးသားရဲအဓိကရုဏ်း ဖြစ်မလာခင် မီးသလင်းကျောက်မှာ အချိန်မီသိပ်သည်းနိုင်ပါ့မလား သူအနေနှင့် မပြောတတ်တော့ပါ။
***
နှစ်တစ်ရာကျင့်ကြံပြီးနောက်
အခန်း ၆၅ ။ ဓမ္မရတနာအလောင်းအလျာကို သန့်စင်ခြင်း
ထို့နောက်တွင် သတ္တုတွင်းအတွင်းရှိ ဝိညာဉ်ရတနာများကို လေးယောက်သား ရှာဖွေသိမ်းဆည်းကြပါတော့သည်။
ရက်အနည်းငယ်ကြာပြီးနောက်.....
ရွှီချန်းဟယ်သည် နောက်ဆုံးသော အစီအရင်အလံကို နေရာချလိုက်သည်။ ကျန်းချန်ရွှမ်၊ ရှန်းရူယန်နှင့် ရှန်းတောက်မင်တို့မှာ မလှမ်းမကမ်းတွင် ရပ်ကြည့်နေကြသည်။ တစ်ခဏချင်းမှာပင် ဝိညာဉ်အလင်းတန်းများ ကွန့်မြူးနေသော ကြက်သွေးရောင်ရွှေသတ္တုတွင်းကြီးသည် သာမန်တောင်ကုန်းတစ်ခုကဲ့သို့ အသွင်ပြောင်းသွားသည်။ ရှန်းတောက်မင်က ရွှီချန်းဟယ်ကို ကျေးဇူးတင်သောအကြည့်နှင့် ကြည့်ရှုရင်း
“အကြီးအကဲရွှီရေ ခင်ဗျားကို ဒီနေရာမှာ စောင့်ခိုင်းထားရတာ အားနာပါတယ်၊ ဘိုးဘေးတွေပြန်ရောက်တာနဲ့ ခင်ဗျားအစား တခြားတစ်ယောက်ကို လွှတ်လိုက်ပါ့မယ်”
အချိန်အတန်ကြာ အချေအတင်ဆွေးနွေးပြီးနောက် ရှန်းတောက်မင်တို့အဖွဲ့သည် အစီအရင်ခင်းကျင်းခြင်းအတတ်တွင် အထူးကျွမ်းကျင်သူ ရွှီချန်းဟယ်ကို သတ္တုတွင်းအား စောင့်ကြည်ရန်တာဝန်ကို ပေးအပ်ဖို့ဆုံးဖြတ်ခဲ့ခြင်းဖြစ်သည်။ ကူယန်မြို့ရှိ ဝိညာဉ်သွေးကြောအတွက်မူ ကျန်းချန်ရွှမ်နှင့်ရှန်းရူယန်တို့ ကျောက်စိမ်းဖြူစျေးကို ပြန်လည်ရောက်ရှိသည့်အချိန်တွင် ရှန်းတောက်ယွမ်ကို ကူယန်သို့စေလွှတ်လိုက်မည်ဖြစ်သည်။
ရွှီချန်းဟယ်က ပြုံးရယ်လျက်
“မစိုးရိမ်ပါနဲ့ ကျုပ်မသေသရွေ့ ဒီသတ္တုတွင်း ဘာမှမဖြစ်စေရဘူး”
ထို့နောက်တွင် ကျန်းချန်ရွှမ်တို့သုံးဦးသည် ရွှီချန်းဟယ်ကို နှုတ်ဆက်ပြီး ကိုယ်စီခရီးကိုထွက်ခွာလာကြတော့သည်။ ကျန်းချန်ရွှမ်နှင့် ရှန်းရူယန်တို့မှာ ကျောက်စိမ်းဖြူစျေးသို့ အလောတကြီးပြန်စရာမလိုသည့်အတွက် ရှန်းတောက်မင်နှင့်အတူ ယွီဟွာတောင်သို့ လိုက်ပါလာခဲ့ကြသည်။ တောင်ပေါ်ရောက်သည့်အခါ ကျန်းချန်ရွှမ်တို့နှစ်ဦးသည် သည်တစ်ခါ စစ်ဆင်ရေးမှရရှိခဲ့သော မိသားစုအကျိုးဆောင်ရမှတ်များကို အသုံးပြုပြီး လိုအပ်သည်များကို လဲလှယ်ကြသည်။
ကျန်းချန်ရွှမ်က အဆင့်၂ မီးဓာတ် မန္တန်အနည်းငယ်၊ အခြေခံတည်ဆောက်ခြင်း အလယ်အဆင့်ကျင့်ကြံမှုကို အထောက်အကူပြုမည့် ဆေးဝါးအချို့နှင့် အဆင့်၂ အဆောင်လက်နက်များကို ဖန်တီးရာတွင် လိုအပ်သောပစ္စည်းအချို့ကို လဲလှယ်လိုက်သည်။ ရှန်းရူယန်ကမူ အဆင့်၃ အဆောင်ပစ္စည်းအချို့အပြင် သူမရရှိထားသော အကျိုးဆောင်အမှတ်များအားလုံးကို လက်နက်သန့်စင်ရာတွင် အသုံးပြုသည့်ပစ္စည်းများနှင့် လဲလှယ်ပစ်လိုက်သည်။ သို့သော် သူမလိုအပ်နေသည့် ပစ္စည်းများမှာ လုံလောက်ဟန်မတူသေး။ ကျန်းချန်ရွှမ်နှင့်အတူ အခြားဂိုဏ်းများ၏စျေးများအထိ သွားရောက်လည်ပတ်ဝယ်ယူခဲ့သော်လည်း ရူယန်လိုအပ်နေသော ပစ္စည်းအရေအတွက်မှာ ပြည့်မီပုံမပေါ်သေးပါ။
ဘေးမှအတူလိုက်ပါနေသော ကျန်းချန်ရွှမ်မှာ ရူယန်တစ်ယောက် မည်သည့်အရာကို သန့်စင်လိုနေ၍ သည်မျှအထိ အပင်ပန်းခံဝယ်ယူနေရသနည်း ဆိုသည်ကို သိချင်စိတ်ပြင်းပြနေပါတော့သည်။ ရှန်းရူယန်ကလည်း ကွယ်ဝှက်ခြင်းမရှိပါ။ သူမသန့်စင်လိုသည့်အရာမှာ အဆင့်၃ ဓမ္မရတနာလောင်းဖြစ်သည်ဟု ဝန်ခံပါသည်။
အနာဂတ်တွင် ရူယန်တစ်ယောက် ကျီဖုနယ်ပယ်ကို တက်လှမ်းနိုင်ခဲ့လျှင် ဤဓမ္မရတနာလောင်းသည် သူမ၏ကိုယ်ပိုင်ရတနာတစ်ပါးဖြစ်လာမည်ဖြစ်သည်။ အားလုံးသိကြသည့်အတိုင်း ကျီဖုနယ်ပယ်ကိုတက်လှမ်းနိုင်သော ကျင့်ကြံသူတစ်ဦးသည် ကိုယ်ပိုင်ရတနာကို သွန်းလုပ်သန့်စင်ခွင့်ရှိပြီး ထိုအချိန်တွင် သူတို့၏လက်နက်များမှာ “ဓမ္မလက်နက်ပစ္စည်း” အဖြစ်မှ “ဓမ္မရတနာ” အဖြစ်သို့ အဆင့်မြင့်သွားမည်ဖြစ်သည်။ ဓမ္မရတနာလောင်းဆိုသည်မှာ ဓမ္မလက်နက်ပစ္စည်းနှင့် ဓမ္မရတနာနှစ်ခုအကြားက ကြားခံအဆင့်ဖြစ်ပြီး ရတနာလောင်း၏စွမ်းအားမှာ ဓမ္မလက်နက်ပစ္စည်းများထက် ပိုမိုသာလွန်ပြီး ဓမ္မရတနာများထက်တော့ နိမ့်ကျပါသည်။
ထို့အပြင် ရတနာလောင်းများတွင် ရတနာအစစ်များကဲ့သို့ လုပ်ဆောင်နိုင်စွမ်းအချို့ရှိပြီး ဥပမာအနေနှင့် ကျင့်ကြံသူတစ်ဦးသည် ရတနာလောင်းကို သူ၏ဒန်တျန်သွေးကြောအတွင်းသို့ စုပ်ယူနိုင်စွမ်းရှိသည်။ အဆိုပါကျင့်ကြံသူသည် ကျီဖုအဆင့်သို့ရောက်ရှိသွားပါက ထိုရတနာလောင်းကို ဓမ္မရတနာအစစ်အဖြစ်သို့ သန့်စင်နိုင်မည်ဖြစ်သည်။ အချုပ်ဆိုရလျှင် လိုအပ်သည့်ရင်းမြစ်ပစ္စည်းများနှင့် ကျင့်ကြံမှုအဆင့်တစ်ခု မရှိဘဲ ဓမ္မရတနာလောင်းကို သန့်စင်ဖို့ လုံးဝမဖြစ်နိုင်ပါ။
ထို့နောက်တွင် ကျန်းချန်ရွှမ်တို့နှစ်ဦးသား ကျောက်စိမ်းဖြူစျေးသို့ ပြန်လည်ရောက်ရှိလာပါတော့သည်။ သူမတို့မရှိသည့်အတောအတွင်း ဖြစ်ပွားခဲ့သည့် အခြင်းအရာများကို မေးမြန်းစုံစမ်းပြီးနောက် ရူယန်သည် သူမ၏ရတနာလောင်းကို သန့်စင်ဖို့အလျင်အမြန် ပြင်ဆင်ပါသည်။ သည်တစ်ခါ ကျန်းချန်ရွှမ်ကိုပါ ဘေးကနေစောင့်ကြည့်ဖို့ ဖိတ်ခေါ်ပါသည်။
အနာဂါတ်တွင် ကျန်းချန်ရွှမ်တစ်ယောက် ကျီဖုအဆင့်သို့ ရောက်ရှိသွားလျှင် သူ၏ကိုယ်ပိုင်ရတနာကို သန့်စင်ရမည်ဖြစ်၍ ရှန်းရူယန်က ရတနာသန့်စင်နည်းကို တစ်ခါတည်းသင်ပြပေးလိုခြင်းဖြစ်သည်။ ကျန်းချန်ရွှမ်အနေနှင့် ရူအယ်တစ်ယောက် လက်နက်သန့်စင်နည်းများကို ကျွမ်းကျင်နေမှန်း မသိထားခဲ့ပါ။ ယခု ရူယန်၏ဝန်ခံချက်အရ သူ့တွေးထင်ချက်အချို့ မှန်ကန်နေပြီဖြစ်ကြောင်း သေချာသွားပါသည်။ မဟုတ်လျှင် အချိန်တိုအတွင်း လူတစ်ယောက်မှာ ဤမျှအထိ ပြောင်းလဲသွားနိုင်စရာ အကြောင်းမရှိပါ။ ကျန်းချန်ရွှမ် တွေးတောနေသည့်အရာကို သိနေသည့်အလား ရှန်းရူယန်က ပြုံးရင်း
“ယောက်ျားရေ ကျွန်မအရင်ကပြောဖူးတယ်မလား၊ အချိန်တန်ရင် ရှင့်ကိုအသိပေးရမဲ့အရာတွေရှိတယ်လို့၊ အခုလောလောဆယ်တော့ ကျွန်မပိုင်ဆိုင်ခဲ့တဲ့ မှတ်ဉာဏ်အချို့ကို မကြာသေးခင်အချိန်က ပြန်ရထားခဲ့တယ်လို့ ရှင်သိထားရင် လုံလောက်ပါပြီ”
ဤစကားကိုကြားလိုက်ရ၍ ကျန်းချန်ရွှမ်၏အတွေးမှန်ကန်သည်မှာ လုံးဝသေချာသွားသည်။ သူ၏တာအိုကျင့်ကြံဖော် ရူယန်သည် သူမ၏ အတိတ်ဘဝတွင် အဆင့်မြင့်ကျင့်ကြံသူတစ်ဦးဖြစ်လိမ့်မည်။ သူမ၏ အတိတ်မှတ်ဉာဏ်များကို လက်ရှိရူယန်က တစ်နည်းနည်းနှင့် ရရှိသွားခြင်းဖြစ်ပေလိမ့်မည်။ သို့သော် သူနားမလည်သည့်အချက်က ရူယန်သာ အတိတ်ဘဝက ကျင့်ကြံမှုအဆင့်မြင့်မားခဲ့သူဖြစ်လျှင် သူ့ကိုသူမ၏တာအိုကျင့်ကြံဖော်အဖြစ် အဘယ်အတွက် လက်ခံခဲ့သနည်း ဆိုသည့်အချက်ပင်ဖြစ်သည်။ ထိုအခါရူယန်က
“အတွေးမလွန်ပါနဲ့ ယောက်ျားရယ် ရှင်နဲ့ကျွန်မက ဘဝတူတွေပါပဲ၊ ဒီရှည်လျားတဲ့ အမတခရီးကို ကျွန်မနဲ့ရှင်ပဲ အတူလက်တွဲပြီး လျှောက်လှမ်းနိုင်မှာလေ”
ကျန်းချန်ရွှမ်တစ်ယောက် ရူယန်၏စကားကြောင့် တုန်လှုပ်သွားမိသည်။ ဘဝတူဆိုသည့်စကားက ဘာကိုဆိုလိုသနည်း။ ရူယန်တစ်ယောက် သူနှင့်ပတ်သက်သည့်တစ်ခုခုကို သိထားသည်များလား။ ရူယန်က တစ်ဖန်ပြုံးလိုက်ရင်း စကားဆက်ပြန်သည်။
“ရှင်နဲ့ကျွန်မက တာအိုကျင့်ကြံဖော်တွေ ဖြစ်နေပြီပဲ၊ တစ်ယောက်နဲ့တစ်ယောက် ရိုးသားစွာဆက်ဆံရမှာမှန်ပေမဲ့ ကိုယ်ပိုင်လျှို့ဝှက်ချက်လေးတွေတော့ ရှိထားသင့်တယ်ထင်တာပဲ၊ လောလောဆယ်အတောအတွင်းပေါ့၊ ရှင်ဘယ်လိုသဘောရလဲ”
ရူယန်သည် ဤစကားကို ကျန်းချန်ရွှမ်၏မျက်လုံးကို နက်ရှိုင်းစွာ စေ့စေ့ကြည့်လျက်ပြောခြင်းဖြစ်သည်။ ကျန်းချန်ရွှမ်၏နှလုံးမှာ အခုန်မြန်လာပြီး အနိုင်နိုင်ပြုံးလျက် ခေါင်းညိတ်ပြလိုက်ရသည်။
“ဒါပေါ့ မိန်းမမှန်ပါတယ်၊ ကိုယ်နားလည်တယ်”
ထို့နောက်တွင် နှစ်ယောက်သား စကားစဖြတ်လိုက်ကြပြီး ဓမ္မရတနာအလောင်း သန့်စင်သည့်ကိစ္စကိုသာ အာရုံစိုက်လိုက်ကြသည်။ ရှန်းရူယန်က
“ဒီတစ်ခါ သန့်စင်မဲ့ရတနာလောင်းက မိုးကြိုးသွား လျှပ်စီးမီးဓား ပဲ၊ ကျွန်မရဲ့ဝိညာဉ်အမြစ်က လျှပ်စီးဓာတ်ဆိုတော့ လျှပ်စီးဓာတ်အခြေခံ ဓမ္မရတနာတွေကို အသုံးပြုတာ အကောင်းဆုံးပဲ၊ ဒါကြောင့် ဒီ “မိုးကြိုးသွား လျှပ်စီးမီးဓား” က လျှပ်စစ်ဓာတ်အခြေခံ ဓမ္မရတနာဖြစ်တယ်၊ ဒါပေမဲ့ လက်နက်ရဲ့သတ်ဖြတ်နိုင်စွမ်းကို မြှင့်ဖို့ မီးဓာတ်အဆီအနှစ်အချို့ ထည့်သွင်းပေါင်းစပ်ထားတယ်”
ပြောရင်းဆိုရင်းနှင့်ပင် ရူယန်က ကျန်းချန်ရွှမ်ကို လက်နက်သန့်စင်နည်းများအကြောင်း အခြေခံမှစ၍ သင်ကြားပေးပါတော့သည်။ ရှန်းရူယန်၏ လက်နက်သန့်စင်ခြင်းနှင့် ပတ်သက်သည့်အသိပညာမှာ အတော်လေးအဆင့်မြင့်မားသည်ဟု ဆိုရမည်ဖြစ်သည်။ လအနည်းငယ်အတွင်း လက်နက်သန့်စင်ခြင်းပညာကို တီးမိခေါက်မိရှိလာရုံမက ရှန်းရူယန််၏ အနီးကပ်ညွှန်ကြားမှုဖြင့် အခြေခံလက်နက်အချို့ကိုပင် သန့်စင်နိုင်နေပြီဖြစ်သည်။ ထိုအခိုက် စနစ်၏အသံက ရုတ်တရက်ထွက်ပေါ်လာပါတော့သည်။
[ဒင်! ဆောင်ရွက်ရန် မစ်ရှင်တစ်ခု ကြေငြာလိုက်သည်၊ စနစ်ပိုင်ရှင်၊ အခြေခံပစ္စည်းများကို သန့်စင်မှု အကြိမ် ၁၀၀ ပြုလုပ်ပါ]
[တာဝန်ပြီးမြောက်မှု : ၆%]
***